1-2. Guutisior­ner­put Jehovamit akuerineqas­sap­pat susariaqar­pugut?

 OQAASEQ “guutisior­neq” tusaraangakku suna eqqarsaatigisar­piuk? Immaqa qatan­ngutip maniguul­luni qinunik­kut uum­mam­miuni aniatik­kai eqqarsaatigivat. Imaluun­niit ilaqutariit nuan­naarlutik Biibilimik atuaq­qisaaqatigiit­tut eqqarsaatigivatit.

² Pineqar­tut taakku tamarmik Jehovamik guutisior­put. Guutisior­nerat Jehovamit akuerineqas­sava? Aap, piumasaanut naaper­tuut­tumik iliuuseqarunik aamma asan­nil­lutillu ataq­qin­nil­lutik guutisiorunik akuerineqas­saaq. Jehova asangaar­par­put. Nalun­ngilar­put guutisiorfigineqar­tariaqar­toq, pitsaaner­paamillu taamaaliorusup­pugut.

3. Allaaserisami matumani suut sam­mis­savagut?

³ Allaaserisami matumani guutisioriaaseq itsaq Jehovap akuerisimasaa aamma ullumik­kut guutisior­nitsinni iliuuserisar­tak­kagut arfineq-pingasut sam­mis­savagut. Taakku sam­mitil­lugit pitsaanerusumik qanoq guutisiorsin­naanerluta eqqarsaatigisin­naavar­put. Aamma guutisior­neq sooq pil­lualis­sutaasar­toq sam­mis­savar­put.

4. Itsaq inuusut Jehovamik ataq­qin­nin­ner­tik asan­nin­ner­tillu qanoq ersersit­tar­paat?

⁴ Angutit aalajaatsut itsaq inuusut, soorlu Aabelip, Nooap, Aaperaap Juubillu, Jehovamik ataq­qin­nin­ner­tik asan­nin­ner­tillu ersersit­tar­paat. Qanoq? Jehovap naalan­neratigut, upperineratigut  pil­liuteqarfigisar­neratigullu. Biibilimi allas­siman­ngilaq qanor­piaq guutisior­tas­sasut. Erseq­qip­porli sapin­ngisamin­nik Jehova ataq­qin­nit­tuliorfigaat guutisior­nerallu akuerineqar­toq. Kingusin­nerusuk­kut Jehovap Israalik­kun­nut inatsisit Moorsisi aqqutigalugu tun­niup­pai. Inatsisini taak­kunani akuerisaasumik Jehova qanoq guutisiorfigineqas­sasoq pil­lugu ilitsersuuteqar­poq.

5. Jiisusip toqunerata makititaaneratalu kingorna guutisior­neq ilumoor­toq qanoq allan­ngor­pa?

⁵ Jiisusip toqunerata makititaaneratalu kingorna Moorsisip inatsisai Jehovap atuuk­kun­naarsip­pai. (Rom 10:4) Kristumiut inatsisit nutaat, tassa “Kristusip inatsisai”, malerualer­tus­saavaat. (Gal 6:2) Inatsisit taakku alan­ngaar­tariaqan­ngilaat ilitsersuuter­pas­suillu maleruar­tariaqar­nagit, Jiisusilli ilaar­neratigut ilin­niar­titsis­sutigisaanillu maleruaanik­kut ‘inatsisit’ naalas­savaat. Ullumik­kut­taaq kristumiut Jehovamit iluarisaajumal­lutik ‘nakus­satsik­kumal­lutil­lu’ Kristusi sapin­ngisamin­nik ilaar­niar­tar­paat. – Mat 11:29.

6. Allaaserisaq manna qanoq iluaqutigisin­naavar­put?

⁶ Guutisior­nitsinni iliuuserisar­tak­kagut sam­mitil­lugit apeq­qutit uku eqqarsaatigik­kit: ‘Tamatumun­nga tun­ngatil­lugu qanoq siumukarsimavunga? Pitsaanerusumik Jehovamut kif­far­torsin­naavunga?’ Siumukarsimanerit nuan­naarutigisin­naavat, sutigulli pitsan­nguisin­naanerlutit paasiumal­lugu Jehovamut ikioq­qugit.

7. Uum­mam­mit pisumik qin­nutigut Jehovap qanoq isigisar­pai?

⁷ Jehova qin­nuigigaangatsigu guutisior­figisar­parput. Qin­nutigut tipigis­saatil­liis­sutinut piareersarluak­kanut Biibilimi assersuun­neqar­put. (Tuss 141:2) Guutip tipigis­saatil­liis­sutit taakku iluarai. Taamatut­taaq uum­mam­mit pisumik qin­nutigut oqal­loris­saar­niutaan­ngik­kaluar­tut iluarisar­pai. (Uss 15:8; Mos 5. 33:10) Asan­nin­nitsin­nik qujamasun­nitsin­nillu oqaasin­nguisar­ner­put Jehovap nuan­naarutigisaraa upperil­luin­narsin­naavar­put. Isumakuluutigut, neriuutigisagut kis­saatigisagullu pil­lugit imminut oqalut­tuar­nis­sar­put kis­saatigaa. Jehovamut qinun­ngin­ninni oqaatiginiak­katit eqqarsaatigeq­qaarsin­naavatit. Taamaalioruit Ataatan­nut qilam­miusumut pitsaaner­paamik ‘tipigis­saatil­liis­suteqas­saatit’.

8. Guutip unnersiutiginis­saanut qanoq periarfis­saqar­pugut?

⁸ Jehova unnersiutigigaangatsigu guutisior­figisar­parput. (Tuss 34:2) Jehovap pis­susii nuan­nersut iliuuserisimasaalu tupin­nar­tut oqalut­tuarigaangatsigit Jehova unnersiutigisar­par­put. Jehova qujamasuf­figigutsigu unnersiutigerusus­savar­put. Jehovap ajun­ngis­susia, tassa uagut pil­luta iliuuserisar­pas­sui, eqqarsaatigeq­qis­saar­tarutsigit unnersiutiginis­saanut pis­sutis­saqarluas­saagut. Ingam­mik oqaluus­sinermi ‘pil­lium­mik unnersiutigin­nis­sum­mik, tassa qanitta inerititaan­nik, Guutimut sas­saas­siuar­nis­samut’ periarfis­saqar­pugut. (Hebr 13:15) Soorlu qinun­ngin­nitsinni oqaatiginiak­kagut eqqarsaatigeq­qaar­tus­saagigut, taamatut­taaq oqaluus­sinermi qanoq oqas­sanerluta eqqarsaatigeq­qaar­tariaqar­par­put. Pitsaaner­paamik “unnersiutigin­nis­sum­mik” pil­liuteqarusuk­katta kajumingaarluta oqaluus­sisar­pugut.

9. Israalik­kutulli ataatsimiit­tar­nigut qanoq iluaqutigisar­pagut? Misigisimasan­nik oqalut­tuarit.

⁹ Ataatsimiigiaraangatta Jehova guutisior­figisar­parput.  Israalik­kut ima peq­quneqar­put: “Angutitatit tamarmik ukiumut pingasoriarlutik najuk­kami Naalak­kap qinerumaagaani Naalak­kap Guutivit kiinaata saanut sas­sar­tas­sap­put.” (Mos 5. 16:16) Taak­kua peqan­ngin­neranni angerlarsimaf­fiat narsaataallu ujajaaf­figineqariaan­naasar­put. Jehovalli ima neriorsorsimavai: “Nunaatit allanit pigineqalis­san­ngilaq ukiumut pingasoriarlutit majuar­taruit Naalak­kap Guutivit kiinaa takuniarlugu.” (Mos 2. 34:24) Jehova tatigil­luin­narlugu Israalik­kut ukiumoor­tumik nal­liut­torsior­nerit peqataaf­figisar­paat. Taamaalior­taramik pil­luaq­quneqar­tar­put – Guutip inatsisai paasineruler­tar­paat, ajun­ngis­susia eqqarsaatigeq­qis­saar­tar­paat uppeqatitillu qiim­maal­lan­nar­tumik peqatigisarlugit. (Mos 5. 16:15) Pil­liuteqar­tariaqaraluarluta ataatsimiigiaraangatta taamatoq­qis­saaq pil­luaq­quneqar­tar­pugut. Naatsumillu oqaaseqar­nis­samut piareersarsimagaangatta Jehova nuan­naar­tar­poq.

10. Sooq erinarsor­neq guutisior­nitsinni pingaaruteqar­pa?

¹⁰ Erinarsoqataagaangatta Jehova guutisior­figisar­parput. (Tuss 28:7) Israalik­kut erinarsor­neq guutisior­nerminni pingaaruteqar­tutut isigaat. Kun­ngip Daavip guutisiorfimmi Levik­kuusut 288-it erinarsor­tar­tus­satut toq­qar­pai. (Nal 1. 25:1, 6-8) Uagut­taaq Jehova erinarsorfigigaangatsigu taas­sumin­nga asan­nin­ner­put ersersis­sin­naavar­put. Taamaaliorumal­luta erinagis­suusariaqan­ngilagut. Una eqqarsaatigiuk: Oqaluk­kaangatta “kuk­koqat­taar­tar­pugut”, taamaak­kaluar­toq ilagiinni oqaluus­sinermilu nipangersimaan­nar­tuun­ngilagut. (Jaak 3:2) Taamatut­taaq erinarsor­nitsinni kuk­kusaraluarluta Jehova unnersiutigalugu erinarsorfigisar­par­put.

11. Tus­siaat 48:14-imi allas­simasutut sooq ilaqutariit­tut atuaq­qis­saar­tar­neq pif­fis­saqarfigisariaqar­par­put?

¹¹ Biibili atuaq­qissaaraangatsigu meeq­qagullu Guuti pillugu ilin­niartik­kaangatsigit Jehova guutisior­figisar­parput. Israalik­kut ullormi qasuersaarfimmi sulinatik Jehova ikin­ngutigil­luar­neruler­tar­paat. (Mos 2. 31:16, 17) Israalik­kut aalajaatsut qitor­natik Jehova taas­sumalu ajun­ngitsuunera pil­lugu ilin­niar­tit­tar­paat. Uagut­taaq Guutip oqaasianik atuar­nis­saq misis­sueq­qis­saar­nis­sarlu pif­fis­saqarfigisariaqar­pagut. Taamaalior­neq guutisior­nitsin­nut ilaavoq, Jehovamullu qanin­nerusumik attaveqalis­sutigisar­par­put. (Tuss 73:28) Ilaqutariit­tullu atuaq­qis­saaraangatta meeq­qagut aamma Ataatatsin­nut asan­nit­tumut qilam­miusumut qanit­tumik attaveqaler­nis­saan­nut ikiorsin­naasar­pagut. – Tussiaat 48:14 atuaruk.

12. Tupermik guutisiorfim­mik pisataanillu sanasut sulineran­nik Jehovap isigin­nit­taasia qanoq ilin­niarfigisin­naavar­put?

¹² Illut guutisior­nitsinnut tunngasut sanagaangatsigit aserfallatsaa­ligaangatsigillu Jehova guutisior­figisar­parput. Biibilimi allas­simavoq tupermik guutisiorfim­mik pisataanillu sananeq iller­nar­tuusoq. (Mos 2. 36:1, 4) Nalitsinni Jehovap naalagaaf­filersaarfin­nik illunillu guutisior­nitsin­nut tun­ngasunik sananeq guutisior­ner­tut isigisar­paa. Uppeqatitta ilaasa sanaar­tor­nermut pif­fis­sarujus­suaq ator­tar­paat, qujamasuf­figingaar­pagullu. Soorunami aamma oqaluus­seqataasar­put. Ilaallu allaat pionerin­ngorusut­tar­put. Utoq­qaaner­tat sanaar­tor­nermik tapersersuiner­tik ersersis­sin­naavaat qatan­ngutit suleruloor­tut taak­kua piumasaqaataasunik eqqor­titsisut pionerin­ngor­nis­saan­nik akuerinerisigut. Sanaar­tor­neq pik­korif­figigutsigu pik­korif­figin­ngik­kutsiguluun­niit  tamatta illunik taak­kunin­nga eqqiaaqataasin­naal­lutalu aserfal­latsaaliuinermi peqataasin­naavugut.

13. Jehovap peqatigiis­sor­taanut tunis­sutigut qanoq isigis­savagut?

¹³ Aningaasanik Jehovap peqatigiis­sortaanut tunis­suteqaraangatta Jehova guutisior­figisar­parput. Israalik­kut Jehovamut sas­saraangamik pisin­naasatik naaper­torlugit tunis­suteqar­tar­tus­saap­put. (Mos 5. 16:16) Taamaalioraangamik anersaak­kut isumas­sor­neqar­ner­tik qujamasuutigalugu ersersit­tar­paat. Uagummi Jehovamik asan­nin­ner­put anersaak­kullu isumas­sor­neqar­nitsin­nik qujamasuutigin­nin­ner­put qanoq ersersis­sin­naavar­put? Ilaatigut taamaaliorsin­naavugut pisin­naasagut naaper­torlugit ilagiin­nut nunarsuarlu tamak­kerlugu sulinermut aningaasanik tunis­suteqar­nitsigut. Apustili Paulusi ima allap­poq: “Guutip piumasarigamiuk pigin­ngisat naaper­tor­nagit pigisalli naaper­torlugit tunis­suteqar­toqar­tas­sasoq kajumil­luni tunis­suteqar­neq pingaar­tumik iluaraa.” (Kor 2. 8:4, 12) Tunis­sutigut tamaasa, annikik­kaluar­tul­luun­niit, Jehovap iluarai. – Mak 12:42-44; Kor 2. 9:7.

14. Ussatit 19:17 uppeqatitsin­nik pisariaqar­titsisunik ikiuisar­ner­put Jehovap qanoq isigisar­paa?

¹⁴ Uppeqatigut pisariaqar­titsisut ikioraangatsigit Jehova guutisior­figisar­parput. Israalik­kut piitsunut tuk­kor­tuusut Jehovamit pil­luaq­quneqar­nis­samin­nik neriorsor­neqar­put. (Mos 5. 15:7, 10) Uppeqatitsin­nik pisariaqar­titsisunik ikiuisar­ner­put Jehovap imminut tunis­sutitut isigisar­paa. (Ussatit 19:17 atuaruk). Assersuutigalugu kristumiut Filip­pimeersut Paulusimut par­naarus­saaq­qasumut tunis­suteqar­nerat Paulusip “pil­liutitut tipigis­sutut Guutip akuerisaatut iluarinar­titaatul­lu” taavaa. (Flp 4:18) Illit ilagiin­niit­tut eqqarsaatigalugit imminut ima aperigit: ‘Arlaat ikiorsin­naavara?’ Pif­fis­sar­put, nukigut, pigin­naasagut pigisagullu atorlugit pisariaqar­titsisunik ikiuiner­put Jehovap iluarisar­paa. Guutisior­ner­tut isigisar­paa. – Jaak 1:27.

15. Jehovamik guutisior­neq pif­fis­sar­tor­narlunilu nukersor­naraluar­toq sooq artor­nar­tuun­ngila?

¹⁵ Jehovamik guutisior­neq pif­fis­sar­tor­narlunilu nukersor­nar­poq. Artor­nar­tuun­ngilarli. (Joh 1. 5:3) Sooq? Asan­nin­ner­put kajumis­sis­sutigalugu Jehova guutisiorfigisaratsigu. Meeraq ataataminut tunis­suteqarusut­toq takorlooruk. Immaqa pif­fis­sarujus­suaq atorlugu tunis­sutis­saminik titar­taavoq. Meeq­qap pif­fis­sarujus­suarmik atuisimanini peq­qis­simis­sutigin­ngilaa. Ataatani asavaa, tunis­suteqarfigisin­naagamiullu nuan­naar­poq. Uagut­taaq Jehova asagatsigu guutisiorfiginerani pif­fis­satsin­nik nukitsin­nillu atuisin­naaner­put nuan­naarutigisar­par­put.

16. Hebræerit 6:10 naaper­torlugu Jehovap imminik nuan­naar­titserusul­lutik iliuuseqar­tut tamaasa qanoq isigisar­pai?

¹⁶ Angajoq­qaat asan­nit­tut meeq­qamin­nit assigiim­mik tunis­suteqarfigineqar­nis­sar­tik naatsorsuutigineq ajor­paat. Nalun­ngilaat meeq­qat tamarmik pigin­naasamik­kut assigiin­ngitsuusut. Taamatut­taaq Ataatatta qilam­miusup pigin­naasatta assigiin­ngitsuunerat nalun­ngilaa. Immaqa guutisior­nermi ilisarisimasan­nit iliuuseqar­nerusin­naavutit. Imaluun­niit utoq­qaliar­tor­nerit, peq­qiil­lior­nerit ilaqutariin­niluun­niit akisus­saaf­feqar­nerit pis­sutigalugu inut­tulli allatut iliuuseqar­tigisin­naan­ngilatit. Nikal­loqinak. (Gal 6:4) Jehovap illit iliuuserisimasatit puiun­ngisaan­nas­savai. Sapin­ngisan­nik  eqqor­tumillu pis­sutiginiagaqarlutit iliuuseqaraangavit nuan­naar­tar­poq. (Hebræerit 6:10 atuaruk). Allaat iliuusererusutaraluatit Jehovap nalun­ngilai. Taas­sumun­nga kif­far­tor­ninni iliuuserisin­naasatit nuan­naarutigalugillu nalerisimaarutigis­sagitit kis­saatigaa.

17. (a) Guutisioriaatsitta ilaat saper­nar­tik­kutsigu susin­naavugut? (b) Ungalusami “ Pil­luar­nerulerit”-mi takutin­neqar­tut ilaat qanoq iluaqutigisimaviuk?

¹⁷ Taavami guutisioriaatsitta ilaat saper­nar­tik­kutsigu, soorlu nam­mineq atuaq­qis­saar­neq oqaluus­sinerluun­niit? Akulikitsumik taamaalior­tarutta nuan­naarutiginerul­lugulu iluaqutiginerus­savar­put. Guutisior­ner­put timik­kut pat­tan­nermil­luun­niit sungiusar­nermut assersuus­sin­naavar­put. Ilaan­nik­kuin­naq sungiusar­tarutta pik­koris­sinavian­ngilagut. Takorloorulli ullut tamaasa sungiusar­tar­tugut. Immaqa aal­laq­qaam­mut sivikitsumik sungiusar­tar­pugut, pif­fis­salli ingerlanerani sungiusar­tar­ner­put sivitsoriar­torsin­naavoq. Ilungersor­nitta sun­niuteqar­nera misigisaratsigu sungiusar­nis­sar­put qilanaariler­tar­par­put. Assersuut tamanna guutisior­nitsin­nut qanoq tun­ngatin­neqarsin­naasoq takusin­naaviuk?

18. Inuunitta siuner­taa qanoq eqqor­tit­tar­par­put, taman­nalu uagutsin­nut qanoq sun­niuteqar­tar­pa?

¹⁸ Sapin­ngisatsin­nik Jehova guutisiorfigigaangatsigu inuunitta siuner­taa eqqor­tit­tar­par­put. Taamaat­tumik nuan­naarluta nalerisimaarlutalu inuusin­naavugut Jehovallu naas­saan­ngitsumik guutisiorfiginis­saa neriuutigalugu. (Uss 10:22) Maanna isum­mak­kut eqqis­sisimavugut nalun­ngin­natsigu ajor­nar­torsior­nitsinni Jehovamit ikior­neqar­tarluta. (Es 41:9, 10) Ataatatsin­nik asan­nit­tumik ‘unnersiutigineqar­tariaqarlunilu ataq­qineqar­tariaqar­tumik’ guutisior­nitsinni pil­luar­nis­samut pis­sutis­saqarluar­pugut. – Saqq 4:11.