1-2. A ki moman Jéova ka aksèpté adorasyon-la nou ka bay la ?

 LÈ YO ka palé dè « adorasyon », ki biten sa ka fè-w sonjé ? Pétèt an lèspri a-w ou ka vwè on frè oben on sè ki ajounou douvan kabann a-y é ki ka priyé Jéova èvè onlo fwa avan i ay dòmi. Oben pétèt ou ka sonjé on fanmi ki sanblé pou étidyé ansanm é yo ka pasé on bon timoman.

² Adan sé 2 ka-lasa, sé frè é sè la ka adoré Jéova. Men ès Jéova ka aksèpté adorasyon-la yo ka ba-y la ? Wi, i ka aksèpté-y men pousa fò sé frè é sè la fè éfò pou fè volonté a-y, fò-yo enmé-y é fò-yo rèspèkté-y. Nou enmé Jéova toubònman é nou sav kè i mérité kè nou adoré-y. Nou vé adoré-y kon i ka mandé é nou vé fè sa byen konm i fo.

3. Ka nou ké vwè adan awtik-lasa ?

³ Adan awtik-lasa, nou ké vwè kijan Jéova té ka mandé moun adoré-y an tan lontan é nou ké vwè osi 8 biten nou ka fè pou adoré Jéova é ki ka fè-y plézi. Pannan nou ké ka ègzaminé sé lidé-lasa, nou ké pé réfléchi pou vwè kijan nou pé pwogrésé adan sé domenn-lasa pou nou adoré Bondyé byen konm i fo. Nou ké vwè osi poukwa lè nou ka adoré Jéova kon i ka mandé sa ka mèt jwa an tchè an nou.

4. Avan Jézi té vin si latè, kijan sèwvitè a Jéova té ka montré Jéova kè yo té enmé-y é kè yo té ka rèspèkté-y ?

⁴ Avan Jézi té vin si latè, ni dé moun fidèl kon Abèl, Noé, Abraam é Jòb ki té ka montré Jéova kè yo té ka rèspèkté-y é kè yo té enmé-y. Kijan yo té ka fè sa ? Yo té ka kouté-y, yo té ni fwa adan-y é yo té ka fè sakrifis a zannimo ba-y. Bib-la pa ka di-nou tout sé biten-la yo té ni a fè la pou adoré Jéova. Men on biten ki té sèten sé kè yo té  ka fè tousa yo té pé pou ba Jéova lonnè é pou adoré-y on mannyè ki té ka fè-y plézi. Tibwen tan apré, Jéova ba sé Izraélit-la Lwa a Moyiz. Adan lwa-lasa, i té ka di jan i té vé kè yo adoré-y.

5. Kijan Jéova vé kè disip a Jézi adoré-y ?

⁵ Apré Jézi mò é apré i résisité, Jéova pa té ka mandé sèwvitè a-y rèspèkté Lwa a Moyiz ankò (Wom. 10:4). Fò sé krétyen-la té suiv on nouvo lwa, « lwa a Kris » (Gal. 6:2). Men pou fè sa, yo pa té oblijé aprann lwa-lasa pa tchè é yo pa té oblijé suiv on séri lwa nonplis. Fò-yo té imité Jézi é fò-yo té suiv sa i té ka anségné. Jòdijou osi, sé krétyen-la ka fè tousa yo pé pou suiv Kris pas yo vé fè Jéova plézi é pas yo vé « touvé konsolasyon » (Mat. 11:29).

6. Ki bon biten awtik-lasa ké pòté ba-w ?

⁶ Toupannan nou ka ègzaminé sé 8 biten-la nou pé fè la pou adoré Bondyé, mi sa pou mandé-w : « Ki pwogré an ja fè adan domenn-lasa ? » Oben : « Ka an pé fè pou adoré Bondyé pibyen ankò ? » Dépi ou adan lavérité, sèten ou ja fè onlo pwogré é ou pé ni tchè-kontan pousa. Men ou pé mandé Jéova édé-w vwè adan ki domenn fò kò a-w vin pibon ankò.

7. Lè nou ka priyé Jéova èvè tout tchè an nou, ka i ka rèsanti ?

⁷ Nou ka priyé Jéova. Yo té ka ofè lansan adan tabèwnak-la é kèlkè tan apré yo fè sa adan Tanp-la. Yo té ka pran onlo prékosyon pou préparé-y (Sòm 141:2). Labib ka konparé priyè an nou èvè lansan-lasa. Lansan-lasa té ka voyé on bon ti lòdè pou Bondyé. Menmjan-la osi, lè nou ka priyé Jéova èvè tout tchè an nou sa ka fè-y « plézi », menmsi nou pa’a sèvi èvè gran jan dè mo pou palé ba-y (Pwov. 15:8 ; Dét. 33:10). On biten nou sèten sé kè Jéova enmé lèwvwè nou ka di-y jan nou enmé-y é jan nou ni rèkonésans pou-y. I vé kè nou di-y sa ki ka pran tèt an nou, sa nou ka èspéré é sa nou anvi. Men avan nou priyé-y, sa té’é byen si nou té ka réfléchi a sa nou ké di-y. Si nou fè sa, nou ké ofè Pap’an nou ki an syèl-la méyè « lansan » ki tini.

8. A ki moman nou pé ba Bondyé louwanj ?

⁸ Nou ka ba Jéova louwanj (Sòm 34:1). Lè nou ka ba Jéova louwanj, nou ka di lézòt kijan nou enmé-y, ki bèl kalité i ni é jan nou èstèbèkwè douvan tousa i kréyé. Si tchè an nou ranpli èvè rèkonésans a pa ti bon biten nou ké ni a di asi Jéova. Si nou ka pran tan réfléchi asi tout bon biten Jéova ja fè pou nou, nou ké toujou touvé on rézon pou nou ba-y louwanj. Lè nou ka préché, nou ni diféran lokazyon pou nou ‘ba Bondyé on sakrifis a louwanj, kivédi pawòl ki ka sòti dè bouch an nou’ (Ébr. 13:15). Avan nou ay palé ba Jéova, nou ka pran on ti tan pou nou gadé ka nou ké di-y. Menmjan-la osi, avan nou ay palé ba sé moun-la an téritwa-la, fò-nou pran on ti tan pou gadé ka nou ké di-yo. Nou ka fè sa pas nou vé ba Jéova méyè « sakrifis a louwanj » ki tini. Sé pousa nou ka palé èvè onlo chalè lèwvwè nou ka préché.

9. Sé Izraélit-la té k’ay adan diféran fèt pou adoré Bondyé. Ki byenfé sa té ka pwokiré-yo, é ki byenfé sé réinyon-la ka pwokiré-nou jòdijou ? Bay on ègzanp ki ka montré jan sé réinyon-la ka édé-w pèwsonèlman.

⁹ Nou k’ay adan réinyon an nou. Mi sa Jéova té di sé Izraélit-la : « Twa fwa adan lanné-la, tout sé misyé-la ké parèt douvan Jéova Bondyé a-w koté-la i ké  chwazi la » (Dét. 16:16). Pannan sé fèt-lasa, fò sé Izraélit-la té lésé kaz a yo é jaden a yo é pa té ni ponmoun pou jété on zyé asi biten a yo pou yo. Men mi sa Jéova té pwomèt-yo : « Ponmoun pé’é pran péyi a-w lè ou ké monté owa Jéova Bondyé a-w » (Ègz. 34:24). Konm sé Izraélit-la té sèten kè Jéova té’é tchenn pwomès a-y, yo té ka vin adan sé fèt-lasa chak lanné. Kifè, yo té ka jwenn onlo bénédisyon. Pa ègzanp, yo té ka vin konnèt Lwa a Bondyé pibyen, yo té ni lokazyon pran tan réfléchi asi bonté a Jéova é yo té pé pasé on bèl moman èvè dòt sèwvitè a Bondyé (Dét. 16:15). Lèwvwè nou ka fè tousa nou pé pou nou vin réinyon, nou ka jwenn onlo bénédisyon kon yo. Ès ou ja imajiné jan Jéova kontan lè ou ka préparé déotwa komantè toukout é kè ou ka pran tan réfléchi asi sa ou ké di !

10. Poukwa sa enpòwtan kè nou chanté pou adoré Jéova ?

¹⁰ Nou ka chanté pou Jéova èvè frè é sè an nou (Sòm 28:7). Pou sé Izraélit-la, fò-yo té chanté pou yo té adoré Bondyé pas sé té on biten ki té enpòwtan. Sé pousa wa David té chwazi 288 Lévit pou yo té chanté an Tanp-la (1 Kron. 25:1, 6-8). Jòdijou osi, nou ka chanté pou ba Bondyé louwanj. Konsa, nou ka montré-y kè nou enmé-y. Kò an nou pa oblijé bon adan zafè a chanté la pou ba Jéova louwanj. Lèwvwè nou ka palé, « pli souvan ki rarman nou ka fè érè », men apapousa nou pa’a réponn an réinyon oben kè nou pa’a palé an prédikasyon (Jak 3:2). Menmjan-la osi, menmsi pou nou nou pa’a chanté tèlman byen, a pa sa ki dwètèt anpéché-nou chanté pou Jéova.

11. Kon Sòm 48:13 ka montré, poukwa fò-nou pran on tan pou étidyé Labib èvè fanmi an nou ?

¹¹ Nou ka étidyé Labib é nou ka édé timoun an nou aprann konnèt Jéova. Jou a saba-la sé Izraélit-la pa té ka travay. Kifè, yo té pé pwofité pou pozé kò a yo é yo té pé fè dé biten pou vin pibon zanmi èvè Jéova (Ègz. 31:16, 17). Sèwvitè a Jéova ki té fidèl, té ka pwofité pou palé èvè timoun a yo dè Jéova é dè bonté a-y. Nou osi, fò-nou pran on tan pou nou pé sa li é étidyé Pawòl a Bondyé. Lè nou ka fè sa, nou ka adoré Jéova é sa ka édé-nou vin pibon zanmi èvè-y (Sòm 73:28). É lè nou ka étidyé Labib èvè fanmi an nou, nou ka édé timoun an nou vin pibon zanmi èvè Pap’an nou ki an syèl-la (li Sòm 48:13).

12. Kijan Jéova té ka vwè travay-la yo té ka fè la pou konstwi tabèwnak-la é pou fè sé mèb-la ki té k’ay adan tabèwnak-la, é ka sa ka aprann-nou ?

¹² Nou ka bay on pal pou konstwi é pou pran swen a sé koté-la nou ka adoré Bondyé la. Labib ka di kè travay-la yo té ka fè la pou konstwi tabèwnak-la é pou fè sé mèb-la ki té k’ay adan tabèwnak-la, sé té on ‘travay ki té sakré’ (Ègz. 36:1, 4). Jòdijou osi, travay-la yo ka fè la pou konstwi sé sal di Wayòm la é pou konstwi dòt koté yo ka adoré Bondyé, sé on travay ki sakré pou Jéova. Ni sèwten frè é sè ki ka pasé onlo tan ka fè travay-lasa. A pa ti rèkonésans nou ni pou bèl travay-la yo ka fè la ! Men a pa sa tousèl yo ka fè. Yo ka préché osi é ni sa adan yo ki anvi vin pyonyé. Lèwvwè sé frè é sè la ka fè sa ki fo pou yo pé sa vin pyonyé, sé ansyen-la ka montré kè yo ka soutyenn travay-la yo ka fè la pou konstwi batiman lèwvwè yo ka pèwmèt-yo vin pyonyé. Ki nou sé on zouti-filé adan domenn  a konstriksyon, ki nou pa konnèt granzafè adan domenn-lasa, noutout nou pé fè ansòt pou pran swen a sé koté-la nou ka adoré Bondyé la é pou yo rété pwòp.

13. Ka pou nou mèt fon an tèt an nou anrapò èvè sé don-la nou ka fè la pou travay a prédikasyon-la ki ka fèt toupatou si latè ?

¹³ Nou ka bay on lajan pou soutyenn travay a prédikasyon-la ki ka fèt toupatou asi latè. Sé Izraélit-la pa té ni dwa vin douvan Jéova 2 men a yo balan (Dét. 16:16). Konm tout sé Izraélit-la pa té ka gangné menm kantité lajan-la, yo pa té pé ba Jéova menm biten-la. Men fò-yo té bay sa yo té pé. Lè yo té ka fè sa, yo té ka montré Jéova kè yo té ni onlo rèkonésans pou tousa i té ka ba-yo. É nou, kijan nou pé montré Jéova kè nou enmé-y é kè nou ni onlo rèkonésans pou tousa i ka fè pou nou ? On biten nou pé fè sé bay on lajan pou soutyenn lasanblé an nou é pou soutyenn travay a prédikasyon-la ki ka fèt toupatou si latè. Men lè nou ké fè sa, nou ké fè sa sèlon sa nou ni. Dayè, mi sa lapòt Pòl di : « Si on moun byen désidé fè on don, don-la i ka fè la parapòt a sa i ni é non parapòt a sa i pa ni, ka fè Bondyé plézi toubònman » (2 Kor. 8:4, 12). Lè nou ka fè on don, kèlkèswa kantité lajan-la nou ka bay la, sa ni onlo valè pou Jéova (Mawk 12:42-44 ; 2 Kor. 9:7).

14. Dapré Pwovèb 19:17, lèwvwè nou ka édé frè é sè an nou ki bizwen on biten, kijan Jéova ka vwè sa ?

¹⁴ Nou ka édé frè é sè an nou ki bizwen on biten. Jéova té di sé Izraélit-la kè siwvwè yo té donan èvè sé maléré-la i té’é ba-yo on bèl rékonpans (Dét. 15:7, 10). Pou Jéova, chakfwa nou ka édé on frè oben on sè ki bizwen on biten, sé konsi nou ka fè-y on kado (li Pwovèb 19:17). Pa ègzanp, lèwvwè Pòl té lajòl, sé krétyen Filip la fè-y on bèl kado é lèwvwè i palé dè sa i di kè Bondyé té dakò èvè kado-lasa é kè sa té ka fè-y plézi (Filip. 4:18). Sonjé frè é sè a lasanblé a-w é mi sa pou mandé-w : « Kimoun an pé édé an lasanblé-la ? » Jéova kontan lè i ka vwè kè nou ka itilizé tan an nou, fòs an nou, kapasité an nou é sa nou ni osi pou nou pé sa édé frè é sè an nou ki bizwen on biten. Pou-y, lè nou ka fè sa, sé adoré nou ka adoré-y (Jak 1:27).

15. Pou nou adoré Jéova kon i ka mandé, sa ka mandé tan é sa ka mandé éfò, men sa pa fòsan. Poukwa nou ka di sa ?

¹⁵ Pou nou adoré Jéova kon i ka mandé, sa ka mandé tan é sa ka mandé éfò, men sa pa fòsan (1 Jan 5:3). Poukwa nou ka di sa ? Sa pa fòsan pou nou pas nou enmé Jéova é sé pousa nou ka adoré-y. Imajiné on tigason anvi fè pap’a-y on kado. I ka pasé onlo tan ka fè on ti désen ba-y. Men pou-y tan-la i ka pasé la pa ni pon enpòwtans pas i enmé papa-y é pas i kontan fè-y ti kado-lasa. Menmjan-la, konm nou enmé Jéova, nou kontan sèvi èvè tan-la nou ni la é nou kontan fè éfò pou adoré-y kon i ka mandé.

16. Dapré Ébré 6:10, lèwvwè Jéova ka vwè tout sé éfò-la nou ka fè la pou fè-y plézi, ka i ka rèsanti ?

¹⁶ On papa é on manman ki enmé tout timoun a yo sav byen kè chak sé timoun-la pé’é pé ba-yo menm kado-la pas yo sav kè chak timoun diféran. Menmjan-la osi, Jéova sav byen kè noutout pé’é pé fè menm biten-la pas noutout diféran. Pétèt kè ou ka rivé fè sèwten biten kè dòt frè é sè pa’a rivé fè oben pétèt kè onlo  frè é sè ka rivé fè dé biten kè vou ou pa’a rivé fè, pétèt pas ou ja ni on ti laj oben kè santé-la pa two flanbo oben pas fò ou okipé dè fanmi a-w. Si sé ka a-w, pa dékourajé ! (Gal. 6:4). Jéova pé’é jen oubliyé tousa ou fè pou-y. Dépi ou ka ba-y sa ou ni dè méyè é kè ou ka fè sa èvè tout tchè a-w, sa ka fè-y plézi (li Ébré 6:10). Jéova jous sav sa ou té’é anvi fè ba-y. Men sa i vé sé kè ou kontan parapòt a tousa ou ka rivé fè pou-y.

17. a) Ka nou pé fè si nou ni dimal a fè sèwten biten pou adoré Jéova ? b) Adan ti karé-la «  Déotwa biten ki ka mèt jwa an tchè a-w », ni sèwten biten ki ka pèwmèt-nou adoré Jéova. Kilès ki ka édé-w plis ?

¹⁷ Nou sòti palé dè déotwa biten nou pé fè pou adoré Jéova byen konm i fo. Men ka ou pé fè si sèwten biten, kon étidyé tousèl a-w oben préché, ka ba-w gaz ? Sèten ou ké rann-vou kont kè pli ou ké fè sé biten-lasa, pi ou ké vin enmé-yo é pi yo ké fè-w dibyen. Sé kon lèwvwè ou ka koumansé fè on ispò oben kè ou ka aprann jouwé mizik. Si ou ka fè sa dè tanzantan tousèl, ou pé’é fè onlo pwogré. Men imajiné kè ou ka mété-w ka fè sa touléjou, sèten ou ké fè plis pwogré. Pétèt ou ké koumansé toupiti é kè ou ké fè déotwa minit é piti-a-piti ou ké anvi pasé plis tan ka fè sa. Lé ou ké vwè jan ou ka pwogrésé, ou ké ni tchè-kontan é ou ké anvi kontinyé fè sa. Sé menm biten lè nou ka adoré Jéova.

18. Ki méyè biten nou pé fè an vi an nou é ki byenfé sa ka pwokiré-nou ?

¹⁸ Méyè biten nou pé fè an vi an nou sé adoré Jéova èvè tout tchè an nou. Ki byenfé sa ka pwokiré-nou ? Vi an nou ni on sans, nou ni tchè-kontan é nou ni lèspwa kè nou ké pé adoré Jéova pou touttan (Pwov. 10:22). Anplisdisa, lèspri an nou trankil pas nou sav Jéova ka édé sèwvitè a-y ki ka jwenn difikilté (Iz. 41:9, 10). É lè nou ka réfléchi asi tout sé biten-lasa, a pa ti kontan nou kontan adoré Jéova ! Sé on Papa ki enmé-nou onlo é i mérité kè tout kréyasyon a-y bay ‘glwa é lonnè’ (Rév. 4:11).