1-2. Anni i kuattam tapenu alawatan na Dios i paddayaw tam?

 ANNI i manono mu nu maginnam i uvovug nga “paddayaw”? Posible nga maimajimmu i tadday nga brother nga agga-palittukag nga makimemallo kani Jehova nige na nga makkatrug. Baka manono mu gapa i tadday nga familia nga magayayya ta paf-family worship da.

² Parefu ira nga makiparte ta makagi nga paddayaw. Ngem alawatan kari ni Jehova i paddayoda? Wan! Nu mekunnay yatun ta urena anna nu maddayaw ira megafu ta aya anna respeto da ta nisa. Kuruga iddukattam si Jehova. Ammu tam nga mepangngo yayya nga medayaw anna kayà tam nga iyawa ta nisa i kapianan nga paddayaw.

3. Anni i gigiammuattam taw nga artikulo?

³ Taw nga artikulo, gigiammuattam i klase na paddayaw nga inalawa ni Jehova ta tiempo na Biblia anna ikonsidera tam gapa i walu nga makua tam tapenu alawatan ni Jehova i paddayaw tam sangawe. Tapus pannonopattam nakuan nu kunnasi tam mapakasta i kalidad na paddayaw tam. Gigiammuattam gapa nu ngatta mamagayayya ta nittam i kurug nga paddayaw.

4. Nige nga minay si Jesus ta davvun, kunnasi nga naddayaw i aripan ira ni Jehova ta nisa?

⁴ Nige nga minay si Jesus ta davvun, nipasingan na matalo ira nga lallaki gitta da Abel, Noe, Abraham, anna Job i respeto anna pangaya da kani Jehova. Kunnasi? Sinuppal da i Dios, nangurug ira ta nisa, anna nangitavvung ira ta nisa. Ari nga dinetalye  na Biblia i ngamin nga mawag tu kuadda ta paddayoda. Ngem kingngua da i ngamin nga mawayya da tapenu ikakua si Jehova, yari tu inalawa na i paddayoda. Turi kua, niyawa ni Jehova i Mosaiko nga Dob ta gaka-gaka ni Abraham. Nelavu taw i espesipiko ira nga instruksion nu kunnasi i kayà ni Jehova nga paddayoda ta nisa.

5. Anni nga panguloli i nesimmu ta kurug nga paddayaw kabalin nga napaginnolay si Jesus?

⁵ Kabalin nga napaginnolay si Jesus, ari ngana nga ikiddaw ni Jehova nga tuttulan na maddayaw ira ta nisa i Mosaiko nga Dob. (Roma 10:4) Mekiddaw ngana ta Cristiano ira nga tuttuladda i bagu nga dob, “i dob ni Cristo.” (Gal. 6:2) Matuttul da yaw nga “dob” gukaban na pamarig ta ehemplo ni Jesus anna panuttul ta tuttuddu na ira, ari tu gukaban na pakkabisadu anna panuttul ta aru nga dob. Yayya nga kukukuan na Cristiano ira sangawe i ngamin nga mawayya da nga tuttulan si Cristo tapenu mapagayayya si Jehova anna tapenu ‘maleradda i hustu nga pagibannag.’—Mat. 11:29.

6. Kunnasi ittam mammakapia taw nga artikulo?

⁶ Durante nga sinaggi-taddayattam i kukukuattam ta paddayaw, iyavu mu ta baggim, ‘Kukukuakku ngana kari yaw?’ Awayyam paga iyavu, ‘Kunnasì paga nga mapakasta i paddayò?’ Magayayya ka nakuan ta kukukuammu, ngem makimallo ka kani Jehova tapenu masingammu i puedem paga ira nga pakastan ta paddayom.

7. Anni i matageno ni Jehova ta napafutuan ira nga pakimallo tam?

⁷ Medayaw tam si Jehova nu makimallo ittam ta nisa. Nikumpara na Biblia i pakimallo tam ta insensu ira nga neprepara tu mapia tapenu metavvung ta tabernakulo anna ta templo. (Sal. 141:2) Mamagayayya ta Dios i agug natun nga insensu. Kunnatun gapa i napafutuan ira nga pakimallo tam. “Mamagayayya” yatun ta Dios maski nu simple laman ira nga uvovug i usattam. (Prov. 15:8; Deut. 33:10) Kumbinsidu ittam nga kakayà ni Jehova nga ginnan i pangikagi tam ta pangaya anna pappabalo tam ta nisa. Kakayà na nu ikagi tam ta nisa i pakavurungattam ira, i iddanamattam ira, anna i pakkaraga tam ira. Nige mu gafu nga makimallo kani Jehova, ngatta ariammu labbi nga pannonopan tu mapia nu anni i ikagim ta nisa? Nu kuammu yatun, meyawa mu i kapianan nga “insensu” ta Yamam ta langi.

8. Kunnasi tam paga medayaw i Dios?

⁸ Medayaw tam si Jehova nu mabbala-balo ittam sa anna idayaw tam yayya ta bibig tam. (Sal. 34:1) Medayaw tam si Jehova nu ikagi tam ta tanakuan i makasta ira nga kualidad na anna i kikkingngua na. Aru i rasottam nga mappabalo kani Jehova. Nu pannonopattam tu mapia i ngamin nga makasta nga kiningngua na para ta nittam, aru i rasottam tapenu idayaw yayya. Chansa tam i pallayyagayya tapenu “iyawa tam ta Dios i sakrifisio na paddaya-rayaw, nga vunga na bibig ira.” (Heb. 13:15) Nu kunnasi nga pannonopattam tu mapia i ikagi tam kani Jehova nige tam nga makimallo ta nisa, importante gapa nga pannonopattam tu mapia i ikagi tam turi ira ta layyagayyattam. Kayà tam nga kapianan i “sakrifisio na paddaya-rayaw” tam. Yayya nga maganas ittam nakuan nu kibbidattam i tanakuan ta ministerio.

9. Gitta na Israelita ira gari, kunnasi ittam mammakapia nu makistudy ittam? Mangiyawa tu angngarigan nu kunnasi ka mismu nammakapia.

⁹ Medayaw tam si Jehova nu makistudy ittam. Nedob ta Israelita ira gari: “Mamillu  kada ragun nga mawag tu umarubang i ngamin nga lallaki nikamu kani Jehova nga Dios nu ta lugar nga pilian na.” (Deut. 16:16) Mawag tu panawadda i gibbalayadda anna mulu-mula da. Awan tu mabbantay tatun ira. Ngem nipromesa ni Jehova ta nira: “Awan tu manga ta davvummu kada manaw ka tapenu umarubang ta Dios mu nga si Jehova.” (Ex. 34:24) Masikan i pangurug danatun nga Israelita kani Jehova yayya nga zinagun ira nga magatende ta fiesta ira. Aru gapa i pammakapianadda tatun. Nakagigiammu ira ta Dob na Dios, napannonopadda i mapia ira nga kingngua ni Jehova ta nira, anna nagayayya ira nga makikavulu ta kapangngurug da. (Deut. 16:15) Mammakapia ittam gapa nu massakrifisio ittam tapenu magatende ta study. Siguradu gapa nga magayayya si Jehova nu egga i niprepara tam tu ababba ngem napannonopan tu mapia nga komento.

10. Ngatta importante nga parte na paddayaw tam i pakkansion?

¹⁰ Medayaw tam si Jehova nu makkansion ittam kavulu na wawwaragi. (Sal. 28:7) Importante nga parte na paddayaw na Israelita ira i pakkansion. Nappili si Patul David tu 288 nga Levita tapenu makkansion ta templo. (1 Cro. 25:1, 6-8) Mepasingattam gapa sangawe i pangaya tam ta Dios nu makkansion ittam tu kansion ira na pamadayaw. Ari tu mawag nga malalaki ittam nga makkansion tapenu makua tam yatun. Ikonsidera yaw nga angngarigan: Nu mabbida ittam, “sittam ngamin ay maruddu nga makaliwa.” Ngem ari ittam nga mafugaddan natun nga makkomento onu mallayyagayya. (Sant. 3:2) Makkansion ittam lagapa nakuan tu pamadayaw kani Jehova maski nu ari kuruga tu makasta i boses tam.

11. Segun ta Salmo 48:13, ngatta mawag tu egga i iskediul tam para ta family worship?

¹¹ Medayaw tam si Jehova nu gigiammuattam i Uvovug na anna tudduattam i ána tam meyannung ta nisa. Ari nga mattrabahu i Israelita ira nu Sabbath. Chansa da gare yatun nga aggaw tapenu paladdan i relasiodda kani Jehova. (Ex. 31:16, 17) Tatun gapa nga aggaw, tudduan na matalo ira nga magana i ána da meyannung kani Jehova anna ta kinapia na. Mawag gafu tu egga i iskediul tam nga mabbibbig anna maggigiammu tu Uvovug na Dios. Parte gare yatun na paddayaw tam kani Jehova anna moffunan ittam natun nga mas maddukko paga ta nisa. (Sal. 73:28) Nu maf-family worship ittam gapa, moffunattam i ána tam nga mapeggan tu personal anna madukko nga relasion ta minaggiddu nga Yama tam ta langi.​—Bibbigan i Salmo 48:13.

12. Anni i magigiammu tam ta pagimamma ni Jehova ta trabahu na namadday ta gamit ira ta tabernakulo?

¹² Medayaw tam si Jehova nu mamataddag ittam anna imentena tam i lugar ira nga paddayarayawattam. Kinagi na Biblia nga “sagradu nga trabahu” i pamadday tu tabernakulo anna i gamit ira tatun. (Ex. 36:1, 4) Sagradu gapa nga trabahu para kani Jehova i pamataddag tu Kingdom Hall ira anna tanakuan paga nga teokratiko nga fasilidad. Aru nga oras i usan na karuan nga wawwaragi tam tapenu mabboluntariu ta kunnatun ira nga aktibidad. Siguradu nga appresiattam i dakal nga meyuffudda ta trabahu na Pappatulan. Siempre, makipapparte gapa ira ta pallayyagayya. Kayà paga lagu na karuan ta nira i marregular payunir. Yayya nga mepasingan na elder ira i passuporta da ta trabahu ira ta construction nu ari ira nga magalangan nga apruban bilang payunir danaw nga malallappo  nga lallaki anna babbay nu kualipikadu mabba ira. Maski gafu nu egga i skills tam ta construction onu awan, makoffun ittam ngamin tapenu mattalupaddian nga marenu anna makasta i kondision danatun nga building.

13. Ngatta mangiyawa ittam tu donasion tapenu suportan i trabahu na Pappatulan?

¹³ Medayaw tam si Jehova nu mangiyawa ittam tu donasion tapenu suportan i trabahu na Pappatulan. Ari nga umarubang i Israelita ira kani Jehova nga limi-lima laman. (Deut. 16:16) Mawag tu mangiyawa ira tu material nga pakkukua da depende ta paddia-paddiadda. Nu kunnatun i kuadda, mepasingadda nga appresiadda i ngamin nga unnug nga nakua tapenu mammakapia ira ta espiritual. Kunnasi tam gapa mepasingan i pangaya tam kani Jehova anna i pangappresia tam ta espiritual ira nga probision nga nalawa tam? Makua tam yatun nu maddona ittam para ta paggastuan ira na kongregasion anna ta worldwide work depende ta pakawayya tam. Kunnaw i nitabarang ni apostol Pablo: “Nu alawa i futu nu nga mangiyawa, alawatan na Dios i regalu nu segun ta egga nga meyawa nu, ari tu yuri i awan nikamu.” (2 Cor. 8:4, 12) Tagibaloran ni Jehova i napafutuan nga donasiottam maski nu baddi laman yatun.​—Mar. 12:42-44; 2 Cor. 9:7.

14. Segun ta Proverbio 19:17, kunnasi nga imammatan ni Jehova i panguffuttam ta wawwaragi tam nga magawag?

¹⁴ Medayaw tam si Jehova nu uffunattam i kapangngurug tam ira nga magawag. Nipromesa ni Jehova nga bala-balakkan na i Israelita ira nga vuka-palag ta pobre ira. (Deut. 15:7, 10) Kada manguffun ittam ta kapangngurug tam nga magawag, imammatan yatun ni Jehova bilang regalu tam ta nisa. (Bibbigan i Proverbio 19:17.) Angngarigan na, turi ta agga-fuku si Pablo, nangituvug tu regalu ta nisa i Cristiano ira nga taga-Filipos. Minammatan na yatun bilang “tavvung nga alawatan anna kapagustuan na Dios.” (Fil. 4:18) Obserbammu i kongregasiommu anna iyavu mu ta baggim, ‘Egga kari i wagi awayyà nga uffunan?’ Magayayya si Jehova nu masingan na nga usattam i tiempo, sikan, abilidad, anna material nga pakkukua tam tapenu uffunan danuri magawag. Imammatan na yatun bilang parte na paddayaw tam.​—Sant. 1:27.

15. Ngatta ari nga mamakadammo i kurug nga paddayaw?

¹⁵ Mawag i tiempo anna sikan para ta kurug nga paddayaw. Ngem ari nga mamakadammo yatun. (1 Juan 5:3) Ngatta? Maddayaw ittam gare kani Jehova megafu ta ayatattam yayya. Imajinammu i tadday nga abbing nga kayà na nga marregalu ta yama na. Baka piga oras yayya nga naddrowing para ta yama na ngem ari na nga kinakenga i tiempo nga nofu na tatun. Iddukan na gare i yama na anna kakayà na nga iregalu yatun ta nisa. Kunnatun ittam gapa. Gafu ta iddukattam si Jehova, magayayya ittam maski nu aru nga tiempo anna sikan i usattam tapenu makiparte ta kurug nga paddayaw.

16. Segun ta Hebreo 6:10, anni i matageno ni Jehova nu kukukuattam i ngamin nga mawayya tam tapenu mapagayayya yayya?

¹⁶ Ari nga ekspektan na minaggiddu ira nga magana nga makalawa ira tu para-parefu nga regalu maggafu ta kada ana da. Ammu da gare nga madduruma i abilidad na kada abbing. Malippawa gapa na Yama tam ta langi nga madduruma i abilidad tam. Baka mas aru i makuam kumpara ta karuan nga wagi. Posible gapa nga ari ngana tu kekkaru i makuam kagitta na tanakuan megafu ta edad  mu, gawa-gawayyan, onu responsibilidad ta familia. Ngem ari nakuan nga makkafi i nono mu. (Gal. 6:4) Ari vuluvuga nga kattaman ni Jehova i kingnguam. Basta iyawa mu ta nisa i kapianammu anna fustu i motibom, mapagayayya mu yayya. (Bibbigan i Hebreo 6:10.) Ammu paga lagu ni Jehova nu anni paga i kayà mu nga kuan para ta nisa. Kayà na nga magayayya ka ta maski anni nga meyawa mu tapenu dayawan yayya.

17. (a) Anni i kuattam nu marigatan ittam ta karuan nga kukukuattam ta paddayaw? (b) Kunnasi naka ngana noffunan na tadday ta egga ta kahon nga “ Mabbalikka tu Mas Magayayya”?

¹⁷ Kunnasi nu marigatan ittam ta karuan nga kukukuattam ta paddayaw gitta na pappersonal study onu pallayyagayya? Nu mas kanayun ittam nga makiparte tatun ira nga aktibidad, mas magenjoy ittam anna mas mabbenefisio ittam. Awayya tam ikumpara i paddayaw tam ta karuan nga aktibidad gitta na pagexercise onu pappraktis nga mattugtug tu instrumento. Nu sinaggi-mittan tam laman nga kuan yatun, baka ari ittam mapprogreso. Ngem kunnasi nu kadaggaw tam ngana yatun nga kuan? Ta ollu na, awayya na nga sinaggi-baddi laman nga oras i usattam tatun. Tapus sisinu nga papidduattam yatun. Nu masingattam ngana i papprogreso tam, mas excited ittam ngana ta oras nga pagangngua tam tatun ira anna mas magenjoy ittam ngana tatun. Kunnasi tamma nga meyaplika yatun ta paddayaw tam?

18. Anni i pinaka-importante nga makua tam ta pattoletam, anna anni i mesimmu nu kuattam yatun?

¹⁸ I pinaka-importante nga makua tam ta pattoletam ay i pangiyawa ta kapianattam tapenu medayaw si Jehova. Nu kunnatun i kuattam, magayayya ittam, kontentu, anna egga iddanama tam nga mannanayun nga dayawan si Jehova. (Prov. 10:22) Memammo ittam ngana megafu ta ammu tam nga uffunan ni Jehova i maddayaw ira ta nisa nu maka-ekspiriensa ira tu problema. (Isa. 41:9, 10) Siguradu nga aru i rasottam tapenu magayayya durante nga dayawattam i minaggiddu nga Yama tam, i mepangngo nga mangalawa ta ‘kekakua anna dayaw’ maggafu ta ngamin nga pinaratu na!—Nep. 4:11.