1-2. Vyuma muka vinahase kulingisa Kalunga etavile kulemesa chetu?

 VYUMA muka vyeji kwizanga muvishinganyeka vyenu nge munevu lizu “kulemesa”? Pamo mweji kushinganyekanga ndumbwetu walunga nafukama kukahela kenyi ali nakulomba kuli Yehova. Chipwe pamo mweji kushinganyekanga tanga yakuwahilila yili nakulinangwila hamwe Mbimbiliya.

² Vyakutalilaho vyosena vivali vinapu jijila jakulemeselamo Kalunga. Uno Yehova mwetavila kulemesa chavo tahi? Mwetavila kachi nge navalinga ngocho mujila yize asaka kaha nawa muzangi namukavumbi. Twazanga chikuma Yehova, twatachikiza ngwetu asaka tumulemesenga. Kaha twasaka kumulemesa mujila yize etavila.

3. Vyuma muka natushimutwila muchihande chino?

³ Muchihande chino natushimutwila hakulemesa chize etavilile Yehova kushikulu. Kaha nawa natushimutwila hajijila 8 jakulemeselamo Yehova jize etavila makumbi ano. Omu natushimutwila hajijila kana, twatela kushinganyeka omwo tunahase kumulemesa mujila yize asaka.

4. Uno vatu vaze valemeselenga Yehova kushikulu vasolwele ngachilihi ngwavo vamuzanga nakumuvumbika?

⁴ Kushikulu malunga vakushishika vakufwana nge Avele, naNowa, naApalahama, naYopa vazangile Yehova nakumuvumbika. Valingile ngachilihi ngocho? Valingile ngocho hakumwononoka,  nakumufwelela, nahakumuhana mawana. Mbimbiliya kayalumbununa vyuma vyosena valingile hakumulemesako. Oloze vazachile nangolo javo josena hakuvumbika Yehova, ngocho etavilile kulemesa chavo. Kufumaho Yehova ahanyine vaIsalele Jishimbi kuhichila muli Mose. Jishimbi kana jasolwele vyuma vatelele kukavangiza vaIsalele hakulemesa Yehova mujila yize etavila.

5. Uno Yehova asakile vaka-Kulishitu vamulemese ngachilihi?

⁵ Omu alingile Yesu vanamusangula lyehi, Yehova kasakile vangamba jenyi vakavangize Jishimbi ahanyine Moseko. (Loma 10:4) Vaka-Kulishitu vatelele kukavangiza lushimbi lwaluhya, “lushimbi lwaKulishitu.” (Ngale. 6:2) Vatelele kukavangiza “lushimbi” kana hakulondezeza Yesu nakukavangiza vyuma vize anangwilenga. Namakumbi ano vaka-Kulishitu veji kuzatanga nangolo javo josena valondezeze Yesu mangana vevwise Yehova kuwaha ‘nakupwa vakuhizumuka.’—Mateu 11:29.

6. Chihande chino nachitunganyalisa ngachilihi?

⁶ Omu natushimutwila hajijila jakulemeselamo Yehova lihulisenu ngwenu: ‘Kutala nguli nakulemesa Yehova mujila yize asaka tahi?’ Munahase nawa kulihulisa ngwenu: ‘Kutala ngunahase kulingako vyuma vimwe mangana ngulemese Yehova mujila yize nayimwivwisa kuwaha tahi?’ Munahase kwivwa kuwaha hajila muli nakulemeselamo Yehova oholyapwa. Oloze mwatela nawa kulomba Yehova amikafwe mumone nge kuli vimwe mwatela kuzachilaho.

7. Yehova amona ngachilihi kulomba chetu chakufuma kumuchima?

⁷ Tweji kulemesanga Yehova hakulomba kuli ikiye. Visoneka vyafwanyisa kulomba chetu kuvyuma vyalivumba lyamwaza vize vahanyinyinenga hatavanaku, kutwala muze hatembele. (Samu 141:2) Vize vyuma vyalivumba lyamwaza vyalowelenga livumba lyalupengopengo lize lyevwishilenga Kalunga kuwaha. Chochimwe nawa, kulomba chetu “eji kuchivwilanga kuwaha” numba tuhu natuzachisa mazu amashi hakumulomba. (Vishi. 15:8; Lushi. 33:10) Shikaho, twafwelela ngwetu Yehova eji kwivwanga kuwaha kwivwilila kukulomba chetu chize cheji kusololanga nge twamuzanga kaha nawa twamuvumbika. Asaka tumulweze vyuma tunalizakamina navize tuli nakusaka. Shimbu kanda tulombe nachipwa chamwaza kushinganyeka havyuma natuhanjika. Nge namulinga ngocho kaha namuhana chikupu “vyuma vyalivumba lyamwaza” kuli Senu wamwilu.

8. Lwola muka tweji kwalisanga Kalunga?

⁸ Tweji kulemesanga Yehova hakumwalisa. (Samu 34:1) Tweji kwalisanga Yehova hakulweza vakwetu vilinga vyenyi vyamwaza namilimo yenyi. Nge natuwanangako lwola lwakushinganyeka havyuma vyamwaza vize natulingila Yehova, nakusolola kusakwilila chetu havyuma kana, kaha nachitulingisa tumwalise. Kwambulula nawa cheji kutulingisanga tuhanenga “Kalunga shimbu yosena chimuna wakuvatula wakumwalisa, yikiko mihako yamivumbo yetu.” (Hepe. 13:15) Ngana muze tweji kushinganyekelanga chimweza vyuma natuhanjika shimbu kanda tulombe kuli Yehova, nachipwa nawa chamwaza kushinganyekela chimweza vyuma natuhanjika kuvatu natuwana muwande. Twasaka kuhana “chimuna wakuvatula wakumwalisa” wamwaza. Echi chikiko cheji kutulingisanga tuhanjike natwima hakwambulula.

9. Ngana muze chapwile kuli vaIsalele, tweji kunganyalanga ngachilihi hakupwa kukukunguluka? Hanjikenu omwo munanganyala hakupwanga kukukunguluka?

 ⁹ Tweji kulemesanga Yehova hakupwanga kukukunguluka. VaIsalele kushikulu vavalwezele ngwavo: “Malunga vosena vakasoloke kumeso aYehova Kalunga kenu mapapa katatu mumwaka, kuchihela chize mwakasakula.” (Lushi. 16:16) Vasezelenga membo avo navimbuto vyavo chakuzeneka mutu wakuvilama. Oloze Yehova avafwelelesele ngwenyi: “Kakweshi kukapwa mutu mwakafwila lize lifuchi lyenu omu namukasolokanga kumeso aYehova Kalunga kenuko.” (Kulo. 34:24) Hakuwana nge vaIsalele vafwelele Yehova nakuya kuviwanyino vyamumwaka, ngocho vanganyalile mwamunene. Chakutalilaho, vevwishishile Jishimbi jaKalunga, nakushinganyeka hakuwaha chenyi, nakulikolezeza navakwavo. (Lushi. 16:15) Nayetu nawa tweji kunganyalanga mwamunene hakulisuula kupwanga kukukunguluka. Tachikizenu nawa ngwenu Yehova eji kwivwanga kuwaha nge namuliwahishila chimweza mangana mukakumbululeho.

10. Mwomwo ika kwimba chapwila chachilemu hakulemesa Kalunga?

¹⁰ Tweji kulemesanga Yehova hakumwimbila myaso? (Samu 28:7) VaIsalele vamwene kwimba myaso kupwa chuma chachilemu hakulemesa Kalunga. Mwangana Ndavichi atongwele vaLevi 288 vapwenga vaka-kwimba myaso hatembele. (Miji. 1, 25:1, 6-8) Makumbi ano tunahase kusolola ngwetu twazanga Kalunga hakwimba myaso yakumwalisa. Kachasakiwa kupwa nalizu lyamwaza numba twimbile Yehovako. Achishinganyekenu hachuma chino. Nge tuli nakuhanjika, “tuvosena tweji kuhukananga kakavulu.” Oloze echi kachatulingisa tulitwamine kuhanjika nge tuli kukukunguluka namumulimo wamuwandeko. (Yako. 3:2) Chochimwe nawa tunahase kumbila Yehova myaso yakumwalisa numba tuhu tweji kwimbanga nalitangu.

11. Ngana muze vasoneka hali Samu 48:13, mwomwo ika twatela kunonekelanga lwola lwakulinangula Mbimbiliya natanga yetu?

¹¹ Tweji kulemesanga Yehova hakulinangula Mbimbiliya nakunangula vana vetu vyaikiye. Halikumbi lyaSambata vaIsalele kavazachilenga milimoko, oloze halikumbi kana vazamishilenga usoko wavo naYehova. (Kulo. 31:16, 17) Visemi vakushishika vanangwilenga vana vavo vyaYehova nahakuwaha chenyi. Shikaho twatela kunonekanga lwola lwakutanganga Mbimbiliya nakulinangulayo, mwomwo yapwa jila yakumulemeselamo. Kaha nawa eji kutukafwanga tupandame kuli ikiye. (Samu 73:28) Nge natulinangwilanga hamwe natanga yetu kaha natukafwa chisemunwino chachihya, kulumbununa vana vetu vapwenga nausoko wakukola naSetu wamwilu wazangi.—Tangenu Samu 48:13.

12. Yehova amwenenga ngachilihi vatu vaze vawahishilenga vyuma vyamutavanaku, kaha natulinangulako ika?

¹² Tweji kulemesanga Yehova hakutunga nakutungulula vihela vyakumulemesela. Mbimbiliya yahanjika ngwayo kutunga tavanaku navyuma vyosena vyapwilemo wapwile “mulimo wajila.” (Kulo. 36:1, 4) Namakumbi ano nawa Yehova amona mulimo wakutunga jiZuvo jaWangana navihela vyeka vyamuliuka kupwa mulimo wajila. Vandumbwetu vamwe veji kuzachisanga lwola lwaluvulu chikuma hakuzata mulimo kana. Tweji kusakwililanga chikuma vandumbwetu vali nakuzata milimo kaneyi. Chipwe ngocho navakiko veji kwazananga mumulimo wakwambulula. Vamwe veji kufwilanga kuzata upayiniya, vakulwane muvikungulwilo vanahase kusolola ngwavo vakundwiza mulimo wakutunga hakuhona kulangisa kutongola vandumbwetu kana vaze vanalisonekesa kuzata upayiniya kachi nge vanatemo  kulinga ngocho. Numba tukwechi uhashi mukutunga chipwe chiku, tuvosena tunahase kwazana mumulimo wakuwahisa evi vihela vyakulemesela Kalunga.

13. Twatela kumona ngachilihi mawana aze tweji kuhananga akukundwiza kumulimo waWangana?

¹³ Tweji kulemesanga Yehova hakuhana mawana akukundwiza mulimo waWangana. VaIsalele kavatelele kusoloka kumeso aYehova mavokovokoko. (Lushi. 16:16) Vatelele kuhana wana kweseka nachiyoyelo chavo, kulinga ngocho chasolwele nge vapwile nakusakwilila Yehova havyuma vyosena vize apwile nakuvalingila. Uno natusolola ngachilihi ngwetu twazanga Yehova nakumusakwilila havyuma vyakushipilitu ali nakutuhana? Jila yimwe tunahase kulingilamo ngocho, shina hakuhana mawana akukundwiza kuchikungulwilo, nakumulimo wamukaye kosena kweseka nomu chili chiyoyelo chetu. Kaposetolo Paulu asonekele ngwenyi: “Kachi nge chatete muchima wakulizanga kulinga kuuli, kaha Kalunga mwachitavila kweseka navize ali navyo mutu, keshi nge kweseka navize nazeneka kupwa navyoko.” (Koli. 2, 8:4, 12) Yehova eji kusakwililanga kala wana uze natumuhana namuchima wetu wosena.—Mako 12:42-44; Koli. 2, 9:7.

14. Kweseka namazu ahali Vishimo 19:17, Yehova eji kumonanga ngachilihi vyuma tweji kulingilanga vandumbwetu vali muukalu?

¹⁴ Tweji kulemesanga Yehova hakukafwa vandumbwetu vaze vali muukalu. Yehova afwelelesele kukisula vaIsalele vaze vakafwilenga vaka-kuhutwa. (Lushi. 15:7, 10) Shikaho kala lwola natukafwa ndumbwetu uze ali muukalu Yehova eji kumonanga nge tunahane wana ikiye. (Tangenu Vishimo 19:17.) Chakutalilaho, omu vaka-Kulishitu vamuFwilipi vatuminyinyine wana Paulu omu vamukashile, Paulu amwene wana kana kupwa “chimuna wakuvatula wakwitavila, wakwivwisa Kalunga kuwaha.” (Fwili. 4:18) Chochimwe nawa nayetu twatela kutala muchikungulwilo tumone nge muli ndumbwetu uze twatela kukafwa. Yehova eji kwivwanga kuwaha hakutumona natuzachisa lwola lwetu, nangolo jetu, nauhashi wetu navikumba vyetu mangana tukafwe vakwetu vaze vali muukalu. Amona vyuma kanevi kupwa hijila yimwe yakumulemeselamo.—Yako. 1:27.

15. Kulemesa Yehova chasakiwa kuzachisa lwola lwetu nangolo jetu, kaha mwomwo ika kachapwila hichiteliko?

¹⁵ Chasakiwa kuzachisa lwola lwetu nangolo jetu hakulemesa Yehova, oloze kulinga ngocho kachapwa hichiteliko. (Yowa. 1, 5:3) Mwomwo ika? Mwomwo twamuzanga shikaho tweji kumulemeselanga. Achishinganyekenu mwana wamundende ali nakusaka kuhana wana ise. Nahase kumbata lwola, nakufunjikila ise muvwimbimbi, chipwe ngocho keshi kuliveya halwola luze nazachisako mwomwo yakuzanga ise ngocho mwevwa kuwaha kumuhana wana kana. Chochimwe nayetu nawa mwomwo yakuzanga Yehova tweji kuzachisanga lwola lwetu nangolo jetu mangana tumulemese.

16. Kweseka namazu ahali WavaHepeleu 6:10, Yehova eji kwivwanga ngachilihi hakumona kukilikita chetu mangana tumwivwise kuwaha?

¹⁶ Visemi vazangi kavafwila ngwavo vana vavo vavahane wana wakweseka hamweko. Vatachikiza ngwavo mwana himwana akwechi uhashi wenyi. Chochimwe nawa, Setu wamwilu atachikiza uhashi wamutu himutu. Chakutalilaho, munahase kuzata milimo yimwe yize navahona kuzata vakwenu. Chipwe kuhona kuzata milimo yimwe yize navazata vakwenu, mwomwo yaushinakaji, namisongo chipwe milimo yamutanga. Nge chili ngocho, kaha kamwatela kuhombako. (Ngale. 6:4) Yehova  keshi kavulyama milimo yenuko. Kachi nge namuzata noho hakumina ngolo jenu kaha nawa namuchima wenu wosena, Yehova mwevwa kuwaha. (Tangenu WavaHepeleu 6:10.) Yehova eji kutachikizanga vyuma muli nakufwila kulinga. Asaka mupwenga vakuwahilila nakusuuluka najila muli nakumulemeselamo.

17. (a) Vyuma muka twatela kulinga nge cheji kutukaluhwilanga kwambulula nakupwa nachilongesa chauka? (b) Ika munanganyala kujila yimwe yakulemeselamo Kalunga yili mulipwata lyakwamba ngwavo, “ Vyuma Navitulingisa Tuwahilile”?

¹⁷ Vyuma muka twatela kulinga kachi nge cheji kutukaluhwilanga kupwa nachilongesa chauka nakwazana mumulimo wakwambulula? Nge natulinganga vyuma kanevi kuswakumwe, kaha natulivwisa kuwaha kuvilinga nakunganyala nawa. Tunahase kufwanyisa jijila kaneji jakulemeselamo Kalunga kukulinyukanyuka mujimba chipwe kukwimba myaso. Nge katweshi kulinyukanyukanga mujimba chipwe kwimbanga shimbu yosenako, kaha katweshi kuzovolokako. Oloze vyuma muka navisoloka kachi nge natulinganga vyuma kana hakumbi hakumbi? Chakutalilaho, tunahase kuputuka kulinga ngocho hatando yayindende, kutwala muze natuvilinga hatando yayisuku. Kahomu natumona nganyo nayifumamo nachitulingisa tuvilingenga shimbu yosena. Omu mukiko tunahase kulinga nahakulemesa Kalunga.

18. Chuma muka chachilemu twatela kulinga, kaha vyuma muka navifumamo?

¹⁸ Kulemesa Yehova namuchima wetu wosena hichuma chachilemu chize twatela kulinga. Kulinga vyuma kana nachitukafwa tulivwise kuwaha nakupwa vakusuuluka mukuyoya, nakupwa nawa nalutalililo lwakukalemesa Yehova haya myaka yosena. (Vishi. 10:22) Kutachikiza ngwetu Yehova eji kukafwanga vaka-kumulemesa nge vali muukalu cheji kutukafwanga tuunde muchima. (Isa. 41:9, 10) Chikupu vene tukwechi vyuma vyavivulu vyakutulingisa tuwahilile hakulemesa Setu wazangi uze ‘atamo kutambula upahu nakavumbi’ kufuma kuvyuma vyakutenga vyosena.—Kuso. 4:11.