1-2. Nemene la nyine tro sa kuca matre troa kapa la hmi së hnei Iehova?

 NEMENE la hne së hna canga mekun göne la hna hape, “hmi”? Maine jë, easa mekun la ketre trejin ka sa iwatingöneca matre troa fe la hni angeic ngöne la thith. Maine pena, easa mekun la ketre fami ka ce ini Tusi Hmitrötr.

² Ame ngöne la lue ceitune cili, angatr asë hi a hmi me atrunyi Iehova. Ngo hapeu, Nyidrëti kö a kapa la hmi angatr? Maine tro angatr a atrunyi Iehova thenge la aja i Nyidrë, nge cememine la ihnim me metrötr, tro hë Nyidrëti a kapa la hmi angatr. Eje hi, tru la ihnimi së koi Iehova, matre easa ajane troa atrunyi Nyidrë me hamën la ka sisitria koi Nyidrë.

3. Nemene la hne së hna troa ce wang ngöne la tane mekun celë?

³ Ame ngöne la tane mekun celë, tro sa ce wang la hmi hna kapa ekö hnei Iehova, memine la 8 lao aqane tro sa atrunyi Nyidrë enehila. Loi e tro sa isa lapa mekun la nyine troa kuca matre troa atrunyi Iehova thenge la aja i Nyidrë. Tro fe sa ce wang la kepin matre, easa madrin ngöne la easa atrunyi Iehova.

4. Tune kaa la aqane amamane ekö la itre hlue i Iehova la ihnim me metrötre i angatr koi Nyidrë?

⁴ Ame ekö, hnene la itre hlue i Iehova tui Abela me Noa me Aberahama me Iobu hna amamane la ihnim  me metrötre i angatr koi Iehova. Tune kaa? Hnei angatre hna idrengethenge me lapaun me tro fë la itre huuje koi Iehova. Eje hi, tha hnei Tusi Hmitrötr kö hna hamëne la itre ithuemacany, göne la aqane tro angatr a atrunyi Iehova. Ngo hnei angatre pe hna kuca la hnei angatr hna atrein matre atrunyi Iehova, nge hnei Nyidrëti hna kapa la hmi angatr. Thupene lai, hnei Iehova hna hamën la Wathebo i Mose kowe la itre matra i Aberahama. Ame ngöne la Wathebo cili, kola qaja la aqane tro angatr a atrunyi Iehova thenge la aja i Nyidrë.

5. Nemene la ka saze ngöne la nyipi hmi, thupene la kola amele Iesu hmaca qa hna mec?

⁵ Thupene la kola amele Iesu hmaca qa hna mec, tha hnei Iehova kö hna musinëne la itre hlue i Nyidrë troa drengethenge la Wathebo i Mose. (Rom. 10:4) Ngo loi e tro pe la itre Keresiano a trongëne la wathebo ka hnyipixe, ene la “wathebo i Keriso.” (Gal. 6:2) Eje hi, tha nyipiewekë hmaca kö tro angatr a hnehen maine trongëne pena la itre wathebo hna amë xötren. Ngo loi e tro pe angatr a nyitipu Iesu me drengethenge la itre ini qaathei nyidrë. Ketre tu së fe enehila, easa kuca la hne së hna atrein matre xötrethenge la tulu i Iesu me amadrinë Iehova me “catr.”​—Mat. 11:29.

6. Nemene la aqane tro epuni a kepe eloin qa ngöne la tane mekun celë?

⁶ Ame la easa troa ce wang la itre igötranene la hmi së, loi e tro sa isa hnying ka hape, ‘Eni kö a kuca la itre ewekë cili?’ Eni palahi a kuca la hnenge hna atrein matre troa atrunyi Iehova thenge la aja i Nyidrë?’ Eje hi, loi e tro sa madrin la itre trengecatre hne së hna kuca ha. Nge loi e tro fe sa sipo ixatua koi Iehova matre atre la itre xaa nyine troa kuca, matre atrunyi Nyidrë thenge la aja i Nyidrë.

7. Tune kaa la aqane goeëne Iehova la itre thithi së?

⁷ Troa thith. Tusi Hmitrötr a aceitunëne la itre thithi së memine la sinöe ka pui loi hna dreuth hune la ita ne huuj me ngöne la uma ne hmi. (Sal. 141:2) Iehova a madrine la kola dreuthe la itre sinöe ka pui loi. Ketre tune fe, Iehova a madrine la itre thithi së, ngacama easa qaja la itre hnaewekë ka hmaloi troa trotrohnin. (Ite edomë 15:8; Deu. 33:10) Aja i Iehova tro sa qaja la ihnimi së me hni ne ole së koi Nyidrë ngöne la thith. Nyidrëti fe a ajane tro sa qaja la itre jol hne së hna cile kow me itre aja ne la hni së. Qëmekene tro sa thith, loi e tro sa pane mekun la nyine tro sa qaja. E cili, tro ha “pui loi” la itre thithi së koi Iehova.

8. Eu la itre ijin easa atrunyi Iehova?

⁸ Troa ole me atrunyi Iehova. (Sal. 34:1) Easa atrunyi Iehova ngöne la easa qaja koi itre xan la itre thiina i Nyidrë me itre hnei Nyidrëti hna kuca. Ngo tro sa kuca lai, e hetre hni ne ole së koi Iehova. Celë hi matre, loi e tro sa lapa mekun la ihnimi Nyidrë me itre hnei Nyidrëti hna kuca koi së. Jëne la huliwa ne cainöj, ijije hi tro sa tro fë koi Akötresie la itre “huuj ne iatruny, ene la wene ne la itre ineqë së.” (Heb. 13:15) Tune la easa thith, nyipiewekë tro sa pane lapa mekun la itre nyine tro sa qaja kowe la itre atr hne së hna cainöje kow. Easa ajane troa hamëne la ka sisitria ngöne la easa tro fë “la itre huuj ne iatruny.” Celë  hi matre, easa madrin troa qaja koi itre xan la itre ini qaathei Iehova.

9. Tune la angetre Isaraela ekö, nemene la itre eloin e troa sine la itre icasikeu? Qaja jë la hnei epuni hna melën.

⁹ Troa sine la itre icasikeu. Hnei Iehova hna qaja kowe la angetre Isaraela ekö ka hape: “Tro ha a köni a mama ngöne la macate la nöjei trahmany asë xajawa i Iehova Akötesi ’ö ngöne la hnë tro nyidëti a iën.” (Deu. 16:16) Ame ngöne la itre ijine cili, angatr a tro me nue la itre hnalapa me itre hlapa i angatr. Celë hi matre, öni Iehova: “Tha tro kö kete ate a meciune la nöje i ’ö, e tro eö a mama xajawa i Iehova Akötesi ’ö.” (Eso. 34:24) Hnene la angetre Isaraela hna lapaune koi Iehova me sine la itre feet e nöjei macatre. Nge nyimutre la itre manathithi hnei angatr hna kapa. Angatr a trotrohnine hnyawa la wathebo i Akötresie, me lapa mekun la ihnimi Nyidrë, me ithuecatrekeu memine la itre xaa hlue i Nyidrë. (Deu. 16:15) Ketre tu së fe, easa kepe eloin qa ngöne la hne së hna catre sine la itre icasikeu. Nge the qaja palaha la madrine i Iehova ngöne la easa hnëkëne la itre mekun nyine troa hamën!

10. Pine nemene matre ka nyipiewekë troa nyima ngöne la easa atrunyi Iehova?

¹⁰ Troa nyima. (Sal. 28:7) Ame kowe la angetre Isaraela ekö, ketre igötranene la hmi angatr la troa nyima. Hnei Dravita joxu hna upe la 288 lao atre Levi matre troa nyima ngöne la uma ne hmi Iehova. (1 A. l. ite jo. 25:1, 6-8) Ketre tu së fe enehila, easa amamane la ihnimi së koi Iehova ngöne la easa thing la itre nyima nyine atrunyi Nyidrë. Nge tha ka nyipiewekë kö troa atreine nyima. Ame la easa ithanata, “ka tria palahi së,” ngo tha kolo kö lai a sewe së troa ithanata ngöne la ekalesia me ngöne la hna cainöj. (Iako. 3:2) Celë hi matre, ngacama ka tria la nine së, ngo loi e tro sa nyima matre atrunyi Iehova.

11. Thenge la Salamo 48:13, pine nemene matre tro sa xomi ijine thatraqane la Hmi Ne La Fami?

¹¹ Troa ini Tusi Hmitrötr me inine la itre nekönatr. Ame ekö ngöne la drai sabath, angetre Isaraela a amë la itre huliwa i angatr, matre troa acatrene la aqane imelekeu i angatr me Iehova. (Eso. 31:16, 17) Angatr e cili a inine la itre nekö i angatr la pengöi Nyidrë me ihnimi Nyidrë. Ketre tu së fe enehila, loi e tro sa xomi ijin matre troa e me inine la Tusi Hmitrötr. Celë hi ketre igötranene la hmi së koi Iehova, nge ka xatua së troa easenyi koi Nyidrë. (Sal. 73:28) Nge ame la easa kuca la Hmi Ne La Fami, easa xatuane la itre nekö së troa acatrene la aqane imelekeu i angatr me Iehova.​—E jë la Salamo 48:13.

12. Nemene la ini hne së hna xom qa ngöne la aqane goeëne Iehova la huliwa ne la itre ka xupe la uma ne hmi?

¹² Troa xup me nyidrawane la itre uma ne hmi së. Öni Tusi Hmitrötr ka hape, ketre huliwa ka “hmitrötr” la kola acile la uma mano me kuca la itre aliene ej. (Eso. 36:1, 4) Ketre tune enehila, ketre huliwa ka hmitrötr koi Iehova la troa xupe la itre Uma Ne Baselaia me itre xaa uma thatraqane la hmi ka wië. Ame la itre xaa trejin, angatr a nue la traeme i angatr troa hane sine la huliwa cili. Hapeu, hetre hni ne ole së kö koi angatr? Angatre fe a catre cainöj me ajane troa xome la huliwa ne pionie. Tro la itre qatre thup a amamane la hni ne ole i angatr, ngöne la angatr a aijijëne la itre  trejin cili troa hane pionie. Ngacama tha ijije kö tro sa hane sine la huliwa ne xupi Uma Ne Baselaia, ngo easa atrunyi Iehova ngöne la easa nyidrawane la itre hnë hmi së.

13. Tune kaa la aqane tro sa goeëne la itre ahnahna hna kuiëne thatraqane la huliwa ne cainöj?

¹³ Troa kuië ahnahna thatraqane la huliwa ne cainöj. Ame lo angetre Isaraela a sine la itre feet e nöjei macatre ke, hetre ahnahna palahi hnei angatr hna traqa fë. (Deu. 16:16) Angatre hi lai a amamane la hni ne ole i angatr kowe la itre hna acil hnei Iehova. Tune kaa la aqane tro sa amamane la ihnimi së me hni ne ole së koi Iehova, göne la itre ewekë hnei Nyidrë hna hamën? Maine ijij, loi e tro sa kuië ahnahna kowe la ekalesia me kowe la huliwa ne cainöj e cailo fen. Öni Paulo aposetolo: “Maine nyipici laka, hna canga ajan, ngo tro ha kapa hnyawa e hna hamën thenge la hna hetreny, ngo tha thenge kö la pë.” (2 Kor. 8:4, 12) Eje hi, Iehova a wangatrune la nöjei ahnahna hne së hna kuiën ngacama tha ka tru kö.​—Mar. 12:42-44; 2 Kor. 9:7.

14. Thenge la Ite Edomë 19:17, tune kaa la aqane goeëne Iehova la ixatua hne së hna hamën kowe la ketre trejin?

¹⁴ Troa xatuane la ketre trejin. Öni Iehova kowe la angetre Isaraela ekö ka hape, tro kö Nyidrëti a amanathithine la itre ka hnime la itre ka pë ewekë. (Deu. 15:7, 10) Ame koi Iehova, ketre ahnahna koi Nyidrë la easa xatuane la ketre trejin. (E jë la Ite Edomë 19:17.) Ame la itre Keresiano ne Filipi a iupi fë ahnahna koi Paulo ngöne la kalabus, öni nyidrë ka hape, ketre “huuj ka amadrinë Akötresie.” (Fil. 4:18) Ketre tune fe, loi e tro sa isa hnying ka hape: ‘Hetre trejine kö e hnine la ekalesia ka aja ixatua?’ Iehova a madrin ngöne la easa nue la traeme së me trengecatr me itre hne së hna atrein me itre mo së, matre troa xatuane la itre trejin. Aqane tro hi së lai a atrunyi Iehova.​—Iako. 1:27.

15. Pine nemene matre tha ketre ehnefe kö la troa nue traem me trengecatr thatraqane la nyipi hmi?

¹⁵ Nyipiewekë tro sa nue la traeme së me trengecatr matre troa atrunyi Iehova. Ngo tha ketre ehnefe kö lai koi së. (1 Ioane 5:3) Pine nemen? Pine laka, tru la ihnimi së koi Iehova. Pane mekune jë la ketre nekönatr ka ajan troa nyi ahnahna kowe la keme i nyën. Itre hawa ne nyën a pane desë. Ame koi nyën, tha nyëne kö a aluzi traem. Tru la ihnimi nyën kowe la kem, matre nyën a madrine troa kuca la ahnahna. Ketre tu së fe, hnene la ihnimi së koi Iehova, matre easa madrin troa nue la traeme së me trengecatr matre troa sajuëne la nyipi hmi.

16. Thenge la Heberu 6:10, tune kaa la aqane goeëne Iehova la itre trengecatr hne së hna nue koi Nyidrë?

¹⁶ Atre hi la kem me thin laka, tha ka ceitu kö la itre ahnahna hna troa hamën hnene la itre nekönatr. Eje hi, isapengöne kö angatr nge hetre hnei angatr hna isa atreine kuca. Ketre tune fe, atre hi Iehova laka, hetre hne së hna isa atreine kuca. Maine jë, tru kö la hnei epuni hna kuca hune la itre sinee i epun. Maine pena, thatreine kö epuni huliwa catr ke, epuni a uti ipië trootro me wezipo, maine pena hetre hnëqa i epun ngöne la fami. Ngo tha tro pi kö a kucakuca. (Gal.  6:4) Tha tro kö Iehova a thëthëhmine la itre huliwa i epun. Maine tro epuni a hamën la hnei epuni hna atrein, cememine la ihnim, tro hë Nyidrëti a madrin. (E jë la Heberu 6:10.) Öhne hi Iehova la itre hnei epuni hna pi kuca koi Nyidrë. Ngo Nyidrëti a ajane tro epuni a madrine la hnei epuni hna kuca enehila, matre troa atrunyi Nyidrë.

17. (a) Nemene la nyine tro sa kuca e jole koi së troa eatrën la ketre huliwa i Iehova? (b) Tune kaa la aqane xatua epun hnene la hna eköhagen hna hape, “ Itre Huliwa Ka Hamë Madrine Së”?

¹⁷ Nemene la nyine tro sa kuca e jole koi së troa ini tusi caas me cainöje trootro? Maine tro sa catre kuca la itre huliwa cili, tro hë sa wangatrune itre ej me kepe thangane qa ngön. Ceitune hi lai memine la easa inine troa lepe gitar. Maine tha xomi ijine kö së troa inin ke, tha tro kö së lai a maca. Ame la xötrei, loi e tro sa iëne la ketre hnepe ijin e nöjei drai, matre troa inine troa lepe gitar. E nango atreine hë së lepe gitar, tro hë sa pi elo gitar. Tune kaa pena kowe la itre huliwa i Akötresie?

18. Nemene la ewekë ka sisitria ngöne la mele së, nge nemene la thangane lai?

¹⁸ Ame la ewekë ka sisitria ngöne la mele së ke, troa atrunyi Iehova hnene la hni së ka pexej. Nemene la thangane lai? Easa mele madrin, nge easa mejiune troa atrunyi Nyidrë uti hë epine palua. (Ite edomë 10:22) Ketre, tingetinge la mele së ke atre hi së laka, Iehova a xatuane la itre hlue i Nyidrë ka cile kowe la itre jol. (Is. 41:9, 10) Celë hi kepin matre easa madrine troa atrunyi Iehova Keme së ka tru ihnimin, nge ka “ijije troa kapa la lolo me iatrunyi” qa ngöne la nöjei ewekë asë hna xup!​—Hna ama. 4:11.