1-2. Yinki ke sala ti Yehova ndima bima yina beto ke salá samu na kusambila yandi?

 NTANGU nge ke wá “kusambila,” na yinki nge ke kanisá? Ntangu ya nkaka na mpangi mosi yina ke ya kufukama na mantwala ya mfulu ya yandi, mpe yandi ke na fungulá ntima ya yandi na Yehova na lusambu. To nge ke kanisá na dikanda mosi yina ke na kilengi ya kulongoka Biblia.

² Bampangi yayi ke na salá bima yayi samu na kusadila to kusambila Yehova. Yehova ke ndimá kwandi yina ba ke na salaka? Yandi ke ndima yawu si ya ke na kwelaná na dikanisi ya yandi, mpe si ba ke na sadilak’ yandi na luzolo mpe buzitu nyonso. Beto ke zolá mingi Yehova. Beto zaba ti yandi me lunga beto sadila yandi, mpe beto zola kusadila yandi na mutindu yina yandi ke zolaka.

3. Yinki beto ke tala na artikle yayi?

³ Na artikle yayi, beto ke tala faso ya kusambila Yehova yina yandi vandá ndimá na ntangu ya ntama. Mpe beto ke tala bima 8 yina yandi ke ndimá beto sala bubu yayi samu na kusambila yandi. Ntangu beto ke na talak’ yawu, mosi na mosi na beto me bonga kukanisa na mutindu yina yandi lenda bongisa faso ya yandi ya kusadila Yehova. Beto ke zonzila mpe samu na yinki kusadila Yehova na faso yina yandi ke zolá ke pesá kilengi.

4. Tekila Yesu kwiza awa na ntoto, wa’ faso bantu vandá lakisa buzitu mpe luzolo samu na Yehova?

⁴ Tekila Yesu kwiza awa na ntoto, bantu mutindu Abele, Nowe, Abrahami, na Yobi lakisá buzitu mpe luzolo samu na Yehova.  Wa’ faso? Ba vandá tumamá na Yehova, ba tulá kiminu ya bawu na yandi, mpe ba vandá pesak’ yandi minkayulu. Biblia ke zonzilá ve nyonso yina Yehova vandá vingila ba sala samu na kusambila yandi. Kasi beto zaba ti ba salá nyonso yina ba lendá kusala, samu na kupesa Yehova nkembo. Mpe Yehova ndimá yina ba vandá sala samu na kusadila yandi. Na manima, Yehova pesá Misiku ya Moyize na bana ya Izraele. Misiku yango vandá lakisa mutindu ya mbote ya kusambila Yehova.

5. Wa’ faso Yehova zola bakristo sadila yandi?

⁵ Na manima ya kuvumbuka ya Yesu na lufwa, Yehova vandá vingila dyaka ve bantu landa misiku ya Moyize. (Rom. 10:4) Bakristo zolá landa musiku ya malu-malu, ‘musiku ya Kristo.’ (Gal. 6:2) Na kulanda “musiku” ya Kristo, ba vandá ve na nsatu ya kusimba na yintu bima nyonso yina Yehova ke niminá, mpe bima yina yandi zolá ba sala. Kasi, Yehova vandá vingila ba landa kifwani ya Yesu, mpe ba sadila malongi ya yandi na luzingu ya bawu. Bubu yayi mpe, bisadi ya Yehova ke salá bangolo samu na kulanda kifwani ya Yesu. Ba zaba ti kusala yawu ke sepelisá Yehova mpe ke pesá bawu mosi “mvundulu [ngolo].”—Mat. 11:29.

6. Wa’ faso artikle yayi ke sadisa beto?

⁶ Ntangu beto ke na tadilá mosi na mosi ya bima yina beto ke salá samu na kusambila Yehova, nge lendá yufula: ‘Mu ke na salá kwandi bamambu yayi mbote kulutila na ntama?’ Nge lenda yufula mpe: ‘Ya ke kwandi na bima mu lenda bongisa na faso ya munu ya kusadila Yehova?’ Nyonso yina nge me sala tii bubu yayi samu na kubongisa faso ya nge ya kusadila Yehova ke mbote. Nge lenda sepela na yawu. Kasi nge lenda lomba na Yehova yandi sadisa nge na kutala bisika ya nkaka yina nge lenda bongisa.

7. Wa’ faso Yehova ke tadilá balusambu yina ke katuká na ntima?

⁷ Beto ke sadilá Yehova ntangu beto ke sambilak’ yandi. Biblia ke zonzá ti balusambu ya beto ke faso mananasi yina ba vandá pesá na tabernacle, mpe na manima, na tempelo. (Nku. 141:2) Mananasi yango, ba vandá bongisak’ yawu mbote-mbote. Mpe ya vandá basisá nsunga ya kitoko yina vandá sepelisá Yehova. Mutindu mosi mpe, balusambu ya beto yina ke katuká na ntima ke pesá Yehova “kiese,” ata beto ke na talá ti beto ke ve na mayela ya kuzonza bamambu faso bantu ya nkaka. (Bin. 15:8; Kul. 33:10) Ya ke pesá ntima ya Yehova kilengi ntangu beto ke zonzilak’ yandi luzolo ya beto samu na yandi, mpe ntangu beto ke vutulak’ yandi matondo. Yandi ke na nsatu beto zonzila yandi bamambu yina ke na kwamisá beto, mpe bima yina beto ke na yawu nsatu. Na yawu, tekila nge sambila Yehova, kanisa mbote-mbote na bamambu yina nge ke zonzila yandi. Si nge sala yawu, balusambu yina nge ke zonzila na Tata ya nge ya mazulu ke vanda mutindu “mananasi” yina ke na nsunga ya kitoko.

8. Wa’ faso beto lendá pesa nkembo na Nzambi?

⁸ Beto ke sadilá Yehova ntangu beto ke pesak’ yandi nkembo. (Nku. 34:1) Beto ke kembilá Yehova ntangu beto ke zonzá na bantu ya nkaka faso beto ke zolá bifu ya yandi ya mbote, mpe bima yina yandi salaka. Si na ntima ya beto, beto ke sepelá na bima yina Yehova salá, ya ke nata beto na kupesa yandi nkembo. Si beto baka ntangu ya kukanisa na bima ya mbote nyonso yina Yehova pesá beto, beto ke vanda kaka na bamambu ya kuzonzila yandi samu na kuvutula yandi matondo. Na kisalu ya kusamuna, beto ke na bweso ya nene ya “kupesa na Nzambi masiika mutindu munkayulu. Ya zola kutuba: Bampova ya yinwa ya beto.” (Ebr. 13:15) Beto  ke bongisá bamambu yina beto ke zonzilá na Yehova na lusambu. Mutindu mosi mpe, beto me lunga kubongisa bamambu yina beto ke zonza na bantu yina beto ke kutana na kisalu ya kusamuna. Beto ke na nsatu ya kusala bangolo ya beto nyonso samu na kupesa na Nzambi “masiika mutindu munkayulu.” Ni yina ke salá ti beto samuna na tiya nyonso.

9. Faso bana ya Izraele na ntama, yinki balukutakanu ke natiná beto? Zonzila mwa bambote yina nge me kuzwa na kuvanda na balukutakanu.

⁹ Beto ke sadilá Yehova ntangu beto ke vandá na balukutakanu. Yehova zonzá na bana ya Izraele: ‘Babakala ya nge nyonso fwana kukwenda na mantwala ya Yehova Nzambi ya nge na kisika yina yandi me sola, bambala tatu na mvula.’ (Kul. 16:16) Na kusala yawu, ba zolá bika bayinzo ya bawu mpe bilanga ya bawu na ata muntu ya kukengidila yawu. Yehova zonzá na bawu: ‘Ata muntu mosi ve ke lula yinsi ya nge na ntangu nge ke kwenda samu na kutala luse ya Yehova Nzambi ya nge.’ (Bas. 34:24) Samu ba vandá na kiminu na Yehova, ba vandá kwendá mvula na mvula na balukutakanu ya nene. Kusala yawu vandá natina bawu bambote mingi. Na kifwani, ba vandá longoká ya kulutila Misiku ya Nzambi. Ba vandá baká ntangu ya kukanisa na mutindu Yehova vandá lakisa bawu ntima ya mbote. Mpe ba vandá sepelá kuvanda kintwadi na bantu ya nkaka yina vandá zolá Yehova. (Kul. 16:15) Beto mpe ke zwá bambote ya faso mosi ntangu beto ke salá bangolo ya beto nyonso na kuvanda na balukutakanu. Mpe kanisa na kilengi yina ya ke salá Yehova ntangu, na balukutakanu, beto ke pesá bamvutu ya nkufi yina beto me baka ntangu ya kubongisa.

10. Samu na yinki kuyimba ke kima ya mfunu na kati ya bima yina beto ke salá samu na kusadila Yehova?

¹⁰ Beto ke sadilá Yehova ntangu beto ke yimbá kintwadi na bampangi. (Nku. 28:7) Samu na bana ya Izraele, kuyimbila Yehova vandá kima ya mfunu na kati ya bima yina ba vandá salá samu na kusambila yandi. Mfumu Davidi solá balevi 288 samu na kuyimba na tempelo. (1 Ns. 25:1, 6-8) Bubu yayi mpe, beto ke lakisá luzolo ya beto na Yehova ntangu beto ke yimbilak’ yandi banzimbu yina ke pesak’ yandi nkembo. Kuzaba kuyimba ke ve mfunu. Kanisa na mambu yayi: ntangu beto ke zonzá, ‘beto nyonso ke bulaka mabaku.’ Ata faso yina, beto ke biká ve kuzonza na balukutakanu to na kisalu ya kusamuna. (Zaki 3:2) Mutindu mosi mpe, beto zolá bika ve kuyimba samu na kukembila Yehova, ata beto ke na kanisá ti beto zaba ve kuyimba.

11. Faso ke na lakisak’ yawu Nkunga 48:13, samu na yinki ya me bonga beto baka ntangu ya kulongoka Biblia na dikanda ya beto?

¹¹ Beto ke sadilá Yehova ntangu beto ke longoká Biblia mpe ntangu beto ke sadisá bana ya beto na kuzaba yandi. Na Izraele, bantu vandá salá ve kilumbu ya saba. Ya vandá kilumbu ya kukumisa ngolo kindiku ya bawu na Yehova. (Bas. 31:16, 17) Ba yina vandá ya kukangama na Yehova vandá longá bana ya bawu na kuzaba Yehova mpe ntima ya mbote ya yandi. Bubu yayi, beto mpe me bonga kuyidika programme ya beto samu na kuzwa ntangu ya kutanga mpe kulongoka Biblia. Ya ke na kati ya bima yina beto ke salá samu na kusadila Yehova. Ya ke sadisá beto na kuvanda pene-pene na yandi. (Nku. 73:28) Mpe ntangu beto ke longoká kintwadi na bana ya beto, beto ke sadisá bawu na kuvanda na kindiku ya ngolo na Tata ya beto ya mazulu.—Tanga Nkunga 48:13.

12. Yinki beto ke na longoká na faso Yehova tadilá kisalu ya kuyidika tabernacle?

¹² Beto ke sadilá Yehova ntangu beto ke tungá mpe ke bongisá bisika yina beto ke salá balukutakanu. Biblia ke zonzá ti kisalu ya kuyidika tabernacle, mpe bima nyonso yina vandá na kati,  vandá “kisalu ya santu.” (Bas. 36:1, 4) Bubu yayi mpe, na meso ya Yehova, kutunga ba-salle du Royaume mpe bayinzo ya nkaka ke faso ya kusadila yandi. Bampangi ya kento na ya bakala ya nkaka ke lutisá bantangu mingi na bisalu yayi. Beto ke sepelá na yina ba ke salá samu kisalu ya Kimfumu kwenda na mantwala. Ata ti ba ke lutisá ntangu mingi na kisalu ya kutunga, bampangi yina ke salá mpe kisalu ya kusamuna. Ba ya nkaka na kati ya bawu ke sosá kukuma ba-pionnier. Ntangu ba ke lombá kukuma ba-pionnier, bakuluntu zolá kanga ve bawu nzila. Ya ke faso ya bakuluntu ya kulakisa ti ba ke na nsatu kisalu ya kutunga kwenda na mantwala. Ata beto zaba ve kisalu ya kutunga, beto nyonso lenda tula diboko samu bayinzo yina beto ke sadilá vanda kaka kitoko, mpe ya beba ve.

13. Wa’ faso beto me bonga kutadila mbongo yina beto ke pesá samu kisalu ya Kimfumu kwenda na mantwala?

¹³ Beto ke sadilá Yehova ntangu beto ke pesá mbongo ya beto samu kisalu ya Kimfumu kwenda na mantwala. Yehova zonzá na bana ya Izraele na kukwiza ve na mantwala ya yandi maboko-mpamba. (Kul. 16:16) Ba zolá pesa yandi yina ba lendá kuzwa. Kupesa na Yehova vandá lakisa ti ba vandá vutula yandi matondo na nyonso yina yandi salá samu na bawu. Wa’ faso beto lenda lakisa ti beto ke zolá Yehova mpe beto ke vutulak’ yandi matondo na bima nyonso yina yandi ke pesá beto? Mosi ya bafaso ya kusala yawu ni ya kupesa mbongo yina beto lenda kuzwa samu na bisalu yina ke salamá na kimvuka yina beto kele, mpe na yinza ya muvimba. Ntumwa Polo zonzaka: “Ntangu muntu ke kabulaka na luzolo yina kele na ntima ya yandi, Nzambi ke ndimaka dikabu yina. Nzambi ke talaka ve bima yina kele ve na muntu, kasi yina kele na yandi.” (2 Ko. 8:4, 12) Yehova ke sepelá na yina beto ke pesak’ yandi na ntima mosi, ata ya ke ve mingi.—Mrk. 12:42-44; 2 Ko. 9:7.

14. Mutindu Bingana 19:17 ke zonzak’ yawu, wa’ faso Yehova ke talá yina beto ke salá samu na kusadisa bampangi?

¹⁴ Beto ke sadilá Yehova ntangu beto ke sadisá bampangi ya beto. Yehova zonzá ti yandi ke futa bana ya Izraele yina vandá kabulá na ba yina vandá pauvre. (Kul. 15:7, 10) Bambala nyonso yina beto ke sadisá bampangi, Yehova ke talá ti ni na yandi beto ke na kabulaka. (Tanga Bingana 19:17.) Ntangu bakristo ya Filipi fidisá dikabu na Polo na boloko, yandi zonzá ti ya vandá ‘munkayulu yina Nzambi ke ndimaka mpe yina ke pesaka yandi kiese.’(Flp. 4:18) Kanisa na bampangi ya kimvuka ya nge, mpe yufula: ‘Nani mu lenda sadisa?’ Ya ke salá Yehova kilengi ya kutala beto kupesa ntangu, ngolo, mayela, mbongo mpe bima ya beto samu na kusadisa bampangi. Samu na yandi, ya ke na kati ya bima yina beto ke salá samu na kusadila yandi.—Zaki 1:27.

15. Ata kusadila Yehova ke baká ntangu mpe bangolo, samu na yinki ya ke ve kilo?

¹⁵ Kusadila Yehova ke lombá ntangu mpe bangolo. Kasi, ya ke ve kilo. (1 Yoa. 5:3) Samu na yinki? Samu ni luzolo ke natá beto na kusala yawu. Kanisa na mwana ya fioti yina zola kupesa kima na tata ya yandi. Yandi me baka ntangu ya kusadila yandi dessin. Mwana yina lenda nyonga kwandi ntangu yina yandi me lutisa na kusala yawu? Ve. Samu yandi ke zolá tata ya yandi, yandi ke na kilengi ya kupesa yandi yawu. Faso mosi mpe, samu beto ke zolá Yehova, beto ke na kilengi ya kupesa ntangu mpe bangolo ya beto samu na kusadila yandi.

16. Mutindu ke na lakisak’ yawu Baebre 6:10, wa’ faso Yehova ke talá bangolo yina beto ke salá samu na kusepelisa yandi?

¹⁶ Bibuti yina ke na luzolo ke vingilá ve ti bana ya bawu pesa bawu bima ya faso mosi. Ba  zaba ti bana ke ve na ngolo mpe mayela mutindu mosi. Tata ya beto ya mazulu zaba ti luzingu ya beto ke ve faso mosi. Ntangu ya nkaka, nge ke na ngolo ya kusala kulutila bampangi. To nge ke na lendá ve kusala mingi faso bampangi samu nge me nuna, nge ke na belá to nge ke na mingi ya kusala na kati ya dikanda ya nge. Ata faso yina, kulemba ve. (Gal. 6: 4) Yehova lenda zimbana ve kisalu ya nge. Si nge pesa bangolo ya nge nyonso na ntima mosi, yandi ke sepela na nge. (Tanga Baebre 6:10.) Yehova zaba yina nge ke na kanisá kusala. Yandi zola nge vanda na kilengi na yina nge lenda sala samu na kusadila yandi.

17. a) Si beto ke na talá ti ya ke na bima ya nkaka ya kimpeve yina ke mpasi na beto, yinki beto lenda sala? b) Zonzila kima mosi yina me sadisa nge na kati ya enkadre “ Kulisa kilengi ya nge”?

¹⁷ Yinki beto lenda sala si ya ke mpasi na beto na kusala bima ya nkaka yina beto me zonzila na artikle yayi, faso kulongoka Biblia mpe kusamuna? Beto lenda fwanisa bima yina beto ke salá na kimpeve, na sport, to na kusika kitare. Si nge ke salá ve yawu bambala mingi, nge ke mesana ve na yawu, mpe nge ke bongisa ve faso ya nge ya kusala. Kasi, yinki ke salama si nge banda kusala yawu bilumbu nyonso? Na kubanda, nge ke lutisa kaka mwa ntangu fioti. Mpe malembe-malembe, nge ke banda kulutisa bantangu mingi. Mpe si nge ke na talá ti bangolo ya nge ke na futá, nge ke sepela na yawu, mpe nge ke vanda na nsatu ti bantangu yina nge ke salak’ yawu kuma na mbangu. Mutindu mosi mpe, si beto ke salá bamambu ya kimpeve bambala mingi, beto ke mesana na yawu, beto ke vanda na kilengi ya kusala yawu, mpe ya ke natina beto bambote.

18. Wapi yina ke kima ya kulutila mfunu na luzingu ya beto, mpe yinki ya ke natina beto?

¹⁸ Kusadila Yehova ke kima ya kulutila mfunu na luzingu ya beto. Ni yawu ke pesá beto kilengi na luzingu, mpe kivuvu ya kuvanda ntangu nyonso bisadi ya Yehova. (Bin. 10:22) Beto ke na kizunu ya ntima samu beto zaba ti Yehova ke sadisá bisadi ya yandi ntangu ba ke lutisá bantangu ya mpasi. (Iza. 41:9, 10) Ntembe ve, beto ke na kilengi ya kusadila Tata ya beto ya luzolo, yina me lunga ‘kubaka nkembo, lukumu, mpe ngolo’!—Luz. 4:11.