1-2. Jehova amchi bhokti kednam manun ghetolo?

 “BHOKTI” hem utor aikotana tumchea monant kitem ieta? Ghoddie tumchea monant ek bhav ieta zo ratcho nhidche poilim dimbi ghalun Jehova lagim kallzantlean magnnem korta. Vo tumchea monant ek famil ieta ji sangata mellon khuxalkaien Bible-acho obheas korta.

² Him soglim bhav-bhoinnam Jehovachi bhokti kortat. Punn tim Jehovachi khuxi kortat, tacho mog kortat, ani taka man ditat zalearuch Jehova tanchi bhokti manun ghetolo. Tor ami pasun Jehovacho khub mog kortat ani taka amchea boreantlem borem diunk sodhtat. Karonn fokot takach amchi bhokti favo mhunn ami zannant.

3. Hea lekhant ami kitem polloitolim?

³ Tor hea lekhant, adlea kallar Jehova aplea lokam thaun kosli bhokti manun ghetalo tem ami polloitolim. Toxench, ami att vatto polloitolim jea vorvim aiz ami Jehovachi bhokti kortat. Tor heo att vatto polloitana ami Jehovachi bhokti anik bore toren koxi korunk zata tea vixim ami chintunk zata. Tea bhair, khori bhokti kelolean ami kiteak khuxal zaunk pavtolim tem-ui ami hea lekhant polloitolim.

4. Adlea kallar Jehovachea sevokamnim te tacho mog kortat ani taka man ditat mhunn koxem dakhoilem?

⁴ Adlea kallar jietole visvaxi munis zoxe Abel, Noah, Abraham, ani Job, Jehova Devachea utrak pallo ditale, tacher  bhavarth dovortale ani taka bolidanam bhettoitale. Karonn te tacho mog kortale ani taka man ditale. Te Jehovachi bhokti koxe kortale tea vixim Bible amkam soglench sangona. Punn Jehovak mhoima diunk te apnnachean zata tem soglem kortale ani Jehova tanchi bhokti manun ghetalo mhunn amkam Bible-antlean kollon ieta. Uprant, Jehovan Israelitkarank Moizesa udexim Somurt dili. Ani tea Somurtint, tannim Jehovachi bhokti koxi korunk zai tea vixim kaide asle.

5. Jezu moronn punorjivont zalea uprant Jehovachi bhokti korunk Kristanvamnim kitem korunk zai aslem?

⁵ Jezu moronn punorjivont zalea uprant, Jehovachea sevokamnim Moizesachi Somurt pallchi goroz nasli. (Rom. 10:4) Karonn Kristanvank ek novo kaido dilʼlo. To mhunnttlear, “Kristachi somurt.” (Gal. 6:2) Hea ‘somurtint’ tonddpatt korun pallunk, Jehova Devan kaideanchem ek lamb list diunk naslem. Punn tannim Jezuchi dekh gheunk zai asli ani tachi xikounn pallunk zai asli. Tor aiz ami Jehova Devak manvota tem korunk ani ‘jivak somadhan mellonk,’ Kristachi dekh gheunk amchean zata tem soglem kortat.—Mt. 11:29.

6. Ho lekh amkam kitem korunk modot kortolo?

⁶ Tor atam ami Jehovachi bhokti kortat ti ek-ek vatt polloitat tednam ami amkanch he prosn vicharunk zatat: ‘Atam meren hanvem hantunt kitli vaddavoll kelea? Hea vixim hanvem anik sudharnni korunk zata kai?’ Tumi atam porian kitem kortat tem polloun tumi khuxal zaunk zata. Punn tem anik bore toren korunk tumi kitem korunk zai tem zannam zaunk tumi Jehova lagim modot magonk zai.

7. Ami kallzantlean kelʼlim magnnim Jehovak kitea sarkim zaun asat?

⁷ Ami Jehovak magnnem kortat tednam ami tachi bhokti kortat. Bible-ant amchea magnneank pormollit dhumpak sor kela. Adlea kallar povitr tombunt ani uprant, devmondirant dhump bhettoitale. Ani to dhump zotnaien toiar kortale. (St. 141:2) Hea dhumpacho pormoll Jehova Devak khub manvotalo. Teach bhaxen, ami Jehovak kallzantlean magnnem kortat tednam amchim utram sadhim aslear pasun tem “taka mogachem.” (Mho. 15:8; D.S. 33:10) Tor ami Jehovacho kitlo mog kortat ani tachim kitlim upkari asat tem ami taka sangtat tednam tem aikonk Jehovak khub borem dista mhunn ami khatri dovrunk zata. Ami amche uske, ami kitem korunk sodhtat, amche anvdde Jehovak ukteponnim sanglole taka zai. Tor magnnem korchea poilim tumi Jehovak kitem sangtolim tea vixim bariksannen chintat. Oxem kelolean, tumchea sorginchea Bapak, eka orthan, tumi pormollit ‘dhump’ bhettounk pavtolim.

8. Jehovak vakhannʼnni diunk amkam kosli sondhi asa?

⁸ Ami Jehovak vakhannttat tednam ami tachi bhokti kortat. (St. 34:1) Jehovachim ojapachim kamam ani tache gunn amkam kitle avoddttat tea vixim ami dusreank sangtat tednam ami taka vakhannttat. Toxench, porgottnnechea kama udexim ‘Devak amchea onttamnim vakhannun, vakhannʼnnecho iodn bhettounk’ amkam sondhi melltta. (Heb. 13:15) Tor Jehovan kitem soglem kelam tache pasot ami upkari asat tednam ami tachi vakhannʼnni korunk pavtolim. Ani tannem amchea pasot kelʼlea borea vostuncher ami niall kortat tednam tachi vakhannʼnni korunk amkam anikui borim karonnam astolim. Punn zoxem magnnem korchea poilim ami Jehova lagim kitem uloitolim tea vixim bariksannen chintunk zai, teach bhaxen, porgottnnent ami dusream lagim kitem uloitolim tea vixim ami bariksannen chintunk zai. Karonn ami Jehovak boreantlo boro “vakhannʼnnecho iodn” bhettounk sodhtat. Ani tea pasot, porgottnnent dusream lagim uloitana ami urben tanche lagim uloitat.

9. Israelitkaram bhaxen aiz ami mittingek hajir zatat tednam amkam koso faido zata? Mittingek hajir zalolean tumkam svota koso faido zala tea vixim sangat.

 ⁹ Ami mittingek hajir zatat tednam ami Jehovachi bhokti kortat. Adlea kallar, Israelitkarank oxi adnea dilʼli: “Tumchea sogllea dadleamnim vorsak tin pavtti Sorvesporak man-nomoskar diunk hea ekach zagear ektthovchem.” (D.S. 16:16) Tor Israelitkar Jehovachi bhokti korunk voitale tednam tanchim ghoram ani xetam rakhunk konn naslo. Punn Jehovan tankam oxi bhas dilʼli: “Hea porbam-somoiar tumcho ganv kaddun gheunk konn ieunchona.” (Sutt. 34:24) Tor Israelitkar Jehovacher purnn toren patieun dor vorsak hea porbenk hajir zatale. Ani oxem kelolean tankam zaitea vattamnim faido zatalo. Udharonnak, Jehovachea kaideam vixim tankam anik xikonk mellttalem, Jehovan tankam kelolea soglea borea vostuncher tim niallunk pavtalim, toxench tim Devachea lokam sangata khuxalkaien vell sarunk pavtalim. (D.S. 16:15) Teach bhaxen, mittingek hajir zaunk ami zata tem soglem kortat tednam amkam faido zata. Toxench, ami mittinge pasot adim fuddench toiari kortat, ani lhan toxech orth-bhorit zobab ditat tednam Jehova khub khuxal zata.

10. Gitam gavop amchea bhoktecho ek mhotvacho bhag kiteak zaun asa?

¹⁰ Ami amchea bhav-bhoinnam sangata Jehovak mhoima diunk gitam gaitat tednam ami tachi bhokti kortat. (St. 28:7) Israelitkar gaionank khub mhotv ditale. Karonn to tanche bhoktecho bhag zaun asa mhunn te zannam asle. Ani heach pasot, Raza Davidan 288 Levitank devmondirant gavpi mhunn nemle. (1 It. 25:1, 6-8) Aiz ami Jehovak mhoima diunk gitam gaitat tednam ami tacho kitlo mog kortat tem dakhoun ditat. Punn oxem korunk ami bore gavpi asonk zai oxem nhoi. Kiteak? Hea vixim chintat. Ami uloitat tednam “ami sogllim zaitea vattamnim chuki kortanv.” (Jak. 3:2) Punn hea karonnak lagon ami sobhent vo porgottnnent voitat tednam ulounk fattim soronant. Teach bhaxen, ami bore gavpi nhoi oxem amkam dista zalear pasun Jehovak mhoima diunk gitam gaunk ami fattim soronk zaina.

11. Stotr 48:13, 14 pormonnem, famili sangata Bible obheas korunk vell kaddop kiteak gorjechem?

¹¹ Ami Devachea Utracho obheas kortat ani Jehova vixim amchea bhurgeank xikoitat tednam ami tachi bhokti kortat. Sabatachea disa Israelitkar kam korinasle. Punn to dis, te Jehovachi bhokti korunk ani tachea sangata apli ixttagot ghott korunk uzar kortale. (Sutt. 31:16, 17) Visvaxi Israelitkar aplea bhurgeank Jehova vixim ani tachea boreponna vixim xikoitale. Tor aiz ami pasun Devachem Utor vachunk ani tacho obheas korunk vell kaddop gorjecho. Karonn hem amche bhoktecho bhag zaun asa. Ani oxem kelolean Jehova Deva lagim amchi ixttagot ghott zaunk pavta. (St. 73:28) Toxench, famil zaun sangata mellon ami Bible obheas kortat tednam ami amchea bhurgeank amchea mogall sorginchea Bapai lagim ek lagxilʼli ixttagot zoddunk modot kortat.—Stotr 48:13, 14 vachat.

12. Povitr tombu bandpachem kam Jehovan koxem lekhlem, ani hantuntlean ami kitem xiktat?

¹² Jehovachi bhokti korpache zage bandunk ani samballunk ami modot kortat tednam ami tachi bhokti kortat. Povitr tombu bandpachem kam ‘povitr kam’ aslem mhunn Bible-ant sanglam. (Sutt. 36:1, 4) Aiz pasun, Raj-ghoranchem ani songottnnechem her bandkam Jehovache nodren povitr zaun asa. Hem kam korunk thoddim bhav-bhoinnam khub vavr kortat. Ani tanchea vavracho ami khub valor kortat. Him bhav-bhoinnam bandkamachea sangata porgottnnechem kam pasun kortat. Ani tantuntlim thoddim zannam pioneer seva pasun korunk axetat. Tor him bhav-bhoinnam pioneer seva korunk purtim asat zalear, vhoddilamnim tankam pioneer mhunn nemunk fatti sorchem nhoi. Karonn oxem korun vhoddil bandkamachea kamak tenko ditat mhunn te dakhoitat. Tor bandkam korunk amkam kola asum vo na, ami sogleamnim  Jehovache bhokteche zage nitoll dovrunk ani samballunk modot korunk zata.

13. Rajeachea kamak tenko diunk denngim divop kiteak mhotvachem?

¹³ Rajeachea kamak tenko diunk ami denngim ditat tednam ami Jehovachi bhokti kortat. Israelitkar Jehovak porbo monounk voitalim tednam tannim aplea poristhiti pormonnem Jehovak ek dennem vhoronk zai aslem. (D.S. 16:16) Oxem korun Jehova tankam dita tea soglea pasot tim kitlim upkari asat tem tim dakhoun ditalim. Tor aiz Jehova dita tea soglea pasot ami upkari asat mhunn ami koxem dakhounk zata? Ek vatt mhunnttlear, sobhek ani sonvsarbhor zata tea Rajeachea kamak tenko diunk, ami amche poristhiti pormonnem denngim diunk zatat. Hea vixim apostl Paulun oxem mhunnttlem: “Khuxe-monan kitem-i diunk humed-hurba asa zalear, monxa kodde asa tem Dev manun gheta; monxa kodde na tem Dev magina.” (2 Kor. 8:4, 12) Tor ami Jehovak amche poristhiti pormonnem khuxemonan denngim ditat tednam to khub khuxal zata.—Marku 12:42-44; 2 Kor. 9:7.

14. Mhonnʼnneo 19:17 pormonnem, gorjek sampoddlolea bhav-bhoinnank ami modot kortat tednam Jehova tem koxem lekhta?

¹⁴ Gorjek sampoddlolea amchea bhav-bhoinnank modot kortat tednam ami Jehovachi bhokti kortat. Israelitkaramnim tanchea modlea goribank modot keli zalear Jehova tancher axirvad ghaltolo mhunn tannem tankam bhas dilʼli. (D.S. 15:7, 10) Tor aizui dor ek pavtt ami gorjek sampoddlolea eka bhavak vo bhoinnik modot kortat tednam Jehova tem apnnak dilʼlem ek dennem koxem lekhta. (Mhonnʼnneo 19:17 vachat.) Udharonnak, Filipintlea bhav-bhoinnamnim bondkhonnint aslolea Pauluk dennem dilem tednam tem “Devak avoddta ani to manun gheta toslo iodn” oxem Paulun mhunnttlem. (Filp. 4:18) Tor tumchea sobhent aslolea bhav-bhoinnam vixim chintat ani tumkanch vicharat: ‘Mhojea sobhentlea khoinchea bhavak vo bhoinnik hanv modot korunk xokta?’ Tumi tumcho vell, takot, kola ani tumche lagim asat teo vostu dusreank modot korunk uzar kortat tednam Jehova khuxal zata, ani ho amchea bhoktecho ek bhag mhunn to lekhta.—Jak. 1:27.

15. Khori bhokti korunk ami amcho vell ani takot uzar korop ek vojem kiteak nhoi?

¹⁵ Khori bhokti korunk ami amcho vell ani takot uzar korunk zai tem khorem. Punn hem korop ek vojem nhoi. (1 Juanv 5:3, 4) Karonn ami Jehovacho mog kortat dekhun ami tachi bhokti kortat. Hea vixim chintat. Ek lhan bhurgo aplea bapaik chitr kaddun dennem mhunn diunk sodhta. Punn tem chitr kaddunk taka zaitim voram lagonk puro. Hea pasot to bejar zaina, punn khuxal zata. Karonn to aplea bapaicho khub mog korta. Teach bhaxen, ami Jehovacho mog kortat dekhun tachi bhokti korunk amcho vell ani takot uzar korunk ami khub khuxal zatat.

16. Hebrevank 6:10 pormonnem, Jehovak khuxal korunk ami kortat tem soglem polloun taka koxem dista?

¹⁶ Punn Jehovak ami kitem-i ditat tednam ami sogleamnim ek-sarkench diunk zai mhunn to opekxa korina. Udharonnak, avoi-bapai vixim chintat. Tim tanchea bhurgeank bore toren vollkhotat, ani tanchi tank ani piraie pormonnem tim kitem diunk xoktat tacho tim valor kortat. Teach bhaxen, ami kitlem diunk xoktat tem Jehova zannam, ani ami Jehovak diun tachi bhokti kortat tednam ami ti khuxalkaien keloli taka zai. Tor ami ghoddie, ami zannam aslolea zaitea bhav-bhoinnam poros chodd diunk xoktat. Vo amchi pirai, bholaiki vo familichea zobabdarenk lagon dusream poros unnem diunk xoktat. Punn ami niraxi zaunchem nhoi. (Gal. 6:4) Karonn ami kortat tem Jehova kednanch visorna. Ani ami sarko hetu dovrun amchem boreantlem borem taka ditat tednam Jehova khuxal zata mhunn ami ugddas dovrunk zai.—Hebrevank 6:10 vachat.

17. (a) Khore bhoktechim thoddim kamam korunk amkam kotthin zata zalear ami kitem korunk zata? (b) “ Tumchi Khuxalkai Vaddoiat” hea boksant dakhoilʼlea eka kama thaun tumkam koxi khuxalkai mellʼllea?

 ¹⁷ Punn thodde pavtti Jehovachi bhokti korop, zoxem porgottnnechem kam vo svotacho obheas korop amkam kotthin koxem disot. Tednam ami kitem korunk zata? Ugddas dovrat, tumi jitlim chodd hem kam kortolim titlich chodd khuxalkai tumkam mellttoli, ani tumkam faido zatolo. Udharonnak, tumi ek songitachem sadhon xiktat vo tumi exercise korunk lagleant mhunn chintat. Tumi tem kednam-kednam kelear, tumi tem bore toren korunk pavchimnant. Punn tumi dor disak thoddo-thoddo vell tem korit ravlim zalear tumi tem bore toren korunk pavtolim. Hem polloun tumkam tantunt chodd vell ghalunk koxem distolem ani hea vorvim tumkam khuxalkai mellttoli. Teach bhaxen, tumi khore bhoktechim kamam kortat tednam oxench kelear tumkam tem kotthin zaunchem na.

18. Kitem korop sogleam-von chodd mhotvachem, ani oxem kelolean kitem zatolem?

¹⁸ Tor Jehovachi bhokti korunk amchean zata tem soglem korop sogleam-von chodd mhotvachem. Oxem kelolean amkam khuxalkai ani dhadosponn melltta. Ani fuddarak sasnak Jehovachi bhokti korunk amkam bhorvonso melltta. (Mho. 10:22) Toxench, atam pasun amcher tras ietat tednam Jehova aplea sevokank modot korta hem zannam zalolean amkam monachi xanti melltta. (Iz. 41:9, 10) Khorench, sogle aple rochnne thaun “mhoima ani bhovman” favo aslolea amchea mogall Bapachi bhokti korun khuxal zaunk amkam borim karonnam asat!—Prok. 4:11.