1-2. Ano ang dapat naton himuon para batunon sang Dios ang aton pagsimba?

 ANO ang ginahunahuna mo kon mabatian mo ang tinaga nga “pagsimba”? Basi ginaimadyin mo ang mga kauturan nga naga-attend sang miting sa Kingdom Hall. Ukon basi ginaimadyin mo ang mga kauturan nga nagakanta sang pagdayaw kay Jehova.

² Duha ini ka halimbawa sang paagi sang pagsimba kay Jehova. Batunon bala ni Jehova ang ila pagsimba? Batunon niya ini kon ginahimo nila ang iya kabubut-on, kag kon ginapalangga nila sia kag ginarespeto. Palangga gid naton si Jehova. Kabalo kita nga dapat naton sia simbahon sa bug-os naton nga masarangan, kag gusto naton nga himuon ini sa pinakamaayo nga paagi.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton ang paagi sang pagsimba nga ginbaton ni Jehova sang una, kag binagbinagon naton ang walo ka paagi sang pagsimba nga gusto ni Jehova nga himuon naton subong. Samtang ginabinagbinag naton ini, usisaon naton ang aton kaugalingon para mapauswag naton ang aton ginahimo sa pagsimba kay Jehova. Binagbinagon man naton kon ngaa mangin malipayon kita kon simbahon naton si Jehova sa husto nga paagi.

4. Antes nagkadto si Jesus sa duta, paano ginpakita sang mga alagad ni Jehova nga ginarespeto nila kag ginapalangga si Jehova?

⁴ Antes nagkadto si Jesus sa duta, ginpakita sang matutom nga mga lalaki pareho kanday Abel, Noe, Abraham, kag Job nga ginrespeto nila kag ginpalangga si Jehova. Paano? Paagi sa ila pagtuman sa iya, pagtuo sa iya, kag paghalad sa iya. Wala ginasugid sang Biblia kon ano ang dapat nila himuon para masimba si Jehova.  Pero maathag nga ginhimo nila ang ila pinakamaayo para padunggan si Jehova, kag ginbaton niya ang ila pagsimba. Sang ulihi, ginhatagan ni Jehova ang mga Israelinhon sang Kasuguan paagi kay Moises. Nalakip sa sini nga mga kasuguan ang madamo nga instruksion parte sa gusto ni Jehova nga paagi sang pagsimba sa iya.

5. Pagkatapos ginpatay kag ginbanhaw si Jesus, ano ang bag-o nga paagi sang pagsimba kay Jehova?

⁵ Pagkatapos ginpatay kag ginbanhaw si Jesus, wala na ginpatuman ni Jehova sa mga tawo ang Kasuguan nga ginhatag niya sa mga Israelinhon. (Roma 10:4) May bag-o nga kasuguan nga dapat tumanon ang mga Cristiano, kag amo ini “ang kasuguan sang Cristo.” (Gal. 6:2) Matuman nila ini nga “kasuguan,” indi paagi sa pagsaulo kag pagtuman sang madamo nga sugo, kundi paagi sa pag-ilog kay Jesus kag pagtuman sa iya mga gintudlo. Subong, ginahimo man sang mga Cristiano ang ila bug-os nga masarangan nga masunod ang Cristo para malipay sa ila si Jehova kag para ‘makakita sila sing kapahuwayan.’—Mat. 11:29.

6. Paano kita mabuligan sini nga artikulo?

⁶ Samtang ginabinagbinag naton ang kada paagi sang aton pagsimba kay Jehova, pamangkuton naton ang aton kaugalingon, ‘Nag-uswag bala ako sa akon ginahimo sa pagsimba kay Jehova?’ Puede man kita kapamangkot, ‘Mapauswag ko pa bala ang akon ginahimo sa pagsimba kay Jehova?’ May rason gid kita nga malipay sa aton pag-uswag, pero dapat kita mangamuyo kay Jehova nga buligan kita nga mag-uswag pa gid.

7. Paano ginatamod ni Jehova ang aton tinagipusuon nga mga pangamuyo?

⁷ Ginasimba naton si Jehova paagi sa pagpangamuyo sa iya. Suno sa Biblia, ang aton mga pangamuyo daw pareho sa incienso nga nahanda sing maayo. Ginahalad ini nga incienso sa tabernakulo, kag sang ulihi ginahalad ini sa templo. (Sal. 141:2) Nahamuot si Jehova sa kahumot sini nga incienso. ‘Nahamuot’ man si Jehova sa aton tinagipusuon nga mga pangamuyo, bisan pa pamatyag naton simple lang nga mga tinaga ang aton ginagamit. (Hulu. 15:8; Deut. 33:10) Nalipay gid si Jehova kon ginapabutyag naton sa iya nga palangga naton sia kag nagapasalamat kita sa iya. Gusto niya nga isugid naton sa iya ang aton mga ginakabalak-an, ginalauman, kag ginahandum. Antes ka mangamuyo kay Jehova, mas maayo kon pamensaron mo anay kon ano ang imo ihambal. Kon himuon mo ini, posible gid nga makahalad ka sa aton Amay sa langit sang pinakamahamot nga “incienso.”

8. Ano ang isa ka maayo nga kahigayunan nga madayaw naton ang Dios?

⁸ Ginasimba naton si Jehova paagi sa pagdayaw sa iya. (Sal. 34:1) Madayaw naton si Jehova paagi sa pagsugid sa iban nga nanamian kita sa iya dalayawon nga mga kinaiya kag ginaapresyar naton ang iya mga hinimuan. Kon pirme kita nagapasalamat kay Jehova, madamo kita sang maayo nga mahambal parte sa iya. Kon pamalandungan naton ang tanan nga maayo nga ginhimo ni Jehova para sa aton, madamo kita sang rason para dayawon sia. Kon nagabantala kita, isa gid ini ka maayo nga kahigayunan nga ‘magdulot pirme sa Dios sang halad sang pagdayaw, nga amo ang bunga sang aton mga bibig.’ (Heb. 13:15) Ginsambit kaina nga antes kita mangamuyo kay Jehova, dapat anay naton hunahunaon sing maayo kon ano ang aton ihambal. Amo man sini ang dapat naton himuon antes kita magbantala. Dapat anay naton hunahunaon sing maayo kon ano ang aton ihambal sa aton bantalaan. Gusto naton mahatag ang pinakamaayo nga “halad sang pagdayaw.” Gani ginatinguhaan naton nga halin gid sa aton tagipusuon ang aton ginahambal kon nagabantala kita.

9. Pareho sa mga Israelinhon sang una, ano ang mga pagpakamaayo kon nagatipon kita kaupod sang mga nagapalangga man kay Jehova? Magsugid sang imo eksperiensia.

 ⁹ Ginasimba naton si Jehova paagi sa pag-attend sa mga miting. Ginsugo ang mga Israelinhon sang una: “Tatlo ka beses kada tuig, ang tanan ninyo nga lalaki dapat mag-atubang kay Jehova nga inyo Dios sa lugar nga pilion niya.” (Deut. 16:16) Dapat nila biyaan ang ila mga balay kag mga uma, kag wala sing magabantay sa sini. Pero nagpromisa si Jehova sa ila: “Wala sing bisan sin-o nga mag-agaw sang inyo duta samtang nagataklad kamo agod mag-atubang kay Jehova nga inyo Dios.” (Ex. 34:24) Bangod nagasalig gid ang mga Israelinhon kay Jehova, gintuman nila sia kag ginasaulog nila ang mga kapiestahan kada tuig. Gani madamo gid sila sing nabaton nga pagpakamaayo. Halimbawa, nahangpan nila sing maayo ang Kasuguan sang Dios, napamalandungan nila ang iya kaayo, kag napalig-on sila kay kaupod nila ang mga nagapalangga man kay Jehova. (Deut. 16:15) Amo man sini nga mga pagpakamaayo ang mabaton naton kon ginahimo naton ang aton bug-os nga masarangan nga maka-attend sa aton mga miting. Kag hunahunaa ang kalipay ni Jehova kon may nahanda pa gid kita nga malip-ot kag makapalig-on nga mga komento.

10. Ngaa masiling naton nga importante nga bahin sang aton pagsimba ang pagkanta?

¹⁰ Ginasimba naton si Jehova paagi sa pagkanta kaupod sang aton mga kauturan. (Sal. 28:7) Para sa mga Israelinhon, ang pagkanta isa ka importante nga bahin sang ila pagsimba. Gintangdo ni Hari David ang 288 ka Levinhon nga mangin mga manug-amba sa templo. (1 Cron. 25:1, 6-8) Subong, mapabutyag naton sa aton Dios nga palangga naton sia paagi sa pagkanta sang mga ambahanon sang pagdayaw. Indi kinahanglan nga manami gid kita magkanta para mahimo naton ini. Binagbinaga ini nga pagpaanggid: “Kita tanan nagakasandad sing madamong beses” sa aton paghambal, pero wala kita nagauntat sa paghambal sa kongregasyon kag sa pagbantala. (Sant. 3:2) Indi man kita dapat mag-untat sa pagkanta sang pagdayaw kay Jehova, bisan pa indi kita manami magkanta.

11. Suno sa Salmo 48:13, ngaa dapat hatagan sang tion sang pamilya ang pagtuon sang Biblia?

¹¹ Ginasimba naton si Jehova paagi sa pagtuon sang iya Pulong kag pagtudlo sa aton kabataan parte sa iya. Kon Adlaw nga Inugpahuway, wala nagaobra ang mga Israelinhon kag ginagamit nila ini nga adlaw para pabakuron ang ila kaangtanan kay Jehova. (Ex. 31:16, 17) Ginatudluan sang matutom nga mga Israelinhon ang ila kabataan parte kay Jehova kag parte sa iya kaayo. Subong, dapat man naton hatagan sang tion ang pagbasa kag pagtuon sang Pulong sang Dios. Bahin ini sang aton pagsimba kay Jehova, kag nagabulig ini para mangin suod pa gid kita sa iya. (Sal. 73:28) Kag kon nagatuon kita bilang pamilya, ginabuligan naton ang aton kabataan nga mangin suod sa aton mahigugmaon nga Amay sa langit.—Basaha ang Salmo 48:13.

12. Ano ang matun-an naton sa pagtamod ni Jehova sa paghimo sang mga kagamitan sang tabernakulo?

¹² Ginasimba naton si Jehova paagi sa pagpatindog kag pagmentinar sang mga pasilidad nga ginagamit naton sa pagsimba. Ang Biblia nagasiling nga ang paghimo sang tabernakulo kag sang mga kagamitan sini isa ka “balaan nga hilikuton.” (Ex. 36:1, 4) Subong, ginakabig man ni Jehova nga isa ka sagrado nga pag-alagad sa iya ang pagpatindog sang mga Kingdom Hall kag iban pa nga mga pasilidad. Madamo nga tion ang ginagamit sang pila ka kauturan sa sini nga mga hilikuton. Ginaapresyar gid naton ang ila daku nga bulig para sa hilikuton sang Ginharian. Magluwas sa sini, nagabantala man sila. Posible nga gusto pa gani sang iban sa ila nga magpayunir. Kon mag-aplay sila kag kalipikado sila, mapakita sang mga gulang nga ginasuportahan  nila ang mga proyekto sa konstruksion paagi sa pag-approve sa sining mapisan nga mga kauturan nga mangin payunir. May nabal-an man kita sa konstruksion ukon wala, makabulig kita tanan para mangin matinlo kag namentinar sing maayo ang ginagamit naton nga mga pasilidad.

13. Paano naton dapat tamdon ang aton donasyon para sa hilikuton sang Ginharian?

¹³ Ginasimba naton si Jehova paagi sa paghatag sang aton donasyon para suportahan ang hilikuton sang Ginharian. Kon nagasaulog sang kapiestahan ang mga Israelinhon, dapat may dala sila nga regalo para kay Jehova. (Deut. 16:16) Dapat sila maghatag sang regalo suno sa ila masarangan. Paagi sa sini, ginapakita nila nga nagapasalamat sila kay Jehova sa tanan nga ginahimo niya para sa ila. Paano naton mapakita nga palangga naton si Jehova kag ginapasalamatan naton sia sa tanan nga ginahimo niya para sa aton? Ang isa ka paagi amo ang pag-amot sang kuarta para sa aton kongregasyon kag para sa bug-os kalibutan nga hilikuton suno sa aton masarangan. Amo ini ang ginsiling ni apostol Pablo: “Ang dulot nga tinagipusuon labi nga kalahamut-an sa Dios, bangod ginapaabot sang Dios nga maghatag ang isa ka tawo suno sa yara sa iya, indi suno sa wala sa iya.” (2 Cor. 8:4, 12) Ginapabaloran gid ni Jehova ang aton tinagipusuon nga donasyon, bisan pa gamay lang ini.—Mar. 12:42-44; 2 Cor. 9:7.

14. Suno sa Hulubaton 19:17, paano ginatamod ni Jehova ang pagbulig naton sa aton mga kauturan nga nagakinahanglan?

¹⁴ Ginasimba naton si Jehova paagi sa pagbulig sa aton mga kauturan nga nagakinahanglan. Nagpromisa si Jehova nga pakamaayuhon niya ang mga Israelinhon nga maalwan nga nagabulig sa mga imol. (Deut. 15:7, 10) Sa kada tion nga ginabuligan naton ang aton utod nga nagakinahanglan, ginatamod ini ni Jehova nga regalo sa Iya. (Basaha ang Hulubaton 19:17.) Halimbawa, sang napriso si Pablo, nagpadala sa iya sang regalo ang mga kauturan sa Filipos. Gintawag niya ini nga “isa ka halad nga kalahamut-an sa Dios.” (Fil. 4:18) Hunahunaa ang mga kauturan sa inyo kongregasyon kag pamangkuta ang imo kaugalingon, ‘Sin-o ang puede ko buligan?’ Nalipay si Jehova kon ginagamit naton ang aton tion, kusog, ikasarang, kag kuarta para buligan ang mga nagakinahanglan. Ginakabig niya ini nga bahin sang aton pagsimba.—Sant. 1:27.

15. Kinahanglan ang tion kag pagpanikasog para masimba naton si Jehova, pero ngaa indi ini mabug-at ukon mabudlay himuon?

¹⁵ Kinahanglan ang tion kag pagpanikasog para masimba naton si Jehova. Pero indi ini mabug-at ukon mabudlay himuon. (1 Juan 5:3) Ngaa? Bangod ginasimba naton si Jehova kay palangga naton sia. Imadyina ang isa ka bata nga gusto magregalo sa iya amay, gani nagdrowing sia. Posible nga inoras niya ini nga ginhimo. Wala nanugon ang bata sa inoras niya nga gingamit sa pagdrowing. Palangga niya ang iya amay, kag nalipay sia nga iregalo sa iya amay ang iya ginhimo. Bangod palangga man naton si Jehova, nalipay kita nga gamiton ang aton tion kag kusog para simbahon sia.

16. Suno sa Hebreo 6:10, paano ginatamod ni Jehova ang aton pagpanikasog para malipay sia?

¹⁶ Wala nagapaabot ang mahigugmaon nga mga ginikanan nga palareho ang iregalo sa ila sang ila kabataan. Kabalo sila nga indi pareho ang kada bata kag lainlain ang ila ikasarang. Nahangpan man sang aton Amay sa langit ang sitwasyon sang kada isa sa aton. Kon ikumparar sa mga kilala mo kag pinalangga, posible nga mas madamo ang mahimo mo sangsa mahimo sang kalabanan sa ila. Ukon posible man nga indi mo masarangan ang ginahimo sang iban bangod tigulang ka na, nagamasakit, ukon madamo ka sang responsibilidad sa pamilya. Indi ka dapat  maluyahan sang buot. (Gal. 6:4) Indi pagkalimtan ni Jehova ang imo ginahimo para sa iya. Kon ginahimo mo ang imo bug-os nga masarangan kag husto ang imo motibo, malipay si Jehova. (Basaha ang Hebreo 6:10.) Kabalo pa gani si Jehova sang handum sang imo tagipusuon. Gusto niya nga malipay ka sa masarangan mo himuon sa pagsimba sa iya.

17. (a) Kon nabudlayan kita sa pila ka paagi sang pagsimba nga ginbinagbinag naton, ano ang himuon naton? (b) Ano ang nabulig sa imo sang ginhimo mo ang isa ka paagi sang pagsimba kay Jehova nga makita sa kahon nga “ Mangin Malipayon Ka Pa Gid”?

¹⁷ Ano ang himuon naton kon nabudlayan kita sa pila ka paagi sang pagsimba nga ginbinagbinag naton, pareho sang pagtuon sang Biblia ukon pagbantala? Panikasugan naton nga pirme himuon ini nga mga hilikuton. Paagi sa sini, mas manamian kita sa sini nga mga hilikuton kag makabenepisyo pa gid kita. Puede naton ikumparar ang aton ginahimo sa pagsimba sa pag-exercise ukon pagtuon sa pagtokar sang gitara. Kon talagsa lang kita mag-exercise ukon magpraktis sa pagtokar, mahinay ang aton pag-uswag. Pero ano abi kon himuon naton ini adlaw-adlaw? Sa umpisa, posible nga mga pila ka minuto lang kita mag-exercise ukon magpraktis, dayon amat-amat naton nga dugangan ang aton tion nga ginagamit sa sini. Kon makita naton ang maayo nga resulta sang aton pagpanikasog, posible gid nga mangin excited kita nga himuon ini pirme kag mangin malipayon kita. Matuod man ini sa aton pagsimba kay Jehova.

18. Ano ang pinakaimportante nga hilikuton nga dapat naton himuon, kag ano ang resulta kon himuon naton ini?

¹⁸ Dapat naton himuon ang aton pinakamaayo sa aton pagsimba kay Jehova. Amo ini ang pinakaimportante nga hilikuton nga dapat naton himuon. Kon himuon naton ini, mangin malipayon kita kag kontento, kag may paglaum kita nga simbahon si Jehova sing wala sing katapusan. (Hulu. 10:22) Malinong ang aton hunahuna kay kabalo kita nga ginabuligan ni Jehova ang mga nagasimba sa iya kon may problema sila. (Isa. 41:9, 10) Madamo gid kita sang rason nga mangin malipayon sa pagsimba sa aton mahigugmaon nga Amay, nga takus ‘himayaon kag padunggan’ sang tanan niya nga tinuga.—Bug. 4:11.