1-2. E na kangaa ni butimwaeaki ara taromauri iroun te Atua?

 TERA ae ko iangoia ngkana ko ongo te taeka ae “taromauri”? Tao ko kona n iangoa te tari temanna ae tataro ma nanona nakon Iehova imwaini matuna. Ke tao te utu teuana ae a katuuaa aia iango i aon aia taromauri n utu.

² A bane n irekereke itera akana uoua akanne ma te taromauri. E na butimwaei aia taromauri Iehova? Eng, ngkana e boraoi ma nanona ao a tangiria ao ni karinea. Ti rangi n tangira Iehova. Ti ataia bwa e riai n taromauriaki ao ti kani karaoa ara kabanea n tamaroa nakoina.

3. Tera ae ti na maroroakinna n te kaongora aei?

³ N te kaongora aei, ti na maroroakina iai te aeka n taromauri are e kukurei iai Iehova rimoa, ao n nori naba baika wanua ibukin te taromauri aika kakukureia te Atua ni boong aikai. Ni karaoan aei, ti na kona iai n iangoa kanakoraoan riki ara taromauri. Ti na noria naba bwa e aera ngkai e karekea kukureira te taromauri ae koaua.

4. A kangaa taan taromauria Iehova ake imwain aia tai Kristian ni kaotiota karinean ao tangiran Iehova?

⁴ Imwain aia tai Kristian, ao mwaane aika kakaonimaki n aron Abera, Noa, Aberaam, ao Iobi, a boni kaotiota tangiran ao karinean Iehova. N te aro raa? Bon rinanon ongeabaia, aia onimaki ao aia angakarea nakoina. E aki taekinaki n te Baibara aron aia taromauri are a riai ni karaoia. Ma e noraki bwa a  karaoa aia kabanea n tamaroa ni karinea Iehova, ao e a kukurei iai n aia taromauri. Imwina riki, e a angania te tua Iehova rinanoni Mote. Ao a irekereke tuua aikai ma tuua aika rangi ni bati i aon aron taromauriana are e tangiria.

5. Tera te bitaki nakon te taromauri ae koaua imwini maten Iesu ao mangautina?

⁵ Imwini maten Iesu ao mangautina, e a aikoa kantaningaiia aomata Iehova bwa a na ongeaba n te Tua Rinanoni Mote. (IRom. 10:4) A riai Kristian n ongeaba n te tua ae boou ae “ana tua te Kristo.” (IKar. 6:2) A kona n ongeaba n te “tua” aei, tiaki mani kamatenanoana ao n ongeabaia nakon tuua aika rangi ni bati, ma boni man aroia ni kakairi n ana katoto Iesu ao touani mwin ana reirei. Ni boong aikai, a karaoa naba aia kabanea ni konaa Kristian n ongeaba n ana tua te Kristo bwa a aonga ni kakukureia Iehova ao ni “kabebeteaki [nanoia] iai.”—Mat. 11:29.

6. Ti na kangaa ni kakabwaiaaki n te kaongora aei?

⁶ Ngkana ti rinanon arora n taromauri aikai, titirakiniko ni kangai, ‘Tera aron rikirakeu n te itera aei?’ ‘I kona ni kanakoraoa riki arou n taromauri?’ Ko kona ni kukurei n rikirakem, ma ko bon riai ni butiia Iehova bwa e na buokiko ni kona n nori itera ake ko riai ni kanakoraoi riki.

7. Tera aron Iehova ni kaineti ma ara tataro?

⁷ Ti taromauria Iehova ngkana ti tataro nakoina. E kabotauaki n te Baibara ara tataro ma te bwai ae boiarara ae kareanaki n te umwanrianna ae tabu ao imwina n te tembora. (TaiAre. 141:2) E kakukureia te Atua te boi ae boiarara. N aron naba anne, ara tataro mai nanora a boni “kakukurei” nakoina, e ngae naba ngke ti taekin taeka aika bebete. (TaeRab. 15:8; TuaKau. 33:10) Ti riai ni kakoauaa bwa e kukurei Iehova n norira ni kaotiota ara tangira ao ara kakaitau nakoina. E tangirira naba bwa ti na kaota nakoina tabeaiangara, ara kantaninga, ao baika ti tatangiri. Imwain ae ko tataro nakon Iehova, ko riai n iaiangoi raoi am taeka? Ni karaoan anne, ko a anga iai “te bwai ae boiarara” nakon Tamam are i karawa.

8. N ningai taai ake ti kona ni karaoiroa iai te Atua?

⁸ Ti taromauria Iehova ngkana ti karaoiroia. (TaiAre. 34:1) Ti karaoiroa Iehova ngkana ti taekinna nakoia aomata ae ti tangiria ao ni kaitaua ibukin aroarona ao ana mwakuri aika raraoi. Ti boni karaoiroia ma nanora ni kakaitau. Ngkana ti iaiangoi ana mwakuri Iehova aika raraoi ibukira, ti na boni karaoiroia riki. Ngkana ti uarongorongo, bon anne te tai ae tamaroa bwa ti na “anga te karea ni karaoiroi nakon te Atua ae nako mai wira.” (Ebera 13:15) N aron ae ti riai n iaiangoi raoi ara taeka imwain ae ti tataro nakon Iehova, ti wanawana naba ngkana ti iaiango raoi ara taeka nakoia ake ti kaitiboo ma ngaiia n te mwakuri ni minita. Ti kani karaoa ara “karea ni karaoiroi” n aron ara kabanea ni konaa. Anne bukina ae ti rangi n ingainga iai ngkana ti uarongorongo.

9. Ti na kangaa ni kakabwaiaaki ma ni kaakaeani bobotaki n aroia tibun Iteraera rimoa? Taekina buokam iai.

⁹ Ti taromauria Iehova ngkana ti kaakaei bobotaki. A tuangaki tibun Iteraera rimoa ae kangai: “A riai ni kaoti ami mwaane ni kabane i matan Iehova ae Atuami tenua te tai n te ririki, n te tabo ae e rineia.” (TuaKau. 16:16) A riai ni kitani mwengaia ao aia tawaana n akea ae tararuai. Ma e berita Iehova nakoia ni kangai: “Akea ae e na kan taua abam  ngkana ko a nako ni kaoti i matan Iehova ae Atuam.” (TeOti. 34:24) Ibukina bwa a rangi n onimakina raoi Iehova tibun Iteraera, a boni kaakaei tooa ni katoa ririki. Ao a kakabwaiaaki n aanga aika bati. N te katoto, a reiakina riki ae bati n Ana Tua te Atua, a iaiangoa ana raoiroi, ao a rangi ni kimwareirei ni bobotakia ma raoia n te onimaki. (TuaKau. 16:15) Ti kona naba ni karekei aeka ni kakabwaia akanne, ngkana ti karaoa ara kabanea ni konaa ni kaakaei bobotaki ni Kristian. Ao iangoa aroni korakorani kimwareirein Iehova, ngkana ti a roko ao n anga ara kaeka aika kimototo ma ni kaungaunga.

10. E aera bwa boni kanoan naba ara taromauri ae kakawaki te anene?

¹⁰ Ti taromauria Iehova ngkana ti kaai n anene ma tarira n te onimaki. (TaiAre. 28:7) A iangoa te anene tibun Iteraera bwa kanoan naba aia taromauri ae kakawaki. E mwiokoiia te Uea ae Tawita tibun Rewi aika 288 bwa taan anene n te tembora. (1Rong. 25:1, 6-8) Ni boong aikai, ti kona ni kaota tangiran te Atua ngkana ti anenei kuuna ni karaoiroi. E aki kakawaki tangiraoini bwanaara. Iangoa te kabotau aei: Ngkana ti taetae, “ti bane n titibanako n taai aika bati,” ma tiaki nanon anne bwa ti na tukaki iai n taetae n te ekaretia ke n te mwakuri ni minita. (Iak. 3:2) N aron anne, ti kona n anenei kuuna ni karaoiroi nakon Iehova, e ngae naba ngkana ti bwanaabuaka.

11. N aron ae taekinaki n Taian Areru 48:13, e aera bwa ti riai ni bairea ara tai ibukin te reirei n te Baibara n ara utu?

¹¹ Ti taromauria Iehova ngkana ti ukeuke n reirei n ana Taeka ao n reireinia naba natira taekana. A aki mwamwakuri tibun Iteraera n te Taabati ma a kamanena te bong anne ibukini kakorakoraan aia iraorao ma Iehova. (TeOti. 31:16, 17) Iai aika kakaonimaki i buakoia ake a reireinia natiia taekan Iehova ao ana raoiroi. Ni boong aikai, ti riai ni bairea naba ara tai ibukini warekan ao ara ukeuke n reirei n te Baibara. Aio bon iteran naba ara taromauri nakon Iehova, ao ti a kaaniaki riki iai ma ngaia. (TaiAre. 73:28) Ao ngkana ti reiakina te Baibara n ara utu, ti a buokiia iai natira bwa a na karikirakea aia iraorao ae kaan ma Tamara ae tatangira are i karawa.—Wareka Taian Areru 48:13.

12. Tera reireiara man aron Iehova n iaiangoa aia mwakuri naake a karaoi bwain nanon te umwanrianna ae tabu?

¹² Ti taromauria Iehova ngkana ti katei taabo n taromauri ao ni kateimatoai raoiroia. E taekinaki n te Baibara bwa te mwakuri ni kateitei ibukin te umwanrianna ae tabu ao bwain nanona, bon te “mwakuri ae tabu.” (TeOti. 36:1, 4) E iangoa naba Iehova te mwakuri ni kateitei ibukin Taabo n Taromauri ao kateitei riki tabeua ngkai, bwa mwakuri aika tabu. A kabanei taai aika bati taari tabeman ibukini mwakuri aikai. Ti bon rangi ni kakaitau n te boutoka ae kakawaki aei n te mwakuri ibukin te Tautaeka n Uea. Ni koauana, a bon uarongorongo naba. Iai tabeman i buakoia aika a boni kani bwaiania naba. A kona unimwaane n te ekaretia ni kaota aia boutoka nakon te mwakuri ni kateitei, man aroia n aki baenikai ni mwiokoia taari aika mwakuri korakora aikai, bwa bwaiania aika katoatai ngkana a a tau. E ngae ngke ti mwaatai ke tiaki n te mwakuri ni kateitei, ma ti kona ni bane ni boutokaa kateimatoaan itiakini kateitei aikai ao te onobwai iai.

13. Tera arora ae riai ibukin ara bwaintangira ni kaineti ma boutokaan te mwakuri ibukin te Tautaeka n Uea?

¹³ Ti taromauria Iehova ngkana ti boutokaa te mwakuri ibukin te Tautaeka n Uea n ara bwaintangira. A aki riai ni kaoti tibun Iteraera  i matan Iehova n akea uotaia. (TuaKau. 16:16) A riai n uota te bwaintangira ni kaineti ma aia konaa. N te aro anne, a a kaotia iai bwa a kakaitau ibukini bwaai ni kabane ake e a tia ni karaoi Iehova ibukia. Ti na kangaa ni kaota ara tangira nakon Iehova ibukini bwaai ni kabane ake e a tia ni karaoi ibukira? Te anga teuana, boni man arora n anga ara boutoka te mwane nakon ara ekaretia, ao te mwakuri ni katobibia te aonnaba n aron ara konaa. E taekinna te abotoro Bauro n aron aei: “E butimwaeaki riki te angabwai ngkana e tauraoi te aomata ni kan anga. E aki kantaningaaki bwa e na anga are akea irouna, ma e na anga are iai irouna.” (2Kor. 8:4, 12) A kakawaki iroun Iehova ara bwaintangira aika ti anga ma nanora, e ngae naba ngke e uarereke.—Mareko 12:42-44; 2Kor. 9:7.

14. Ni kaineti ma Taeka N Rabakau 19:17, tera ana iango Iehova ngkana ti buokiia taari aika kainnanoa buokaia?

¹⁴ Ti taromauria Iehova ngkana ti buokiia raora ni Kristian aika kainnanoa te ibuobuoki. E berita Iehova nakoia tibun Iteraera bwa e na kabooa mwin aia tituaraoi nakoia ake a maiu ni kainnano. (TuaKau. 15:7, 10) N taai ni kabane ake ti buokiia iai raora n te onimaki ake a maiu ni kainnano, e bon iangoia Iehova bwa te bwaintangira nakoina. (Wareka Taeka N Rabakau 19:17.) N te katoto, ngke a kanakoa aia bwaintangira Kristian ake i Biribi nakoni Bauro ngke e karabuutinaki, e bon taekinna teuaei bwa “te karea ae boiarara ae butimwaeaki, ao e kakukureia nanon te Atua.” (IBir. 4:18) Iangoia kaain am ekaretia ao titirakiniko ni kangai, ‘Iai ae I kona ni buokia?’ E kukurei Iehova ngkana e norira ni kamanenai ara tai, korakorara, rabakaura, ao ara bwai, ni buokiia iai aika kainnanoa buokaia. E iangoa anne bwa iteran naba ara taromauri.—Iak. 1:27.

15. E kainnanoaki te tai ao te korakora ibukin te taromauri ae koaua, ma e aera ngkai e aki karawawata?

¹⁵ E kainnanoaki te tai ao te korakora n te taromauri ae koaua, ao akea te karawawata iai. (1Ioa. 5:3) Bukin tera? Ibukina bwa ti tangira Iehova, ngaia are ti taromauria. Iangoa te teei ae e kan anga ana bwaintangira nakon tamana. E bae ni kabanea te tai ae bati ibukini korean taamnein tamana. Ma e aki ngurengure n ana tai are e kabanea iai. E tangira tamana, ao e kan anganna ana bwaintangira anne. N aron naba anne, ibukina bwa ti tangira Iehova, ti kukurei ni kamanena ara tai ao korakorara ibukin taromauriana.

16. Ni kaineti ma Ebera 6:10, tera ana iango Iehova ni kaineti ma mwakuri aika ti karaoi ibukini kakukureiana?

¹⁶ A aki kantaningaa te bwaintangira ae titeboo mairouia natiia kaaro aika tatangira. A ataia bwa a kaokoro aia konabwai natiia. N aron naba anne, e ataa te bwai ae ti kona ni karaoia Tamara are i karawa. Tao ko kona ni karaoa ae bati riki nakoia naake ko kinaia ao n tangiriia. Ke ko aki kona ni karaoa ae bati n aroia ake tabeman riki, tao ibukin te kara, te aoraki, ke tabem n am utu. Ma tai kabwaraa nanom. (IKar. 6:4) E na bon aki mwanuokin am mwakuri Iehova. Ngkana ko karaoa am kabanea ni konaa ma nanom ae raoiroi, e na bon kukurei iai. (Wareka Ebera 6:10.) E bon nori naba baika ko kani karaoi Iehova. E tangiriko bwa ko na kukurei ao n rau nanom n te bwai ae ko kona ni karaoia ibukina.

17. (a) Ngkana ti nori iteran ara taromauri tabeua bwa e kangaanga karaoaia iroura, tera ae ti na karaoia? (b) Ko na kangaa ni buokaki ni kanoan te bwaoki ae “ E Karakaa Riki Kukureim”?

¹⁷ Tera ae ti kona ni karaoia ngkana e a kangaanga iroura karaoani bwaai tabeua aika ti a tibwa tia ni maroroakini, n aron te reirei n  te Baibara, ke te uarongorongo? Ngkana ti kabatiaa riki ara tai ni karaoi baikai, ti na boni kukurei riki ao ni kakabwaiaaki iai. Ti kona ni kabotaua ara taromauri ma mwakuri tabeua n aron te kamarurung ke te kataneiai n te katangitang. Ngkana ti karaoa anne n tii tabetai, ti na bon aki kona n rikirake iai. Ma iangoia bwa ti a baireia bwa ti na karaoia ni katoa bong. N te moantai, ti kona ni karaoia i nanon tabeua te miniti, ma imwina riki ti a kona ni kaabwabwaka ara tai. Ngkana ti nori mwina aika raraoi, ti na bon ingainga ao ni kukurei ni karaoi baikai. Ti kona naba ni karaoa aei ni kaineti ma ara taromauri.

18. Tera te bwai ae moan te kakawaki ae ti kona ni karaoia, ao tera uaana?

¹⁸ Te bwai ae moan te tamaroa ae ti kona ni karaoia, boni karaoan ara kabanea ni konaa ibukin taromaurian Iehova. Ni karaoan anne, ti na boni kukurei, e na manena maiura, ao ti a karekea te kantaninga ae ti na taromauria Iehova n aki toki. (TaeRab. 10:22) Ti a kaman namakina te raunnano ibukina bwa ti ataia ae Iehova, e na boni buokiia taan taromauria ngkana a kaaitara ma kangaanga. (Ita. 41:9, 10) Ti riai ni kakoauaa bwa ti boni kona ni kukurei ngkai ti taromauria Tamara ae tatangira are e bon riai “n anganaki te neboaki ma te karineaki” mairouia ana karikibwai!—TeKao. 4:11.