1-2. Yumanyi yikuletesha kudifukula kwetu akwiteji kudi Nzambi?

 YUMANYI yenzaña muyitoñojoka yenu neyi mutiya izu dakwila nawu “kudifukula”? Hadaha mwatoñojokaña hadi manakwetu wunafukami kukadidi kindi nakulomba kudi Yehova henohu kanda akaami. Indi kwiji hadaha munateli kutoñojoka chisaka chikweti muzañalu chinakudiza Bayibolu.

² Iyi yakutalilahu yejima yiyedi, yinakumwekesha nawu anakudifukula. Komana Yehova wukwiteja kudifukula kwawu? Wukwiteja neyi kunakwendela hamu nankeñelu yindi nawa neyi anakwila mwenimu muloña wakumukeña nikumulemesha. Twamukeña Yehova chikupu. Tweluka netu diyi hohu itwatela kudifukulaku, nawa tunakukeña kudifukula munjila yayiwahi hama.

3. Yumanyi yitukuhanjeka muchinu chibaaba?

³ Muchinu chibaaba, tukuhanjeka hakudifukula kwetejeliyi Yehova kunyima nawa tukuhanjeka hanjinjila 8 yinakukeñayi Yehova nindi tudifukwileñamu kudi yena. Chitukuhanjekaña, tutoñojokeña chitunateli kuwahishaku kudifukula kwetu hamuntu-hamuntu. Tukuhanjeka cheñi muloña waweni kudifukula kwalala chikwatuletelaña muzañalu.

4. Indi antu adifukwileña kudi Yehova henohu Yesu kanda enzi hanu hamaseki amwekesheli ñahi nawu amulemesheli Yehova nikumukeña?

⁴ Henohu Yesu kanda enzi hanu hamaseki, amayala ashinshika adi neyi Abeli, Nowa, Abarahama niYoba amwekesheli nawu amulemesha Yehova nikumukeña. Munjilanyi? Amwovwahilileña  Nzambi, amukuhweleleli nawa amulambwileña nyilambu. Bayibolu hiyatuleja yuma yejima yateleliwu kwila mukudifukula kwawuku. Ilaña azatili hakumina ñovu jawu kumulemesha Yehova, nawa wetejeli kudifukula kwawu. Chimwahitili mpinji, Yehova wayinkeli anyana kaAbarahama Nshimbi jaMosi. Muniyi nshimbi mwabombeleli yuma yayivulu yahosheleña hachateleleliwu kudifukula kudi Yehova munjila yetejayi.

5. Yehova wakeñaña nindi akakumulondela Yesu adifukuleña ñahi kudi yena?

⁵ Chelili Yesu afwi nawa asañuki, Yehova hakeñeleña nindi twovwahileña Nshimbi jaMosiku. (Rom. 10:4) Dichi akaKristu ateleleli kulondela lushimbi lwaluha, “lushimbi lwaKristu.” (Ñal. 6:2) Ateleleli kwovwahila ilu “lushimbi,” bayi neyi kuhitila mukulwanuka nikulondela nshimbi jajivuluku, ilaña kuhitila mukumwimbujola Yesu nikulondela ntañishilu yindi. Nimakonu, akaKristu azataña nañovu hakumulondela Kristu kulonda amuzañaleshi Yehova nawa ‘anookeña.’—Mat. 11:29.

6. Achinu chibaaba chinateli kutukwasha ñahi?

⁶ Chitukuhanjekaña hanjila yakudifukula kwetu, dihulenu nenu, ‘Komana inakwila chiwahi munilu lubadi?’ Munateli kudihula cheñi nenu, ‘Komana nateli kuwahishaku njila yami yakudifukwilamu’? Mwatela kutiya kuwaha chimunakuzata chayinu mpinji, ilaña mwatela cheñi kumulomba Yehova kulonda ayikwashi kwiluka himunateli kuzatila.

7. Yehova wamonaña ñahi kulomba kwetu kwakufuma hamuchima?

⁷ Twadifukulaña kudi Yehova neyi tulomba kudi yena. Nsona jesekeja kulomba kwetu nainsensi yinaloñeshiwu chiwahi yocheleñawu hatabanaka nkumininaku hatembeli. (Mas. 141:2) Iyi insensi yedishileña ivumba dadiwahi damutiyishileña Nzambi kuwaha. Munjila yoyimu, kulomba kwetu kwakufuma hamuchima “kwamuzañaleshaña,” hela chakwila tunazatishi mazu apela. (Yish. 15:8; Kuhit. 33:10) Tukweti wunsahu wunakumwekesha nawu chamutiyishaña Yehova kuwaha neyi yamona chitwamukeña nichitwamusakililaña. Wakeñaña tumulejeña yuma yitunakutoñojoka, yitunakukeña niyitunakufwila. Henohu kanda mulombi kudi Yehova, kwila mutoñojokahu hamazu imwatela kuzatisha nehi? Neyi mwila mwenimu, mukulambula “insensi” yayiwahi kudi Tata yenu wamwiwulu.

8. Mpinjinyi yayiwahi yitwatela kumushimeka Nzambi?

⁸ Twadifukulaña kudi Yehova neyi tunakumushimeka. (Mas. 34:1) Twamushimekaña Yehova neyi tunakulejañaku antu yilwilu yindi yabadika ninyidimu yindi. Tunateli kumushimeka neyi tukweti muchima wakusakilila. Neyi twikala nampinji yakutoñojoka hakuwaha kwaYehova hela netu yuma yejima yatwililayi, tukumushimekaña mpinji yejima. Neyi tunakushimwina diyi mpinji yayiwahi yitwamulambulaña “Nzambi mpinji yejima mulambu wakushimeka, dikwila nawu, nyikaabu yakunyivumbu yetu.” (Heb. 13:15) Neyi chochitunateli kutoñojokahu hamazu itukuhosha henohu kanda tulombi kudi Yehova, munjila yoyimu twatela kutoñojokahu chikupu hamazu itukuhosha henohu kanda tuwani antu itunakushimwina. Tunakukeña “mulambu [wetu] wakushimeka” wikali wawuwahi chikupu. Dichatuleteshaña tushimwineña chakufuma hamuchima neyi tunakuyishimwina antu.

9. Kufwana aIsarela, yumanyi yayiwahi yitwadiluñishaña neyi tuya nakupompa? Shimunenu yuma yimwadiluñishaña.

 ⁹ Twadifukulaña kudi Yehova neyi tuya nakupompa. AIsarela ayilejeli nawu: “Kapampa kasatu muchaaka, amayala eyi ejima atela kuya kumesu aYehova Nzambi yeyi kwiluña dakatondayi.” (Kuhit. 16:16) Ashileña matala awu nimaha awu chakadi muntu wakuyitala. Yehova wayikanini nindi: “Kwosi muntu wukafwilaña ituña deyi hiwakayaña nakudimona naYehova Nzambi yeyi.” (Kwid. 34:24) Chineli aIsarela amukuhweleli chikupu Yehova, ayileña kuyawija yaha chaaka. Dichi adiluñishileña yuma yayivulu; elukili chikupu Nshimbi jaNzambi, atoñojokeleña chikupu hakuwaha kwindi nawa adikolesheleña nawakwawu akakwitiya. (Kuhit. 16:15) Ninetu twadiluñishaña yuma yoyimu neyi tuzata nañovu kulonda tuyi nakupompa. Nawa toñojokenu muzañalu watiyañayi Yehova neyi tuya iku tunadiloñeshi kulonda twakulihu ñakwilu yatiyakana nawa yayihi.

10. Muloñadi kwimba chikwekalila mbadi yalema yakudifukula kwetu?

¹⁰ Twadifukulaña kudi Yehova neyi tunakwimba kamina. (Mas. 28:7) AIsarela amweneña nawu kwimba himbadi yalema yakudifukula. Mwanta Davidi watondeli aLevi 288 kulonda ekali añimbi ahatembeli. (1 Kushi. 25:1, 6-8) Makonu, tunateli kumwekesha chitwamukeña Nzambi neyi twimbaña tumina twakushimeka. Hitwatela kwikala añimbi amawahi mwaka dinu tumushimekiku. Talenu ichi chakutalilahu: “Wejima wetu twahukanaña kakavulu,” ilaña chumichi hichatukañeshaña kuhosha muchipompelu nimumudimu wakushimwinaku. (Yak. 3:2) Munjila yoyimu, tunateli kumushimeka Yehova mukamina hela chakwila tunakutoñojoka netu mazu etu atama.

11. Neyi chinashimuniwu haMasamu 48:13, muloñadi chitwatela kwikalila nampinji yakudiza Bayibolu hamu nachisaka?

¹¹ Twadifukulaña kudi Yehova neyi tudiza Izu dindi nikudizisha anyanetu kulonda amwiluki. Hefuku daSabata, aIsarela hiyazatileña nyidimu yakumujimbaku, chumichi chayikwashileña kusha maana hawubwambu wawu naYehova. (Kwid. 31:16, 17) Ana ashinshika hakachi kawu, adizishileña anyanawu kumwiluka Yehova nihakuwaha kwindi. Ninetu makonu twatela kwikalaku nampinji yakutaña nikudiza Izu daNzambi. Iyi hinjila yakudifukwilamu kudi Yehova nawa yatukwashaña kuswina kwakwihi nayena. (Mas. 73:28) Nawa neyi tudizaña hamu neyi chisaka, tukukwasha ikiñu dadiha dikwila nawu anyanetu, kwikala nawubwambu wawuwahi naTata yetu wamwiwulu wukweti kukeña.—Tañenu Masamu 48:13.

12. Chumanyi chitunakudizila kudi Yehova chamweneñayi mudimu wazatili antu atuñili yuma yamutabanaka?

¹² Twadifukulaña kudi Yehova neyi tunakutuña nikuwahisha maluña akudifukwila. Bayibolu yahosha nawu mudimu wakutuña tabanaka niyuma yadiñamu wadiña “mudimu wajila.” (Kwid. 36:1, 4) Nimakonu, Yehova wamonaña mudimu wakutuña Matala aWanta nimatala amakwawu akudifukwilamu nindi mudimu wajila. Amanakwetu niahela amakwawu ekalaña nampinji yakuzata iyi nyidimu. Kwila tuyisakilila hamudimu walema wazatañawu wakwashaña mudimu waWanta nehi? Hela chochu, azataña nimudimu wakushimwina. Amakwawu afwilaña nikuzataku wupayiniya. Akulumpi muchipompelu anateli kumwekesha nawu anakukwasha  nyidimu yakutuña kuhitila mukubula kushintajala kuhameka awa amanakwetu niahela adikita kwikala apayiniya neyi anashikihu. Hela chakwila tweluka mudimu wakutuña hela nehi, wejima wetu tunateli kuzataku mudimu wakuwahisha nikuhemba chiwahi awa matala.

13. Twatela kumonaña ñahi yawaana yitwahanaña yakukwasha mudimu waWanta?

¹³ Twadifukulaña kudi Yehova neyi tukwasha mudimu waWanta nayawaana yetu. AIsarela hiyateleli kwinza kudi Yehova makasa-kasaku. (Kuhit. 16:16) Ahanineña yawaana yawu kwesekeja nayuma yikwetiwu. Dichi amwekesheli kusakilila hayuma yejima yayilililiyi Yehova. Tunateli kumwekesha ñahi netu twamukeña Yehova nawa twasakililaña hayuma yakuspiritu yitwatambwilaña? Njila yimu hikuhanaku yawaana muchipompelu chetu nikumudimu wamukaayi kejima kwesekeja nahakumini wuswa wetu. Kapostolu Pawulu wahosheli nindi: “Nzambi wetejaña hohu chawaana chahanañayi muntu kufuma hamuchima, muloña yena wakeñaña muntu kuhana chuma chikutweshayi, bayi chikubula kutweshayiku.” (2 Kor. 8:4, 12) Yehova walemesha chawaana chidi chejima chitwahanaña chakufuma hamuchima hichikweti muloña nakutoha kwachuku.—Maku 12:42-44; 2 Kor. 9:7.

14. Kwesekeja naYishimu 19:17, Yehova wamonaña ñahi chitwakwashaña amanakwetu anakankili?

¹⁴ Twadifukulaña kudi Yehova neyi tukwasha akwetu akaKristu anakankili. Yehova wayishikili aIsarela nindi wukuyikiswilaña neyi akwasha atuzweñi. (Kuhit. 15:7, 10) Mpinji yejima yitwakwashaña mukwetu mukakudifukula wunakankili, Yehova wamonaña nindi tunakumwinka yena chawaana. (Tañenu Yishimu 19:17.) Chakutalilahu, chelili akaKristu amuAFwilipi amutemesheli Pawulu yawaana hampinji yamukasiliwu, wateneni yawaana yamwinkeliwu nindi “mulambu wetejewa, watiyañayi Nzambi kuwaha.” (Fwili. 4:18) Shinshikenu muchipompelu chenu nawa dihulenu nenu, ‘Kudihu muntu inatela kukwasha?’ Yehova wazañalalaña neyi amona tunakuzatisha mpinji yetu, ñovu yetu yuma yitweluka niyuma yakumujimba hakwila tukwashi antu anakankili. Wamonaña chumichi nindi hikudifukula.—Yak. 1:27.

15. Kudifukula kwalala kwakeñekaña mpinji niñovu, hanu dinu muloñadi chikwabulila kwikala chisenda?

¹⁵ Kudifukula kwalala kwakeñekaña mpinji. Ilaña hichisenda wanyi. (1 Yow. 5:3) Muloñadi? Muloña twadifukulaña kudi Yehova hamuloña wakumukeña. Fwikijenu mwana wanyanya nakufwila kumwinka tata yindi chuma. Nateli kushakama mpinji yayilehi nakufunjeka mwevulu wakumwinka tata yindi. Iwu mwana hakutoñojokaña nindi nombi mpinji yeneniku. Wamukeña tata yindi nawa natiyi kuwaha kumwinka chawaana. Munjila yoyimu, hamuloña wakwila twamukeña Yehova, twatiyaña kuwaha kuzatisha mpinji yetu niñovu jetu kulonda tudifukuleña.

16. Kwesekeja naAHeberu 6:10, Yehova wamonaña ñahi ochu chitwadishañaku kulonda tumutiyishi kuwaha?

¹⁶ Anvwali akweti kukeña hiyakuhwelelaña kutambula yawaana yoyimu kudi anyanawuku. Eluka nawu mwana-himwana wambuka nawa akweti wuswa washiyashana. Munjila yoyimu, Tata yetu wamwiwulu watwiluka wonsu wetu niyuma yitunateli kwila. Hadaha munateli kuzata chiwahi kubadika antu amavulu imweluka nawa imwakeña. Hadaha munateli wanyi kuzata neyi chinakuzatawu  akwenu, hadaha muloña wayaaka, kukola kumujimba indi kwiji nyidimu yamuchisaka. Bayi muzeyaku. (Ñal. 6:4) Yehova hakavulamena mudimu wenuku. Wukuzañalala chakala hohu munakuzata hanakumini ñovu yenu nawa nayilwilu yayiwahi. (Tañenu AHeberu 6:10.) Yehova wamonaña cheñi yuma yimunakukeña kuzata. Nakukeña nindi mwikali namuzañalu nikuzañalala nanyidimu yimunakuzata mukudifukula kwetu.

17. (a) Neyi tumona netu chinakutukalila kwila yuma yabombela mukudifukula kwetu, twatela kwiladi? (b) Chuma chimu chashimunawu muchikasha chinakwila nawu “ Vulishenu Muzañalu” chinayikwashi ñahi?

¹⁷ Munateli kwila ñahi neyi chayikalilaña kwila yuma yimu yitunahanjekihu, chidi neyi kudiza Bayibolu nikushimwina? Neyi twilaña yuma yejimiyi mpinji yejima tukutachika kuyikeña nawa yikutukwasha nankashi. Tunateli kwesekeja kudifukula kwetu nanyidimu yikwawu, chidi neyi kudiza chakwimba tudada hela kuvumisha ndimba. Neyi chakwila twahemaña wanyi mpinji yejima hela kuvumisha yisanji hitukuyilaku hambidiku. Hanu chumanyi chikumwekana neyi tufuukula kuyilaña mpinji yejima? Hadaha hakusambila tukwilaña maminiti antesha hohu, ilaña mukuhita kwamafuku tukatachika kuleheshaku mpinji. Neyi tunakumona yuma yayiwahi yinakufumamu, tukukeñaña kuyila mpinji yejima nawa tukutiyaña kuwaha. Dichitwatela kwilaña ninakudifukula kwetu.

18. Chumanyi chabadika chitwatela kwila, nawa chumanyi chikufumamu neyi tuchiilaña?

¹⁸ Kuzata hakumina ñovu yetu kulonda tudifukuleña kudi Yehova dichuma chalema chitwatela kwila. Chitwela mwenimu, tukwikala namuzañalu nichihandilu chachiwahi nawa tukuchiñejaña kudifukula kudi Yehova haya nyaaka. (Yish. 10:22) Tukweti kuwunda kwamuyitoñojoka muloña tweluka netu Yehova wakwashaña akakudifukula indi neyi anakumona kukala. (Isa. 41:9, 10) Tukweti wunsahu wukuletesha twikali namuzañalu hampinji yitunakudifukula kudi Tata yetu wukweti kukeña “watelela kutambwila kulema nikalemesha” kufuma kuyileñaleña yindi yejima!—Chim. 4:11.