1-2. Otjikeṋa tji matji tjiti kutja Mukuru ma yakure omerikotameneno wetu?

 HAPO tji wa zuu embo ndi “okurikotamena,” mo ripura na iye? Mape ya o ripura nomurumendu omukambure ngu ri kozongoro meṋe yombete ye, ngu ma kumbu ku Jehova okuza komutima ngunda e hi ya rara. Poo mape ya o ripura neṱunḓu ndi mari konḓonona Ombeibela nondjoroka.

² Ovihorera aviyevari mbyo, mavi raisa omuano wokurikotamena ku Jehova. Hapo Jehova ma yakura omerikotameneno wawo? Eye ma yakura indu owo tji ye ri otja kondando ye, na indu tji mave raisa orusuvero nondengero ku ye. Eṱe twa suvera Jehova tjinene. Nu matu tjiwa kutja eye wa pwa okurikotamenwa, neṱe matu vanga okutjita nao momuano omusembasemba.

3. Morupa ndwi matu kahungirira ku ye?

³ Morupa ndwi, matu kerihonga ohunga nomuano womerikotameneno Jehova mbwaa yakura oruveze orukuru, nu matu kahungirira komiano hambondatu Jehova me vanga kutja tu rikotamene ku ye ndino. Otja tji matu tjiti nao, matu yenene okuripura ohunga nomuano mu matu yenene okutjita omarundurukiro momerikotameneno wetu kutja ye yakurwe i ye. Wina matu katara kutja ongwaye okurikotamena ku Jehova momuano omusemba tji ku tu pa ondjoroka.

4. Omomuano uṋe imba mbaave rikotamene ku Jehova moruveze orukuru mu va raisa ondengero norusuvero ku Jehova?

⁴ Ovakarere ovaṱakame voruveze orukuru tjimuna Abel, Noa, Abraham, na Job aave raisa ondengero norusuvero ku Jehova.  Omomuano uṋe? Owo va raisa onḓuviro ku Mukuru, va ri nongamburiro mu ye, nu ve mu tjitira ozombunguhiro. Ombeibela ka i tu raere oviṋa avihe mbyaave sokutjita momerikotameneno wawo. Nungwari va kondja pu mave yenene okuyozika Jehova, neye wa yakura omerikotameneno wawo. Jehova kombunda wa yandja Omatwako okupitira mu Moses kozondekurona za Abraham. Omatwako nga ya ri nomaronga omengi ohunga nomuano womerikotameneno Jehova mbwe yakura.   

5. Omarundurukiro yeṋe nga tjitwa momerikotameneno watjiri kombunda yonḓiro nombendukiro ya Jesus?

⁵ Kombunda yonḓiro nombendukiro ya Jesus, Jehova kaa undjire ko kutja imba mbu mave rikotamene ku ye, ve rikotamene ku ye otja kOmatwako nga yandjere kotjiwaṋa tja Israel okupitira mu Moses. (Rom. 10:4) Ovakriste aave sokukongorera etwako epe, ndi ri “etwako raKristus.” (Gal. 6:2) Owo aave sokukara nonḓuviro ‘ketwako’ ndo, nu kaku rihonga ro motjiuru nokukongorera omazeva omengi ngu maye ve raere mbi mave sokutjita na mbi ve ha sokutjita, nungwari aave sokuhorera ku Jesus nokukara nonḓuviro komahongero we. Ndino, Ovakriste wina ve kondja pu mave yenene okuhorera ku Kristus kokutja ve yorokise Jehova nokurimunina oveni “orusuvo.”—Mat. 11:29.

6. Matu munu vi ouwa morupa ndwi?

⁶ Otja tji matu katara komuano auhe womerikotameneno wetu, auhe wetu ma hepa okuripura kutja, ‘Hapo mbi ungura vi motjiṋa hi?’ Ove wina mape ya o ripura omuini kutja, ‘Hapo me hepa okutjita omarundurukiro momuano wandje womerikotameneno?’ Ove mo yenene okukara nondjoroka na imbi mbi u ungura nai, nungwari wina ma rire nawa okukumba ku Jehova kutja me ku vatere okuungura ovingi kombanda yanao.

7. Jehova u vara vi ozongumbiro zetu nḓu tu kumba okuza komutima?

⁷ Eṱe tu rikotamena ku Jehova indu tji matu kumbu ku ye. Omatjangwa ye sasaneka ozongumbiro zetu kovyomoro omuwa mbwaau rongerisiwa nawa pondanda yomaturiro, nu kombunda mbwa karongerisiwa pondjuwo ondjapuke ya Muhona. (Eps. 141:2) Ovyomoro omuwa mbyo vya ri nomuṋuko omuwa mbwaau tjata ku Mukuru. Momuano otjingewo, ozongumbiro nḓu tu kumba okuza komutima ze mu pa ‘onyuṋe,’ nandarire kutja katu nokuungurisa omambo omazeu. (Omiano 15:8; Deut. 33:10) Eṱe tu nomapu omawa okukambura kutja Jehova u nonyuṋe okupuratena ku eṱe, indu tji matu raisa orusuvero rwetu nondangi ku ye. Eye u vanga kutja tu mu raere ozongendo zetu, omaundjiro nozonḓero zetu. Ongwaye tji u hi nokuripura nawa ohunga noviṋa mbi mo sokuhungira ku Jehova ngunda au hi ya kumba? Tjiwa tjiti nao, ove mo yandja “ovyomoro omuwa” ovisembasemba ku Iho womeyuru.

8. Omozongaro zeṋe mu matu yenene okutanga Mukuru?

⁸ Eṱe tu rikotamena ku Jehova indu tji matu mu tanga. (Eps. 34:1) Eṱe tu tanga Jehova tji matu raere varwe ohunga nomuano mbu twa suvera ovikaṋena vye noviungura vye oviwa. Eṱe matu kara noviṋa ovingi oviwa okuhungira ohunga na Jehova indu tji tu nondangi ku ye. Indu tji matu ripurire oukoto kouwa wa Jehova, noviṋa avihe mbye tu tjitira, matu panḓere pokumutanga aruhe. Otjiungura tjokuzuvarisa tji tu pa ouyara ‘wokupunguhira Ndjambi ombunguhiro yondangero,’ ndji tu mu pa “nomiṋa mbi hongonona ena re.” (Hebr. 13:15) Tjimuna tji tu sokuripurira nawa ku imbi mbi matu kahungira ngunda atu  hi ya kumba ku Jehova, onawa okuripurira ku imbi mbi matu kahungira ku imba mbu tu hakaena motjiungura tjokuzuvarisa. Eṱe matu vanga kutja ‘ombunguhiro yetu yondangero’ i rire osembasemba. Eṱe opu tu zokuhungira okuza komutima indu tji matu hongo varwe ouatjiri.

9. Matu munu vi ouwa mozombongarero zetu otja Ovaisrael voruveze orukuru tji va munine ouwa? Yandja otjihorera ohunga nomuano ozombongarero zombongo mu ze ku vatera.

⁹ Eṱe tu rikotamena ku Jehova indu tji tu ri pozombongarero zombongo. Ovaisrael voruveze orukuru va raerwa kutja: “Povikando vitatu mombura, ngamwa ovavena avehe ngave munike komurungu waMuhona, Ndjambi woye, poṋa Muhona pe ritoororera.” (Deut. 16:16) Owo aave sokuisa ozonganda zawo novikunwa vyawo nokuhina ondjeverero. Nungwari Jehova wa kwizika kutja “kape na umwe ngu me rizerire okuti kwoye, ove ngunda awa sekama okukamunika komurungu waMuhona, Ndjambi woye.” (Eks. 34:24) Ovaisrael mba ri nondira ku Jehova mbo, aave i komazemburukiro ngaaye tjitwa ombura aihe, mena rokutja va ri nongamburiro okuura mu Ye. Nowo va muna ouwa momiano omingi. Otjotjihorera, owo ve rihonga ovingi ohunga nOmatwako wa Mukuru, aave ripurire ko oukoto kouwa Jehova mbwe ve tjitira, nokuyorokera okukara pu novakambure ovakwao. (Deut. 16:15) Eṱe wina tu muna ouwa otjingewo indu tji matu tjiti atjihe tji matu yenene okukara pozombongarero zOukriste. Nu ripura nondjoroka Jehova ndje kara na yo indu tji twe ya atwe rirongerisa nawa okuyandja omaziriro wetu omasupi nomayanḓiparise.

10. Omomuano uṋe okuimbura mu ku ri orupa orunanḓengu momerikotameneno wetu?

¹⁰ Tu rikotamena ku Jehova indu tji matu imbura pamwe. (Eps. 28:7) Ovaisrael aave vara okuimbura otjorupa orunanḓengu rwomerikotameneno wawo. Ombara David wa zika Ovalevi 288 okurira ovaimbure pondjuwo ondjapuke ya Muhona. (1 Ekuruh. 25:1, 6-8) Ndino, eṱe matu yenene okuraisa orusuvero ku Mukuru indu tji matu imbura omaimburiro wondangero. Eṱe katu nokuhepa okurira ovaimbure ovawa okutanga Jehova. Tara komasasanekero nga: Indu tji matu hungire “atuhe tu tataiza moviṋa ovingi,” nungwari iho katji tu tjaere kutja atu ha hungire mombongo poo motjiungura tjokuzuvarisa. (Jak. 3:2) Momuano otjingewo, matu yenene okutanga Jehova nomaimburiro nandarire kutja matu munu kutja kaweṱe ovaimbure ovawa.

11. Otja kEpsalme 48:13, ongwaye tji matu sokutwa po oruveze komakonḓononeno wOmbeibela otjeṱunḓu?

¹¹ Eṱe tu rikotamena ku Jehova indu tji matu konḓonona Embo re nokuhonga ovanatje vetu ohunga na ye. Ovaisrael kaave ungura otjiṋa mEsabata nu otjaave ungurisa eyuva ndo okupamisa oupanga wawo ku na Jehova. (Eks. 31:16, 17) Imba ovaṱakame mokati kawo aave hongo ovanatje vawo ohunga na Jehova nouwa we. Eṱe wina ndino matu sokutwa po oruveze rwokulesa nokukonḓonona Embo ra Mukuru. Indwo orupa rwomerikotameneno wetu ku Jehova, nu ru tu vatera okutumbuka popezu na ye. (Eps. 73:28) Neṱe tji matu konḓonona pamwe otjeṱunḓu, tu yenena okuvatera ovanatje vetu okuhara oupanga wopopezu ku na Tate wetu womeyuru.—Lesa Epsalme 48:13.

12. Hapo matu rihongere ko ye komuano Jehova maa vara oviungura vya imba mbaave ṱunu ondanda yomahakaeneno?

¹² Okutunga nokuṱuna otuveze twomerikotameneno omuano wokurikotamena ku Jehova. Jehova aa vara oviungura vyokutunga ondanda yomahakaeneno noviungurisiwa vyayo otjoviungura oviyapuke. (Eks. 36:1, 4) Ndino wina, Jehova u vara oviungura  vyokutunga Omatuwo wOmerikotameneno notuveze twarwe twotjira tja Jehova otjoviungura oviyapuke. Ovakambure ovakwetu tjiva ve ungurisa oruveze oruingi okuungura oviungura mbyo. Eṱe tjiri tu nondangi kombatero ndji ve yandja koviungura vyOuhona. Otjiperi kutja owo wina ve kara norupa motjiungura tjokuzuvarisa. Tjiva vawo mape ya ve vanga okurira ovakandjira. Ovanene vombongo mave yenene okuraisa kutja ve vara otjiungura tjokutunga otjotjiṋa otjinanḓengu, mokuhina okukeyakeya okuzika ovakambure mbe ungura otjiungura ho okurira ovakandjira, ndoovazu mave yenene okurira ovakandjira. Kainatja kutja tu nondjiviro motjiungura tjokutunga poo indee, eṱe atuhe matu yenene okukara norupa mokutjinda otuveze two oukohoke nokutuṱuna nawa.

13. Matu sokuvara vi otjiyandjewa tji tu yandja okuvatera otjiungura tjOuhona?

¹³ Eṱe tu rikotamena ku Jehova indu tji matu vatere oviungura vyOuhona mokuyandja oviyandjewa. Ovaisrael kaave sokuya komurungu wa Jehova nokuhina otjiṋa. (Deut. 16:16) Owo aave sokuyeta oviyandjewa otja paave yenene. Momuano mbwo, aave raisa kutja ve nondangi koviṋa avihe Jehova mbyee ve tjitire. Matu yenene vi okuraisa orusuvero rwetu ku Jehova nondangi yetu koviṋa avihe Jehova mbye tu tjitira? Omuano umwe, omokuyandja ovimariva kombongo yeṋu na koviungura vyouye auhe otja ozongaro zoye pu maze ku yandjere. Omuapostele Paulus wa tja: “Omundu tje nombango ombwa na yandja otja ku imbi mbye na vyo, Ndjambi ma yakura ihi otjiyandjewa. Ndjambi ke nakuundja okupewa i omundu ngo imbi eye mbye hi na vyo.” (2 Kor. 8:4, 12) Jehova u vara otjiyandjewa atjihe tji tu yandja okuza komutima, kainatja kutja tji ṱa pi.—Mar. 12:42-44; 2 Kor. 9:7.

14. Otja kOmiano 19:17, Jehova u vara vi ombatero ndji tu yandja kovakambure ovakwetu mbe nouhepe?

¹⁴ Eṱe tu rikotamena ku Jehova indu tji matu vatere ovakambure ovakwetu mbe nouhepe. Jehova wa kwizikira Ovaisrael kutja eye me ve sere ondaya indu tji mave vatere ovasyona nouharupu. (Deut. 15:7, 10) Otjikando atjihe tji matu vatere ovakambure ovakwetu mbe nouhepe, Jehova u tji vara otjotjiyandjewa ku Ye. (Lesa Omiano 19:17.) Otjotjihorera, indu Ovakriste va Filipi tji va hinda otjiyandjewa ku Paulus tja ri motjovakamburwa, eye wa vara otjiyandjewa tjawo ‘otjombunguhiro ndji tjata ku Ndjambi, nEye me nonyuṋe.’ (Fil. 4:18) Ripurira ku imba mbe ri mombongo yeṋu nu u ripure omuini kutja, ‘Hapo pe nomukambure omukwetu ngu me yenene okuvatera?’ Jehova u kara nonyuṋe indu tji me tu munu tji matu ungurisa oruveze rwetu, omasa wetu, nondjiviro, noviṋa mbi tu na vyo okuvatera imba mbe nouhepe. Eye u vara ovitjitwa otja imbyo otjomuano wetu wokurikotamena ku ye.—Jak. 1:27.

15. Omerikotameneno watjiri ye hepa oruveze nozongondjero, posi yokutja ongwaye tji ye he ri omazeu?

¹⁵ Omerikotameneno watjiri ye hepa oruveze nozongondjero. Posi yokutja kamazeu. (1 Joh. 5:3) Omena raye? Mena rokutja eṱe tu rikotamena ku Jehova mena rworusuvero rwetu ku ye. Ripurira komuatje omuṱiṱi ngu ma vanga okuyandja otjiṋa ku ihe. Eye mape ya a ungurisa oruveze rwe oruingi okumuperendera otjiperendero. Omuzandona kamaa kara nomuhihamwatima mena roruveze ndwa ungurisa okuperenda otjiperendero ho. Eye wa suvera ihe, nu u nondjoroka okumupa otjiyandjewa ho. Momuano otjingewo, mena rorusuvero rwetu ku Jehova, eṱe tu nondjoroka okuungurisa oruveze rwetu nomasa wetu okurikotamena ku ye.

16. Otja kOvaheberi 6:10, Jehova u noumune uṋe ohunga nozongondjero nḓu tu tjita okutjata ku ye?

 ¹⁶ Ovanene vorusuvero kave undjire ko okupewa otjiyandjewa otjingetjo komuatje wawo auhe. Owo ve tjiwa kutja omuatje auhe wa panguka moviṋa mbi ma yenene okutjita. Momuano otjingewo, Tate wetu womeyuru u tjiwa imbi auhe wetu mbi ma yenene okutjita. Mape ya ove mo yenene okuungura ovingi okukapita ovengi mbu mo tjiwa nu mbu wa suvera. Poo mape ya ko yenene okuungura ovingi otja varwe tji ve tjita, ngahino mena rotjiwondo tjoye, ouveruke poo omerizirira ngu u na wo meṱunḓu. O rihahiza. (Gal. 6:4) Jehova kamaa zembi oviungura vyoye. Indu tji wa yandja pu mo yenene nondando osemba, eye ma kara nonyuṋe. (Lesa Ovaheberi 6:10.) Jehova nandarire u tjiwa imbi mbi mo vanga okutjita. Eye u vanga kutja u kare nohange ohunga na imbi mbi mo yenene okumuungurira.

17. (a) Omikambo viṋe mbi matu yenene okutoora indu tji twa munu kutja pe noviṋa momerikotameneno wetu mbi ri ovizeu okutjita? (b) Otjikeṋa tji tja raisiwa mokawongo nga “ Oviṋa mbi mavi ku vatere okukara nondjoroka,” tji tja yenena okukuvatera?

¹⁷ Matu yenene okutjita vi indu tje ri ouzeu ku eṱe okutjita oviṋa tjiva mbi twa hungirire ko, tjimuna okukonḓonona Ombeibela poo okuzuvarisa? Eṱe tji twa kara norupa movitjitwa mbi aruhe, mavi utu okutjata ku eṱe nu matu munu ouwa mu vyo. Eṱe matu yenene okusasaneka omerikotameneno wetu ku na ovitjitwa tjiva, tjimuna okurikuturisa orutu poo okurihonga okunyanda otjihumba tjomuzumbi. Indu tji tu hi nokutjita oviṋa mbyo aruhe, eṱe kamaatu yenene okuvitjiwa tjimanga. Posi yokutja indu tji twa tye okutjita oviṋa mbyo eyuva arihe mape tjitwa tjike? Eṱe matu yenene okuuta kouṱiṱiṱiṱi nu okuzambo atu yende amatu weza oruveze. Otja tji matu munu omarundurukiro omawa mozongondjero zetu, eṱe matu utu okukara nondjoroka yokuviungura. Omerikotameneno wetu matu yenene okuyevara momuano otjingewo wina.

18. Matu yenenisa vi ondando ndji twa memenwa, nu tji twa tjiti nao maku kongorere tjike?

¹⁸ Eṱe tu yenenisa ondando ndji twa memenwa indu tji matu rikotamene ku Jehova nomutima wetu auhe. Tji twa tjiti nao, matu kara nehupo ewa rondjoroka nu matu kara nomaundjiro wokurikotamena ku Jehova nga aruhe. (Omiano 10:22) Eṱe nai tu nohange momuinyo mena rokutja tu tjiwa kutja Jehova u vatera ovakarere ve indu tji va munu ouzeu. (Jes. 41:9, 10) Eṱe tu kara nondjoroka indu tji matu rikotamene ku Tate wetu worusuvero, ngwa pwa okumuna “ondjozikiro nondengero” okuza koviutwa vye avihe.—Omavan. 4:11.