1-2. Ki nou bizin fer pou ki Zeova aksepte nou ladorasion?

 KAN to tann mo “ladorasion,” ki sa fer twa panse? Kitfwa to mazinn enn frer ki pe azenou kot so lili ek ki pe priye Zeova. Ouswa to mazinn enn fami ki kontan etidie Labib ansam.

² Dan toulede sitiasion, sa bann frer ek ser-la pe ador Zeova. Me eski Zeova pou aksepte zot ladorasion? Li pou aksepte zot ladorasion si zot fer zefor pou fer so volonte, ek si zot kontan Li ek respekte Li. Nou bien kontan Zeova. Nou kone ki Li merite ki nou ador Li, ek nou anvi ador Li dan meyer fason ki ena.

3. Ki nou pou examine dan sa lartik-la?

³ Dan sa lartik-la, nou pou gete ki kalite ladorasion Zeova ti aksepte dan lepase, ek nou pou get wit kitsoz ki Zeova anvi nou fer kan nou ador Li. Amezir ki nou fer sa, nou kapav reflesi lor kouma nou kapav amelior nou ladorasion pou Zeova. Nou pou gete osi kifer, kan nou ador Zeova dan bon fason, sa rann nou ere.

4. Dan lepok Biblik, kouma bann serviter Zeova ti montre ki zot ti kontan Li ek respekte Li?

⁴ Dan lepok Biblik, bann zom fidel kouma Abel, Noe, Abraam, ek Zob ti montre ki zot ti kontan Zeova ek respekte Li, kan zot ti obeir Li, zot ti ena lafwa an Li, ek zot ti fer bann sakrifis pou Li. Labib pa koz lor tou seki zot  ti bizin fer pou ador Zeova. Me li kler ki zot ti fer zot best pou donn Li loner, ek Zeova ti aksepte zot ladorasion. Plitar, Zeova ti donn bann Izraelit Lalwa Mozaik. Ek dan sa lalwa-la, Zeova ti donn zot bann instriksion bien presi pou ki zot ador Li dan fason ki Li Li anvi.

5. Kouma Zeova ti anvi ki bann disip Zezi ador Li?

⁵ Apre lamor ek rezireksion Zezi, Zeova ti nepli demann bann dimounn pou obeir Lalwa Mozaik. (Rom. 10:4) Bann disip Zezi ti bizin swiv enn nouvo lalwa, “lalwa Lekris.” (Gal. 6:2) Pou zot obeir sa “lalwa” la, zot pa ti bizin rapel ek swiv enn long lalis instriksion. Zot ti bizin imit lexanp Zezi ek swiv so bann lansegnman. Azordi osi, bann Kretien fer zot best pou swiv lexanp Zezi, pou ki zot fer Zeova plezir ek ki zot “gagn rekonfor.”​—Mat. 11:29, NW.

6. Kouma nou kapav gagn bann bienfe ar sa lartik-la?

⁶ Amezir ki nou pou examinn sakenn parmi sa wit kitsoz ki form parti dan nou ladorasion-la, nou kapav demann noumem, ‘Ki progre mo’nn fer dan sa domenn-la? Eski mo kapav amelior mo ladorasion pou Zeova?’ Kitfwa nou satisfe avek seki nou pe fer asterla. Selman, nou bizin demann Zeova pou ed nou pou trouve ki kitsoz nou kapav ameliore ankor.

7. Ki Zeova panse kan nou priye Li avek tou nou leker?

⁷ Nou ador Zeova kan nou priye Li. Labib konpar nou bann lapriyer ar enn lansan ki ti ofer dan tabernak ek dan tanp. Anplis, sa lansan-la ti bien prepare. (Ps. 141:2) So parfin ti fer Zeova plezir. Dan mem fason, bann lapriyer ki nou fer avek tou nou leker “fer Li plezir,” mem si nou servi bann mo ki bien sinp. (Prov. 15:8; Det. 33:10) Nou kapav sir ki Zeova kontan kan nou dir Li ki nou kontan Li ek ki nou rekonesan anver Li. Li anvi ki nou dir Li seki trakas nou ek seki fer nou plezir. Avan ki nou priye Zeova, li bon ki nou reflesi bien lor seki nou pou dir Li. Lerla, nou pou kapav ofer nou Papa ki dan lesiel enn pli bon “lansan.”

8. Ki lokazion nou ena pou donn Zeova laglwar?

⁸ Nou ador Zeova kan nou donn Li laglwar. (Ps. 34:1) Nou donn Zeova laglwar kan nou dir bann dimounn ki nou kontan Li ek ki nou apresie so bann zoli kalite. Si nou ena rekonesans pou Zeova, nou pou ena boukou bon kitsoz pou dir lor Li. Kan nou pran letan pou reflesi lor bann bon kitsoz ki Zeova inn fer pou nou, nou pou trouv bann rezon pou donn Li laglwar. Ek kan nou prese, nou gagn lokazion pou “ofer Bondie nou louanz kouma enn sakrifis.” (Ebre 13:15) Avan ki nou priye Zeova, nou bizin reflesi bien lor seki nou pou dir Li. Dan mem fason, nou bizin reflesi bien lor seki nou pou dir bann dimounn dan predikasion. Kan nou “ofer Bondie nou louanz,” nou anvi donn Li nou best. Akoz sa, nou koz avek tou nou leker kan nou partaz bann verite Biblik ar bann dimounn.

9. Parey kouma bann Izraelit, kouma nou gagn bann bienfe kan nou asiste bann renion? Explike kouma bann renion inn ed twa.

⁹ Nou ador Zeova kan nou asiste bann renion. Zeova ti dir bann Izraelit: “Trwa fwa dan lane, tou bann zom bizin vinn  devan Zeova to Bondie dan plas ki Li’nn swazir.” (Det. 16:16) Bann Izraelit ti bizin kit zot lakaz ek zot karo, ek pa ti ena personn pou vey lor la. Me Zeova ti promet zot: “Personn pa pou anvi pran to pei kan to pou al get Zeova to Bondie, trwa fwa dan lane.” (Ex. 34:24) Bann Izraelit ti ena full konfians an Zeova. Akoz sa, sak lane, zot ti asiste sa bann fet-la ek zot ti gagn bann bienfe. Par exanp, zot ti aprann plis lor Lalwa Zeova, zot ti reflesi lor bann bon kitsoz ki Zeova ti fer pou zot, ek zot ti profit konpagni bann lezot Izraelit ki ti kontan Zeova. (Det. 16:15) Dan mem fason, nou osi nou gagn bann bienfe kan nou fer tou seki nou kapav pou asiste bann renion. Anplis, Zeova bien kontan kan nou prepar ek donn bann zoli komanter dan renion.

10. Kifer bann kantik bien inportan dan nou ladorasion pou Zeova?

¹⁰ Nou ador Zeova kan nou sant bann kantik ansam ar nou bann frer ek ser. (Ps. 28:7) Bann kantik ti bien inportan dan ladorasion ki bann Izraelit ti donn Zeova. Lerwa David ti donn 288 Levit responsabilite pou sante dan tanp. (1 Kro. 25:1, 6-8) Azordi, nou kapav montre nou lamour pou Zeova kan nou sant bann kantik. Ek nou pa bizin enn bon santer pou nou fer sa. Reflesi lor-la: Kan nou koze, nou tou fer erer, me sa pa anpes nou pou koze dan renion ek dan predikasion. (Zak 3:2) Dan mem fason, mem si nou panse ki nou pa sant bien, fode pa ki sa anpes nou pou sant bann kantik pou Zeova.

11. Dapre Psom 48:13, kifer nou bizin pran letan pou etidie Labib an fami?

¹¹ Nou ador Zeova kan nou etidie so Parol ek kan nou ed nou bann zanfan pou aprann konn Li. Zour saba, bann Izraelit pa ti travay. Sa zour-la, zot ti ranforsi zot lamitie avek Zeova. (Ex. 31:16, 17) Bann Izraelit ki ti fidel, ti ed zot zanfan pou aprann konn Zeova ek pou reflesi lor bann bon kitsoz ki Li ti fer pou zot. Azordi osi, nou bizin pran letan pou lir ek etidie Labib. Sa form parti dan nou ladorasion pou Zeova, ek sa ed nou pou vinn pli pros avek Li. (Ps. 73:28) Ek kan nou etidie Labib an fami, nou kapav ed nou bann zanfan pou kontan Zeova ek pou vinn pli pros avek Li.​—Lir Psom 48:13.

12. Ki nou kapav aprann ar fason ki Zeova ti konsider travay ki bann Izraelit ti fer pou aranz tabernak?

¹² Nou ador Zeova kan nou konstrir ek fer mintenans bann batiman ki nou servi pou ador Li. Kan bann Izraelit ti aranz tabernak ek so bann meb, Labib dir ki Zeova ti konsider sa kouma enn ‘travay sakre.’ (Ex. 36:1, 4) Dan mem fason azordi, kan nou konstrir bann Lasal Renion, ouswa bann lezot batiman ki nou servi pou ador Zeova, Zeova konsider sa travay-la kouma enn travay ki sakre. Sertin frer ek ser pas boukou letan pou partisip dan sa travay-la. Ek nou bien apresie tou seki zot fer! Anplis, zot partisip osi dan predikasion, ek sertin parmi zot anvi fer pionie. Bann ansien montre ki zot soutenir travay konstriksion, kan zot pa anpes sa bann frer ek ser-la pou fer pionie. Mem si nou pena bann gran kapasite dan konstriksion, nou tou nou kapav ede pou fer mintenans sa bann batiman-la ek pou gard zot prop.

13. Kouma nou bizin konsider bann kontribision ki nou fer?

 ¹³ Nou ador Zeova kan nou fer bann kontribision pou travay predikasion. Bann Izraelit pa ti gagn drwa vinn devan Zeova lame vid. (Det. 16:16) Dapre zot sitiasion, zot ti bizin amenn enn kado pou Zeova. Se koumsa ki zot ti montre zot rekonesans pou tou seki Zeova ti fer pou zot. Kouma nou kapav montre nou lamour pou Zeova ek nou rekonesans pou tou seki Li pe fer pou nou? Enn fason ki nou fer sa, se kan nou fer bann kontribision pou nou lasanble ek pou travay predikasion ki pe fer dan lemond antie. Lapot Pol ti dir: “Si zot ena bonn volonte, Bondie aksepte don ki zot done dapre seki zot ena, pa dapre seki zot pena.” (2 Kor. 8:4, 12) Zeova bien kontan kan nou fer bann kontribision avek tou nou leker, mem si nou donn bien tigit.​—Mark 12:42-44; 2 Kor. 9:7.

14. Dapre Proverb 19:17, ki Zeova panse kan nou ed nou bann frer ek ser?

¹⁴ Nou ador Zeova kan nou ed nou bann frer ek ser ki bizin led. Zeova ti promet bann Izraelit ki Li ti pou zenere ar bann dimounn ki ti zenere anver bann pov. (Det. 15:7, 10) Wi, sak fwa ki nou ed enn konpagnon Kretien ki bizin led, Zeova konsider sa kouma enn kado ki nou pe donn Li. (Lir Proverb 19:17. *) Par exanp, kan Pol ti dan prizon ek ki bann Kretien dan lasanble Filip ti avoy li enn kado, Pol ti dir: “Zot bann don kouma enn sakrifis ki fer plezir Bondie.” (Fil. 4:18) Mazinn bann frer ek ser ki ena dan to lasanble, ek demann tomem: ‘Eski ena enn kikenn ki mo kapav ede?’ Zeova bien kontan kan nou servi nou letan, nou lenerzi, nou kapasite, ek nou bann kitsoz materyel pou ed lezot. Pou Li, sa form parti dan nou ladorasion.​—Zak 1:27.

15. Mem si nou bizin donn nou letan ek fer bann zefor pou ador Zeova dan bon fason, kifer se pa enn fardo?

¹⁵ Nou bizin donn nou letan ek fer bann zefor pou ador Zeova dan bon fason. Me se pa enn fardo. (1 Zan 5:3) Kifer? Parski nou kontan Zeova. Anou pran enn lexanp. Enn zanfan anvi donn so papa enn kado. Kitfwa li kapav pran boukou letan pou fer enn desin pou so papa. Me zanfan-la pa pou sagrin ki li’nn pas tou sa letan-la pou fer sa desin-la. Kifer? Parski li kontan so papa, ek li anvi donn li sa kado-la. Dan mem fason, parski nou kontan Zeova, nou anvi servi nou letan ek nou lenerzi pou ador Li.

16. Dapre Ebre 6:10, kouma Zeova trouv bann zefor ki nou fer pou fer Li plezir?

¹⁶ Bann paran ki kontan zot zanfan, pa pou atann ki tou zot zanfan donn zot mem kado. Zot kone ki sak zanfan diferan, ek ki sakenn ena so prop kapasite. Dan mem fason, Zeova kone ki sakenn parmi nou ena diferan kapasite. Kitfwa to kapav fer plis ki lezot. Ouswa, kitfwa to nepli kapav fer otan ki lezot akoz to laz, to lasante, ouswa to bann responsabilite. Me fode pa to dekouraze. (Gal. 6:4) Zeova pa pou ‘bliye seki to’nn fer.’ Tanki to fer to best pou Li, ek ki to fer sa ar bann bon lintansion, sa pou fer  Li plezir. (Lir Ebre 6:10, NW. *) Anplis, Zeova trouve seki to ena dan to leker ek Li kone seki to anvi fer pou Li. Li anvi ki to ere ek ki to satisfe ar seki to pe kapav fer pou Li.

17. (a) Si nou trouv sa difisil pou fer sertin kitsoz ki nou’nn examine dan sa lartik-la, ki nou kapav fer? (b) Parmi bann domenn ki ena dan lankadre “ Vinn Pli Ere,” lekel finn ed twa dan to ladorasion pou Zeova?

¹⁷ Ki nou kapav fer si nou trouv sa difisil pou fer sertin kitsoz ki form parti dan nou ladorasion, kouma par exanp, nou letid personel ouswa predikasion? Plis nou fer sa bann kitsoz-la, plis nou pou aprann kontan zot, ek plis nou pou gagn bann bienfe. Nou kapav konpar nou ladorasion pou Zeova ar bann laktivite kouma fer lexersis ouswa zwe enn linstriman lamizik. Si nou fer sa enn fwa letan, nou pa pou progrese. Me si nou pran labitid pou fer sa toulezour, o-koumansman, kitfwa nou pou kapav fer li zis pandan de-trwa minit. Me avek letan, nou pou kapav fer li pli lontan. Ek amezir ki nou trouv rezilta nou bann zefor, nou pou vremem kontan sa bann laktivite-la, ek nou pou anvi fer zot. Li parey pou nou ladorasion pou Zeova.

18. Ki kitsoz pli inportan nou kapav fer, ek ki pou arive si nou fer sa?

¹⁸ Kitsoz pli inportan nou kapav fer, se fer nou best pou ador Zeova. Si nou fer sa, nou pou ere, nou pou ena enn lavi ki ena sans, ek nou pou ena posibilite pou ador Zeova pou touletan. (Prov. 10:22) Anplis, nou deza ena lape lespri parski nou kone ki Zeova pe ed so bann serviter ki dan difikilte. (Iza. 41:9, 10) Nou vremem ena bann bon rezon pou ere kan nou ador nou Papa Zeova, Li ki “merit resevwar laglwar, ek loner ek pwisans”!​—Rev. 4:11.