1-2. Ni byahi ebikendi leka Nyamuhanga inialigha eriramya lyethu?

 NI KYAHI ekikasa omwa malengekania wukowa ekinywe “eriramya”? Obundi wukathera akasasani ka mulikyethu oyuwabiriyibombeka inianakukamire ahali engyingo yiwe iniane musaba erilhua okwa muthima. Kutse obundi wukalengekanaya okw’eka eyitsemire ibanemuyeghesya ndeke e Biblia.

² Omwa mibere yosi ibiri eyo, abosi bali okw’iramya. Mbwino Yehova anemwendi ligha eriramya lyabu? Iniakendi lighalyo lyamabya irinemukolhwa erikwamana n’ekighendererwa kiwe n’erihebwa omo lhwanzo n’erisikya. Thwanzire Yehova ya kutsibu. Thunasi ngoku yutholere eriramibwa, kandi thwanzire eriramya erya thukamuha iryabya eryuwene kutsibu.

3. Thukendi kania okuki omwa mwatsi ono?

³ Omo mwatsi ono, thukendi kania okw’iramya eryo Yehova aby’akaligha kera n’erilebya ebindu munani ebikaleka eriramya lyethu iryaliwa munabwire. Thukakolha ekyo, thwangana lengekania nga thwang’uwania thuthi emiramirye yethu. Kandi thukendi lebya esyonzumwa esikaleka eriramya ly’okwenene iryathulethera etseme.

4. Abaramya ba Yehova ababyaho Ekikristayo kithe kyatsuka, mubakangania bathi ku basikirye Yehova kandi ku bamwanzire?

⁴ Ekikristayo kithe kyatsuka, abalhume abathaleghulha nga Abeli, Noa, Abrahamu, na Yobu mubakangania ngoku basikirye Yehova kandi ku bamwanzire. Bathi? Erilhabira omwa bwowa bwabu, erikirirya, n’obuhere. E Biblia siyirithubwira  ebyosi ebyo babya batholere erikolha omw’iramya lyabu. Aliwe omo kwenene mubakolha ku bangathoka eriha Yehova y’olhukengerwa, nayu mwaligha eriramya lyabu. Enyuma waho, Yehova mwaha ab’olhubutho lhwa Abrahamu b’Emighambo ya Musa. Omwa Mighambo eyo mwabya obusondoli obulhangirikire obuhambire okwa mibere y’eriramiryamo Yehova omwa nzira eyo akaligha.

5. Yesu abere abiriholha n’erilhubuka, ni mbinduka yahi eyabya omw’iramya ly’okwenene?

⁵ Yesu abere abiriholha n’erilhubuka, Yehova mwabya isyakiyithagha abandu erighendera okwa Mighambo ya Musa. (Abar. 10:4) Abakristayo mubabya b’erighendera okwa bihano bihyaka, “emighambo ya Kristo.” (Gal. 6:2) Bangaghendere okwa “mighambo” eyi omw’igherererya eky’erileberyako kya Yesu n’erikwama esyongangirirya siwe, butsira erihambirayo omwa muthwe n’erikwama elisti y’ebilhaghiro binene. Namunabwire, Abakristayo bakakolha ngoku bangathoka erikwama Kristo nuku batsemesaye Yehova ‘n’eribana erilhuhuka omo mithima yabu.’​—Mt. 11:29.

6. Thukendi ghasirwa thuthi omo mwatsi ono?

⁶ Thukakania okwa buli kindu ekihambire okw’iramya lyethu, yibulhaye, ‘Ni kulha-kulhana lyahi eryo nabirikolha omw’eki?’ N’ekindi, ‘Mbwino nanganuwania emiramirye yaghe?’ Wutholere iwatsema busana n’erikulha-kulhana eryo wabirikolha, aliwe kandi wutholere iwasaba Yehova akuwathikaye eriminya aho wukayithagha eryuwania.

7. Yehova akalhangira athi emisabe yethu eyikalhua okwa muthima?

⁷ Thukaramaya Yehova thukamusaba. Amasako akalinganisaya emisabe yethu n’obukwa obwabya bukatheghekwa ndeke erihebwayo okwa hema y’erihindaniramu n’enyuma waho okwa hekalu. (Esy. 141:2) Obukwa obo ibukalhuamu akakumbo akuwene akakatsemesaya Nyamuhanga. Kuthya, emisabe yethu eyikalhua okwa muthima ni “butseme bwiwe,” nomuthwanga kolesya ebinywe ebyolhobire. (Emi. 15:8; Ebi. 33:10) Thuwithe nzumwa mbuya y’erikirirya ngoku kikatsemesaya Yehova akowa thukakangania ku thumwanzire kandi ku thukamusima. Anzire ithwamubwira ebitsibu byethu, ebilhubirirwa byethu, n’eriyisunza lyethu. Wuthewakania na Yehova omwa musabe, busana naki iwuthatsuka erilengekania ndeke okwa bya wukendi bugha? Omw’ikolha ekyo, iwukendiha Thatha wawu w’elhubulha ‘y’obukwa’ obuwene kutsibu.

8. Ni kaghisa kahi akuwene akathuwithe ak’eripipiramo Nyamuhanga?

⁸ Thukaramaya Yehova thukamupipa. (Esy. 34:1) Busana n’erisima, thukapipa Yehova omw’ikania okwa mibere yiwe mibuyanga n’emibiiri yiwe. Eripipa likalhua okwa muthima owatsemire. Omw’ihiraho obuthuku bw’erighanirya okwa bubuya bwa Yehova​—okwa byosi eby’abirithukolera—​isithwendi syabulha ebyanga leka ithwamupipa. Kutsibu-tsibu omubiiri wethu w’erithulira akathuha akaghisa akuwene ak’eriha “eripipa lyethu ng’obuhere oku Nyamuhanga.” (Ebr. 13:15) Ngoku thunatholere erilengekania ndeke okwa bya thukayabugha thuthe thwasaba Yehova, thukakolha ndeke thukatsuka erilengekania ndeke okwa bya thukendi bwira abathukeghaya omw’ithulira. Thwanzire “eripipa lyethu ng’obuhere” iryabya eryuwene kutsibu. Thukakanaya erilhua okwa muthima thukabwira abandi b’okwa kwenene.

9. Ng’Abaisraeli, thukaghasirawa thuthi thukahindana? Iha eky’erileberyako ekikuhambireko.

⁹ Thukaramaya Yehova thukahindana. Abaisraeli mubabwirwa bino: “Engendo isathu  oko mwaka, abalhume bawu bosi basyahulhuka embere sy’Omwami Mukulhu Nyamuhanga wenyu aho asyayisogha.” (Ebi. 16:16) Babya b’erisigha emiyi yabu n’ebirimwa byabu butsira mutheya. Aliwe Yehova mwabalhaghanisya athi: “Sihali oyowasyarumwa oko kihugho kyawu omughulhu wukahethuka erihulhuka embere sy’Omwami Mukulhu Nyamuhanga wenyu.” (Eri. 34:24) Busana n’erikirirya linene omu Yehova, Abaisraeli abakubaha Nyamuhanga abo ibakahindana okwa mikonga y’obuli mwaka. Neryo ibakabana mighisa mingyi; ibongera eriyitheghererya Emighambo ya Nyamuhanga, erighanirya okwa bubuya bwiwe, n’eritsemera eribya haghuma n’abaramya balikyabu. (Ebi. 16:15) Nethu thukabana emighisa ng’eyo thukayihayo erihindana okwa mihindano. Kandi lengekanaya ngoku Yehova akatsema thukasa okwa mihindano ithunatheghekire ebya thukendi subirya omwa bikuhi kandi ebikahimba.

10. Busana naki eriimba ni kitsweka kikulhu ky’okw’iramya lyethu?

¹⁰ Thukaramya Yehova thuk’imbira haghuma. (Esy. 28:7) Abaisraeli ibakalhangira eriimba ng’ekitsweka kikulhu ky’okw’iramya lyabu. Omwami Dawudi mwaha Abalawi 288 b’olhukwamirwa lhw’eribya bimbi okwa hekalu. (1 Emy. 25:1, 6-8) Munabwire, thwangana kangania ku thwanzire Nyamuhanga thukimba esyonyimbo sy’eripipa. Mbulha thwasi eriimba ndeke kutse eyihi, ekyo si kya kikulhu. Thalengekania okw’ilinganisya lino: Thukabya thukabugha, “ithwe abosi thukathalha omwa bingyi,” aliwe ekyo sikiri thukakiraya okw’ikania omughulhu thuli omwa kithunga kutse omw’ithulira. (Yak. 3:2) Kuthya, si thutholere thukalighira eky’eribya isithwasi eriimba ndeke kikathulemesya eripipa Yehova omw’imba.

11. Ngoku kiri omwa Esyonyimbo 48:13, busana naki thutholere ithwahiraho endambi y’eriyeghesya e Biblia ng’eka?

¹¹ Thukaramaya Yehova thukayeghesya Ekinywe kiwe n’erikangirirya abaana bethu okw’iyo. E Sabato muyaha Abaisraeli b’akaghisa k’erilhuhuka okwa mibiiri yabu n’erighumya obughuma bwabu na Yehova. (Eri. 31:16, 17) Ababya bathaleghulha mubakangirirya abaana babu oku Yehova n’obubuya bwiwe. Nethu thutholere ithwahiraho endambi y’erisoma n’eriyeghesya Ekinywe kya Nyamuhanga. Eki ni kitsweka ky’okw’iramya Yehova, kandi kikathuwathikaya eriyithunda hakuhi nayu. (Esy. 73:28) Kandi thukabya thukayeghesya ng’eka, thukawathikaya abaana bethu​—eriyithungira obughuma na Thatha wethu w’elhubulha ow’olhwanzo.​—Soma Esyonyimbo 48:13.

12. Thuk’ighaki okwa mibere Yehova alhangiriramo omubiiri w’abakolha ebikayithaghisibawa oko hema y’erihindanamo?

¹² Thukaramaya Yehova thukahimba n’erisugha emyanya y’eriramiryamo. E Biblia yikabugha yithi omubiiri w’erihimba ehema y’erihindanamo n’ebikayithaghisibawamo abya mubiiri owabuyirire. (Eri. 36:1, 4) Namunabwire, Yehova akalhangira omubiiri w’erihimba Ebisenge by’Obwami n’awandi manyumba w’ekiteokrasi mo w’abuyirire. Abandi balikyethu bakaghunza buthuku bunene bakasangira omwa mibiiri eyi. Mbwino sithulisima eriyihayo lyabu erikayithaghisibawa eri omwa mubiiri w’Obwami? Kandi nibya bakabya ibanemusangira n’omwa mubiiri w’erithulira. Abandi b’okw’ibo bangananza eribya batemburi. Abasyakulhu b’ekithunga bangana kangania ku bakasighika emibiiri y’obuhimbe eyi omw’ilighira balikyethu abakakolha kutsibu aba erikolha ng’abatemburi bamabya ibanatholere. Mbulha thwasi eby’obuhimbe  kutse eyihi, ithwe bosi thwangana wathikya omw’iyonza n’erisugha amanyumba ayo.

13. Thutholere ithwalhangira thuthi ebya thukahayo erisighika omubiiri w’Obwami?

¹³ Thukaramaya Yehova thukasighika omubiiri w’Obwami omw’ihayo. Abaisraeli si babya b’eryasa embere sya Yehova byalha bisa. (Ebi. 16:16) Babya batholere eriletha ebihembo erikwamana n’emibere eyabalimu. Mubakangania erisima lyabu busana n’esyondegheka syosi esyahirawaho eribaghasira bunyakirimu. Thwanga kangania thuthi ku thwanzire Yehova kandi ku thukasima eby’obunyakirimu ebya thukahebawa? Enzira nguma ly’erihayo esyosente erisighika ekithunga kyethu n’omubiiri w’ekihugho kyosi erikwamana n’emibere eyathulimu. Omukwenda Paulo mwakibughako athi: “Mwamabya n’omuhwa w’erihithya, Nyamuhanga akaligha ebyo mundu awithe, butsira ebyo athawithe.” (2 Kor. 8:4, 12) Yehova akalhangira erihayo lyosi-lyosi erikalhua okwa muthima mwa ly’obughuli, nomulyangabya like.​—Mk. 12:42-44; 2 Kor. 9:7.

14. Ngoku kiri omwa Emisyo 19:17, Yehova akalhangira athi obuwathikya obwa thukaha balikyethu abali omwa buyithawa?

¹⁴ Thukaramaya Yehova thukawathikya Abakristayo balikyethu abali omwa buyithawa. Yehova mwayilhagha erisyahemba Abaisraeli abatsomana abera. (Ebi. 15:7, 10) Neryo obuli wathikya omuramya mulikyethu oyuli omwa buyithawa, Yehova akalhangira nga n’iyo thwamaha. (Soma Emisyo 19:17.) Ng’eky’erileberyako, Abakristayo abe Filipi babere bakathumira Paulo y’ekihembo iniane omwa ngomo, mwakyahulhamo “obuhere obutholere, obukatsemesaya Nyamuhanga yo ndeke.” (Fil. 4:18) Thathimbya ameso w’omwa kithunga wanayibulya, ‘Mbwino hane omundu wosi-wosi oyo nangawathikya?’ Yehova akatsema akalhangira thukakolesya endambi, akaghalha, ebya thwasi, n’ebya thuwitheko eriwathikya abali omwa buyithawa. Akalhangira ekyo mwa kitsweka ky’okw’iramya lyethu.​—Yak. 1:27.

15. Eriramya ly’okwenene likayithagha obuthuku n’akaghalha, aliwe busana naki sirikalire?

¹⁵ Eriramya ly’okwenene likayithagha obuthuku n’akaghalha. Aliwe sirikalire. (1 Yn. 5:3) Busana naki? Kundi thukaramaya Yehova habw’erimwanza. Thalengekania omwana inianza eriha thatha wiwe y’ekindu kirebe. Iniangana ghunza endambi akathera ekisasani ekyo akendi muha. Omwana oyo isyendi yikubyabwomo habw’endambi eyo alyaghunza akakithera. Anzire thatha wiwe, kandi atsemire erimuha ekihembo ekyo. Kuthya, kundi thwanzire Yehova, thukatsema thukahiraho obuthuku n’akaghalha nuku thusangire omw’iramya ly’okwenene.

16. Ngoku kiri omwa Abaebrania 6:10, Yehova akalhangira athi akaghalha ako thukahiraho erimutsemesya?

¹⁶ Ababuthi b’olhwanzo sibali lengekanaya bathi abaana babu ibabaha ebihembo ebisosene. Bakaminya ngoku abaana babu sibasosene kandi ngoku bawithe amaaka awathasosene. Kuthya, Thatha wethu w’elhubulha anasi ekyo buli mughuma angathoka. Obundi wangana kolha bingyi kwilhaba abangyi abawasi n’abawanzire. Kutse iwabya isiwanga thasyathoka erikolha bingyi ng’abandi, obundi busana n’erikulha omo myaka, amaghalha eritsotsobera, kutse busana n’esyongwamirwa sy’amaka. Isiwahwa amani. (Gal. 6:4) Yehova syangibirirwa omubiiri wawu. Iniakendi tsema wamabya iwunemukolha ekyo wanga thoka kandi iwunawithe ekilhubirirwa ekitholere. (Soma Abaebrania 6:10.) Yehova akalhangira ebiri omwa muthima wawu. Anzire  iwatsema n’eritsemera eriramya erya wukathoka erimuha.

17. (a) Omulingo mulebe w’eriramya lyethu amabya ng’amathukalira, ni byahi ebya thwanga kolha? (b) Wabirighasirwa wuthi omwa mughuma w’okwa miringo y’eriramya lyethu eyiri omwa kasanduko “ Ongera Etseme Yawu”?

¹⁷ Kandi ibbwa kyamathukalira erisangira omwa mulingo mulebe w’eriramya lyethu, ng’eriyeghesya kutse erithulira ahali abandu bangyi? Omughulhu thukasangira kutsibu omwa mibiiri eyi, ithwanganongera eritsemerayo n’erighasirwa muyo. Ithwangana linganisya eriramya lyethu ng’erigha eriwatha ekidari. Thwamathendi bera erikolha ekyo, ithwangana ghana erihamba ndeke. Kandi ibbwa thwamathwamu erikolha ekyo buli kiro? Ithwangana tsuka eribya thukakolesya kathambi kake-kake neryo lyolho-lyolho ithwaghenda thukongera endambi. Thukendibya thunemulhangira ebibuya ebikalhwiririra omo kaghalha kethu, ithukendi lindirira n’omuhwa endambi y’eriyegheseryamo kandi ithwatsemerabyo. Wanamalhangira ngoku thwanga kolesya enzira eyi omw’iramya lyethu?

18. Thukaberereraya thuthi ekighendererwa kyethu ky’eribyaho, kandi mukalhwiririraki?

¹⁸ Thukaberererya ekighendererwa kyethu ky’eribyaho omw’iramya Yehova n’omuthima wethu wosi. Busana n’ekyo, thukatsemera engebe eyiwithe ekighendererwa kandi thuwithe amaha w’eriramya Yehova kera na kera. (Emi. 10:22) Lino thuwithe obuholho kundi thunasi ngoku Yehova akawathikaya abaramya biwe bakabana ebitsibu. (Isa. 41:9, 10) Ahathe erithika-thika, thuwithe esyonzumwa mbuya esikaleka ithwatsema thukaramya Thatha wethu w’olhwanzo, oyutholere “eribana olhukengerwa, n’erisikya” erilhua okwa bihangikwa biwe byosi!​—Erib. 4:11.