1-2. I cani icikalenga Leza aapokelela ukapepa witu?

 I VYANI vino mukaelenganyapo nga muvwa izwi lyakuti “ukapepa”? Limwi mungelenganya pa mwina uwatafukama aakupepa nu kulanda kuli Yeova lino atatala walaala. Nanti limwi mungelenganya pa lupwa ulwa nsansa ulukuipakizya ukusambilila Baibo.

² Antu yaa yonsi, yakupepa Leza. Uzye Yeova amapokelela ukapepa wao? Angaupokelela ndi cakuti yakacita ukulonda kwakwe nupya yamutemwa nu kumucindika. Twatemwa sana Yeova. Twamanya ukuti walinga ukupepwa nupya tukalonda ukulamupepa umu nzila iikamuzanzya.

3. I vyani vino tumasambilila umu cipande cii?

³ Mu cipande cii, tumalanda pali ukapepa uno Yeova wapokelelanga uku cisila nupya tumalanda na pa nzila 8 zino akalonda ukuti twamupepelamo ndakai. Lino tukusambilila pa vintu vivyo, lekini twaelenganya pali vino mungacita pakuti mwazifizyako ukapepa winu. Nupya tumalanda na pa milandu ino tungasininkizizya ukuti ukupepa ukwa cumi kungatulenga ukuya ni nsansa.

4. Uzye antu aapepanga Yeova lino Yesu atatala wiza pano nsi, yalangililanga uli ukuti yatemilwe Yeova nu kumucindika?

⁴ Lino Yesu atatala wiza pano nsi, aonsi aacisinka wakwe Abeli, Nowa, Abulahamu, na Yobo yalangililanga ukuti yacindike Yeova nupya yamutemilwe. U mu nzila ci? U kupitila umu kuya ni cuvwila, ukuya acisinka, na malambo yano yapeelanga. Baibo italanda vyonsi vino yalondekwanga ukucita pa  kupepa Leza. Nomba yezyanga apapezile amaka yao ukucindika Yeova, nupya wapokelelanga ukapepa wao. Lyene pa cisila, Yeova wapeezile aina Izlaeli Masunde ukupitila muli Mose. Mu masunde yayo walondolwile inzila ino akalonda ukuti antu yamupepelamo.

5. Pa cisila ca mfwa nu kutuutululwa kwakwe Yesu, i nzila ci ino Yeova walondanga ukuti aina Klistu yamupepelamo?

⁵ Pa cisila ca mfwa nu kutuutululwa kwakwe Yesu, Yeova atalondanga ukuti antu yamupepa ukulingana na vino masunde yano wapeezile aina Izlaeli yalandanga. (Loma 10:4) Aina Klistu yalondekwanga ukulalondela isunde ilipya, kuli kuti “isunde lyakwe Klistu.” (Gala. 6:2) Pa kuvwila isunde lii, yatalondekwanga ukukwata masunde aalandanga pali vino yaalinzile ukucita na vino yatalinzile ukucita, lelo yali nu kulauvwila isunde lilyo ukupitila umu kukolanya Yesu nu kulacita vino wasambilizyanga. Na ndakai kwene, aina Klistu yakaezya apapezile maka yao ukulondela Klistu pakuti yazanzya Yeova nu kuzana ukupuza.—Mate. 11:29.

6. Uzye icipande cii cimatwazwa uli?

⁶ Lino tukusambilila pali vino tukacita pa kupepa Yeova, mwayuzya ukuti, ‘Uzye kuli vimwi vino nacita pakuti naomba ningo muli cii?’ Nupya mwayuzya nu kuti, ‘Uzye kuli vino ningacita pakuti nazifyizyako ukapepa wane?’ Mungaya ni nsansa pali vino mukacita ndakai, nomba mwapepa na kuli Yeova pakuti amwazwa ukulola muno mungazifya.

7. Uzye Yeova akalola uli mapepo itu aakufuma pansi ya mwenzo?

⁷ Tukapepa Yeova ukupitila umu mapepo itu. Malembo yakolanya mapepo itu ku vya koca ivinunkile ivipekanyiziwe ningo vino yocanga pi tenti lya kupepelapo nupya vino izile iyatandika ukoca api tempele. (Masa. 141:2) Ivya koca vivyo ivinunkile vyafumyanga icena icisuma icazanzyanga Leza. Mu nzila ili imwi kwene, mapepo itu aakufuma pansi ya mwenzo yakazanzya Leza nanti cakuti ituomvya sile mazwi angupale. (Mapi. 15:8; Malan. 33:10) Twakwata umulandu ucindame uno tungatailila ukuti Yeova akazanga ukuvwa uku mapepo itu aakalanga vino twamutemwa na vino tukamutaizya. Akalonda ukuti twamunena ivikutusakamika, vino tukulonda ukucita, na vino tukuyuvwa. Lino mutatala mwapepa kuli Yeova, cingazipa imutala imwelenganya pali vino mumalanda umwi pepo lilyo. Nga mwacita vivyo, mulaocela Tata winu uwa kwi yulu ivya koca ivinunkile ningo sana.

8. I vyani vino tungalumbanyizizyamo Leza?

⁸ Tukapepa Yeova nga tukumulumbanya. (Masa. 34:1) Tukalumbanya Yeova nga tukunenako yauze pa miyele yakwe isuma na pa milimo yakwe iya kuzungusya. Tungakwata ivingi ivya kulumbanyizizyapo Yeova nga tukamutaizya. Ndi cakuti tukukwatako insita iya kwelenganya pa usuma wakwe Yeova, kuli kuti pali vyonsi vino watucitila, tulakwata ivingi ivya kumulumbanyizizyapo. Mulimo uwa kusimikila ukatupeela isyuko ilicindamisye ilya kupeelelamo “ilambo lya kulumbanya kuli Leza, kuli kuti ukuomvya imilomo itu.” (Aeb. 13:15) Wakwe vivi kwene vino tulinzile ukwelenganyapo sana pali vino tumalanda umwi pepo lino tutatala twapepa kuli Yeova, ali vino tulinzile nu kwelenganyapo pali vino tungalanzyanya na antu yano twazana lino tuli umu mulimo uwa kusimikila. Tukalonda ukuti ‘malambo itu akulumbanya’ yaya asuma sana. Fwandi ali mulandu kwene uno tukaela acincimuke lino tukunenako yauze icumi ca muli Baibo.

9. Wakwe vino cali uku ina Izlaeli, uzye ukuzanwa umu kulongana kwamwazwa uli? Landini vino kwamwazwa pa lwinu.

 ⁹ Tukapepa Yeova nga tukuzanwa uku kulongana. Leza wanenyile aina Izlaeli ukuti: “Aonsi yonsi amu luko lwinu yalinzile yiiza ku kulongana nu kupepa Yawe [Yeova] amaila yatatu pa mwaka pa ncende yonga iya kupepela penepo.” (Malan. 16:16) Yali nu kusya mang’anda yao ni vyalo vyao ukwaula uwa kuvilinda. Nomba Yeova wayalavile ukuti: “Kusi umuntu nanti wenga aleezya kumulwisya nu kupokolola impanga inu pa nsita ya kuzevya.” (Kufu. 34:24) Pa mulandu wakuti aina Izlaeli yataile sana Yeova, yayanga umu kuzevya cila mwaka. Na cii calenganga ukuti yapokelela mapaalo aingi, kuli kuti, ukuvwikisya Masunde Yakwe Leza, ukwelenganya pa usuma wakwe, nu kuipakizya ukuya pamwi na antu yauze aatemilwe Yeova. (Malan. 16:15) Naswe kwene tukapokelela mapaalo aali yamwi nga tukwezya na maka ukuzanwa uku kulongana ukwa ina Klistu. Nupya elenganyini pali vino Yeova akatemwa nga walola vino tukupekanya masuko asuma nupya aipi.

10. U mulandu ci uno ukwimba kwacindamila umu kupepa kwitu?

¹⁰ Tukapepa Yeova lino tukwimbila pamwi na ina na ya nkazi. (Masa. 28:7) Aina Izlaeli yalolanga ukuti ukwimba kwacindime sana umu kupepa kwao. Umwene Devedi wasonsile aina Levi 288 aakuti yaimba pi tempele. (1 Mila. 25:1, 6-8) Na ndakai kwene, tukalanga ukuti twatemwa Leza ukupitila umu kwimba inyimbo izya kumulumbanya. Tulinzile ukulaimba asi mulandu na vino izwi litu lyaya. Elenganyini pali vii, nanti cakuti “swensi tukaluvyanya imiku iingi” mu milandile itu, cico cisilenga ukuti tute ukulanda lino tuli umu kulongana nu mu mulimo uwa kusimikila. (Yako. 3:2) Mu nzila ili imwi kwene, tutalinzile ukuleka vino izwi litu lyaya vyatulesya ukwimba inyimbo izya kulumbanya Yeova.

11. Ukulingana na Masamu 48:13, u mulandu ci uno tulinzile ukukwatilako insita iya kusambilila Baibo pamwi nu lupwa lwitu?

¹¹ Tukapepa Yeova lino tukusambilila Izwi lyakwe nu kusambilizyako ana itu pali aliwe. Pa wanda wi Sabata, aina Izlaeli yataombanga imilimo ili yonsi, fwandi yaomvyanga uwanda uwa uku kukomya ucuza wao na Yeova. (Kufu. 31:16, 17) Aina Izlaeli aali acisinka yasambilizyanga ana yao pali Yeova na pa usuma wakwe. Na ndakai kwene, tulinzile ukulakwatako insita iya kubelenga nu kuisambilizya Izwi Lyakwe Leza. Ukucita vivyo, inzila iya kupepelamo Yeova nupya kukatwazwa ukupalama kuli aliwe. (Masa. 73:28) Nupya nga tukusambilila Baibo pamwi nu lupwa, tungazwa ana itu ukukwata ucuza usuma na Tata witu uwa kwi yulu uwaya nu kutemwa.—Belengini Masamu 48:13.

12. I vyani vino tungasambilila kuli vino Yeova walolanga umulimo uno aapanzile ivya kuomvya pi tenti lya kupepelapo yaomvile?

¹² Tukapepa Yeova lino tukukuula nu kuzifya ivifulo ivya kupepelapo. Baibo ikalondolola ukuti mulimo uwa kupanga itenti lya kupepelapo ni vya kuomvya pi tenti lii wali uwa muzilo. (Kufu. 36:1, 4) Na ndakai kwene, Yeova akalola umulimo uwa kukuula Mang’anda ya Wene ni vikuulwa vyuze ivya mwi uvi ukuti umulimo uwa muzilo. Aina yamwi na ya nkazi yakaomvya insita yao uku kuomba imilimo kwene ii. Uzye tutalinzile ukuyataizya pa mulimo uu uwa Wene ucindamisye uno yakaomba? Kwene, nayo kwene yakaombako umulimo uwa kusimikila. Yamwi yene yakalonda nu kuombako upainiya. Ya eluda yangalanga ukuti yakatungilila umulimo uwa makuule ukupitila umu kuzumilizya aina yaa na ya nkazi aakaombesya ukuya ya painiya  nga iyalinga. Swensi kwene, usi mulandu twamanya ukuomba umulimo uwa makuule nanti foo, tungaombako umulimo wa kusunga ningo ivikuulwa vii nupya ivya usaka.

13. Uzye tulinzile ukulalola uli misangulo ino tukasangwilako uku kutungilila umulimo uwa Wene?

¹³ Tukapepa Yeova lino tukutungilila umulimo uwa Wene ukupitila umu kusangwilako. Aina Izlaeli yasendanga mawila aakupeela Yeova lyonsi lino yaya umu kuzevya. (Malan. 16:16) Yapeelanga mawila yayo ukulingana na vino yangakwanisya. Ukucita vivyo kwalangililanga ukuti yataizyanga pali vyonsi vino Yeova wayacitilanga. Tungalanga uli ukuti twatemwa Yeova nupya tukataizya pali vyonsi vino akatucitila? Inzila yonga ino tungacitilamo vivyo, u kusangwilako impiya izya kuomvya pa cilongano nu ku mulimo uwa mu nsi yonsi ukulingana na vino tungakwanisya. Mutumwa Paulo walanzile ukuti: “Nga umwi akulonda ukupeela, upe wakwe ulapokelelwa ndi cakuti wapeela ukulingana na vino akweti, asi kupeela vino atakweti.” (2 Kol. 8:4, 12) Yeova akataizya sana pa misangulo ino tukasangula ukufuma pansi ya mwenzo nanti ingacepa uli.—Mako 12:42-44; 2 Kol. 9:7.

14. Kulingana na Mapinda 19:17, uzye Yeova akalola uli vino tukaazwilizya aina na ya nkazi aakulondekwa uwazwilizyo?

¹⁴ Tukapepa Yeova lino tukwazwilizya Ina Klistu yanji aakulondekwa uwazwilizyo. Yeova walavile ukuti wali nu kupaala ina Izlaeli aazwilizyanga apiina. (Malan. 15:7, 10) Fwandi nga tukwazwilizya aina na ya nkazi aakulondekwa uwazwilizyo, Yeova akalola ukuti tukumukongwesya. (Belengini Mapinda 19:17.) Wakwe, lino aina Klistu aa ku Filipi yazwilizye Paulo lino wali umu cifungo, walanzile ukuti vino yamucitile vyali wi “lambo ilinunkile ilikazanzya Leza.” (Filipi 4:18) Elenganyini pali yano mwaya nayo umu cilongano, alino muyuzye mweineco iuzyo ilyakuti, ‘Uzye kuli umwi aakulondekwa uwazwilizyo wino ningazwilizya?’ Yeova akaya nu luzango nga walola vino tukuomvya insita itu, maka, milimo ino twamanya, ni vyuma vitu uku kwazwilizizyako yauze. Akalola ukucita vivyo ukuti inzila ya kumupepelamo.—Yako. 1:27.

15. U mulandu ci uno citatalila ukuya umu kupepa kwa cumi nanti cakuti cikalondekwa insita nu kuombesya?

¹⁵ Pa kuya umu kupepa kwa cumi cikalondekwa insita nu kuombesya. Lelo, citatala ukucita vivyo. (1 Yoa. 5:3) U mulandu ci? Pano tukapepa Yeova pa mulandu wakuti twamutemwa. Elenganyini pa mwana aakulonda ukupeela ya isi cimwi. Angaomvya insita ikulu pa kulenga icikope cakwe ya isi. Umwana wiyo atange alanguluka pa nsita ino waomvya pa kuomba umulimo uwo. Lelo pa mulandu wakuti watemwa ya isi, angaalondesya ukuyapeela uwila uwo. Mu nzila ili imwi kwene, pa mulandu wakuti twatemwa Yeova, tukaitemelwa ukuomvya insita itu na maka uku kumupepa.

16. Kulingana na vino Aebele 6:10 ikalanda, uzye Yeova akalola uli vino tukaombesya pakuti twamuzanzya?

¹⁶ Avyazi aya nu kutemwa yasienekela ana yao ukuyacitila ivintu ivili vimwi. Yakaiusya ukuti ana yao yapusana, ni vikayacitikila kwene vyapusana. Mu nzila ili imwi, Tata witu uwa kwi yulu wamanya ningo vino swensi wenga na wenga tungakwanisya ukucita. Limwi mungacita ivintu ivingi ukucila yamwi yano mwamanya nupya yano mwatemwa. Nanti, limwi mungafilwa ukucita ivintu vimwi vino yauze yakacita limwi pa mulandu nu kukota, kulwalilila, nanti ukusakamala ulupwa. Nga caya vivyo mutalinzile ukutoovoka. (Gala. 6:4) Yeova  atalilila vino mukamuombela. Leza akaya nu luzango ndi cakuti mukumuombela apapezile amaka inu. (Belengini Aebele 6:10.) Yeova akalola ivili umu mwenzo winu. Akalonda ukuti mwaya ni nsansa pa mulandu na vino mukamuombela.

17. (a)I vyani ivingatwazwa ndi cakuti cikututalila ukucita vimwi vino tukacita umu kupepa kwitu? (b) Uzye icisinka icili umu kambokosi kakuti “Ivingamwazwa Ukuya ni Nsansa” cingamwazwa uli?

¹⁷ Tungacita uli ndi cakuti cikututalila ukucitako vimwi vino tukacita umu kupepa kwitu, wakwe ukuisambilizya Baibo nanti ukusimikila? Ndi cakuti mukucita sana ivintu vivyo mulaipakizya ukuvicita. Tungakolanya ukapepa witu uku milimo imwi wakwe, ukutukusya umwili nanti ukusambilila ukuomvya iviombelo vino yakaomvya pa kulizya inyimbo. Ndi cakuti tusikuomba imilimo iyo cila nsita tutanga twalunduluka zuwa. Limwi pa kutandika tungaaomba imilimo iyo pa nsita sile inono. Lelo nga papita insita tungatandika ukuiomba pa nsita itali. Ndi cakuti twalola ivisuma ivikutucitikila pa mulandu nu kuombesya kwitu, tungatandika ukulondesya ukuomba imilimo iyo nupya tungaipakizya. Vikwene avino caya na kuli ukapepa witu.

18. I cintu ci icicindamisye cino tungacita, nupya i vyani ivingafumamo?

¹⁸ Kupepa Yeova nu mwenzo onsi ali cintu icicindamisye cino tungacita. Kungalenga tuye ni nsansa nu umi usuma, alino nu kuya nu upaalilo uwa kupepanga Yeova manda pe. (Mapi. 10:22) Ndakai twaya nu mutende umu melenganyo pano twamanya ukuti Yeova akaazwa ya kapepa yakwe lino yali ni ntazi. (Eza. 41:9, 10) Icumi kwene twakwata ivingi ivingatulenga ukuya ni nsansa lino tukupepa Tata witu uwaya nu kutemwa, uwalinga ukupokelela “ululumbi nu mucinzi” ukufuma uku viumbwa vyakwe vyonsi!—Kuso. 4:11.