1-2. Isiyani inlamuliyeehu upanka wiira Yehova atthune uswali wihu?

 ISIYANI inoowaani mmuru mweewaka nuulumo “uswali”? Nyuuva atthunaka nnomuupuwela munna nakhoromile anlompaka Yehova hinaaya urupa. Awula atthunaka nnowuupuwela amuci yasomaka Ibiiblya nkhayi unaatteelale nrima.

² Citthu coopiili cimpankaaya ayo atthwaayo unkhala unswalela Nluku. Niireke Yehova naahala utthuna uswali waya? Naahala utthuna wakhala wiira ayo atthwaayo anawiikurumica umwiiwelela, ananfenta ni ananhisimu. Hi ninanfenta cinene Yehova. Ninaacuwela wiira uyo unamphwanela uswaleliya; phimaana nimpheela wiikurumica unswalela sana-saana.

3. Isiyani inhaleehu wiitthuca nhina ula mwahoola?

³ Nhina ula mwahoola, ninaahala wuuluma uswali Yehova waatthunaawe khalayi. Ciicammo, ninaahala woona citthu 8 cinlamuliyeehu upanka mahukwaala wiira ninswalele Yehova ni wiira atthune uswali wihu. Ukati unhaleehu woopela mwaha nnyo citthunnyo, muupuwele mananna cinhaleehu weettela nnyo citthunnyo wiira ntepe unswalela ratta Yehova. Ni ninaahala wiitthuca nlattuni untteeliyeehu nrima nanswalelaka ratta Yehova.

4. Yesu Kristu hinaaya uwa watuninyani, aswali a Yehova yaathoonyenre cani wiira yaananhisimu ni yaananfenta?

⁴ Yesu Kristu hinaaya uwa watuninyani, alopwana ookhuluvelya khampa Apeli, Nowee, Aparahaamu ni Jó yahothoonyera unhisimu ni unfenta Yehova. Manannani? Ayo yahomwiiwelela, yahomwaamini ni yahonvaherera itthuvo. Ibiiblya khinhimya citthu ayo atthwaayo caalamuliyaaya upanka wiira answalele Nluku. Masi iyo inaathoonyera wiira ayo yaheekurumica unttitthimiha Yehova ni uyo ahotthuna uswali waya. Wahoolo, Yehova ahonruma Moceesi waahimyeera asarayeli malamulwaawe. Ayo  malamulwaayo yaanaattonkaca manannani Yehova caapheelaawe uswaleliya.

5. Ukhwa wawe ni wunwelelihiya wawe Yesu Kristu, mananna ooswaleliya Yehova yaarukunuwile cani?

⁵ Ukhwa wawe ni wunwelelihiya wawe Yesu Kristu, Yehova hohiya ulepela wiira apinaatamu yeettele malamulo a Moceesi. (Aroo. 10:4) Makristau yaahaana vano yeettelaka nlamulo nophiyaaru: “nlamulo na Kristu.” (Akalas. 6:2) Wiira yiiwelele nno nlamulo nophiyaarunno, makristau khayaalamuliya utthara ilista yo citthu caalamuliyaaya upanka ni cahaalamuliyaaya. Masi ayo yahaana yantakihaka Yesu ni utthara citthu ciitthucihilyaawe. Mahukwaala, makristau ciicammo anawiikurumica untakiha Yesu. Ni yeekurumicaka untakiha, anantteeliha nrima Yehova ni anaaphwanya “utteeliya nrima.”—Mat. 11:29.

6. Ula mwahoola unhala wuukaviherani cani?

⁶ Ukati unhaleehu woopela mwaha khula itthu inlamuliyeehu upanka wiira ninswalele Yehova, mwiikohe co: ‘Ila itthwiila miiva kinnopanka ratta?’ Ni pooti wiikoha-tho: ‘Isiyani miiva inlamuliyaaka upanka wiira unswalela waka Yehova utepe ukhala womaana?’ Nyuuva nhaana isariya yowuutteelani nrima moonaka wiira nnaakhitiri upanka citthu cinci wiira munswalele Yehova. Masi ciicammo munlepele Yehova wuukaviherani woona isiyani inamuliyeenyu wiitthuceeha upanka ratta.

7. Yehova noonela cani ulompa wihu ninrimeehu wotheene?

⁷ Hiiva ninanswalela Yehova nanlompaka. Ibiiblya ineera wiira ulompa wihu unkhala khampa ilumpani yaatthenkaciya ratta-raatta wiira ipahiye ntabernakuluni ni wahoolo ntempuluni. (Isaa. 141:2) Iyo ilumpaniiyo Yehova aanawoona unukhela cinene. Inanna imocaaru, ulompa wihu ninrimeehu wotheene unancivela cinene Yehova, hataa nihuulumaka citthu cinci ukati unlompeehu. (Miru. 15:8; Deut. 33:10) Pooti wankupaliihu wiira Yehova unancivela wiiwa moolumweehu anthoonyera unfenta ni unsukhuru wihu. Yehova mpheela wiira ninhimyeere citthu cinnihela isukhuli, citthu cinoopuweleehu upanka wahoolo ni citthu cimpheeleehu. Nhinaaya umuulumana Yehova, nnoonela cani weemela vakaani ni wuupuwela citthu cinhaleenyu unhimyeera? Mwapankaka commo, nyuuva nnaahala unvaha Yehova ilumpani yoonukhela cinene.

8. Manannani hiiva ninonttottopeleehu Nluku?

⁸ Hiiva ninanswalela Yehova nanttottopelaka. (Isaa. 34:1) Hi ninonttottopela Yehova naahimyeeraka akhwiihu inanna cinonfenteehu ni inanna cinnicivelaaya makhalelwaawe ni citthu cimpankaawe. Nansukhuruku Yehova ninrimeehu wotheene, khunnirika unttottopela. Nakumihaka ukati wiira nuupuwele citthu comaana cotheene Yehova nonipankelaawe, khacinhala unithwaa citthu conttottopela. Nteko woolalyaa ihapari ‘unlikana nunvaha itthuvo Nluku nivarelaka nteko malakwiihu.’ (Mabere. 13:15) Nihinaaya ulompa, unaareera weemela ni wuupuwela isiyani inhaleehu unhimyeera Yehova. Inanna imocaaru, nihaana nikumihaka ukati wiira nuupuwele myahani cinhaleehu uwoopana atthu wuulalyaani ihapari. Hi nimpheela unvaha Yehova itthuvo yomaana. Phimaana ukati wo waalalyeera atthu ihapari ca Nluku, ninaahala wiikurumica wuuluma ninrimeehu wotheene.

9. Khampa asarayeli, manannani mikutthaano cihu cinnikaviheraaya? Nttonkace mananna mikutthaano cuukavihenryaayani nyuuva.

⁹ Hiiva ninanswalela Yehova nakhalaka mmikutthaanoni. Asarayeli yaheereliya co: “Khula mwaakha ikwaha tthaaru, alopwana otheene ahaana yamphiyeeraka Yehova nipuro ninhalaawe uthanla.” (Deut. 16:16) Iyo itthwiiyo maanaaya wiira inupa caya ni imatta caya caahala uhala veekha woohikhalenliya nintthu.  Masi Yehova aheera co: “Khaavo nhala woonela nttima itthayeenyu ukati unhaleenyu weetta isafari ikwaha tthaaru khula mwaakha nrwaaka umphiyeera Yehova, Nlukwiinyu.” (Nkw. 34:24) Ukhala wiira yaanankhuluvela Yehova, asarayeli yaanaarwa woona nnyo mikutthaanonnyo khula mwaakha. Woona nnyo mikutthaanonnyo, waanaakavihera asarayeli nimananna menci toko wiitthuca nlamulo na Nluku, wuupuwela citthu comaana Yehova caapankenlyaawe ni utteeliya nrima nlattu wookhala naatthu akhwaawe yanfenta Yehova. (Deut. 16:15) Iyo ciicammo phi itthu inniirannyeela neekurumicaka urwaa umikutthaanoni. Ni muupuwele mananna Yehova cinontteelaaya nrima anoonaka nirwaaka umikutthaanoni owiitthenkaceene wiira nivahe ikomentaariyu cankaani ni cowuupuweliya ratta.

10. Kontha isiyani wiipa inkhala itthu yofayita wuuswalini wihu?

¹⁰ Hiiva ninanswalela Yehova neepaka nkhayi ni mayamunneehu. (Isaa. 28:7) Wiipa yaakhala itthu yuulupale muuswalini waasarayeli. Mwene Davidi ahaathanla malevita 288 wiira yiipe ntempulu. (1 Ikor. 25:1, 6-8) Ilelo, hiiva ninthoonyera wiira ninanfenta Nluku neepaka icipo conttottopela, hataa ukhalaka wiira ninaacuwela wiipa ratta awula mena. Muupuwele ila itthwiila: Ukati ninoolumeehu, “otheene cihu ninaatthekaka imaara cinci.” Masi hataa ukhala commo, hi khaninhiya wuuluma wanlokoni ni wuulalyaani. (Tiya. 3:2) Inanna imocaaru, hi khaninlamuliya uhiya wiipa icipo conttottopela Yehova nlattu wowooniha wiira khanincuwela wiipa.

11. Toko cineeraaya Isaalimu 48:13, nlattuni unreeraaya usoma Ibiiblya naamuciihu?

¹¹ Hiiva ninanswalela Yehova nasomaka Ibiiblya ni naakaviheraka asaaniihu uncuwela. Nihuku no Isaapatu asarayeli khayaavara nteko ni yaanaahoolelihera ulipihaca upatthannyaaya ni Yehova. (Nkw. 31:16, 17) Nno nihukunno, asarayeli yanwiitthuciha asaanaaya myaha ca Yehova ni citthu comaana caapankaawe. Mahukwaala, hiiva ciicammo nihaana niivahaka ukati wiira nisome Nuulumo na Nluku. Upanka commo unaalipihaca upatthaniihu ni Yehova ni ankhala mananna onswalela. (Isaa. 73:28) Ni napankaka uswali waamuci, ninaakhalana ukati wowaakavihera asaaniihu ukhalana upatthani woolipa naapaapeehu Yehova..—Nsome Isaalimu 48:13. *

12. Yehova aawehera cani nteko waatthu yaatekile itabernakulu, ni iyo itthwiiyo inniitthuciha isiyani?

¹² Hiiva ninanswalela Yehova natekaka ni narattelaka nipuro ninswaliihu. Ibiiblya ineera wiira utekiya itabernakulu ni upankiya ikaruma cotheene caari nhina waya, waari “nteko wowaarya.” (Nkw. 36:1, 4) Mahukwaala, Yehova ciicammo nawoona ukhala nteko wowaarya utekiya Isalau co Umwene ni inupa cikhwaawe cintekiya wiira civareliye nteko mumphwinkoni wawe woothotokanihiya. Mayamunneehu anaaviriha ukati mwinci yavaraka uyo ntekooyo. Hi ninawaasukhuru cinene nlattu wo nteko unvaraaya. Masi ayo mayamunnaayo ciicammo anaavara nteko woolalya ihapari ca Nluku ni akhwaawe atthunaka anaapheela uvara nteko weepiyoneeru. Mahumu anhala uthoonyera wiira anaakavihera nteko unvaraaya ayo mayamunnaayo yaatthuniheraka ukhala mapiyoneeru wanlokoni. Hataa ukhalaka wiira khanincuwela utekateka, otheene cihu pooti ukavihera uyo ntekooyo neekurumicaka urattela nipuro ninswaliihu.

13. Kontha isiyani micanko cinvaheehu cihaana ifayita?

¹³ Hiiva ninanswalela Yehova navahaka micanko wiira nikavihere nteko wo Umwene. Asarayeli khayaalamuliya umphiyeera Yehova matataru. (Deut. 16:16) Ayo yahaana yanwaanelaka Yehova itthuvo caahalaaya ukhitiri unvaha. Yapankaka commo, ayo yanthoonyera  usukhuruweela citthu cotheene Yehova caapankelaawe. Ninhala uthoonyera cani unfenta Yehova ni unsukhuru nlattu wo citthu cotheene cinnivahaawe ni cinnipankelaawe? Inanna imoca ukhanle uvaha micanko wiira nikavihere nloko nihu ni wiira nikavihere nteko wo Umwene ntuninyani motheene. Apostolu Paulu heera: “Nluku uncivela cinene navahaka ninrimeehu wotheene, kontha uyo nopheela wiira ntthu avaheke ile irinaawe, kahi itthu ihirinaawe.” (2 Akor. 8:4, 12) Yehova unantteela nrima oonaka khula ncanko unvaheehu ninrimeehu wotheene, hataa ukhalaka vakaani.—Mark. 12:42-44; 2 Akor. 9:7.

14. Toko cineeraaya Miruku 19:17, Yehova nokhala cani anoonaka naakaviheraka mayamunneehu?

¹⁴ Hiiva ninanswalela Yehova naakaviheraka mayamunneehu. Yehova ahohimya wiira anhala waatthuvela asarayeli yaahala waakavihera amasikhini. (Deut. 15:7, 10) Khula ikwaha ninonkavihereehu munneehu awula nrokorihu nothwennya unkhala khampa ninanvaha itthu Yehova. (Nsome Miruku 19:17. *) Wootakihera, ukati makristau o Filipo waaveleelihilyaaya itthu wiira ankavihere Paulu ukati waaryaawe nkhattya, uyo aheera wiira itthu yaapankilyaaya yaakhala ‘khampa itthuvo yomaana inontteeliha nrima Nluku.’ (Afili. 4:18) Nwuupuwele mayamunna o wanlokoni ni mwiikohe co: ‘Haavo munna wanlokoni nopheela ukaviheriya?’ Yehova unantteela nrima anoonaka nivahaka ukatiihu, ikuru cihu ni citthu cihu wiira naakavihere akhwiihu. Upanka commo, ankhala mananna onswalela Yehova.—Tiya. 1:27.

15. Kontha isiyani unswalela Yehova khinakhala itthu yoorika?

¹⁵ Wiira ninswalele Yehova ratta, nihaana nilevaka ukatiihu ni wiikurumica cinene. Hataa ukhalaka commo, unswalela Yehova khinakhala itthu yoorika. (1 Jo. 5:3) Kontha isiyani? Kontha hi ninonswalela nlattu wonfenta. Mmuupuwele mwanhima nopheela waavaha itthu athumwaane. Uyo atthunaka naaviriha ukati mwinci apankaka idesenho wiira aavahe athumwaane, masi khankhala oonyoonyiya nlattu wooviriha ukati mwinci apankaka idesenho impheelaawe waavaha. Uyo nawaafenta athumwaane ni unantteela nrima nlattu wo waavaha iyo itthwiiyo. Inanna imocaaru, hi ninanfenta Yehova. Phimaana unaanitteela nrima wiivaha ukati wiira ninswalele.

16. Toko cinthoonyeraaya Maberewu 6:10, Yehova noonela cani wiikurumica wihu wiira nintteelihe nrima?

¹⁶ Ayari anaafenta asaanaaya khanweherera uvahiya citthu cimocaaru naasaanaaya otheene. Ayo anaacuwela wiira asaanaaya anaavirikana ni khanhala waavaha awula waapankela citthu cimocaaru. Inanna imocaaru, Apaapeehu owiirimu anaacuwela wiira citthu cinaapankeleehu pooti uvirikana. Atthunaka nyuuva nnaakhitiri unvarela nteko Yehova cinene waavikana mayamunneenyu enci. Awula pooti ukhalaka wiira nyuuva khannokhitiri uvara cinene nteko wa Yehova nlattu wo wuuluvala, uweryaaciya awula nlattu wo miteko cirineenyu wiira mwaawacere ni mwaatothele iyoolya amuciinyu. Wakhala wiira iyo phi itthu inwiirani, nhikhale nimasukhuli. (Akalas. 6:4) Yehova khanhala uliyala citthu nyuuva cinompankeleenyu. Mweekurucaka upanka inkhitiriinyu niiraati, Yehova unaahala untteela nrima. (Nsome Maberewu 6:10. *) Yehova nawoona nrimeehu ni naacuwela citthu caanicivenle umpankeela, ni nopheela wiira unitteela nrima nlattu wo citthu cinkhitiriihu upanka.

17. a) Isiyani inlamuliyeehu upanka noonaka wiira ihaavo itthu inthoonyera unswalela wihu Yehova innirika wiilemaleliha upanka? b) Upanka citthu cihimiye wakwaaturuni “ Muncerere utteeliya winyu nrima” wuukavihenreni cani?

 ¹⁷ Vano isiyani inlamuliyeenyu upanka moonaka wiira ihaavo itthu yuulumiye nhina ula mwahoola nyuuva ihimpankeenyu ratta, toko usoma veekha Ibiiblya ni ulalya ihapari comaana? Nyuuva atthunaka nnaahala woonelela wiira mweekurumicaka upanka nnyo citthunnyo woohihiyerera, cinaahala wancera wuucivelani ni utepa wuukaviherani. Phi itthu ineerannya nanceraka utthawatthawa awula wiitthuca umwiipa viyola. Napankaka nnyo citthunnyo nkwaha mmoca ni uviriha ukati mwinci woohipanka, khaninhala ukhitiri wiilemaleliha. Masi nalakelaka uviriha ukati vakaani khula nihuku nipankaka nnyo citthunnyo ni vakaani-vakaani noncereraka ukati unkhaleehu nipankaka, pooti waakuva wiilemaleliha. Napankaka commo, unaahala unitteela nrima ni ninaahala upheela uhihiyerera upanka. Nihaana nipankaka itthu imocaaru noonaka wiira ihaavo itthu inthoonyera unswalela wihu Yehova innirika wiilemaleliha upanka.

18. Hiiva numpiye wiira nipanke isiyani?

¹⁸ Hiiva numpiye wiira nikhale ninswalelaka Yehova. Phimaana, nanswalelaka, ninaakhalana ukumi womaana ni unaanitteela cinene nrima. Ni wahoolo, ninaaweherera unswalela Yehova mpaka. (Miru. 10:22) Ciicammo, khanintepa ukhala nimasukhuli kontha ninaacuwela wiira Yehova nawaakavihera atthu anonswalela yaakhumelelaka masakha. (Isai. 41:9, 10) Khweeliini, khacimala citthu cinnitteeliha nrima ukati unaaswaleleehu Apaapeehu o wiirimu unaaphwanela “uttitthimihiya ni uhisimiya” nicitthu cotheene cumpalyaaya!—Apoka. 4:11.