1-2. Dirava ese iseda tomadiho karana ia abia dae totona, dahaka ita karaia be namo?

 INAI hereva “tomadiho karana” oi kamonai neganai, dahaka oi laloa? Reana tadikaka ta oi laloa, ia do mahuta lasi neganai, ia tui diho bona Iehova ia guriguri henia. Eiava famili ta oi laloa, idia be mai moale edia ruma bese tomadiho idia karaia noho.

² Unai haheitalai rua lalonai, idia be tomadiho karadia idia karaia. Iehova ese edia tomadiho do ia abia dae, a? Bema ia ura henia dalana idia badinaia bona mai lalokau bona hemataurai ida idia karaia, edia tomadiho dalana do ia abia dae. Iehova ita lalokau henia bada. Ita diba ia ita tomadiho henia be maoro, bona ita ura iseda tomadiho karana ia goeva be namo.

3. Inai atikol ai dahaka do ita herevalaia?

³ Inai atikol ai, idaunegai Iehova ese ia abia dae tomadiho dalana bona hari ia abia dae tomadiho daladia 8 do ita herevalaia. Unai amo ita ta ta ese iseda tomadiho karana ita hanamoa dalana do ita laloa. Danu, tomadiho momokani ese ita ia hamoalea ena badina idauidau do ita herevalaia.

4. Edena dala ai, abidadama taudia ese idia hahedinaraia Iehova idia matauraia bona lalokau henia?

⁴ Abidadama taudia hegeregere Abela, Noa, Aberahamo bona Iobu ese Iehova idia matauraia bona lalokau henia. Edena dala ai? Idia ese Dirava idia kamonai henia, abidadama henia,  bona ia dekenai boubou gaudia idia henia. Baibel ese edia tomadiho karana lalonai idia karaia gaudia ibounai ia gwauraia lasi. To ia hahedinaraia goevagoeva, idia gaukara goada Iehova idia hanamoa totona, bona ia ese edia tomadiho karana ia abia dae. Gabeai, Iehova ese Mose amo Israela taudia dekenai Taravatu ia henia. Unai taravatu idauidau ese Iehova ia abia dae tomadiho dalana idia hahedinaraia.

5. Iesu ia mase bona toreisi lou murinai, dahaka ia vara?

⁵ Iesu ia mase bona toreisi lou murinai, Iehova ese Mose ena Taravatu badinaia karana ia koua. (Roma 10:4) Keristani taudia be taravatu matamatana idia badinaia, unai be “Keriso ena taravatu.” (Gal. 6:2) Unai “taravatu” idia badinaia totona, idia ese Iesu ena haheitalai idia tohotohoa bona ena hahediba herevadia idia badinaia, to taravatu momo idia laloatao bona idia badinaia be anina lasi. Hari danu, Keristani taudia idia gaukara goada Keriso ena murinai idia raka, unai amo Iehova idia hamoalea bona “goada matamata” idia abia diba.​—Mat. 11:29.

6. Edena dala ai inai atikol ese ita do ia durua?

⁶ Iseda tomadiho karadia ta ta ita herevalaia neganai, sibona ita henanadai, “Egu tomadiho karadia lau karaia noho, a?” Danu do ita henanadai, “Egu tomadiho karana lau hanamoa diba, a?” Emu tomadiho karadia oi karaia noho dainai oi moale, to gau haida oi hanamoa totona Iehova ena heduru oi noia be namo.

7. Iehova ese mai kudouna ibounai ida ita gwauraia guriguri be edena bamona ia laloa?

⁷ Guriguri be Iehova tomadiho henia karana ta. Toretore Helagadia idia gwau iseda guriguri be palai dubuna bona dubu helaga dekenai idia henia bonana namo muramura bamona. (Sal. 141:2) Unai bonana namo muramura ese Dirava ia hamoalea. Unai hegeregerena, mai kudouna ibounai ida ita gwauraia guriguri ese “Dirava ia hamoalea,” ena be auka lasi herevadia ita gaukaralaia. (Aon. 15:8; Deu. 33:10) Bema Iehova dekenai ia ita lalokau henia bona tanikiu henia herevadia ita gwauraia, ita diba momokani Iehova ia moale. Ia ura iseda lalohekwarahi bona ura gaudia be ia dekenai ita herevalaia. Iehova oi do guriguri henia lasi neganai, do oi gurigurilaia gaudia oi laloa namonamo guna be namo. Unai amo, emu guba Tamana dekenai “bonana namo muramura” do oi henia.

8. Edena bamona negadiai Dirava ita hanamoa?

⁸ Iehova ita hanamoa neganai, ia ita tomadiho henia unai. (Sal. 34:1) Ma haida dekenai Iehova ena kara namodia bona ena gaukara namodia ita herevalaia neganai, ia ita hanamoa. Iehova ese ia karaia gau namodia momo ita herevalaia karana amo, eda tanikiu karana ita hahedinaraia. Bona unai gaudia ita laloa dobu neganai, badina namodia momo idia noho ia ita hanamoa totona. Haroro gaukara ita karaia neganai, “iseda uduna ita gaukaralaia, ma haida dekenai iena ladana ita gwauraia totona.” (Heb. 13:15) Iehova ita do guriguri henia lasi neganai, do ita herevalaia gaudia ita laloa namonamo. Unai hegeregerena, taunimanima ita do haroro henia lasi neganai, do ita herevalaia gaudia ita laloa namonamo guna be namo. Ita ura Dirava dekenai ita henia “boubou gauna” be namo herea. Unai dainai ita haroro neganai, mai ura bada ida ita hereva.

9. Israela taudia hegeregerena, hebou ita lao neganai dahaka namo ita davaria? Hebou karana ese oi ia durua dalana gwauraia.

⁹ Hebou ita lao karana be Iehova tomadiho henia karana ta. Iehova ese Israela taudia ia hamaoroa: “Lagani ta lalonai, emui  tatau bona memero ibounai be Iehova emui Dirava ese ia abia hidi gabuna ai, nega toi iena vairanai do idia mai.” (Deu. 16:16) Edia ruma bona uma gabudia idia rakatania neganai, ta ese unai gaudia ia naria lasi. To Iehova be idia dekenai ia gwauhamata: “Emui Dirava Iehova ena vairana itaia totona umui daekau neganai, ta ese emui tano do ia abia lasi.” (Eso. 34:24) Israela taudia be Iehova idia abidadama henia momokani dainai, lagani ta ta ena aria negadia ai idia lao. Bona dala idauidau ai namo idia davaria. Hegeregere, Dirava ena taravatu ma haida idia dibaia, Iehova ena kara namodia idia laloa dobu, bona Iehova idia lalokau henia taudia ma haida bamoa karana idia moalelaia. (Deu. 16:15) Ita gaukara goada Keristani heboudia ita lao henia neganai, namo ita davaria danu. Bona ita hegaegae namonamo bona hebou dekenai haere ita henia neganai, Iehova do ia moale bada.

10. Dahaka dainai ane abia karana be iseda tomadiho ena kahana badana ta?

¹⁰ Ane abia karana be Iehova tomadiho henia karana ta. (Sal. 28:7) Israela taudia idia diba ane abia karana be edia tomadiho ena kahana badana ta. King Davida ese Levi taudia 288 ia abia hidi, dubu helaga dekenai ane idia abia totona. (1 Siv. 25:1, 6-8) Hari danu, ane ita abia neganai ita hahedinaraia Dirava ita lalokau henia. Ena be iseda gadona be namo lasi, to gau badana be ane ita abia. Mani inai haheitalai ita laloa: Ita hereva neganai “nega momo ita kerere,” to unai ese ita ia koua lasi kongrigeisen bona haroro gaukara ai ita hereva totona. (Iam. 3:2) Unai hegeregerena, ena be ita laloa iseda gado regena be namo lasi, to Iehova hanamoa anedia ita abia noho.

11. Salamo 48:13 hegeregerena, dahaka dainai nega ita atoa ruma bese tomadiho ita karaia totona?

¹¹ Iehova ena hereva ita stadilaia bona iseda natudia dekenai ia ita herevalaia karana be Iehova tomadiho henia karana ta. Sabati dinana ai, Israela taudia idia gaukara lasi bona unai dina idia gaukaralaia Iehova ida edia hetura karana idia hagoadaia totona. (Eso. 31:16, 17) Bona idia huanai abidadama taudia ese edia natudia dekenai Iehova bona ena kara namodia idia hadibaia. Hari, namona be nega ita atoa Dirava ena Hereva ita duahia bona stadilaia totona. Unai be Iehova ita tomadiho henia karana ta, bona unai ese ita ia durua Iehova kahirakahira ita lao totona. (Sal. 73:28) Danu tama sina be natudia ida ruma bese tomadiho idia karaia hebou neganai, unai ese natudia do ia durua iseda lalokau guba Tamana ida edia hetura karana idia hagoadaia.​—Salamo 48:13 duahia.

12. Iehova ese palai dubu bona ena kohu idia karaia taudia edia gaukara ia laloa dalana amo dahaka ita dibaia?

¹² Tomadiho rumadia haginia bona naria karana be Iehova tomadiho henia karana ta. Baibel ia gwau, palai dubu bona ena kohu idauidau idia karaia neganai, unai be “gaukara helagana.” (Eso. 36:1, 4) Hari, Iehova totona Kingdom Hall bona bildin ma haida ita haginia gaukarana danu be tomadiho karana ta. Tadikaka bona taihu haida be nega bada idia henia unai gaukara idia karaia totona. Unai be Basileia gaukara durua dalana ta dainai ita moale, ani? Oibe, idia be haroro gaukara idia karaia danu. Idia haida idia ura painia gaukara idia karaia danu. Bona painia totona aplikeisen idia siaia neganai, elda taudia ese maoro idia henia, unai amo elda taudia ese idia hahedinaraia konstraksen gaukara idia durua danu. Ena be konstraksen gaukara ita diba eiava lasi, to unai tomadiho rumadia ita hagoevaia bona naria be namo.

13. Basileia gaukara durua totona ita henia kontribusen be edena bamona ita laloa be namo?

¹³ Iseda kontribusen amo Basileia gaukara  ita durua karana be Iehova tomadiho henia karana ta. Aria dekenai Israela taudia be imana kavakava Iehova vairanai idia lao lasi. (Deu. 16:16) Edia noho dalana hegeregerena harihari gaudia idia abia lao. Unai amo edia tanikiu karana idia hahedinaraia, badina Iehova be gau momo ia karaia edia hetura karana ia ida idia hagoadaia totona. Hari, Iehova be ia ida iseda hetura karana ia hagoadaia gaudia gau momo ia henia dainai, edena dala ai ita hahedinaraia ia ita lalokau henia bona ia karaia gaudia ita laloa bada? Dala ta be, eda noho dalana hegeregerena kongrigeisen bona tanobada ibounai gaukarana durua totona kontribusen ita henia. Aposetolo Paulo be inai bamona ia gwau: “Bema ta be mai ena ura ida gau ta ia henia, Dirava ese unai henia karana do ia abia dae. Ia dekenai ia noho gauna hegeregerena ia henia, to ia dekenai ia noho lasi gauna ia henia lasi.” (2 Kor. 8:4, 12) Ena be ita henia kontribusen be maragi, to mai kudouna ibounai ida ita henia dainai Iehova ese ia laloa bada.​—Mar. 12:42-44; 2 Kor. 9:7.

14. Aonega Herevadia 19:17 hegeregerena, idia dabu tadikaka taihu ita durua karana be Iehova ese edena bamona ia laloa?

¹⁴ Idia dabu tadikaka taihu durua karana be Iehova ita tomadiho henia karana ta. Iehova ia gwauhamata bema Israela taudia ese ogogami taudia idia durua, idia do ia hanamoa. (Deu. 15: 7, 10) Oibe, ia dabu tadikaka eiava taihu ta ita durua neganai, unai be hegeregere Iehova dekenai harihari gauna ta ita henia. (Aonega Herevadia 19:17 duahia.) Hegeregere, Paulo be dibura ruma ai ia noho lalonai Filipi Keristani taudia ese ia totona harihari gauna ta idia siaia, bona Paulo ia gwau: “Unai be bonana namo muramura, boubou gauna namona bamona, bona Dirava ese ia moalelaia.” (Fili. 4:18) Emu kongrigeisen ai idia noho taudia oi laloa bona sibona oi henanadai, ‘Ta lau durua diba, a?’ Iseda nega, goada, diba, bona ita dekenai idia noho gaudia amo dabu taudia ita durua neganai, Iehova ia moale. Ia dekenai unai be iseda tomadiho ena kahana ta.​—Iam. 1:27.

15. Iehova ita tomadiho henia totona nega bona goada ita henia, to dahaka dainai unai be metau lasi?

¹⁵ Iehova ita tomadiho henia totona iseda nega bona goada ita henia be namo. Bona unai ita karaia totona be metau lasi. (1 Ioa. 5:3) Dahaka dainai? Badina Iehova ita lalokau henia dainai ia ita tomadiho henia. Mani inai haheitalai ita laloa, mero maragi ia ura ena tamana dekenai harihari gauna ta ia henia. Reana hora momo lalonai ena tamana totona laulau ta ia torea. Natuna ese nega bada ia haorea karana ia laloa lasi. Badina ia ese tamana ia lalokau henia, bona ia moale unai harihari gauna ia henia totona. Unai hegeregerena, Iehova ita lalokau henia dainai mai moale ida nega bona goada ita henia Ia ita tomadiho henia totona.

16. Heberu 6:10 hegeregerena, Iehova hamoalea totona oi karaia gaudia be edena bamona ia laloa?

¹⁶ Lalokau tama bona sina idia diba edia natudia ese idia henia harihari gaudia be idauidau. Idia diba edia natudia ese idia karaia diba gaudia be idauidau. Unai hegeregerena, iseda guba tamana ia diba iseda noho daladia be idauidau. Reana oi be gau momo oi karaia diba, to emu lalokau taudia momo be unai bamona lasi. Eiava reana oi be gau momo oi karaia diba lasi badina oi buruka, oi gorere, eiava emu famili ena maduna oi huaia. To oi lalomanoka lasi. (Gal. 6:4) Iehova ese emu gaukara do ia laloaboio lasi. Bema oi gaukara goada bona badina maorona dainai oi karaia,  Iehova do ia moale. (Heberu 6:10 duahia.) Iehova be oi ura karaia gaudia ia itaia. Ia ura ia totona oi karaia tomadiho karadia dekenai oi moale.

17. (a) Bema iseda tomadiho ena kahana ta ita karaia be auka, dahaka ita karaia diba? (b) “ Emu Moale Habadaia” ena maua ai edena kahana ese oi ia durua?

¹⁷ Bema iseda tomadiho ena kahana ta, hegeregere sibona eda stadi karana eiava haroro gaukara ita karaia be auka, dahaka do ita karaia? Nega ibounai unai gaudia ita karaia neganai, do ita moale bona namo do ita davaria. Reana iseda tomadiho karadia be eksasais eiava miusiki dibaia totona ita praktis karana hegeregerena. Bema hanaihanai ita karaia lasi, do ita manada haraga lasi. To bema dina ta ta ai ita eksasais eiava praktis, dahaka do ia vara? Reana matamanai miniti haida sibona do ita karaia, to gabeai nega do ita halataia. Iseda hekwarahi dainai ia vara namo ita itaia neganai, reana do ita ura lasi unai negadia ita reaia. Iseda tomadiho karadia ai unai dala ita badinaia diba.

18. Dahaka ita karaia be mai anina bada, bona dahaka do ia vara?

¹⁸ Iehova ita tomadiho henia totona ita gaukara goada be mai anina bada. Bema unai bamona ita karaia, iseda mauri ita moalelaia bona ita ura Iehova do ita tomadiho henia ela bona hanaihanai. (Aon. 10:22) Namona be ita gari lasi, badina ita diba Iehova ese hekwakwanai negadia ai ia idia tomadiho henia taudia ia durua. (Isa. 41:9, 10) Oibe, iseda lalokau Tamana be hegeregere momokani havaraia gaudia ese ‘hairai bona hemataurai’ idia henia totona, bona ia ita tomadiho henia neganai, badina namodia momo idia noho ita moale totona!​—Apok. 4:11.