1-2. Ihi yandabhangesa Nzambi kuxikina o ubhezelu wetu?

 IHI i uxinganeka kyoso kiwivwa o kizwelu “kubheza”? Nange uxinganeka phange wafukama, wamuzwela ni Jihova mumusambu ande dya kuya muzeka. Mba nange uxinganeka mwiji wamudilonga o Bibidya ni kusanguluka kwoso.

² Mu ifika iyadi yiyi, enyoso abhange kima kyalungu ni ubhezelu. O kwila Jihova wandaxikina o ubhezelu wâ? Mwene wanda ku uxikina se ulunga ni vondadi yê, anga a ubhanga ni henda ni kuxila. Etu twazolo kyavulu Jihova. Twejiya kwila, kyamufwama kutambula o ubhezelu wetu, twamesena kumubheza mu ukexilu watokala.

3. Ihi itwandadilonga mumilongi yiyi?

³ Mu milongi yiyi twandadilonga o maukexilu akubheza axikina Jihova mu ukulu, twandamona we dinake dya maukexilu akubheza axikina Jihova mu izuwa yalelu. Kyoso kituya ni kubhanga kiki, tutena kuxinganeka jindunge jakubandekesa dingi o ukexilu wetu wakubheza. Twandamona we se mukonda dyahi o ubhezelu wakidi utusangulukisa.

4. Kyebhi o abhezi a Jihova ande dya Jezú kwiza mu ngongo, kyalondekesele o henda ni kuxila kwa Jihova?

⁴ Ande dya Jezú kwiza mu ngongo, kwamonekene kya mayala afiyele, kala Abele, Nowé, Mbalahamu ni Jobe, alondekesa kwila axila, azolo Jihova. Kyebhi kyabhange kiki? Mukubelesela, kuxikana ni kubhana jisata kwa Nzambi. O Bibidya ki  itutangela yoso yabhangele ene mu ubhezelu wâ. Maji yoso ilondekesa kwila, abhangele yoso phala kubhana kijingu kwa Jihova ni kumubheza mu ukexilu watokala. Mukusuluka, Jihova wabhana Ijila ku mwiji wa Mbalahamu, bhukaxi ka Mozé. Mu ijila yiyi, mwexile itumu yalungu ni kubheza Jihova mu ukexilu uxikina mwene.

5. Jihova wamesena kwila o maxibulu a Jezú amubheza mu ukexilu webhi?

⁵ Kyoso kyafu Jezú ya amufukununa, Jihova kexile mukingila dingi kwila, o abhezye akayela o Kijila kyabhele kwa akwa Izalayele. (Loma 10:4) O Jikidista exile mubelesela kijila kya ubhe, “o kijila kya Kidistu.” (Nga. 6:2) Ene ejitena kubelesela o “kijila” kiki, mukukayela o phangu ya Jezú ni kutumaka o ima yalongo, muveji dya kukayela ijila yavulu. Lelu we, o Jikidistá abhanga yoso phala kukayela o phangu ya Kidistu, n’a tene kusangulukisa o muxima wa Jihova, ni ‘kusanga kutululuka’ phala ene.—Mat. 11:29.

6. Mbote yahi itutena kukatula mumilongi yiyi?

⁶ Kyoso kituya ni kudilonga o maukexilu alungu ni ubhezelu wetu, twatokala kudibhwidisa: ‘Kyebhi kingamuditunda mu maka yá?’ Dibhwidise we: ‘O kwila ngabhingi kubandekesa o uhete wami mumaka yá?’ Né mwene se kindala wasanguluka ni yoso iwene mubhanga kya, utena kubhinga kwa Jihova n’a kukwatekesa kumona se bhebhi bhu wabhingi kubandekesa dingi.

7. Kyebhi Jihova kyamona o misambu itubhanga ni muxima woso?

⁷ Tubheza Jihova kyoso kitusamba kwa mwene. O Mikanda Ikôla isokesa o misambu yetu ni wasu wadizumba wosokejeke ni muxima woso, wexile mubhana kyadyanga mu balaka, mukusuluka mu tembulu. (Jisá. 141:2) O wasu wenyo wexile mubhana dizumba dyambote dyexile musangulukisa Nzambi. Kyene we kimoxi, Nzambi ‘wawabhela’ o misambu yetu, né mwene se kitutumbula izwelu yakatunda. (Jisa. 15:8; Mate. 33:10) Tutena kudyelela kwila, Jihova wawabhela kwivwa o misambu itubhanga ni henda yoso ni kisakidilu kitulondekesa kwa mwene. Mwene wamesena kwila, tumutangela o ima yamutukatula o kilu, o kidyelelu kyetu ni jihanji jetu. Ande dya kusamba kwa Jihova, watokala kuxinganeka kyambote mu ima iwamesena kuzwela. Mukubhanga kiki, wandatena kubhana kwa Tata yetu ya dyulu “wasu wa dizumba” dyambote.

8. Ithangana yebhi itwala nayu phala kuximana Nzambi?

⁸ Tubheza Jihova kyoso kitumuximana. (Jisá. 34:1) Tuximana Jihova mukutangela kwa akwetu kwila, twazolo, tudiwana o idifwa ni ibhangelu yê yakatunda. O Kukala ni kisakidilu kumuxima, kutubhangesa kuximana Jihova. Kyoso kituxinganeka mu ima yoso yatubhangela Jihova, twandakala ni ima yavulu phala kumuximana. O kikalakalu kya kuboka kitubhana kithangana kyambote phala kubhakula “jinga kwa Nzambi o sata ya kiximanu. O sata yiyi, yene o kiximanu kitunda ku dikanu dyetu.” (Jihe. 13:15) Kala kitubhanga ande dya kusamba kwa Jihova, twabhingi we kuxinganeka kyambote mu ima itwandazwela kwa yó utwandasanga mu ukunji wetu. Etu twamesena kubhana “sata ya kiximanu” yafwama mwene kyambote. Kiki kyene kitubhangesa kuzwela ni muxima woso kyoso kitwamulonga o kidi kwa akwetu.

9. Kala akwa Izalayele m’ukulu, mbote yahi itukatula kyoso kitudyongeka ni akwetu? Tumbula yenemubhita n’eye.

⁹ Tubheza Jihova kyoso kituya muyônge. Akwa Izalayele m’ukulu, a atangelele kwila:  “Mala oso mu kaxi kenu atokala kwiza lutatu ku muvu mu kudibhakula bhupholo ya Jihova Nzambi yé, bhu kididi bhwoso bhwa solo mwene.” (Mate. 16:16) Ene abhingile kuxisa o mabhya ni jinzo jâ, sé muthu phala kwa alanga. Maji Jihova wa akanena: “Kana muthu we ukala ni lwimbi lwa mavu enu, kyoso enu ki mu banda mu kudibhakula bhu pholo ya Jihova Nzambi yenu.” (Mak. 34:24) Kuma akwa Izalayele adyelele kwa Jihova ni muxima woso, exile muya mu jifesa jiji mivu yoso. Ene exile mukatula mbote yavulu. Mukifika, adilongele o Ijila ya Nzambi, exile muxinganeka mumbote ya abhangela Jihova ni kudyongeka ni akwâ azolele we Jihova. (Mate. 16:15) Tukatula we mbote yadifu kiki kyoso kitubhanga yoso itutena phala kuya muyônge ya kilunga. Jihova usanguluka we kyavulu kyoso kitusota kithangana phala kupelelapalala itambwijilu mu izwelu yofele, maji itula kumuxima.

10. Mukonda dyahi tuzwela kwila, o kwimba kubhanga mbandu mu ubhezelu wetu?

¹⁰ Tubheza Jihova kyoso kitwimba kumoxi ni jiphange jetu. (Jisá. 28:7) Akwa Izalayele exile mumona kuma, o kwimba kwabhangele mbandu ya ubhezelu wâ. Sobha Davidi wasolele 288 a Jilevita phala kukala jingimbidi mu tembulu. (1 Mal. 25:1, 6-8) Lelu, tutena we kulondekesa o henda yetu kwa Nzambi mukumuximana bhukaxi ka mimbu. Kitwabhingi kukala ni dizwi dyafwama phala kubhanga kiki. Tala o kifika kiki: Mukuzwela, “etu enyoso twene mutondala muveji javulu,” maji kiki kikyene mutufidisa kuzwela mukilunga mba mukuboka. (Tiya. 3:2) Kyene we kimoxi, kitwatokala kufula kuximana Jihova bhukaxi ka mimbu, né mwene se tuxinganeka kwila, kitwejiya kwimba kyambote.

11. Kala kyakijimbulula mu Jisálamu 48:13, mukonda dyahi twatokala kusota kithangana phala kudilonga o Bibidya kumwiji?

¹¹ Tubheza Jihova kyoso kitudilonga o Maka mê ni kulonga o twana twetu yalungu ni mwene. O kizuwa kya Sabhalu kyexile mubhana kithangana kwa akwa Izalayele phala kuxisa o ibhangelu yâ ya kizuwa ni kizuwa, n’a lunge o muxima mu ubhezelu wâ kwa Jihova. (Mak. 31:16, 17) Oso exile jifiyele bhukaxi kâ, exile mulonga o twana yalungu ni Jihova ni mbote ya abhangela. Etu we twatokala kusota kithangana phala kutanga ni kudilonga o Mak’â Nzambi. Kiki kibhanga mbandu ya ubhezelu wetu kwa Jihova, kitukwatekesa kuzukama dingi kwa mwene. (Jisá. 73:28) O kudilonga kumwiji, kukwatekesa o twana kukala ni ukamba wambote ni Tata yetu ya henda, wala kudyulu.—Tanga Jisálamu 48:13.

12. Ihi itudilonga mu ukexilu wa Jihova kutala yó abhange o ima yexile mu balaka?

¹² Tubheza Jihova mukutunga ni kulanga o Ididi ya ubhezelu. O Bibidya yamba kuma o kikalakalu kyakutunga o balaka ni ima yoso yexilemu, kyexile ‘kikalakalu kikôla.’ (Mak. 36:1, 4) Lelu we, Jihova utala o kikalakalu kyakutunga o Ididi ya Ubhezelu ni ididi yamukwa yatokala mukilunga, kala ikalakalu ikôla. Sayi jiphange ja mala ni ja ahatu, ene mungastala ithangana yavulu mu ikalakalu yiyi. O kwila twene mulondekesa kisakidilu munguzu yene mubhanga phala o Utuminu wa Nzambi? Mukidi, ene akalakala we mu sidivisu ya kuboka. Amoxi mudyâ, amesena kukala aboki athembu yoso. O tufunga mu ilunga alondekesa kwila amukwatekesa o kikalakalu kyakutunga, mukuxikina o jiphange jiji sé hele, kyoso kya abhana o petisá phala kukala aboki athembu yoso. Kikale se twala ni uhete wakutunga mba kana, etwenyoso tutena kukwatekesa kuzelesa ni kuyudika o Ididi ya Ubhezelu.

13. Kyebhi kitwatokala kumona o kitadi kitusangela phala kukwatekesa o kikalakalu kya Utuminu?

 ¹³ Tubheza Jihova kyoso kitusangela kitadi phala kukwatekesa o kikalakalu kya Utuminu. Akwa Izalayele katokalele kuya mubheza Jihova ni maku ahatu. (Mate. 16:16) Ene atokalele kubheka kabasa o ujitu watenene kubhana. Mukubhanga kiki, ene exile mulondekesa o kisakidilu kyâ mu yoso yabhange Jihova phala kwa akwatekesa mu nzumbi. Kyebhi kitutena kulondekesa o henda ni kisakidilu kwa Jihova mu yoso yene mutubhana, phala kutulanga mu nzumbi? Ukexilu umoxi wakubhanga kiki, o kusangela kitadi phala kukwatekesa o kilunga mu twatokala, ni kikalakalu kitwene mubhanga ku mundu woso, kate bhwoso bhu twatena. Poxolo Phawulu wajimbulula o maka yá mu ukexilu yú: “Se mwa mesena kukwatekesa, Nzambi uxikina o ujitu yú. Muthu watokala kubhana kala kya kala nakyu, kana mu ima kala nayu.” (2 Kol. 8:4, 12) Jihova usanguluka kyoso ki tusangela kitadi mba ujitu wosowoso utwatena, né mwene se kimoneka kala kikyala ni valolo.—Mál. 12:42-44; 2 Kol. 9:7.

14. Kala kilondekesa Jisabhu 19:17, kyebhi Jihova kyamona o kikwatekesu kitubhana kujiphange jetu abhindama?

¹⁴ Tubheza Jihova kyoso kitukwatekesa o jiphange abhindama. Jihova wakanena kwila, wejifuta woso mu Izalayele, ukwatekesa o ngadyama. (Mate. 15:7, 10) Ithangana yoso itukwatekesa phange wabhindama, Jihova udivwa kala ujitu utwabhana kwa Mwene. (Tanga Jisabhu 19:17.) Mukifika, kyoso akwa Filipe kyatumikisa ujitu kwa Phawulu mu kaleya, mwene wambele kwila, o ujitu yú wexile “sata inuha kyambote ya wabhela Nzambi.” (Fil. 4:18) Xinganeka kujiphange mukilunga kyé, anga udibhwidisa: ‘O kwila sayi muthu ungitena kukwatekesa?’ Jihova usanguluka kyoso kyamona kwila, twamubhakula o kithangana, o nguzu yetu, o mauhete ni kitadi kyetu phala kukwatekesa woso wabhindama. Mwene umona kwila, o ima yiyi ibhanga mbandu ku ubhezelu wetu.—Tiya. 1:27.

15. O ubhezelu wakidi ubhinga kithangana ni nguzu; maji mukonda dyahi kikimbamba kyaneme?

¹⁵ O ubhezelu wakidi ubhinga kithangana ni nguzu. Maji kikimbamba kyaneme, kana. (Nzw. 5:3) Mukonda dyahi? Mukonda o henda yetu kwa Jihova yene itubhangesa kumubheza. Xinganeka mon’andenge wamesena kubhana kima kwa tat’ê. Mwene nange ubhita ola javulu mukubhanga fikula phala tat’ê. O mona kadyela mukonda dya kithangana kyabhiti mukubhanga o fikula. Mwene wazolo tat’ê, usanguluka mukumubhana o ujitu yú. Kyene kimoxi we, mukonda dya henda yetu kwa Jihova, twasanguluka mukungastala o kithangana ni nguzu yetu phala kumubheza.

16. Kala kilondekesa Jihebelewu 6:10, kyebhi Jihova kyamona o nguzu itubhanga phala kumusangulukisa?

¹⁶ O jitata ja henda kakingila kutambula ujitu wasokela ku ana oso. Ene ejiya kwila o ana kasokela mu uhete wakubhanga o ima. Kyene kimoxi we, Tata yetu yadyulu utendela ihi itena kubhanga kala muthu mudyetu. Nange eye utena kubhanga dingi o athu amukwa uwejiya, uwazolo ndenge. Mba nange eye kutena kubhanga dingi kala kyene mubhanga akwenu, nange mukonda dya kitala, uhaxi mba o kikalakalu kyakulanga o ibhindamu yamwiji. Kana kuluwala. (Nga. 6:4) Jihova kandajimba o kikalakalu kyé. Se ubhanga yoso i utena ni muxima woso, mwene wandasanguluka. (Tanga  Jihebelewu 6:10.) Jihova wejiya katé mwene o ima iwamesena kubhanga. Mwene wamesena kwila usanguluka ni yoso i utena kubhanga phala kumubheza.

17. (a) Se sayi ima itwadilongo mumilongi yiyi yamutubhoza ku ikumbidila, Ihi itutena kubhanga? (b) O jipondo jitwadilongo mu kaxa “ Bandekesa o Kusanguluka Kwé” ja kukwatekesa kyebhi?

¹⁷ Ihi itutena kubhanga se sayi ima itwadilongo mumilongi yiyi yamutubhoza ku ikumbidila, kala o kudilonga ubheka mba ukunji? Kubhanga o ima yiyi muveji javulu, kutena kutusangulukisa dingi, twandakatula we mbote mukubhanga kiki. Tutena kusokesa o ubhezelu wetu ni ikalakalu yamukwa, kala o kutungutisa o mukutu mba kuxika mwimbu. Se tubhanga kiki mu ithangana yofele kitwandakatula mbote. Maji ihi yejibhita se tusola kubhanga kiki izuwa yoso? Etu tutena kumateka bhofelebhofele ni kubandekesa o ithangana kamwanyukamwanyu. O kumona o mbote ijila mu nguzu itwamubhanga, kwandatubhangesa kusanguluka dingi. Kiki kyene kibhita we mu ubhezelu wetu.

18. Kyebhi o kima kyabetakota ki twatokala o kubhanga, ni ihi yandabhita se tukibhanga?

¹⁸ Kubhanga yoso itutena phala kubheza Jihova, kyene o kima kyabetakota ki tutena o kubhanga. Se kyene kitubhanga, twandasanguluka kyavulu kumwenyu, twandakala ni kidyelelu kya kubheza Jihova kate kuhádya ni hádya. (Jisa. 10:22) Etu twala kya ni kutululuka kwa muxima mukonda twejiya kuma Jihova ukwatekesa o abhezyê kyoso kyadihbana ni maka. (Iza. 41:9, 10) Sé phata, twala ni ima yavulu itusangulukisa mukubheza o Tata yetu ya henda, yó wafwama “kutambula o fuma, o kijingu” mukonda dya ima yoso yabhange!—Dij. 4:11.