1-2. Bichi byakarhuma Mungu ayemera obuharamye bwerhu?

 BICHI onabona omu bwenge eyi wayunva echinwa “buharamye”? Nkabaga onabona mwene-werhu w’omwirhohye ofukamire embere z’obuliri bwage ali abwira Yehova ebili omu murhima gwage embere alyame. Changwa nkabaga onawaza omulala gugwerhe obusime guyikere haguma yibajira efunzo lyabo lye Biblia.

² Mw’ezola hali zombi, ebi bali bajira bihirirwe omu bijiro by’obuharamye. Yehova ayemera obola buharamye bwabo si? Abuyemera akaba bali bachihangana kujira obulonza bwage, bamuzigiire, banamukengere. Rhuzigiire Yehova bwenene. Rhumenyere oku yirhukwanene rhuharamye, rhunalonzeze rhumuharamye omu bulyo bukwirire bwenene nk’oku byakashobokana koshi.

3. Bichi rhwaganirako mu gunola mwazi?

³ Mu gunola mwazi, rhwashuba kubona buharamye buli gurhe Yehova aliyemerere mira, rhwaganira na ku bigabi munane by’obuharamye Yehova ayemerere zene. Oku rhuli rhwabishambalako, buli muguma werhu awaza gurhe akakwiza okuntu anaharamya. Rwashuba kubona bulagurhe obuharamye b’okuli bunarhulerhera obusime.

4. Gurhe abaliri baharamya Yehova embere Yesu ayinje, baliyerekene oku bamukengere, banamuzigiire?

⁴ Embere Yesu ayinje, abalume b’obwemere nka Abeli, Nowa, Abrahamu na Yubu, baliyerekene obukenge  n’obuzigire bwabo ku Yehova. Nka gurhe? Kugerera obukenge bwabo, obwemere, n’enterekero baliri bamuha. Ebiblia erhaderhere byoshi baliri bajira omu kumuharamya. Aliko biboneke oku balijrire okwabo koshi yibaha Yehova olukengo, anayemera obuharamye bwabo. Buzinda Yehova ahereza oluburho lwa Abrahamu Esheriya ya Musa. Amola marhegeko maliyerekene okuntu bakajira omu kuhereza Yehova obuharamye ayemerere.

5. Bichi byahindamukire omu buharamye b’okuli enyuma y’okufa n’okufuka kwa Yesu?

⁵ Enyuma y’okufa n’okufuka kwa Yesu, Yehova arhalichihemere abantu bakenge esheriya ya Musa. (Ro. 10:4) Abakrisu balikwanene bakulikire esheriya mpyahya, “esheriya ya Kristu.” (Gal. 6:2) Balikwanene bakenge elyo “rhegeko,” arhali mp’omu kulifarha omu rhwe n’okugwarha eperu lilehere ly’ebintu rhukwanene kujira n’ebirhurhakwanene kujira, sy’omu kuyiganya omufano gwa Yesu n’okukulikira enjira zage. Na zene, Abakristu banajira okwabo koshi omu kukulikira Yesu yibasimisa Yehova ‘‘n’okuchiluhusya”.​—Mt. 11:29.

6. Bichi gunola mwazi gwarhurhabalamo?

⁶ Oku rhuli rhwaganira ku buli chigabi ch’obuharamye bwerhu, ochibaze: ‘Maja-mbere machi najirire mw’echila chigabi?’ Kandi wakashuba kuchibaza; ‘nakachihangana nkwize obuharamye bwani si?’ Okwanene oyunve obusime oku bilolere amaja-mbere wakolere, aliko kandi okwanene osalire Yehova n’omurhima goshi akurhabale orhegeere aha bihemere okwize.

7. Gurhe Yehova anabona amasala merhu marhengerere oku murhima?

⁷ Rhunaharamya Yehova amango rhwamamusalira. Amandiko mahuzenye amasala merhu n’obuvumba burheganyizwe bwinja bwaliri bwahaanwa oku tabernakulo na buzinda oku hekalu. (Zb. 141:2) Obola buvumba bwaliri bwajira omusingu gusimisize Mungu. Konakuguma, amasala merhu manamusimisa, chiro rhwakolesa ebinwa biyorohere. (Mez. 15:8; Kum. 33:10) Che chirhumire rhwakachizera oku Yehova anasima kuyunviriza amasala merhu mayerekene kangana gurhe rhumuzigiire n’eshukrani rhumuherheko. Alonzeze rhumubwire ebirhulazize, ebirhunihire, n’enyifinjo zerhu. Embere oyegere Yehova omu sala, chakarhuma orharhanga kuwaza oku bi wamubwira? Omu kujira ntyo, waha Yisho w’embingu “obuvumba” bukwirire nk’oku byakashobokana koshi.

8. Kasanzi kahe kenja rhuherhe k’okusingiza Mungu?

⁸ Rhunaharamya Yehova amango rhuli rhwamusingiza. (Zb. 34:1) Rhunasingiza Yehova omu kubwira abandi oku ngeso zage zinja bwenene, n’ebyakolere. Amango omurhima gwerhu guyunjwire mw’eshukrani, rhwanabona binene rhwakamusingizako. Nka rhurholere akasanzi k’okuwaza oku bwinja bwa Yehova; k’okuderha ku byoshi arhujirire, rhurhakafa rhwabulire empanvu z’okumusingiza. Akasi k’okuhubiri kaba kasanzi kenja “k’okuha Mungu enterekero y’okusingiza, k’okuderha, etunda ly’obunu bwerhu.” (Ebr. 13:15) Nka kulala birhuhemere rhuwaze bwenene oku bi rhwabwira Yehova embere rhumusalire, ku binahemere kandi rhuwaze bwinja oku bi rhwabira abandi omu mahubiri. Rhulonzeze ‘enterekero yerhu y’okusingiza’ ebe nyinja bwenene. Che chirhuma eyi rhwabwira abandi oku bilolere obukweri bwe Biblia, rhunaderha ebirhengere oku murhima.

9. Kuguma n’Abaizraeli ba mira, nyungu zichi embuganano zinarhulerhera? Lerha omufano guyerekene gurhe wayungukire n’embuganano bwawe-bwawe.

 ⁹ Rhunaharamya Yehova omu kuhika oku mbugano. Abaizraeli ba mira balibwirirwe ntya: “Turu esharhu omu mwaka, abalume benyu boshi bakwanene babonekane embere za Yehova Mungu wawe ahantu achishoga.” (Kum. 16:16) Balikwanene baleke enju n’amashwa mabo buzira omuntu w’okubichunga. Aliko Yehova abalaganya ntya: “Nta muntu wachifija echihugo chawe amango waba wagendere kubona amalanga ma Yehova Mungu wawe.” (Kut. 34:24) Bulala abola Baizraeli balilangalire Yehova bwenene, baliri bahika oku mbuganano zikulu za buli mwaka. Baliri bayunguka binene nk’okuyongera obumenyi bwabo bwe Sheriya ya Mungu, okukengeera oku bwinja bwage, n’okusiimira okuba haguma n’abandi bemezi. (Kum. 16:15) Nerhu rhunapata enyungu zili nk’ezola amango rhwamachihangana kuhika oku mbuganano ze Chikristu. Jaga wawaza okuntu Yehova anasima ey’abona rhwayinja oku mbuganano eyi rhwarheganyize omu kuntu rhugale kuhaana ebishubizo biyufuhire, aliko biderhere binene.

10. Bulagurhe okuyimpa chiba chigabi ch’akamaro omu buharamye bwerhu?

¹⁰ Rhunaharamya Yehova omu kuyimpa haguma na bene-berhu na bali-berhu. (Zb. 28:7) Abaizraeli balibwene k’okuyimpa chili chigabi ch’akamaro omu buharamye bwabo. Omwami Daudi alishimikire Balawi 288 babe bayimpaji oku hekalu. (1 Nya. 25:1, 6-8) Zene, rhwakayereka Mungu werhu oku rhumuzigiire, amango rhwamayimpa enyimpo z’okumusingiza. Okukwira k’omulenge gwerhu arhali ch’echintu ch’akamaro. Rhurhole omufano: Nka rhuli rhwaderha, “rhweshi rhuzigana kusirhalira omu luderho,” aliko chirhabuza rhurhaderha omu chibaga n’omu mahubiri. (Yak. 3:2) Konakuguma rhwakagenderera kuyimpira Yehova erenge chiro akaba rhuwazize ku rhurhenji kuyimpa bwinja.

11. Nk’oku Zaburi 48:13 eyerekene, bulagurhe rhukwanene kupanga akasanzi k’okuyiga Ebiblia omu mulala?

¹¹ Rhunaharamya Yehova omu kuyiga Echinwa chage n’okuyigiriza abana berhu oku bimulolere. Esabato yaliri yaha Abaizraeli akasanzi k’okurhanga kuleka amakasi mabo ma buli lusiku, bawaze bwenene oku bwira bwabo haguma na Yehova. (Kut. 31:16, 17) Abaliherhe obwemere mubo, baliri bayigiriza abana babo oku bilolere Yehova n’obwinja bwage. Nerhu rhukwanene kuchipangira akasanzi k’okusoma n’okuyiga Echinwa cha Mungu. Chili chigabi ch’obuharamye bwerhu emwa Yehova, kandi kunarhurhabala rhuyorhe hofi-hofi naye. (Zb. 73:28) N’amango rhwamayiga haguma omu mulala, rhwanarhabala echizazi chihyahya; k’okuderha abana berhu, nabo bakuze obwira bwa hofi-hofi na Darha muzigirwa w’embingu.​—Osome Zaburi 48:13.

12. Bichi rhwakayiga oku bilolere okuntu Yehova aliri abona abarhalaga kukola ebiloleso by’omu tabernakulo?

¹² Rhunaharamya Yehova omu kuyumbaka n’okukwiziza efasi z’okuharamizya. Ebiblia ederhere ok’okukola etabernakulo n’ebikoleso byamo kaliri “kasi kachesibwa.” (Kut. 36:1, 4) Zene naho, Yehova anabona akasi k’okuyumbaka Amachumbi m’Obwami, n’ezindi nju z’echiteokrasi oku kali kasi kachesibwa. Bene-berhu na bali-berhu banene banageza bisanzi binene mw’akola kasi. Ka rhurhasimisizwe bwenene n’eyola nshololo y’akamaro banahaana oku kasi k’Obwami? Arhali mpu hosh’aho, banakola n’oku kasi k’amahubiri. Chiro na baguma mubo bakarhola obupainiya. Abashamuka bakayerekana oku bashigikire akasi k’okuyumbaka omu kuyemerera buzira nganagane,  abanachihaana bwenene mw’akala kasi babe bapainiya omu mango bayeneze ebihemerwe. Rhube rhumenyerere akasi k’okuyumbaka changwa nanga, rhweshi rhwakarhabala y’ezola nju zigenderera kuyorha zichere, zinakwizizwe bwinja.

13. Gurhe rhukwanene rhubone enshololo rhunahaana omu kurhabala oku kasi k’obwami?

¹³ Rhunaharamya Yehova omu kugwasa oku kasi k’Obwami kugerera enshololo zerhu. Abaizraeli barhalikwanene kuja embere za Yehova maboko momu. (Kum. 16:16) Balikwanene balerhe ebintu by’omubiri ah’obuhashe bwabo bunahikire. Omu kujira ntyo baliri bayerekana eshukrani yabo ku Yehova oku bintu byoshi abajirire. Gurhe nerhu rhwakayerekana eshukrani yerhu ku Yehova oku bintu by’ekiroho byoshi ali arhuha? Njira nguma, kuli kuhaana enshololo z’okurhabala oku kasi k’omu chibaga cherhu n’ak’omu gulu lyoshi ah’obuhashe bwerhu bunahikire. Entumwa Paulo alibiderhereko ntya: “Akaba obulonza burhangire kubaho, buyemererwe ahanene, oku by’omuntu aherhe s’arhali oku by’arhaherhe.” (2 Kor. 8:4, 12) Yehova anasima enshololo rhunahaana n’omurhima goshi, chiro yakaba egehere gurhe.​—Mk. 12:42-44; 2 Kor. 9:7.

14. Nk’oku Mezali 19:17 eyerekene, gurhe Yehova anabona ebi rhunajira omu kurhabala bene-berhu bali omu bulagirire?

¹⁴ Rhunaharamya Yehova omu kurhabala aberhu Bakristu bali omu bulagirire. Yehova alilaganyize oku ajuha Abaizraeli baliri baha abakene n’omurhima goshi. (Kum. 15:7, 10) Nechi, amango moshi rhwamarhabala mwene-werhu changwa mwali-werhu oli omu bulagirire, Yehova anabona oku eli ntuulo rhumuhere. (Osome Mezali 19:17.) Omufano, amango Paulo aliri omu pirizo, Abakristu be Filipi bamurhumira oburhabale, abuyirika oku “nterekero eyemererwe, enasimisize Mungu bwinja.” (Flp. 4:18) Olole omu chibaga chawe, ochibaze: ‘Hali olimo nakarhabala si?’ Yehova anasima amango amarhubona yirhwakolesa ebisanzi, emisi, obufundi changwa ebintu byerhu by’omubiri, omu kurhabala abali omu bulagirire. Anabona oku chili chigabi ch’obuharamye bwerhu.​—Yak. 1:27.

15. Obuharamye b’okuli buhemere ebisanzi n’emisi. Aliko si, bulagurhe lurhali lukoba?

¹⁵ Obuharamye b’okuli buhemere ebisanzi n’emisi. Aliko lurhali lukoba. (1 Yo. 5:3) Chirhumire rhwaderha ntyo? Bulala obuzigire rhuherhe ku Yehova b’oburhuma rhwamuharamya. Ba nka wawaza oku mwana olonzeze kuha eshe chintu chilebe. Akageza bisanzi binene ali achapa efoto amuha. Oyola mwana arhakachiganya ebisanzi byoshi amalire ali achapa eyo foto n’okubona nka byafire busha. Azigiire eshe anayunvirhe obusime b’okumuha olola luhembo. Konakuguma, obuzigire rhuherhe ku Yehova bunarhuha obushiru n’okurhuma rhwayunva rhusimire kugeza bisanzi binene omu buharamye b’okuli.

16. Nk’oku olwandiko lwa Waebrania 6:10 luderhere, gurhe Yehova anabona ebi buli muguma werhu anajira omu kuchihangana y’amusimisa?

¹⁶ Abazere baherhe obuzigire, barhalingiriza okw’abana boshi babahe empembo zili kuguma. Bamenyere okw’abana boshi barhali kuguma, na buli muguma aherhe obwage buhashe. Konakuguma, Darha w’embingu ab’amenyere obuhashe bwa buli muguma werhu. Hali oku wakaba oherhe obuhashe b’okukola binene kulusha bantu banene oyinji anabazigiire. Changwa hali oku wakaba ey’orhakagala kukola bingana n’eby’abandi bakolere, nkabaga eju y’obushaja, amagala, changwa eby’okwanene  kukolera omulala. Orhavunikaga omurhima. (Gal. 6:4) Yehova arhayibagira akasi kawe. Amango moshi oli wamuha echinja wakaba ogwerhe, ey’onashunikirwe n’omurhima gwinja, asima. (Osome Waebrania 6:10.) Yehova anabona chiro n’enyorha z’omurhima gwawe. Alonzeze ogwarhe obusime onatosheke n’obuharamye wakagala kumuha.

17. a) Nka rhwamabona hali ebigabi by’obuharamye bwerhu birhukomerere kukola, gurhe rhwakajira? b) Gurhe warhaberwe na chigabi chiguma omu biyerekenwe omu chisanduku “ Oyongere Obusime Bwawe”?

¹⁷ Gurhe rhwakaja rhwajira nka rhwamabona nka hali chigabi chiguma birhukomerere kuyeneza mw’ebila rhwaganirireko; nk’efunzo lyerhu-lyerhu lye Biblia changwa amahubiri? Oku rhuli rhwabikola kanene-kanene, ku rhwanabisima, n’okuyunguka nabyo. Rhwakahuzanya obuharamye bwerhu n’ok’omuntu anayiga akarasisi (sport) kalebe, changwa okuyiga kuziha omuziki. Nka rhuyinjire rhwayiga liguma-liguma amango rhwanabwene akasanzi, rhurhakabimenya juba-juba. Aliko rhuderhe, lero wamarhola akasanzi k’okubikola buli lusiku. Gurhe byaba? Rhwakarhondera omu kurhola kasanzi kageke, oku rhuli rhwagenderera rhwanazinda rhukala rhuli rhwageza bisanzi binene. N’oku rhuli rhwabona amalehe menja m’obushiru bwerhu, rhwanayinja rhwalingiriza oku nyorha akola kasanzi kerhu kahike, n’okuyunva rhukasimire bwenene. Obwene nka gurhe ebyola bipatene n’obuharamye bwerhu si?

18. Gurhe rhunajira y’akalamo kerhu kagwarha echi kamalire, n’okujira ntyo kunarhulerhera nyungu nchi?

¹⁸ Rhunajira akalamo kerhu kagwarhe echi kamalire omu kuharamya Yehova n’omurhima goshi. Echola chinarhulerhera abusime, n’okuyunva rhutoshekere omu kalamo eyi rhunanihiire oku rhwaharamya Yehova esiku n’amango. (Mez. 10:22) Bunola rhurhulerere omu bwenge bulala rhumenyere oku Yehova anarhurhabala amango rhuli omu bibazo. (Isa. 41:9, 10) Kweri rhuherhe mpanvu zinene z’okugwarha obusime oku rhuli rhwaharamya Darha w’obuzigire, okwanene “kuhaabwa obukuze n’olukengo” lurhengerere oku bulemi bwage boshi!​—Ufu. 4:11.