13-زەرتتەۋ ماقالاسى
تازا عيبادات مول باقىت اكەلەدى
«قۇدايىمىز ەحوبا، سەن داڭققا، قۇرمەت پەن كۇش-قۇدىرەتكە يە بولۋعا لايىقسىڭ!» (ايان 4:11).
31-ٵن قۇدايمەن بىرگە جۇرگەيسىڭ!
اڭداتپا *
1، 2. ەحوبا قانداي عيباداتتى قابىلدايدى؟
«عيبادات » دەگەن ٴسوزدى ەستىگەندە، كوز الدىڭىزعا نە ەلەستەيدى؟ بالكىم، ٴبىر ەر باۋىرلاستىڭ تىزەرلەپ وتىرىپ، دۇعادا جۇرەك شەرىن تارقاتىپ جاتقانى ەلەستەيتىن شىعار. نەمەسە ۇستەل باسىندا جينالىپ، قۇداي ٴسوزىن زەرتتەپ وتىرعان باقىتتى وتباسىن ەلەستەتەرسىز.
2 وسى ەكى جاعدايداعى عيباداتتى ەحوبا قابىلداي ما؟ ەگەر ولار ەحوبانىڭ ەركىن ورىنداسا، ونى سۇيسە ٵرى قۇرمەتتەسە، قابىلدايدى. ٴبىز ەحوبانى قاتتى سۇيەمىز جانە ونىڭ عيباداتىمىزعا ابدەن لايىق ەكەنىن دە بىلەمىز. سوندىقتان عيباداتىمىزدىڭ ساپاسى مۇمكىندىگىنشە جوعارى بولعانىن قالايمىز.
3. بۇل ماقالادا نە تۋرالى بىلەمىز؟
3 وسى ماقالادا ەحوبانىڭ ەجەلدە قانداي عيباداتتى قابىلداعانىن جانە بۇگىندە وعان ۇنامدى عيباداتتىڭ قانداي سەگىز جولى بار ەكەنىن بىلەمىز. سونداي-اق نەلىكتەن تازا عيبادات ٴبىزدى باقىتتى ەتەتىنىن دە كورەمىز. ٴسىزدى وسى ماقالانىڭ بارىسىندا «ٶز عيباداتىمنىڭ ساپاسىن قالاي جاقسارتسام بولادى» دەپ ويلانۋعا شاقىرامىز.
ەجەلدە ەحوبا قانداي عيباداتتى قابىلداعان؟
4. ەجەلدە ەحوباعا عيبادات ەتكەن جاندار ونى قۇرمەتتەيتىندەرىن جانە سۇيەتىندەرىن قالاي كورسەتكەن؟
4 ەجەلدە، ماسىحشىلەردىڭ زامانىنان تالاي عاسىر بۇرىن، ٵبىل، نۇح، ىبىرايىم جانە ٵيۇپ سياقتى ادال كىسىلەر ەحوبانى قۇرمەتتەگەن جانە سۇيگەن. ولار بۇنى مويىنسۇنۋلارىمەن، سەنىمدەرىمەن جانە اكەلگەن قۇرباندىقتارىمەن كورسەتكەن. كيەلى كىتاپتا ولاردىڭ ەحوباعا ناقتى قانداي جولدارمەن عيبادات ەتكەندەرى جايلى كوپ ايتىلماعان. ٴبىراق ٴبىر ايقىنى، ولار ەحوبانى داڭقتاۋ ٷشىن قولدان كەلگەننىڭ ٴبارىن جاساعاندىقتان، عيباداتتارى وعان ۇنامدى بولعان. كەيىن ىبىرايىمنىڭ ۇرپاقتارىنا ەحوبا مۇسا زاڭىن بەردى. وندا ەحوباعا ۇنامدى عيباداتتىڭ قانداي بولۋى كەرەكتىگى ەگجەي-تەگجەيلى ٴتۇسىندىرىلدى.
5. يسا ٶلىپ، قايتا تىرىلگەن سوڭ، تازا عيباداتتا قانداي وزگەرىس بولدى؟
5 يسا ٶلىپ، قايتا تىرىلگەننەن كەيىن، مۇسا زاڭى ٶز كۇشىن جويدى (ريم. 10:4). ەحوبا ماسىحشىلەردەن ەندى جاڭا زاڭعا — «ٴماسىحتىڭ زاڭىنا» — باعىنۋدى تالاپ ەتتى (عال. 6:2). بۇل »زاڭ» نە ىستەۋگە بولاتىنى مەن بولمايتىنىنا قاتىستى ۇزىن سونار ەرەجەلەر تىزىمىنەن تۇرماعان. ٴماسىحتىڭ زاڭىن ورىنداۋ يساعا ەلىكتەۋدى جانە ونىڭ تالىمدەرىن ومىردە قولدانۋدى بىلدىرگەن. بۇگىندە دە ماسىحشىلەر يساعا ەلىكتەۋ ٷشىن بار كۇشتەرىن سالادى. وسىلاي ولار ەحوباعا ۇنامدى بولادى جانە «جاندارى سەرگيدى» (مات. 11:29).
6. بۇل ماقالانىڭ پايداسىن كورۋ ٷشىن نە ىستەگەنىڭىز دۇرىس؟
6 ٴقازىر عيبادات ەتۋدىڭ سەگىز جولىنا جەكە-جەكە توقتالعاندا: «وسى سالادا قانداي جەتىستىككە جەتتىم؟ عيباداتىمنىڭ ساپاسىن قالاي جاقسارتسام بولادى؟»— دەپ وي جۇگىرتىڭىز. وسى ۋاقىتقا دەيىن جەتكەن جەتىستىكتەرىڭىز سىزگە قۋانىش سيلارى ٴسوزسىز. دەسە دە ەحوباعا دۇعا ەتە وتىرىپ، تاعى قالاي جاقسارساڭىز بولاتىنى جايلى ويلانىڭىز.
ٴبىزدىڭ عيباداتقا نە جاتادى؟
7. ەحوبا شىن جۇرەكتەن ايتقان دۇعالارىمىزعا قالاي قارايدى؟
7 ەحوباعا دۇعا ەتۋ عيباداتقا جاتادى. جازبالاردا دۇعا جاقسىلاپ ازىرلەنگەن حوش ٴيىستى تارتۋعا تەڭەلەدى (ٴزاب. 141:2). كيەلى شاتىردا، كەيىن عيباداتحانادا ۇسىنىلعان بۇنداي تارتۋلاردىڭ ٴيىسى ەحوباعا وتە ۇنامدى بولعان (ناق. س. 15:8؛ مۇس. 5-ج. 33:10). سول سياقتى، سوزگە شەشەن بولماساق تا، شىن جۇرەكتەن ايتقان دۇعالارىمىز وعان ٴدال سولاي ۇنامدى. دۇعادا ەحوبانى جاقسى كورەتىنىمىزدى جانە وعان العىسىمىزدى ايتقاندا، بۇل ونىڭ جۇرەگىنە جىلى تيەتىنىنە سەنىمدى بولايىق. ول ٴبىزدىڭ تىلەك-قالاۋىمىزدى، ۋايىمىمىزدى تىڭداعىسى كەلەدى. ەندەشە، دۇعا ەتپەس بۇرىن نە ايتقىڭىز كەلەتىنىن جاقسىلاپ ويلانىپ الىڭىز. سوندا كوكتەگى اكەڭىزگە ارناعان تارتۋىڭىز راسىمەن دە «حوش ٴيىستى» بولادى.
8. قۇدايدى ماداقتاۋدىڭ كەرەمەت مۇمكىندىگى قانداي؟
8 ەحوبانى ماداقتاۋ عيباداتقا جاتادى (ٴزاب. 34:1). ٴبىز باسقالارعا ەحوبانىڭ كەرەمەت قاسيەتتەرى مەن ىستەرى جايلى تامسانا ايتقاندا، ونى ماداقتايمىز. بۇنداي ماداق العىسقا تولى جۇرەكتەن شىعادى. سوندىقتان ەحوبانىڭ ىزگىلىگى — بىزگە جاساعان بارلىق جاقسىلىقتارى — جايلى ۋاقىت ٴبولىپ ويلانساق، ونى ماداقتاۋعا سەبەپتەرىمىز جەتىپ ارتىلاتىنىن بايقايمىز. «قۇدايعا ماداقتاۋ قۇرباندىعىن ۇسىنۋدىڭ، ياعني اۋزىمىزدان شىققان سوزىمىزبەن ونى ماداقتاۋدىڭ» كەرەمەت مۇمكىندىگى — ۋاعىزداۋ (ەۆر. 13:15). جوعارىدا ٴبىز ەحوباعا دۇعا ەتپەس بۇرىن نە ايتاتىنىمىز جايلى ويلانىپ الۋىمىز كەرەك دەدىك. سول سياقتى، قىزمەتكە شىقپاس بۇرىن دا نە تۋرالى ۋاعىزدايتىنىمىزدى جاقسىلاپ ويلاستىرىپ الايىق. سونداي-اق شىندىقتى شابىتپەن جەتكىزۋگە تىرىسايىق. ويتكەنى ٴبىز «ماداقتاۋ قۇرباندىعىمىزدىڭ» مۇمكىندىگىنشە ساپالى بولعانىن قالايمىز.
9. ەجەلگى يسرايلدىكتەر سياقتى، بۇگىندە ٴبىز دە كەزدەسۋلەردىڭ قانداي پايداسىن كورىپ ٴجۇرمىز؟ ٶزىڭىز جايلى ايتىپ بەرىڭىز.
9 كەزدەسۋلەرگە قاتىسۋ عيباداتقا جاتادى. ەجەلدە ەحوبا يسرايلدىكتەرگە: «ەركەك كىندىكتىلەردىڭ ٴبارى ەحوبا قۇدايلارىڭنىڭ الدىنا، ونىڭ ٶزى تاڭداعان جەرگە جىلىنا ٷش مارتە كەلەتىن بولسىن»،— دەپ بۇيىرعان ەدى (مۇس. 5-ج. 16:16). دەمەك، ولارعا ۇيلەرى مەن ەگىندىكتەرىن تاستاپ كەتۋ كەرەك بولعان. ٴبىراق قۇداي ولارعا: «ەحوبا قۇدايىڭنىڭ الدىنا بارعان كەزدە، ەشكىم دە جەرىڭدى تارتىپ الۋعا تىرىسپايدى»، — دەپ ۋادە ەتتى (مۇس. 2-ج. 34:24). وسى ۋادەگە نىق سەنگەندىكتەن، يسرايلدىكتەر جىل سايىنعى مەيرامدارعا قالماي بارعان. ولار وسىنداي قۇرباندىقتارعا بارعاندارىنىڭ مول جەمىسىن كورگەن، ياعني قۇداي زاڭىن تەرەڭىرەك تۇسىنگەن، ونىڭ ىزگىلىگى جايلى وي جۇگىرتكەن جانە ٶزارا ارالاسىپ، ٴماز-مەيرام بولعان (مۇس. 5-ج. 16:15). ٴبىز دە قاۋىم كەزدەسۋلەرىنە قاتىسۋ ٷشىن قۇرباندىقتارعا بارساق، ٴدال وسىنداي باتالارعا كەنەلەمىز. ال قىسقا دا ماعىنالى تۇسىنىكتەمەلەر دايىنداپ بارساق، ەحوبانى ودان سايىن قۋانتاتىنىمىز ٴسوزسىز.
10. نەلىكتەن ٵن شىرقاۋ عيباداتىمىزدىڭ ماڭىزدى بولىگى بولىپ تابىلادى؟
10 ەحوباعا ماداق ٵنىن شىرقاۋ عيباداتقا جاتادى (ٴزاب. 28:7). يسرايلدىكتەر ٷشىن ٵن شىرقاۋ عيباداتتىڭ ماڭىزدى بولىگى بولعان. ٴداۋىت پاتشا عيباداتحانادا ٵن شىرقاۋعا ٴتىپتى 288 لەۋىلىكتى ٴبولىپ قويعان ەدى (شەج. 1-ج. 25:1، 6—8). بۇگىندە ٴبىز دە ەحوبانى انمەن ماداقتايمىز. وسىلايشا ٴبىز ونى قانشالىقتى سۇيەتىنىمىزدى كورسەتەمىز. الايدا ٴسىز «انگە داۋسىم كەلمەيدى، ونداي قابىلەتىم جوق» دەپ ويلاساڭىز شە؟ كيەلى كىتاپتا ٴبارىمىز دە سوزدەن «كوپ سۇرىنەتىنىمىز» ايتىلعان (جاق. 3:2). ٴبىراق وسىلاي ەكەن دەپ، ٴبىز قاۋىمدا نە قىزمەتتە مۇلدەم سويلەمەي قويمايمىز عوي؟! سول سياقتى ٵن ايتۋعا قابىلەتىم جوق دەپ ويلاعانىمىز ەحوبانى انمەن ماداقتاۋعا ەش كەدەرگى بولماۋ كەرەك.
11. ٴزابۇر 48:13 كە ساي، كيەلى كىتاپتى وتباسى بولىپ زەرتتەۋگە نەگە ۋاقىت ٴبولۋىمىز كەرەك؟
11 ەحوبانىڭ ٴسوزىن زەرتتەۋ جانە بالالارىمىزعا ول تۋرالى ۇيرەتۋ عيباداتقا جاتادى. دەمالىس كۇنى يسرايلدىكتەر كۇيبىڭ تىرلىكتى شەتكە ىسىرىپ، ەحوبامەن قارىم-قاتىناستارىنا كوڭىل بولگەن (مۇس. 2-ج. 31:16، 17). بالالى-شاعالى يسرايلدىكتەر وسى ۋاقىتتا بالالارىنا ەحوبا تۋرالى، ونىڭ ىزگىلىگى تۋرالى ۇيرەتكەن. ٴبىز دە قۇداي ٴسوزىن وقىپ-زەرتتەۋگە ارنايى ۋاقىت بولەمىز، ويتكەنى بۇل عيباداتقا جاتادى ٵرى ٴبىزدى ەحوباعا جاقىنداتا تۇسەدى (ٴزاب. 73:28). ال كيەلى كىتاپتى وتباسى بولىپ زەرتتەگەندە، ٴبىز «كەلەر ۇرپاققا»، ياعني بالالارىمىزعا كوكتەگى اكەمىزبەن جاقىن دوس بولۋعا كومەكتەسەمىز (ٴزابۇر 48:13 وقىڭىز).
12. كيەلى شاتىردىڭ جابدىقتارىن جاساعانداردىڭ ەڭبەگىنە ەحوبا قالاي قاراعان جانە ٴبىز بۇدان نە ۇيرەنەمىز؟
12 عيبادات ورىندارىن سوعۋ جانە ولاردى كۇتىپ ۇستاۋ عيباداتقا جاتادى. كەزىندە كيەلى شاتىردى جانە ونىڭ جابدىقتارىن جاساۋدى ەحوبا «كيەلى جۇمىس» دەپ بىلگەن (مۇس. 2-ج. 36:1، 4 ٴسىلت.). بۇگىندە دە ەحوبا پاتشالىق سارايلارى مەن باسقا دا تەوكراتيالىق عيماراتتاردى سوعۋدى قاسيەتتى قىزمەت دەپ قاراستىرادى. كەيبىر ەر جانە ايەل باۋىرلاستارىمىز وسى ىسكە كوپ كۇش پەن ۋاقىت جۇمسايدى. ولار قۇرىلىس ىسىندە تەر توگۋمەن قاتار، ۋاعىز ىسىندە دە بەلسەندىلىك تانىتادى. كەيبىرى ٴتىپتى ٸزاشار بولعىسى كەلەتىن شىعار. ەگەر ولاردان وسىنداي ٶتىنىش تۇسسە، اقساقالدار ولاردى ٸزاشار قىلىپ تاعايىنداۋدان تارتىنباعاندارى ٴجون. ويتكەنى بۇل دا اقساقالداردىڭ تاراپىنان قۇرىلىس ٸسىن قولداۋ بولىپ تابىلادى. قۇرىلىس جۇمىسىندا قابىلەتىمىز بولسىن-بولماسىن، بارلىعىمىز دا عيماراتتاردى كۇتىپ ۇستاۋعا اتسالىسا الامىز.
13. پاتشالىق ىسىنە سالاتىن ساداقاعا قالاي قاراۋىمىز كەرەك؟
13 پاتشالىق ىسىنە ساداقا جاساۋ عيباداتقا جاتادى. يسرايلدىكتەرگە: «ەشقايسىسى ەحوبانىڭ الدىنا قۇرالاقان كەلمەسىن»،— دەپ بۇيىرىلعان ەدى (مۇس. 5-ج. 16:16). ولار ٶز جاعدايلارىنا قاراي سي-تارتۋ اكەلۋ كەرەك بولعان. وسىلاي ولار ەحوبانىڭ جاساپ جاتقان بارلىق رۋحاني شارالارىنا العىستارىن بىلدىرەتىن. ٴبىز دە ەحوبانى سۇيەتىنىمىزدى جانە رۋحاني شارالارىن باعالايتىنىمىزدى بىلدىرگىمىز كەلەدى. بۇنىڭ ٴبىر جولى — قاۋىم قاجەتتىلىكتەرىنە جانە دۇنيەجۇزىلىك ىسكە جاعدايىمىزعا قاراي ساداقا بەرۋ. ەلشى پاۋىل: «قۇدايعا اسىرەسە شىن ىقىلاسپەن بەرىلگەن سي-تارتۋ ۇنامدى. ول ادامنىڭ قولدا جوعىنا ەمەس، بارىنا قاراي قابىلدايدى»، — دەگەن (قور. 2-ح. 8:4، 12). راسىندا دا، ەحوبا از بولسا دا، شىن ىقىلاسپەن بەرىلگەن ساداقاعا قاتتى قۋانادى (مار. 12:42—44؛ قور. 2-ح. 9:7).
14. ناقىل سوزدەر 19:17 گە ساي، باۋىرلاستارعا كورسەتكەن كومەگىمىزدى ەحوبا قالاي قابىلدايدى؟
14 باۋىرلاستارعا كومەكتەسۋ عيباداتقا جاتادى. ەحوبا كەدەيلەرگە قول ۇشىن بەرەتىن يسرايلدىكتەردىڭ جاقسىلىقتارىن قايتاراتىنىن ايتقان (مۇس. 5-ج. 15:7، 10). بۇگىندە دە ەحوبا مۇقتاجدىق كورگەن باۋىرلاستارعا كورسەتكەن كومەگىمىزدىڭ ٴبارىن وزىنە ارنالعان سي دەپ قابىلدايدى (ناقىل سوزدەر 19:17 وقىڭىز). مىسالى، تۇرمەدە وتىرعان ەلشى پاۋىل فىلىپىدەگى ماسىحشىلەردەن سي-تارتۋ العاندا، ونى «قۇدايعا ۇنامدى ٵرى جاعىمدى قۇرباندىق» دەپ اتاعان (ٴفىلىپ. 4:18). ٴسىز دە قاۋىمىڭىزداعى باۋىرلاستاردى ەسىڭىزگە ٴتۇسىرىپ: «كىمگە قانداي جاقسىلىق جاساسام بولادى؟»— دەپ ويلانىڭىز. مۇقتاج جانعا جاردەم بەرۋ ٷشىن ۋاقىتىمىز بەن كۇشىمىزدى، قابىلەتىمىز بەن قولدا بارىمىزدى جۇمساعانىمىز ەحوباعا وتە ۇنامدى. ول مۇنى عيباداتتىڭ ٴبىر بولىگى دەپ قابىلدايدى (جاق. 1:27).
تازا عيبادات بىزگە باقىت سيلايدى
15. تازا عيبادات ۋاقىت پەن كۇشىمىزدى تالاپ ەتكەنمەن، نەگە ول بىزگە اۋىرتپالىق ەمەس؟
15 راس، تازا عيبادات كۇش پەن ۋاقىت تالاپ ەتەدى. ٴبىراق بۇل ٴبىز ٷشىن اۋىرتپالىق ەمەس (جوح. 1-ح. 5:3). ويتكەنى ٴبىز ەحوبانى سۇيەمىز. مىسالعا اكە مەن كىشكەنتاي بالانى الايىقشى. بالاسى وعان ارناپ سۋرەت سالعىسى كەلدى دەلىك. سول سۋرەتتى ول تەرلەپ-تەپشىپ، كەشكە دەيىن سالادى. ٴبىراق وسىنشا ۋاقىت سارپ ەتكەنىنە ونىڭ ەش كوڭىلى تۇسپەيدى. سەبەبى ول اكەسىن سۇيەدى جانە ونى قۋانتۋدان ٶزى دە قۋانىش الادى. ٴبىز دە ەحوبانى قاتتى سۇيگەندىكتەن، وعان عيبادات ەتۋ ٷشىن ۋاقىت پەن كۇش جۇمساۋعا وتە قۋانىشتىمىز.
16. ەۆرەيلەرگە 6:10 عا ساي، ەحوبا ٴبىزدىڭ ونى قۋانتۋ ٷشىن جاساعان ىستەرىمىزگە قالاي قارايدى؟
16 ٴسۇيۋشى اتا-انا بالالارىنىڭ بارىنەن بىردەي سيلىق كۇتپەيدى. ٴبىر قۇرساقتان شىقسا دا، ولاردىڭ قابىلەتتەرى، شامالارى ٵرتۇرلى ەكەنىن ەسكەرەدى. ٴدال سولاي كوكتەگى اكەمىز دە ٵرقايسىسىمىزدىڭ شامامىزدى جاقسى بىلەدى. بالكىم، ٴسىز باسقالارعا قاراعاندا كوپ ىستەي الاتىن شىعارسىز. يا بولماسا دەنساۋلىعىڭىزعا، جاسىڭىزعا نەمەسە وتباسىلىق جاۋاپكەرشىلىكتەرىڭىزگە وراي، ەحوباعا كوپ بەرۋگە جاعدايىڭىز كەلمەيتىن شىعار. ٴبىراق بۇعان كوڭىلىڭىز ەش تۇسپەسىن (عال. 6:4). ەحوبا ٴسىزدىڭ ەڭبەگىڭىزدى ۇمىتپايدى. ول دۇرىس نيەتپەن قولدان كەلگەنىڭىزدى جاساپ جاتقانىڭىزعا قۋانادى (ەۆرەيلەرگە 6:10 وقىڭىز). ەحوبا ٴتىپتى جۇرەك قالاۋىڭىزدى كورىپ تە قۋانادى. ول ٴسىزدىڭ بارىڭىزدى سالىپ عيبادات ەتىپ جۇرگەنىڭىزگە كوڭىلىڭىز تولىپ، ٶزىڭىزدى باقىتتى سەزىنگەنىڭىزدى قالايدى.
17. ا) عيباداتىمىزدىڭ قانداي دا ٴبىر بولىگىنە قاتىسۋ قيىنعا سوقسا، نە ىستەسەك بولادى؟ ٵ) « باقىتىڭىزدى ەسەلەڭىز» دەگەن قورشاۋداعى عيبادات ەتۋ جولدارىنىڭ قانداي پايداسىن كورىپ ٴجۇرسىز؟
17 ەگەر جەكە زەرتتەۋ نەمەسە ۋاعىزداۋ سياقتى عيباداتىمىزدىڭ قانداي دا ٴبىر بولىگىنە قاتىسۋ بىزگە وڭاي بولماسا شە؟ «سويلەي-سويلەي شەشەن بولاسىڭ» دەگەندەي، وسى ىستەرمەن ٴجيى اينالىسقان سايىن، ولاردى ٴسۇيىپ اتقاراتىن بولامىز جانە پايداسىن دا كورە باستايمىز. مىسالى، قانداي دا ٴبىر جاتتىعۋ جاساۋدى نەمەسە مۋزىكالىق اسپاپتا ويناۋدى ۇيرەنگىمىز كەلەدى دەلىك. ٴبىز ولاردى ۇيرەنۋ ٷشىن اندا-ساندا عانا ۋاقىت بولسەك، بۇدان ايتارلىقتاي ٴبىر ناتيجە شىعا قويماس. ال ەگەر كۇن سايىن از-ازدان ۋاقىت بولە باستاپ، ونى بارا-بارا كوبەيتسەك، جەتىستىكتەرگە جەتە باستايمىز. ٴتىپتى سول ىسپەن اينالىساتىن ۋاقىتتى اسىعا كۇتىپ، ٴسۇيىپ اتقاراتىن بولامىز. وسى ٵدىستى عيباداتىڭىزدا دا قولدانىپ كورە الاسىز با؟
18. ٴبىز ٷشىن ەڭ ماڭىزدى نارسە نە جانە سونى ورىنداساق، جەمىسى قانداي بولادى؟
18 ەحوباعا بار جۇرەكپەن عيبادات ەتۋ — ٴبىزدىڭ تىك باسىپ، ٴتىرى جۇرگەندەگى نەگىزگى ماقساتىمىز. وعان عيبادات ەتۋ بىزگە باقىت سيلايدى، ٶمىرىمىزدى ٴماندى ەتەدى جانە ەحوباعا ماڭگىلىك عيبادات ەتۋگە ٷمىتىمىز دە بار (ناق. س. 10:22). ٴتىپتى قازىرگى زاماننىڭ وزىندە دە جۇرەگىمىز تىنىشتىققا تولى، ويتكەنى قيىنشىلىقتا ەحوبا جار بولاتىنىنا سەنىمدىمىز (يشايا 41:9، 10). «داڭققا، قۇرمەتكە يە بولۋعا لايىقتى» سۇيىكتى اكەمىز ەحوباعا عيبادات ەتۋ بىزگە تەك باقىت اكەلەدى! (ايان 4:11).
24-ٵن ەحوبانىڭ تاۋىنا كەلىڭدەر!
^ ەحوبا جاراتۋشىمىز بولعاندىقتان، عيبادات ەتۋىمىزگە ابدەن لايىق. عيباداتىمىز وعان ۇنامدى بولۋ ٷشىن، ٴبىز ونىڭ تالاپتارىن ورىندايمىز جانە پرينسيپتەرىنە ساي ٶمىر كەشەمىز. وسى ماقالادا ٴبىز عيبادات ەتۋدىڭ سەگىز جولى تۋرالى جانە ولاردىڭ ٵرقايسىسى بىزگە قالاي باقىت سيلايتىنى جايلى بىلەمىز.
