1-2. Acani cino cingalenga e Yehova ukupocelela ukupepa kwitu?

 AVYANI vino mukakwelenganya nga mwivwa izwi lya kuti “ukupepa”? Ncepamwi mukakwelenganya pa mwanawitu wino afukime lyo akupepa pano atani alale. Nanti ncepamwi mukakwelenganya pa lupwa luno lukuwazya Baibolo pano wali pamapepo ya lupwa.

² Wonsinye wano wakucita vyo-o vino twalandapo lyo wakupepa. Nomba uzye e Yehova angapocelela ukupepa kwawo? Angapocelela nga cakuti wakumupepa ukulingana nukulonda kwakwe. Swinya nga cakuti wamukunda nu kumucindika. Twakunda nkaninye e Yehova. Twamanya ukuti awino wayana ukumupepa. Swinya tukakwelezya na maka yitu ukumupepa mu nzila yino akalonda.

3. Avyani vino twandi tusambilile mwe co-o icipande?

³ Mwe co-o icipande, twandi tusambilile pakupepa kuno Yehova wapocelelanga mu mpindi zya kukali. Twasambilila na pa nzila 8 izyakupepelamo Yehova zino akapocelela mwe ya-a amanda. Pano tukusambilila mwalola vimwi vino mungacita pakuzifyako vino mukapepa Yehova. Twasambilila na vino ukupepa Yehova mu nzila iyizima kukalenga twawa ni nsansa.

4. Uzye awawomvi wa kwe Yehova awa ku kaali walanjizizye wuli ukuti wakunzile e Yehova swinya wamucindisile?

⁴ Awawomvi wa kwe Yehova awa cisinka ndi vino Abelo, Nowa, Abrahamu, ne Job, walanjizizye ukuti wakunzile e Yehova swinya wamucindisile. Walanjizizye wuli wo-o? Wamwivwilanga, wamusuwizile swinya wayikundilanga ukumuwombela. E Baibolo yitalanda vyonsinye vino wacitanga pakumupepa. Lelo nanti  ciwe wo-o wawombesyanga ukufika pano papelezile amaka yawo ukucindika Yehova. Swinya nawe wapocelelanga ukupepa kwawo. Mukupita kwa mpindi e Yehova wizile apa awina Israeli amasundo ukupitila mwe Musa. Mwe ya-a masundo mwalinji vino Yehova wa wanenile pa kuti wamupepa ukulingana na vino akalonda.

5. Akupiluka ci kuno kwacitisile pano Yesu wazyulupusile?

⁵ Pano Yesu wazyulupusile, e Yehova atalondanga awawomvi wakwe wamupepa ukulingana na Masundo yano wapile awina Israeli. (Roma. 10:4) Pe yo-o impindi awina Kristu wazipizile ukukonka isundo ilipya akuli ukuti “isundo lyakwe Kristu.” (Gal. 6:2) Watalinji nu kuwakwivwila lyo-o “isundo” ukupitila mu kulisunjila ku mutwe nanti ukutantika vino wazipizile ukucita na vino watazipizile ukucita. Lelo wazipizile ukukolanya icakulolelako ca kwe Yesu navino wasambilizyanga. Mwe ya-a amanda awawomvi wa kwe Yehova wakakwelezya na maka ukukolanya e Yesu pakuti wasecelesya Yehova “nukuzana ukupuza”.—Mat. 11:29.

6. Avyani vino tuzipizile ukucita pa kuti tunoncelemo mwe co-o icipande?

⁶ Pano tukusambilila pa nzila yonga na yonga iyakupepelamo e Yehova, mwayikolowozya ukuti, ‘Uzye nkawombesya mwe yo-o inzila? Uzye pali pamwi pano nzipizile ukuzifyako?’ Mungawa ni nsansa nga mwalola ukuti mukucita icete. Lelo muwalenga e Yehova ukumyavwa ukulola na munjinye muno muzipizile ukuzifyako.

7. Uzye e Yehova akalola wuli amapepo yitu ayakufuma pansi ya mwezo?

⁷ Ipepo lwawa aluwali lwakupepelamo Yehova. E Baibolo yakolanya ipepo ku vyifungo nuncile vino wapanga pi hema ne mukupita kwa mpindi pi tempile. (Amalu. 141:2) Vyo-o ivyifungo nuncile vyafumyanga akacena akazima kano kasecelesyanga e Yehova. Wonye avino na mapepo yano tukapepa ukufuma pansi ya mwezo yakamusecelesya asa mulandu twalanda amazwi matici swinya amapepuke. (Imilu. 15:8; Amasu. 33:10) Twawa ni milandu imivule yino yikalenga tusuwile ukuti e Yehova akakwivwa icete pano tukumunena vino twamukunda na vino tukayivwa pe weliwe. Akalonda tuwamunena vino vikutusakamika, vino tukalonda navino tukuyivwa. Fwandi pano tutani tutalike ukupepa cingazipa ukwelenganya sana pe vino twandi tulande ni nzila yino twandi tuvilandilemo. Nga tukucita wo-o tuliwawapa ivyifungo nuncile ku Mukwasi witu uwa kwi yulu e Yehova.

8. Anzila ci yimwi yino tukalumbanizizyamo e Yehova?

⁸ Tukapepa Yehova ukupitila mukusambilizya wanji pe weliwe. (Amalu. 34:1) Tukamulumbanya ukupitila mukunenako wanji pe vino twamukunda, pa miwele yakwe imizima nga napa milimo yakwe. Nga cakuti tukusalifya pe vino Yehova akutucitila, tuliwawa ni vivule ivyakunenako wanji. Cinji acakuti, nga tukukwatako impindi yakwelenganya pe vino Yehova watucitila, tuliwawa ni milandu imivule iyakumulumbanizizyapo. Umulimo wakuwizya wukatupa ulungo ulwakupa inzuwi zyakulumbanizizyamo e Leza, akuli ukuti “inzuwi zyamilomo yitu.” (Hebe. 13:15) Wulyanye vino tuzipizile ukwelenganyapo sana pano tutani tutalike ukupepa kwe Yehova, avino tuzipizile ukwelenganyapo sana pa mazwi yano twandi twalanda kwe wano tukuwizizya. Tukalonda inzuwi zitu ‘izyakutumvya e Leza’ ukuwa azizima. Awuli umulandu wuno tukalandila ukufuma pansi ya mwezo pano tukuwizya.

9. Uzye ukuzanwa mukulongana kukatwavwa wuli ndi vino kwavwanga awina Israeli? Landani pe vino ukulongana kwamyavwa pa lwinu.

⁹ Tukapepa Yehova ukupitila mukuzanwa mu kulongana. Awina Israeli wawanenile ukuti:  “Awantu wonsi awamwiko winu wazipila ukuya mukupakata Imfumu e Leza, impindi zitatu mumwaka mumasyo yonganye-nsu ayakupakatila.” (Amasu. 16:16) Mukucita wo-o mwasanzizyemo ukusya ama ng’anda ni vyalo vyawo, ukwasowa uwakuvilonda. Lelo nanti ciwe wo-o e Yehova wawalayile ukuti “Pasi nanti wenga wino alichimvya insi yinu pa mpindi zitatu mumwaka, zino mukuyanga amuloleka pankolelo pakwe nene, ne Mfumu e Leza, e Leza winu.” (Ukuf. 34:24) Pamulandu wakuti awina Israeli wasuwizile nkaninye e Yehova, cila mwaka wayanga mukuzanwa kwe wo-o umuteweto. Nga waya wazanwa, wapocelelanga ivizima ivivule. Ku cakulolelako, wasambililanga ivivule pa Masundo ya kwe Leza, welenganyanga pawuzima wa kwe Yehova na vino wawakunzile, swinya wivwanga icete ukuwa ponga na wina Klistu wawuye wano wakunzile e Yehova. (Amasu. 16:15) Nasweswenye mwe ya-a amanda tukazanamo ivizima ivivule nga cakuti twawombesya ukuzanwa mukulongana. Ukwasowa nukuvwilika e Yehova akakwivwa icete nkaninye ukulola kuno tukwasukapo ivyasuko ivizima swinya ivifupi.

10. Amulandu ci wuno ukwimbila lwawela aluwali lwakupepa Yehova?

¹⁰ Tukapepa Yehova pano tukwimbila na wanawitu na wankazi. (Amalu. 28:7) Awina Israeli walolanga ukuti ukwimbila lwalinji aluwali lwakupepa Yehova. Imfumu David yasozile awina Levi 288 awakwimbila pi tempile. (1 Imila. 25:1, 6-8) Nasweswenye mwe ya-a amanda tungalanjizya vino twakunda e Yehova, nga tukwimbila indwimbo zya ku mulumbanya. Nomba tuzipizile tuwakwizuka ukuti vino izwi litu likakwivwika pano tukwimbila asa vino vyacindama. Ku cakulolelako, pano tukulanda ‘swe wavule tukaluvyanya,’ nomba uzye tukaleka ukulanda pano tuli pakulongana nanti pano tukuwizya? Awe, tusileka. (Jemu. 3:2) Wonye avino cawa na mu kwimbila, tungalumbanya Yehova nanti twawa ni cileyanye, nanti nga tukulola ukuti izwi litu litazipa.

11. Ukulingana na Amasundo 6:6, 7 amulandu ci wuno tuzipizile ukusambilila Baibolo ponga nu lupwa?

¹¹ Tukapepa Yehova pano tukuyisambilizya Izwi lyakwe na pano tukusambilizya awana witu. Pa wanda wi Sabata awina Israeli watawombangapo umulimo uwuli wonsinye. Lelo wawomvyanga wo-o uwanda kukuwomya wuciwuza wawo ne Yehova. (Ukuf. 31:16, 17) Pe wo-o uwanda awakwasi wamwi wasambilizyanga awana wawo pe Yehova na pavizima vino wawacitizile. Nasweswenye mwe ya-a amanda tuzipizile ukutantika impindi yakuyisambilizya Baibolo nukwelenganyapo. Ukucita wo-o kwawa aluwali lwakupepa Yehova swinya kukatwavwa ukupalamila kwe weliwe. (Amalu. 73:28) Fwandi nga cakuti tukuyisambilizya Baibolo ponga nu lupwa, tuliyavwa awana witu ukuwomya wuciwuza wawo nu mukwasi witu uwa kwi yulu e Yehova.—Wazyani Amasundo 6:6, 7.

12. Tukusambililako cani kwe vino Yehova walolanga wano wapanganga ihema?

¹² Ukuzenga nukuzifya ivifulo vyakupepelamo lwawa aluwali lwakupepa Yehova. E Yehova walolanga umulimo wakuzenga ihema nukuwakupanga iviwombelo vya kuwomvya penepo ukuti walinji amulimo uwutele. (Ukuf. 36:1, 4) Na peyonye impindi e Yehova akalola ukuti umulimo wakuzenga ama Ng’anda ya Wufumu ni vifulo vinji ivyakumupepelamo ukuti aluwali lwakumupepa. Awanawitu na wankazi wamwi wakasumba impindi nkulu ukuzenga nukuzifya ivifulo vyakupepelapo Yehova. Tukasalifya nkaninye pe vyo wakawombesya. Wa-a awanawitu wasipelelavye pa-a, wakawombako nu mulimo wakuwizya. Wamwi pe wa-a wangavwamba nukuwombako wupainiya. Wa eluda wangalanjizya ukuti wakutunjilila umulimo wawuzengo nga cakuti wakuzumilizyako wa-a awanawitu na wankazi wano wakawombesya  ukuwombako wupainiya nga cakuti wafisilepo. Asamulandu nukuti twamanya nanti tutamanya ukuzenga, swensinye tungawombako umulimo wakuzifya nanti ukulunjisya vino vikononeka pa vifulo vyakupepelapo Yehova.

13. Tuzipizile twalola wuli imisangulo yino tukasangula ku kutunjilila umulimo wa Wufumu?

¹³ Tukapepa Yehova ukupitila mukusangwilako ku kutunjilila umulimo wa Wufumu. Awina Israeli watazipizile ukuya kung’anda ya kwe Yehova makasavye. (Amasu. 16:16) Wazipizile ukuya mukupa icili consinye ukulingana na pano amaka yawo yapelezile. Nga wacita wo-o walanjizyanga ukuti wakusalifya pe vyonsinye vino Yehova wawacitilanga. Tungalanjizya wuli ukuti twakunda e Yehova swinya tukasalifya pe vyonsinye vino akatucitila? Inzila yonga, akusangwilako pi wungwe pano twawa nanti ku mulimo wansi yonsi ukulingana na pano tukwatizile. Umutumwa Paulo walanzile ukuti: “Ndi achino mukulondesya ukufima, Leza alipochelela ivyawila vinu, alole vino muli navyo. Leza asipechela pavintu vino musi navyo.” (2 Kor. 8:4, 12) E Yehova akasalifya nkaninye pa misangulo yino mukapa ukufika pano papelezile amaka yinu asamulandu nukuti kali katici.—Mar. 12:42-44; 2 Kor. 9:7.

14. Ukulingana ni Imilumbe 19:17, uzye e Yehova akalola wuli vino tukapa awanawitu na wankazi wano wakulondeka ukuwavwa?

¹⁴ Ukwavwa awanawitu na wankazi wano wasowezilwe aluwali lwa kupepa Yehova. E Yehova walayile awina Israeli wano wavwilizyanga awapina ukuti aliwanyosezya vyonsinye vino wawapanga. (Amasu. 15:7, 10) Fwandi lyonsinye pano tukwavwilizya awanawitu wano wakulondekwa ukuwavwa, e Yehova akalola ukuti tukupa weliwe. (Wazyani Imilumbe 19:17.) Ku cakulolelako, pano awina Klistu wa ku Filipi watumizile e Paulo ivyawila lyo ali mucifungo, e Paulo walanzile pe vyo-o ivyawila ukuti “Vili ngati awusule wununchile uwakufimila Leza, inzuwi yino ikamusechelesya.” (Flpi. 4:18) Namwemwenye mungelenganya pa wanawitu na wankazi wano mwawa nawo mwiwungwe nukuyikolowozya ukuti, ‘Uzye pali wumwi wino ningamwavwa?’ E Yehova akasecelela nkaninye ukulola kuno tukuwomvya impindi yitu, amaka, vino twacenjelamo na vino twakwata kukwavwa wano wakulondekwa ukuwavwa. Akalola ukuti ukucita wo-o lwawa aluwali lwa kumupepa.—Jemu. 1:27.

15. Amulandu ci wuno ukupepa kwa cisinka kutawela acisendo nanti acakuti cikapinda ukuwomvya impindi namaka?

¹⁵ Ukupepa kwa cisinka kukalondeka ukuwomvya impindi na maka. Lelo nanti ciwe wo-o asacisendo. (1 Yoh. 5:3) Amulandu ci wuno kutawela acisendo? Amuno tukapepa Yehova pamulandu wakuti twamukunda. Lekani tulanjilile, tuti umwana akulonda ukupa e yisi cimwi. Nga wasumba impindi inkulu ukudrowa icikope cakupa yisi. Pa mulandu wakuti wakunda tata wakwe, atandi atalike ukwelenganya pa mpindi yino tewasumba pakucidulowa, pano akuya mukumupa vino tewadrowa. Wonye avino cawa nakwe sweswe. Tukawomvya impindi yitu na maka ku kupepa Yehova pa mulandu wakuti twamukunda.

16. Ukulingana na Waheberi 6:10, uzye e Yehova akakwivwa wuli pe vino cila muntu akacita pakumusecelesya?

¹⁶ Awakwasi wasikwenecela ukupocelela ivyawila ivili vyonga ukufuma ku wana wawo. Amuno wamanya vino umwana wenga nawenga angakumanisya ukucita. Wonye avino nu Mukwasi witu uwa kwi yulu wawa. Wamanya vino cila muntu angakumanisya ukucita na vino atanga acite. Ncepamwi mungawomba ivintu vimwi ukucila na wano mwamanya nanti wano mwakunda. Ne mpindi zimwi pamulandu wacimo, uwumi nanti imilimo yino mwawa nayo mu lupwa, ncepamwi mungapotwa ukuwomba ndi  vino wanji wakawomba. Nga cawa wowo, mutazipizile ukwivwa uwuwi. (Gal. 6:4) Amuno e Yehova atalitela ayiwilile vino mukamuwombela. Aliwasecelela nga cakuti kuli imilandu imicindame yino yikulenga mwamuwombela swinya mukumuwombela ukufika pano papelezile amaka yinu. (Wazyani Waheberi 6:10.) E Yehova akalola vino mukavwambisya ukumuwombela. Swinya akalonda muwasecelela pe vyonsinye vino mukukumanisya ukumuwombela.

17. (a) Tungacita wuli nga cakuti twazana ukuti cikutuwomela ukucita vimwi vino vyawa mukupepa kwitu? (b) Acili kwinye pe vyo vino vili mukambokosi kano kakuti “ Muwalundilako Insansa” cino camyavwa swinya camyavwa wuli?

¹⁷ Tungacita wuli nga twazana ukuti cikutuwomela ukucita vimwi pevino twasambilila, ndi vino ukuyisambilizya Baibolo nukuwombako mu mulimo wakuwizya? Nga tukuwomba lyonsinye yo-o imilimo, tulitalika ukuyikunda swinya tuliwazanamo uwuzima. Tungakolanya vino tukacita mukupepa kwitu, kwe wino akusamala pa kuti umuwili wakwe wuwelele nanti kwe wino ukusambilila ivyakulizya indwimbo ukuwomvya e gita. Nga cakuti we-e umuntu atakucita vyo-o ivintu lyonsinye, ncepamwi angiwilila. Nomba mukwelenganya ukuti cani cingacitika nga cakuti mukuwomba vyo-o ivintu cila wanda? Pakutalika ncepamwi mungavicitavye pa kampindi katici. Lelo mukupita kwa mpindi mungaya mukulundako. Nga cakuti mwalola ivizima vino vyafuma mukuwombesya kwinu, muliwavwambisya sana ukuvicita swinya muliwakwivwa icete. Wonye avino cawa na kwe vino tukacita mu kupepa kwitu.

18. Acintu ci icicindame cino tungacita, swinya avyani vino vilifumamo?

¹⁸ Ukuwombesya ukufika pano papelezile amaka yitu mukuwombela Yehova acili icintu icicindame cino tungacita. Ukucita wo-o kukalenga twawa ni nsansa nu wumi uwuzima. Kukalenga tuwe ni suwilo lyakutwalilila ukupepa Yehova ku ciyayaya. (Imilu. 10:22).Twawa kaali nu mutende wamumelenganyo amuno twamanya ukuti e Yehova akakwavwa awawomvi wakwe nga cakuti wawa ni ntazi. (Ayize. 41:9, 10) Asa vyo-o vitupu, twawa ni milandu imivule yino yikalenga twawa ni nsansa pano tukuwombela Umukwasi witu uwa lukundo, wino wayana ukupocelela “uwukankala numuchinzi” ku vintu vyonsinye vino welewula!—Ukuwu. 4:11.