1-2. Yɛɛ naŋ nɔ yɛ miŋ tosa le mi Mɛlɛka chɛl piɛile naaleŋ?

 A YƐƐ okɔɔ ŋ yiyaŋ yɛ, te a tuei pɛ a Mɛlɛka piɛiyo okɔɔ? Naapum ma yiyaŋ a puaapilɛnɔ baŋ wulaŋ, mbo wa piɛileŋ o Chɛhowa lo wo. Ɔɔ naapum ma yiyaŋ a yuŋgu cho a kɔl kɛndɛ, ma wa pɛɛku leyuŋgoo tosaa wo.

² O sɔɔŋ muŋ niŋ kpou, waŋnda haa cho tosaa sɔɔŋ naŋ tosa o Mɛlɛka piɛiyo niŋndo. Baa Chɛhowa cho pa piɛile ndaleŋ chɛlɔɔ? O cho leŋ chɛlɔɔ te le chɛlaŋ pɛ a hɛnaŋ ndɔɔ, ma kaala ndu, nduyɛ ma nɔ bɛɛleŋ le ndu. Ŋ kaala Chɛhowa tau. Ŋ sina maa ndu naŋ nɔ ni miŋ piɛi. Nduyɛ ŋ yeema miŋ piɛi ndu a kɔl naa kpou.

3. Yɛɛ naŋ cho yɛ yaasiaa o buŋgɛi hei niŋ?

³ O buŋgɛi hei niŋ, ŋ cho yaasiaa piɛile suu Chɛhowa ndoo chɛl o sindɔɔ niŋndeŋ. Nduyɛ ŋ cho vɛlɛ yaasiaa sɔɔŋ ŋɔmaa ŋ o yeema naa miŋ tosa o ndu piɛiyo niŋndo. Te ŋ wa pɛ sɔɔŋ muŋ yaasiaa, naa a pilɛŋ pilɛŋnda nɔ miŋ yiyaŋ a nɛila naŋ nɔ miŋ tosa hiouwɔɔ lachioo o Mɛlɛka piɛiyo niŋndo okɔɔ. Ŋ cho vɛlɛ chɔ le sabu naŋ wa a kɔl kɛndɛ wo te ŋ wa pɛ Mɛlɛka piɛiyo o nɛi tonyaa choo.

4. Vɛɛ wanaa ndaa piɛi Chɛhowa o sindɔɔ niŋ nda chɔm yɛ maa ndaa nɔ bɛɛleŋ le ndu, nduyɛ maa ndaa kaala ndu?

⁴ O sindɔɔ niŋ, mi Ebɛl, Nuuwa, Ebilaham a Choobu chɔm maa ndaa nɔ bɛɛleŋ le Chɛhowa, nduyɛ maa ndaa kaala ndu. Vɛɛ nda tosa yɛ hei? Ma tosa hei sanaa a diikɔŋ ndaa, laalaŋ  ndaa, a sala soliaŋ ndaa. Baabuiyo chɔm naa sɔɔŋ ndaa tosa o Mɛlɛka piɛiyo niŋndoŋ kpou le. Kɛ ma tosa o ndaa tiuba wo le ndu bɛɛleŋ kioo. Nduyɛ mi Chɛhowa chɛl piɛile ndaleŋ. Okoŋ kɔɔli, mi Chɛhowa ke Isɔluɛiya sawalaŋ sanaa a Muuse. Mi sawalaŋ ndaŋ la chɔm nɛila chɔmaala ndoo yeema nda ma tol kɔɔli o ndu piɛiyo niŋndaŋ.

5. Siŋgaŋ yɛɛ ndoo tosaŋ yɛ a piɛile tonyaleŋ okɔɔ mɛɛ Chiisu vi, nduyɛ mbo miiŋgu yoomu?

⁵ Mɛɛ Chiisu vi nduyɛ mbo miiŋgu yoomu, Chɛhowa ndoo yeema lɛ mi waŋnda ndaa hiou lachi a sawala ndoo ke Muuselaŋ diikɔŋndo le. (Luomaŋ. 10:​4) Kilisiɔŋnda ndaa nɔ niŋ ma tol sawa sɛnɛiyo kɔɔli. Ndu cho yɛ “sawa Kiliti wo” ni. (Kalee. 6:​2) O cho ‘sawaa’ hoo loonɔŋndo a sɔɔŋ o dimi woŋ tosaa kpou le chɔm maa a wa sawaa hoo diikɔŋndo le. Kɛ ndaa nɔ ma tol tamasi Chiisu wo kɔɔli, nduyɛ ma dɔu pɛɛkula ndɔlaŋ o wali niŋ. Hau bɛɛ, mi Kilisiɔŋnda tosa o nda tiuba wo le tamasi Chiisu wo tolɔɔ kɔɔli, le halikpeŋ ma nɛŋi Chɛhowa kɔllo. Nduyɛ mi hei tosa ma “sɔla pɛŋgioo o yoomula” ndalaŋ niŋ.—Maa. 11:​29.

6. Te ŋ wa pɛ sɔɔŋ naŋ tosa o Mɛlɛka piɛiyo niŋndoŋ i kɛ kɛ yaasiaa, nyunala kuɛɛ naŋ nɔ yɛ miŋ nyunaŋ?

⁶ O buŋgɛi hei niŋ, te ŋ wa pɛ sɔɔŋ naŋ tosa o Mɛlɛka piɛiyo niŋndoŋ i kɛ kɛ yaasiaa, nyunaŋndɔ aa: ‘Hiouwɔɔ lachi kuɛɛ ya tosa yɛ niŋ o nɛiyo hoo choo?’ Naapum a nyunaŋ vɛlɛ aa: ‘Baa I nɔ pa mi tosa hiouwɔɔ lachioo o nɛiyo hoo choo?’ A nɔ ma naŋ kɔl le hiouwɔɔ lachi ŋ tosa niŋndo. Kɛ te a yiyaŋ pɛ maa a nɔ ma tosa hiouwɔɔ lachioo o nɛi kɛ kɛ niŋ, mɛɛ nyuna Chɛhowa o piɛileŋ niŋ le mbo mala num.

7. Vɛɛ Chɛhowa yiyaŋ yɛ te ŋ piɛi ndu pɛ a kɔllo kpou?

⁷ Piɛileŋ o Chɛhowa lo cho nyɔɔ opilɛ o naŋ tosa o ndu piɛiyo niŋndo. O Baabuiyo niŋ, ma tuu piɛile naaleŋ a nyɛm chuŋ kɛndɛŋ ndaa luam o chiɛi Mɛlɛkaa niŋndo. (Sam 141:​2) Te ndaa lom pɛ nyɔɔŋ muŋ, mi chuŋ kɛndɛ koŋ ndoo nɛŋi Mɛlɛka kɔllo. O nɛi pilɛ koŋ choo, mi piɛile naaleŋ le nɛŋi Mɛlɛka kɔllo, te ŋ piɛi pɛ o ndu lo a kɔllo kpou o yɔŋ bɛɛ miŋ soliŋ diomnda tɛtɛlɛlaŋ kpeku. (Pulɔ. 15:​8; Ditɔnɔ. 33:​10) Ŋ nɔ sabu kɛndɔɔ le laalaŋndo maa mi Chɛhowa naŋ kɔl le naa diomndo tueiyɔɔ te ŋ wa pɛ kaala naa a balika melaa naŋ nɔ le ndu wo chɔmndo. O yeema naa miŋ chɔm ndu buulaŋnda naalaŋ, yiyaŋnda naalaŋ, a yeemaŋ naŋ. Lelaŋ, tuupa ma kandu piɛileŋ o Chɛhowa lo, yiyaŋ yiŋgoloŋ a nyɛ ŋ yeema ma dimul ndu wo okɔɔ. Te a tosa pɛ keŋ, mɛɛ nyɛm chuŋ kɛndɔŋ ŋ cho muŋ lomɔɔ Finya num cho o choo choo niŋndo o hɔl ni.

8. O nɛila kuɛɛ choo naŋ saŋgala yɛ Mɛlɛka?

⁸ Miŋ saŋgala Chɛhowa o ndu piɛiyo niŋ. (Sam 34:​1) Miŋ saŋgala Chɛhowa te ŋ wa pɛ acheleŋnda dimullo a ndu okɔɔ, vɛlɛ a walta ndɔla kɔndɔfiltaŋ. Te ŋ nɔ pɛ balika melaa le Chɛhowa, mɛɛ ŋ cho nɔ sɔɔŋ kɛndɔŋ tau le dimioo a ndu okɔɔ. Te ŋ yiyaŋ pɛ a sɔɔŋ kɛndɛŋ o tosal naa niŋndoŋ okɔɔ, ŋ cho nɔ sabulaŋ tau le ndu saŋgalaa. Mi wali dimiaa yooŋgu kɛndɔɔ ke naa dikeŋnaŋndo le ‘salaa solioo o Mɛlɛka lo. Koŋ cho ni, waŋnda dimullo kpendekele a ndu okɔɔ.’ (Hibu. 13:​15) Tuupa miŋ piɛi o Chɛhowa lo, mɛɛ miŋ yiyaŋ fɛŋ nyɛkɛndɛi a nyɛ naŋ cho ndu dimullo okɔɔ. O nɛi pilɛ koŋ choo, ŋ nɔ miŋ yiyaŋ fɛŋ nyɛkɛndɛi a nyɛ naŋ cho lakɔ waŋnda dimul o yooŋgu kɛndɔɔ dimioo niŋndo okɔɔ. Naa kpou yeema mi sala naŋ solul Mɛlɛka wo wa o kɛndɛ kɛndɔɔ. Lelaŋ naŋ duau sɛmbɔɔ tau ni le acheleŋnda yooŋgu kɛndɔɔ dimullo.

9. Maa Isɔluɛiya o sindɔɔ niŋ, tɔnɔ yɛɛ naŋ sɔla yɛ te ŋ kuɛ pɛ o bɔŋaŋndaŋ? Chɔmndɔ tamaseliiyo mɛɛ bɔŋaŋndaŋ la mala num niŋ yɛ.

⁹ Kɔlaŋ o bɔŋaŋndaŋ cho vɛlɛ nyɔɔ opilɛ o naŋ  tosa o Mɛlɛka piɛiyo niŋndo. Mi Muuse dimul Isɔluɛiya aa: “Wana pɔnɔ o wana pɔnɔ cho Isɔluɛi, o wɔsioo niŋ o nɔ mbo kɔ sooluu Mɛlɛka Yaawɛɛ, Mɛlɛka nyaa le yaa o fondaŋ Mɛlɛka o cho hɛli le ndu waa sooluuwo loŋ ndo.” (Ditɔnɔ. 16:​16) Ndaa nɔ mi ndaa mɛi chiɛila ndalaŋ a chiɔɔŋ ndaŋ, mi che bɛɛ wana o wana ve lo kɔɔli le muŋ manda le. Mi Chɛhowa chuel nda buŋgɛi aa: “Boondii nya cho o bɔŋaŋnda nya nɔ laŋ mi la bii leyaa o wɔsioo niŋ ndaŋ choo ve, a yɔŋ bɛɛ mi yaamɔɔwa huŋ del lɛŋnde nyaleŋ choo a sɔŋgɔɔ, a nɔla ma yem nya ma poonda nya lɛŋnde nyaleŋ o ba le.” (Ɛsɔ. 34:​24) Mi Isɔluɛiya haa ndaa dɔu laalaŋndo o Chɛhowa niŋ, nduyɛ mi ndaa kuɛ o bɔŋaŋnda laŋ iwɔsi o iwɔsi. Te ndaa kuɛ pɛ o bɔŋaŋndaŋ ndaŋ, mi ndaa sɔla tɔnɔɔ o nɛila bɔɔbɔɔ niŋ. Le tamaseliiyo, mi ndaa pɛɛku tau a sawala Chɛhowalaŋ okɔɔ, ma yiyaŋ a sɔɔŋ kɛndɛŋ ndoo tosal nda niŋndoŋ, nduyɛ mi ndaa wa vɛlɛ a kɔl kɛndɛ le waa a chaaŋaa ndaa laalaŋnda latulu. (Ditɔnɔ. 16:​15) Mi naa bɛɛ sɔla tɔnɔla waa nuaa te ŋ wa pɛ soliŋndo sala le kɔlaŋ o bɔŋaŋnda leKilisiɔŋndaŋ. Nduyɛ, yiyaŋndɔ vɛlɛ mɛɛ Chɛhowa wa a kɔl kɛndɛ yɛ, te ŋ bɛɛndiaŋ pɛ nyɛkɛndɛi le mulioo yɔŋgoo o biŋgi, mi muli koŋ pilaŋ acheleŋnda kɔltaŋ.

10. Vɛɛ chondoŋ solioo cho yɛ nyɛ sɔvɛ o Mɛlɛka piɛiyo niŋ?

¹⁰ Miŋ soli chondoŋ o Chɛhowa piɛiyo niŋ. (Sam 28:​7) Isɔluɛiya ndaa che bɔɔ chondoŋ solioo nyɛ sɔvɛ bɛndu o Mɛlɛka piɛiyo niŋ. Mi Masaa Deeve hɛli Livaiya 288 le ma wa chondoŋ solioo o chiɛi Mɛlɛkaa niŋ. (1 Kolo. 25:​1, 6-8) Hau bɛɛ, miŋ chɔm kaala naa le Mɛlɛka, te ŋ soli pɛ chondoŋ le ndu saŋgalaa. O cho mɛɛ diom naa cho yɛ le cho suɛi sɔvɛ le. Yiyaŋndɔ a tamaseliiyo hoo okɔɔ. Te ŋ wa pɛ suɛi, “miŋ benduŋ teleŋnda bɔɔbɔɔ.” Kɛ keŋ kuuna naa suɛi o kundaa niŋ a o yooŋgu kɛndɔɔ dimioo niŋ te. (Chemi. 3:​2) O nɛi pilɛ koŋ choo, ŋ nɔ miŋ soli chondoŋ le Chɛhowa saŋgalaa o yɔŋ bɛɛ miŋ yiyaŋ maa ŋ niŋ diom te.

11. A mɛɛ Sam 48:​13 dimi yɛ, le yɛɛ yuŋgoo nɔ yɛ mbo kɛsi teleŋndo le waa Baabuiyo pɛɛkoo diompilɛ?

¹¹ Chuauwaa naa pɛɛkoo a Chɛhowa okɔɔ vɛlɛ a Diom ndɔɔ pɛɛkoo cho nyɛ cheleŋ naŋ tosa o ndu piɛiyo niŋndo ni. O paale pɛŋgiaaleŋ choo, Isɔluɛiya ndaa tosa wali o wali le. Nduyɛ mi ndaa soliŋ paaleleŋ kpeku le chaŋyɛi ndɛi kindioo a Chɛhowa. (Ɛsɔ. 31:​16, 17) Mi kalaŋ chuauwaa ndaa kaala Chɛhowa wa ndaa pɛɛku chuauwaa ndaa a Chɛhowa okɔɔ. Nduyɛ, mi ndaa chɔm nda sɔɔŋ kɛndɛŋ o tosal nda niŋndoŋ. Hau bɛɛ, ŋ nɔ miŋ kɛsi teleŋndo le waa Diom Mɛlɛkaa pɛɛkoo lepaa o lepaa. Hei cho nyɔɔ opilɛ o naŋ tosa o Chɛhowa piɛiyo niŋndo. Nduyɛ mi keŋ mala naa miŋ sɔɔŋguu ndu ikɛi kpɛɛluŋ. (Sam 73:​28) Te yuŋgoo wa pɛ Diom Mɛlɛkaa pɛɛkoo diompilɛ, mi keŋ mala chuauwaa ndaa ma kindi chaŋyɛi ndɛi a Finya nda kaalaa cho o choo choo niŋndo.—Nuawɔ Sam 48:​13.

12. Mi Chɛhowa cha wali waŋnda wa tosaa le chiɛi ndɔɔ taŋgullo wo maa wali sɔviɔɔ pila. Yɛɛ naŋ pɛɛku yɛ o keŋ niŋ?

¹² Fondaŋnda naala lepiɛilaŋ taŋgullo a laŋ biyɔɔ nyɛkɛndɛi cho vɛlɛ nyɔɔ opilɛ, o naŋ tosa o Mɛlɛka piɛiyo niŋndo. Mi Chɛhowa cha wali waŋnda wa tosaa le chiɛi ndɔɔ taŋgullo wo maa wali sɔviɔɔ pila. Kanifuule, ‘chiɛi diandaa’ nda wa taŋgullo ni. (Ɛsɔ. 36:​1, 4) Hau bɛɛ, mi Chɛhowa che Toŋgola leMasalaŋ a fondaŋnda lepiɛila cheleŋ taŋgullo, maa nyɔɔ opilɛ o naŋ tosa o ndu piɛiyo niŋndo. Mi puaapiliaa a ndepiliaa apum chua teleŋndo tau o waltaŋ ndaŋ tosaa niŋ. Baa ŋ nɔ pa balika melaa le wali nda cho hoo tosaa o wali Mɛlɛkaa niŋndo? O faŋaŋndɔ okoŋ kɔɔli, mi puaapiliaa a ndepiliaa haa yɔŋguŋ vɛlɛ o wali dimiaa yooŋgu kɛndɔɔ niŋ. Mi apum  yɔŋguŋ pɛŋ le kɔɔfaleŋ tosaa. Te puaapiliaa a ndepiliaa haa suliŋ pɛ le kɔɔfaleŋ tosaa, bɛnduaa kundaa nɔ ma dɔunuŋ tamala le nda suei yulɔɔ le. O nɛiyo hoo choo bɛnduaa kundaa chɔm ni maa a cho wali taŋgulaa hoo tooloo. O yɔŋ bɛɛ aa ŋ chaa wali taŋgulaa tosaa ɔɔ ŋ chiee le, naa kpou yɔŋguŋ le fondaŋnda naala lepiɛilaŋ dindioo a le laŋ biyɔɔ nyɛkɛndɛi.

13. Vɛɛ naŋ nɔ yɛ miŋ che toolula naŋ yɔŋgu le wali dimiaa yooŋgu kɛndɔɔ hivioo lachi laŋ?

¹³ Toolula naalaŋ yɔŋgoo le wali dimiaa yooŋgu kɛndɔɔ hivioo lachi, cho vɛlɛ nyɔɔ opilɛ o naŋ tosa o Chɛhowa piɛiyo niŋndo. O sindɔɔ niŋ, Isɔluɛiya ndaa nɔ ma kuɛ bala fondo le Chɛhowa piɛiyo le. (Ditɔnɔ. 16:​16) Ndaa nɔ ma kuɛ a kioo o ndaa tiuba le sɔlaa wo. Hei ndii chɔm ni maa a nɔ balika melaa le nyɛ Chɛhowa wa nda tosallo wo. Vɛɛ naa bɛɛ chɔm yɛ balika melaa le nyɛ o nyɛ Chɛhowa cho naa tosallo? Nɛiyo opilɛ o naŋ tosa heiyo cho toolula naalaŋ yɔŋgoo le kundaa ni. Ŋ tosa vɛlɛ hei te ŋ wa pɛ tooloo yɔŋgoo le wali dimiaa yooŋgu kɛndɛ cho tosaŋndo chieeŋndo balɔɔ silɔ wo mɛɛ naŋ tiuba yɛ. Mi kiilanɔɔ Pɔɔl dimi pɛŋ a hei okɔɔ aa: “Te waŋndo nɔ pɛ yeemɛi le yɔŋgoo, ke waa lende kpeekpei Mɛlɛka chɛl ni. Mɛɛ waŋndo nɔla sɔlaa yɛ o yɔŋgu ni, kɛ o cho mɛɛ o nɔla sɔla le yɛ le.” (2 Kɔliŋ. 8:​4, 12) Mi Chɛhowa naŋ kɔl a toolu kɛ kɛ naŋ yɔŋgu pɛ, o yɔŋ bɛɛ mbo ve o bɔɔ le.—Maki 12:​42-44; 2 Kɔliŋ. 9:​7.

14. A mɛɛ Pulɔwaa 19:​17 dimi yɛ, vɛɛ Chɛhowa cha yɛ mala naŋ yɔŋgu le puaapiliaa naa cho o bahawɛiyo niŋnda malaa wo?

¹⁴ Chaaŋaa naa laalaŋnda malaa cho vɛlɛ nyɔɔ opilɛ o naŋ tosa o Chɛhowa piɛiyo niŋndo. Mi Chɛhowa mɛi lediom le Isɔluɛiyaa ndaa chɔm nyiɛɛye le wanaa bala fonduaa malaa wa fandaa kioo. (Ditɔnɔ. 15:​7, 10) A tonya, teleŋ o teleŋ naŋ mala pɛ chaaŋ naa laalaŋ cho o bahawɛiyo niŋndo, mɛɛ kuoo naŋ wuu koŋ Chɛhowa ni. (Nuawɔ Pulɔwaa 19:​17.) Le tamaseliiyo, mɛɛ Pɔɔl wa o biyɔɔ niŋ, mi Kilisiɔŋnda Filipai yɔŋ ndu kioo. Nduyɛ mbo cha ke koŋ maa “sala chuŋ kɛndɛ, o Mɛlɛka chɛl, nduyɛ mbo hini kɔl a ndu wo.” (Filipi. 4:​18) Yiyaŋ a wanaa cho o kunda numndo niŋnda okɔɔ, okoŋ ma nyunaŋ aa: ‘Baa wana cho pa o ya nɔ mi mala wo?’ Mi Chɛhowa naŋ kɔl tau te o che pɛ miŋ soliŋ teleŋ naa, yoomuma naŋ, nyɛ naŋ chaa tosaa wo a nyɛm naŋ kiɔɔŋ kpeku le wanaa cho o bahawɛiyo niŋnda malaa. Nduyɛ pɛŋ, mbo che keŋ maa nyɔɔ opilɛ o naŋ tosa o ndu piɛiyo niŋndo.—Chemi. 1:​27.

15. Teleŋndo a sɛmbɔɔ yeemaŋ ni le Chɛhowa piɛiyo. Kɛ le yɛɛ naŋ dimi yɛɛ maa hei kindu tosa le?

¹⁵ Teleŋndo a sɛmbɔɔ yeemaŋ ni le Chɛhowa piɛiyo. Kɛ o cho nyɛ kendu tosa le. (1 Chɔŋ 5:​3) Le yɛɛ naŋ dimi yɛ lende? Kanifuule miŋ piɛi Chɛhowa le mɛɛ naŋ kaala ndu yɛ. Yiyaŋndɔ a poombɔ yeema mbo ke Finya ndɔ nyɛ wo. Mbo chua hawɛila bɔɔbɔɔ le finya ndɔ fotueiyo tuuliallo. Kɛ o tembu kɔl le mɛɛ o chua hawɛilaŋ tau le fotuei koŋ tuulaa yɛ le. Kanifuule, o kaala finya ndɔ tau, nduyɛ o cho a kɔl kɛndɛ le mbo ke ndu fotuei koŋ. O nɛi pilɛ koŋ choo, le mɛɛ naŋ kaala Chɛhowa tau yɛ, miŋ naŋ kɔl le teleŋndo a sɛmbɔɔ dɔwɔɔ le ndu piɛiyo.

16. A mɛɛ Hibuluiya 6:​10 dimi yɛ, baa mi Chɛhowa puɛɛnuŋ pa wali naa a pilɛŋ pilɛŋnda tosa le ndu kɔllo nɛŋioo wo?

¹⁶ Kalaŋ chuauwaa kaala chuauwaa ndaa wa, ve nda kɔl le mi o kɛ kɛ tosa nyɛ pilɔɔ kpe le. A sina maa chua kɛ kɛ cho teŋgeŋ, nduyɛ maa nda kpou tiuba ma tosa nyɛ pilɛ le. O nɛi pilɛ koŋ choo, Finya naa cho o choo choo niŋndo sina nyɛ naa pilɛŋ pilɛŋnda tiuba le tosaa wo. Naapum a tiuba ma tosa tau, mbo hiau mɛɛ  wanaa ŋ sina nduyɛ ma kaala wa tosa yɛ. Ɔɔ a tiuba ma tosa tau mɛɛ acheleŋnda tosa yɛ le. Kanifuule, a cho o yuuwɛi, a nɔ kɛndiaa sɔvɛ le ɔɔ a nɔ kalaŋnda yuŋgoo tau. Te lende i cho ni, mɛɛ tambu kɔl te. (Kalee. 6:​4) Loonuŋ maa Chɛhowa puɛɛnuŋ wali ŋ cho tosaa wo le. Te o yɔŋ pɛ ma tosa nyɛ ŋ tiuba wo nduyɛ ma nɔ yiyaŋ kɛndɔɔ, mbo naŋ kɔllo tau. (Nuawɔ Hibuluiya 6:​10.) Chɛhowa sina pɛŋ nyɛ ŋ yeema le tosaa wo. Nduyɛ o yeema num ma wa a kɔl kɛndɛ vɛlɛ ma nɔ kɔl hiniaa le tosaa o ŋ tiuba wo o ndu piɛiyo niŋ.

17. (a) Te ŋ che ndi pɛ ikala le sɔɔŋ ŋpum tosaa o Mɛlɛka piɛiyo niŋ, yɛɛ naŋ nɔ yɛ miŋ tosa? (b) Vɛɛ sɔɔŋ ŋpum o kɔfoo hoo niŋ, “ Chɔɔlu Kɔl Kɛndɔɔ Sɔla” mala yɛ num niŋ?

¹⁷ Yɛɛ naŋ nɔ yɛ miŋ tosa te ŋ che ndi pɛ ikala le sɔɔŋ ŋpum tosaa o Mɛlɛka piɛiyo niŋ, mɛɛ pɛɛkɔŋ ipilayaa ɔɔ yooŋgu kɛndɔɔ dimioo o luŋ kpendekele cho nuaa yɛ? Ŋ nɔ miŋ dɔu sɛmbɔɔ le muŋ tosaa. Te ŋ wa pɛ muŋ tosaa teleŋ o teleŋ, ŋ cho muŋ tueiyɔɔ yeela, nduyɛ miŋ sɔla tɔnɔɔ leniŋ. Ŋ tuu sɔɔŋ naŋ tosa o Mɛlɛka piɛiyo niŋndo a dialloŋ hiiluuwo ɔɔ pɛɛkoo le nyɛchaa lɔɔ. Te ŋ wa pɛ sɔɔŋ muŋ tosaa lepilɛŋ pilɛŋ, ŋ tosa hiouwɔɔ lachi tau le. Kɛ miŋ tosa hiouwɔɔ lachioo tau te ŋ kɛɛsiaa pɛ le muŋ waa tosaa lepaa o lepaa. Naapum ŋ kandu hei tosaa o pɔmpɔmbɔ. Nduyɛ mɛɛ naŋ kua fau, lende naŋ kua a teleŋndo bɛndioo ni. Te ŋ wa pɛ hiouwɔɔ lachioo chɔɔ o sɛmbɛ naŋ cho dɔwɔɔ wo niŋ, naapum nyɔɔ cho naa hɛnaŋ le muŋ waa tosaa teleŋ o teleŋ. Baa ŋ tiu pa ba miŋ tosa nyɛ pilɔɔ hoo kpe a sɔɔŋ naŋ tosa o Mɛlɛka piɛiyo niŋndo?

18. Yɛɛ sɔvɛ naŋ nɔ yɛ miŋ tosa, nduyɛ fulamakɔɔli yɛɛ naŋ sɔla yɛ o ndu tosaa niŋ?

¹⁸ Chɛhowa piɛiyo a kɔl naa kpou cho nyɛ sɔvɛ naŋ nɔ miŋ tosa wo ni. Fulamakɔɔlioo cho wa ni, ŋ cho wa a kɔl kɛndɛ, miŋ nɔ yoomu sɔviɔɔ, nduyɛ miŋ nɔ tiindaŋndo le ndu waa piɛiyo lefafɛɛŋ. (Pulɔ. 10:​22) Ŋ cho niŋ a kɔl nyulu kanifuule, ŋ sina maa mi Chɛhowa mala buɛiyaa nduaa te bahawɛilaŋ la komal nda pɛ. (Aisaya 41:​9, 10) A tonya, ŋ nɔ sabula kɛndɛlaŋ tau le waa a kɔl kɛndɛ o Finya naa kaalaa piɛiyo niŋ. Kanifuule, ndu “bɛnda ni [mbo] sɔla biiloo, a bɛɛleŋ, a kpaayaa” nyɛm o toosiaa woŋ kpou o ba.—Sɔɔŋ. 4:​11.