1-2. Йаһоԝа чь щурʹә һʹәбандьн ԛәбул дькә?

 ГАВА кӧ тӧ хәбәра «һʹәбандьн» дьбьһейи, чь те бәр чʹәʹве тә? Дьбәкә тӧ дьди бәр чʹәʹве хԝә, кӧ бьраки мьлук кʹәтийә сәр чока у дӧада дьле хԝә Хԝәдерʹа вәдькә. Йан жи, дьбәкә малбәтәкә бәхтәԝар те бәр чʹәʹве тә, кʹижан кӧ Кʹьтеба Пироз тʹәвайи леколин дькьн.

² Әв һәрдӧ мәсәлә жи щурʹе һʹәбандьне дьдьнә кʹьфше. Гәло Йаһоԝа ԝе һʹәбандьна ԝан ԛәбул кә? Һәгәр һʹәбандьна ԝан ль гора ԛьрара ԝи бә у бь һʹьзкьрьн у ԛәдьр бә, әԝе жь һʹәбандьна ԝан рʹази бә. Әм Йаһоԝа гәләк һʹьз дькьн. Әм заньн ԝәки тʹәне Әԝ һежа йә кӧ әм ԝи бьһʹәбиньн, ләма жи әм дьхԝазьн бь щурʹе һәри баш ԝи бьһʹәбиньн.

3. Ве готареда, әме дәрһәԛа чь шеԝьр кьн?

³ Ве готареда, әме бьвиньн кӧ ԝәʹде бәре Йаһоԝа чь щурʹә һʹәбандьн ԛәбул дькьр, у әме дина хԝә бьдьн һʹәйшт пʹаред һʹәбандьна мә. Ԝәʹде шеԝьркьрьне, ԝәрә әм бьфькьрьн кӧ әм ча дькарьн һʹәбандьна хԝә дьһа баш кьн. Ӧса жи әме бьвиньн, кӧ һʹәбандьна рʹаст чьрʹа мә бәхтәԝар дькә.

4. Ԝәʹде бәре, хьзмәткʹаред Йаһоԝа ча нишан дькьрьн, кӧ әԝана ԝи һʹьз дькьн у ԛәдре ԝи дьгьрьн?

⁴ Ԝәʹде бәре, кәсед амьн мина Һабил, Нӧһ, Бьраһим у Ибо, бь гӧһдарибуна хԝә у ӧса жи бь баԝәри у ԛӧрбанед  хԝә, нишан дькьрьн ԝәки әԝана Йаһоԝа һʹьз дькьн у ԛәдре ԝи дьгьрьн. Кʹьтеба Пироз мәрʹа һур бь һур набежә, кӧ гәрәке ԝана чаԝа Хԝәде бьһʹәбанда. Ле әшкәрә йә, кӧ әԝ кәсед амьн чь жь дәсте ԝан дьһат дькьрьн, ԝәки рʹумәте бьдьнә Йаһоԝа, у Йаһоԝа һʹәбандьна ԝан ԛәбул дькьр. Паше, Йаһоԝа Ԛануна Муса да зӧрʹәта Бьраһим. Ван ԛанунада һур бь һур рʹебәри һатьбун дайине, кӧ гәрәке ԝана ча Йаһоԝа бьһʹәбанда.

5. Паши мьрьн у рʹабуна Иса, һʹәбандьна рʹастда чь һатә гӧһастьне?

⁵ Паши мьрьн у рʹабуна Иса, Йаһоԝа ида дәʹԝа нәдькьр, ԝәки ль гора Ԛануна Муса Ԝи бьһʹәбиньн (Рʹомайи 10:4). Шагьртед Иса ида гәрәке ль гора ԛануна тʹәзә бьжитана, демәк ль гора «ԛануна Мәсиһ» (Галати 6:2). Сәва кӧ гӧһ бьдьн ве «ԛануне», нә лазьм бу кӧ ԝана бь сәда тʹәми у ԛәйдә әзбәри бькьн. Ԝана гәрәке чʹәʹв бьда Иса у ль гора һинкьрьнед ԝи бьжитана. Иро, әм жи чь жь дәсте мә те дькьн, кӧ пәй Иса һәрʹьн ԝәки Йаһоԝа жь мә рʹази бә у әм бькарьбьн «рʹьһʹәтийе бьбиньн» (Мәтта 11:29).

6. Әм ча дькарьн жь ве готаре кʹаре бьстиньн?

⁶ Чахе әме дина хԝә бьдьн һьнә пʹаред һʹәбандьна хԝә, ԝе баш бә кӧ әм жь хԝә бьпьрсьн: «Әз ча ве йәкеда пешда чумә? Гәло әз дькарьм хьзмәтийа хԝә дьһа баш кьм?» Һәгәр әм ве йәкеда ида пешда чунә, баш ә. Ле диса жи әм гәрәке жь Йаһоԝа аликʹарийе бьхԝазьн, ԝәки тедәрхьн кӧ гәрәке әм кʹижан алийава дьһа зедә пешда һәрʹьн.

7. Йаһоԝа сәр дӧайед мәйи жь дьл ча дьньһерʹә?

⁷ Дӧа пʹарәкә һʹәбандьна мә йә. Ньвисаред Пироз дӧайед мә бәрамбәри бьхуре дькә, кʹижан кӧ бь мәхсуси дьһатә һазьркьрьне, у пешийе коне пирозда, паше жи пʹарьстгәһеда дьһатә шәԝьтандьне (Зәбур 141:2). Әв бина бьхуре Хԝәде хԝәш дьһат. Мина ве йәке, «дӧайе рʹаста ль бәр дьле Ԝида ширьн ә» (Мәтʹәлок 15:8; Ԛануна Дӧщари 33:10). Сәва кӧ Йаһоԝа жь дӧайед мә рʹази бә, нә лазьм ә кӧ әм гьлийед мәхсус бьдьнә хәбате. Әм дькарьн баԝәр бьн, кӧ гава әм һʹьзкьрьн у рʹазибуна хԝә жь дьл дьдьнә кʹьфше, Йаһоԝа гәләк ша дьбә. Әԝ дьхԝазә ԝәки әм ԝирʹа бәʹса хәм, һеви у хԝәстьнед хԝә бькьн. Пешийа кӧ әм дӧа бькьн, ԝе баш бә әм рʹьнд бьфькьрьн кӧ әме чь бежьн. Бь ви щурʹәйи, әме бькарьбьн «бьхура» һәри хԝәш пʹешкʹеши Баве хԝәйи әʹзмана кьн.

8. Чь мәщаләкә баш һәйә кӧ әм пәсне Хԝәде бьдьн?

⁸ Пәсьндайина Йаһоԝа пʹарәкә һʹәбандьна мә йә (Зәбур 34:1). Гәләк мәʹни һәнә кӧ әм бь рʹазибуне бәʹса һʹӧнӧр у кʹаред Йаһоԝа бькьн у бь ви щурʹәйи пәсне ԝи бьдьн. Һәгәр әм дәрһәԛа ԛәнщийа Йаһоԝа, демәк дәрһәԛа һʹәму тьштед кӧ әԝи бона мә кьрийә, кʹур бьфькьрьн, әме һәр гав бьхԝазьн пәсне ԝи бьдьн. Шьхӧле бәлакьрьна мьзгине мәщаләкә баш дьдә мә, ԝәки әм «ԛӧрбана пәсьндайине бьдьнә Хԝәде, аԝа готи бәре зар-зьмане хԝә» (Ибрани 13:15). Әм гәрәке рʹьнд бьфькьрьн кӧ әме дӧайед хԝәда чь бежьн, ӧса жи әм гәрәке рʹьнд бьфькьрьн кӧ әме хьзмәтеда мәрьварʹа чь бежьн. Әм дьхԝазьн кӧ «ԛӧрбана пәсьндайине», йа кӧ әм пʹешкʹеши Йаһоԝа дькьн, йа һәри баш бә. Ләма жи әм бь дьл у щан мәрьварʹа рʹастийе гьли дькьн.

9. Мина хьзмәткʹаред Хԝәде йед бәре, әм жь щьвина чь кʹаре дьстиньн? Мәсәла хԝә гьли кә.

⁹ Щьватед мә пʹарәкә һʹәбандьна мә  йә. Ԝәʹде бәре Исраелийарʹа һатьбу готьне: «Сале се щара бьра һʹәму ԛьсьме тәйи нерин ль бәр Хӧдан Хԝәдейе тә ль ԝи щийе кӧ Хӧдане бьбьжерә, бьсәкьньн» (Ԛануна Дӧщари 16:16). Гава әԝана дьчунә щийе щьвине, гәло лазьм бу кӧ әԝана бона мал у мьлкʹ у зәвийед хԝә, бьтьрсийана? На! Йаһоԝа соз дабу ԝан: «Ԝәʹде кӧ тӧ сале се щара ль бәр Хӧдан Хԝәдейе хԝә бьсәкьни, тʹӧ кәсе чʹәʹв нәвежә ԝәлате тә» (Дәркʹәтьн 34:24). Кәсе кӧ Йаһоԝа һʹьз дькьр баԝәрийа хԝә ԝи дьани, у бәрдәԝам дькьр дьчу щәжьнед һәрсали. Әв йәк кʹарәкә гәләк мәзьн дьда ԝан. Бь сайа ван щәжьна, ԝана дькарьбу Ԛануна Хԝәде дьһа баш фәʹм кьрана, дәрһәԛа ԛәнщийа ԝи кʹур бьфькьрийана у жь һәвалтийа тʹәви хьзмәткʹаред Йаһоԝа шабун бьстандана (Ԛануна Дӧщари 16:15). Чахе мәрʹа чәтьн ә ле әм диса жи чь дәсте мә те дькьн, ԝәки щьвата бәрʹнәдьн, әм жи кʹарәкә мәзьн дьстиньн. Дә бьдьнә һʹәсабе хԝә, гава әм хԝә һазьр дькьн ԝәки щабед кьн у хԝәш бьдьн, Йаһоԝа чьԛас ша дьбә!

10. Чьрʹа һʹәбандьна мәда кʹьламед мә пʹарәкә фәрз ә?

¹⁰ Кʹьламед мә пʹарәкә һʹәбандьна мә йә (Зәбур 28:7). Исраелийа һʹәбандьнеда кʹьлам ча пʹарәкә фәрз һʹәсаб дькьрьн. Даԝьд Пʹадша 288 меред жь бәрәка Леԝи, ча стьранбежед пʹарьстгәһе кʹьфш кьрьбу (1 Дирок 25:1, 6-8). Әм жи дькарьн бь сайа кʹьламед пәсьндайине нишан кьн, ԝәки әм Хԝәде һʹьз дькьн. Бона ве йәке, әʹсәйи нинә кӧ әм хԝәйе дәнге хԝәш у зиз бьн. Соз мәсәлә, гава әм хәбәр дьдьн, «әм һʹәму жи гәләки шашийа дькьн», ле диса жи, әм щьватада у хьзмәтеда аза хәбәр дьдьн (Аԛуб 3:2). Ләма жи, гәрәке әм нәфькьрьн кӧ һәгәр дәнге мә һаԛас хԝәш нинә, әм нькарьн бь кʹьлама пәсьне Йаһоԝа бьдьн.

11. Ль гора Ԛануна Дӧщари 6:6, 7, фәрз ә кӧ әм чь бькьн?

¹¹ Чахе әм Кʹьтеба Пироз леколин дькьн у зарʹед хԝә дәрһәԛа Йаһоԝа һин дькьн, әв жи пʹарәкә һʹәбандьна мә йә. Рʹожа Шәмийе Исраелийа тʹӧ шьхӧл нә дькьрьн, ле ԝәʹде хԝә бона Йаһоԝа хәрщ дькьрьн (Дәркʹәтьн 31:16, 17). Ӧса жи, кәсед баԝәрмәнд зарʹед хԝәрʹа бәʹса Йаһоԝа у ԛәнщийа ԝи дькьрьн. Гәрәке әм жи бона хԝәндьн у леколина Хәбәра Хԝәде ԝәʹдә вәԛәтиньн. Әв йәк пʹарәкә һʹәбандьна мә йә у али мә дькә кӧ әм дьһа незики Йаһоԝа бьн (Зәбур 73:28). Чахе әм Кʹьтеба Пироз тʹәви малбәта хԝә леколин дькьн, әм али зарʹед хԝә дькьн кӧ әԝана жи бьбьн достед Баве мәйи әʹзмана (Ԛануна Дӧщари 6:6, 7 бьхунә)

12. Әм жь ве йәке чь һин дьбьн, кӧ Йаһоԝа ча сәр шьхӧле чекьрьн у хԝәйкьрьна коне пироз дьньһерʹи?

¹² Авакьрьн у хԝәйкьрьна авайед бона һʹәбандьне жи пʹарәкә һʹәбандьна мә йә. Кʹьтеба Пирозда те готьне, ԝәки шьхӧле чекьрьн у хԝәйкьрьна коне пироз, ча хәбата пироз дьһатә һʹәсабе (Дәркʹәтьн 36:1, 4). Иро жи Йаһоԝа шьхӧле авакьрьна Одед щьвата у авайед тʹәшкиләте, ча шьхӧле пироз һʹәсаб дькә. Әм ԝан хушк-бьред кӧ сәр ве шьхӧле фәрз дьхәбьтьн, гәләк ԛимәт дькьн. Ӧса жи, әԝана шьхӧле бәлакьрьна мьзгине жи тиньн сери. Һьнә жь ԝан дьхԝазьн ча пешәнг хьзмәт кьн. Һәгәр әԝана рʹӧһʹанида гьһишти нә, ԝе баш бә кӧ рʹуспи ԝана кʹьфш кьн. Һьлбәт һәр кәс нькарә шьхӧле авакьрьнеда  кʹар бькә, ле әм гьшк жи дькарьн шьхӧле тʹәмьзкьрьн у хԝәйкьрьна ван авайада аликʹарийе бьдьн.

13. Гәрәке әм сәр ԛӧрбанкьрьнед бона шьхӧле Пʹадшатийе, чаԝа бьньһерʹьн?

¹³ Ԛӧрбанкьрьнед бона шьхӧле Пʹадшатийе жи пʹарәкә һʹәбандьна мә йә. Исраелийарʹа һатьбу готьне ԝәки «дәст вала ль бәр Хӧдан нәсәкьньн» (Ԛануна Дӧщари 16:16). Ԝана дькарьбу һаԛас бьанийана, чьԛас кӧ дәсте ԝанда һәбу. Бь ве йәке ԝана дькарьбу рʹазибуна хԝә бьдана кʹьфше, бона һәр тьште кӧ Йаһоԝа сәва ԝан кьрьбу. Гәло әм чаԝа дькарьн нишан кьн, ԝәки әм Йаһоԝа һʹьз дькьн у кʹәрәмед кӧ әм жь ԝи дьстиньн, гәләк ԛимәт дькьн? Ԝе баш бә кӧ әм чьԛас жь дәсте мә те пе ԛӧрбанед хԝә пьштгьрийа щьвата хԝә у шьхӧле һʹәмдьнйайе бькьн. Паԝлосе шанди ӧса готьбу: «Һәгәр һун бь рʹәзәдьли кʹомәке бьдьн, әԝ ԝәкә ԝе йәке ԛәбул ә, чьԛас дәсте кʹева те, ле нә ԝәкә ԝе йәке, кӧ дестда тʹӧнә» (2 Корьнтʹи 8:4, 12). Бона Йаһоԝа, тьште һәри фәрз нә әв ә кӧ әме чьԛас бьдьн, ле әв ә кӧ әм жь дьл ве йәке бькьн (Марԛос 12:42-44; 2 Корьнтʹи 9:7).

14. Ль гора Мәтʹәлок 19:17, гава әм али хушк-бьред дәсттәнг дькьн, Йаһоԝа ча сәр ве йәке дьньһерʹә?

¹⁴ Чахе әм али хушк-бьред һʹәԝщәдар дькьн, әв жи пʹарәкә һʹәбандьна мә йә. Йаһоԝа соз дабу ԝәки ԝе ван мәрьва хәлат бькә, йед кӧ бь мәрʹдани аликʹарийе дьдьнә бәләнгаза (Ԛануна Дӧщари 15:7, 10). Һәр щар чахе әм кʹомәке дьдьнә хушк йан бьраки һʹәԝщәдар, Йаһоԝа һʹәсаб дькә кӧ әм пʹешкʹеш дьдьнә Ԝи (Мәтʹәлок 19:17 бьхунә). Мәсәлә, гава хушк-бьред жь Филипйайе Паԝлосрʹа пʹешкʹешәк шандьн, йе кӧ ль ԝе дәме гьрти бу, әԝи әв пʹешкʹеш ча «һʹәдийа ԛәбул у ль Хԝәде хԝәш» нав кьр (Филипи 4:18). Дәрһәԛа щьвата хԝә бьфькьрә у жь хԝә бьпьрсә: «Һәла хушк йан бьраки ӧса һәйә кӧ һʹәԝще аликʹарийе йә у әз ча дькарьм али ԝи бькьм?» Чахе Йаһоԝа дьвинә кӧ әм ԝәхт, ԛәԝат, фәрәсәт у һәбуна хԝә дьдьнә хәбате сәва кӧ пьштгьрийа кәсед һʹәԝщәдар бькьн, Әԝ жь мә рʹази дьбә. Әԝ ве йәке ча пʹарәкә һʹәбандьна мә һʹәсаб дькә (Аԛуб 1:27).

15. Рʹаст ә әм бона һʹәбандьна рʹаст ԝәхт у ԛәԝате хәрщ дькьн, ле әв йәк чьрʹа бона мә баргьрани нинә?

¹⁵ Сәва һʹәбандьна рʹаст ԝәʹдә у ԛәԝат лазьм ә. Ле диса жи әв бона мә баргьрани нинә (1 Йуһʹәнна 5:3). Гәло чьрʹа? Чьмки әм Йаһоԝа һʹьз дькьн. Зарʹәки бьдә бәр чʹәʹве хԝә, йе кӧ дьхԝазә пʹешкʹешәке бьдә баве хԝә. Дьԛәԝьмә әԝ бь сьһʹәта ԝәʹде хԝә хәрщ дькә, сәва кӧ тьштәки бона ԝи нәԛьш кә. Зарʹ әʹщьз набә ԝәки әԝ һаԛас ԝәʹдә сәр ве йәке хәрщ дькә, чьмки әԝ баве хԝә һʹьз дькә у жь дьл дьхԝазә ве пʹешкʹеше бьдә ԝи. Мина ве йәке, әм жи Йаһоԝа һʹьз дькьн у жь дьл дьхԝазьн ԝәхт у ԛәԝата хԝә бона һʹәбандьна рʹаст бьдьнә хәбате.

16. Ль гора Ибрани 6:10, Йаһоԝа сәр хирәта мә ча дьньһерʹә?

¹⁶ Де-бав заньн кӧ һәр зарʹекә ԝан ԝе пʹешкʹешед мина һәв нәдьнә ԝан. Мина ве йәке, Баве мәйи әʹзмана фәʹм дькә, кӧ дәрәщед мә һәр кәси жь һәв щӧдә нә. Дьбәкә һʹале тә ӧса йә, ԝәки тӧ дькари жь кәсед дьн зедәтьр бона Йаһоԝа бьки. Йан жи, дьбәкә тӧ ида әʹмьрда мәзьн и, сьһʹәт-ԛәԝата тә тʹӧнә йан жи щабдарийед тәйә малбәтеда гьран ьн у тӧ нькари  һаԛас бьки, чьԛас кәсед дьн дькьн. Хәмгин нәбә! (Галати 6:4). Йаһоԝа ԝе шьхӧл у щәфе тә тʹӧ щар бир нәкә. Һәгәр тӧ чь жь дәсте тә те бьки у ве йәке бь нета рʹаст бьки, әԝе жь тә рʹази бә (Ибрани 6:10 бьхунә). Йаһоԝа нета дьле тә дьвинә. Әԝ дьхԝазә ԝәки тӧ жь ве йәке шабуне бьстини, чь кӧ ԛәԝата тә дьгьһиже бона ԝи бьки.

17. (а) Һәгәр мәрʹа чәтьн ә һьнә пʹаред һʹәбандьна хԝә биньн сери, әм гәрәке чь бькьн? (б) Жь чаргоша « Шабуна Хԝә Зедә Бькә» тә жь кʹижан пʹара һʹәбандьна мә кʹар стандийә?

¹⁷ Һәгәр мәрʹа чәтьн ә һьнә тьшта бькьн, чь кӧ дькʹәвә нава һʹәбандьна мә, мәсәлә, леколина шәхси йан хьзмәти, әм дькарьн чь бькьн? Бь рʹасти, чьԛас һе зедә әм ван тьшта бькьн, һаԛас һе зедә әме кʹаре у шабуне бьстиньн. Һʹәбандьна хԝә әм дькарьн бәрамбәри һащәтәкә мусике кьн. Һәгәр әм тʹәне щар-щара ве һащәте бьдьнә хәбате, әме нькарьбьн ве йәкеда пешда һәрʹьн. Ле һәгәр әм һәр рʹож ве һащәте бьдьнә хәбате у һе зедә ԝәʹде хԝә сәр хәрщ кьн, әме пешда һәрʹьн у һе зедә шабуне бьстиньн. Ве йәке әм дькарьн дәрһәԛа һʹәбандьна хԝә жи бежьн.

18. Жийина мәда тьште һәри фәрз чь йә у һәгәр әм ве йәке бькьн, әме чь кʹаре бьстиньн?

¹⁸ Жийина мәда тьште һәри фәрз әв ә, кӧ әм бь дьл у щан Йаһоԝа бьһʹәбиньн. Әԝ йәк мә бәхтәԝар дькә у һевийе дьдә мә, ԝәки һʹәта-һʹәтайе Йаһоԝарʹа хьзмәт бькьн (Мәтʹәлок 10:22). Дьле мә рʹьһʹәт ә, чьмки әм заньн кӧ һәгәр әм рʹасти тәнгасийа бен, Йаһоԝа ԝе али мә бькә (Ишайа 41:9, 10). Гәләк мәʹни һәнә кӧ әм бь шабуне Баве хԝәйи әʹзмана бьһʹәбиньн. Бәле, әԝ бь рʹасти һежа йә «кӧ рʹумәт, һӧрмәте у ԛәԝате» бьстинә (Әʹйанти 4:11).