1-2. Ua li cas Yehauvas thiaj li txaus siab rau peb txoj kev teev tiam?

 THAUM peb hnov lo lus “teev tiam,” peb xav li cas xwb? Tej zaud, peb yuav xav txog ib tug kwv tij ntseeg tab tom txhos caug ntawm ntug txaj thov Yehauvas ua ntej nws mus pw. Los sis tej zaud peb xav txog ib tse neeg tab tom kawm txog Yehauvas ua ke.

² Raws li ob zaj hais tas los no, ua li puas yog kev teev tiam Yehauvas tiag? Nco ntsoov hais tias tsis yog lam ua kom tas kev tas cai tiam sis yog ib tug twg ua raws li Yehauvas lub siab nyiam ces Yehauvas yeej txais yuav. Peb zoo siab tias Yehauvas yog peb tus Vajtswv. Yog li ntawd, peb yuav tau pe hawm Yehauvas kawg siab kawg ntsws vim nws tib leeg xwb thiaj li tsim nyog yog tus uas peb teev tiam.

3. Nyob hauv zaj kawm no, yuav piav txog dab tsi?

³ Nyob rau hauv zaj kawm no, yuav piav txog tej kev teev tiam Yehauvas txais yuav txheej puag thaum ub thiab yim txoj hau kev teev tiam uas Yehauvas txais yuav niaj hnub niam no. Thaum peb kawm nyob rau hauv zaj no, yuav tsav tau peb txoj kev teev tiam lawm hov ntau tuaj thiab peb yuav kawm tias teev tiam Yehauvas raws li nws lub siab nyiam yuav ua rau peb kaj siab heev.

4. Cov tib neeg txheej puag thaum ub ua ntej Yexus yug, teev tiam Yehauvas li cas?

⁴ Ua ntej Yexus los yug hauv ntiaj teb no, cov ntseeg xws li Anpees, Nau-as, Anplahas, thiab Yauj qhia tias Yehauvas yog lawv tus Vajtswv li cas? Lawv mloog Vajtswv lus, muaj kev ntseeg, thiab muab khoom fij rau Yehauvas. Vajtswv Txoj Lus tsis qhia ntxaws ntxaws seb lawv txoj kev teev tiam yog li cas rau li cas tiag. Tiam sis Yehauvas kuj txais yuav lawv txoj kev teev tiam vim lawv yeej ua npaum li lawv ua tau. Tom qab no Yehauvas mam muab nws tej kev cai rau Mauxes sau tseg cia rau cov neeg Ixayees. Cov kev cai no qhia ntau ntau yam seb yuav teev tiam Yehauvas li cas rau li cas thiaj zoo.

5. Yehauvas xav kom cov uas xyaum coj lub neej li Yexus, teev tiam nws li cas?

⁵ Tom qab Yexus tuag thiab sawv rov los lawd, Yehauvas tsis hais kom nws cov tib neeg coj raws li Txoj Kev Cai nws muab rau cov Ixayees lawm. (Loos 10:4) Cov ntseeg yuav tau coj txoj kev cai tshiab uas yog “Yexus Khetos txoj kevcai.” (Kalatias 6:2) Yexus txoj cai no tsis yog muab cim tseg cia los sis kom caiv tsis pub ua ub ua no, tiam sis yuav tau xyaum Yexus lub neej thiab tej nws qhia tseg cia. Niaj hnub niam no, cov ntseeg yeej ua npaum li lawv ua tau los xyaum Yexus lub neej kom thiaj ua tau haum Yehauvas siab thiab lawv thiaj “nyob kaj siab lug.”​—Mathais 11:29.

6. Zaj kawm no yuav tsav tau peb lub neej li cas?

⁶ Thaum peb kawm ib ntus zuj zus txog seb yuav teev tiam Yehauvas li cas, cia li zaum tsaws xav li no, ‘Kuv tau hloov kuv lub neej li cas lawm tiag? Tseem tshuav dab tsi kuv yuav tau hloov ntxiv?’ Txawm peb txaus siab rau peb txoj kev teev tiam lawm los, peb yuav tau thov kom Yehauvas pab seb tseem tshuav qhov twg peb yuav tau hloov ntxiv.

7. Yehauvas saib peb tej lus thov zoo li cas xwb?

⁷ Thaum peb thov Yehauvas, twb yog peb teev tiam nws ntag. Nyob hauv Vajtswv Txoj Lus qhia tias peb tej lus thov zoo yam nkaus li tej tshuaj tsw qab uas muab fij rau hauv lub tsev ntaub sib ntsib thiab tom qab no, rau hauv lub tuam tsev. (Phau Ntawv Nkauj 141:2) Cov hmoov tshuaj no tsw qab ntxiag ua rau Yehauvas txaus siab heev. Zoo ib yam li ntawd, thaum peb thov tawm plaws hauv nruab siab tuaj, los kuj txaus nws siab kawg li tab txawm peb tsis txawj hais tej niag phab tej niag pheev. (Pajlug 15:8; 2 Kevcai 33:10) Yehauvas xav kom peb qhia tej nraim nkoos hauv peb nruab siab rau nws. Nco ntsoov thaum peb yuav thov Yehauvas rau ib yam twg, kuj zoo rau peb ua tib zoo xaiv peb tej lus. Yog peb ua li ntawd, ces cuag li peb hlawv hmoov tshuaj tsw qab rau peb Leej Txiv Yehauvas.

8. Yehauvas saib peb txoj kev tshaj tawm txog nws zoo li cas?

⁸ Thaum peb tshaj tawm txog Yehauvas, twb yog peb teev tiam nws ntag. (Phau Ntawv Nkauj 34:1) Thaum peb tshaj tawm txog Yehauvas, zoo rau peb tham txog tej nws tau tsim thiab nws tus xeeb ceem. Yog peb ris Yehauvas txiaj tsig rau txhua yam nws tau ua ces peb yuav piav tsheej zag tsis txawj tag. Thaum peb mus tshaj tawm rau ib zej tsoom sawv daws ces twb yog peb siv “peb lub qhovncauj” qhia txog Yehauvas. (Henplais 13:15) Zoo ib yam li thaum peb xaiv peb tej lus ua ntej peb thov Yehauvas, thaum peb qhia tib neeg txog Yehauvas los peb yuav tau ua zoo xaiv peb tej lus tib yam nkaus vim hais tias peb xav qhia tawm plaws hauv nruab siab tuaj.

9. Thaum Yehauvas cov tib neeg mus kev sib txoos, pab tau lawv li cas? Piav seb tej kev sib txoos pab tau koj li cas.

⁹ Thaum peb mus kev sib txoos, twb yog peb  teev tiam Yehauvas ntag. Nyob rau txheej puag thaum ub, cov Ixayees yuav tau coj yam li no: “Nej haivneeg txhua tus txivneej yuav tsum tuaj pehawm [Yehauvas] ntawm qhov chaw uas nws xaiv cia ib xyoos peb zaug.” (2 Kevcai 16:16) Yog li ntawd, thaum lawv mus pe hawm Yehauvas, tsis muaj leej twg yuav ntoj yuav thuv lawv tej vaj tse thiab liaj teb li. Tiam sis Yehauvas cog lus li no rau lawv: “Tsis muaj leejtwg yuav tuaj txeeb nej lub tebchaws thaum uas nej ua peb zaug kevcai ntawd li.” (Khiav Dim 34:24) Cov Ixayees tso siab plhuav rau Yehauvas thiab mus koom tej koob tsheej no txhua txhua xyoo. Thaum lawv mus koom ua ke yam li no, ua rau lawv nkag siab Vajtswv Txoj Kev Cai zoo zuj zus tuaj, lawv muaj caij muaj nyoog los xav txog tej yam zoo Yehauvas tau ua, thiab ib leeg txhawb ib leeg lub zog. (2 Kevcai 16:15) Zoo ib yam li ntawd, thaum peb mus kev sib txoos peb yuav pom tej yam zoo li hais tas los no thiab. Yog peb tsa tes teb ob peb los thaum tuaj sib txoos ua ke, yuav ua rau Yehauvas txaus siab heev.

10. Vim li cas hu nkauj rau Yehauvas ho yog kev teev tiam nws?

¹⁰ Thaum peb hu nkauj rau Yehauvas, twb yog peb teev tiam nws ntag. (Phau Ntawv Nkauj 28:7) Cov Ixayees yeej xam pom hais tias kev hu nkauj yog ib txog ke teev tiam Yehauvas. Vaj Ntxwv Daviv thiaj li xaiv 288 leej Levis los hu nkauj rau hauv lub tuam tsev. (1 Xwmtxheej Vajntxwv 25:1, 6-8) Niaj hnub niam no, thaum peb hu nkauj rau Yehauvas twb yog peb zoo siab tias nws yog peb tus Vajtswv. Tsis txhob txhawj nyob tsam peb hu tsis tau nkauj zoo. Xws li thaum peb hais lus, muaj qee zaug peb yeej hais tau lus siab lus qes tiam sis qhov no yeej tsis txwv kom peb tsis txhob hais lus ntxiv thaum mus kev sib txoos los sis mus tshaj tawm txoj moo zoo. (Yakaunpaus 3:2) Zoo ib yam li ntawd, tab txawm peb xav hais tias peb tsis txawj hu nkauj los tsis txhob cia qhov no tav tau peb txoj kev hu nkauj rau Yehauvas.

11. Raws li Phau Ntawv Nkauj 48:13, vim li cas peb yuav tau teem caij teem nyoog rau tsev neeg kawm Vajlugkub ua ke?

¹¹ Thaum peb kawm Vajtswv Txoj Lus thiab cob qhia peb tej me tub me nyuam, twb yog peb teev tiam Yehauvas ntag. Hnub Xanpataus, cov Ixayees so tsis ua hauj lwm xwv lawv thiaj muaj caij muaj nyoog kawm txog Yehauvas kom txhawb tau lawv txoj kev ntseeg. (Khiav Dim 31:16, 17) Cov ntseeg puag ntxov nram ntej i, cob qhia lawv tej tub ki kom paub txog Yehauvas thiab tej yam zoo Yehauvas tau ua los lawm. Niaj hnub niam no, peb yuav tau lauj sij hawm los nyeem thiab kawm Vajtswv Txoj Lus. Tej no yog kev teev tiam Yehauvas thiab yuav tsav tau peb txoj kev ntseeg. (Phau Ntawv Nkauj 73:28) Tsis tas li ntawd, yog peb yim kawm Yehauvas ua ib tse tib neeg, peb yim pab tau peb tej tub tej kiv kom muaj kev sib raug zoo nrog peb Leej Txiv Yehauvas.​—Nyeem Phau Ntawv Nkauj 48:13.

12. Vim li cas txua lub tsev ntaub sib ntsib ho yog kev teev tiam Yehauvas?

¹² Thaum peb tsa thiab txhim kho tej tsev teev tiam Yehauvas, twb yog peb teev tiam Yehauvas ntag. Nyob rau hauv phau Vajlugkub tau hais tias tes hauj lwm ua lub tsev ntaub sib ntsib thiab tej nyuag txhiam laj txhiam xwm nyob rau hauv yog ib txog ke teev tiam Yehauvas. (Khiav Dim 36:1, 4) Niaj hnub niam no los Yehauvas yeej saib tes hauj lwm tsa Tsev Nceeg Vaj thiab lwm cov tsev teev tiam Yehauvas tam li ib txoj kev teev tiam nws. Muaj coob leej kwv tij nkauj muam ntseeg lauj sij hawm ntau heev mus ua tes hauj lwm no. Peb yeej ris txhua leej txhua tus txiaj ntsig kawg nkaus li. Tsis tas li ntawd, lawv haj tseem niaj hnub khiav khawv khuav mus tshaj tawm txoj moo zoo. Muaj ib txhia los kuj xav ua ib tug tho kev. Cov txwj laus  yuav tau txhob ua siab deb tiam sis tso cai rau tus xav ua ib tug tho kev los yeej meem cia nws ua. Txawm tias peb yuav txawj kho vaj kho tsev los tsis txawj, txhua leej txhua tus yeej muaj rab peev xwm tu kom tej tsev teev tiam Yehauvas du qas lug.

13. Vim li cas tej dej siab siv mus ua Yehauvas tes hauj lwm ho yog kev teev tiam Yehauvas?

¹³ Thaum peb pub me ntsis dej siab mus ua Yehauvas tes hauj lwm, twb yog peb teev tiam nws ntag. Thaum cov Ixayees mus rau tej koob tsheej, Yehauvas tsis xav kom lawv tuaj tes dawb tes npliag. (2 Kevcai 16:16) Tus uas muaj ntau los nqa ntau, tus uas muaj tsawg los nqa tsawg. Ua li no, thiaj qhia tau tias lawv ris Yehauvas txiaj ntsig rau tej yam nws tau ua rau lawv. Niaj hnub niam no, peb qhia tau li cas tias peb ris Yehauvas txiaj ntsig rau txhua yam nws tau ua rau peb? Ib qho yog nco ntsoov pub me ntsis dej siab rau hauv lub koom txoos thiab rau Yehauvas tes hauj lwm thoob qab ntuj. Tus tub txib Paulus tau hais li no: “Yog nej zoo siab hlo pab raws li nej muaj, Vajtswv zoo siab yuav npaum li ntawd, yeej tsis muaj leejtwg thov tej uas nej tsis muaj.” (2 Kauleethaus 8:4, 12) Yehauvas yeej txaus siab thaum peb muab npaum li peb muab tau, tsis hais ntau los tsawg.​—Malakaus 12:42-44; 2 Kauleethaus 9:7.

14. Raws li Pajlug 19:17, Yehauvas xav li cas thaum peb txaus siab pub rau tej kwv tij nkauj muam ntseeg uas tu ncua ib yam twg?

¹⁴ Thaum peb txaus siab pub rau tej kwv tij nkauj muam ntseeg uas tu ncua ib yam twg, twb yog peb teev tiam Yehauvas ntag. Yehauvas cog lus rau cov Ixayees tias yog lawv pub rau tej tug txom nyem ces Yehauvas yuav foom koob hmoov rau tus pub ntawd. (2 Kevcai 15:7, 10) Niaj hnub niam no los yog peb pub rau ib tug ntseeg twg ces Yehauvas suav tias twb yog peb muab pub rau nws ntag. (Nyeem Pajlug 19:17.) Xws li thaum cov ntseeg nyob hauv Filipis tau xa qho me ntsis khoom mus pub rau Paulus hauv tsev kaw neeg, nws hais tias “tej uas nej xa tuaj rau kuv ntawd zoo ib yam li tej tshuaj tsw qab uas sawvdaws muab fij rau Vajtswv.” (Filipis 4:18) Cia li zaum tsaws xav txog cov ntseeg nyob rau hauv peb lub koom txoos seb puas muaj tus peb pab tau. Yehauvas txaus siab heev thaum peb lauj sij hawm, siv dag zog, tej yam peb paub ua, thiab peb tej txhiam laj txhiam xwm mus pab cov tu ncua qho yam. Yehauvas suav tias tej hais no yog kev teev tiam nws.​—Yakaunpaus 1:27.

15. Vim li cas teev tiam Yehauvas ho tsis yog ib lub nra hnyav?

¹⁵ Teev tiam Yehauvas yeej siv caij siv nyoog thiab dag zog tiam sis tsis yog ib lub nra hnyav. (1 Yauhas 5:3) Vim li cas ho tsis ua nra hnyav? Vim tias peb txaus siab hlo teev tiam Yehauvas. Muab piv txwv tias ib tug me tub xav ua ib yam zoo zoo rau nws txiv. Nws lauj sij hawm ntau heev los mus txua thiab tws ib lub tuaj lub pub rau nws txiv. Leej tub no yeej tsis yws tsis npau tias cas nws yuav lauj sij hawm ntau ua luaj li vim nws zoo siab tias nws muaj ib leeg txi. Zoo ib yam li ntawd, peb yeej zoo siab tias muaj Yehauvas ua peb tus Vajtswv. Txawm peb yuav siv caij siv nyoog ntau npaum li cas los peb yeej tsis khuv xim ib qho li.

16. Raws li Henplais 6:10, Yehauvas pom li cas txog tej yam peb ua rau nws?

¹⁶ Leej niam thiab leej txiv uas muaj siab dawb siab zoo yeej tsis kom tej tub tej kiv muab tej khoom zoo tib yam nkaus rau nws. Nws yeej xam pom tias ib tug me nyuam zoo tsis thooj ib tug me nyuam. Nyias muab raws li nyias siab xav. Zoo tib yam nkaus li ntawd, peb Leej Txiv Yehauvas yeej nkag siab txog qhov peb muab tau npaum li peb muab. Tej zaud peb qho leej yuav muab ntau dua li lwm tus uas peb pom  tau muab. Hos peb qho leej ho muab tsis tau npaum li lwm tus muab vim peb hnub nyoog nchav lawm, noj qab nyob tsis zoo, los sis peb yuav tau koob lub cuab lub yig. Txawm li cas los xij peem, tsis txhob muab xav ntau dhau. (Kalatias 6:4) Yehauvas yeej nco ntsoov txhua yam peb tau ua los lawm. Nws yeej txaus siab yog hais tias peb ua npaum li peb ua tau thiab ua tawm plaws hauv nruab siab tuaj. (Nyeem Henplais 6:10.) Yehauvas yeej pom tej nyob nraim nkoos puag hauv peb nruab siab. Nws xav pom peb nyob luag ntxhwb ntxhi thiab zoo siab hlo teev tiam nws.

17. (1) Peb yuav ua li cas yog tias muaj ib qho twg ntawm peb txoj kev teev tiam tsis yooj yim? (2) Muaj tej yam twg hauv lub ntsiab me “ Tsav Kev Kaj Siab” ho pab tau koj?

¹⁷ Peb yuav ua li cas yog tias muaj ib qho twg ntawm peb txoj kev teev tiam tsis yooj yim, xws li kawm Vajlugkub los sis mus tshaj tawm txoj moo zoo? Yog peb yim mus tshaj tawm thiab kawm Vajlugkub ces peb yim nyiam thiab yim pab tau peb. Peb kuj muab tau peb txoj kev teev tiam piv ib yam li tus neeg tshuab raj. Yog tus neeg ntawd lam tshuab ib ob nyuag lwm xwb, nws yuav tsis txawj tshuab raj. Tiamsis yog nws tshuab luj laub luj laub thawm hnub ces nws yuav txawj rag. Thaum nws pom tias nws tshuab tsheej zag tsheej zag lawd, nws yeej xav tshuab luj les luj les tas zaj tas zog. Peb txoj kev teev tiam Yehauvas kuj zoo tib yam nkaus li ntawd ntag.

18. Yam uas tseem ceeb tshaj peb ua tau yog dab tsi, thiab yog peb ua tej ntawd yuav muaj li cas?

¹⁸ Peb ua npaum li peb ua tau los teev tiam Yehauvas, yog ib yam uas tseem ceeb tshaj hauv peb lub neej. Yog peb ua li tej hais no, peb yuav muaj kev kaj siab, yuav muaj lub neej muaj hauv paus hauv ntsis, thiab peb yuav muaj peev xwm teev tiam Yehauvas mus tas ib txhiab ib txhis. (Pajlug 10:22) Niaj hnub niam no, peb twb muaj kev kaj siab yeeb vim yog peb paub ntsoov tias Yehauvas yog tus pab peb thaum muaj kev nyuaj siab ntxhov plawv rau ib qho twg. (Yaxayas 41:9, 10) Yog li ntawd, yeej tsim nyog peb muaj kev kaj siab teev tiam peb Leej Txiv Yehauvas. Nws tib leeg xwb thiaj “tsimnyog peb sawvdaws hwm” thiab “tau koob meej.”​—Tshwmsim 4:11.