1-2. Yisinke ngayi ninkisa Jehova a tambure ukareli wetu?

 YISINKE o gazara apa o zuvhu nkango “ukareli”? Ove nampo kugazara kuhamena munazinyetu gomugara ogu ana tongamene ana kukanderera kwaJehova komeho a rare. Ndi ove nampo kugazara kuhamena epata eli lina kuhafera kulironga Bibeli.

² Momaukaro nagenye ogo, navenye ava vana hamene mo kuna kurugana ukareli. Kuvhura Jehova a tambure ukareli wawo ndi? Age nga tambura ukareli wawo nsene wa li za nompango zendi ntani nsene kuna kuyirugana neharo nefumadeko. Ose twa hara unene Jehova. Ose twa yi diva asi age ya mu fira kumukarera ntani tuna hara kumukarera monkedi zongwa po.

3. Yisinke natu ka zogera mosirongwa esi?

³ Mosirongwa esi tatu ka zogera ukareli ou ga tambwire Jehova mosiruwo sanare ntani tatu ka zogera nonkedi ntantatu omu ana hara Jehova tu mu karere neina. Ngomu natu ka yi rugana ngoso, kuvhura tu gazadare ko omu natu wapukurura ukareli wetu pamundinda. Natu ka zogera hena eyi ukareli wousili au tu reterere ruhafo.

4. Ngapi omu vakereli vaJehova ava va parukire komeho Jesus a wize pevhu va likidire efumadeko neharo kwaJehova?

⁴ Mosiruwo sanare komeho Jesus a wize pevhu, vagara wovalimburukwi ngwendi Abeli, Nowa, Abirahamu ntani Joba, kwa fumadekere Jehova ntani nokumuhara. Ngapi omu va yi  rugene? Pokulimburukwa Karunga, pokukara nepuro mwendi ntani pokumuzambera nonzambo. Bibeli kapi za tu tantera nayinye eyi ngava rugana moukareli wawo. Nye awo kwa rugene paapa va hulira mokukarera Jehova ntani age kwa tambwire ukareli wawo. Konyima Jehova kwa geve Veta zaMosesa koruvharo rwaAbirahamu. Veta ozo kwa kwaterere mo yininke yoyinzi kuhamena omu Jehova ga here va mu karere.

5. Elitjindjo musinke va tulire po kuhamena ukareli wousili konyima zonomfa nevhumbuko lyaJesus?

⁵ Konyima zonomfa nevhumbuko lyaJesus, Jehova kapi ga ndindilire kovantu va mu karere kuliza noveta ezi ga geve koVaisraeli. (Rom. 10:4) Vakriste va hepere kukwama veta zompe, “veta zaKristusa.” (Gar. 6:2) Awo kapi va limburukwire veta ozo pokuzikwata momutwe ndi pokukwama noveta dononzi, nye pokuhonena Jesus ntani pokukwama eyi nga rongo. Neina Vakriste nawo kurugana paapa va hulira pokukwama Kristusa yipo va hafese Jehova ntani va gwane “epwizumuko.”—Mat. 11:29.

6. Ngapi omu nasi ka tu vatera sirongwa esi?

⁶ Ngomu natu ka zogera mwankenye ruha rokukarera Jehova, lipura nyamoge asi, ‘ezokomeho musinke na tura po moruha oru?’ Kuvhura hena o li pure asi, ‘kuvhura ni wapukurure monkedi omu ani karere Jehova ndi?’ Ove kuvhura o hafe pokumona ezokomeho eli wa tura po dogoro ngesi, nye wa hepa hena kukanderera kwaJehova a ku vatere o dimburure apa wa hepa kuwapukurura.

7. Ngapi omu Jehova a tara makanderero getu gokutundilira komutjima?

⁷ Ose kukarera Jehova apa atu kanderere kwendi. Matjangwa kuhetakanesa makanderero getu kononzambo edi ngava gava ponkongoronzugo ntani edi va ya geve konyima pontembeli. (Epis. 141:2) Nonzambo odo ngadi gava edumba lyewa eli nga hafere Jehova. Mokulifana, Jehova kuhafera makanderero getu gokutundilira komutjima nampili tu ruganese nonkango doureru. (Yis. 15:8; Deut. 33:10) Twa kara nokonda zongwa zeyi natu yi pulira asi Jehova kuyihafera apa atu kanderere kwendi pokumupandura ntani nokumutantera asi twa mu hara. Age ana hara tu mu tantere yinka yetu ntani neyi tuna hara kurugana. Komeho o kanderere kwaJehova, nayi wapa nsene kuvhura o gazadare ko eyi no tumbura mekanderero lyoge. Nsene o yi rugana ngoso, ove ngo gava “nzambo” zongwa po kwaGuhyetu gemeguru.

8. Monkedi musinke natu hamberera Karunga?

⁸ Ose kukarera Jehova pokumuhamberera. (Epis. 34:1) Ose kuhamberera Jehova pokutantera ko wopeke kuhamena yikara yendi yoyiwa ntani noyirugana yendi. Nsene tu kara norupandu kwaJehova, ose ngatu kara noyininke yoyinzi eyi ngatu tantera ko wopeke kumuhamena. Nsene tu litulira po siruwo sokuteda koyininke nayinye eyi ga tu ruganena Jehova, ngayi tu vatera tu kare nonokonda dononzi edi nadi tu ninkisa tu mu hamberere. Sirugana sokuzuvhisa kutupa mpito yipo tu gave “nonzambo dehamberero kwaKarunga kupitira mwendi, kutanta asi kuruganesa tuna twetu.” (Heb. 13:15) Ngwendi moomu tupu atu gazadara ko eyi natu tumbura mekanderero komeho tu kanderere kwaJehova, ose kugazadara ko nawa kuhamena eyi natu ka tantera vantu ava natu ka ligwana nawo mokuzuvhisa. Tuna hara ‘nonzambo detu dehamberero’ di kare donongwa po. Eyi yiyo nye atu uyungire noupampi apa atu zogere novantu.

9. Ngapi omu aga tu vatere mapongo ngwendi moomu tupu ga vaterere Vaisraeli? Gava sihonena omu mapongo ga ku vatera.

 ⁹ Ose kukarera Jehova apa atu kara komapongo. Vaisraeli kwava tanterere asi: “Vagara navenye womuhoko gweni ngava ze va ka tongamene HOMPA rutatu momumvho pevega lyokutongamenena.” (Deut. 16:16) Awo va hepere kusiga mambo gawo nomapya gawo pwa hana gokuyitakamesa. Nye Jehova kwava tumbwidilire asi: “Nagumwe si ogu nga pinga sirongo soge, moyiruwo yitatu momumvho eyi ngo ka horoka kosipara sange, ame Hompa Karunga goge.” (Ex. 34:24) Mokumona asi Vaisraeli kwa kere nepuro mwaJehova, awo ngava zi va ka kare poyipito yankenye mvhura. Awo kwa gwanenene mo mauwa gomanzi. Pasihonena, awo va kwete nawa egano veta zaKarunga, awo ngava gazadara ko koyininke yoyiwa eyi ngava ruganene Jehova ntani ngava hafere kukara kumwe novantu ava va here Jehova. (Deut. 16:15) Nose kugwanena mo mauwa gokulifana apa atu rugana paapa twa hulira tu kare momapongo. Ntani Jehova kumuhafesa apa atu liwapaikire nokuya gava malimbururo gomawa gokukorangeda komapongo.

10. Morwasinke kudimba nonsumo kwa karera ruha romulyo moukareli wetu?

¹⁰ Ose kukarera Jehova apa atu lihameke mo mokudimba nonsumo. (Epis. 28:7) Vaisraeli ngava tara kudimba ngoruha romulyo moukareli wawo. Hompa Ndafita kwa horowere Varevhi 288 yipo va dimbe pontembeli. (1 Hist. 25:1, 6-8) Neina ose kulikida eharo lyetu kwaJehova pokudimba nonsumo dehamberero. Ose kapi twa hepa kukara vadimbi wovawa mokuyirugana oyo. Tu hetakaneseni eyi yina kukwama ko: Apa atu uyunga, “natuvenye kulipuka yikando yoyinzi,” nye oyo kapi ayi tu kondere tu dire kuuyunga mombungakriste nomokuzuvhisa. (Jak. 3:2) Mokulifana, ose kuvhura simpe kudimba nonsumo dehamberero kwaJehova nampili tu gazare asi ose kapi atu dimbi nawa.

11. Ngomu va yi faturura mEpisarome 48:13, morwasinke natu litulilira po siruwo sokulironga Bibeli nomapata getu?

¹¹ Ose kukarera Jehova apa atu lirongo Nonkango dendi ntani nokuronga vana vetu kumuhamena. Mezuva lyEsabata, Vaisraeli kapi ngava rugana. Awo ngava ruganesa ezuva olyo yipo va nkondopeke elikwatakano lyawo naJehova. (Ex. 31:16, 17) Vakareli vaJehova wovalimburukwi ngava rongo vana vawo kuhamena Jehova noyininke yoyiwa eyi ga va ruganenene. Neina nose twa hepa kulitulira po siruwo sokuresa nokulironga Nonkango daKarunga. Aro kuna kara ruha roukareli wetu ntani kutuvatera tu hedere unene pepi naJehova. (Epis. 73:28) Apa atu lirongo ngepata, ose kuvatera vana vetu va tunge po ukaume wounene naGuhyetu gemeguru geharo.—Resa Episarome 48:13.

12. Yisinke natu lirongera ko monkedi omu Jehova ga tere ava va tungire nkongoronzugo ntani neyi ya kere mo?

¹² Ose kukarera Jehova apa atu tungu mavango goukareli wetu ntani nokugapakera mbili. Bibeli kuuyunga asi sirugana sokutunga ntembeli ntani noyininke eyi ya kere mo kwa pongokere. (Ex. 36:1, 4) Neina, Jehova kutara hena sirugana sokutunga Yinyanga yetu yoUhompa nomatungo gamwe goukareli wetu asi sirugana sokupongoka. Vanavazinyetu vamwe kuruganesa siruwo sawo sosinzi yipo va rugane yirugana oyo. Ose kuhafera yirugana eyi ava rugana mokukwatesa ko Uhompa. Nye nampili ngoso, awo hena kulihameka mosirugana sokuzuvhisa. Vamwe kuvhura hena va kare neharo lyokukara vazuvhisi  wokukarerera. Vakuronambunga kuvhura va yi likide asi awo kukwatesa ko yirugana yomatungo pokupulisira vanavazinyetu owo wokurugana unene va kare vazuvhisi wokukarerera nsene vana wapere. Yi kare asi twa kara noudivi wokutunga ndi hawe, natuvenye kuvhura kulihameka mo mokuninka matungo getu ga kare gana zere.

13. Ngapi omu natu tara yigava eyi atu gava mokukwatesa ko yirugana yoUhompa?

¹³ Ose kukarera Jehova apa atu kwatesa ko sirugana soUhompa pokugava yigava. Vaisraeli va hepere kusimba ko sigava esi va hepere kugava kwaJehova apa ngava zi koyipito yankenye mvhura. (Deut. 16:16) Awo va hepere kugava kuliza neyi va vhulire kugava ko. Monkedi zangoso, awo kwa likidire rupandu rwawo kwaJehova koyininke nayinye yopampepo eyi ga va ruganenene. Ngapi natu likida eharo norupandu kwaJehova koyininke nayinye yopampepo eyi atu ruganene? Nkedi zimwe kuna kara pokugava yigava kuliza noukaro wetu mombungakriste ntani koyirugana youzuni mudima. Mupositoli Paurusa kwa uyungire asi: “Nsene muntu a gava kutundilira komutjima, Karunga kuyihafera yeeyi age kwa hara asi muntu a gave kuliza neyi ga kara nayo nye kapisi eyi ga dira kukara nayo.” (2 Kol. 8:4, 12) Jehova kuhafa apa atu gava nkenye eyi twa kara nayo nampili yi kare asi yisesu.—Mar. 12:42-44; 2 Kol. 9:7.

14. Kuliza noYisewe 19:17, ngapi omu Jehova a tara evatero eli atu gava kovanavazinyetu ava vana hepa ekwafo?

¹⁴ Ose kukarera Jehova apa atu vatere Vakriste vakwetu ava vana hepa ekwafo. Jehova kwa tumbwidilire asi nga tengwidira kuwoko Vaisraeli ava va geve konohepwe. (Deut. 15:7, 10) Nkenye siruwo apa atu vatere mupuli mukwetetu, Jehova kuyitara asi awo uhwi. (Resa Yisewe 19:17.) Pasihonena, apa Vakriste womoFilipi va tumine mauhwi kwaPaurusa ogu ga kere modorongo, age kwa yi tumbwire asi: “kwa kara ngwendi nzambo zedumba lyewa ezi azi zi Karunga komutjima.” (Fil. 4:18) Gazadara ko ava va kara mombungakriste nokulipura nyamoge asi, ‘kweli gumwe ogu nani vhura kuvatera ndi?’ Jehova kuhafa apa atu mono kuna kuruganesa siruwo setu, nonkondo detu, ediwo lyetu ntani neyi twa kara nayo mokuvatera ava vana hepa ekwafo. Age kuyitara asi ayo kuna kara ruha roukareli wetu.—Jak. 1:27.

15. Morwasinke ukareli wousili wa dilira kukara mudigo nampili ngomu wa hepa siruwo nononkondo detu?

¹⁵ Ukareli wousili wa hepa siruwo nononkondo detu. Nye ayo kapisi udigu mokuyirugana ngoso. (1 Joh. 5:3) Morwasinke? Morwa ose kukarera Jehova morwa twa mu hara. Gazara kuhamena munona ogu ana hara kugava yuma koguhwe. Age kuvhura yi mu guse siruwo sosire mokufanekera oguhwe efano. Munona ogo gomumati kapi na livera kosiruwo esi ana ruganesa mokufaneka efano. Age kwa hara oguhwe ntani ana hara kuvapa efano olyo ngouhwi. Mokulifana, mokumona asi twa hara Jehova, ose tuna hafa pokuruganesa siruwo setu nononkondo detu mokumukarera.

16. Kuliza noVahebeli 6:10, ngapi omu Jehova a lizuvhu kweyi atu rugana pamundinda yipo tu mu hafese?

¹⁶ Vakurona kapi ava ndindire ko kwankenye munawo a va pe uhwi wokulifana. Awo va yi diva asi vana vawo va lisiga mweyi na vhura kurugana nkenye gumwe. Mokulifana, Guhyetu gemeguru kukwata egano eyi na vhura kurugana nkenye gumwe gwetu. Nampo kuvhura o rugane yoyinzi kupitakana vantu vamwe ava wa diva ntani ava wa hara. Ndi nampo kuvhura o dire kurugana yoyinzi ngwendi  vamwe morwa nomvhura doge, ukanguki woge ndi yitumbukira yemepata. Kapisi yi ku dompese. (Gar. 6:4) Jehova kapi nga divara yirugana yoge. Jehova nga hafa nsene o rugana paapa wa hulira ntani nsene kuna kuyirugana nositambo sosiwa. (Resa Vahebeli 6:10.) Jehova kumona eyi wa hara kurugana. Age ana kuharere o hafe kweyi ono kumuruganena.

17. (a) Yisinke natu rugana nsene kutudigopera kurugana yininke yimwe eyi ya hamena moukareli wetu? (b) Ngapi omu sa ku vatera sininke simwe esi va tumbura mokakende “ Eyi no rugana o twikire kukara noruhafo”?

¹⁷ Yisinke natu rugana nsene kutukarera udigu kurugana yininke eyi tuna zogere ngwendi kulironga Bibeli ntani kulihameka mokuzuvhisa? Nsene tu litura mo unene moyirugana oyo, ose ngatu gwanena mo mauwa gomanzi ntani ngatu hafera yirugana oyo. Ukareli wetu kuvhura kuuhetakanesa koyirugana ngwendi kuhufena ndi kuliyomberesa yikwanomusika. Nsene tu dira kuyirugana eyi nkenye apa, ose nampo kapi ngatu tura po ezokomeho lyewa. Nye yisinke ngayi horoka nsene tu yi rugana nkenye ezuva? Pomuhowo kuvhura ngatu yi rugane nakauke-nakauke, ano konyima kuvhura ngatu yi rugane siruwo sosire. Apa ngatu mona yitundwamo yelituromo lyetu, ayo ngayi tu ninkisa tu yi rugane nkenye apa ntani nokuyihafera. Eyi ya lifana noukareli wetu.

18. Sininke musinke somulyo natu rugana ntani yisinke ngayi horoka nsene tu yi rugana ngoso?

¹⁸ Sininke somulyo esi natu vhura kurugana kuna kara pokurugana paapa twa hulira yipo tu karere Jehova. Nsene tu yi rugana ngoso, ose ngatu kara noruhafo meparu ntani ngatu kara nehuguvaro lyokukakarera Jehova narunye-nanarunye. (Yis. 10:22) Ose kulizuvha mbili morwa twa yi diva asi Jehova kuvatera vakareli vendi apa ava ligwanekere nomaudigu. (Jes. 41:9, 10) Yosili ose twa kara nonokonda donongwa edi nadi tu ninkisa tu hafe ngomu tuna kukarera Guhyetu geharo ogu ya ‘wapera kufumadeka nokuyererepeka.’—Ehor. 4:11.