1-2. Engin nge kan biakna chu Pathian pawm nihtîr ang?

 “BIAKNA” tih thu mal i hriat hian eng nge i rilruah lo lang? A khum bula ṭhingṭhia tih tak zeta ṭawngṭaitu kan unau inngaitlâwm tak tu emaw chu i mitthla mai thei. A nih loh leh, ngun taka Bible zirhona nei chhûngkaw hlim tak chu i ngaihtuah mai thei bawk.

² Chu dinhmun pahnihah chuan anni chu biakna thiltihah an tel ve ve a ni. Jehova’n an biakna chu a pawm ang em? A thiltum nêna inmila hmangaihna leh zahna nêna ti an nih chuan a pawm ngei ang. Jehova chu kan hmangaih tak zet a. Ani chuan chibai bûk a phuin, a ṭha thei ang bera amah biak chu kan duh a ni.

3. He thuziakah hian eng nge kan sawiho vang?

³ He thuziakah hian hmân laia Jehova pawm biakna chungchâng kan ennawn ang a, tûn laia a pawm biakna hmêlhmang pariat pawh kan sawiho bawk ang. Chutianga kan sawiho laiin, Pathian kan biaknaah mi mal taka hma kan sâwn theih dânte kan ngaihtuah thei a. Biakna dikin min tihhlim chhante pawh kan sawiho bawk ang.

4. Engtin nge Kristianna hun hmaa Jehova chibai bûktute’n amah zahna leh hmangaihna an lantîr?

⁴ Kristianna hun hma chuan Abela te, Nova te, Abrahama te, leh Joba te ang mi rinawmte chuan Jehova chungah zahna  leh hmangaihna an lantîr a ni. Engtin nge? Thuawihna te, rinawmna te, leh inpêknate hmangin a ni. Bible chuan Pathian an biak dân chungchâng chu chipchiar takin min hrilh lo. Mahse, an theih ang tâwka Jehova an chawimawi avângin an biakna chu pawmsakin a awm a. Chumi hnuah chuan, Jehova’n Abrahama thlahte hnênah Mosia Dân a pe a. Chûng dânahte chuan a pawm tlâka Amah biak dân tûr chungchânga kaihhruainate a tel a ni.

5. Isua a thih a, a thawhleh hnuah biakna dik chungchângah eng inthlâk danglamna nge awm?

⁵ Isua a thih a, a thawhleh hnuah Jehova chuan Mosia Dân zâwm tûrin min phût tawh lo. (Rom 10:4) Kristiante chuan dân thar, “Krista dân” an zawm a ngai a. (Gal. 6:2) Chu “dân” chu dân leh dûn tam tak zawmna ni lovin, Isua entawn tûr siam zui a, a zirtîrnate nunpuina hmangin an zâwm thei a ni. Tûn laiah pawh, Kristiante chuan Jehova an tihlâwm theih nân leh ‘chawlh hahdamna an hmuh’ theih nân theih tâwp chhuahin Krista hnung an zui a ni.—Mt. 11:29.

6. Engtin nge he thuziak hi kan hlâwkpui theih?

⁶ Kan biakna hmêlhmang tinte kan sawiho laiin heti hian inzâwt rawh, ‘Hemi chungchângah hian eng hmasâwnna nge ka neih tawh?’ tiin. ‘Pathian ka biak dânah hma ka sâwn lehzual thei ang em?’ tih pawhin i inzâwt thei bawk. Hmasâwnna i neih tawhte avângin i hlim ngei ang; mahse, hmasâwn zawm zêl i ngaihna laite hre tûrin Jehova hnênah a ṭanpuina dîlin ṭawngṭai ang che.

7. Engtin nge Jehova’n thinlung taka kan ṭawngṭainate chu a thlîr?

⁷ Jehova hnêna kan ṭawngṭai hian amah kan bia a ni. Bible chuan kan ṭawngṭainate chu biak bûk leh a hnua biak in lo ni taa hlan ṭhin, ṭha taka buatsaih rimtui nên a khaikhin a. (Sâm 141:2) Chu rimtui chuan Pathian a tilâwm a ni. Chutiang bawkin, thinlung taka kan ṭawngṭainate chu ṭawngkam mâwl mang tak pawh ni se, “a lâwm zâwng a ni.” (Thuf. 15:8; Deut. 33:10) Jehova’n amah kan hmangaihzia leh a chunga kan lâwmzia a hriat hian, chu chuan a thinlung a tilâwm tih rinna tûr chhân ṭha kan nei a. Kan lungkhamna te, beiseina te, leh kan duh zâwngte chu a hnêna thlen tûrin min duh a ni. Ṭawngṭaia Jehova i pan hmain, engvângin nge i sawi tûrte chu ngun taka i ngaihtuah lâwk loh vang? Chutianga i tih chuan, kan Pa vâna mi hnênah “rimtui” ṭha ber i hlân a ni ang.

8. Pathian fak tûrin eng hun remchâng ṭha nge kan neih?

⁸ Jehova kan fak hian amah kan bia a ni. (Sâm 34:1) Jehova mize ropui tak takte leh a thiltihte chungchâng phûr taka kan sawi hian amah kan fak a ni. Fakna chu lâwmna thinlung aṭanga lo chhuak a ni a. Jehova ṭhatnate—kan tâna a thiltih zawng zawngte—hun pea kan chhût ngun hian, amah fakna tûr chhan tam tak kan nei a ni. Thu hrilh rawngbâwlna chuan a bîk takin, “hmuite rah,” tia sawi theih ‘faka inthawina chu Pathian hnêna hlan’ theihna hun remchâng min pe a ni. (Heb. 13:15) Ṭawngṭaia Jehova kan pan hmaa kan sawi tûrte ngun taka kan ngaihtuah lâwk a ngai ang bawkin, rawngbâwlnaa kan mi tawn tûrte hnêna kan sawi tûrte chu ngun takin kan ngaihtuah lâwk tûr a ni. A ṭha thei ang bera Pathian hnêna “faka inthawina” hlan chu kan duh a. Chuvângin, mi dangte hnêna thu kan hrilh hunah thinlung aṭangin kan sawi ṭhîn a ni.

9. Hmân lai Israelte angin, engtin nge inhmuhkhâwm chu kan hlâwkpui? I mi mal thiltawn sawi rawh.

⁹ Inkhâwma kan tel hian Jehova kan bia a ni. Hmân lai Israel mite chu: “Kum tin in  mipa zawng zawng te chu vawi thum LALPA hmaah, hmun a la ruat tûrah chuan an inlan tûr a ni,” tia hrilh an ni a. (Deut. 16:16) An in leh thlai chînte chu vêngtu awm lova an kalsan a ngai a ni. Mahse, Jehova’n an hnênah: “LALPA i Pathian hmaa inlan tûra i han kal hunah chuan tu mahin i ram hi an rawn ît hek lo vang,” tiin a tiam a ni. (Ex. 34:24) Pathian Jehova ṭihtu chûng Israelte chuan rinna nghet tak an neih avângin kum tina neih kût nîte hmang tûrin an kal a. Chuvângin, malsâwmna tam tak an dawng a ni; Pathian Dân an hre thiam lehzual a, A ṭhatnate an chhût ngun a, an rinpui unaute nêna intihchak tawnna hun ṭha tak an nei a ni. (Deut. 16:15) Keini pawhin, Kristian inkhâwmtea tel tûra kan inpêk hian chutiang hlâwknate chu kan dawng a ni. Chhânna tawi fel tak pe tûra inbuatsaihna ṭha tak neia kan lo kal huna Jehova lâwm dân tûr chu han ngaihtuah teh.

10. Engvângin nge hlasak chu kan biakna pêng pawimawh tak a nih?

¹⁰ Hla kan sakho hian Jehova kan bia a ni. (Sâm 28:7) Israel mite chuan hlasak chu an biakna pêng pawimawh tak angin an ngai a. Lal Davida chuan biak ina hla satu tûr Levia mi 288 a ruat a ni. (1 Chro. 25:1, 6-8) Tûn laiah pawh, fakna hlate sain Pathian kan hmangaihzia kan lantîr a. Kan aw ṭhat leh ṭhat loh chu thil pawimawh ber a ni lo. He khaikhinna hi han ngaihtuah teh: Thu kan sawi hian ‘vawi tam tak kan sawi sual fo ṭhîn a;’ mahse, chu chuan kohhranah leh rawngbâwlnaah thu sawi lovin min awmtîr chuang lo. (Jak. 3:2) Chutiang bawkin, kan aw a ṭhat tâwk loh hlauhna chu Jehova faka zai loh phah nân kan hmang tûr a ni lo.

11. Sâm 48:13-naa sawi angin, engvângin nge chhûngkuaa Bible zirhona atâna hun duan kan neih a ngaih?

¹¹ Bible kan zira kan fate kan hrilh chhâwn hian Jehova kan bia a ni. Chawlhni chuan Israel mite chu an nî tin hnathawhte chawlhsan a, Jehova nêna an inlaichînna ngaihven theihna hun remchâng a pe a. (Ex. 31:16, 17) An zînga mi rinawmte chuan an fate chu Jehova leh a ṭhatna chungchâng an zirtîr a ni. Keini pawhin Bible chhiar nân leh zir nân hun duan kan neih a ngai a. Chu chu Jehova kan biakna pêng pakhat a nih bâkah, amah min hnaihtîrtu a ni. (Sâm 73:28) Chu bâkah, chhûngkuaa Bible zirhona kan neih hian ṭhangtharte—kan fate—chu hmangaihna nei tak kan Pa vân mi nêna mi mal inlaichînna ṭha nei tûrin kan ṭanpui tihna a ni.—Sâm 48:13 chhiar rawh.

12. Jehova’n biak bûk satute leh a bungrua siamtute hnathawh a thlîr dân aṭangin eng nge kan zir?

¹² Biakna atâna hman inte saa, kan vawn ṭhat hian Jehova kan bia a ni. Jehova chuan biak bûk sak leh a bungruate siam hna zawng zawng chu rawngbâwlna thianghlim angin a thlîr a. (Ex. 36:1, 4) Tûn laiah pawh, Kingdom Hall leh biakna atâna hman inte sak chu rawngbâwlna thianghlim angin a la thlîr reng a ni. Unau ṭhenkhat chuan chûng hnate thawhnaah hun tam tak an sêng a. Chûng insaknaa tel kan unaute chungah chuan kan lâwm hle a ni lâwm ni? Ni e, chûng unaute chu thu hrilh rawngbâwlnaah pawh an tel a. An zînga ṭhenkhat chuan pioneer thawh an duh hial a ni. Kohhran upate chuan chûng kan unau thawkrim takte zînga pioneer thawk tûra tlingte chu hreh miah lova thawhtîrin, biakna atâna hman in saknate an thlâwpzia an lantîr thei a. Chûng in sakna lamah chuan thiamna kan nei emaw, nei lo emaw pawh ni se, kan za hian chûng inte tihthianghlimna leh vawn ṭhatna kawngah kan tel vek thei a ni.

13. Engtin nge Lalram rawngbâwlna atâna kan thawhlâwm thawhte chu kan thlîr ang?

 ¹³ Thawhlâwm hmanga Lalram rawngbâwlna kan thlâwp hian Jehova kan bia a ni. Israel mite chu Jehova hmaa kutruaka inlan lo tûra hrilh an ni a. (Deut. 16:16) An dinhmun azirin thilpêkte an keng tûr a ni. Chutiang chuan, Jehova’n an tâna a tihsak zawng zawngte avânga an lâwmzia an lantîr a ni. Engtin nge Jehova kan hmangaihna leh kan tâna thil min tihsak zawng zawngte avânga kan lâwmzia kan lantîr theih? Kawng khat chu kan dinhmun azira tualchhûng kohhran leh khawvêl pum huap tâna thawhlâwm thawh hi a ni a. Tirhkoh Paula chuan: “Inpeihna chu a awm phawt chuan, mi a neih loh pui ni lovin, a neih angzia zêla a pêk chu lawm tlâk a ni si a,” tiin a sawi a ni. (2 Kor. 8:3, 4, 12) Jehova chuan kan thawhlâwm thawhte chu beitham hle mah se, thinlung taka pêk a nih phawt chuan a ngaihlu hle a ni.—Mk. 12:42-44; 2 Kor. 9:7.

14. Thufingte 19:17-a sawi angin, engtin nge Jehova’n ṭanpui ngai unaute kan ṭanpuina chu a thlîr?

¹⁴ Ṭanpui ngai kan Kristian unaute kan ṭanpui hian Jehova kan bia a ni. Ani chuan Israel mite chu mi reitheite chunga thilphalna an lantîr chuan a rûl leh ang tih a tiam a. (Deut. 15:7, 10) Ni e, ṭanpui ngai kan Kristian unaute kan ṭanpui apiangin, Jehova chuan a hnêna thilpêk pe angin a thlîr a ni. (Thufingte 19:17 chhiar rawh.) Entîr nân, Philippi khuaa Kristiante’n tân ina awm Paula hnêna thilpêk an pêk khân, Paula’n chu thilpêk chu “inthawina chhân tlâk, Pathian lâwm zâwng a ni,” tiin a sawi. (Phil. 4:18) In kohhrana unaute chu ngaihtuahin, ‘Ṭanpui ngai tu emaw an awm em?’ tiin inzâwt ang che. Ṭanpui ngai unaute tâna kan hun te, tha leh zung te, thiamna te, leh thil neihte kan hman hian Jehova chu a lâwm a. Ani chuan chu chu kan biakna pêng pakhat angin min thlîrsak a ni.—Jak. 1:27.

15. Biakna dik atân hun leh thate sên ngai mah se, engvângin nge chu chu phurrit a nih loh?

¹⁵ Biakna dik atân hun leh thate sên a ngai a. Mahse, chu chu phurrit a ni lo. (1 Joh. 5:3) Engvângin nge? Jehova kan biak chhan chu amah kan hmangaih vâng a ni. A pa hnêna thil eng emaw pe duhtu naupang chu han mitthla teh. A pêk tûr milem ziah nân dârkâr eng emaw zât a hmang a. Ani chuan dârkâr eng emaw zât a hman avângin pawi a ti lo. A pa a hmangaih a, a milem ziah chu pêk a duh a ni. Chutiang bawkin, Jehova kan hmangaih avângin, biakna dik atâna kan hun leh thate kan hmang thei chu kan hlim hle a ni.

16. Hebrai 6:10-naa sawi angin, engtin nge Jehova’n amah tilâwm tûra kan mi mal hmalâknate chu a thlîr?

¹⁶ Hmangaihna nei tak nu leh pate chuan an fate hnên aṭangin thilpêk inang vek dawn an beisei lo. An fate chu an danglam ṭheuh bâkah, an tih theihte pawh a inchen lo tih an hria a ni. Chutiang bawkin, kan Pa vâna mi chuan kan mi mal dinhmun ṭheuh chu a hre thiam a. I ngainat leh i hriat unau tam takte aiin i thawk tam zâwk pawh a ni thei. A nih loh leh, kum upatna te, hrisêl lohna te, leh chhûngkaw mawhphurhnate avângin mi dangte tlukin i thawk tam thei lo pawh a ni thei bawk. Chutianga a nih chuan, lunghnual suh. (Gal. 6:4) Jehova chuan i thiltihte chu a theihnghilh ngai lo vang a. Chêttîrtu ṭha tak nêna i neih ṭha ber i pêk chhûng chu a lâwm ang. (Hebrai 6:10 chhiar rawh.) Ani chuan thinlunga i thiltumte thlengin a hria a. A tâna i tih theih tâwkahte chuan lâwmna leh lungawina nei tûrin a duh che a ni.

17. (a) Kan biakna pêng thiltih ṭhenkhat chu hlen harsa kan ti a nih chuan, eng hmalâknate nge kan neih theih? (b) “ I Hlimna Tipung Rawh,” tih bâwma târ lan thiltih pakhat chu engtin nge i hlâwkpui tawh?

 ¹⁷ Mi mala inzirna leh vântlâng hmuna rawngbâwlna ang chi biakna pêng ṭhenkhata inhman chu harsa kan ti a nih chuan, engtin nge ni ang? Chûng thilahte kan inhman tam poh leh nuam kan ti lehzualin kan hlâwkpui lehzual tih kan hriat ngei a rinawm. Kan biakna chu taksa sawizawi emaw, rimawi tum zir emaw ang chi thiltih ṭhenkhat nên kan khaikhin thei a. Chûngte chu eng emaw châng chauhva kan ti a nih chuan, hma kan sâwn chak lo ngei ang. Mahse, nî tina tih kan tum angah han inchan teh. A tîr chuan, rei lo te chhûng chauh kan ti a, a hnuah zawi zawiin hun kan hmang tam hret hret a ni. Kan thawhrimnain rah ṭha a chhuah tih kan hmuh chuan, chutianga tih hun chu kan nghâkhlelin nuam kan ti hle ngei ang. Chutiang chiah chuan, kan biaknaah pawh a tihtheih tih i hria em?

18. Kan tih theih azawnga pawimawh ber chu eng nge ni a, chutianga tihna chuan eng nge a thlen ang?

¹⁸ A ṭha thei ang bera Jehova biak chu kan tih theih azawnga thil pawimawh ber a ni a. Chutianga kan tih chuan, nun hlimawm leh lungawithlâk tak kan nei ang a, chatuana Jehova chibai bûk theihna pawh kan nei ang. (Thuf. 10:22) Jehova’n amah chibai bûktute chu harsatnate an tawh hunah a ṭanpui ṭhîn tih kan hriat avângin, tûnah ngei pawh rilrua thlamuanna kan nei a ni. (Is. 41:9, 10) A thil siam zawng zawngte hnên aṭanga “ropuina te, chawimawina te” dawng tlâk, hmangaihna nei tak kan Pa Jehova kan biak theih avângin hlimna tûr chhan ṭha kan va nei chiang tak êm!—Thup. 4:10, 11.