1-2. Wii sol unser aanpeetung sin tas Kot es aan nëmt?

 WËNS tuu tas wort “aanpeetung” heerst, was khomt in tayn khop? Fiilaycht, tenkst tuu in een pruuter woo sich kniit un tsu Yeehoowa peet foer se xloofe. Orer im xtant, tenkst tuu in een familye woo, mit frooheet, ti Piipel mitsamer xtutiirt.

² In te 2 situatsyoone, tuun ti layt Kot aan peete. Meecht Kot tëne sayn aanpeetung aan nëme? Kewis, wën tas mit sayn wile xtimt un wën se tëm liipe un respektiire. Meyer liipe Yeehoowa aarich fiil un meyer wise tas eyer unser aanpeetung fertiint. Tan, meyer wole tas mache in te pest aat wiis meechlich is.

3. Was tuun mer in tiise artikel siin?

³ In tiise artikel, tuun mer lërne was fer sort aanpeetung hot Yeehoowa in te piiplixe tsayte aan kenom. Meyer xpreche aach iwer 8 aate wii Yeehoowa wil hon tas mer tëm hayt aan peete. Soo lang wii mer tas noo kuke, tenk aan wii khanst tuu tayn aanpeetung tsu Kot ferpesere. Meyer tuun aach siin warom Kot in te richtich aat aan peete, uns froo lost.

4. Wii hon ti layt woo Yeehoowa aan kepeet hon liip un respekt tsu tëm ketsaycht, eep Yeesus uf te eyert khom is?

⁴ Eep Yeesus uf te eyert khom is, hon troye mëner wii Apël, Noee, Apraham un Yoop sayn respekt un liip tsu Kot ketsaycht. Wii? Tii hon Yeehoowa aan keheert, uf tëm keklaapt, un tëm opfere kemacht. Ti Piipel kept net kleenichkheete iwer ales was se mache muste fer Kot aan  peete. Awer, es is taytlich tas se hon sayn pestes kemacht fer Kot kefale. Un Yeehoowa hot tëne sayn aanpeetung aan kenom. Xpeeter, hot Yeehoowa tas mosayxe Kesets fer ti israeliiter kep. Tat trin, hot Kot fiile oryentiirunge kep woo ketsaycht hon wii se tëm aan peete solte.

5. Was fer ënerung is pasiirt in te aat fer Kot aan peete, noo tas Yeesus kextorep un uf keruuft kep is?

⁵ Noo tas Yeesus kextorep un uf keruuft kep is, is een ënerung pasiirt. Yeehoowa wolt net mee hon tas ti layt tëm aan peete teete tëm noo tas mosayxe Kesets. (Rom. 10:4) Ti kriste miste een nay kesets noo keen: “Kristus sayn kesets”. (Kal. 6:2) Fer tiise “kesets” foliche, praychte se net mee tas kanse kesets ausm khop wise orer een lang list fon reekele aan heere. Yets, miste se Yeesus noo mache un tëm sayn inlërnunge foliche. Ti kriste hayt mache aach sayn pestes fer Yeesus noo keen. Soo, kefale se Yeehoowa un tuun “nay kraft fine”. (Mat. 11:29)

6. Wii khanst tuu nutse fon tiise artikel kriin?

⁶ Soo lang wii mer noo kuke wii mer Kot aan peete, froo tich: ‘Wii fiil sin ich xon foran kang in tiise aat fer Kot aan peete?’ Tuu khanst tich aach frooe: ‘Wii khan ich mayn aanpeetung tsu Kot ferpesere?’ Kewis, solst tuu froo sin mit was tuu xon machst. Awer tuu khanst Yeehoowa sayn hilef ferlange fer se wise wiis tuu tich ferpesere khanst.

7. Was tenkt Yeehoowa iwer unser hërtsliche kepeete?

⁷ Meyer tuun Yeehoowa aan peete wën mer kepeete tsu tëm mache. Ti Piipel ferklaycht unser kepeete mit insëns. Im friirixe Israël, hon se te insëns mit ketult kemacht un tan tëm keprënt im tapernakel, un xpeeter, im thempel. (Psal. 141:2) Te insëns hat een kuute keroch, woo Kot kefalt hot. Kraat soo, unser hërtsliche kepeete tuun ‘Yeehoowa fraye’, soo kaar wën mer keweenliche wërter penutse. (Xpr. 15:8; Teut. 33:10) Meyer khene uns sicher sin: wën Yeehoowa unser petankliche un liipliche wërter heert, tas lost tëm sayn hërts froo. Tee wil hon tas mer mit tëm fertseele iwer unser soriche, unser pleen un unser winxe. Eeps tuu een kepeet tsu Yeehoowa machst, was mënst tuu fon een pisye xtil hale un tenke aan was tuu saan tuust? Wëns tuu es machst, tuust tuu te pest “insëns” woos meechlich is fer tayn Fater opfere.

8. Was fer xeen oportuniteet hon mer fer Kot loope?

⁸ Meyer tuun Yeehoowa aan peete wën mer tëm loope. (Psal. 34:1) Meyer loope Yeehoowa wën mer mit te anere fertseele iwer wii wunerlich tëm sayn kwaliteete un aarwayte sin. Wën mer triwer noo tenke aan ales was Yeehoowa xon fer uns kemacht hot, tuun mer imer uersache hon fer tëm loope. Un woo petanklicher sin mer tsu Yeehoowa, woo laychter wërt fer uns sin tëm loope. Ti preetich aarwayt kept uns een xeen oportuniteet fer “opfer fon loop fer Kot mache, es wil saan, ti frucht fon unsere lipe”. (Hep. 13:15) Soo wii mer xtil hale mise eep een kepeet tsu Kot mache, sole mer aach xtil hale un tenke eep mer mit te layt in te preetich aarwayt xpreche. Meyer wole hon tas unser “opfer fon loop” unser pestes is. Tes weeche, wën mer preetiche, mache mer tas mit muut.

9. Soo wii ti israeliiter, was fer nutse kriin mer wën mer uns fersamele? Kep een payxpiil woo tsaycht wii ti fersamlunge tich xon keholef hon.

⁹ Meyer tuun Yeehoowa aan peete wën mer tsu te fersamlunge keen. Ti israeliiter hon tiise kepoot kriit: “Ti kanse mëner mise foer  Yeehoowa, sayn Kot, khome im plats woo eyer raus suucht, tray mool es yoer.” (Teut. 16:16) Wën ti israeliiter tiise rees kemacht hon, is nimant keplip fer tëne sayn plantaaje un hayser xitse. Awer Yeehoowa hot tëne ferxproch: “Nimant tuut tayn lant winxe, wëns tuu tray mool im yoer foer Yeehoowa, tayn Kot keest.” (Eeks. 34:24) Ti israeliiter hon uf Yeehoowa kans ketraut un weeche tas sin se yeetes yoer in tiise feste kang. Un tii hon fiil nutse too tefun kriit. Tsum payxpiil: tii hon mee iwer Kot sayn Kesets kelërnt; tii hon aan Yeehoowa sayn kuutheet triwer noo ketenkt; un tii sin froo kep wayl se tsayt aus kep hon mit anere woo Yeehoowa aach keliipt hon. (Teut. 16:15) Hayt tsu taach, pasiirt was eenliches wën mer uns aan xtrenge fer in te fersamlunge keen. Un Yeehoowa wërt wool aarich froo kepe wën mer uns foer perayte fer khortse un ufmuutiche antworte kepe.

10. Warom is singe een wichtich teel fon unser aanpeetung?

¹⁰ Meyer tuun Yeehoowa aan peete wën mer mit unser priiter un xwestere singe. (Psal. 28:7) Fer ti israeliiter, singe waar een wichtich teel fon sayn aanpeetung tsu Kot. Te kheenich Tawi, tsum payxpiil, hot 288 lewiiter raus kesuucht fer singer im thempel sin. (1 Kro. 25:1, 6-8) Hayt, khene mer unser liip tsu Yeehoowa tsayche wën mer liite fon loop singe. Un meyer prayche net kuute singer sin fer tas mache. Kuk mool tiise ferklaychung: wën mer xpreche, tuun mer al “fiil mools xtolpere”; awer mer tuun net too teweeche noo lose se xpreche in te kemaynt un in te preetich aarwayt. (Tya. 3:2) Tas is net fiil anerste wën mer tsu Yeehoowa singe: meyer sole net noo lose tas mache ploos wayl mer tenke tas unser xtim net perfekt is.

11. Tëm noo Psalm 48:13, warom sole mer tsayt hoole fer ti Piipel wii familye xtutiire?

¹¹ Meyer tuun Yeehoowa aan peete wën mer unser khiner iwer tëm in lërne un wën mer ti Piipel xtutiire. Am samstaach, hon ti israeliiter net kexaft. Tii hon tiise taach penutst fer sayn froyntxaft mit Yeehoowa ferxtërke. (Eeks. 31:16, 17) Ti troye israeliiter hon sayn khiner in kelërnt iwer Yeehoowa un tas kuutes woo eyer kemacht hot. Hayt, mise mer aach tsayt hoole fer Kot sayn Wort leese un xtutiire. Tas is teel fon unser aanpeetung tsu Kot un helft uns tichter pay tëm khome. (Psal. 73:28) Un wën mer mitsamer wii familye xtutiire, khene mer unser khiner helfe een ticht froyntxaft mit unser liipliche Fater im himel paue. (Lees Psalm 48:13.) *

12. Wii hot Yeehoowa aan kesiin ti aarwayt fon tëne woo ti meewle un kexër fom tapernakel kemacht hon, un was lërne mer too temit?

¹² Meyer tuun Yeehoowa aan peete wën mer aanpeetung pletse uf paue un uf phase. Ti Piipel saat tas ti paueray fom tapernakel un aach sayn meewle un kexër mache waar een “hayliche tiinst”. (Eeks. 36:1, 4) Hayt, tuut Yeehoowa aach siin ti paueray fon Raych Saale un anere kepaye fon te Orkanisatsyoon wii teel fon sayn aanpeetung. Etliche priiter fertraype fiil tsayt too traan. Un meyer kepe fiil weyert fer ti kans aarwayt woo se mache fer tas Raych pay xteen. Kewis, xafe se aach in te preetich aarwayt. Etliche fon tëne wole soo kaar pyoneere sin. Wën ti elteste tiise flaysiche priiter un xwestere wii pyoneere in setse — kewis, wën se sich kwalifitsiire —, tuun se tsayche tas se ti paueray aarwayt pay xteen. Soo kaar wën mer net kwap sin fer in te paueray xafe,  khene mer unser teel mache fer tiise pletse in te ray un sauwer hale.

13. Warom sin ti kontripuytsyoone fer ti aarwayt fom Raych uner xtitse soo wichtich?

¹³ Meyer tuun Yeehoowa aan peete wën mer ti aarwayt fom Raych mit unser kontripuytsyoone uner xtitse. Wën ti israeliiter tsu te feste kang sin, solte se imer een kexenk fer Yeehoowa mit pringe. (Teut. 16:16) Tiise kexenk solt aach sin tëm noo was se kepe khonte. Soo, hon se petanklichkheet fer ales was Yeehoowa tëne kemacht hat ketsaycht. Wii khene mer tsu Yeehoowa tsayche tas mer tëm liipe un tas mer petanklich sin fer ales was tee uns kept? Een aat is kontripuytsyoone fer unser kemaynt un fer ti welt wayt aarwayt mache, tëm noo was mer kepe khene. Te aphostel Phaul hot kesaat: “Wën ti persoon wilich is, is tas kexenk kuut aan kenom — tëm noo was ti persoon hot, net tëm noo was ti persoon net hot.” (2 Kor. 8:4, 12) Yeehoowa kept fiil weyert fer kwalkee kontripuytsyoon woo mer fom hërts aus mache — ekaal ep tas fiil orer weenich is. (Mar. 12:42-44; 2 Kor. 9:7)

14. Tëm noo Xpriiche 19:17, was mënt Yeehoowa iwer ti hilef woo mer fer unser priiter kepe?

¹⁴ Meyer tuun Yeehoowa aan peete wën mer unser priiter helfe wën se es prayche. Yeehoowa hot ferxproch tas eyer peloone teet ti israeliiter woo ti aarme helfe teete. (Teut. 15:7, 10) Yeetes mool woo mer een pruuter orer xwester helfe, siit Yeehoowa tas wii een kexenk tsu Tëm. (Lees Xpriiche 19:17.) * Tsum payxpiil: een mool, hon ti kriste in Filipos een kexenk fer Phaul kexikt, woo in kexpërt waar. Tee hot kesaat tas tas kexenk waar ‘een opfer woo Kot kefalt’. (Fili. 4:18) Tenk iwer ti priiter in tayn kemaynt un froo tich: ‘Kepts yemant woo ich helfe khan?’ Wën mer unser tsayt, kraft, apiliteete un tinge penutse fer ti anere helfe, lose mer Yeehoowa froo. Fer tëm, tas is teel fon unser aanpeetung. (Tya. 1:27)

15. Yeehoowa aan peete khost tsayt un aanxtrengung, awer warom is tas net een last?

¹⁵ Yeehoowa in te richtich aat aan peete khost tsayt un aanxtrengung. Awer tas is net een last. (1 Yo. 5:3) Weeche was net? Wayl mer Yeehoowa aan peete weeche unser liip tsu tëm. Iwerlee tich een puup woo wil een kexenk fer sayn papa kepe. Fiilaycht, tuut eyer fiile xtune xafe fer etwas fer sayn papa moole. Awer tee tuut sich net pexweere, am tenke: ‘Xaat fer ti tsayt woo tas mich kekhost hot!’ Tee liipt sayn papa un es frayt tëm tiise kexenk kepe. Kraat soo, wayl mer Yeehoowa liipe, sin mer froo tas mer khene unser tsayt un kraft penutse fer tëm aan peete.

16. Tëm noo Hepreeyer 6:10, was mënt Yeehoowa iwer was yeete eene fon uns macht fer tëm froo lose?

¹⁶ Liipliche eltere waarte net tas selwiche kexenk fon yeete eene fon sayn khiner kriin. Tii wise tas sayn khiner net ekaal sin un tas se khene net tas selwiche mache. Kraat soo, unser Fater im himel wees was yeete eene fon sayn khiner mache khan. Fiilaycht, khanst tuu mee mache wii fiil fon unser liipe priiter. Orer khan sin tas tuu khanst net soo fiil wii ti anere mache weeche tayn elter, tayn kesuntheet, orer weeche ti flichte woos tuu in te familye host. Wën es soo is, playp net oone muut. (Kal. 6:4) Yeehoowa ferkest sich net fon was tuu machst. Wëns tuu tayn pestes am kepe pist, un weeche ti richtich uersach, wërt Eyer froo. (Lees Hepreeyer 6:10.) * Yeehoowa wees soo kaar was in tayn  hërts is un was tuu tëm kërn mache teest. Tee wil hon tas tuu froo wërst mit was tuu mache khanst fer tëm aan peete.

17. (a) Was khene mer mache wëns xweyer fer uns is een phunkt fom artikel aan wëne? (b) Wii een aktiwiteet mache, woo im khaste “ Ferkrees tayn frooheet” xteet, hot tich xon keholef?

¹⁷ Awer im xtant, is es xweyer fer uns etliche phunkte fom artikel aan wëne, wii ti Piipel xtutiire un preetiche keen. Was khene mer tan mache? Tsiimlich sicher, woo eftas mer tiise tinge mache, woo liiper tuun mer se hon un mee nutse tuun mer kriin. Meyer khene unser aanpeetung tsu Kot ferklayche mit fiisix esersiis mache orer een instrumënt xpiile. Wën mer tiise aktiwiteete tan un wan mache, keen mer net fiil foran. Awer, was teet pasiire wën mer tas yeete taach mache teete? Am aanfang, fiilaycht tuun mer ploos phaar minute too traan fertraype. Awer soo wii ti taache rom keen, khene ti minute, xtune wëre. Wën mer ti kuute resultaate fon unser aanxtrengung siin, tsiimlich sicher tuun mer mee frayt in tiise aktiwiteete fine un noch mee muut hon fer tëne mache. Tas selwiche kilt fer unser aanpeetung tsu Kot.

18. Was is tas wichtichste tings woo mer mache khene, un was is te resultaat too tefun?

¹⁸ Niks is wichticher in unser leepe wii unser pestes mache fer Yeehoowa aan peete. Wën mer uns mit kans hërts too traan aan xtrenge, tuun mer een froo leepe, mit een opjetiiw, hon. Meyer hon aach ti hofnung fer Yeehoowa fer imer aan peete. (Xpr. 10:22) Un xon hayt, kriin mer friit, wayl mer wise tas Kot uns helfe tuut wën mer propleeme mit mache. (Isa. 41:9, 10) Kewis, hon mer fiile uersache fer froo sin wën mer aanpeetung kepe fer unser liipliche Fater, woo fertiint ‘ti hërlichkheet un ti eer’ fon sayn kans kriatsyoon kriin! (Apo. 4:11)