1-2. Ki lika mañi zeluswanela kueza kuli Mulimu aamuhele sebelezo yaluna?

 KI LIKA mañi zetahanga mwa munahano wamina hamuutwa linzwi la kulapela? Mwendi munahananga za muzwale yakubami ni kulapela ku Jehova kuzwelela kwatasaa pilu pili asika lobala kale. Kamba mwendi munahananga za lubasi lolueza tukiso ya kulapela sina lubasi.

² Mwa miinelo yeo kaufela, batu bao balapela Jehova. Kana Jehova ukaamuhela sebelezo yabona? Ukaamuhela sebelezo yeo haiba zebaeza zaswalisana ni tato yahae mi bamulata ni kumukuteka. Lulata hahulu Jehova. Lwaziba kuli waswanela kulapelwa mi lubata kueza molukonela kaufela kuli lumulapele ka nzila yelukile.

3. Lukanyakisisañi mwa taba ye?

³ Mwa taba ye, lukanyakisisa libaka Jehova hanaaamuhezi bulapeli bwa batanga bahae mwa linako za kwamulaho mi hape lukanyakisisa lika ze 8 zeluswanela kueza kuli Jehova aamuhele bulapeli bwaluna kacenu. Halunze lueza cwalo, lwakona kunahana zelukona kueza ka butu ilikuli lulapele Jehova ka nzila yelukile. Hape lukanyakisisa libaka kulapela Jehova ka nzila yelukile haku lutahiseza tabo.

4. Batanga ba Jehova bane bapilile mwa linako za kwamulaho pili Kreste asika taha kale fa lifasi nebabonisize cwañi kuli nebakuteka ni kulata Jehova?

⁴ Mwa linako za kwamulaho pili Kreste asika taha kale fa lifasi, baana babasepahala babacwale ka Abele, Nuwe,  Abrahama, ni Jobo nebabonisize kuli nebakuteka ni kulata Jehova. Ka mukwa ufi? Nebaezize cwalo ka kuutwa Mulimu, kubonisa tumelo ku yena, ni kufa matabelo. Bibele haitalusi lika kaufela zene baezize mwa bulapeli bwabona. Nihakulicwalo, nebaezize mone bakonela kaufela kukuteka Jehova, mi Jehova naaamuhezi bulapeli bwabona. Hamulaho wa nako, Jehova afa baikulu ba Abrahama Mulao ka kuitusisa Mushe. Mulao wo neunani litaelo zenongile zenebonisa mwakulapelela Jehova ka nzila yemutabisa.

5. Jehova naabata kuli batanga bahae bamulapele cwañi Jesu hasaashwile ni kuzusiwa kwa bafu?

⁵ Jesu hasaashwile ni kuzusiwa kwa bafu, Jehova naasatokwi hape kuli batanga bahae bamamele Mulao wa Mushe. (Maro. 10:4) Bakreste nebatokwa kumamela mulao omunca, ili “mulao wa Kreste.” (Magal. 6:2) Nebatokwa kumamela “mulao” wo ka kulikanyisa mutala wa Jesu ni kusebelisa lituto zahae, isiñi ka kuupeta kamba kumamela milao yemiñata-ñata ya lika zene baswanela kueza ni zene baswanela kutokolomoha. Ni kacenu, Bakreste baeza mobakonela kaufela kulikanyisa Kreste ilikuli batabise Jehova ni kuli ‘bakatuluhe.’—Mat. 11:29.

6. Ki lika mañi zelutokwa kueza kuli lutusiwe ki taba ye?

⁶ Halunze lunyakisisa lika zeamiwa mwa bulapeli bwaluna, muipuze kuli: ‘Ki zwelopili mañi yeniezize mwa taba ye?’ Hape mwakona kuipuza kuli: ‘Ki lika mañi zeñwi zenitokwa kueza kuli nilapele Jehova ka nzila yelukile?’ Mutabe kabakala zwelopili yemuezize, kono hape mukupe Jehova kuli amituse kuziba lika zeñwi zemutokwa kueza.

7. Jehova uunga cwañi litapelo zaluna zezwelela kwatasaa pilu?

⁷ Lulapela Jehova halu muatumela ka tapelo. Bibele ibapanya litapelo zaluna kwa insense yelukisizwe hande yenefiwanga kwa tabernakele ni kwa tempele hasamulaho. (Samu 141:2) Insense yeo neitahisanga munko omunati ku Mulimu. Ka mukwa oswana, litapelo zaluna zezwelela kwatasaa pilu ‘zamunyakalalisa’ mane niha luitusisa feela manzwi abunolo. (Liprov. 15:8; Deut. 33:10) Lunani buikolwiso bwa kuli Jehova wanyakalalanga halu mutaluseza kuli lwamulata mi lwaitebuha lika zaluezeza. Ubata kuli lumutaluseze lika zelubilaeza, milelo yaluna, ni lika zelutabela. Kacwalo, musika lapela kale ku Jehova, munahanisisange litaba zemubata kubulela. Haiba mueza cwalo, tapelo yamina ikaswana sina “insense” yelukisizwe hande luli yemufa Ndataa mina wa kwa lihalimu.

8. Ki kolo mañi yende yelunani yona ya kulumbeka Mulimu?

⁸ Lulapela Jehova halu mulumbeka. (Samu 34:1) Lulumbeka Jehova halutaluseza batu babañwi moluitebuhela tulemeno twahae totunde ni misebezi yahae. Kacwalo, haiba luitebuha lika zaluezelize Jehova, luka mulumbeka. Kunahanisisanga bunde bwa Jehova, zona lika kaufela zaluezelize, kuka lutusa kuli luzwelepili kumulumbeka. Musebezi wa kukutaza sihulu ulufanga kolo yende hahulu ya “[kufa] Mulimu sitabelo sa milumbeko, fo kikuli, manzwi azwa mwa milomo yaluna.” (Maheb. 13:15) Sina feela halunahanisisanga zelubata kubulelela Jehova mwa tapelo pili lusika lapela kale, luswanela kunahanisisanga ka  tokomelo zeluka bulela kwa batu bolubata kukutaza ku bona. Lubata kuli “sitabelo sa milumbeko” selufa Mulimu sibe sesinde hahulu. Ki lona libaka halukutazanga ka mafulofulo.

9. Sina Maisilaele ba kwaikale, batanga ba Jehova batusiwanga cwañi habafumaneha kwa mikopano ya puteho? Mutaluse momutuselizwe ka butu.

⁹ Lulapela Jehova halufumaneha kwa mikopano ya puteho. Maisilaele ba kwaikale nebataluselizwe kuli: “Halaalu ka silimo, baana kaufela mwa sicaba sahenu baswanela kuitahisa fapilaa Jehova Mulimu wahao mwa sibaka sakaketa.” (Deut. 16:16) Nebanani kusiya mandu abona ni licalo zabona kamba masimu abona kusina yalilibelela. Kono Jehova naabasepisize kuli: “Hakuna mutu yakalakaza naha yahao nako yeuya kuyo bona pata ya Jehova Mulimu wahao.” (Exo. 34:24) Bakeñisa kuli nebanani tumelo yetiile ku Jehova, Maisilaele bane basaba Mulimu bao nebafumanehanga kwa mikiti ya ka silimo. Kacwalo, nebaikolanga limbuyoti zeñata; nebautwisisanga hande Mulao wa Mulimu, kunahanisisa bunde bwahae, ni kuikola siango sesinde ni Maisilaele babañwi. (Deut. 16:15) Ni kacenu, luikolanga limbuyoti zeswana halueza molukonela kaufela kufumaneha kwa mikopano ya puteho. Kaniti, Jehova watabanga haiba luitukiseza mikopano ni kufa likalabo zende zekuswani.

10. Ki kabakalañi kuopela haili kalulo ya butokwa mwa bulapeli bwaluna?

¹⁰ Lulapela Jehova haluopela lipina za Mubuso. (Samu 28:7) Maisilaele nebaanga kuopela kuba kalulo ya butokwa mwa bulapeli bwabona. Mulena Davida naaketile Malivi ba 288 kuli baopelange kwa tempele. (1 Makol. 25:1, 6-8) Kacenu, lubonisa kuli lwalata Mulimu haluopela lipina za milumbeko. Halutokwi kuba baopeli babande kuli lueze cwalo. Halunyakisiseñi mutala wo: “Kaufelaa luna lwasitatalanga hañata” haluambola, kono taba yeo hai lupaleliswangi kualaba kwa mikopano kamba kubulela haluli mwa bukombwa. (Jak. 3:2) Ka mukwa oswana, haluswaneli kupalelwa kuopelela Jehova lipina za milumbeko bakeñisa kuli luikutwa kuli halu baopeli babande.

11. Sina mokuboniselizwe kwa Samu 48:13, ki kabakalañi haluswanela kubanga ni nako ya kulapela sina lubasi?

¹¹ Lulapela Jehova haluituta Linzwi lahae ni kuluta bana baluna ka za hae. Mulao wa Sabata neufanga Maisilaele kolo ya kupumula kwa misebezi yabona ya ka zazi ni zazi ilikuli batiise silikani sabona ni Jehova. (Exo. 31:16, 17) Babañwi bane basepahala mwahalaa bona nebaitusisanga nako yeo kuluta bana babona ka za Jehova ni bunde bwahae. Ni luna luswanela kubanga ni nako ya kubala ni kuituta Linzwi la Mulimu ka butu. Yeo ki nzila yeñwi yelukona kulapela Jehova ka yona, mi ilutusa kusutelela hahulu ku yena. (Samu 73:28) Mi haluba ni nako ya kulapela sina lubasi, lukatusa bana baluna kuba ni silikani sesinde ni Ndataa luna yalilato ya kwa lihalimu.—Mubale Samu 48:13.

12. Luitutañi ku Jehova ka mwanaangela musebezi one baeza batu bane balukisa lisebeliso za kwa tabernakele?

¹² Lulapela Jehova haluyaha ni kubabalela libaka za kulapelela. Bibele italusa kuli musebezi wa kuyaha tabernakele ni lisebeliso zayona neli “musebezi okenile.” (Exo. 36:1, 4) Ni kacenu, Jehova uunga musebezi wa kuyaha Mandu A Mubuso ni libaka zeñwi za kopano kuba sebelezo yekenile. Mizwale ni likaizeli babañwi batandanga nako yeñata kueza misebezi yeo. Kaniti luli, lwaitebuha musebezi wa butokwa obaeza wa  kuzwisezapili Mubuso. Kono hape ni bona bakutazanga. Mane babañwi ku bona babata kuba mapaina. Baana-bahulu ba puteho bakona kutusa mwa musebezi wa kuyaha ka kusaliyeha kuketa mizwale ni likaizeli babasebeza ka taata bao kuba mapaina haiba bakwanisize zetokwahala kuli baketiwe. Ibe kuli lucuukile mwa musebezi wa buyahi kamba kutokwa, kaufelaa luna lwakona kutusa kukenisa miyaho yeo ni kuibabalela.

13. Luswanela kuunga cwañi linubu zelufanga kuli lituse mwa musebezi wa Mubuso?

¹³ Lulapela Jehova halutusa mwa musebezi wa Mubuso ka kufa linubu. Maisilaele nebasa swaneli feela kutaha mazoho-zoho fapilaa Jehova. (Deut. 16:16) Nebaswanela kufa limpo ka kuya ka miinelo yabona. Ka kueza cwalo, nebaka bonisa kuli nebaitebuha lika kaufela zanaa baezelize Jehova. Lukona kubonisa cwañi kuli lwalata Jehova mi lwaitebuha lika kaufela zaluezeza zelutusa kwa moya? Nzila yeñwi yelukona kueza cwalo ka yona ki ka kufa linubu zetusa kwa lisinyehelo za puteho yaluna ni mwa musebezi wa mwa lifasi kaufela ka kuya ka miinelo yaluna. Muapositola Paulusi naañozi kuli: “Haiba takazo iteñi pili, mutu walumelelwa fapilaa Mulimu hafa kulikana ni sanani sona, isiñi kulikana ni sasina.” (2 Makor. 8:4, 12) Jehova waitebuhanga linubu kaufela zelu mufa kuzwelela kwatasaa pilu niha likona kuba zenyinyani.—Mare. 12:42-44; 2 Makor. 9:7.

14. Ka kuya ka Liproverbia 19:17, Jehova uunga cwañi tuso yelufa mizwale ni likaizeli baluna babatokwile?

¹⁴ Lulapela Jehova halutusa Bakreste sina luna babatokwile. Jehova naasepisize kuli naakafuyaula Maisilaele bane batusa babotana. (Deut. 15:7, 10) Kaniti, nako kaufela halutusa Mukreste sina luna, Jehova uunga kuli lumufile mpo. (Mubale Liproverbia 19:17.) Ka mutala, Bakreste ba kwa Filipi hane bafile Paulusi mpo hanaali mwa tolongo, naabulezi kuli mpo yeo neili “sitabelo sesikateleha, sesitabisa ku Mulimu.” (Mafil. 4:18) Munahane ka za mizwale ni likaizeli mwa puteho yamina, mi muipuze kuli: ‘Kana kunani mutu yomuñwi yenikona kutusa?’ Jehova watabanga haluitusisa nako yaluna, maata, buikoneli, ni lika zeñwi za kwa mubili kutusa babatokwile. Uunga taba ya kutusa babañwi kuba ya butokwa mwa bulapeli bwaluna.—Jak. 1:27.

15. Ki kabakalañi halusa ngi kuli kulapela Jehova ka nzila yelukile kwaimeza, niha lutokwa kuitombola nako yaluna ni kuikataza?

¹⁵ Lutokwa kuitombola nako yaluna ni kuikataza kuli lulapele Jehova ka nzila yelukile. Kono kueza cwalo haku luimezi. (1 Joa. 5:3) Kabakalañi? Kakuli lulapela Jehova kabakala kuli lwamulata. Luungeñi kuli mwanana yomuñwi ubata kufa bo ndatahe siswaniso. Ukona kutanda nako yeñata kuswanisa siswaniso seo. Mwana yo hainyazi kuli utandile nako yeñata kuswanisa siswaniso seo. Walata bo ndatahe mi utabela kubafa mpo yeo. Ka mukwa oswana, bakeñisa kuli lwalata Jehova, lutabela kuitombola nako yaluna ni kueza molukonela kaufela kumulapela ka nzila yelukile.

16. Ka kuya ka Maheberu 6:10, Jehova uunga cwañi buikatazo bwaeza mañi ni mañi waluna kuli amutabise?

¹⁶ Bashemi babalata bana babona habalibeleli kuli mwana ni mwana uka bafa mpo yeswana. Baziba kuli bana babona bashutana mi banani buikoneli bobushutana. Ka mukwa oswana, Ndataa luna wa kwa lihalimu waziba kuli miinelo yaluna yashutana.  Mwendi mwakona kueza zeñata mwa sebelezo yamina kufita batu babañata bomuziba ni bomulata. Kamba mwendi hamukoni kueza zeñata sina batu babañwi kabakala busupali, mapongo, kamba buikalabelo bwa lubasi. Musike mwazwafa. (Magal. 6:4) Jehova haana kulibala musebezi wamina. Haiba mueza momukonela kaufela kumusebeleza ni kueza cwalo ka mabaka aswanela, muka mutabisa. (Mubale Maheberu 6:10.) Jehova mane waziba lika zemubata kumuezeza. Ubata kuli mube ni tabo ni buikolwiso bwa kuli waamuhela zemueza kaufela mwa sebelezo yamina ku yena.

17. (a) Ki lika mañi zelukona kueza haiba kulubela taata kueza likalulo zeñwi za bulapeli bwaluna? (b) Mutusizwe cwañi ki zebonisizwe mwa mbokisi yeli, “ Muekeze Kwa Tabo Yamina”?

¹⁷ Ki lika mañi zelukona kueza haiba kulubela taata kueza lika zeñwi za bulapeli bwaluna zecwale ka kueza tuto ya ka butu kamba kukutaza? Haiba luikataza kueza lika zeo kamita, lukana lwatabela hahulu kulieza mi lukatusiwa hahulu ki zona. Lukona kubapanya bulapeli bwaluna kwa lika zeñwi zecwale ka kueza papali yetiisa mubili kamba kuituta kuliza lipina fa siliziso sa lipina. Haiba lueza feela lika zeo ka siwela, mwendi haluna kueza hahulu zwelopili. Kono ki nto mañi yekaezahala haiba lueza cwalo zazi ni zazi? Lukona kukala ka kueza lika zeo ka nako yekuswani kono hasamulaho lukona kuekeza kwa nako yelueza cwalo hanyinyani-hanyinyani. Haluka lemuha kuli kueza lika zeo kwalutusa, lukona kunyolelwa hahulu kulieza mi lukaikolanga zona. Lukona kueza nto yeswana ni mwa bulapeli bwaluna.

18. Ki nto mañi ya butokwa hahulu yeluswanela kueza mwa bupilo bwaluna, mi lukatusiwa cwañi haiba lueza cwalo?

¹⁸ Kulapela Jehova ka pilu yaluna kaufela ki yona nto ya butokwa hahulu yeluswanela kueza. Haiba lueza cwalo, lukaba ni tabo, lukaikola bupilo, mi lukaba ni sepo ya kulapela Jehova kuya kuile. (Liprov. 10:22) Nihaiba ka nako ya cwale, lunani kozo ya mwa munahano kakuli lwaziba kuli Jehova watusanga batanga bahae habakopana ni miinelo yetaata. (Isa. 41:9, 10) Kusina kukakanya, kulapela Ndataa luna yalilato kulutahiseza tabo, mi waswanela “kufiwa kanya ni likute” ki libupiwa zahae kaufela.—Sin. 4:11.