1-2. Nso idinam Jehovah enyịme se inamde inọ enye?

 KE INI okopde ke owo atuak ibuot ọnọ Abasi, esikere ke owo oro anam nso n̄kpọ? Anaedi emesikere nte owo ọtọn̄ọde edọn̄ ke mben bed esie osụhọde idem ọbọn̄ akam ke ofụri esịt ọnọ Jehovah. Mîdịghe edi esikere nte ubon ẹtiede kiet ẹsịn idem ẹkpep Bible.

² Owo emi ọbọn̄de akam do ye ubon emi ẹkpepde Bible do ẹtuak ibuot ẹnọ Jehovah. Ndi Jehovah eyenyịme se mmọ ẹnamde oro? Eyenyịme edieke ekemde ye uduak esie, edieke mmọ ẹmade enye, ẹnyụn̄ ẹkponode enye. Imama Jehovah etieti. Imọdiọn̄ọ ke enye odot se ituakde ibuot inọ, inyụn̄ iyom yak se inamde inọ enye edi mfọnn̄kan.

3. Nso ke idikpep ke ibuotikọ emi?

³ Ke ibuotikọ emi, iyese se ikesinamde Jehovah enyịme se ikọt esie ẹkenamde ẹnọ enye ke eyo Bible, inyụn̄ ineme nsio nsio usụn̄ itiaita emi isidade ituak ibuot inọ enye mfịn. Nte inemede ika, ẹyak ise m̀mê iyekeme ndisịn idem nnam n̄kpọ esie n̄kan nte inamde idahaemi. Ndinam n̄kpọ Jehovah  esinam esịt enen̄ede enem owo. Iyeneme se isinamde edi ntre.

4. Mbemiso Christ edide isọn̄, didie ke ikọt Jehovah ẹkewụt ke imama Jehovah inyụn̄ ikpono Enye?

⁴ Mbemiso Jesus ekedide isọn̄, nso ke nti ikọt Abasi nte Abel, Noah, Abraham, ye Job ẹkenam ẹwụt ke imama Jehovah inyụn̄ ikpono enye? Mmọ ẹma ẹsikop uyo esie, ẹbuọt idem ye enye, ẹnyụn̄ ẹwa uwa ẹnọ enye. Bible itịn̄ke kpukpru se mmọ ẹkenamde ẹtuak ibuot ẹnọ Jehovah. Edi mmọ ẹma ẹnam ofụri ukeme mmọ ndikpono Jehovah, Jehovah ama onyụn̄ ama se mmọ ẹkenamde. Nte ini akakade, Jehovah ama ọnọ nditọ nditọ Abraham Ibet Moses. Enye ama ewet ata nnennen nnennen nte ẹkpetuakde ibuot ẹnọ imọ.

5. Didie ke Jehovah okoyom mme mbet Jesus ẹtuak ibuot ẹnọ imọ?

⁵ Ke Jesus ama akakpa eset, Jehovah ikoyomke ikọt Esie ẹnịm Ibet Moses aba. (Rome 10:4) Enye ọkọnọ mme Christian obufa ibet, oro edi, “ibet Christ.” (Gal. 6:2) Didie ke mmọ ẹdinịm “ibet Christ”? Ikedịghe ke ndimụm ibet oro ndọn̄ ke ibuot, owo ikonyụn̄ iwetke udịm udịm n̄kpọ emi ẹdọhọde nam emi, kûnam oko. Akana mmọ ẹdu uwem nte Christ okodude ẹnyụn̄ ẹnam se enye ekekpepde. Mfịn n̄ko, mme Christian ẹdomo ofụri ukeme mmọ ndikpebe Christ man esịt enem Jehovah, man mmọ ẹnyụn̄ ‘ẹkụt nduọkodudu’ ẹnọ idemmọ.​​—Matt. 11:29.

6. Nso ke ikpanam man ibọ ufọn ito ibuotikọ emi?

⁶ Nte inemede usụn̄ kiet kiet emi isituakde ibuot inọ Jehovah, bụp idemfo, ‘Ndi mmanam n̄kpọ enye emi n̄kan nte n̄kesinamde?’ Emekeme ndinyụn̄ mbụp idemfo, ‘Ndi mmekeme ndisịn idem n̄kan oro?’ Ekpedi emesịn idem anam n̄kpọ Jehovah akan nte ekesinamde akpa, edi se esịt enemde fi. Edi ọfọn n̄ko yak ọdọhọ Jehovah an̄wam fi okụt m̀mê emekeme ndinam n̄kan oro.

7. Jehovah esida didie akam ofụri esịt nnyịn?

⁷ Isituak ibuot inọ Jehovah ke ini ibọn̄de akam inọ enye. Nditọ Israel ẹma ẹsifọp incense ke tent utuakibuot ye ke temple ẹnọ Jehovah. Mmọ ẹma ẹsida ini ẹtịm utọ incense oro mbemiso ẹmende ẹkefọp. Bible emen akam nnyịn odomo ye utọ incense oro. (Ps. 141:2) Incense oro ama esisio utebe emi ekenemde Jehovah etieti. Ukem ntre, akam ofụri esịt nnyịn ‘esinem Jehovah esịt’ ekpededi nnyịn itịn̄ke ikpọ ikpọ ikọ ke akam oro. (N̄ke 15:8; Deut. 33:10) Imenen̄ede inịm ke esinem Jehovah ndikop nnyịn idọhọde ke imama enye ye se enye anamde ọnọ nnyịn. Jehovah oyom nnyịn idọhọ imọ se ifịnade nnyịn ye se iyomde. Edi mbemiso ọbọn̄de akam ọnọ Jehovah, ọfọn yak etịm ekere se editịn̄de. Oro ayanam akam fo enem Ete fo ke heaven nte ata eti “incense.”

8. Siak nsio nsio ini emi ikemede nditoro Abasi.

⁸ Isituak ibuot inọ Jehovah ke ini itorode enye. (Ps. 34:1) Usụn̄ kiet emi itorode Jehovah edi nditịn̄ nti edu esie ye ikpọ utom esie nnọ mme owo. Owo mîmaha owo itoroke. Ke ntre, edieke itịmde itie ikere kpukpru nti n̄kpọ emi Jehovah anamde ọnọ nnyịn, nnyịn idinanake se idade itoro enye. Akpan usụn̄ en̄wen emi isitorode Jehovah edi ke ini ‘iwade uwa ekọm inọ enye,’ oro edi, ke ini ikwọrọde eti mbụk. (Heb. 13:15) Ukem nte anade itịm ikere kan̄a mbemiso ibọn̄de akam inọ  Jehovah, ana itịm ikere se iditịn̄de ke ini ikwọrọde ikọ. Isiyom ndinam ofụri ukeme nnyịn ke ini ‘iwade uwa ekọm’ inọ Jehovah. Oro esinam itịn̄ ikọ ke ofụri esịt ke ini ikwọrọde ikọ.

9. Nso ufọn ke isibọ ke ini idụkde mbono esop? Didie ke mbono esop an̄wam fi?

⁹ Isituak ibuot inọ Jehovah ke ini idụkde mbono esop. Jehovah ọkọdọhọ nditọ Israel: “Yak kpukpru nditọiren fo ẹdi ke iso Jehovah Abasi fo utịm ikata ke isua ke ebiet emi enye edimekde.” (Deut. 16:16) Owo ndomokiet ikodụhe ndikpeme ufọk mmọ ye in̄wan̄ mmọ ini mmọ ẹdahade do. Edi Jehovah ama ọn̄wọn̄ọ ọnọ mmọ ete: “Owo baba kiet idiyomke isọn̄ fo ke adan̄aemi afo ọdọkde aka ndikụt iso Jehovah Abasi fo.” (Ex. 34:24) Nditọ Israel emi ẹkebakde Jehovah ẹma ẹsibuọt idem ye enye, ẹsinyụn̄ ẹka mme usọrọ oro. Ndien se mmọ ẹkenamde ikatakke-tak sia mmọ ẹma ẹda ufan̄ oro ẹnen̄ede ẹdiọn̄ọ Ibet Jehovah, ẹtie ẹkere nti utom esie, ẹnyụn̄ ẹnyene ifet ndineme nneme ye mbon eken emi ẹkebakde Jehovah. (Deut. 16:15) Nnyịn n̄ko imesibọ ediwak ufọn ke ini iwade idem idụk mbono esop. Kere n̄ko nte esinemde Jehovah ke ini inen̄erede itịm idem man inọ ibio ibio ibọrọ emi an̄wan̄ade owo ke mbono esop.

10. Nso inam ikwọ edi akpan usụn̄ kiet emi isituakde ibuot inọ Jehovah?

¹⁰ Isituak ibuot inọ Jehovah ke ini ikwọde ikwọ. (Ps. 28:7) Nditọ Israel ẹkeda ikwọ nte akpan usụn̄ kiet emi mmọ ẹtuakde ibuot ẹnọ Jehovah. Edidem David ama emek nditọ Levi 288 man ẹsikwọ ikwọ ke temple. (1 Chron. 25:​1, 6-8) Mfịn imekeme ndida ikwọ ndọhọ Jehovah adan̄a nte imade enye. Idịghe nte uyo nnyịn etiede edi akpan n̄kpọ. Ke uwụtn̄kpọ, “kpukpru nnyịn idedue ediwak ini” ke ini itịn̄de ikọ, edi oro ikpanke nnyịn ndisitịn̄ ikọ ke mbono esop ye ke ukwọrọikọ. (Jas. 3:2) Ukem ntre, nnyịn ikpayakke nte uyo nnyịn etiede akpan nnyịn ndikwọ ntoro Jehovah.

11. Psalm 48:13 owụt ke nso ikpanam isisio ini inịm Utuakibuot Ubon?

¹¹ Isituak ibuot inọ Jehovah ke ini itiede ke idem nnyịn ikpep Bible ye ke ini ikpepde nditọ nnyịn iban̄a Jehovah. Ke usen Sabbath, nditọ Israel ẹma ẹsikpọn̄ kpukpru se mmọ ẹkesinamde, ẹnam se idin̄wamde mmọ ẹka iso ẹkpere Jehovah. (Ex. 31:​16, 17) Mbon emi ẹkesọn̄ọde ẹda ye Jehovah ke otu mmọ ẹma ẹsida ufan̄ oro ẹkpep nditọ mmọ ẹban̄a Jehovah ye nti utom esie. Ana nnyịn owo kiet kiet isisio ini ikpep Bible. Usụn̄ kiet emi ituakde ibuot inọ Jehovah edi oro, oro oyonyụn̄ an̄wam nnyịn inen̄ede ikpere enye. (Ps. 73:28) Ndien ke ini itiede ye ubon nnyịn ikpep Bible, oro ayan̄wam nditọ nnyịn ẹnen̄ede ẹkpere edima Ete nnyịn ke heaven.​​—Kot Psalm 48:13.

12. Nte Jehovah akadade utom mbon emi ẹkenamde mme n̄kpọ emi ẹkedude ke tent utuakibuot ekpep nnyịn nso?

¹² Isituak ibuot inọ Jehovah ke ini itienede ibọp inyụn̄ idiọn̄ mme ufọk esop Abasi. Bible ọdọhọ ke mbon emi ẹkenamde tent utuakibuot ye mme n̄kpọ emi ẹkedọn̄de ke esịt ẹkenam “edisana utom.” (Ex. 36:​1, 4) Mfịn n̄ko, Jehovah ada nte ke mbon emi ẹbọpde mme Ufọkmbono Obio Ubọn̄ ye mme ufọk esop Abasi eken ẹtuak ibuot ẹnọ imọ idahaoro. Ndusụk nditọete ẹsisịn ata ediwak ini ẹda ẹnam utom emi. Ndi mmọ idotke itoro? Edi ana mmọ ẹsụk ẹtiene ẹkwọrọ ikọ. Ndusụk mmọ ẹsikam ẹyom ndidi mme asiakusụn̄ ofụri ini. Ikpanaha mbiowo ẹbiat ini ndimek mmọ mme asiakusụn̄ ofụri ini ke ini  mmọ ẹsịnde n̄wed, edieke mmọ ẹdotde. Usụn̄ kiet emi mbiowo ẹn̄wamde man ẹkeme ndika iso mbọp n̄kpọ nnọ esop Abasi edi oro. M̀mê imekeme ndibọp n̄kpọ nnọ esop Abasi m̀mê ikemeke, kpukpru nnyịn imekeme ndinịm mme ufọk oro ẹsana nnyụn̄ ntịm mmọ n̄kama.

13. Ikpese didie okụk emi itịpde yak ẹda ẹnam n̄kpọ Abasi?

¹³ Isituak ibuot inọ Jehovah ke ini itịpde okụk yak ẹda ẹnam utom esie. Jehovah ọkọdọhọ nditọ Israel ẹkûsan̄a ukpọk ubọk ẹdi iso imọ. (Deut. 16:16) Akana mmọ ẹnọ se ededi emi mmọ ẹkemede. Mmọ ẹkeda oro ẹwụt ke imama kpukpru se Jehovah anamde man mmimọ ika iso ikpere enye. Didie ke nnyịn n̄ko ikpowụt ke imama Jehovah ye kpukpru se enye anamde ọnọ nnyịn? Usụn̄ kiet edi nditịp okụk ẹda ẹnam n̄kpọ ke esop nnyịn, ndinyụn̄ ntịp ẹda ẹnam n̄kpọ Abasi ke ofụri ererimbot nte ukeme nnyịn ayakde. Apostle Paul ọkọdọhọ: “Edieke edinyịme akam odude, enen̄ede enem Abasi esịt ndibọ nte ekemde ye se owo enyenede, idịghe se owo mînyeneke.” (2 Cor. 8:​4, 12) Se ededi emi inọde Jehovah ke ofụri esịt, enye ama, inamke n̄kpọ m̀mê ekpri didie.​​—Mark 12:​42-44; 2 Cor. 9:7.

14. Mme N̄ke 19:17 owụt ke Jehovah esida didie un̄wam emi in̄wamde nditọete nnyịn?

¹⁴ Isituak ibuot inọ Jehovah ke ini in̄wamde nditọete emi ẹnyenede mfịna. Jehovah ama ọn̄wọn̄ọ ke imọ iyọnọ nditọ Israel utịp edieke mmọ ẹn̄wamde mme ubuene. (Deut. 15:​7, 10) Ini ekededi emi in̄wamde nditọete nnyịn emi ẹnyenede mfịna, Jehovah esida nte ke nnyịn inọ imọ n̄kpọ idahaoro. (Kot Mme N̄ke 19:17.) Ke uwụtn̄kpọ, mme Christian ke Philippi ẹma ẹnọ n̄kpọ ẹsọk Paul ini ẹkekọbide enye. Enye ọkọdọhọ ke enọ mmọ oro edi “uwa emi ẹnyịmede, emi etịmde enem Abasi esịt.” (Phil. 4:18) Se kanade esop mbufo nyụn̄ bụp idemfo, ‘Ndi enyene owo emi n̄kpan̄wamde?’ Esinem Jehovah ini ekededi emi enye okụtde nte idade ini nnyịn, odudu nnyịn, se idiọn̄ọde, ye se inyenede in̄wam nditọete emi ẹnyenede mfịna. Enye esibat oro esịn ke usụn̄ emi ituakde ibuot inọ enye.​​—Jas. 1:27.

15. Kpa ye emi ndinam n̄kpọ Abasi oyomde ini ye ukeme, ntak emi mîdịghe mbiomo?

¹⁵ Ndituak ibuot nnọ Jehovah oyom ini ye odudu, edi idịghe mbiomo. (1 John 5:3) Se inamde okûdi mbiomo edi ke isituak ibuot inọ Jehovah ke ntak emi imade enye. Yak ida eyenọwọn̄ emi oyomde ndinọ ete esie n̄kpọ inam an̄wan̄a. Enye ekeme ndida ediwak hour ọdrọ ndise emi enye oyomde ndinọ ete esie. Kpa ye oro adade enye anyan ini ndidrọ ndise oro, enye ituaha n̄kpọfiọk sia enye ama ete esie, onyụn̄ enenem enye ndinọ ete esie n̄kpọ oro. Ukem ntre, esinenem nnyịn ndida ini nnyịn ye odudu nnyịn nnam n̄kpọ Jehovah sia imama enye.

16. Mme Hebrew 6:10 ọdọhọ ke Jehovah ada didie se nnyịn owo kiet kiet inamde man esịt enem enye?

¹⁶ Mme ete ye eka emi ẹmade kpukpru nditọ mmọ isidorike enyịn kpukpru nditọ ndinọ mmọ n̄kpọ ukem ukem. Mmọ ẹdiọn̄ọ ke nditọ idịghe ukem ukem, ke nte n̄kpọ etiede ye eyen enye emi onyụn̄ okpụhọde ye nte n̄kpọ etiede ye eyen enye oko. Ukem ntre, Ete nnyịn ke heaven ọdiọn̄ọ nte n̄kpọ etiede ye nnyịn owo kiet kiet. Ekeme ndidi amanam n̄kpọ Abasi akan ndusụk owo emi afo ọdiọn̄ọde onyụn̄ amade, mîdịghe edi ke ukemeke ndinam nte mmọ ke ntak isua emana, udọn̄ọ, m̀mê mbiomo ubon. Kûyak esịt ọduọ fi. (Gal.  6:4) Jehovah idifreke utom fo. Ama akam edi amanam ofụri ukeme fo, unyụn̄ unamke ke ntak ibụk, esịt enem enye. (Kot Mme Hebrew 6:10.) Jehovah esikụt se afo akpamade ndinam. Enye oyom esịt enem fi ke se anamde ọnọ imọ.

17. (a) Nso ke ikpanam edieke enyenede se isọn̄de nnyịn ndinam nnọ Jehovah? (b) Didie ke n̄kpọ kiet emi ẹsiakde ke ekebe oro “ Nam Se Idinamde Esịt Enen̄ede Enem Fi” akan̄wam fi?

¹⁷ Nso ke ikpanam edieke ọsọn̄de nnyịn ndinam ndusụk n̄kpọ emi isinamde ituak ibuot inọ Jehovah, utọ nte ndikpep Bible ke idem nnyịn m̀mê ndikwọrọ ikọ? Imekere ke edidi nte isịnde idem inam mme n̄kpọ oro ika, ntre ke edinen̄ede inem nnyịn ika, ntre ke idinyụn̄ inen̄ede ikụt ufọn mmọ ika. Imekeme ndimen mme n̄kpọ emi ndomo ye ndusụk se isinamde isịn̄ede idem m̀mê ndikpep ndibre kita. Edieke isinamde mme n̄kpọ emi ini inyụn̄ inyenede ini, ekeme ndinam nnyịn idinen̄ekede idiọn̄ọ. Edi ekere ke nso iditịbe edieke imekde ndinam mmọ kpukpru usen? Ke nsonso oro, imekeme ndisinam n̄kpri n̄kpri, aka ko nnyịn inam ibịghi. Ndien ima itọn̄ọ ndikụt ufọn, idisitetie ibet yak ini emi ikenịmde edikem. Ukem oro ke edi ye se isinamde inọ Jehovah.

18. Didie ke ikeme ndinam se Jehovah okobotde nnyịn ọnọ? Nso ididi ufọn edieke inamde?

¹⁸ Jehovah okobot nnyịn man inam uduak esie. Edieke ituakde ibuot inọ enye ke ofụri esịt, ọwọrọ imanam se enye okobotde nnyịn ọnọ. Oro ayanam ikop inem uwem idahaemi, ndien iyodori enyịn ndituak ibuot nnọ enye ke nsinsi. (N̄ke 10:22) Esịt ana nnyịn sụn̄ idahaemi sia imọdiọn̄ọ ke Jehovah esin̄wam mbon emi ẹtuakde ibuot ẹnọ enye ini mmọ ẹnyenede mfịna. (Isa. 41:​9, 10) Imenyene nti ntak ndikop idatesịt nte ituakde ibuot inọ edima Ete nnyịn emi odotde “ndibọ ubọn̄ ye ukpono” nto kpukpru se enye okobotde!​​—Edi. 4:11.