1, 2. Nita Jehová mike täte ye kadre ngäbiti kwe yekäre, ¿nikwe dre mada nuaindre?

 NGÖBÖ mikata täte nieta ngwane, ¿dreta nüke mä töite? Ja mräkä iti tä ngukodokwäbiti jän o cama kwe ken aune tä orare ja brukwä tätebiti Jehovai ye raba nüke mä töite. O nitre ja mräkäre tä ja tötike gwairebe Bibliabätä ye bä raba nemen mä okwäte.

² Kukwe ketebu bämiri nekänti nitre ye tä Ngöbö mike täte. ¿Akwa niaratre tä kukwe nuainne ye Jehová tä kain ngäbiti? Jän, Ngöbö töita ño ye ererebätä tätre kukwe nuainne, tätre nuainne ja brukwä tätebiti aune Ngöbö mikakäre ütiäte jai ye ngwane, Ngöböta kain ngäbiti. Jehová tare krubäte nikwe aune ni rabadre niara mike täte ye gare nie, ye medenbätä ni tö niara mikai täte bäri kwin.

3. ¿Drebätä nikwe ja tötikai kukwe ja tötikara nekänti?

³ Jehová mika nämäne ño täte kirabe aune niara nämäne kain ngäbiti bätä kukwe keta kwä nuainta Ngöbö mikakäre täte kä nengwane, ye niara tä kain ngäbiti ye nikwe mikai gare jai kukwe ja tötikara nekänti. Ni täi ja tötikebätä ngwane, ni raba Ngöbö mike täte ño bäri kwin yebätä nikwe töbikadretari. Aune nita kukwe metre mike täte ye raba kä mike ño bäri juto nibätä ye nikwe mikai gare jai arato.

4. Nitre Jehová mikaka täte Kristo känenkri ye nämäne Jehová tarere aune mike ütiäte jai, ¿ye bämikani ño kwetre?

⁴ Kristo känenkri nitre ja ngwanka metre, Abel, Noé, Abrahán aune Job ye nämäne Jehová tarere aune mike ütiäte jai ye bämikani kwetre. ¿Nuainbare ño kwetre? Nämänentre kukwe mike täte, nämänentre tödeke aune kukwe ñaka nuäre nuainne yebiti.  Niaratrekwe Jehová mikani ño täte ye Biblia ñaka mike gare metre ta. Akwa niaratrekwe ja di ngwani Jehová mikakäre ütiäte jai aune niaratre käkwe Jehová mikani ño täte ye Jehovakwe kani ngäbiti. Kä nikani ta ye bitikäre, Kukwe Biani Moisés ie ye Ngöbökwe biani Abrahán mräkätre ie. Jehová mikadre ño täte ye ie Jehová tö nämäne ye mikani gare metre ta kwe kukwe biani kwe yebätä.

5. ¿Jehová mika jatani ño täte Jesús murie ketani aune ganinkröta ye bitikäre?

⁵ Jesús murie ketani aune ganinkröta ye bitikäre, juta Jehovakwe käkwe Kukwe Biani Moisés ie ye mikadre täte ye Jehovakwe ñaka ribebare jankunu ietre (Rom. 10:4). Ñakare aune, nitre kristiano käkwe ja jie ngwandre kukwe mrä yebiti, ye abokän “kukwe ükaninte Kristokwe” (Gál. 6:2, TNM). Kukwe ye mikadre täte kwetre yekäre, ñaka kukwe mikadre gare ja töibiti kwetre jai aune kukwe meden kwin aune kukwe meden ñäkäita ietre ye ñan rabadre mike gare jökrä jai. Ñakare aune Jesukwe kukwe bämikani aune kukwe driebare kwe ye ererebätä rabadre ja jie ngwen. Kä nengwane arato, nitre kristiano tä ja di ngwen ja ngwankäre Kristo erere, ne kwe rabadre kukwe kwin nuainne Jehová okwäbiti aune töi rabadre jäme (Mat. 11:29).

6. ¿Kukwe ja tötikara ne raba ni dimike ño?

⁶ Nita Jehová mike ño täte ye nita mike gare jai ngwane, nikwe kukwe ne ngwandretari jai: “¿Ti ririabarera nuäi kukwe ja üairebiti? ¿Tita Ngöbö mike ño täte ye ti raba nuainne bäri kwin ya?”. Ni ririabarera nuäi kukwe ja üairebiti ye käi tädre juto nibätä ye kwin, akwa kukwe meden ni raba nuainne bäri kwin ye Jehovakwe mikadre nüke gare nie ye nikwe ribedre ie.

7. ¿Nita orare ja brukwä tätebiti Jehovai ye tuin ño ie?

⁷ Nita orare Jehovai yebiti nita niara mike täte. Biblia yebätä orasion ye ketata incienso sribe nämäne kwin yebätä. Incienso ye bian nämäne tabernáculo yete aune ye bitikäre bian jatani templo yete (Sal. 141:2). Incienso ye rä nämäne nemen mate bäni Jehovabiti. Ye erere arato, nita orare ie kukwe braibebiti akwa nita nuainne ja brukwä tätebiti ie ye ngwane, “käita nemen jutobätä” (Prov. 15:8; Deut. 33:10). Nita Jehová tarere aune debe bien ie ye nikwe mikadre gare Jehovai ye tuin kwin krubäte ie, ye kukwe keta kabre tä mike gare. Ni tö dre ie, dre tä ni mike töbike aune dre ie nita tö ngwen yebätä nikwe blitadre ben ye ie niara tö. Ye medenbätä, ¿ni jämi orasion nuainne ye känenkri nikwe dre niei yebätä ni raba töbike kwin käne? Ye erere mäkwe nuaindi ngwane, “incienso” bäri kwin ye mäkwe biain mä Rün kä kwinbiti ie.

8. ¿Dre kwin krubätebiti ni raba Ngöbö käikitekä?

⁸ Nita Jehová käikitekä yebiti nita niara mike täte (Sal. 34:1). ¿Ni raba Jehová käikitekä ño? Niara töi kwin keta kabre aune jondron sribebare kwe yebätä nita blite kä jutobiti ye ngwane. Ni iti tä debe bien ja brukwä tätebiti ye köböire tä ni mada käikitekä. Kukwe keta kabre kwinkwin nuainbarera Jehovakwe ni kräke, yebätä nikwe kä diainkä jai töbikatarikäre ngwane, kukwe ñaka krütadi jire nie niara käikitakakäre. Kukwe drie ye köböire ni raba kukwe nuainne Jehová käikitakakäre ye abokän “Ngöbö käikitadrekä nikwe ja kadabti” (Heb. 13:15). Nikwe dre niei Jehovai yebätä nita töbiketari kwin käne ni jämi orare ye ngwane. Ye erere arato, nikwe dre niei nitre ie yebätä nikwe töbikadretari kwin ni jämi niken kukwe driere ngwane, nikwe ye erere nuaindre ye kwin. Kukwe nuainta nikwe Jehová käikitakakäre ye rabadre bare bäri kwin ye ie ni tö. Nita niken kukwe metre driere nitre ie ngwane, nita blite ja brukwä tätebiti.

9. ¿Juta Ngöbökwe tä kwen gätäbätä ye köböire kukwe meden kwin tä nemen kwe aune gätä ye mä dimikanina ño?

⁹ Nita niken gätäbätä ngwane, nita Jehová mike täte. Nitre israelita kirabe ie, kukwe ne erere niebare: “Bämä jire kä kwatire kwatire te, nitre brare ye jökrä rabadre nemen Jehová Ngöbö  mäkwe ye ngwärekri kä dianinkä kwe yekänti” (Deut. 16:16). Niaratre ñaka rabadre nitre mikete jubäkrä jakrä aune kä kwe ngübakäre. Akwa Jehovakwe kukwe ne käbämikani ietre: “Nitre ñakare jire iti tö rabadi kä mäkwe ye diandi jai” (Éx. 34:24). Fiesta nuain nämäne kä kwatire kwatire te yebätä nitre israelita nämäne niken ngwane, nämänentre tö ngwen kwatibe Jehovai. Ye köböire kukwe kwin keta kabre nämäne nemen kwetre: Kukwe Ngöbökwe nämäne nüke gare bäri kwin ietre, kukwe keta kabre kwin nuain nämäne Jehovakwe kräketre yebätä nämänentre töbiketari aune nitre mada Jehová mikaka täte yebe nämänentre ja kete, ye käi nämäne nemen juto bätätre (Deut. 16:15). Nita ja di ngwen rikakäre gätäbätä ye köböire kukwe kwin tä nemen nikwe arato. Nita ja kite kwin blitakäre kukwe braibebiti aune nita töbiketari kwin blitakäre gätäte ye käita nemen juto krubäte Jehovabätä.

10. ¿Kantata ye ütiäte krubäte Jehová mikakäre täte ye ñobätä ni raba niere?

¹⁰ Nita kantare Jehová ie ja mräkätre ben ngwane, nita niara mike täte (Sal. 28:7). Kantadre ye nämäne ütiäte krubäte nitre israelita kräke, ñobätä ñan aune yebiti nämäne Jehová mike täte. Ñodre, rei David käkwe nitre levita 288 dianinkä kantakäre templote (1 Crón. 25:1, 6-8). Kä nengwane arato, ni raba Jehová käikitekä nita kantare yebiti aune niara tare nikwe ye bämikakäre ie. Ni kukweita ngitiekä ño kantakäre ye ñan ai bäri ütiäte. Töbike kukwe nebätä: nita blite ngwane, “ni jökrä käta ja mike ngite”, akwa ye ñaka tä ni ketebätä blitakäre konkrekasionte aune kukwe drie yekänti (Sant. 3:2). Ye erere arato, ni ñan kukwei ngitiekä kwin dikaro kantakäre ye ñaka ni ketadrebätä kantakäre Jehovai.

11. Salmo 48:13 tä niere erere, ¿ñobätä ni rabadre kä denkä jai ja tötikakäre Bibliabätä ni mräkätre yebe?

¹¹ Nita ja tötike Ngöbö kukwei yebätä aune blitebätä monsotre nikwe ben ye ngwane, nita Jehová mike täte. Nitre israelita nämäne dre nuainne käre, ye nämänentre tuenmetre ken sábado kratire kratire te ja ketakäre bäri kwin Jehovabe (Éx. 31:16, 17). Nitre israelita ja ngwanka metre ye nämäne blite monsotre kwetre ben Jehovabätä aune kukwe kwin nuain nämäne Jehovakwe yebätä. Ye erere arato, kukwe keta kabre tä nuaindre nie akwa nikwe kä diandrekä jai ñäkäkäre Bibliabätä aune ja tötikakärebätä. Yebiti nita Jehová mike täte aune ye käkwe ni dimikai rökrakäre bäri niara ken (Sal. 73:28). Ne madakäre, nita ja tötike gwairebe ni mräkätrebe, ye köböire ni raba monsotre nikwe ye dimike ja kete kwin krubäte ni Rün kä kwinbiti ni tarekä yebe (ñäkädre Salmo 48:13 yebätä). *

12. ¿Nitre käkwe jondron sribebare tabernáculo kräke ye namani tuin ño Jehovai aune ye tä dre driere nie?

¹² Nita ju sribere Jehová mikakäre täte aune nita ngübare yebiti nita niara mike täte. Sribi nuainbare tabernáculo yebätä aune jondron nämäne tabernáculo yete yebätä ye abokän “sribi deme” kwrere mikata gare Bibliabätä (Éx. 36:1, 4). Kä nengwane arato, Ju Ja Ükarakrö sribeta aune ju mada mada sribeta Jehová kräke ye sribi deme nuainta ye kwrere tuin Jehovai. Ja mräkätre tä kä denkä krubäte jai sribi ye erere nuainkäre aune tätre sribire Gobran Ngöbökwe kräke yebätä nita debe bien krubäte ietre. Akwa, niaratre tä kä denkä jai kukwe driekäre arato. Niaratre ruäre ye tö ja mikai prekursor arato raba ruin nie. Ye medenbätä, dre dre ribeta rabakäre prekursor ye erere nemen bare ietre ye ngwane, nitre umbre ji ngwanka tä tuenmetre sribi prekursor nuainne, yebiti nitre umbre ji ngwanka tä sribi ye dimike ye bämikata kwe. Ju sribe gare nie o ñakare, akwa yebiti ta ni jökrä raba ju keta kabre sribeta ye ngübare kwin aune ükete mrebe.

13. Ngwian bianta sribi Ngöbökwe nuainta kä jökräbiti tibien ye dimikakäre, ¿ye nikwe mikadre tuin ño jai?

¹³ Sribi nuainta Gobran Ngöbökwe kräke ye  nita dimike ngwian bianta nikwe yebiti ngwane, nita Jehová mike täte. Kirabe sete, nitre israelita ñaka rabadre niken kise tökare Jehová ngwärekri (Deut. 16:16). Ñakare aune niaratre raba dre bien ye ererebätä nämänentre jondron bien. Niaratre nämäne kukwe ye erere nuainne ngwane, kukwe kwin keta kabre nämäne nemen kwetre kukwe ja üairebiti, yebätä nämäne debe bien krubäte ye bämika nämäne kwetre. Nita Jehová tarere aune kukwe keta kabre bianta kwe nie ja üairebiti yebätä nita debe bien krubäte ie ye ni tö bämikai ie ngwane, ¿ni raba dre nuainne? Kukwe keteiti ni raba nuainne ye abokän ni raba ngwian bien konkrekasion nikwe kräke aune sribi Ngöbökwe nuainta kä jökräbiti tibien ye kräke, ni di raba nüke nuäi ye ererebätä. Apóstol Pablo käkwe kukwe ye mikani gare krörö: “Ni töta nebe jändrän biain era metre ja moto kuinbti amne jändrän tä nuäi nuäi nikwe abko erere nita bien, ye abko dbe Ngöbökrä amne Ngöböta kaen ngäbti ja moto kuinbti nie arato. Jändrän ñakare nikwe, ye abko Ngöböta kärere ñakare nie” (2 Cor. 8:4, 12). Nita jondron bien chi, akwa ja brukwä tätebiti ye ütiäte krubäte Jehová kräke (Mar. 12:42-44; 2 Cor. 9:7).

14. Proverbios 19:17 tä niere erere, ¿ja mräkätre meden tä ja di ribere ye nita dimike ye tuin ño Jehová ie?

¹⁴ Ja mräkätre meden tä jondron ribere jai ye nita dimike ngwane, nita Jehová mike täte. Nitre israelita meden käkwe nitre bobre dimikadre, ye kräke Jehovakwe kukwe kwin nuaindi ye käbämikani kwe ietre (Deut. 15:7, 10). Ja mräkätre meden tä jondron ribere jai ye nita dimike ngwane, nita jondron bien Jehovai ye erere tuin ie (ñäkädre Proverbios 19:17 yebätä). * Ñodre, Pablo nämäne ngite ngwane, nitre kristiano Filipo käkwe jondron juani Pablo kräke, kukwe ye kwrere nuainta abokän tä nemen tuin kwin krubäte Ngöböi niebare Pablokwe (Filip. 4:18). Ani töbike ja mräkätre konkrekasion nikwe yebätä aune ani kukwe ne ngwentari jai: “¿Ja mräkätre meden tä ja di ribere ye ti raba dimike?”. Nita kä denkä jai, ja di yebiti, kukwe nuain gare nie yebiti aune jondron tärä nikwe yebiti nita nitre tä ja di ribere ye dimike, ye tuin kwin krubäte Jehovai. Nita kukwe ye erere nuainne yebiti nita niara mike täte ye erere tuin ie (Sant. 1:27).

15. Ni rabadre kä denkä jai aune ja di yebiti Jehová mike täte ye ñaka tribe doboko ye kwrere, ¿ye ñobätä ni raba niere?

¹⁵ Nikwe Jehová mikadre täte niara tö ño ie ye erere, yekäre nikwe ja di ngwandre aune kä diandrekä jai. Akwa kukwe ye ñan tribe doboko ye kwrere (1 Juan 5:3). ¿Ñobätä ñaka kore? Ñobätä ñan aune, nita niara tarere. Monso chi tö jondron biain rün kwe ie ye ani bämike ja okwäte. Monso chi ye raba ora kabre te dibujo ye sribere rün kwe kräke, akwa ñaka tuin tribe doboko ye kwrere ie, ñobätä ñan aune rün ye tare kwe aune jondron biandre kwe rün ie ye käi jutobätä. Ye erere arato, Jehová tare krubäte nikwe yebätä nita kä denkä jai aune ja di yebiti Jehová mike täte ye käi juto krubäte nibätä.

16. Hebreos 6:10 tä niere erere, ¿mätä ja di ngwen ja ngwankäre kwin Jehová okwäbiti ye tuin ño ie?

¹⁶ Nitre rüne tä monsotre kwetre tarere ngwane, monsotre kwe käkwe jondron ja erebe biain ie ye ñaka ngübata kwe. Ñobätä ñan aune, monsotre ye ñaka ja erebe aune tä ja tuin kukwe jene jene ben ye gare kwin ie. Ye erere arato, kukwe jene jene tä ni kisete ye nüke gare kwin ni Rün kä kwinbiti ie. Ñodre, mä raba sribire bäri ni mada ye kräke o ja ketamukotre mäkwe ye kräke ni raba niere. O mäta bren, mäta umbre aune mä mräkätre tä ngübadre mäi yebätä mä ñaka raba sribire krubäte nitre mada ye erere ni raba niere. Akwa mä ñaka ja di ngwan nekä kukwe yebätä (Gál. 6:4). Nikwe kukwe kwin nuaindi Jehová kräke aune töi kwinbiti ngwane, kukwe ye käi täi juto krubäte Jehovabätä. Mäkwe  dre nuaindi Jehová kräke ye ñaka käi rikwitaikäbiti (ñäkädre Hebreos 6:10 yebätä). * Ño töire mätä kukwe nuainne ye gare kwin krubäte Jehovai. Mätä Jehová mike ño täte ye käi tädre juto mäbätä aune ja tädre ruin kwin mäi kukwe yebätä ye ie Jehová tö.

17. a) Nita kukwe nuainne Ngöbö mikakäre täte ye ruäre ñaka tä nemen nuäre ni kräke nuainkäre ngwane, ¿ni raba dre nuainne? b) Kukwe mikata gare recuadro “ Ni raba nüne ño bäri kä jutobiti” yete, ¿ye meden käkwe mä dimikanina?

¹⁷ Kukwe nuainta nikwe Jehová mikakäre täte ye ñaka nemen nuäre ni kräke nuainkäre rabadre gare nie, ñodre ja tötike Bibliabätä o kukwe drie ye ngwane, ¿ni raba dre nuainne? Nikwe kä diainkä bäri jai kukwe ye kräke ngwane, bäri kä rabai juto nibätä aune rabai tuin kwin nie ye rükai gare nie. Nita kukwe nuainne Ngöbö mikakäre täte ye bämika raba ejercicio nuainta o ni töta nemen musika täkäi yebätä. Nita nuainne nane nane ye ngwane, ñan raba nemen bare kwin nie. Akwa nikwe nuaindi köbö kwatire kwatire, kena nikwe kä diainkä chi jai biti nikwe kä diainkä bäri jai ngwane, kukwe kwin nemen bare ye nikwe tuai. Kä rikai ta ye bitikäre, ora ye rükadre jötrö käi ngwankäre juto jabätä ye ie ni tö jatai. Nita kukwe nuainne Ngöbö mikakäre tätebätä, ¿ñobätä ni ñan raba kukwe ye erere nuainne?

18. Kukwe meden bäri ütiäte nuaindre nikwe aune nikwe nuaindi ngwane, ¿ye köböire kukwe kwin meden rabai nikwe?

¹⁸ Nita Jehová mike täte ja brukwä tätebiti, yebiti nita kukwe bäri ütiäte nuainne. Nita kukwe ye erere nuainne ngwane, nita nüne kä jutobiti kukwe ütiäte kräke aune ni raba nemen Jehová mike täte kärekäre (Prov. 10:22). Kukweta nemen ni kisete ngwane, Jehovata juto biare ni dimikakäre ye gare nie ye tä ni töi mike jäme (Is. 41:9, 10). Ni Rün ni tarekä käkwe jondron jökrä sribebare, yebätä jondron jökrä ye rabadre mike ütiäte jai aune käikitekä ye nita mike täte, ye kukwe keta kabre tärä nie kä ngwankäre juto jabätä (Apoc. 4:11).