1-2. Nama patut digaga kitai ngambika Petara nerima sembah kitai?

 NAMA runding nuan lebuh nuan ninga leka jaku “sembah”? Nuan engka ngambarka seiku menyadi benung besampi ba tisi katil iya sereta madahka asai ati iya ngagai Petara. Tauka nuan engka ngambarka siti ruang bilik ke rindu belajarka Bup Kudus.

² Semua sida ke disebut tadi benung nyembah Jehovah. Tang kati Jehovah nerima sembah sida? Au. Enti sida enggau naka ulih ngereja peneka Iya, rinduka Iya sereta bebasaka Iya. Kitai mega amat rinduka Jehovah lalu kitai nemu Iya endang patut disembah. Nya alai, kitai deka meri Iya sembah ti pemadu manah.

3. Nama deka dikerandauka kitai ba artikel tu?

³ Ba artikel tu, kitai deka berandauka sembah ti diterima Jehovah maya jeman Bup Kudus kelia. Udah nya, kitai deka berandauka lapan iti pengawa ba sembah ti diterima Jehovah kemayaharitu. Enggau nya, kitai ulih berundingka baka ni kitai ulih ngemansangka pengawa tu enggau manah agi dalam sembah kitai ngagai Jehovah. Ke penudi sekali, kitai deka meda nama kebuah sembah ngagai Jehovah ulih ngasuh kitai gaga ati agi.

4. Sebedau Jesus datai ke dunya, baka ni bala penyembah Jehovah nunjukka basa sereta rinduka Jehovah?

⁴ Sebedau Jesus datai ke dunya, baka ni penyembah Jehovah ti tetap ati baka Abel, Noah, Abraham, enggau Jop nunjukka basa sereta rinduka Jehovah? Bup Kudus nadai madah enggau silik semua utai ti patut dikereja sida kena nyembah Jehovah. Tang kitai nemu sida ngasika Iya, bisi pengarap ngagai Iya, meri pemeri ngagai Iya sereta enggau naka ulih ngemuliaka Iya. Nya alai, Jehovah nerima sembah sida. Udah nya, Jehovah meri Adat Moses ngagai orang Israel. Adat nya bisi mayuh atur ti silik pasal chara sembah ti diterima Jehovah.

5. Pengudah Jesus mati lalu diangkatka idup baru, baka ni chara orang patut nyembah Jehovah?

⁵ Pengudah Jesus mati sereta diangkatka idup baru, Jehovah enda agi ngasuh bala penyembah Iya nitihka Adat Moses. (Rom. 10:4) Tang Iya ngasuh orang Kristian nitihka adat ti baru, iya nya “adat Kristus.” (Gal. 6:2) Kena nitihka “adat” tu, sida enda ibuh ngafal lalu enda ibuh nitihka mayuh atur. Sida semina patut nitihka teladan sereta ngasika ajar Jesus. Kemayaharitu, orang Kristian mega enggau naka ulih nitihka teladan Kristus. Enggau ngereja tu, sida ulih ngelantangka ati Jehovah lalu “deka bulih pengering baru.”—Mat. 11:29, NWT.

6. Baka ni kitai bulih penguntung ari artikel tu?

⁶ Lebuh berandauka tiap iti pengawa ke digaga kitai kena nyembah Jehovah, tanya meh diri empu, ‘Nama pemansang aku ke diatu? Ulih aku ngemansangka agi chara aku nyembah Jehovah?’ Enti nuan ngasaika nuan udah ngaga pemansang, nuan patut berasai gaga ati. Tang nuan ulih besampi ngagai Jehovah ngambika nemu chara nuan ulih ngemansangka agi sembah ngagai Iya.

7. Nama asai ati Jehovah lebuh kitai besampi ari ati?

⁷ Besampi ngagai Jehovah. Bup Kudus nyemaka sampi kitai enggau menyan ke disediaka enggau manah. Menyan tu diberi ba Langkau Sembiang lalu udah nya ba rumah sembiang Jehovah. (Mas. 141:2) Bau rengut ari menyan tu ngelantangka ati Petara. Sama mega, sampi kitai ari ati ‘ngelantangka ati Petara,’ taja pan kitai semina ngena jaku ti mudah. (J-lam. 15:8; U-dat. 33:10) Nya alai kitai andal, Jehovah rindu ninga sampi kitai ti ngayanka pengerindu sereta terima kasih ngagai Iya. Iya deka kitai madahka pengirau kitai, utai ti dikearapka kitai enggau pengingin kitai. Nyadi sebedau besampi, berunding meh enggau manah pasal utai ke deka disebut kitai. Enggau tu, nuan ulih meri “menyan” ti pemadu manah ngagai Apai kitai ti di serega.

8. Ni maya kitai ulih muji Jehovah?

⁸ Muji Jehovah. (Mas. 34:1) Kitai muji Jehovah lebuh kitai bejaku pasal pemanah enggau pengawa Iya ti ngalitka ati. Asai terima kasih deka meransang kitai muji Jehovah. Nya alai, kitai patut meri awak berunding enggau dalam semua pemanah ke diayanka Jehovah ngagai kitai. Enggau tu, kitai deka seruran bisi peluang muji Iya. Maya nginjil, kitai bisi peluang “meri puji ngagai Petara, nyadika pemeri kitai, iya nya pemeri ti diberi kitai ngena mulut.” (Heb. 13:15, NWT) Baka kitai ke berunding dulu sebedau besampi, kitai mega patut besedia enggau manah sebedau nginjil. Tu ketegal, kitai deka “meri puji” ti pemadu manah ngagai Jehovah. Enggau tu, kitai ulih nginjil enggau ransing.

9. Baka orang Israel kelia, nama penguntung ke diulih kitai lebuh datai begempuru? Padahka baka ni gempuru udah nulung nuan empu.

 ⁹ Datai begempuru. Tu pesan ke diberi ngagai orang Israel kelia: ‘Kita enda tau enda datai nyembah Jehovah tiga kali setaun ba siti endur ti deka dipilih Jehovah.’ (U-dat. 16:16) Lebuh sida ngereja tu, nadai orang deka nyaga rumah sereta kebun sida. Tang Jehovah besemaya, “nadai orang deka nguji ngalahka menua sida.” (P-sut. 34:24) Ketegal orang Israel arapka Jehovah, sida datai ngagai pengerami ti diatur Jehovah tiga kali setaun. Enggau ngereja nya, sida deka bulih mayuh penguntung. Ambika chunto, sida ulih meretika agi Adat Petara. Sida mega ulih berunding enggau dalam semua pemanah Jehovah lalu gaga ati begulai enggau penyembah Jehovah ke bukai. (U-dat. 16:15) Kitai mega bulih penguntung ti sama enti kitai enggau naka ulih datai begempuru. Kelimpah ari nya, enti kitai nyediaka saut ti pandak sereta meransang, Jehovah tentu amat gaga ati.

10. Nama kebuah belagu amat penting kena kitai nyembah Petara?

¹⁰ Muji Jehovah ngena lagu. (Mas. 28:7) Ba orang Israel, belagu nya siti begian ti penting ba sembah sida. Raja David milih 288 iku orang Lewi nyadi penanyi ba rumah sembiang Jehovah. (1 Ban. 25:1, 6-8) Kemayaharitu, lebuh kitai belagu muji Petara, kitai nunjukka pengerindu ngagai Iya. Kati kitai patut nyadi penanyi ti landik kena belagu muji Iya? Enda. Uji berunding: Lebuh kitai bejaku, “semua kitai bela ngereja mayuh macham penyalah.” Tang tu enda nagang kitai ari ngenataika begian tauka meri komen ba eklisia sereta nginjil. (Jas. 3:2) Sama mega, taja pan kitai enda landik belagu, tang semua kitai agi ulih muji Jehovah ngena lagu.

11. Nitihka Masmur 48:13, nama kebuah kitai patut bisi jadual kena Belajarka Bup Kudus enggau Diri Sebilik?

¹¹ Belajarka Bup Kudus sereta ngajar anak pasal Jehovah. Ba Hari Sabat, orang Israel ngetu gawa. Lalu tu meri sida peluang kena negapka kaul sida enggau Jehovah. (P-sut. 31:16, 17) Orang Israel ti tetap ati deka ngajar anak sida pasal Jehovah sereta pemanah Iya. Kemayaharitu, kitai mega patut ngaga jadual kena macha sereta mansik Bup Kudus. Tu sebagi ari sembah kitai ngagai Jehovah, lalu ulih nulung kitai semak ngagai Iya. (Mas. 73:28) Lebuh kitai Belajarka Bup Kudus enggau Diri Sebilik, nya ulih nulung bala anak ngambika bisi kaul ti rapat enggau Jehovah.—Bacha Masmur 48:13.

12. Nama ulih dipelajar kitai ari runding Jehovah pasal pengawa bekaul enggau langkau sembiang?

¹² Nirika endur kitai nyembah Jehovah sereta nentuka iya seruran manah. Bup Kudus madahka pengawa nirika langkau sembiang Jehovah sereta nyediaka perengka ti dikena ba langkau sembiang nya siti “pengawa ti kudus.” (P-sut. 36:1, 4, NWT) Kemayaharitu mega, Jehovah ngumbai pengawa nirika Palan Gempuru sereta bengunan teokratik ke bukai nya sebagi ari sembah ti tuchi. Sekeda bala menyadi ngena mayuh awak ba pengawa nirika bengunan teokratik sereta nentuka bengunan nya seruran manah. Kitai tentu amat beterima kasihka pengawa sida. Bala menyadi tu mega ngereja pengawa nginjil lalu bisi entara sida nya deka nyadi pengerintis biasa. Tuai gempuru mega ulih nunjukka diri nyukung pengawa nirika sereta nyeruri bengunan teokratik. Nya alai, bala tuai gempuru tentu enda nagang bala menyadi nya ari nyadi pengerintis enti sida layak. Pia mega, enda ngira kitai landik tauka enda ba pengawa nya, semua  kitai ulih nulung nentuka bengunan teokratik kitai seruran beresi sereta dijaga enggau manah.

13. Nama kebuah kitai meri pemeri kena nyukung pengawa Perintah Petara?

¹³ Meri pemeri kena nyukung pengawa Perintah Petara. Lebuh orang Israel datai nyembah Jehovah, sida patut mai pemeri ngagai Iya. (U-dat. 16:16) Sida ulih meri pemeri nitihka ulih sida. Enggau chara tu, sida nunjukka diri beterima kasihka semua utai ti udah digaga Jehovah ke sida. Kemayaharitu, baka ni kitai ulih ngayanka pengerindu ngagai Jehovah sereta asai terima kasih ke semua utai ti digaga Iya ke kitai? Siti chara nya enggau meri pemeri ke eklisia sereta ke pengawa serata dunya nitihka ulih kitai. Rasul Paul nulis: “Enti pengeransing nya bisi, pemeri kita nya deka diterima, beduduk ba utai ti dikemisi kita, ukai beduduk ba utai ti nadai ba jari kita.” (2 Kor. 8:4, 12) Nyadi, Jehovah tentu gaga ati enggau utai ke ulih diberi kitai taja pan nya mimit aja.—Mrk. 12:42-44; 2 Kor. 9:7.

14. Nitihka Jaku-Dalam 19:17, nama asai ati Jehovah lebuh kitai nulung bala menyadi?

¹⁴ Nulung bala menyadi ke begunaka bantu. Jehovah besemaya deka merekatka orang Israel ke nulung orang ti miskin. (U-dat. 15:7, 10) Genap kali kitai nulung bala menyadi ke begunaka bantu, Jehovah ngumbai nya baka siti hadiah ngagai Iya. (Bacha Jaku Dalam 19:17.) Ambika chunto, lebuh Paul dijil, orang Kristian ba Pilipi ngirumka utai ke diguna iya. Paul ngumbai nya ‘pemeri ti diterima sereta dikerinduka Petara.’ (Plp. 4:18) Nya alai, perundingka bala menyadi ba eklisia nuan lalu tanya meh diri empu, ‘Sapa ke ulih ditulung aku?’ Jehovah lantang ati lebuh kitai ngena awak, pengering, pengelandik sereta utai ti dikemisi nulung bala menyadi ke begunaka bantu. Jehovah ngumbai pengawa kitai ke nulung bala menyadi Kristian nya sebagi ari sembah kitai.—Jas. 1:27.

15. Kitai begunaka awak enggau usaha ba sembah kitai ngagai Jehovah. Taja pia, nama kebuah tu enda ngenusahka kitai?

¹⁵ Kitai patut meri awak enggau usaha kena nyembah Jehovah. Tang tu enda ngenusahka kitai laban kitai rinduka Jehovah. (1 Jhn. 5:3) Gambarka seiku anak mit deka meri hadiah lukisan ngagai apai iya. Iya engka begunaka mayuh awak kena nembuka lukisan nya. Tang anak nya enda ngasaika iya masau jam. Tu ketegal anak nya sayauka apai iya sereta gaga ati meri hadiah lukisan nya ngagai apai iya. Sama mega, ketegal kitai rinduka Jehovah, kitai gaga ati meri awak enggau pengering kitai kena nyembah Iya.

16. Nitihka Hebrew 6:10, nama asai ati Jehovah pasal utai ke digaga tiap iku kitai kena ngelantangka ati Iya?

¹⁶ Apai indai ti bepengerindu enda ngarapka hadiah ti sama ari tiap iku anak sida. Tu ketegal sida nemu utai ke ulih digaga tiap iku anak sida nya enda sama. Baka nya mega, Jehovah meretika situasi tiap iku kitai. Nuan engka ulih ngereja mayuh agi ari orang bukai. Tauka nuan engka enda ulih ngereja mayuh baka orang bukai ketegal umur, pengerai tauka tanggung pengawa nuan ba ruang bilik. Enti pia, anang meh asa ati. (Gal. 6:4) Jehovah deka seruran ingatka pengawa ti udah dikereja nuan. Iya berasai gaga ati seagi-agi nuan meri utai ti pemadu manah sereta ngereja nya enggau tuju ati ti betul. (Bacha Hebrew 6:10.) Ingat meh, Jehovah ulih nemu tuju ati nuan ti bendar. Iya deka nuan berasai  gaga sereta puas ati enggau utai ti ulih digaga nuan ke Iya.

17. (a) Nama patut digaga kitai enti kitai ngasaika sekeda pengawa ba sembah kitai tusah dikereja? (b) Baka ni siti ari pengawa ba kutak “ Tambahka Pengaga Ati Nuan” udah nulung nuan?

¹⁷ Enti kitai berasai tusah deka ngereja sekeda pengawa ba sembah kitai, baka belajarka Bup Kudus kediri empu tauka pengawa nginjil, nama patut digaga kitai? Lebuh kitai majak enggau pengawa tu, kitai deka majak agi gaga ati sereta bulih mayuh penguntung. Kitai ulih nyemaka sembah kitai baka pengawa sesais tauka belajar main perengka musik. Enti kitai enda suah ngereja nya, kitai tentu enda ulih ngaga mayuh pemansang. Tang baka ni enti sema kitai berunding deka ngereja nya tiap hari? Terubah iya, kitai engka ngereja nya semina beberapa minit ninting hari. Lubah-lubah, kitai ulih ngemanjaika agi awak kitai ngereja nya. Lebuh kitai meda asil ti manah ari utai ke digaga kitai, kitai tentu enda sabar deka ngereja pengawa nya ninting hari. Kitai mega tentu rindu ati ngereja nya. Nya alai, ulih kitai beratika baka ni kitai mega ulih ngena chara ti sama ba sembah kitai ngagai Jehovah?

18. Nama utai ti pemadu beguna ke ulih digaga kitai, lalu nama asil iya?

¹⁸ Utai ti pemadu beguna ke ulih digaga kitai nya, nyembah Jehovah enggau pengabis ati. Asil iya, kitai deka ngembuan pengidup ti besai reti sereta ngelantangka ati. Lalu, kitai bisi peluang nyembah Jehovah belama iya. (J-lam. 10:22) Diatu kitai berasai lantang ati laban nemu Jehovah tentu deka nulung penyembah Iya lebuh sida napi penusah. (Isa. 41:9, 10) Endang amat, kitai bisi mayuh kebuah ti manah ulih gaga ati nyembah Jehovah. Iya meh ke patut ‘nerima mulia enggau basa’ ari semua utai ke udah digaga Iya!—Pem. 4:11.