1-2. Anhte a nawku dawjau lam hpe Karai hkap la hkra hpa galaw ra ai kun?

 “NAWKU DAWJAU” ngu ai ga si hpe na dat ai shaloi, nang hpa hpe myit hkrup ai kun? Yup-ra makau hta hpunau langai hput di di nna akyu hpyi nga ai (sh) dinghku langai ngwi pyaw let Chyum Laika hkaja nga ai hpe myit hkrup na re.

² Dai masa lam lahkawng yan gaw, nawku dawjau ai lam ni re. Shanhte a nawku dawjau lam hpe Yehowa hkap la na kun? Karai yaw shada lam hte maren byin na, Karai hpe tsawra nna, hkungga na nga yang hkap la na re. Yehowa hpe anhte grai tsawra ai. Anhte a nawku dawjau ai lam hpe Karai lu ging ai hpe chye ai majaw, kaja htum ladat hte nawku mayu ga ai.

3. Ndai sumhpa hta hpa lam bawngban na kun?

³ Moi prat hta, Yehowa hkap la ai nawku dawjau lam, ya prat Yehowa hkap la ai nawku dawjau lam hte seng ai daw 8 a lam hpe ndai sumhpa hta hkaja na re. Tinang a nawku dawjau ai atsam ningja hpe gara hku rawt jat lu ai lam, tengman ai nawku dawjau lam gaw anhte hpe hpa majaw ngwi pyaw shangun ai lam hpe mung san jep na re.

4. Hkristan prat n rai shi ai aten hta, nawku dawjau ai ni gaw Yehowa hpe tsawra nna hkungga ai lam gara hku madun wa ai kun?

⁴ Hkristan prat n rai shi ai aten hta, Abela, Noa, Abraham, Yoba zawn re ai sadi dung ai ni gaw, Yehowa hpe tsawra  hkungga ai. Dai hpe gara hku madun dan ai kun? Madat mara ai, kamsham ai, sak jaw ai lam ni hku nna re. Shanhte gara zawn nawku dawjau wa ai hpe gaw, Chyum Laika hta ahkri ahkrai n tsun da ai. Raitim, Yehowa hpe kaja htum ladat hte shagrau wa na re. Shanhte a nawku dawjau lam hpe Karai hkap la ai. Hpang hta, Abraham a aru arat ni hpe Mawshe Tara jaw ai. Dai Tara hta Karai ra sharawng ai ladat hte gara hku nawku ra na ngu ai ahkri ahkrai lam matsun ni lawm ai.

5. Yesu si nna, bai hkrung rawt ai hpang, tengman ai nawku dawjau lam hta gara galai shai lam byin wa ai kun?

⁵ Yesu si nna, bai hkrung rawt ai hpang, Mawshe Tara hpe matut hkan sa na matu, Yehowa n hpyi shawn sai. (Rom 10:4) Hkristan ni gaw, “Hkristu a tara” hpe sha hkan sa ra sana re. (Gal 6:2) Dai “tara” hpe matsing nga hkra galaw ai, koi ra ai, hkan sa ra ai lam ni hpe jahpan galaw nna hkan sa ai hku n re. Yesu a kasi hpe hkan sa ai, sharin ya ai lam ni hpe madat ai hku nna re. Dai ni aten na Hkristan ni mung, Yehowa a myiman lu na matu, “myit masin ban sa” lam lu na matu, Hkristu hpe dang lu ai daram kasi la nga ai.​—Mat 11:29.

6. Ndai sumhpa kaw na gara hku akyu lu mai ai kun?

⁶ Nawku dawjau ai daw langai hpra hpe san jep nna, tinang hkum tinang ndai hku san yu u: ‘Ndai daw hta ngai kade daram rawt jat nga sai kun? Nye a nawku dawjau ai atsam gara hku rawt jat hkra galaw lu na kun?’ Ya, tinang rawt jat nga ai lam a matu myit dik lu tim, naw rawt jat ra ai daw hpe akyu hpyi nna myit ging ai.

7. Myit masin mahkra hte hpyi ai akyu hpyi ga hpe Yehowa gara hku sawn la ai kun?

⁷ Akyu hpyi ai gaw, Yehowa hpe nawku nga ai re. Chyum Laika hta, akyu hpyi ai lam hpe atsawm hkyen lajang nna nawng ya ai manam pyaw ai hkungga hte shingdaw da ai. (Shk 141:2) Manam pyaw ai hkungga a sama hpe Karai Kasang ra sharawng ai. Dai zawn sha, asan sha re ai ga si ni hte akyu hpyi yang pyi, myit masin mahkra hte hpyi ai hpe Karai “awng sharawng nga ai.” (Gsh 15:8; Trj 33:10) Shi hpe tsawra ai lam, chyeju dum ai lam anhte tsun ai shaloi Shi grai pyaw ai. Myit tsang ai lam, myit mada lam, byin mayu ai lam ni hpe tsun dan shangun mayu ai. Akyu n hpyi shi yang, hpa hpyi na hpe atsawm myit ging ai. Rai yang she, kaja htum “manam pyaw” ai hkungga hpe nawng ya lu na re.

8. Karai Kasang hpe shakawn na matu gara ahkaw ahkang lu da ai kun?

⁸ Yehowa hpe shakawn ai gaw, nawku dawjau nga ai re. (Shk 34:1) Shi a mauhpa atsam ningja ni, galaw ai lam ni hpe kaga ni hpe tsun dan ai hku nna anhte shakawn ai. Chyeju dum myit nga yang she, shakawn lu na re. Yehowa galaw ya ai lam ni, mai kaja ai lam ni hpe aten la myit sawn sumru na nga yang, shakawn na lam law law nga na re. Laksan hku nna, hkaw tsun bungli gaw, “n-gup n-gau a asi ngu ai shakawn kungdawn hkungga hpe . . . Karai Kasang kaw . . . nawng ya” lu ai ahkaw ahkang re. (Heb 13:15) Akyu n hpyi shi yang, atsawm myit ging ai zawn, hkaw tsun bungli hta mung, hpa tsun ra na hpe atsawm myit ging ai. “Shakawn kungdawn hkungga” hpe kaja htum nawng ya mayu ai majaw, myit kraw kata kaw na hkaw tsun ging ai.

9. Moi prat na Israela ni zawn, rau zuphpawng ai kaw na anhte gara hku akyu lu ai kun? Tinang a mahkrum madup hpe tsun dan u.

⁹ Zuphpawng lung ai gaw, Yehowa hpe nawku dawjau nga ai re. “Laning mi hta masum lang . . . lasha ni nlang hte gaw, na a Karai Kasang Yehowa san da ai shara, shi a man e myi man madun lu na rai myit dai” ngu nna Israela ni  hpe Karai htet da ai. (Trj 16:16) Dai zawn sa ai shaloi, nta hte nsi nai si ni hpe tawn kau da ra ai. Raitim, “Yehowa a man de . . . myi man madun sa mat ai shaioi, na lamu ga hpe gade ai mung la ya mayu lu na n rai” ngu Yehowa ga sadi jaw da ai. (Pru 34:24) Shi hpe tsep kawp kam ai majaw, shaning shagu sa ma ai. Dai majaw, shaman chyeju law law lu la ai. Karai a tara hpe grau chye na wa ai. Karai a mai kaja ai lam hpe grau myit sumru lu nna, kamsham shada kanawn mazum ai kaw na n-gun lu la ai. (Trj 16:15) Anhte mung sak jaw nna, Hkristan zuphpawng ni lung ai nga yang, dai zawn akyu ni lu ai. Tang du ai mahtai ni jaw lu hkra hkyen lajang wa yang, Yehowa pyaw na re.

10. Mahkawn hkawn ai gaw, nawku dawjau lam a ahkyak ai daw hpa majaw byin ai kun?

¹⁰ Hpunau nauna ni hte rau mahkawn hkawn ai gaw, Yehowa hpe nawku dawjau nga ai re. (Shk 28:7) Israela ni a matu, mahkawn hkawn ai gaw, nawku dawjau lam a ahkyak ai daw re. Hkawhkam Dawi gaw, nawku htingnu hta, Lewi masha 288 hpe mahkawn hkawn na matu lit jaw ai. (1 Hl 25:1, 6-8) Dai ni aten hta mung, shakawn mahkawn ni hkawn ai hku nna, Karai Kasang hpe tsawra ai lam madun mai ai. Nsen kaja ai, n kaja ai gaw ahkyak n re. Ndai lam hpe myit yu ga: “Anhte nga manga hte . . . gaw kataw ai hkrai rai nga ga ai.” Raitim, ga shaga shut na tsang nna, nawku hpung hta, hkaw tsun bungli hta, ga n shaga ai sha n nga ai. (Yak 3:2) Dai zawn sha, nsen n kaja ai majaw, Yehowa hpe shakawn mahkawn n hkawn ai baw n byin ging ai.

11. Shakawn 48:13 hku nga yang, dinghku nawng Chyum Laika hkaja na matu hpa majaw chyarang galaw da ging ai kun?

¹¹ Chyum Laika hkaja ai, ma ni hpe sharin achyin ya ai gaw, Yehowa hpe nawku dawjau nga ai re. Laban nhtoi lamang a majaw, Israela ni gaw, bungli kaw na hkring sa lu nna, Yehowa hte hku hkau lam ngang kang hkra galaw lu ai. (Pru 31:16, 17) Ma ni hpe Yehowa a lam, Shi a mai kaja ai lam ni hpe sharin ya lu ai. Anhte mung, Chyum Laika ayan hkaja na matu chyarang galaw da ging ai. Dai gaw, nawku dawjau ai lam a daw rai nna, Karai hte grau hku hkau shangun ai. (Shk 73:28) Dinghku nawng hkaja ai shaloi, ma ni hpe tsawra myit nga ai sumsing Kawa hte hku hkau lam kaja hkra karum ya lu ai.​—Shakawn 48:13 hpe hti u.

12. Nawku sum arung arai ni galaw ai bungli hpe Yehowa mu mada ai lam kaw na anhte hpa sharin la lu ai kun?

¹² Nawku Htingnu ni gawgap ai, gram lajang ai gaw, Yehowa hpe nawku dawjau nga ai re. Nawku sum gawgap ai, nawku sum arung arai ni galaw ai gaw, “chyoi pra ai” bungli re ai lam Chyum Laika hta tsun da ai. (Pru 36:1, 4) Dai ni aten hta mung, Nawku Htingnu ni hte kaga nawku dawjau na Htingnu ni gawgap ai hpe mung, Chyoi pra ai bungli hku nna Yehowa mu mada ai. Dai bungli hta, hpunau nauna nkau aten law law sak jaw nga ai. Mungdan magam a matu, shanhte sak jaw ai hpe anhte manu shadan ai. Hkaw tsun magam hta mung shanhte shang lawm ai. Nkau nga yang, ningshawng pyi lu galaw ai. Bungli shakut ai dai hpunau nauna ni atsam hpring wa ai shaloi, ningshawng lit ap na matu n htingnut ai hku nna, myitsu salang ni gaw, gawgap bungli hpe madi shadaw ai lam madun mai ai. Anhte yawng gawgap bungli hta atsawm chye galaw ai raitim, n chye galaw ai raitim, dai htingnu ni hpe jasan jaseng galaw ai, gram lajang ai hta shang lawm mai ai.

13. Mungdan magam hpe madi shadaw na matu alu bang ai hpe gara hku mu mada ging ai kun?

¹³ Mungdan magam hpe madi shadaw na matu alu bang ai gaw, Yehowa hpe nawku dawjau nga ai re. Israela ni gaw, Yehowa man  de lata kaman hte n mai sa ai. (Trj 16:16) Dang lu ai daram alu la sa ra ai. Dai lam hku nna, nawku dawjau lam a matu Yehowa galaw ya ai lam yawng hpe chyeju dum ai lam madun ai. Anhte mung, Yehowa hpe tsawra ai lam, nawku dawjau na matu Yehowa galaw ya ai lam ni hpe chyeju dum ai lam gara hku madun mai ai kun? Lam langai hku nna, buga nawku hpung hte mungkan grup bungli a matu dang lu ai daram alu shang lawm ai hku nna re. “Nanhte hta jaw ya mayu ai shawang myit rawng ai rai yang, Karai Kasang gaw nanhte a rai lu ai made jaw ya ai kumhpa hpe hkap la na ra ai. Nanhte n rai lu ai hpe Karai Kasang hpyi na n rai” ngu kasa Pawlu tsun ai. (2 Ko 8:4, 12, JCLB) Kade daram raitim, shawang myit hte jaw ai hpe Yehowa manu shadan ai.​—Mrk 12:42-44; 2 Ko 9:7.

14. Ga Shagawp 19:17 hku nga yang, ra kadawn nga ai hpunau nauna ni hpe anhte karum ya ai hpe Yehowa gara hku sawn la ai kun?

¹⁴ Ra kadawn nga ai hpunau nauna ni hpe karum ya ai gaw, Yehowa hpe nawku dawjau nga ai re. Matsan mayan ni hpe tsawra myit madun ai Israela ni hpe, Yehowa bai sak jaw na ngu ga sadi jaw da ai. (Trj 15:7, 10) Ra kadawn nga ai wa hpe anhte karum ya shagu, Yehowa gaw shi hpe hkoi ya ai ngu sawn la ai. (Ga Shagawp 19:17 hpe hti u.) Ga shadawn, Hpilipi kaw na Hkristan ni gaw, bawng dung hkrum nga ai Pawlu a matu kumhpa ni shagun ya ai. Dai hpe “Karai Kasang ra sharawng ai hte hkap la ging ai shagu hkungga” ngu nna Pawlu tsun ai. (Hpl 4:18, JCLB) Nawku hpung hta, ‘ngai karum ya lu ai marai langai ngai nga ai kun?’ ngu tinang hkum tinang san yu u. Ra kadawn nga ai ni hpe, anhte a aten, n-gun atsam, arung arai ni hte karum ya ai hpe Yehowa ra sharawng ai. Nawku dawjau lam a daw re ai ngu Shi sawn la ai.​—Yak 1:27.

15. Tengman ai nawku dawjau lam hta shang lawm na matu aten hte n-gun atsam jaw ai gaw, hpa majaw n yak ai kun?

¹⁵ Tengman ai nawku dawjau lam hta shang lawm na matu, aten hte n-gun atsam ra ai. Dai hku galaw na matu n yak ai. (1 Yh 5:3) Hpa majaw nga yang, Yehowa hpe tsawra nna nawku nga ai majaw re. Kawa hpe lama ma jaw mayu ai ma langai a lam hpe myit yu u. Kawa hpe jaw na matu aten law law shama nna sumla soi ai. Dai zawn aten jaw kau ra ai hpe ma gaw myit malai n lu ai. Kawa hpe tsawra ai majaw, dai kumhpa jaw lu ai hpe kabu ai. Dai zawn sha, anhte mung Yehowa hpe tsawra ai majaw, tengman ai nawku dawjau lam hta lawm na matu, aten hte n-gun atsam sak jaw ai hpe kabu ai.

16. Hebre 6:10 hku nga yang, Karai ra sharawng ai lam lu na matu anhte langai hpra shakut ai hpe gara hku sawn la ai kun?

¹⁶ Tsawra myit nga ai kanu kawa ni gaw, ma ni kaw na bung ai kumhpa lu na matu n myit mada ai. Ma langai hpra a masa n bung ai hpe chye na ai. Dai zawn sha, sumsing kawa mung anhte langai hpra a masa hpe chye na ai. Nang gaw, kaga ni hta grau galaw lu ai rai na re. Shing nrai, asak aprat, hkamja lam, dinghku lit ni a majaw, kaga ni daram n lu galaw ai rai na re. Myit hkum daw. (Gal 6:4) Nang galaw ai lam hpe Yehowa n malap ai. Myit majing hte kaja htum sak jaw nga dingsa, Karai ra sharawng ai. (Hebre 6:10 hpe hti u.) Na a myit masin hpe Yehowa mu ai. Nawku dawjau lam hta, dang lu ai daram sak jaw let ngwi pyaw shangun mayu ai.

17. (a) Nawku dawjau lam a daw nkau hta lawm na matu yak nga yang, hpa galaw lu ai kun? (b) “ Grau Ngwi Pyaw Shangun” ngu ai lawk hta lawm ai daw langai ngai kaw na nang hpa akyu lu nga ai kun?

¹⁷ Tinang hkrai hkaja ai lam, hkaw tsun  bungli zawn re ai nawku dawjau lam a daw nkau hta lawm na matu yak nga yang, gara hku galaw na kun? Dai lam ni hta chyahkring hkring shang lawm magang, grau akyu lu magang rai na re. Dai hpe hkum hkrang shamu shamawt galaw ai (sh) madum sumpyi lama ma shaman ai hte shingdaw mai ai. Kalang lang she shaman yang, rawt jat na n re. Raitim, nnan hta shani shagu aten loi jaw na, hpang hta aten na na shaman na nga yang, kaja ai akyu ni lu la na re. Grau pyaw wa na re. Dai aten pyi lawan du mayu wa na re. Nawku dawjau lam hta mung dai hte maren sha re.

18. Anhte galaw lu ai lam yawng hta ahkyak htum gaw hpa rai kun? Dai zawn galaw yang hpa akyu lu na kun?

¹⁸ Yehowa hpe myit masin mahkra nawku ai gaw, anhte galaw lu ai lam yawng hta ahkyak htum re. Dai zawn nawku na nga yang, lachyum nga ai prat lu na. (Gsh 10:22) Yakhkak hkrum ai aten hta, nawku dawjau ai ni hpe Yehowa karum ya ai hpe chye ai majaw myit simsa lam hkamsha lu na. (Esa 41:9, 10) Dai majaw, hpan da ai lam yawng a “hpung shingkang, arawng sadang” lu ging ai sumsing Kawa hpe nawku ai gaw, ngwi pyaw lam law law lu shangun ai.​—Shr 4:11.