1-2. Ania ti aramidentayo tapno akseptaren ti Dios ti panagdaydayawtayo?

 ANIA ti mapanunotmo no mangngegmo ti sao a “panagdaydayaw”? Baka maimadyinmo ti maysa a napakumbaba a brother a nakaparintumeng iti abay ti pagiddaanna bayat nga ibagbagana ti amin a linaon ti pusona iti napasnek a panagkararagna. Wenno mabalin a mapanunotmo ti maysa a naragsak a pamilia nga agen-enjoy nga agadal iti Biblia.

² Ti ar-aramidenda ket agpada a panagdaydayaw iti Dios. Akseptaren ngata ni Jehova ti panagdaydayawda? Wen, no ar-aramidenda dayta maitunos iti panggepna ken gapu iti ayat ken panagraem. Ay-ayatentayo la unay ni Jehova. Ammotayo nga isu ti maikari iti panagdaydayawtayo, ket kayattayo nga aramiden dayta iti kasayaatan a pamay-an.

3. Ania ti usigentayo iti daytoy nga artikulo?

³ Iti daytoy nga artikulo, kitaentayo ti klase ti panagdaydayaw nga inakseptar ni Jehova idi un-unana. Usigentayo met ti walo nga aspeto ti panagdaydayaw nga akseptarenna ita. Bayat nga ar-aramidentayo dayta, kitaentayo no kasanotayo a maparang-ay ti kalidad ti panagdaydayawtayo. Ammuentayonto met dagiti rason no apay a mangparagsak kadatayo ti pudno a panagdaydayaw.

4. Kasano nga impakita dagiti agdaydayaw ken Jehova sakbay ti panawen dagiti Kristiano ti panagraem ken ayatda ken Jehova?

⁴ Sakbay ti panawen dagiti Kristiano, impakita dagiti matalek a tattao a kas kada Abel, Noe, Abraham, ken Job ti panagraem ken ayatda ken Jehova. Kasano? Babaen ti panagtulnog, pammati, ken panagdatonda. Saan nga imbaga ti Biblia ti amin nga inaramidda  iti panagdaydayawda. Ngem nalawag nga inaramidda ti amin a kabaelanda nga agdaydayaw ken Jehova, isu nga inakseptarna ti panagdaydayawda. Kalpasanna, inted ni Jehova ti Mosaiko a Linteg kadagiti kaputotan ni Abraham. Karaman kadagitoy a linteg dagiti espesipiko nga instruksion maipapan iti panagdaydayaw ken Jehova iti pamay-an nga akseptarenna.

5. Ania a panagbalbaliw iti pudno a panagdaydayaw ti naaramid kalpasan ti ipapatay ken panagungar ni Jesus?

⁵ Kalpasan ti ipapatay ken panagungar ni Jesus, saanen a kidkiddawen ni Jehova ti panagtulnog iti Mosaiko a Linteg. (Roma 10:4) Addan baro a linteg a masapul a suroten dagiti Kristiano, “ti linteg ti Kristo.” (Gal. 6:2) Tapno masurotda daytoy a “linteg,” saandan a kasapulan nga ikabesa dayta ken suroten ti adu a bilin a masapul nga aramiden ken dida aramiden. Masapul laengen a tuladenda ni Jesus ken surotenda dagiti insurona. Ar-aramiden met ita dagiti Kristiano ti amin a kabaelanda a mangsurot iti Kristo tapno maparagsakda ni Jehova ken ‘magin-awaanda.’​—Mat. 11:29.

6. Ania ti maitulong kadatayo daytoy nga artikulo?

⁶ Bayat nga us-usigentayo ti tunggal aspeto ti panagdaydayawtayo, isaludsodmo iti bagim, ‘Ania ti rimmang-ayakon iti daytoy a banag?’ Mabalinmo met nga isaludsod, ‘Mabalinko pay kadi a pasayaaten ti kalidad ti panagdaydayawko?’ Maragsakanka la ketdin kadagiti rimmang-ayam. Ngem masapul nga ikararagmo met ken Jehova a tulongannaka a mangkita kadagiti masapul pay a pasayaatem.

7. Ania ti pangibilangan ni Jehova kadagiti naimpusuan a kararagtayo?

⁷ Agdaydayawtayo ken Jehova no agkarkararagtayo kenkuana. Impada ti Biblia dagiti kararagtayo iti insienso a naisagana a naimbag a maidatdaton idi iti tabernakulo ken iti templo idi agangay. (Sal. 141:2) Makaay-ayo iti Dios ti banglo dayta nga insienso. “Maragsakan” met ni Jehova kadagiti naimpusuan a kararagtayo, uray nakasimsimple ti sasao nga usarentayo. (Prov. 15:8; Deut. 33:10) Adda nasayaat a rasontayo a mamati a maragragsakan ti puso ni Jehova a dumngeg bayat nga iyeb-ebkastayo ti ayat ken panagyaman kenkuana. Kayatna nga ibagatayo kenkuana dagiti pakadanagan, namnamaen, ken tarigagaytayo. Sakbay nga agkararagka ken Jehova, panunotem koma a naimbag dagiti ibagam. Iti kasta, maitedmo iti nailangitan nga Amam ti kabangluan nga “insienso.”

8. Ania ti nasayaat nga oportunidad a maidaydayawtayo ti Dios?

⁸ Agdaydayawtayo ken Jehova no idaydayawtayo isuna. (Sal. 34:1) Idaydayawtayo ni Jehova no ipakaammotayo iti dadduma dagiti nagsayaat a kualidad ken aramidna. Adu ti nasayaat a maibagatayo maipapan ken Jehova no managyamantayo kenkuana. No iwayaantayo nga utoben ti kinasayaat ni Jehova​—ti amin nga inaramidna para kadatayo​—ditayto pulos maawanan iti maibaga a mangidaydayaw kenkuana. Nasayaat unay nga oportunidad ti trabaho a panangasaba tapno “ipaaytayo iti Dios ti daton ti panangidaydayaw, kayatna a sawen, usarentayo ti ngiwattayo.” (Heb. 13:15) Masapul a panunotentayo a naimbag dagiti ibagatayo sakbay nga agkararagtayo ken Jehova. Kasta met la ti masapul nga aramidentayo kadagiti kasabaantayo. Kayattayo nga ited ti kasayaatan a “daton ti panangidaydayaw.” Dayta ti makagapu a naganaygaytayo a mangipakaammo iti kinapudno.

9. Kas kadagiti nagkauna nga Israelita, kasanotayo a magunggonaan kadagiti gimong? Mangted iti personal a kapadasan.

⁹ Agdaydayawtayo ken Jehova no makigimgimongtayo. Naibaga kadagiti nagkauna nga Israelita: “Masapul a mamitlo iti makatawen a mapan ti amin a lallaki kadakayo iti sanguanan  ni Jehova a Diosmo iti disso a pilienna.” (Deut. 16:16) Masapul a panawanda ti balbalay ken taltalonda nga awan ti mangbantay kadagita. Ngem inkari kadakuada ni Jehova: “Awanto ti mangagaw iti dagayo bayat a mapankayo agparang ken Jehova a Diosyo mamitlo iti kada tawen.” (Ex. 34:24) Siento porsiento ti panagtalek dagidi nga Israelita ken Jehova, isu a tinawen a nakipiestada. Gapu iti dayta, dagidiay a managbuteng iti Dios ket nakaawat iti adu a bendision; napaunegda ti pannakaawatda iti Linteg ti Dios, nautobda ti kinasayaatna, ken natagiragsakda ti makapabileg a pannakilangen kadagiti kapammatianda. (Deut. 16:15) Maawattayo met dagita no ikagumaantayo ti umatender kadagiti Nakristianuan a gimong. Panunotentayo laengen no kasano karagsak ni Jehova no makigimongtayo nga addaan kadagiti nakasagana nga ababa ken nabagas a komento.

10. Apay a ti panagkanta ket importante a paset ti panagdaydayawtayo?

¹⁰ Agdaydayawtayo ken Jehova no makipagkantatayo. (Sal. 28:7) Para kadagiti Israelita, ti panagkanta ket importante a paset ti panagdaydayawda. Nangpili ni Ari David iti 288 a Levita nga agbalin a kumakanta iti templo. (1 Cron. 25:1, 6-8) Ita, maipakitatayo nga ay-ayatentayo ti Dios no agkantatayo kadagiti kanta a mangidaydayaw kenkuana. Saan a ti kinapintas ti boses ti kapatgan. Panunotentayo daytoy: No agsaotayo, “mamin-adu a maitibkoltayo,” ngem saan a dayta ti rason nga isardengtayo ti agsao iti kongregasion ken iti ministerio. (Sant. 3:2) Ditay met koma ipalubos a gapu ta saan a napintas ti bosestayo iti panagkanta, saantayon nga agkanta iti panangidaydayaw ken Jehova.

11. Kas mabasa iti Salmo 48:13, apay a masapul a mangyeskediultayo iti sangapamiliaan a panagadal iti Biblia?

¹¹ Agdaydayawtayo ken Jehova no adalentayo ti Saona ken isurotayo kadagiti annaktayo ti maipapan kenkuana. Iti Sabbath, saan nga agtrabaho dagiti Israelita ken usarenda dayta nga aldaw a mangpabileg iti relasionda ken Jehova. (Ex. 31:16, 17) Insuro dagiti matalek nga Israelita kadagiti annakda ti maipapan ken Jehova ken iti kinasayaatna. Masapul a mangaramid met ti tunggal maysa kadatayo iti eskediul a mangbasa ken mangadal iti Sao ti Dios. Daytoy ket paset ti panagdaydayawtayo ken Jehova, ken makatulong tapno ad-adda a sumingedtayo kenkuana. (Sal. 73:28) Ken kada agadaltayo a sangapamiliaan, matulongantayo ti maysa a baro a henerasion​—dagiti annaktayo​—a maaddaan iti nasinged a personal a relasion iti nadungngo a nailangitan nga Amatayo.​—Basaen ti Salmo 48:13.

12. Ania ti masursurotayo iti panangmatmat ni Jehova iti trabaho dagidiay nagaramid kadagiti alikamen ti tabernakulo?

¹² Agdaydayawtayo ken Jehova no agibangbangon ken agmanmantenertayo kadagiti lugar a pagdaydayawan. Kuna ti Biblia a ti trabaho a panagaramid iti tabernakulo ken kadagiti alikamen dayta ket “nasantuan a proyekto.” (Ex. 36:1, 4) Uray ita, matmatan ni Jehova kas sagrado a serbisio ti trabaho a panagibangon kadagiti Kingdom Hall ken dadduma pay a pasilidad ti organisasion. Adu nga oras a makiramraman ti dadduma a kakabsat kadagita nga aktibidad. Sigurado nga ap-apresiarentayo daytoy napateg a tulong para iti trabaho ti Pagarian. Siempre, mangaskasaba met dagita a kakabsat. Kayat pay ketdi ti dadduma kadakuada ti agpayunir. Maipakita dagiti panglakayen iti kongregasion ti suportada kadagiti proyekto a panagibangon babaen ti dida panagpangadua a mangapointar kadagitoy a nagaget a kakabsat kas payunir no kualipikadoda. Adda man paglaingantayo iti konstruksion wenno awan, adda amin ti maitulongtayo  tapno agtalinaed a nadalus ken nasayaat ti kondision dagiti pasdek.

13. Ania ti masapul a panangmatmattayo kadagiti donasiontayo para iti trabaho ti Pagarian?

¹³ Agdaydayawtayo ken Jehova no mangmangtedtayo iti donasion para iti trabaho ti Pagarian. Awan kadagiti Israelita ti masapul nga agparang ken Jehova nga ima-ima. (Deut. 16:16) Masapul a mangtedda iti material a sagut sigun iti kabaelanda. Iti kasta, maipakitada nga ap-apresiarenda ti amin nga ar-aramiden ni Jehova para kadakuada. Kasanotayo a maipakita nga ay-ayatentayo ni Jehova ken ap-apresiarentayo dagiti naespirituan a probision a maaw-awattayo? Ti maysa ket ti panagdonar para iti kongregasiontayo ken iti sangalubongan a trabaho no ipalubos ti situasiontayo. Imbaga ni apostol Pablo: “Ta nangnangruna nga awaten ti Dios ti naimpusuan a panagdonar, ta kayatna a mangted ti tao sigun iti kabaelanna, saan a ti awan kenkuana.” (2 Cor. 8:4, 12) Ipatpateg ni Jehova ti aniaman a naimpusuan nga idonartayo, kasano man kabassit dayta.​—Mar. 12:42-44; 2 Cor. 9:7.

14. Sigun iti Proverbio 19:17, ania ti pangibilangan ni Jehova iti tulong nga ipaaytayo kadagiti agkasapulan a kakabsat?

¹⁴ Agdaydayawtayo ken Jehova no tultulongantayo dagiti padatayo a Kristiano nga agkasapulan. Inkari ni Jehova a bendisionanna dagiti Israelita a tumultulong kadagiti napanglaw. (Deut. 15:7, 10) Wen, kada tultulongantayo dagiti kapammatiantayo nga agkasapulan, ibilang dayta ni Jehova a saguttayo Kenkuana. (Basaen ti Proverbio 19:17.) Kas pagarigan, idi naibalud ni Pablo, nangipatulod dagiti Kristiano idiay Filipos iti sagut kenkuana. Inawaganna dayta iti “nabanglo ken makaay-ayo a daton nga awaten ti Dios.” (Fil. 4:18) Panunotem dagiti kakongregasionmo ken isaludsodmo iti bagim, ‘Asino kadakuada ti mabalinko a tulongan?’ Maragsakan ni Jehova no makitana nga us-usarentayo ti tiempo, pigsa, abilidad, ken material nga adda kadatayo a tumulong kadagiti agkasapulan. Ibilangna dayta a paset ti panagdaydayawtayo.​—Sant. 1:27.

15. Apay a saan a makapadagsen ti pudno a panagdaydayaw uray agkasapulan dayta iti tiempo ken pigsa?

¹⁵ Agkasapulan ti pudno a panagdaydayaw iti tiempo ken pigsa. Ngem saan a makapadagsen dayta. (1 Juan 5:3) Apay? Ay-ayatentayo ngamin ni Jehova isu nga agdaydayawtayo kenkuana. Panunotem ti maysa nga ubing a kayatna a regaluan ni tatangna. Mabalin nga adu nga oras nga agdrowing iti iregalona. Saanna a sayangen dagita nga oras. Ngamin, ay-ayatenna ni tatangna, ken maragsakan a mangted kenkuana iti dayta a regalona. Gapu ta ay-ayatentayo ni Jehova, maragsakantayo met a mangusar iti tiempo ken pigsatayo para iti pudno a panagdaydayaw.

16. Maitunos iti Hebreo 6:10, ania ti marikna ni Jehova iti panagregget ti tunggal maysa kadatayo a mangparagsak kenkuana?

¹⁶ Saan nga ekspektaren dagiti nadungngo a nagannak nga agpapada ti iregalo kadakuada dagiti annakda. Ammoda nga agduduma ti abilidad ken maaramidan ti tunggal anakda. Kasta met, maawatan ti nailangitan nga Amatayo nga agduduma ti maaramidan ti tunggal maysa kadatayo. Mabalin nga ad-adu ti maaramidam ngem iti adu nga am-ammom ken ipatpategmo. Wenno baka basbassit ti maaramidam ngem iti sabsabali, nalabit gapu iti edad, salun-at, wenno responsabilidadmo iti pamilia. Ngem dika maupay. (Gal. 6:4) Saanto a lipaten ni Jehova dagiti ar-aramidem. Maparagsakmo isuna basta ipaaymo ti kasayaatan ken umiso ti motibom. (Basaen ti Hebreo 6:10.) Makitkita pay ketdi ni Jehova dagiti intension ti pusom. Kayatna  a naragsak ken kontentoka iti panagdaydayaw nga ipapaaymo kenkuana.

17. (a) No marigatantayo iti dadduma nga aspeto ti panagdaydayawtayo, ania dagiti mabalintayo nga aramiden? (b) Kasano a natulongannaka ti maysa nga aspeto a makita iti kahon a “ Lallalo a Naragragsakka”?

¹⁷ Kasano ngay no marigatantayo iti dadduma nga aspeto ti panagdaydayawtayo, kas iti personal a panagadal wenno panangasaba iti publiko? No regulartayo kadagita nga aktibidad, mas ma-enjoy ken magunggonaantayo kadagita. Ti panagdaydayawtayo ket kayarigan ti panagehersisio wenno panagpraktis nga agtokar iti instrumento. No manmanotayo nga aramiden dayta, ditay unay agprogreso. Ngem no ngay inaldaw nga aramidentayo? Iti damo, mabalin a sumagmamano la a minuto nga aramidentayo dayta, sa in-inut nga ibaybayagtayo. Bayat a makitkitatayo dagiti nasayaat a resulta dagiti panagreggettayo, posible a padpadaanantayon dagita a tiempo ken talaga a magusgustuantayon nga aramiden dayta. Kasta met laeng ti mabalintayo nga aramiden iti panagdaydayawtayo.

18. Kasanotayo a matungpal ti panggep ti pannakaparsuatayo, ken ania dagiti resultana?

¹⁸ Matungpaltayo ti mismo a panggep ti pannakaparsuatayo no naimpusuan nga agdaydayawtayo ken Jehova. Kas resultana, naragsak ken makapnek ti biagtayo ken adda namnamatayo nga agdaydayaw ken Jehova iti agnanayon. (Prov. 10:22) Natalnan ti isiptayo ta ammotayo a tultulongan ni Jehova dagiti agdaydayaw kenkuana no adda dagiti problemada. (Isa. 41:9, 10) Sigurado nga adu ti nasayaat a rasontayo nga agbalin a naragsak bayat nga agdaydayawtayo iti nadungngo nga Amatayo, a maikari nga “umawat iti dayag ken dayaw” manipud iti amin a pinarsuana!​—Apoc. 4:11.