1-2. Ngaˬ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ tuˬ hkʼaˬ hkʼe gʼa te cawˇ ve le?

 “Oˉ kʼoˍ pui ve” htaꞈ kʼoˆ ve nawˬ gʼa kaˇ htaˇ, aˬ htoꞈ ma ve htaꞈ dawˇ mawˬ ve le? Awˬ viˉ awˬ nyi hawˉ hkʼaˆ teˇ gʼaˇ maˇ zuhꞈ sheˍ htaˇ ku˗iˍ paˇ lo hkui tcuhˉ teh leh Yaˬhoˉvaˬ geh bon lawˬ ve htaꞈ nawˬ dawˇ mawˬ ve yoˬ hehˉ. Maˇ heˆ leh yehˬ kʼa teˇ yehˬ kʼa, yehˬ kʼa hkʼaw ha lehˬ ha kʼa oˉ kʼoˍ pui ve htaꞈ nawˬ dawˇ mawˬ ve yoˬ hehˉ.

² Chi ve 2 ceuˬ lehˬ Yaˬhoˉvaˬ htaꞈ oˉ kʼoˍ pui ve hpehꞈ ve yoˬ. Leh Yaˬhoˉvaˬ yawˇ hui oˉ kʼoˍ pui ve htaꞈ haꞈ yuˬ˗aw laˇ? Yawˇ hui Yaˬhoˉvaˬ htaꞈ haꞈ ve pa taw, yawˆ yan ve hkʼaw te leh yawˇ loˍ ve hkʼe oˉ kʼoˍ pui ve kʼo, yawˇ haꞈ yuˬ ve yoˬ. Ngaˬ hui teˇ gʼaˇ le le Yaˬhoˉvaˬ htaꞈ haꞈ jaˇ. Yaˬhoˉvaˬ lehˬ ngaˬ hui oˉ kʼoˍ pui ve htaꞈ gʼa keunˍ ve tehꞈ shiˍ leh ngaˬ hui yawˇ htaꞈ nyi ma awˬ tawˍ hkʼa gaˬ oˉ kʼoˍ pui gaˇ ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Liꞈ hpu ve awˬ co˗e htaˇ, oˉ kʼoˍ pui ve hkʼaˬ hkʼe ve htaꞈ Yaˬhoˉvaˬ haꞈ yuˬ piˇ ve, awˬ lawn chi ve hkʼaw teˇ geh henˇ tuˬ yoˬ. Leh chi beuꞈ teˇ co˗e kaꞈ oˉ kʼoˍ pui ve htaꞈ Yaˬhoˉvaˬ haꞈ yuˬ laˇ tuˬ, awˬ hkʼaˇ 8 hkʼaˇ htaꞈ teˇ geh henˇ tuˬ yoˬ. Teˇ hkʼaˇ leh teˇ hkʼaˇ htaꞈ ngaˬ hui henˇ htaˇ, ngaˬ hui oˉ kʼoˍ pui ve gʼaˇ hteꞈ daꞈ la tuˬ awˬ hkʼaˇ htaꞈ teˇ geh henˇ tuˬ yoˬ. Yaˬhoˉvaˬ htaꞈ cawˇ ve hkʼaw oˉ kʼoˍ pui ve, aˬ htoꞈ ma te ngaˬ hui ha lehˬ tuˬ te laˇ ve kaꞈ teˇ geh henˇ tuˬ yoˬ.

4. Oˇ htaˇ teˇ co˗e Yaˬhoˉvaˬ ve kanˉ te ve chaw Yaˬhoˉvaˬ htaꞈ haꞈ leh yawˆ yan ve tehꞈ Yeˍsuˆ hkʼaˬ hkʼe hpeuꞈ maw laˇ ve le?

⁴ Yeˍsuˆ ve awˬ co˗e maˇ gaˬ sheˍ htaˇ, Yaˬhoˉvaˬ ve kanˉ te ve chaw ka tiꞈ yeˬ ve laiˉ gʼaˇ Aˍbeˍlaˆ, Noˉaꞈ, Aˍbraˍhanˍ, leh Yawˇbaˆ yawˇ hui Yaˬhoˉvaˬ htaꞈ haꞈ leh yawˆ yan ve tehꞈ hkʼaˬ hkʼe hpeuꞈ maw laˇ ve le? Yawˇ hui na yuˬ leh yonˍ ve hkʼaw Yaˬhoˉvaˬ htaꞈ tuˉ tanˇ piˇ ve yoˬ. Yawˇ hui Yaˬhoˉvaˬ htaꞈ oˉ kʼoˍ hkʼaˬ hkʼe pui ve Liꞈ hpu hkʼaw hkʼa tawˍ lehˆ maˇ gʼa kʼoˆ laˇ taˍ. Yaꞈ hkʼaˇ, yawˇ hui Yaˬhoˉvaˬ htaꞈ nyi ma awˬ tawˬ hkʼa gaˬ oˉ kʼoˍ pui leh, yawˇ hui oˉ kʼoˍ pui ve htaꞈ Yaˬhoˉvaˬ haꞈ yuˬ piˇ ve yoˬ. Peuˬ hkʼawꞈ nawˉ Aˍbraˍhanˍ ve awˬ yaˇ awˬ duˬ htaꞈ Yaˬhoˉvaˬ lehˬ Moˉseˍ ve awˬ liˇ tawˇ hkawˇ yawˇ hui htaꞈ piˇ ve yoˬ. Awˬ liˇ tawˇ hkawˇ chi ve hkʼaw yawˇ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ tuˬ awˬ hkʼaˇ kaꞈ hkʼa tawˍ lehˆ kʼoˆ taˍ ve yoˬ.

5. Yeˍsuˆ suh leh kʼawꞈ teꞈ tu la peuˬ hkʼawꞈ nawˉ, oˉ kʼoˍ pui ve htaꞈ caˉ daꞈ ve hkʼaˬ hkʼe pa ve le?

⁵ Yeˍsuˆ suh leh kʼawꞈ teꞈ tu la peuˬ hkʼawꞈ nawˉ, Yaˬhoˉvaˬ lehˬ Hkriꞈ yaˇ htaꞈ Moˉseˍ ve awˬ liˇ tawˇ hkawˇ maˇ kʼawꞈ te tcuh˗o. (Roˉmaꞈ 10:4) Yaꞈ hkʼaˇ, yawˇ hui lehˬ “Hkriꞈ ve awˬ liˇ tawˇ hkawˇ” awˬ suhˉ htaꞈ gʼa kʼawꞈ te ve yoˬ. (Gaˍlaˍtiˆ 6:2) “Awˬ liˇ tawˇ hkawˇ” chi htaꞈ na yuˬ ve lehˬ tawnˇ gʼaw ve maˇ heˆ. Leh aˬ htoꞈ ma te gʼa ve, maˇ te gʼa ve bvuhꞈ tawnˇ taˍ leh gʼaꞈ te ve kaꞈ maˇ heˆ. Yaꞈ hkʼaˇ, Yeˍsuˆ htaꞈ henˇ yuˬ leh yawˇ maˍ laˇ ve htaꞈ gʼaꞈ te ve yoˬ. Chi beuꞈ teˇ co˗e ve Hkriꞈ yaˇ kaꞈ awˉ lawˉ peuˇ ve Hkriꞈ yaˇ hkʼa shuˍ gʼa te cawˇ ve yoˬ. Yaˬhoˉvaˬ nyi hkʼaˇ suh leh “gʼaˇ gʼa jehˇ tuˬ” yawˇ hui Yeˍsuˆ htaꞈ hkʼa dehꞈ henˇ yuˬ cawˇ ve yoˬ.—Maꞈhtehˍ 11:29.

6. Awˬ lawn chi ve hkʼaw ngaˬ hui awˬ bon gʼa tuˬ hkʼaˬ hkʼe gʼa te cawˇ ve le?

⁶ Yaˬhoˉvaˬ htaꞈ oˉ kʼoˍ pui ve ngaˬ hui teˇ hkʼaˇ leh teˇ hkʼaˇ htaꞈ gʼa henˇ htaˇ, a shu yawˇ awˬ to htaꞈ na nyi cawˇ ve, ‘chi teˇ hkui ngaˬ co ha hpawˇ uiˍ la mvuh la leh hkʼaˬ hkʼe taw te gʼa˗oˬ ve le?’ ‘Chi aꞈ kehˉ kʼawꞈ daꞈ la tuˬ ngaˬ pa gʼa˗aw laˇ?’ Nawˬ hkʼa dehꞈ te gʼa ve teˇ ceuˬ ceuˬ cawˬ˗oˬ ve yoˬ. Nawˬ daꞈ la tuˬ pa gʼa ve aˬ htoꞈ ma kʼawꞈ cawˬ sheˍ ve le? Yaˬhoˉvaˬ ga laˇ tuˬ bon lawˬ sheˍ.

7. Ngaˬ hui nyi ma awˬ tawˬ hkʼa gaˬ bon lawˬ htaˇ Yaˬhoˉvaˬ hkʼaˬ hkʼe dawˇ ve le?

⁷ Ngaˬ hui Yaˬhoˉvaˬ htaꞈ oˉ kʼoˍ pui ve lehˬ yawˇ geh bon lawˬ ve. Daꞈ kehˬ jaˇ ve aˉ po kʼoˍ bon yehˬ hkʼaw tuˉ tanˇ tuˬ sha hawnˉ hkʼa dehꞈ gu taˍ ve hkʼe, ngaˬ hui ve bon lawˬ hkawˇ kaꞈ chi ve htaꞈ shuˍ ve tehꞈ Liꞈ hpu hkʼaw kʼoˆ taˍ ve yoˬ. Peuˬ hkʼawꞈ nawˉ Gʼuiˬ sha ve bon yehˬ htaꞈ kʼoˆ gaˇ ve yoˬ. (Chiˇ mvuh ve 141:2) Sha hawnˉ lehˬ hawnˉ jaˇ leh Yaˬhoˉvaˬ nyi hkʼaˇ suh tuˬ te piˇ ve yoˬ. Chi ve hkʼa shuˍ, ngaˬ hui bon lawˬ htaˇ hkʼa sha sha˗ehˬ ve tawˇ hkawˇ yehˇ ve kʼo, nyi ma awˬ tawˬ hkʼa gaˬ “bon lawˬ ve htaꞈ Gʼuiˬ sha nyi ma cawˇ tuˬ yoˬ.” (Tawˇ naˉ ve 15:8; Bon maˍ ve 33:10) Ngaˬ hui bon lawˬ htaˇ Yaˬhoˉvaˬ htaꞈ hkʼaˬ hkʼe taw haꞈ ve kʼoˆ piˇ leh yawˇ ngaˬ hui htaꞈ te laˇ ve awˬ ceuˬ teˇ hpaˍ awˬ bon uiˍ jaˇ tehꞈ kʼoˆ laˇ tcuh gaˇ ve yoˬ. Chi hkʼoˆ kaꞈ, ngaˬ hui dawˇ haˍ dawˇ hkiˉ ve, dawˇ law ve, leh loˍ ve yawˇ htaꞈ kʼoˆ laˇ tcuh gaˇ ve yoˬ. Ngaˬ hui bon maˇ lawˬ sheˍ htaˇ, aˬ htoꞈ ma lawˬ tuˬ awˉ lawˉ dawˇ nyi cawˇ ve yoˬ. Chi hkʼe te ve kʼo, mvuhˇ naw ma hkʼoˆ chehˇ ve Awˬ pa htaꞈ daꞈ jaˇ ve, “sha hawnˉ” tuˉ tanˇ piˇ chehˇ ve yoˬ.

8. Ngaˬ hui Yaˬhoˉvaˬ htaꞈ hkʼaˬ hkʼe te chiˇ mvuh gʼa tuˬ le?

⁸ Ngaˬ hui Yaˬhoˉvaˬ htaꞈ oˉ kʼoˍ pui ve lehˬ yawˇ htaꞈ chiˇ mvuh ve. (Chiˇ mvuh ve 34:1) Ngaˬ hui Yaˬhoˉvaˬ htaꞈ chiˇ mvuh ve lehˬ, yawˇ ve te hkʼaˇ dawˇ hkʼaˇ daꞈ jaˇ ve leh yawˇ te taˍ ve awˬ ceuˬ htaꞈ kʼoˆ ve yoˬ. Ngaˬ hui yawˇ htaꞈ awˬ bon uiˍ jaˇ tehꞈ kʼoˆ piˇ ve kʼo, yawˇ ve awˬ lawn laiˉ ceuˬ htaꞈ kʼoˆ tuˬ cawˬ ve yoˬ. Yawˇ ngaˬ hui htaꞈ te laˇ ve awˬ ceuˬ teˇ hpaˍ htaꞈ dawˇ nyi ve kʼo, ngaˬ hui hkʼaˬ htaˆ kaꞈ yawˇ htaꞈ chiˇ mvuh gʼa tuˬ awˬ hkʼaˇ laiˉ hkʼaˇ cawˬ ve yoˬ. Ngaˬ hui Yaˬhoˉvaˬ htaꞈ chiˇ mvuh gʼa ve teˇ hkʼaˇ lehˬ, hto toˇ ve yoˬ. Liꞈ hpu hkʼaw kʼoˆ ve, “Yeˍsuˆ htaꞈ pa taw,  ngaˬ hui Gʼuiˬ sha htaꞈ hkʼaˬ htaˆ kaꞈ chiˇ mvuh ve tanˇ tuˬ teˇ ceuˬ tanˇ piˇ˗a veuˬ. Chi hkʼe kʼoˆ ve lehˬ, ngaˬ hui ve mawꞈ kʼaw awˬ hkʼaw lo tawˆ la ve tawˇ hkawˇ teˇ hpaˍ” hpehꞈ ve yoˬ. (Heˍbrehˇ 13:15) Ngaˬ hui Yaˬhoˉvaˬ geh aˬ htoꞈ ma ve awˬ lawn bon lawˬ tuˬ maˇ lawˬ sheˍ htaˇ dawˇ nyi ve hkʼa shuˍ, ngaˬ hui hto toˇ˗e htaˇ shu geh aˬ htoꞈ ma ve awˬ lawn yaw piˇ tuˬ awˉ lawˉ dawˇ nyi cawˇ ve yoˬ. Chi hkʼoˆ kaꞈ, ngaˬ hui hto toˇ htaˇ ha lehˬ ha kʼa te ve yoˬ. Ngaˬ hui chi hkʼe te ve kʼo, Yaˬhoˉvaˬ htaꞈ daꞈ jaˇ ve sha hawnˉ tuˉ tanˇ piˇ chehˇ ve yoˬ.

9. Yaˬhoˉvaˬ ve chaw hpawnˬ daꞈ htaˇ, yawˇ hui daꞈ jaˇ ve awˬ bon aˬ htoꞈ ma gʼa ve le? A shu yawˇ ve hpehꞈ laˬ jaw ve awˬ lawn kʼoˆ maˍ laˇ sheˍ.

⁹ Ngaˬ hui Yaˬhoˉvaˬ htaꞈ oˉ kʼoˍ pui ve lehˬ hpawnˬ daꞈ˗e ve. Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, “nawˬ hui hawˉ hkʼaˆ paˍ hkʼa peu˗eˬ, teˇ hkʼawꞈ shehˆ pawˆ Gʼuiˬ sha htaꞈ oˉ kʼoˍ pui kuiˬ lo” gʼa laˬ ve yoˬ. (Bon maˍ ve 16:16) Yawˇ hui chi hkʼe te gʼa tuˬ, yehˬ leh hko htaꞈ kaꞈ gʼa baˬ taˉ ve yoˬ. Yaꞈ hkʼaˇ, Yaˬhoˉvaˬ ka tiꞈ te piˇ ve, “chaw teˇ gʼaˇ kaꞈ nawˬ hui ve mvuhˇ miˬ htaꞈ ca bawˆ la tuˬ ve maˇ heˆ.” (Tawˆ kʼai ve 34:24) Iˉsaˍreˍlaˆ chaw Yaˬhoˉvaˬ htaꞈ gʼaˇ va jaˇ ve pa taw, teˇ hkʼawꞈ le le Paˍsaˍhkaˍ pawehˇ te ve kʼai ve yoˬ. Chi yawˇ hui awˬ bon laiˉ ceuˬ gʼa tuˬ te piˇ ve yoˬ. Iˉsaˍreˍlaˆ chaw Yaˬhoˉvaˬ ve awˬ liˇ awˬ hkʼaˇ gʼa henˇ leh hkʼa dehꞈ na gʼa ve yoˬ. Yaˬhoˉvaˬ yawˇ hui htaꞈ te piˇ ve daꞈ jaˇ ve awˬ ceuˬ teˇ hpaˍ htaꞈ kaꞈ dawˇ nyi gʼa ve yoˬ. Yaˬhoˉvaˬ htaꞈ haꞈ ve chaw htaꞈ kaꞈ yawˇ hui gʼa mawˬ daꞈ ve yoˬ. Chi yawˇ hui awˬ gʼaˇ gʼa jaˇ tuˬ te piˇ ve yoˬ. (Bon maˍ ve 16:15) Chi beuꞈ teˇ co˗e kaꞈ hkʼa shuˍ, hpawnˬ daꞈ˗e tuˬ laiˉ ceuˬ yuˬ tanˇ ve kʼo, awˬ bon gʼa ve yoˬ. Chi hkʼoˆ kaꞈ, ngaˬ hui hpawnˬ daꞈ˗e htaˇ gu taˍ ve htaꞈ hkʼawꞈ ve kʼo, Yaˬhoˉvaˬ hkʼaˬ hkʼe taw ha lehˬ jaˇ ve htaꞈ dawˇ nyi sheˍ.

10. Kʼa muiˬ hkawˇ kʼa ve kaꞈ aˬ htoꞈ ma te Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ ve awˬ ceuˬ hpehꞈ ve le?

¹⁰ Ngaˬ hui Yaˬhoˉvaˬ htaꞈ oˉ kʼoˍ pui ve lehˬ yawˇ htaꞈ kʼa muiˬ hkawˇ kʼa chiˇ mvuh ve. (Chiˇ mvuh ve 28:7) Kʼa muiˬ hkawˇ kʼa ve lehˬ Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ ve tehꞈ Iˉsaˍreˍlaˆ chaw hui shawˍ ve yoˬ. Jawˇ mawˇ Daˍviˆ lehˬ Leˍviˆ chaw 288 gʼaˇ htaꞈ bon yehˬ hkʼaw kʼa muiˬ hkawˇ kʼa tuˬ awˬ vuiˬ piˇ ve yoˬ. (1 Raˍsaˍvanˍ 25:1, 6-8) Chi beuꞈ teˇ co˗e Yaˬhoˉvaˬ htaꞈ haꞈ ve tehꞈ hpeuꞈ maw piˇ ve lehˬ, yawˇ htaꞈ kʼa muiˬ hkawˇ kʼa chiˇ mvuh ve yoˬ. Ngaˬ hui kʼa muiˬ hkawˇ awˬ suhˉ kʼa ve hkʼa dehꞈ maˇ cheuˬ ve, leh awˬ hkawˇ hkʼa dehꞈ maˇ daꞈ ve htawˇ, teꞈ chiˉ maˇ heˆ. ‘Ngaˬ hui tawˇ laiˉ ceuˬ yaw yaꞈ puiˉ ve’ tehꞈ tawnˇ taˍ sheˍ. Yaꞈ hkʼaˇ, ngaˬ hui Gʼuiˬ sha ve kanˉ te ve leh hpawnˬ daꞈ ve hkʼaw hkʼaˬ htaˆ kaꞈ tawˇ yaw ve maˇ heˆ laˇ? (Yaˍkoˆ 3:2) Chi ve hkʼa shuˍ shuˍ, ngaˬ hui kʼa muiˬ hkawˇ kʼa ve hkʼa dehꞈ maˇ cheuˬ ve htawˇ, Yaˬhoˉvaˬ htaꞈ kʼa muiˬ hkawˇ kʼa chiˇ mvuh piˇ gaˇ ve yoˬ.

11. Chiˇ mvuh ve liꞈ 48:13 hkʼaw kʼoˆ taˍ ve hkʼe, aˬ htoꞈ ma te ngaˬ hui yehˬ kʼa hkʼaw oˉ kʼoˍ pui tuˬ awˬ yanˇ shawˍ teh taˍ cawˇ ve le?

¹¹ Ngaˬ hui Yaˬhoˉvaˬ htaꞈ oˉ kʼoˍ pui ve lehˬ a shu yawˇ hkʼaˇ yawˇ Liꞈ hpu henˇ ve leh Gʼuiˬ sha ve awˬ lawn yaˇ htaꞈ maˍ piˇ ve. Shinˉ nyi lehˬ Iˉsaˍreˍlaˆ chaw kanˉ maˇ gʼa te leh yawˇ hui Yaˬhoˉvaˬ geh meuˆ daꞈ tuˬ awˬ yanˇ yehˇ ve yoˬ. (Tawˆ kʼai ve 31:16, 17) Yaˬhoˉvaˬ htaꞈ ka tiꞈ yeˬ ve Iˉsaˍreˍlaˆ chaw Yaˬhoˉvaˬ ve awˬ lawn leh yawˇ te ve daꞈ ve awˬ ceuˬ kaꞈ yaˇ htaꞈ maˍ piˇ ve yoˬ. Chi beuꞈ teˇ co˗e ngaˬ hui kaꞈ Liꞈ hpu gʼaw tuˬ leh a shu yawˇ hkʼaˇ yawˇ Liꞈ hpu henˇ tuˬ awˬ yanˇ shawˍ teh cawˇ ve yoˬ. Chi lehˬ Yaˬhoˉvaˬ htaꞈ oˉ kʼoˍ pui ve teˇ ceuˬ hpehꞈ leh yawˇ geh meuˆ daꞈ tuˬ te laˇ ve yoˬ. (Chiˇ mvuh ve 73:28) Leh ngaˬ hui hkʼaˬ htaˆ kaꞈ yehˬ kʼa hkʼaw oˉ kʼoˍ pui ve te ve kʼo, yaˇ Yaˬhoˉvaˬ geh meuˆ daꞈ tuˬ ga piˇ ve yoˬ.—Chiˇ mvuh ve 48:13 gʼaw sheˍ.

12. Daꞈ kehˬ ve aˉ po kʼoˍ bon yehˬ leh oˇ kaˬ lo cawˬ ve awˬ ceuˬ teˇ hpaˍ htaꞈ te ve Yaˬhoˉvaˬ hkʼaˬ hkʼe dawˇ ve le? Awˬ lawn chi ngaˬ hui htaꞈ aˬ htoꞈ ma maˍ laˇ ve le?

¹² Ngaˬ hui Yaˬhoˉvaˬ htaꞈ oˉ kʼoˍ pui ve lehˬ hpawnˬ daꞈ kuiˬ yehˬ te leh nyi haꞈ shaˉ ve. Liꞈ hpu hkʼaw kʼoˆ ve daꞈ kehˬ ve aˉ po kʼoˍ bon yehˬ te ve leh oˇ kaˬ lo cawˬ ve awˬ ceuˬ teˇ hpaˍ lehˬ daꞈ jaˇ ve awˬ vuiˬ hpehꞈ ve yoˬ. (Tawˆ kʼai ve 36:1, 4) Chi beuꞈ teˇ co˗e hpawnˬ daꞈ kuiˬ yehˬ te ve leh Gʼuiˬ sha ve kanˉ hkʼaˇ ve yehˬ teˇ hpaˍ te ve Yaˬhoˉvaˬ  htaꞈ oˉ kʼoˍ pui ve teˇ ceuˬ hpehꞈ leh daꞈ jaˇ ve awˬ vuiˬ hpehꞈ ve yoˬ. Awˬ viˉ awˬ nyi kanˉ chi ve teˇ hpaˍ htaꞈ ga tuˬ awˬ yanˇ yuˬ tanˇ maˇ jaˇ. Ngaˬ hui kaꞈ yawˇ hui te ve awˬ ceuˬ teˇ hpaˍ htaꞈ awˬ hpfuhˇ shiˍ ve yoˬ. Chi hkʼoˆ kaꞈ, awˬ viˉ awˬ nyi chi teˇ hpaˍ teˇ yehˬ peuˬ teˇ yehˬ hto to˗e tuˬ awˬ yanˇ shawˍ teh leh teˇ hpaˍ kʼo gʼuˇ suhˍ peuˍ ve kaꞈ te gaˇ ve yoˬ. Yawˇ hui hkʼaˬ htaˆ kaꞈ gʼuˇ suhˍ peuˍ ve te keunˍ ve kʼo, nyi haꞈ shaˉ paˍ yawˇ hui htaꞈ te tcuh tuˬ htawˇ dawˇ nawˬ dawˇ maˇ cawˬ. Chi hkʼe te ve lehˬ nyi haꞈ shaˉ paˍ Gʼuiˬ sha ve kanˉ hkʼaˇ hpawˇ yehˬ te ve htaꞈ kaꞈ awˬ gʼaˇ piˇ chehˇ ve yoˬ. Ngaˬ hui lehˬ yehˬ te ve hpawˇ te puiˉ ve, maˇ te puiˉ ve htawˇ, ngaˬ hui teˇ gʼaˇ le le kaꞈ hpawnˬ daꞈ kuiˬ yehˬ hkʼaˬ htaˆ kaꞈ daꞈ ve cawˬ tuˬ nyi haꞈ shaˉ gʼa ve yoˬ.

13. Hpu tanˇ tanˇ ve hpawˇ ngaˬ hui hkʼaˬ hkʼe dawˇ nyi cawˇ ve le?

¹³ Yaˬhoˉvaˬ htaꞈ oˉ kʼoˍ pui ve lehˬ yawˇ ve mvuhˇ miˬ hpawˇ ga tuˬ hpu tanˇ tanˇ ve. Iˉsaˍreˍlaˆ chaw Paˍsaˍhkaˍ pawehˇ ca te˗e htaˇ, yawˇ hui te gʼa ve hkʼe Yaˬhoˉvaˬ htaꞈ tuˉ tanˇ piˇ tuˬ kaꞈ yuˬ kʼai ve yoˬ. Chi lehˬ Yaˬhoˉvaˬ yawˇ hui htaꞈ gu piˇ ve teˇ ceuˬ le le htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ. (Bon maˍ ve 16:16) Ngaˬ hui kaꞈ Yaˬhoˉvaˬ htaꞈ haꞈ leh yawˇ te laˇ ve teˇ ceuˬ le le htaꞈ awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa tuˬ le? Te gʼa ve teˇ hkʼaˇ lehˬ hpawnˬ daꞈ kuiˬ lo hpu tanˇ tanˇ piˇ leh miˬ guiˬ chi hkʼoˆ teˇ kaˬ le le te ve kanˉ htaꞈ yehˇ tuˬ hpu tanˇ tanˇ piˇ gʼa ve yoˬ. Tcuh yaˇ Pawˇluꞈ kʼoˆ ve, “chaw teˇ gʼaˇ cawˬ maˇ cawˬ ve htaꞈ Gʼuiˬ sha nyi ve maˇ heˆ. Te gaˇ ve nyi ma cawˬ ve kʼo, yawˇ haꞈ yuˬ ve yoˬ.” (2 Kawˇrenˍhtuˆ 8:4, 12) Ngaˬ hui hpu tanˇ tanˇ piˇ ve maˇ maˇ ve htawˇ ha lehˬ ha kʼa tanˇ piˇ ve kʼo, Yaˬhoˉvaˬ ha lehˬ jaˇ tuˬ yoˬ.—Maˍkuˆ 12:42-44; 2 Kawˇrenˍhtuˆ 9:7.

14. Tawˇ naˉ ve liꞈ 19:17 hkʼaw kʼoˆ taˍ ve hkʼe, awˬ viˉ awˬ nyi loˍ ve htaꞈ ngaˬ hui ga piˇ ve kʼo, Yaˬhoˉvaˬ hkʼaˬ hkʼe dawˇ ve le?

¹⁴ Yaˬhoˉvaˬ htaꞈ oˉ kʼoˍ pui ve lehˬ awˬ viˉ awˬ nyi loˍ ve htaꞈ ga piˇ ve. Iˉsaˍreˍlaˆ chaw lehˬ haˍ ve gʼawˇ ve chaw htaꞈ ga piˇ ve kʼo, yawˇ hui te taˍ ve awˬ ceuˬ htaꞈ Gʼuiˬ sha kʼawꞈ hkʼawꞈ piˇ tuˬ yoˬ tehꞈ ka tiꞈ te piˇ ve yoˬ. (Bon maˍ ve 15:7, 10) Awˬ viˉ awˬ nyi tuꞈ ve hkanˍ ve htaꞈ ngaˬ hui ga piˇ ve teˇ pawˆ le le, ngaˬ hui Yaˬhoˉvaˬ htaꞈ laꞈ shawnˍ piˇ ve hkʼe hpehꞈ ve yoˬ. (Tawˇ naˉ ve 19:17 gʼaw sheˍ.) Tawˇ pa haˉ te kʼo, Hpiˇliˇpiˆ Hkriꞈ yaˇ Pawˇluꞈ htawnˍ hkʼaw chehˇ htaˇ mawˇ feu piˇ ve yoˬ. Yawˇ kʼoˆ ve, “laꞈ shawnˍ oˇ ve teˇ hpaˍ lehˬ, awˬ shaˉ hawnˉ ve awˬ ceuˬ kaꞈ, Gʼuiˬ sha nyi hkʼaˇ suh leh haꞈ yuˬ ve tanˇ tuˬ kaꞈ hpehꞈ ve yoˬ.” (Hpiˇliˇpiˆ 4:18) Chi htaꞈ pa taw, nawˬ chehˇ ve Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ dawˇ nyi leh a shu yawˇ awˬ to htaꞈ na nyi cawˇ ve, ‘ngaˬ ga piˇ gʼa ve a shu teˇ gʼaˇ cawˬ ve le?’ Ngaˬ hui awˬ yanˇ, awˬ gʼaˇ, puiˉ ve hpehꞈ ve, leh loˍ ve chaw htaꞈ ngaˬ hui ve hpu yehˇ leh ga piˇ ve kʼo, Yaˬhoˉvaˬ ha lehˬ jaˇ tuˬ yoˬ. Chi lehˬ Yaˬhoˉvaˬ htaꞈ oˉ kʼoˍ pui ve teˇ ceuˬ hpehꞈ ve tehꞈ yawˇ shawˍ ve yoˬ.—Yaˍkoˆ 1:27.

15. Yaˬhoˉvaˬ htaꞈ oˉ kʼoˍ pui ve lehˬ aˬ htoꞈ ma te awˬ vuiˬ hpehꞈ ve tehꞈ ngaˬ hui maˇ dawˇ nyi cawˇ ve le?

¹⁵ Yaˬhoˉvaˬ htaꞈ oˉ kʼoˍ pui ve lehˬ awˬ yanˇ yehˇ leh gʼa coˇ caˇ ve yoˬ. Yaꞈ hkʼaˇ, chi ngaˬ hui ve awˬ vuiˬ ceh hpehꞈ ve maˇ heˆ. (1 Yoˇhanˬ 5:3) Aˬ htoꞈ ma pa taw le? Ngaˬ hui Yaˬhoˉvaˬ htaꞈ haꞈ jaˇ ve pa taw, yawˇ htaꞈ oˉ kʼoˍ pui ve yoˬ. Yaˇ paˍ ehˉ teˇ gʼaˇ yawˇ awˬ pa htaꞈ teˇ ceuˬ ceuˬ te piˇ gaˇ ve htaꞈ dawˇ nyi sheˍ. Yawˇ awˬ pa htaꞈ awˬ han shawehˇ piˇ tuˬ awˬ yanˇ laiˉ naˍ riˍ yehˇ ve yoˬ. Yawˇ awˬ pa htaꞈ haꞈ leh laꞈ shawnˍ gʼa piˇ ve pa taw, awˬ yanˇ laiˉ naˍ riˍ gʼa yehˇ ve kaꞈ teꞈ chiˉ maˇ heˆ tehꞈ dawˇ ve yoˬ. Chi ve hkʼa shuˍ shuˍ, ngaˬ hui Yaˬhoˉvaˬ htaꞈ haꞈ jaˇ. Hkʼe te leh, ngaˬ hui Yaˬhoˉvaˬ htaꞈ oˉ kʼoˍ pui tuˬ awˬ yanˇ yehˇ leh coˇ caˇ ve kʼo ngaˬ hui ha lehˬ ve yoˬ.

16. Heˍbrehˇ liꞈ 6:10 hkʼaw kʼoˆ taˍ ve hkʼe, ngaˬ hui Yaˬhoˉvaˬ awˬ pon coˇ caˇ leh te ve htaꞈ yawˇ hkʼaˬ hkʼe dawˇ ve le?

¹⁶ Yaˇ htaꞈ haꞈ ve awˬ pa awˬ e lehˬ yaˇ teˇ gʼaˇ le le yawˇ hui htaꞈ laꞈ shawnˍ hkʼa shuˍ peꞈ laˇ tuˬ maˇ dawˇ law. Yaˇ teˇ gʼaˇ le le maˇ shuˍ daꞈ leh te gʼa ve kaꞈ maˇ shuˍ daꞈ ve tehꞈ yawˇ hui shiˍ ve yoˬ. Ngaˬ hui teˇ gʼaˇ le le kaꞈ hkʼa shuˍ te maˇ gʼa ve tehꞈ  Yaˬhoˉvaˬ shiˍ ve yoˬ. Nawˬ haꞈ ve leh shiˍ daꞈ ve chaw aꞈ kehˉ nawˬ te gʼa maˇ ve yoˬ hehˉ. A shaꞈ maˇ ve, maˇ chehˇ sha puiˉ ve, maˇ heˆ leh yehˬ kʼa hkʼaw gʼa nyi haꞈ shaˉ cawˇ ve pa taw, te gʼa i ve yoˬ. Chi hkʼe hpehꞈ ve kʼo, awˬ gʼaˇ taˇ nuˇ. (Gaˍlaˍtiˆ 6:4) Nawˬ hkʼaˬ hkʼe taw te gʼa ve htawˇ, nawˬ te gʼa ve awˬ ceuˬ htaꞈ Yaˬhoˉvaˬ maˇ leunˇ. Yaˬhoˉvaˬ awˬ pon nawˬ te gʼa ve hkʼe te piˇ leh cawˇ ve hpawˇ te ve kʼo, yawˇ nyi hkʼaˇ suh jaˇ tuˬ yoˬ. (Heˍbrehˇ 6:10 gʼaw sheˍ.) Yaˬhoˉvaˬ nawˬ nyi ma hkʼaw shiˍ leh nawˬ yawˇ awˬ pon hkʼaˬ hkʼe taw te gaˇ ve htaꞈ kaꞈ shiˍ ve yoˬ. Yawˇ htaꞈ oˉ kʼoˍ pui tuˬ nawˬ te ve awˬ ceuˬ htaꞈ kaꞈ ha lehˬ tcuh gaˇ ve yoˬ.

17. (a) Oˉ kʼoˍ pui ve teˇ ceuˬ ceuˬ ngaˬ hui te gʼa haˍ jaˇ tehꞈ dawˇ ve kʼo, ngaˬ hui hkʼaˬ hkʼe te cawˇ ve le? (b) Awˇ ceˬ awˇ fa hkʼaw gʼa mawˬ ve oˉ kʼoˍ pui ve teˇ ceuˬ leh teˇ ceuˬ “ nawˬ ha lehˬ jaˇ tuˬ” hkʼaˬ hkʼe ga laˇ ve le?

¹⁷ Yaˬhoˉvaˬ htaꞈ oˉ kʼoˍ pui ve teˇ ceuˬ ceuˬ te gʼa haˍ jaˇ tehꞈ dawˇ ve kʼo, nawˬ hkʼaˬ hkʼe te cawˇ ve le? Tawˇ pa haˉ te kʼo, a shu yawˇ hkʼaˇ yawˇ Liꞈ hpu henˇ ve maˇ heˆ leh hto toˇ ve chi ve teˇ hpaˍ htaꞈ ngaˬ hui gʼaˇ hteꞈ te ve kʼo, caˉ leh kʼawꞈ te gaˇ tuˬ yoˬ. Leh awˬ bon gʼa ve htaꞈ kaꞈ ngaˬ hui gʼa mawˬ ve yoˬ. Awˬ gʼaˇ caw ve leh teˇ ceuˬ ceuˬ te jawˬ ve oˉ kʼoˍ pui ve htaꞈ tehˆ ve kʼo, chi teˇ hpaˍ ngaˬ hui hkʼaˬ htaˆ kaꞈ maˇ te jawˬ ve kʼo maˇ cheuˬ. Yaꞈ hkʼaˇ, ngaˬ hui teˇ nyi le le te jawˬ ve kʼo, awˉ lawˉ htaˇ ngaˬ hui awˬ yanˇ maˇ yehˇ maw ve yoˬ hehˉ. Yaꞈ hkʼaˇ, ngaˬ hui a yehˉ yehˉ te jawˬ leh ngaˬ hui te gʼa la˗oˬ htaˇ, teˇ pawˆ aꞈ kehˉ teˇ pawˆ awˬ yanˇ yehˇ maˇ ve kʼo, ngaˬ hui dawˇ cawˇ leh awˬ yanˇ yehˇ maˇ la tuˬ yoˬ. Nawˬ dawˇ kʼo, oˉ kʼoˍ pui ve kaꞈ awˬ lawn chi htaꞈ shuˍ daꞈ˗aw laˇ?

18. Ngaˬ hui aˬ htoꞈ ma te tuˬ hpanˍ taˍ laˇ ve le? Leh ngaˬ hui chi hkʼe te ve kʼo, aˬ htoꞈ ma awˬ bon gʼa ve le?

¹⁸ Ngaˬ hui Gʼuiˬ sha htaꞈ oˉ kʼoˍ pui tuˬ hpanˍ taˍ laˇ ve yoˬ. Ngaˬ hui chi hkʼe te htaˇ ha lehˬ ve, leh Yaˬhoˉvaˬ htaꞈ oˉ kʼoˍ pui tuˬ co co taiˍ taiˍ dawˇ law kuiˬ cawˬ ve yoˬ. (Tawˇ naˉ ve 10:22) Chi hkʼoˆ kaꞈ, Yaˬhoˉvaˬ yawˇ ve kanˉ te ve chaw shoꞈ shaꞈ ve gʼa hpuˇ chehˇ ve htaꞈ ga piˇ chehˇ ve tehꞈ ngaˬ hui shiˍ ve pa taw, nyi ma gawˬ lehˍ cawˬ gʼa ve yoˬ. (Iˉsaˍyaˆ 41:9, 10) Ngaˬ hui Yaˬhoˉvaˬ htaꞈ oˉ kʼoˍ gʼa pui ve pa taw, ngaˬ hui ha lehˬ tuˬ te laˇ ve laiˉ hkʼaˇ cawˬ ve yoˬ. “Jawˇ mawˇ Gʼuiˬ sha˗oˬ, nawˬ lehˬ awˬ meꞈ awˬ hponˇ teˇ ceuˬ, yawˆ yan ve teˇ ceuˬ gʼa keunˍ ve yoˬ!”—Hpeuꞈ maˍ ve 4:11.