1, 2. ¿Chuqui yom mi lac mel chaʼan Jehová miʼ chʼʌm jiñi lac chʼujutesaya?

 ¿CHUQUI miʼ tilel ti a jol cheʼ bʌ maʼ wubin jiñi tʼan chʼujutesaya? Tajol maʼ ñaʼtan juntiquil hermano ñocol bʌ tiʼ tʼejl i wʌyib miʼ melben oración Jehová yicʼot miʼ suben chuqui an tiʼ pusicʼal. O tajol maʼ ñaʼtan jumpʼejl familia tijicña bʌ woli (choncol) i pejcañob jiñi Biblia.

² Ili hermanojob tsaʼ bʌ tajleyob ti tʼan woli (yʌquel) i chʼujutesañob Jehová. ¿Mucʼʌch ba i chʼʌm jiñi woli bʌ i melob (chaʼleñob)? Mucʼʌch, mi cheʼʌch miʼ melob cheʼ bajcheʼ miʼ mulan, miʼ melob yicʼot cʼuxbiya yicʼot cheʼ wen jach miʼ melob. La com lac chʼujutesan Jehová ti wen come mi laj cʼuxbin yicʼot la cujil chaʼan yomʌch mi lac chʼujutesan.

3. ¿Chuqui mi caj laj qʼuel ti ili estudio?

³ Ti ili estudio mi caj laj qʼuel bajcheʼ tsiʼ mulaj Jehová chaʼan miʼ chʼujutesʌntel ti wajali yicʼot mi caj laj qʼuel 8 bajcheʼ yom mi lac chʼujutesan ili ora. Cheʼ bʌ mi laj qʼuel majlel, laʼ lac wen ñaʼtan bajcheʼ miʼ mejlel lac ñumen weñʼesan jiñi lac chʼujutesaya. Mi caj laj qʼuel jaʼel chucoch miʼ yʌqʼueñonla lac tijicñʌyel jiñi i sujm bʌ chʼujutesaya.

4. Cheʼ bʌ maxto tilemic Cristo, ¿bajcheʼ tsiʼ pʌsʌyob jiñi i wiñicob Jehová chaʼan miʼ qʼuelob ti ñuc yicʼot chaʼan miʼ cʼuxbiñob?

⁴ Cheʼ bʌ maxto tilemic Cristo ila ti lum, xucʼul bʌ wiñicob bajcheʼ Abel, Noé, Abrahán yicʼot Job tsiʼ pʌsʌyob chaʼan tsiʼ  qʼueleyob ti ñuc yicʼot chaʼan tsiʼ cʼuxbiyob Jehová. ¿Bajcheʼ? Jiñʌch cheʼ tsiʼ jacʼbeyob i tʼan, tsiʼ pʌsʌyob i ñopoñel tiʼ tojlel yicʼot ti chuqui tac tsiʼ meleyob. Jiñi Biblia maʼañic miʼ yʌl bajcheʼ tac tsiʼ chʼujutesayob. Pero tsiquil chaʼan tsaʼʌch i chaʼleyob wersa chaʼan miʼ yʌqʼueñob i ñuclel, i Jehová weñʌch tsiʼ qʼuele jiñi i chʼujutesayajob. Ti wiʼil, Jehová tsiʼ yʌqʼue jiñi i pʼolbal Abrahán jiñi Mandar tsaʼ bʌ aqʼuenti Moisés. Yaʼi tsiʼ yʌlʌ bajcheʼ yom chaʼan miʼ chʼujutesʌntel.

5. ¿Bajcheʼ tsaʼ qʼuextʌyi jiñi i sujm bʌ chʼujutesaya cheʼ bʌ chaʼ chʼojyemix Jesús?

⁵ Cheʼ bʌ tsaʼix chaʼ chʼojyi Jesús, Jehová maʼañix tsiʼ cʼajtibe jiñi i tejclum chaʼan miʼ jacʼ jiñi Mandar tsaʼ bʌ i yʌqʼue Moisés (Rom. 10:4). Tsiʼ yʌlʌ chaʼan muqʼuix caj i jacʼob jumpʼejl tsijiʼ bʌ mandar, jiñi «i mandar Cristo» (Gál. 6:2). Mach cʼʌñʌlic miʼ cʌyob ti jol i listajlel cabʌl mandar tac o chaʼan chuqui tac mach bʌ yomic miʼ melob, yom jach miʼ tsajcañob jiñi i yejemplo Jesús yicʼot miʼ jacʼob jiñi i cʌntesa tac. Ili ora, jiñi xñoptʼañob miʼ chaʼleñob wersa chaʼan miʼ lajiñob Cristo chaʼan cheʼ bajcheʼ jiñi wen miʼ qʼuejlelob ti Jehová yicʼot miʼ tajob i tijicñʌyel (Mat. 11:29).

6. ¿Bajcheʼ miʼ mejlel i coltañonla ili estudio?

⁶ Cheʼ bʌ maʼ qʼuel majlel bajcheʼ an jiñi a chʼujutesaya, cʼajtiben a bʌ: «¿Bajcheʼ cʼamel an c chaʼle wersa? ¿Muʼ ba c mejlel c ñumen weñʼesan jiñi c chʼujutesaya?». Weñʌch cheʼ tijicñayet chaʼan jiñi melbil bʌ a chaʼan, pero yom maʼ cʼajtiben i coltaya Jehová jaʼel chaʼan maʼ qʼuel chuquito yom maʼ weñʼesan.

7. ¿Bajcheʼ yilal miʼ qʼuel Jehová jiñi oración tac loqʼuem bʌ ti lac pusicʼal?

⁷ Mi lac chʼujutesan Jehová cheʼ bʌ mi lac melben oración. Jiñi Tsʼijbujel mi’ lajin jiñi la coración tac bajcheʼ jiñi pom muʼ bʌ i wen chajpʌntel ti wajali yicʼot miʼ yʌjqʼuel yaʼ ti tabernáculo yicʼot ti templo (Sal. 141:2). Ili pom miʼ locʼsan xojocña bʌ i yujtsʼil muʼ bʌ i mulan Jehová. Cheʼ jaʼel, miʼ tijicñesʌben i pusicʼal Jehová jiñi la coración tac loqʼuem bʌ ti lac pusicʼal, anquese mach jiñic cʌlʌx utsʼatax bʌ tʼan tac mi laj cʼʌn (Pr. 15:8; Dt. 33:10, TNM). Cabʌl chuqui miʼ pʌs chaʼan Jehová miʼ mulan cheʼ mi lac pʌs chaʼan mi laj cʼuxbin yicʼot chaʼan mi la cʌqʼuen wocolix i yʌlʌ. Yom chaʼan mi lac suben jiñi la com bʌ, chuqui mi lac pensarin yicʼot jiñi muʼ bʌ lac pijtan. Jin chaʼan, ¿ixcu cheʼ muqʼuic lac ñaxan wen ñaʼtan chuqui mi caj lac suben ti oración? Chaʼan cheʼ jiñi, mi la cʌqʼuen Jehová jiñi lajal bʌ bajcheʼ ñumen wem bʌ «pom».

8. ¿Bajcheʼ miʼ mejlel la cʌqʼuen i ñuclel Jehová?

⁸ Mi lac chʼujutesan Jehová cheʼ bʌ mi la cʌqʼuen i ñuclel (Sal. 34:1). ¿I bajcheʼ mi la cʌqʼuen i ñuclel? Jiñʌch cheʼ mi la cʌcʼ ti cʌñol jiñi melbil tac bʌ i chaʼan yicʼot jiñi utsʼatax bʌ melbal (chaʼlibal) tac am bʌ i chaʼan. Mi la cʌqʼuen i ñuclel Jehová cheʼ bʌ mi laj qʼuel ti ñuc jiñi am bʌ i mele. Mi mucʼʌch la cʌqʼuen i yorajlel chaʼan mi lac wen ñaʼtan bajcheʼ Jehová an i pʌsʌ i yutslel, ti jiñi wen tac bʌ am bʌ i mele ti lac tojlel, tiʼ pejtelel ora mi caj lac mulan la cʌqʼuen i ñuclel. Cheʼ bʌ mi lac chaʼlen subtʼan mi la cʌqʼuen i ñuclel Dios, «ili lajalʌch bajcheʼ jumpʼejl majtañʌl muʼ bʌ la cʌqʼuen» (Heb. 13:15). Cheʼ bajcheʼ mi lac wen ñaʼtan chuqui mi caj lac suben Jehová ti oración, yomʌch mi lac wen ñaʼtan jaʼel chuqui mi caj lac suben jiñi lac piʼʌlob cheʼ bʌ mi lac majlel ti subtʼan. La com chaʼan ñumen wen bajcheʼ mi la cʌqʼuen i ñuclel Jehová. Cheʼ bʌ mi lac suben wen tʼan jiñi yambʌlob, yomʌch loqʼuem ti lac pusicʼal.

9. ¿Bajcheʼ miʼ coltan i tejclum Jehová jiñi tempa bʌ tac, i bajcheʼ an i coltayet?

 ⁹ Mi lac chʼujutesan Jehová cheʼ bʌ mi la cajñel ti tempa bʌ. Jiñi israelitajob ti wajali tsaʼ subentiyob: «Uxyajl ti jujumpʼejl jab mi caj i majlelob winicob yicʼot chʼiton bʌ laʼ walobilob yaʼ ti ajñibʌl yajcʌbil bʌ i chaʼan lac Yum Dios» (Dt. 16:16). Yom miʼ cʌyob i yotot yicʼot jiñi i lumob. Pero Jehová tiʼ subeyob: «Maʼanic majch mi caj i chilbeñetla cheʼ uxyajl mi caj laʼ cʼotel ti cotot. Joñon laʼ Yumon laʼ Dioson» (Éx. 34:24). Jiñi israelitajob ti jumpʼejlob i pusicʼal miʼ ñopob ti Jehová cheʼ bʌ miʼ majlelob ti jiñi qʼuiñijel tac ti jujumpʼejl jab. Cheʼ bajcheʼ jiñi, miʼ ñumen chʼʌmbeñob i sujm jiñi i Mandar Dios, miʼ wen ñaʼtañob chaʼan bʌ jiñi i yutslel yicʼot miʼ yajñelob yicʼotob yambʌ i wiñicob Jehová (Dt. 16:15). Joñonla jaʼel mi lac taj lac wenlel cheʼ bʌ mi lac chaʼlen wersa chaʼan mi lac majlel ti jiñi tempa bʌ tac. I Jehová wen tijicña miʼ yubin cheʼ bʌ miʼ qʼuel chaʼan mi lac wen chajpan lac bʌ chaʼan mi la cʌcʼ wem bʌ laj comentario.

10. ¿Chucoch ñuc i cʼʌjñibal mi laj cʼʌyin Jehová ti jiñi lac chʼujutesaya?

¹⁰ Mi lac chʼujutesan Jehová cheʼ bʌ mi laj cʼʌyin la quicʼot la quermañujob (Sal. 28:7). Jiñi israelitajob wen ñuc i cʼʌjñibal tsiʼ qʼueleyob tiʼ chʼujutesaya cheʼ bʌ miʼ chaʼleñob cʼay. Jumpʼejl ejemplo, jiñi rey David tsiʼ yajca 288 levitajob chaʼan miʼ chaʼleñob cʼay yaʼ ti templo (1 Cr. 25:1, 6-8). Ili ora jaʼel, miʼ mejlel laj cʼʌyin Jehová chaʼan mi lac pʌsben jiñi laj cʼuxbiya. Mach jiñic wen ñuc i cʼʌjñibal mi la cujil cʼay o mi mach la cujilic. Ñaʼtancu iliyi: Cheʼ bʌ mi lac chaʼlen tʼan «ti lac pejtelel mi lac wen taj lac sajtemal», pero iliyi mach yomic i yʌl chaʼan mi laj cʌy tʼan ti jiñi congregación yicʼot ti subtʼan (Sant. 3:2). Cheʼ jaʼel, mach yomic mi laj cʌy laj cʼʌyin Jehová chaʼan jach mach la cujilic cʼay.

11. Cheʼ bajcheʼ miʼ yʌl Salmo 48:13, ¿chucoch yom mi la cʌqʼuen i yorajlel chaʼan mi lac chaʼlen estudio bajcheʼ familia?

¹¹ Mi lac chʼujutesan Jehová cheʼ bʌ mi lac wen qʼuelben i Tʼan yicʼot mi lac suben la calobilob tiʼ tojlel. Ti jujumpʼejl sábado, jiñi israelitajob yom miʼ cʌyob i yeʼtel (troñel) yicʼot miʼ pʼʌtʼesañob bajcheʼ añob yicʼot Jehová (Éx. 31:16, 17). Miʼ pʌsbeñob i yalobilob chaʼan bʌ Jehová yicʼot jiñi i yutslel. Cheʼ joñonla jaʼel, yom mi la cʌqʼuen i yorajlel chaʼan mi lac pejcan yicʼot mi lac chaʼlen ti estudiar jiñi i Tʼan Dios. Ili ochem ti jiñi lac chʼujutesaya ti Jehová i miʼ coltañonla chaʼan mi lac ñumen lʌcʼtesan lac bʌ tiʼ tojlel (Sal. 73:28). Cheʼ jaʼel, cheʼ bʌ mi lac chaʼlen estudio bajcheʼ familia mi laj coltan jiñi la calobilob chaʼan miʼ wen lʌcʼtesañob i bʌ tiʼ tojlel Jehová (pejcan Salmo 48:13).

12. ¿Bajcheʼ yilal tsiʼ qʼuele Jehová i yeʼtel jiñi tsaʼ bʌ i meleyob jiñi an tac bʌ ti tabernáculo, i chuqui miʼ pʌsbeñonla jiñi?

¹² Mi lac chʼujutesan Jehová cheʼ bʌ mi lac mel (pʌt) baqui miʼ chʼujutesʌntel yicʼot mi laj cʌntan. Jiñi Biblia miʼ yʌl chaʼan jumpʼejlʌch chʼujul bʌ eʼtel cheʼ bʌ tsaʼ mejli jiñi tabernáculo yicʼot jiñi an tac bʌ yaʼi (Éx. 36:1, 4, TNM). Ili ora jaʼel, Jehová miʼ qʼuel bajcheʼ chʼujul bʌ eʼtel cheʼ miʼ mejlel i Yotlel tac tempa bʌ yicʼot yan tac bʌ. An hermanojob muʼ bʌ i wen chaʼleñob coltaya ti ili eʼtel. Mucʼʌch lac wen qʼuel ti ñuc jiñi coltaya muʼ bʌ i yʌcʼob chaʼan jiñi eʼtel chaʼan bʌ i Yumʌntel Dios. Pero mucʼʌch i yʌqʼueñob i yorajlel jaʼel chaʼan miʼ chaʼleñob subtʼan. Tajol an yomoʼ bʌ sujtel ti precursor. Jiñi ancianojob miʼ pʌsob chaʼan mucʼʌch i coltañob jiñi construcción cheʼ bʌ miʼ yʌcʼob chaʼan ili hermanojob miʼ yochelob bajcheʼ precursor mi mucʼʌch i tsʼʌctesañob jiñi muʼ bʌ i cʼajtintel. Ti lac pejtelel mi lac mejlel ti coltaya tiʼ  sʌqʼuesʌntel yicʼot tiʼ cʌntʌntel jiñi i yotlel tac chʼujutesaya, mach yʌlʌyic mi la cujil chaʼan bʌ construcción o mach la cujilic.

13. ¿Bajcheʼ yilal yom mi laj qʼuel jiñi donación tac muʼ bʌ la cʌcʼ chaʼan jiñi eʼtel muʼ bʌ i mejlel tiʼ pejtelel Pañimil?

¹³ Mi lac chʼujutesan Jehová cheʼ bʌ mi la cʌcʼ lac donación. Jiñi israelitajob mach yomic toʼol jocholob i cʼʌb miʼ cʼotelob baʼan Jehová (Dt. 16:16). Yomʌch miʼ chʼʌmob majlel majtañʌl mejl bʌ i yʌcʼob. Cheʼ bajcheʼ jiñi miʼ pʌsob chaʼan mucʼʌch i qʼuelob ti ñuc pejtelel muʼ bʌ i mel Jehová tiʼ tojlelob. ¿I bajcheʼ miʼ mejlel lac pʌsben Jehová chaʼan mi laj cʼuxbin yicʼot mi laj qʼuel ti ñuc jiñi bendición tac muʼ bʌ i yʌqʼueñonla? Junchajp jiñʌch cheʼ mi la cʌcʼ lac donación yaʼ ti laj congregación yicʼot chaʼan jiñi eʼtel muʼ bʌ i mejlel tiʼ pejtelel Pañimil cheʼ bajcheʼ mi lac mejlel. Jiñi apóstol Pablo tsiʼ yʌlʌ bajcheʼ iliyi: «Mi juntiquil yom coltaya, utsʼatax miʼ qʼuejlel chuqui miʼ yʌcʼ, cheʼ jiñʌch miʼ yʌcʼ chuqui an i chaʼan i mach jiñic maʼañic bʌ i chaʼan» (2 Cor. 8:4, 12). Jehová miʼ qʼuel ti ñuc jiñi donación tac muʼ bʌ la cʌcʼ tiʼ pejtelel lac pusicʼal, anquese tsʼitaʼ jach (Mar. 12:42-44; 2 Cor. 9:7).

14. Cheʼ bajcheʼ miʼ yʌl Proverbios 19:17, ¿bajcheʼ yilal miʼ qʼuel Jehová cheʼ bʌ mi laj coltan jiñi la quermañujob i cʼʌjñibal bʌ i chaʼañob?

¹⁴ Mi lac chʼujutesan Jehová cheʼ bʌ mi laj coltan jiñi la quermañujob am bʌ chuqui i cʼʌjñibal i chaʼañob. Jehová tsiʼ yʌlʌ chaʼan mi caj i yʌqʼuen bendición jiñi israelitajob muʼ bʌ i coltañob jiñi pʼumpʼuñoʼ bʌ (Dt. 15:7, 10). Cheʼ bʌ mi laj coltan juntiquil hermano am bʌ chuqui i cʼʌjñibal i chaʼan, lajal bajcheʼ woli la cʌqʼuen i majtan Jehová (pejcan Proverbios 19:17). Jumpʼejl ejemplo, jiñi xñoptʼañob ti Filipos tsiʼ chocbeyob majlel jumpʼejl majtañʌl jiñi Pablo cheʼ bʌ ñupʼul, i Pablo tsiʼ yʌlʌ chaʼan ili majtañʌl jiñʌch muʼ bʌ i mulan Dios (Filip. 4:18). Laʼcu lac ñaʼtan jiñi la quermañujob ti laj congregación i laʼ laj cʼajtiben lac bʌ: «¿Am ba majqui miʼ mejlel j coltan?». Jehová miʼ mulan cheʼ bʌ miʼ qʼuel chaʼan mi laj cʼʌn jiñi lac tiempo, lac pʼʌtʌlel, chuqui la cujil yicʼot jiñi am bʌ lac chaʼan chaʼan mi laj coltan jiñi i cʼʌjñibal bʌ i chaʼañob. Miʼ qʼuel chaʼan jiñʌch junchajp ochem bʌ ti lac chʼujutesaya (Sant. 1:27).

15. ¿Chucoch mach wocolic mi la cubin chaʼan mi laj cʼʌn jiñi lac tiempo yicʼot lac pʼʌtʌlel chaʼan mi lac chʼujutesan Jehová?

¹⁵ Yomʌch mi la cʌqʼuen i yorajlel yicʼot mi lac chaʼlen wersa chaʼan mi lac chʼujutesan Jehová cheʼ bajcheʼ miʼ mulan. Pero mach wocolic jiñi (1 Juan 5:3). ¿Chucoch? Come mi laj cʼuxbin. Laʼcu lac ñaʼtan juntiquil alʌ chʼiton yom bʌ i yʌqʼuen i majtan i papá. Tajol wen jal miʼ mel jumpʼejl dibujo pero mach wocolic miʼ yubin come miʼ cʼuxbin jiñi i papá i tijicña cheʼ bʌ miʼ yʌcʼ jiñi majtan. Cheʼ jaʼel, tijicña mi la cubin cheʼ mi laj cʼʌn jiñi lac tiempo yicʼot lac pʼʌtʌlel chaʼan mi lac chʼujutesan Jehová come mi laj cʼuxbin.

16. Cheʼ bajcheʼ miʼ yʌl Hebreos 6:10, ¿bajcheʼ yilal miʼ qʼuel Jehová cheʼ bʌ maʼ chaʼlen wersa chaʼan maʼ tijicñesan?

¹⁶ Jiñi tatʌlob muʼ bʌ i cʼuxbiñob i yalobilob maʼañic miʼ pijtañob chaʼan junlajal jiñi majtañʌl muʼ bʌ i yʌcʼob. Yujilob chaʼan mach lajalobic yicʼot chaʼan qʼuexel bajcheʼ añob. Cheʼ jaʼel, jiñi lac Tat am bʌ ti panchan miʼ chʼʌmben i sujm bajcheʼ yilal añonla ti jujuntiquil. Tajol jatet maʼ mejlel a mel maʼañic bʌ miʼ mejlel i mel jiñi a wamigojob. O tajol mach cabʌlic chuqui miʼ mejlel a mel bajcheʼ jiñi yañoʼ bʌ tiʼ caj jiñi a jabilel, a cʼamʌjel o chaʼan an chuqui yom maʼ qʼuel ti a familia. Pero mach a wubin a chʼijyemlel (Gál. 6:4). Jehová maʼañic mi caj i ñajʌyel i chaʼan jiñi muʼ bʌ a mel. Tijicña  mi caj i yubin mi mucʼʌch a wʌqʼuen chuqui wem bʌ ti a tojlel i mi yicʼotʌch a cʼuxbiya maʼ mel (pejcan Hebreos 6:10). Jehová miʼ qʼuel chuqui yom a pusicʼal. Yom chaʼan tijicñayet chaʼan jiñi chʼujutesaya muʼ bʌ i mejlel a wʌqʼuen.

17. a) ¿Chuqui miʼ mejlel lac mel mi an junchajp wocol bʌ mi la cubin ti jiñi lac chʼujutesaya? b) ¿Am ba i coltayet junchajp muʼ bʌ i tilel ti jiñi recuadro « Miʼ mejlel lac ñumen ubin lac tijicñʌyel»?

¹⁷ ¿Ixcu mi an junchajp wocol bʌ mi la cubin chaʼan mi lac mel ti jiñi lac chʼujutesaya, bajcheʼ jiñi estudio ti lac bajñelil o jiñi subtʼan? Tajol mi caj laj qʼuel chaʼan mi lac ñumen taj lac wenlel yicʼot mi lac ñumen ñusan lac bʌ cheʼ bʌ mi lac ñumen aqʼuen i yorajlel. Miʼ mejlel lac lajin jiñi lac chʼujutesaya bajcheʼ i melol ejercicio o cheʼ bʌ mi lac ñijcan jumpʼejl eʼtijib chaʼan bʌ música. Mi bixetic jach mi lac mel, maʼañic mi caj lac wen qʼuelben i wenlel. Pero mucʼʌch caj laj qʼuelben i wenlel mi ti jujumpʼejlʌch qʼuin mi lac mel anquese ti ñaxan maxto wen jalic, i ti wiʼil ñumen jalix mi lac mel. Ti wiʼil muqʼuix caj lac mulan chaʼan miʼ cʼotel i yorajlel chaʼan mi lac mel i muqʼuix caj lac ñusan lac bʌ. ¿Ixcu mi cheʼ mi lac mel jaʼel ti jiñi lac chʼujutesaya ti Jehová?

18. ¿Bajcheʼ mi lac tsʼʌctesan jiñi ñaʼtʌbil bʌ i chaʼan Jehová cheʼ bʌ tsiʼ meleyonla, i chuqui mi lac taj?

¹⁸ Cheʼ bʌ mi lac chʼujutesan Jehová tiʼ pejtelel lac pusicʼal, mi lac tsʼʌctesan jiñi ñaʼtʌbil bʌ i chaʼan cheʼ bʌ tsiʼ meleyonla. Ili miʼ coltañonla chaʼan tijicñayonla, mi lac tajben i sujmlel jiñi laj cuxtʌlel yicʼot mi laj cʌn chaʼan mi caj i mejlel lac chʼujutesan tiʼ pejtelel ora (Pr. 10:22). Añix lac ñʌchʼtʌlel ili ora come la cujil chaʼan Jehová miʼ coltañonla cheʼ bʌ an lac wocol (Is. 41:9, 10). Cabʌl chuqui miʼ yʌqʼueñonla lac tijicñʌyel cheʼ bʌ mi lac chʼujutesan jiñi lac Tat, yom bʌ miʼ yʌqʼuentel i ñuclel (Apoc. 4:11).