1-2. I biny bidy mwa kulong bwa Mawej iitab kuhambidil kwiitut?

 I BINY biwulaalang hawumvumvw mwaak oow “kuhambidil”? Misang yikwaabw ulaalangil ha mwiin-kweet utwaat bin ku bulal bwindiy bwa kusambil ni wambil Yehow myand yidy yimutond kuuhal kwa kulaaley. Eecy misang yikwaabw ulaalangil ha cisak cidy ni musangal cidy citwaal mu kulong kwa Bibl.

² Mu myand yibidy eey, baat badyobw baleej aab, baleeleej bilong bya mu kuhambidil. Yehow wiiyiiy kwiitabok kuhambidil kwaabab ook eeny? Wiiyiiy kwiitab teng hiikalobw balong myand yumvumvwangan ni kiihicil kindiy, ni biiyilong ni lukat ni kaneemw. Tudy bakat Yehow bikasakan. Tudy bamanyik neey: i muwaakan kumuhambidil, ni tudy bakat kumuhambidil mu mushind mulengel udyey mukat.

3. I biny bitwiiyiiy kutal mu ciin bwaal eecy?

³ Mu ciin bwaal eecy, twiiyiiy kutal mushind a kuhambidil wiitabil Yehow mu biisang bya kal ni twiiyiiy kukontonon myand mwandamukul ya mu kuhambidil kudyey mukat leeloow. Tut balong nook, tudy mwa kulangil ha mushind utudy mwa kulengej mushind iitut a kuhambidil. Twiiyiiy kutal cikwaabw citudy mwa kulong bwa kuhambidil kwa biin-biin kwiituhetesh musangal.

4. I mushind kaay waakady bahambidil ba Yehow ba kuuhal kwa kwiiy kwa Yeez ha bulab, baleej mwaakadyobw bamukat ni bamuneek?

⁴ Baat ba lulamat ba kuuhal kwa biisang bya biin Krist, bu mudy: Abel, Noweh, Abraham, ni Yoobw; baakady bakat Yehow ni bamuneemek. Mushind kaay? Baakady bamukooyel, biitabij myand yindiy, ni bamukadil mudimw. Bibl kiinoh bend wiitwambil myand yoos ya mushind waakadyobw mwa kumuhambidil. Ki baakady  biin-biin biikashishomw bwa kuh Yehow lutumb, ni waakady mwanyish kuhambidil kwaababw. Yehow waakishil cikwaabw twiikululwiil twa Abraham May mindiy maheley Moyiiz. Mu May aam mwaakady may ma kulond ma habwaah habitaatal mushind a kuhambidil Yehow udyey mukat.

5. Haanyim ha lufw lwa Yeez ni kusanguk kwindiy, i mushind kaay waakady Yehow ukaam bwa biyiij bindiy bamuhambidil?

⁵ Kuunyim kwa lufw lwa Yeez ni kusanguk kwindiy, Yehow kaakadyoh bend ukaam bwa baat bamuhambidil bilondeshel may maheeley biin Izaleel ku dyambulwiish dya Moyiz. (Rom 10:4) Biin Krist baakady mwa kulond mukenj muhyaamuhy “diiy dya Krist.” (Kal. 6:2) Baakady mwa kukooyel “diiy” eedy, ha kulek kwiidikwaat bituh ku micim ni hakulond mulong a mikenj-kenj, ki i kulond cileejel cya Yeez ni malongweesh mindiy. Leeloow, biin Krist byaab, biikaakashishomw bwa kulond Krist ni kusangeej Yehow, nook ‘micim yaababw yiikaakal yibatam mund.’​—Mat. 11:29.

6. I mushind kaay udy ciin bwaal eecy mwa kukwambulwiish?

⁶ Bu mutukookontonon mishind ya kuhambidil kwiitut, anj iyihangujok neey: ‘I myand kaay yinady mulong yileeleej neey: nady muy kuuhal mu myand ya mu kuhambidil?’ Udy mwa kwiiyihanguj cikwaabw neey: ‘Nady mwa kulengejok mushind a mim wa kuhambidil Mawej eeny?’ Bikaam wiikal ni musangal bwa myand yilengel yiwudy mulong, ki biikaam ulomb cikwaabw Yehow bwa akwambulwiish bwiibuh kutal myand yiwudy mwa kulengej.

7. I mushind kaay udy Yehow utal masambil matuloolong ni mucim woos?

⁷ Tuhahambidil Yehow hatumusaasambil. Mu Diiy dya Mawej Bafwaafwanyikij masambil miitut ni museng a manansh mulongolol bilengel mu mutand a kusambakeen ni waakadyobw ki balambul mu Nzubw a Mawej hahicil mafuk. (Mis. 141:2) Museng a manansh oow waakady ni diihembw dyaakady disangeej Mawej. Bya mushind aakaabumw, Yehow i “mukat” masambil miitut matuloolong ni mucim woos, ning tut bakal mudimw ni myaak yiheehel menmen. (Tus. 15:8; Mmu. 33:10) Tudy ni kabingil kalengel ka kwiitab neey: Yehow udy ni musangal bwa kukun mat ku myand yitudy bakat kumwambil ni bwa kumufwiijok. I mukat bwa tumwambil myand yitudy naay ku micim, myand yitudy batakamin bwa yikumban, ni myand yitudy bakat bwa kulong. Kuuhal kwa kusambil Yehow, i bya meej bwiibuh kulangil ha biwukaakaam kuleeb. Uw mulong nook, wiiyiiy kulambul Taat iibuh a mu diiwul “museng a manansh” mulengel weeh.

8. I mu biisang kaay bilengel biitwaakaakish Mawej lutumb?

⁸ Tuhahambidil Yehow hatumumumbil misambw ya kumuh naay lutumb. (Mis. 34:1, NWT) Tutuutumbish Yehow hatwambambil bakwaabw mutudy bakat biikadil bindiy bilengel ni midimw yindiy. Twiiyiiy kutumbish cikwaabw Yehow hatuleeleej dyanyish hakwambil baat bakwaabw myand yivul yimutaatal. Hatwangangat diib dya kulangil ha bulengel bwa Yehow​—ha myand yoos yidyey mwiitulongel​—twiiyiiy kwiikal ni tubingil tuvul twa ku muh naat lutumb. Diib ditudy mu mudimw a kudiil baat musah i ciisang cilengel cya ‘kulambul teng kulambul Mawej mulambw a lutumb, i bwiin kuleeb ney tumwaamwaakish lutumb buyiil hatuteeteel diijin dindiy.’ (Ebr. 13:15) Teng mudyeby bilengel bwa kwiikal ni meej ma kulangil ha bitukaakaam kuleeb kuuhal kwa kusambil Yehow, tuloolong bilengel hatulaalangil ni meej ha bitwiikal mwa kuleeb kudy baat batwiikal mwa kutwiilangan naabw mu mudimw iitut a bukajaady. Tudy bakat kulong bwaal bulengel bweeh bwa ‘kulambul teng kulambul Mawej mulambw a lutumb.’ Ki bwabingany tudy ni musangal hatudiidil baat bakwaabw musah.

9. Teng bu biin Izaleel ba kal, i myand kaay yilengel yituhehet hatwiikokongakeen haakaabumw? Twaal cileejel bwa mudy bisangil bikwambulwiish.

 ⁹ Tuhaahambidil Yehow hatutweetweel mu bisangil. Bambiil biin Izaleel ba kal neey: “Ku muvw woos, baat boos ba mukacy mwiinun biikaakal bakiileej bikuuk bisat kuuhal kwa Mawej [Yehow] Mawej iinun ha cyaab ciikaley munoonoh.” (Mmu. 16:16) Baakady mwa kushiy mazubw maabab madimy maabab kakuy muut waakady mwa kwiibalamineby. Ki Yehow wiibalayil neey: ‘Kakwiish muut ning waakaabumw udy mwa kuteet bwa kwiinunyeng cibunj ciinun hawiiyiiy kwiileej kuuhal kwa Mawej [Yehow], Mawej iinun.’ (Cim. 34:24) Bumwaakady biin Izaleel ni diitabij divul kudy Yehow, baakady batweel mu musangal a ku muvw woos i bwiin kuleeb neey: mu fet ya ku muvw woos yaakadyobw balong. Baakady mwa kwaanun nook biit bivul byaakady Mawej mwa kwiibakish; bamanyikil myand yivul habitaatal Mukenj utwaadil Mawej, balangiil ha bulengel bwindiy, ni basangeel ha kwiikal mu cikong cya baat baakady bakat Yehow. (Mmu. 16:15) Tuheehet byeet bulang teng bu bab, hatwiikaakashishomw bwa kutweel mu bisangil bya biin Krist. Ni tulangil ha mushind udy Yehow mwa kwiikal ni musangal hatwiiloolongolol bwa kutwaal maabul mu may makeeh, ni mumvwiik.

10. Bwabiny kumb misambw i cituh citam cya mu kuhambidil kwiitut?

¹⁰ Tuhahambidil Yehow hatumumumbil misambw. (Mus. 28:7) Biin Izaleel baakady bangat kumb kwa misambw ni buseeb bu cituh citam cya l mu kuhambidil kwaabab. Mukaleng Davih uteekel biin Leevy 288 ku butamb bwa kwiikalobw bumb misambw mu Nzubw a Mawej. (1 Cif. 25:1, 6-8) Leeloow, tudy mwa kuleej mutudy bakat Mawej hatumbumb misamb ya kumutumbish naay. Kabiin bilomb bwa kwiikal teng ni diiy dilengel bwa kumutumbish. Tufwanyikijaay ket: hatwiisaasamb, “tut boos tuloolong teng bibiih mu myand yivul,” ki kabiish mwa kwiitukaakeesh bwa kwiisamb mu cisangil ni mu mudimw a bukajaady. (Jak 3:2) Bya mushind aakaabumw, kabiin bikaam tulek kumbil Yehow misambw ya ku muh naay lutumb hakulang neey: katwiin ni diiy dilengel dya kumumbil naady misambw.

11. Teng mudyeby bibileej mu Musambw 48:13, Bwabiny bikaam twiikal ni program a kulong Bibl ni biin mu cisak?

¹¹ Tuhahambidil Yehow hatuloolong Diiy dindiy ni hatuloolongweesh baan myand yindiy. Biin Izaleel kabaakady bakal mudimw diifuk dya Sabaat, ni dyaakady diifuk dyaakadyobw mwa kukashish bulund bwaabab ni Yehow. (Cim. 31:16, 17) Baat bakwaabw baakady ni lulamat baakady balongweesh baan baabab myand ya Yehow ni bulengel bwindiy. Leeloow, tut byeet, bikaam twiikal ni diib dya kubal ni kulong Diiy dya Mawej. Bwaal oobw, i cituh cya mu kuhambidil kwiitut kwa Yehow, ni kulong nook kwiitwambambulwiish bwa kufweej habwiih nend. (Mis. 73:28) Ni hatuloolong haakaabumw Diiy dya Mawej mu cisak, tudy mwa kwambulwiish biikul biinun baakiiy kwiikalok​—baan biitut​—bwa kukashishobw bulund bwaabab ni Taat iitut udy mu diiwul udy ni lukat.​—Bal Musambw 48:13, NWT.

12. I biny bitudy mwa kulongel ku mushind waakady Yehow utal mudimw a baat bamanyiin mutand a kusambakeen?

¹² Tuhahambidil Yehow hatukaakashish diitabij diitut ni hakulam cyaab citudy naacy mu kuhambidil. Bibl uleeleeb neey: mudimw a kwiibak mutand a kusambakeen ni biit byoos byaakadyobw bakal naaby mudimw mu kuhambidil byaakady “mudimw mujilang.” (Cim. 36:1, 4, NWT) Ni leeloow kabidy, midimw ya lwiibak lwa mazubw ma Bukaleng ni midimw yikwaabw yiloolongek mu bulongolody bwa Mawej i yijilang kuuhal kwa Yehow. Biin-kweet bakwaabw bahihitij diib divul ha kulong midimw eey. Bikaam twiikal twanyish bikasakan kwiitwaal kwaabab mu mudimw a Bukaleng. I bilengel, bwaal bitwaatwaal cikwaabw mu mudimw a kudil baat musah. Bakwaabw ba kudyobw i bakat kwiikal  baaseb’aa njil. Bakul mu cisumbw bady mwa kuleej mudyobw bat mudimw a lwiibak nyam ku mikon ha kwiitabil biin-kweet baan-balum ni baan-bakaj bakaakal mudimw bikasakan aab bwa kwiikalobw baaseb’aa njil hadyobw bakumbaj myand yilomb. Ning tut biikal bakumban bwa kambulwiish mu mudimw a lwiibak eecy katuy bakumban, tut boos tudy mwa kulam nzubw ya Bukaleng ni mankend ni twiiyilongolol.

13. Bya bukish bitutwaatwaal bwa kut mudimw a Bukaleng nyam ku mikon, bikaam twiibital bicy?

¹³ Tuhahambidil Yehow hatutwaat mudimw a Bukaleng nyam ku mikon ni bya bukish biitut. Biin Izaleel kabaakady mwa kuy mu Nzubw a Yehow byaal byuum. (Mmu. 16:16) Baakady mwa kwiiy ni biit byaakadyobw mwa kutwaal bilondeshel shikacil a muut woos. Mu mushind oow, baakady baleej mwaakadyobw ni dyanyish kudy Yehow bwa myand yoos yaakadyey wiibalongel. I mushind kaay utudy mwa kuleej neey tudy bakat Yehow ni twanyish byaakudy bya mu spirit bituheehet? Umw a ku mishind utudy mwa kulong i kutokoh midimw ya cisumbw ni yiloolongek ha bulab butuutul nyam ku mikon ha kutwaalok fwalang yiitut bilonshel shikacil utudy nend. Mupostol Pool uleejel neey: “Biikal baat ni mucim mutook a kwaakishangan biit, Mawej wiitaatabij byaakaakishanganobw, bwa utaatal bidy naaby muut, ha kulek ney bikiishey naaby.” (2 Kor. 8:4, 12) Yehow wangangat ni buseeb biit bitutwaatwaal ni mucim aakaabumw, ning biby biikal kabiy bivul.​—Mark 12:42-44; 2 Kor. 9:7.

14. Bilondeshel Tusumw 19:17, i mushind kaay udy Yehow utal biit bitwambambulwiish naaby biin-kweet bady naaby diikeng?

¹⁴ Tuhahambidil Yehow hatwambambulwiish biin Krist neet ni biit bidyobw naaby diikeng. Yehow ulayil bwa kwiiy kufiil biin Izaleel kis baakady bakiish balam-lam biit. (Mmu. 15:7, 10) Ing, ciisang cyoos citwambambulwiish mwiin-kweet ni biit bidyey naaby diikeng, Yehow utaatal bya bukish eeby bu mushind a ku muh lutumb. (Bal Tusumw 19:17.) Cileejel, haakady biin Krist ba mu cibunj cya Filipw batumin mupostol Pool waakady mu nzubw a lukan bya bukish byaabab, Pool wiibitadil bu “mulambw udy Mawej mukat ni umulengeleel.” (Fili. 4:18) Langok bwa baat ba mu cisumbw ciinun ni iyihanguj neey: ‘kudyok muut unady mwa kwambulwiish eeny?’ Yehow udy ni musangal hadyey wiitutal tukal mudimw ni diib diitut, diikand diitut, biheel biitut, ni biit bitudy naaby bwa kwambulwiish aab bady naaby diikeng. Utaatal kulong kwa myand eey bu cituh cya kuhambidil kwiitut.​—Jak 1:27.

15. Kuhambidil kwa biin-biin kwiituloolomb diib ni diikand diitut, bwabiny kabiishoh bend biitukasakeen?

¹⁵ Kuhambidil kwa biin-biin kwiituloolomb diib ni kwiikashishomw. Ki kakwiishoh bend kwiitukasakeen. (1 Jah 5:3) Bwabiny tuleeleeb nook? Bwaal tuhaahambidil Yehow bwa lukat lutudy naalw bwindiy. Lang ket bwa mutofw ukaakaam kwaakish taat indiy ciit kahand. Udy mwa kuhitij diib divul bwa kumuzoleley cifwaatul cya kumwaakish. Mutofw kiishoh bend umvw bibiih bwa diib didyey muhitij ha kwiicizol. I mukat taat indiy, ni udy ni musangal bwa kumwaakishey cifwaatul eecy. Bya mushind aakaabumw, bu mutudy bakat Taat iitut Yehow, tudy ni musangal bwa kukal mudimw ni diib diitut ni diikand diitut bwa kumuhambidil.

16. Bilondeshel mukand a Biin Ebreh 6:10, i mushind kaay udy Yehow utal kwiikashishomw kwa muut woos wa kutudy bwa kumusangeej?

¹⁶ Balel bady ni lukat kabiin bakaamoh bend bwa baan baabab biibakish bya bukish bya mushind aakaabumw. I bamanyik neey: mwaan woos i mushilangan ni mukwaabw ni kabiin ni shikacil aakaabumw. Bya mushind aakaabumw, Taat iitut udy mu diiwul i mumanyik shikacil udy nend muut woos wa kutudy. Misang yikwaabw udy mwa kukal mudimw muvul ha kuhitok baat bavul bawudy mumanyik ni mukat. Eecy kwiin  mwa kulong myand yivul bu muloolong bakwaabw, misang yikwaabw i bwa bidimw biwukaady naaby, mabenj, majit mawudy naam mu cisak. Kukooyeloh bend mu mabok. (Kal. 6:4) Yehow kakuvulaminoh bend mudimw iibuh. Uw utwaal cidy cilengel bwiibuh ni kabingil kalengel, wiiyiiy kwiikal ni musangal. (Bal Biin Ebreh 6:10.) Yehow i mumanyik cikwaabw myand yiwukaakaam kumulongel yidy mu micim yiibuh. I mukat bwa wiikal ni musangal ni umvw bilengel bwa ciwudy mwa kulong bwa kumuhambidil.

17. a) Tut batal neey: mishind yikwaabw ya mu kuhambidil kwiitut i yitukasakeen, i biny bitudy mwa kulong? b) I dyambulwiish Kaay diwudy muhet mu kazubw ka neey: “ Muwudy mwa kuvudij Musangal Iibuh”?

¹⁷ I biny bitudy mwa kulong biby bitukasakeen bwa kulong myand yikwaabw ya mu kuhambidil kwiitut, bu mudy kulong Bibl eecy mudimw a bukajaady? Misang yikwaabw tut biitweej mu midimw eey, twiiyiiy kwiiyikat ni tuhetelok musangal. Tudy mwa kufwanyikij kuhambidil kwiitut ni mudimw kahand, bu mudy kulong kalasiis eecy kwiidibidij ni cyaamw cya kumb naacy misambw. Tut tulong teng ha musang, katwakumanyikoh bend bilengel. Teng tut bangat dihangadik dya kwiidibidij diifuk dyoos. Misang yikwaabw tudy mwa kutwaadij kwangatok minit yikeeh misang yoos yituloolong, ki kuunyim tudy mwa kutwaadij kulong diib divul bwa kwiidibidij. Tut tutal bihet bilengel bya mu kwiikashishomw kwiitut, misang yikwaabw twiiyiiy kwiikal ni musangal bwa kuteek biisang eeby ha cyaab cya kuuhal. Udy mutalok mutudy mwa kukooyel mushind oow mu kuhambidil kwiitut eeny?

18. I bwaal kaay bwa buseeb buvul butudy mwa kulong mu shikacil iitut, ni twiiyiiy kuhet biny tut balong nook?

¹⁸ Tukuukumbaj kiihacil kiitut katam ka kwiikal ni buumy ha bulab, hatuhahambidil Yehow ni mucim iitut woos. Tut balong nook, twiiyiiy kwiikal ni shikacil a musangal udy ni kiihacil ni tudy ni kutakamin kwa kuhambidil Yehow buyiil. (Tus. 10:22) Tudy ni ditalal dya mu micim bwaal tudy bamanyik neey: Yehow wambambulwiish bahambidil bindiy hadyobw bahet makab. (Ye. 41:9, 10) Tudy biin-biin ni tubingil tulengel bwa kwiikal ni musangal hatuhahambidil Taat iitut udy ni lukat, udy muwaakan bwiitut ‘kumuh lutumb ni kumukalakany’ bwaal i yiy ubaahangil biit byoos!​—Yis. 4:11.