1-2. Ntshinyi tshienza bua Nzambi anyishe ntendelelu wetu?

 NTSHINYI tshitu tshikuluila mu lungenyi pautu umvua batela muaku “kutendelela”? Pamuapa utu udifuanyikijila muanetu wa balume kampanda mutue binu lua ku bulalu buende usambila kumpala kua kulala. Anyi kabidi dîku kampanda dia bantu bikale ne disanka benza ntendelelu wa mu dîku.

² Mu bilejilu bionso bibidi abi bantu bonso abu badi benza malu a ntendelelu. Yehowa neitabe ntendelelu wabu anyi? Neamuitabe bobu bamuenza mu diumvuagana ne disua diende, bobu bamunange ne bamunemeka. Tudi banange Yehowa bikole menemene. Tudi bamanye ne: yeye ke udi mukumbane bua tuetu kumutendelela, ne tudi basue bua bionso bitudi tuenza bua kumutendelela bikale bimpe bitambe.

3. Ntshinyi tshituamona mu tshiena-bualu etshi?

³ Mu tshiena-bualu etshi netumone ntendelelu uvua Yehowa wanyisha pa kale. Netumone kabidi malu muanda mukulu adi enza bua Yehowa anyishe ntendelelu wetu matuku etu aa. Patudi tuenda tukonkonona malu aa tudi mua kuela meji a tshitudi mua kuenza bua kuakaja mushindu wetu wa kutendelela. Netujikije ne malu adi enza bua ntendelelu mulelela atupeteshe disanka.

4. Mmunyi muvua batendeledi ba Yehowa ba mu tshikondo tshia kumpala kua Yezu baleje ne: bavua banange Yehowa ne bamutumikila?

⁴ Mu tshikondo tshia kumpala kua Yezu, bantu ba lulamatu bu mudi: Abele, Noa, Abalahama, ne Yobo bakaleja muvuabu banange Yehowa ne bamutumikila. Ntshinyi tshivuabu benza? Bavua ne ditabuja kudiye, bamutumikila, ne bamulambula milambu. Mu Bible kabena baleja malu onso avuabu ne bua kuenza bua kutendelela Yehowa to. Kadi bidi bimueneka patoke ne: bavua benza muabu muonso bua kumutumbisha, ne yeye  pende uvua wanyisha ntendelelu wabu. Pashishe wakapesha ndelanganyi ya Abalahama Mikenji ya Mose. Mikenji ayi ivua ne malu masunguluke a mua kutendelela Yehowa mu mushindu uvuaye wanyisha.

5. Mmushindu kayi uvua Yehowa musue bua bena Kristo bikale bamutendelela panyima pa lufu lua Yezu ne dibishibua diende?

⁵ Panyima pa lufu lua Yezu ne dibishibua diende ku lufu, Yehowa kavua ulomba kabidi bua batendeledi bende bamutendele bilondeshile mikenji ivuaye mupeshe bena Isalele to. (Lomo 10:4) Bena Kristo bavua ne bua kulonda mikenji mipiamipia, mmumue ne: “mukenji wa Kristo.” (Gal. 6:2) Kutumikila “mukenji” au kakuvua kumvuija kukuata mêyi awu ku muoyo anyi kulamata mulongolongo wa malu a kuenza ne a kubenga kuenza to. Kadi kuvua kumvuija kuidikija tshilejilu tshia Yezu ne kulonda malu avuaye ulongesha. Lelu eu kabidi bena Kristo badi benza muabu muonso bua kulonda Kristo bua bamone mua kusankisha Yehowa ne ‘kupetulula bukole.’​—Mat. 11:29.

6. Mmushindu kayi udi tshiena-bualu etshi mua kukuambuluisha?

⁶ Patudi tubanga kukonkonona bualu ne bualu buonso bututu tuenza bua kutendelela Yehowa mu tshiena-bualu etshi, udi mua kudiebeja ne: ‘Ntshinyi tshinkadi muenze bua kuya kumpala mu bualu ebu?’ Udi mua kudiebeja kabidi ne: ‘Ndi mua kuakaja mushindu wanyi wa kutendelela Yehowa anyi?’ Sanka ne tshiudi wenza bua kuya kumpala mu malu aa, kadi nebikale bimpa wewe ulomba Yehowa ne muoyo umue akuambuluishe bua umone muaba uudi kabidi mua kuakaja.

7. Yehowa utu umona masambila atutu tuenza ne muoyo mujima mushindu kayi?

⁷ Tudi tutendelela Yehowa patudi tumusambila. Mu Bible badi bafuanyikija masambila atutu tuenza ne musenga wa manananshi mulongolola bimpe uvuabu balambula mu ntenta wa tshitendelelu kumpala, ne panyima pa bidimu mu ntempelo. (Mis. 141:2) Musenga wa manananshi au uvua ne dipembu dimpe divua disankisha Nzambi. Bia muomumue, masambila atudi tuenza ne muoyo mujima adi kabidi ‘amusankisha’ nansha tuenza muetu mutudi tukokeshila. (Nsu. 15:8; Dut. 33:10) Kudi tshidi tshitujadikila ne: bitu bisankisha muoyo wa Yehowa patutu tumuambila mutudi bamunange ne tumuleja dianyisha. Mmusue tumuambile malu adi matutonde, atudi batekemene, ne majinga etu. Nunku kumpala kua kusambila Yehowa, nebikale bimpe wewe muanji kuela meji a malu awamuambila. Wewe wenza nanku, neulambule Tatuebe wa mu diulu “musenga wa manananshi” muimpe menemene.

8. Mmpunga muimpe kayi ututu nende wa kutumbisha Nzambi?

⁸ Tudi tutendelela Yehowa patudi tumutumbisha. (Mis. 34:1) Tudi tutumbisha Yehowa patudi tuambila bakuabu mutudi banange ngikadilu yende milenga ne bintu bidiye muenze ne tubianyisha. Dianyisha ditudi nadi kudiye ke diatusaka bua kumutumbisha. Tuetu tuangata dîba dia kuelangana meji a bintu bimpe bionso bidi Yehowa mutuenzele, katuakupangila bualu bua kumutumbishila to. Mudimu wa diyisha udi utupetesha mpunga muimpe menemene wa ‘kufila misangu yonso kudi Nzambi mulambu wa kumutumbisha nawu, mbuena kuamba ne: mamuma a mishiku yetu.’ (Eb. 13:15) Anu mututu tuanji kuela meji a malu atuambila Yehowa mu disambila kumpala kua tuetu kudienza, mbimpe tuikale kabidi tuela meji a malu atuambila bantu batudi tuyisha bimpe menemene. Tudi basue bua “mulambu [wetu] wa kumutumbisha nawu” wikale muimpe menemene. Ke bua tshinyi tutu ne musangelu patutu tuyisha.

9. Mmushindu kayi udi didisangisha pamue dituambuluisha anu bu muvuabi bua bena Isalele? Fila tshilejilu tshia mudibi bikuambuluishe wewe.

 ⁹ Tudi tutendelela Yehowa patudi tubuela mu bisangilu. Bavua bambile bena Isalele ba pa kale ne: “Misangu isatu ku tshidimu bantu balume bebe bonso nebamueneke kumpala kua Yehowa Nzambi webe muaba udiye musungule.” (Dut. 16:16) Bavua ne bua kushiya nzubu yabu ne madimi abu kakuyi wa kualama to. Kadi Yehowa uvua mubalaye ne: “Muntu nansha umue kakualakana buloba buebe paudi uya bua kumona mpala wa Yehowa Nzambi webe.” (Ekes. 34:24) Bena Isalele bavua batshina Nzambi abu bavua beyemena Yehowa ne muoyo mujima, ke bualu kayi bavua benza mafesto a ku tshidimu tshionso. Nunku malu abu avua aya kumpala; bavua bakolesha ngumvuilu wabu wa mikenji ya Nzambi, belangana meji a malu mimpe avuaye ubenzela, ne basomba bimpe ne binabu bavua batendelela pabu Yehowa. (Dut. 16:15) Tutu petu tupeta masanka a muomumue patudi tudienzeja bua kuikala kubuela mu bisangilu. Anji elabi meji a mudibi bisankisha Yehowa padiye utumona badilongolole bua kufila mandamuna mimpe mu bisangilu, tuafila mu mêyi makese!

10. Bua tshinyi kuimba misambu ntshitupa tshinene tshia ntendelelu wetu?

¹⁰ Tudi tutendelela Yehowa patudi tumuimbila misambu. (Mis. 28:7) Bena Isalele bavua bangata dimba misambu ne mushinga wa bungi mu ntendelelu wabu. Mukalenge Davidi uvua muteke bena Lewi 288 bua bikale bimba misambu ku ntempelo. (1 Kul. 25:1, 6-8) Lelu eu, tuetu petu tudi mua kuleja mutudi banange Nzambi patudi tumuimbila misambu ya kumutumbisha nayi. Kabiena bikengela anu tuikale ne dîyi dia misambu bua kuimba to. Tuangatabi tshilejilu etshi: patutu tuakula, “tuetu bonso tutu tulenduka misangu ya bungi,” kadi kabitu bitupangisha bua kuakula mu bisangilu ne mu buambi to. (Yak. 3:2) Bia muomumue katuena mua kudikanda bua kuimbila Yehowa misambu ya kumutumbisha nayi bualu tudi tuela meji ne: katuena ne dîyi dia misambu to.

11. Anu mudibu baleje mu Misambu 48:13, bua tshinyi mbimpe tulongolole dîba dia kuikala kuenza dilonga dia Bible mu dîku?

¹¹ Tudi tutendelela Yehowa patudi tulonga Dîyi diende ne tudilongesha bana batudi balele. Dituku dia Nsabatu bena Isalele bavua balekela midimu yabu ya ku dituku ne ku dituku bua kudifila ku malu avua akolesha malanda abu ne Yehowa. (Ekes. 31:16, 17) Bavua ne ditabuja munkatshi muabu bavua balongesha bana babu bua bamanye Yehowa ne malu mimpe avuaye wenza. Tuetu petu tudi ne bua kudikebela dîba dia kuikala kubala Dîyi dia Nzambi ne kudilonga. Kuenza nanku mmushindu wa kutendelela Yehowa, ne kudi kutuambuluisha bua kusemena pabuipi nende menemene. (Mis. 73:28) Tuetu tulonga pamue ne bana betu mu dîku, bidi mua kubambuluisha bua badie pabu bulunda bushême ne Tatu wetu wa mu diulu.​—Bala Misambu 48:13.

12. Mushindu uvua Yehowa wangata mudimu wa bavua benze bintu bia mu ntenta wa tshitendelelu udi utulongesha tshinyi?

¹² Tudi tutendelela Yehowa patudi tuibaka miaba ya dienzela ntendelelu ne tuyilama bimpe. Badi bamba mu Bible ne: mudimu wa kuenza ntenta wa tshitendelelu ne bintu biende uvua “mudimu wa tshijila.” (Ekes. 36:1, 4) Lelu eu kabidi, Yehowa udi wangata mudimu wa dibaka Nzubu ya Bukalenge ne nzubu yetu mikuabu ya malu a ntendelelu bu wa tshijila. Bena Kristo netu bakuabu batu bafila dîba diabu dia bungi mu mudimu eu. Tudi tubanyisha bikole bua bionso bidibu benza mu mudimu wa Bukalenge eu. Batu kabidi badifila mu mudimu wa diyisha. Bamue ba kudibu badi mene mua kuikala ne dijinga dia kulua bampanda-njila. Bakulu badi mua kuleja ne: badi batua midimu ya  dibaka eyi mpanda padibu kabayi belakana bua kulekela bena Kristo netu badi benza mudimu mukole eu balue bampanda-njila bobu bakumbaje malu malomba. Nansha tuetu bapiluke mu midimu ya luibaku peshi katuyi bapiluke, tuetu bonso tudi mua kuambuluisha bua kulama miaba yetu eyi bimpe ne mankenda.

13. Mmushindu kayi utudi ne bua kumona mapa atutu tufila bua kukuatshisha mudimu wa Bukalenge?

¹³ Tudi tutendelela Yehowa patudi tukuatshisha mudimu wa Bukalenge ne mapa etu. Bena Isalele kabavua ne bua kumueneka kumpala kua Yehowa bianza bitupu to. (Dut. 16:16) Bavua ne bua kulua ne mapa muntu ne muntu muende muvuaye mukokeshile. Pavuabu benza nanku, bavua baleja dianyisha bua malu onso avua malongolola bua kubambuluisha mu nyuma. Mmushindu kayi utudi mua kuleja ne: tudi banange Yehowa ne tudi ne dianyisha bua malu onso adiye utuenzela? Umue mushindu nkufila mapa a makuta atudi tukokesha kufila bua kuambuluisha tshisumbu ne kukuatshisha mudimu udi wenzeka pa buloba bujima. Mupostolo Paulo uvua muambe ne: “Bikala dijinga didianjile kuikalaku, mbianyishibue nangananga bilondeshile bidi muntu nabi, kadi ki mbilondeshile bidi muntu kayi nabi to.” (2 Kol. 8:4, 12) Yehowa udi wangata mapa atudi tufila ne muoyo mujima ne mushinga wa bungi, nansha wowu a tukuta tukese.​—Mâko 12:42-44; 2 Kol. 9:7.

14. Bilondeshile Nsumuinu 19:17, mmushindu kayi utu Yehowa umona diambuluisha ditutu tufila bua kukuatshisha bena Kristo netu?

¹⁴ Tudi tutendelela Yehowa patudi tuambuluisha bena Kristo netu badi dijinga ne dikuatshisha. Yehowa uvua mulaye bua kufuta bena Isalele bavua bapesha bapele bintu ne muoyo mujima. (Dut. 15:7, 10) Bushuwa musangu wonso utudi tuambuluisha muena Kristo netu udi dijinga ne dikuatshisha, Yehowa udi umona anu bu ne: tudi tumupesha Yeye. (Bala Nsumuinu 19:17.) Tshilejilu, pavua bena Kristo ba ku Filipoyi batumine Paulo bintu pavuaye mu buloko, wakamba bua tshienzedi tshiabu atshi ne: tshivua “mulambu muanyishibue, udi usankisha Nzambi.” (Filip. 4:18) Ela meji a badi mu tshisumbu tshienu udiebeja ne: ‘kudiku muntu undi mua kuambuluisha anyi?’ Bitu bisankisha Yehowa padiye utumona tuangata dîba dietu, tudifila ne bukole buetu, ne mamanya etu, ne tufila bintu bitudi nabi bua kuambuluisha badi dijinga ne dikuatshisha. Utu umona tshienzedi atshi bu mushindu utudi tumutendelela.​—Yak. 1:27.

15. Bidi bilomba dîba ne bilomba kudienzeja bua kutendelela Yehowa, kadi bua tshinyi kuenza nanku ki nkunême bujitu?

¹⁵ Bidi bilomba dîba ne bilomba kudienzeja bua kutendelela Yehowa. Kadi kuenza nanku ki nkunême bujitu to. (1 Yone 5:3) Bua tshinyi tudi tuamba nanku? Tudi tutendelela Yehowa bualu tudi bamunange. Fuanyikija ne: muana udi ujinga kupesha tatuende tshintu kampanda. Tshilejilu, udi mua kupitshisha dîba dia bungi umuzolela tshintu pa dibeji. Muana kakunyingalala bua dîba didiye mupitshishe adi to. Mmunange tatuende, ne udi umvua disanka dia kumupesha tshintu atshi. Bia muomumue bu mutudi banange Yehowa, tudi tumvua disanka dia kufila dîba dietu ne kudienzeja bua kumutendelela.

16. Bilondeshile Ebelu 6:10, mmushindu kayi utu Yehowa umona bionso bitudi tuenza bua kumusankisha?

¹⁶ Muledi udi munange bana bende katu utekemena bua muana yonso amuenzele malu anu bu bana bende bakuabu to. Mmumanye ne: muana yonso mmushilangane ne bakuabu ku dienza dia malu. Bia muomumue Tatu wetu wa mu diulu mmumanye tshidi yonso wa kutudi mua kukokesha bua kuenza. Pamuapa  wewe udi mua kukokesha bua kuenza malu a bungi kupita bantu ba bungi baudi mumanye ne baudi munange. Peshi udi mua kuikala kuyi ukokesha bua kuenza malu mudi bakuabu baenza, pamuapa bua bungi bua bidimu biukadi nabi, bua kusama, anyi bua majitu a mu dîku. Kabikutekeshi mu maboko to. (Gal. 6:4) Yehowa kakupua mudimu webe muoyo to. Wewe utungunuka ne kudifila muebe muonso ne meji mimpe, neumusankishe. (Bala Ebelu 6:10.) Yehowa utu umona too ne meji adi munda muebe. Mmusue bua wikale ne disanka dia tshiudi ukokesha kuenza bua kumutendelela.

17. a) Ntshinyi tshitudi mua kuenza biobi bitukolela bua kuenza amue malu bua kutendelela Yehowa? b) Bualu bumue budibu baleje mu kazubu ka “ Tshiakuambuluisha bua wikale ne disanka” mbukuambuluishe mushindu kayi?

¹⁷ Ntshinyi tshitudi mua kuenza biobi bitukolela bua kuenza bumue bua ku malu atudi batele kuulu eku bua kutendelela Yehowa, bu mudi didilongela anyi kuyisha? Pamuapa netumone ne: tuetu tuenza malu au pa tshibidilu, netufike ku diananga ne neatuambuluishe. Tudi mua kufuanyikija ntendelelu wetu ne dienza dia malu makuabu, bu mudi didibidija ku bualu kampanda peshi dimba tshiombelu. Tuetu tuenza malu au anu ku mpukampuka katuakuya kumpala to. Kadi tshienzeka ntshinyi tuetu bangate dipangadika dia kuenza malu au dituku dionso? Ku ntuadijilu tudi mua kuikala tuenza anu dîba dikese, kadi pashishe tubanga kuenza mêba a bungi. Patudi tumona bipeta bimpe bia didifila dietu adi, netuvuluke pamuapa bikondo bituvua badifile mu dienza malu au, ne nebitusankishe bikole. Udiku umona muudi mua kuidikija tshilejilu etshi bua malu atudi tuenza bua kutendelela Yehowa anyi?

18. Mmushindu kayi utudi tukumbaja tshipatshila tshinene tshia muoyo wetu? Ntshinyi tshidi kuenza nanku kutupetesha?

¹⁸ Tudi tukumbaja tshipatshila tshinene tshia muoyo wetu patudi tuenza tshionso tshitudi mua kuenza bua kutendelela Yehowa. Nunku netuikale ne disanka ne nsombelu wa nsongo, netuikale kabidi ne ditekemena dia kumutendelela kashidi ne tshiendelele. (Nsu. 10:22) Bua mpindieu tudi ne ditalala dia munda bualu tudi bamanye ne: Yehowa udi utuambuluisha tuetu batendeledi bende patudi tutuilangana ne ntatu. (Yesh. 41:9, 10) Bushuwa, kudi malu a bungi adi enza bua tuikale ne disanka patudi tutendelela Tatu wetu wa dinanga udi mukumbane bua “kuangata butumbi ne bunême” bua bionso bidiye mufuke!​—Buak. 4:11.