1-2. Ang’o ma biro miyo Jehova oyie gi yo ma walamego?

 ANG’O ma biroga e pachi sama iwinjo kowach ni “lamo”? Samoro gima biroga e pachi en owadwa moro mogoyo chonge e bath otandane ka oolo chunye ne Nyasaye. Kata, samoro iparo kuom joot moro mamor sama gipuonjore Muma kanyachiel.

² E moro ka moro kuom wechego, wanyalo wacho ni jogo duto timo gik ma nyiso ni gilamo Nyasaye. Be Jehova biro yie gi yo ma gilamego? Ee, obiro timo kamano ka gilame ka luwore gi dwache, gihere, kendo gimiye luor. Wahero Jehova ahinya. Wang’eyo ni en e mowinjore olame, kendo wadwaro ni walame e yo maberie mogik.

3. Ang’o ma wabiro nono e sulani?

³ E sulani, wabiro nono kit lamo ma Jehova noyiego e kinde machon ka ne pod indiko Muma, kod yore moko aboro ma odwaro ni walamego e kindegi. Sama watimo kamano, wan wawegi wanyalo paro yore ma wanyalo berogo lamo ma wamiyo Jehova. Wabiro nono bende gimomiyo lamo Jehova e yo moyiego miyo wabedo mamor.

4. Ere kaka jotich Jehova ma nodak e kinde machon nonyiso ni giluoro Jehova kendo gihere?

⁴ E kinde machon, jotich Jehova kaka Habil, Noa, Ibrahim, kod Ayub nonyiso kaka ne giluoro Jehova kendo here. E yo mane? Ne gitimo mano e yo ma ne giwinjogo Nyasaye,  ginyisogo yie kuome, kod misengini ma ne gigolo. Muma ok nyiswa sie gik moko duto ma ne dwarore ni gitim mondo oyie gi lamogi. Kata kamano, ne gitimo duto ma ne ginyalo mondo gimi Jehova duong’, kendo Jehova noyie gi lamogi. Bang’e, Jehova nomiyo nyikwa Ibrahim chike kokalo kuom Musa. Chikego ne nigi weche ma ne dhi tayo jotich Jehova e kindego mondo gilame e yo moyiego.

5. En lokruok mane ma notimore e yo ma nilamogo Nyasaye bang’ tho Yesu kod chierne?

⁵ Bang’ tho Yesu kod chierne, jotich Jehova koro ne ok onego olam Jehova kitayogi gi Chike Musa. (Rumi 10:4) Jokristo koro nonego oluw chik manyien ma en “chik Kristo.” (Gal. 6:2) Ne gidhi luwo ‘chikni’ kuom luwo ranyisi mar Yesu kod puonjge, to ok kuom luwo chike moting’o gik mang’eny ma ng’ato onego otim kod ma ok onego otim. E kindegi bende, Jokristo timo duto ma ginyalo e luwo Kristo mondo gimor Jehova kendo ‘ginwang’ yueyo.’​—Mat. 11:29.

6. Sulani biro konyowa nade?

⁶ Sama wabiro nono moro ka moro kuom yore ma walamogo Jehova, penjri ane kama: ‘En dongruok mane ma asetimo e wach miwuoyeno? Be anyalo medo bero lamo ma amiyo Jehova?’ Dongruok misetimo onego omi ibed mamor, kata kamano, ber bende paro matut kuom dongruok monego itim e yo milamogo Jehova.

7. Jehova winjoga nade sama wawuoyo kode e lamo koa e chunywa?

⁷ Walamo Jehova kuom wuoyo kode achiel kachiel. Ndiko pimo wuoyo gi Jehova e lamo gi ubani moik maber ma nichiwo e hema mar lamo, kendo ma bang’e nichiwo e hekalu. (Zab. 141:2) Ubani ma nolos kamano ne gologa suya mamit ma ne moro Jehova. Kamano bende, wuoyo gi Jehova e lamo koa e chunywa more ahinya, kata bed ni wawacho weche matin ma romo nade. (Nge. 15:8; Rap. 33:10) Wan gadier ni Jehova mor sama wawuoyo kode ka wanyise kaka wahere kendo goyone erokamano. Odwaro ni wanyise gik ma chandowa, geno ma wan-go, kod gombowa. Ka pok iwuoyo gi Jehova e lamo, donge inyalo paro matut kuom weche midwaro wacho komondi? Kitimo kamano, to ibiro chiwo ‘ubani’ molos maberie moloyo ne Wuonu manie polo.

8. En thuolo mane ma jaber ma wan-go mar pako Nyasaye?

⁸ Walamo Jehova kuom pake. (Zab. 34:1) Wapako Jehova sama wawuoyo gi jomomako e wi kido mabeyo ma en-go kod tije madongo mosetimo. Ka wan gi chuny mar goyo erokamano, to wabiro bedo gi gik mang’eny ma wanyalo wacho e wi Jehova. Ka wakawo thuolo mondo wapar matut kuom gik mabeyo duto ma osetimonwa, wabiro bedo kod gik mang’eny ma miyo wapake. Tij lendo miyowa thuolo mar ‘chiwo ne Nyasaye misango mar pak, tiende ni olemo mar dhowa.’ (Hib. 13:15) Mana kaka onego wapar matut kuom weche ma wabiro wacho ne Jehova e lamo, e kaka bende dwarore ni wapar matut kuom weche ma wabiro wacho ne joma waromogo e tij lendo. Wadwaro ni ‘misangowa mar pak’ obed misango maberie moloyo. Omiyo, onego wawuo koa e chunywa sama walendo ne jomamoko.

9. Mana kaka Jo-Israel machon, gin gueth mage ma wayudoga sama wadhi e chokruoge? Wach ane moko kuom gueth ma in iwuon iseyudo.

 ⁹ Walamo Jehova kuom dhi e chokruoge. Nonyis Jo-Israel machon kama: “Jou ma chwo duto biro chokore e nyim Jehova Nyasachu nyadidek e higa ka ma obiro yiero.” (Rap. 16:16) Ne nyaka giwe miechgi kod cham ma ne gipidho e puothegi ka onge ng’ama ritogi. Kata kamano, Jehova nosingonegi niya: “Kinde ma ubiroga dhi neno wang’ Jehova Nyasachu didek e higa, onge ng’at ma biro temo kawo pinyu.” (Wuok 34:24) Nikech Jo-Israelgo ne nigi yie motegno kuom Jehova, ne gidhiga e chokruogego ma ok gibare. Ne giyudo gueth mang’eny ahinya. Kuom ranyisi, ne gimedo ng’eyo chike Nyasaye, ne giyudo thuolo mar paro matut kuom ber mar Jehova, kendo ne giyudo jip moa kuom jowetegi. (Rap. 16:15) Wan bende wayudo ber kaka mago sama watimo duto ma wanyalo ma wachopo e chokruoge mag Jokristo. Parie kaka Jehova bedoga mamor sama waikore ne chokruok kendo wachiwo paro ma jiwo jomamoko, kata ka en mana paro machuok!

10. Ang’o momiyo wer en achiel kuom yore madongo ma walamogo Jehova?

¹⁰ Walamo Jehova kuom werne. (Zab. 28:7) Jo-Israel ne neno wer kaka yo maduong’ ma ne gilamogo Jehova. Ruoth Daudi noyiero Jo-Lawi 288 mondo obed jower e hekalu. (1 We. 25:1, 6-8) E kindegi bende, wanyiso kaka wahero Jehova sama wawero wende ma dende. Dwol ma wawergo ok e gima duong’ sama wawer. Ne ane ranyisini: Sama wawuoyo, “waduto wachwanyore nyading’eny,” to mano ok monwaga dhi nyime wuoyo sama wan e chokruok kata sama wan e tij lendo. (Jak. 3:2) E yo ma kamano bende, ka dwondwa ok mit e wer, mano ok onego omonwa wero ne Jehova wende mag pak.

11. Mana kaka olernwa e Zaburi 48:13, ang’o momiyo dwarore ni waket thuolo tenge mondo wapuonjre Muma kaka joot?

¹¹ Walamo Jehova kuom puonjore Wachne kendo puonjo nyithindwa mondo ong’eye. Chik mar Sabato ne miyo Jo-Israel keto dijegi mapile tenge mondo giket pachgi e loso winjruokgi gi Jehova. (Wuok 31:16, 17) Jo-Israel ma nomakore gi Jehova nopuonjo nyithindgi e wi Jehova kod berne. Wan bende nyalo bedo maber ka waketo thuolo moro tenge mondo wasom Wach Nyasaye kendo wapuonjre. Mano en achiel kuom yore ma walamogo Jehova, kendo timo mano konyowa sudo machiegni kode. (Zab. 73:28) Bende, ka wapuonjore Wach Nyasaye kaka joot, wabiro konyo nyithindwa mondo gibed gi winjruok maberie mogik gi Wuon-gi ma jahera manie polo.​—Som Zaburi 48:13.

12. En ang’o ma wapuonjore kuom yo ma Jehova nonenogo tij loso hema kod gik ma ne ni e iye?

¹² Walamo Jehova kuom gero utewa mag lamo kendo ritogi maber. Muma wacho ni tij loso hema kaachiel gi gik ma ne ni e iye ne en “tich mowal.” (Wuok 36:1, 4) E kindewagi bende, Jehova neno tij gero Ute Romo kod ute mamoko misirogo lamo madier kaka tich maler. Nitie owete gi nyimine moko ma tiyo gi thuologi mang’eny e timo tije kaka mago. Donge wamor gi kinda ma gitimo e siro tij Pinyruoth? En adier ni gin bende gidhiga e tij lendo. Moko kuomgi osegombo nyaka bedo jopainia. Sama gikwayo bedo jopainia, jodong-kanyakla  nyalo nyiso ni gimor gi tich ma gitimo kuom pwodhogi ka po ni gichopo okenge ma dwarore ne jopainia. Bed ni wan gi lony e tij gedo kata ooyo, waduto onego wakony e rito utewa mag lamo osik ka ler kendo ka ber.

13. Ere kaka onego wane chiwo ma wagolo ma wasirogo tij Pinyruoth?

¹³ Walamo Jehova kuom golo chiwo ma siro tij Pinyruoth. Jehova nochiko Jo-Israel ni kik gidhi e nyime gi lwetgi nono. (Rap. 16:16) Nonego gikel mich ka luwore gi nyalogi. Kuom timo kamano, ne ginyiso ni gimor gi gik mabeyo duto ma Jehova nosetimonegi. Ere kaka wanyalo nyiso ni wahero Jehova kendo ni wagoyone erokamano kuom gik mabeyo duto mosemiyowa ma konyowa rito winjruokwa kode? Achiel kuom yore ma watimogo kamano en golo chiwo mar pesa ma siro tije mag kanyaklawa kod tij piny ngima ka luwore gi nyalowa. Jaote Paulo nowacho kama: “Ka chuny moikore nitie mokwongo, mano bedo gima owinjore moloyo, ka ng’ato chiwo kaluwore gi gima en-go, to ok kaluwore gi gima oongego.” (2 Kor. 8:4, 12) Jehova mor ahinya gi chiwo ma wagolo koa e chunywa kata bed ni otin ma romo nade.​—Mar. 12:42-44; 2 Kor. 9:7.

14. Ka luwore gi Ngeche 19:17, ere kaka Jehova neno kony ma wamiyo owetewa gi nyiminewa ma chandore?

¹⁴ Walamo Jehova kuom konyo Jokristo wetewa ma chandore. Jehova nosingo ni nodhi chulo Jo-Israel ma ne kecho joma odhier. (Rap. 15:7, 10) Sa asaya ma wakonyo Jakristo wadwa moro, Jehova neno mano ka gima wahole gowi. (Som Ngeche 19:17.) Kuom ranyisi, ka ne Jo-Filipi ooro mich ne Paulo ka ne en e jela, Paulo noneno michgo kaka “misango malong’o, kendo ma Nyasaye oyiego.” (Fil. 4:18) Ng’i ane joma ni e kanyaklau, kae to ipenjri kama: ‘Be nitie ng’at ma chandore ma anyalo konyo?’ Jehova mor sama oneno ka watiyo gi tekowa, thuolowa, lonywa, kod mwanduwa e konyo joma chandore. Oneno mano kaka achiel kuom yore ma walamego.​—Jak. 1:27.

15. Ang’o momiyo lamo Jehova ok en gima tek kata obedo ni odwaro thuolo kod kinda?

¹⁵ Lamo Jehova dwaro thuolo kod kinda. To mano ok en gima tek. (1 Joh. 5:3) Ang’o momiyo wawacho kamano? En nikech hera e ma miyo walamo Jehova. Tem ane paro nyathi ma dwaro miyo wuon-gi mich moro. Onyalo tiyo gi thuolo mang’eny kogoro picha ma odwaro miyo wuon-gi. Nyathino ok bi ywago ang’e kuom thuolo ma notiyogo kogoro pichano. Ohero wuon-gi kendo omor miye michno. Kamano bende, nikech wahero Jehova, wamor tiyo gi thuolowa kendo timo kinda e lame.

16. Ka luwore gi Jo-Hibrania 6:10, ere kaka Jehova neno kinda ma watimo mondo wamore?

¹⁶ Jonyuol mohero nyithindgi ok gen ni nyathi ka nyathi biro miyogi mich machal. Ging’eyo ni nyathi ka nyathi opogore gi nyawadgi kendo ni nyalogi ok chalre. Kamano bende, Wuonwa manie polo ong’eyo chal mar ng’ato ka ng’ato kuomwa. Samoro inyalo timo gik mathoth moloyo jomamoko. Kata samoro ok inyal timo mathoth kaka jomamoko nikech hiki, tuo, kata ting’ mar joot. Kik chunyi nyosre. (Gal. 6:4) Wi Jehova ok bi wil gi tich misetimo. Obiro bedo mamor gi chiwo mimiye, tek mana ni ichiwo kar nyaloni kendo gi chunyi duto. (Som Jo-Hibrania 6:10.) Jehova nenoga  nyaka gik migombo timo. Odwaro ni ibed mamor kendo ilame gi chunyi duto ka luwore gi nyaloni.

17. (a) Ka po ni wayudo ka teknwa timo gik motudore gi lamo, gin okenge mage ma wanyalo kawo? (b) Ere kaka timo gik monyis e sanduk ma wacho ni “Tim Gik ma Biro Miyo Imed Bedo Mamor” osekonyi?

¹⁷ To nade ka po ni wayudo ka teknwa timo gik motudore gi lamo, kuom ranyisi, timo puonjruok ma marwa wawegi kata dhi e tij lendo? Ka watimo gigo ma ok wabare, wabiro bedo mamor kendo wabiro yudo ber mathoth. Wanyalo pimo yorewa mag lamo Jehova gi tiego del kata puonjruok tugo thum. Ka watimo gigo mana dichiel ka dichiel, ok wabi lony e timogi. To nade ka wang’ado ni wabiro timo gigo pile ka pile? Wanyalo chako timogi kuom thuolo machuok, kae to mosmos wanyalo medo thuolo ma watimogigo. Kaka wamedo neno ber ma kindawa kelo, e kaka wabiro medo timo gigo, kendo gibiro miyo wabed mamor. Be ineno kaka wanyalo tiyo gi ranyisino e yore ma walamogo Jehova?

18. Gima duong’ie moloyo ma wanyalo timo e ngimawa en ang’o, to mano biro konyowa nade?

¹⁸ Gima duong’ie moloyo ma wanyalo timo e ngimawa en lamo Jehova e yo moyiego. Timo kamano miyo wabedo mamor kendo wadak e ngima maberie moloyo ka wageno ni wabiro dhi nyime lamo Jehova nyaka chieng’. (Nge. 10:22) Sani wawinjo ka wan gi chuny mokue nikech wang’eyo ni Jehova konyo joma lame sama giromo gi chandruoge. (Isa. 41:9, 10) Kuom adier, wan gi gik mang’eny momiyo onego wabed mamor ni walamo Wuonwa ma jahera mowinjore oyud “duong’, gi luor”!​—Fwe. 4:11.