1, 2. ¿Kasa waaʼinrajatka süpüla anain nuʼwaajia Maleiwa watuma?

 ¿KASA antajaaka pikiiruʼu paapüle süchiki aʼwaajaa Maleiwa? Eesüjaʼa jülüjale paaʼin nüchiki wanee wawala oʼuraajakai nümüin Maleiwa nüsapainyoʼuka sümaa nüküjain tü suluʼukat naaʼin. Jee niale wanee wawala talatakai aaʼin sümaa nüpüshi sünain ekirajawaa tü Bibliakat.

² Naya wayuukana aʼwaajüshii Maleiwa. ¿Nücheküinche Jehová müin nuʼwaajia? Nüchekeerü shia naaʼinrüle tia wanaapünaa sümaa tü keeʼireekat naaʼin jee naaʼinrüle tia süka alin nia napüla sümaa kojutuin nia natuma. Aneesü maʼin watuma nuʼwaajia Jehová süka alin maʼin nia wapüla.

3. ¿Kasa wekirajaajeetka anain sünain ekirajaayakat tüü?

³ Sünain ekirajaayakat tüü wekirajaajeerü anain jamapuʼuin nuʼwaajia Jehová natuma na anoujashiikana namaiwa otta müsia wekirajaajeerü anain mekiisat kasa waaʼinrajatka süpüla waʼwaajüin Jehová maaʼulu yaa. Sümaʼinruʼu wekirajaain sünain, jülüja waaʼin tü waaʼinrajatkat süpüla anaʼleein nuʼwaajia Maleiwa watuma otta jamüin talateetka waaʼin waʼwaajüle nia maʼaka nücheküin shia.

4. Süpülapünaa nüntüin Cristo, ¿jamüsü watüjaaka saaʼu aipuʼuin Jehová jee kojutupuʼuin nia namüin na aʼyataapuʼukana nümüin?

⁴ Süpülapünaa nüntüin Cristo, eepuʼushii wayuu waneepiakana nümaa Jehová, maʼaka naaʼin Abel, Noé, Abrahán  otta Job. Kojutupuʼushi maʼin nia namüin otta aipuʼushi maʼin nia napüla. Watüjaa aaʼu tia süka noonooin nümaa Jehová, kanoulain naya nünain otta naapüin namüin kasa anaka noʼuluʼu. Nnojotsü süküjain tü Bibliakat jamapuʼuin nuʼwaajia Jehová natuma, watüjaapejeʼe saaʼu kojutuin nia natuma sükajee tü naaʼinrakat otta nücheküin Maleiwa naʼwaajüin nia. Mapa, naapüin Maleiwa namüin na nuuʼuliwoʼukana Abrahán tü Pütchi Aapünakat nümüin Moisés eere nüküjain namüin jamüinjatüin sukuwaʼipa nuʼwaajia natuma.

5. ¿Jamüsü sukuwaʼipa nuʼwaajia Jehová süchikijee outuin jee nüsoʼiraain aaʼin Jesús?

⁵ Süchikijee outuin jee süsoʼiraain naaʼin Jesús nnojoluitpa nuchuntuin Jehová sümüin nupueulose naaʼinrüinjatüin tü Pütchi Aapünakat nümüin Moisés (Roma 10:4). Shia naaʼinrajatka jooluʼu na anoujashiikana tü nüchekakat Cristo napüleerua (Gal. 6:2). Nnojotsü choʼujaain jülüjainjatüin naaʼin watta saalii pütchi, shia nashatüinjatka neʼe nukuwaʼipa Jesús sümaa naaʼinrajatüin tü nikirajakalü anain. Maaʼulu yaa, na anoujashiikana nachajaain maʼin sukuwaʼipa süpüla nashatüin nukuwaʼipa Cristo süpüla talatüinjatüin naaʼin Jehová namaa otta anainjatüin naaʼin (Mat. 11:29, 30).

6. ¿Jamüsü anaka maʼin wekirajaale sünain ekirajaayakat tüü?

⁶ Sümaʼinruʼu pikirajaain sünain sukuwaʼipa puʼwaajia Jehová püsakireʼera paaʼin sünain tüü: «¿Anasüche sukuwaʼipa taʼwaajia Jehová maaʼulu yaa suulialeʼeya paala? ¿Eesüche wanee kasa taaʼinrajatka süpüla anaʼleein maʼin shia?». Shiimain anain talatüle paaʼin sümaa pukuwaʼipa sünain aʼwaajaa Maleiwa, shiajaʼa neʼe choʼujaaka puchuntuin nümüin Maleiwa anaʼleeinjatüin maʼin sukuwaʼipa putuma.

7. ¿Jamüinjatü wanüiki nümüin Jehová woʼuraajapa süpüla kamalain shia nümüin?

⁷ Waʼwaajüin Jehová woʼuraajaapa. Tü oʼuraajaakat nümüin Maleiwa müsü aka saaʼin tü wunuʼu jemeta eejuut aʼajünakat suluʼu tü aʼwaajülee eejatkat nükalioʼu Moisés, mapa suluʼu tü aʼwaajülee akumajünakat süchikumüin (Sal. 141:2). Tia wunuʼu aʼajünakat jemetüsü seejuu nümüin Maleiwa. Akaʼaya tü wanüikikat woʼuraajapa nümüin Jehová, aneerü maʼin shia nümüin anale sukuwaʼipa watuma jaʼitasü palitchon wanüiki nümüin (Prov. 15:8; Deut. 33:10). Wainma kasa wayaawataka aaʼujee anain maʼin nümüin Jehová waküjale nümüin alin nia wapüla otta waapüle analuʼut nümüin. Keeʼireesü naaʼin waküjain süchiki tü keeʼireekat waaʼin, tü shapaakalü atuma waaʼin otta tü kasa anasü waʼatapajakat. Anasüjeseʼe jülüjale paaʼin tü pünüikinjatkat süpülapünaa puʼuraajüin nümüin Jehová. Müle shia putuma, meerü paʼajakai saaʼin wanee wunuʼu jemeta eejuut nümüin.

8. ¿Kasa amaa waaʼinrüinjatka süpüla waʼwaajüin Jehová?

⁸ Waʼwaajüin Jehová waküjapa pütchi anasü nüchiki (Sal. 34:1). Waaʼinrüin tia wanaa sümaa waküjain süchiki tü nukuwaʼipakat otta tü kasa nukumalakat. Aküjeena waya pütchi anasü kojutule wamüin tü aainjünakat wapüleerua. Jülüjale waaʼin süpüshuaʼa tü kasa anasü naainjakat Jehová wapüleerua, waʼwaajeechi nia waneepia. Waküjapa süchiki tü pütchi anasükat waʼwaajüin Jehová (Heb. 13:15, TNM). Jülüjainjatü waaʼin palajana tü wanüikinjatkat namüin na wayuukana süpüla waküjain tü pütchi anasükat namüin maʼaka jülüjain waaʼin wanüiki süpülapünaa woʼuraajüin nümüin Maleiwa. Aneesü maʼin watuma tü wanüikinjatkat süpüla waʼwaajüin Jehová.  Waküjapa pütchi namüin na wayuukana, waaʼinrajatü tia süka süpüshuaʼa waaʼin.

9. (1) ¿Kasa anasü weʼraka woutkajaale? (2) ¿Jamüsü anaka pukuwaʼipa sutuma puutkajaain?

⁹ Waʼwaajüin Jehová wanaa sümaa woutkajaain. Anuu wanee pütchi aluwataanapuʼuka anain na israelitakana: «Oʼunuinjana na wayuu tooloyuukana nuʼupala Jehová apünüintua süpüla juyakat eemüin tü mma nüneekakat napüla» (Deut. 16:16). Napütüinjatü nepia otta noumain sümüiwaʼa. Nüküjain Jehová namüin nnojoleerüin kasain aʼluwajünüin noulia sümaʼinruʼu chain naya sünain aʼwaajaa nia (Éx. 34:24). Oʼunushii na israelitakana sünain tü miʼiraa aainjünakat juyawai sümaa neʼitaain maʼin naaʼin nünain Jehová. Sünainjee tia, anasü maʼin nakuwaʼipa süka nekirajaain sünain tü Nünüikikat Maleiwa, tü kasa anasü naaʼinrakat napüleerua otta kottiraain naya namaa na wane aʼwaajakana Jehová (Deut. 16:15). Akaʼaya wayakana, anasü wakuwaʼipa süka wainmain kasa waaʼinraka süpüleerua woutkajaain. Talatakajasaʼa maʼin naaʼin Jehová yapale watuma tü wanüikinjatkat süpüla tü outkajawaakat.

10. ¿Jamüsü anaka maʼin weeʼirajüle jayeechi nümüin Jehová waʼwaajapa nia?

¹⁰ Waʼwaajüin Jehová wanaa sümaa weeʼirajüin jayeechi nümüin namaa na wawalayuukana (Sal. 28:7). Eeʼirajapuʼushii na israelitakana süpüla naʼwaajüin Jehová. Jamüshijaʼa chi aluwataaikai David, nüneeküin 288 levita süpüla neeʼirajüin suluʼu tü aʼwaajüleekat Maleiwa (1 Crón. 25:1, 6-8). Müsia maaʼulu yaa, weeʼirajüle jayeechi nümüin Maleiwa atüjaaneerü aaʼu alin maʼin nia wapüla. Nnojotsü maʼin choʼujaain anashaatainjatüin wamüraluʼu süpüla weeʼirajüin. Jülüjataa waaʼin tüü: eesü kajale wanüiki yootule waya, nnojoliipejeʼe waya kottuin sutuma tia noulia na wawalayuukana otta sünain aküjaa pütchi (Sant. 3:2). Müsia wakuwaʼipa sünain eeʼirajaa jayeechi nümüin Jehová, ayateena waya eeʼirajüin nümüin jaʼitasü nnojoluin anashaatain maʼin wamüraluʼu.

11. Saashin Salmo 48:13, ¿jamüshii wakatalüinjanaka kaʼi süpüla wekirajaain sünain tü Bibliakat namaa wachonnii?

¹¹ Waʼwaajüin Jehová wekirajaale sünain tü Nünüikikat otta yootojiraale waya namaa na wachonniikana nüchiki. Soʼu tü kaʼi neemeraapuʼukalü oʼu na israelitakana naʼwaajapuʼuin Maleiwa süpüla aleewainjanain maʼin naya nümaa (Éx. 31:16, 17). Na israelita waneepiakana nümaa Jehová nekirajapuʼuin nachonnii nüchiki otta süchiki tü kasa naaʼinrakat napüleerua. Müinjatü watuma wayakanaya, akatalüinjana waya kaʼi süpüla waashajeʼerüin jee wekirajaain sünain tü Bibliakat. Tia shia wane kasa waʼwaajaka aka Jehová, tü aleeweenakat maʼin atuma waya nümaa (Sal. 73:28). Wekirajaale namaa na wachonniikana, wakaalinjeena naya süpüla aleewainjanain maʼin naya nümaa chi Washi iipünajachikai (paashajeʼera Salmo 48:13).

12. (1) ¿Jamapuʼusü noʼuluʼu Jehová tü naʼyataainkat na akumajakana tü aʼwaajüleekat nükalioʼu Moisés? (2) ¿Kasa watüjaka sünainjee tia?

¹² Waʼwaajüin Jehová sükajee wakumajüin piichi aʼwaajülee otta waaʼinmajüin shia. Wanaa sümaa sukumajünüin tü piichi aʼwaajülee eejatkat nükalioʼu Moisés otta tü kasairua eekat sümaa, shia wanee sukuwaʼipa nuʼwaajünapuʼuka aka Maleiwa saashin tü Bibliakat (Éx. 36:1, 4). Maaʼulu yaa, waʼwaajüin Maleiwa sükajee wakumajüin Piichi Outkajaalee otta müsia waneirua piichi akumajünaka eeinjachire nuʼwaajünüin. Eeshii wawalayuu aʼyataakana maʼin sünain tia. Anasü maʼin tü naaʼinrakat süpüleerua nupueulose Maleiwa. Otta müsia, aʼyataashii naya wawalayuukana sünain aküjaa pütchi. Eeshiijaʼa noʼutku  nayakana pürekutsooleekana. Atüjaaneerü aaʼu kojutuin namüin na laülaashiikana tü naʼyataainkat naya wawalayuukana, nooʼulaale pürekutsooliin naya kettaale natuma tü achuntunakat nümüin chi eekai pürekutsooleein. Jaʼitainna atüjain waya jee matüjainre waya akumajaa piichi, eeshii süpüla wakaalinjain sünain epitajaa jee aaʼinmajaa tü Piichi Outkajaaleekat.

13. ¿Jamüshii wasülajüinjanaka nneerü süpüla tü aküjaakat pütchi sainküin mma?

¹³ Waʼwaajüin Jehová wanaa sümaa wasülajüin wanneetse süpüla süküjünüin tü pütchikat sainküin mma. Nnojoliinjana antüin na israelitakana majapüitpain nümaʼanamüin Jehová (Deut. 16:16). Asülajüinjana naya nümüin Maleiwa wanaapünaa sümaa tü eekat namaʼana. Naaʼinrüle tia, jayasü naaʼu kojutuin namüin tü naaʼinrakat Maleiwa napüleerua. ¿Jama wayakana?, ¿kasa waaʼinrajatka aire wapüla Maleiwa otta kojutule wamüin tü naaʼinrakat wapüleerua? Wanee kasa waaʼinrajatka shia wasülajüle wanneetse süpüla tü kasa choʼujaakat sümüin tü piichi eere woutkajaain otta müsia süpüla tü aküjaakat pütchi sainküin mma wanaapünaa sümaa tü eekat wamaʼana. Anuu nünüiki Pablo süchiki tia: «Müleka keeʼireere jaaʼin jüsülajeein, talateechi chi Maleiwakai jümaa, nümaa eekai washirüin müleka naapüle kojuya, je nümaa eekai müliain jaʼitashi aapüin palit» (2 Cor. 8:4, 12). Kojutusü nümüin Maleiwa wasülajüle nümüin süka süpüshuaʼa waaʼin jaʼitairü palirüin shia (Mar. 12:42-44; 2 Cor. 9:7).

14. Saashin Proverbios 19:17, ¿kasa maka aka saaʼin nümüin Jehová wakaalinjale na wawalayuu eʼrakana choʼujawaa?

¹⁴ Waʼwaajüin Jehová wakaalinjale na wawalayuu eʼrakana choʼujawaa. Naapüin naʼanasia Maleiwa namüin na israelita akaalinjakana na manneetsekana (Deut. 15:7, 10). Wakaalinjale wanee wawala eʼrakai choʼujawaa müshii wasülajakai aaʼin nümüin Jehová (paashajeʼera Proverbios 19:17). Jamüshiijaʼa na anoujashii chajanakana Filipos, asülajüshii nümüin Pablo wanaa sümaa püreesain nia. Naashin Pablo, tü nasülajakat nümüin müsü aka saaʼin wanee asülajuushi talataka atuma naaʼin Maleiwa (Filip. 4:18). Jülüja waaʼin nakuwaʼipa na wawalayuu outkajaakana wamaa otta wasakireʼera waaʼin sünain tüü: «¿Eeshiche wanee wawala eekai süpüla takaalinjain?». Anasü nümüin Jehová wakatarüle kaʼi otta waapüle süpüshi tü kasa wamaʼanakat süpüla wakaalinjain na eʼrakana choʼujawaa. Waʼwaajüin nia waaʼinrüle tia (Sant. 1:27).

15. ¿Jamüshi waʼwaajaka Jehová mayaainjeʼe nnojoluin mapüleein shia wamüin?

¹⁵ Mayaainjeʼe nnojoluin mapüleein aʼwaajaa Jehová maʼaka nücheküin shia, waaʼinrüin tia süka alin nia wapüla (1 Juan 5:3). Jülüjataa waaʼin nukuwaʼipa wanee jintüi asülajeekai wanee kasa nümüin nüshi, eesüjaʼa süpüla wattaawain kaʼi naaʼu sünain epintajaa wanee dibujo, nnojotsü akulajaain naaʼin sünain tia süka alin nüpüla chi nüshikai otta talateein naaʼin nutuma sümaa tü nüsülajeekat nümüin. Akaʼaya wayakana, waaʼinrüin waneirua kasa süpüla waʼwaajüin Jehová süka alin nia wapüla jaʼitashii kupaain waya.

16. Saashin Hebreokana 6:10, ¿jamüsü naaʼin Jehová süchiki tü paaʼinrakat süpüleerua puʼwaajüin nia?

¹⁶ Na wayuu aikana apüla nachonnii natüjaa aaʼu eein süpüla naatawalin tü nasülajeekat nachonnii namüin waneʼewai nakua. Natüjaa aaʼu naatawalin nakuwaʼipa nachonnii otta tü eekat süpüla nountuin waneʼewai nakua. Müsia nukuwaʼipa chi Washi iipünaajachikai, nütüjaa aaʼu tü eekat süpüla wountuin  waneʼewai wakua. Eesü süpüla wainmain kasa puuntaka noulia na paʼaleewainkana jee shiale palirüin tü kasa puuntakat noulia na waneinnua saaʼujee laülaain pia, ayuulin pia jee shiale saaʼujee paaʼinmajüin püpüshi. Nnojotpejeʼe mojuinjatüin paaʼin saalinjee tia (Gal. 6:4). Nnojoleerü motuin naaʼin Jehová tü kasa paaʼinrakat nüpüleerua. Paapüle nümüin wanee kasa süka süpüshuaʼa paaʼin, talateechi nia pümaa (paashajeʼera Hebreokana 6:10). Nütüjaa aaʼu Jehová tü suluʼukat paaʼin otta keeʼireesü naaʼin talatüin paaʼin sümaa tü paaʼinrakat süpüla puʼwaajüin nia.

17. (1) ¿Kasa waaʼinrüinjatka kapüleere wamüin süpüshi tü eekat süpüla waʼwaajüin akajee Maleiwa? (2) ¿Eesüche wanee kasa paaʼinreeka saʼakajee tü pütchi kanüliakat « Waaʼinrajatka süpüla talatüin maʼin waaʼin»?

¹⁷ ¿Kasa waaʼinrajatka kapüleere wamüin süpüshi tü wekirajaaitpakalü anain, maʼaka saaʼin ekirajawaa sünain tü Bibliakat otta aküjaa pütchi? Waaʼinmaale maʼin shia kamalainjeerü wamüin otta talateerü waaʼin. Tü aʼwaajakat Maleiwa müsü aka saaʼin aainjaa ejercicio otta aʼyalajiraa maasi. Wooʼulaküle neʼe soʼu wanee kaʼi, nnojoleena atüjain maʼin waya. Wooʼulaküinjatü waneepia süpüla watüjainjanain süpüleerua. Shiasaʼa mapa, kamalainjeerü maʼin wamüin aainjaa ejercicio otta waʼyalajirüin tü maasikat, nnojoleerü akulajaain waaʼin sümaa. ¿Eesüche süpüla müin sukuwaʼipa nuʼwaajia Maleiwa watuma?

18. (1) ¿Kasa waaʼinrajatka süpüla wekeraajüin tü niʼitaakalü apüla waya Maleiwa? (2) ¿Kasa eeka sünainjee tia?

¹⁸ Waʼwaajüle Jehová süka süpüshuaʼa waaʼin, wekeraajeerü tü niʼitaakalü apüla waya. Sutuma tia, talateerü waaʼin, watüjaajeerü aaʼu tü waaʼinrajatkat otta eeshi süpüla waʼwaajüin Jehová süpüla kaʼikat süpüshuaʼa (Prov. 10:22). Maaʼulu yaa eeitpa süpüla jimatüin waaʼin süka watüjaain saaʼu nükaalinjain waya Jehová soʼunnaa tü alatakat wamüin (Is. 41:9, 10). Wainma tü kasa talatakalü atuma waaʼin sünainjee waʼwaajüin chi Wamaleiwasekai Jehová. Nia neʼe waʼwaajüinjachikai nümüiwaʼa süka niain kakumalain kasakat süpüshuaʼa (Alat. Map. 4:11).