1, 2. ¿Tlake moneki tijchiuasej tlaj tijnekij Jehová ma kiseli kej tijueyichiuaj?

 ¿IPAN tlake timoiljuia kema tijkaki nopa tlajtoli titlaueyichiuas? Uelis timoiljuia ipan se toikni katli motlankuaketstok kampa kochi uan momaijtoua ika nochi iyolo. O uelis timoiljuia ipan se toikni ininuaya ininchampoyouaj kema momachtiaj Biblia.

² Maske ni toikniuaj amo kichiuaj sanse tlamantli, inijuantij kiueyichiuaj Jehová. ¿Kiselia toTeotsij tlen kichiuaj? Kena, tlaj kichiuaj ika nochi ininyolo, kej kinamiki uan ika tlatlepanitakayotl. Tojuantij tlauel tikikneliaj Jehová uan tijmatij san ya kinamiki tijueyichiuasej, yeka tijchiuaj kampeka tijueyichiuasej kej ya kineki.

3. ¿Tlake tikitasej ipan ni tlamachtili?

³ Ipan ni tlamachtili, tikitasej kenijkatsa Jehová kinekiyaya ma kiueyichiuakaj uejkajkia, uan nojkia tikitasej chikueyi tlamantli tlen Jehová kiselia kema tijueyichiuaj. Kema timomachtijtiasej, ma tikitakaj kenijkatsa nojua tlauel kuali titlaueyichiuasej. Uan nojkia tikitasej kenke tlauel tiyolpakij kema kiampa tijchiuaj.

4. Kema ayamo ualajtoya Jesús, ¿kenijkatsa Jehová itekipanojkauaj kinextijkej kiikneliyayaj uan kitlepanitayayaj?

⁴ Kema ayamo ualajtoya Jesús, Abel, Noé, Abraham uan Job kinextijkej kitlepanitayayaj uan kiikneliyayaj Jehová. ¿Kenijkatsa kinextijkej? Pampa kichijkej tlen ya  kinnauatik, kineltokakej uan pampa kikajkej se keski tlamantli. Maske Biblia amo kiijtoua kenijkatsa kiueyichijkej Jehová, kena kiijtoua kichijkej kampeka kiueyichiuasej, uan ya kiselik tlen kichijkej. Uan kema panok tonali, toTeotsij kinmakak israeleuanij nopa Tlanauatili kampa kiniljuiyaya kenijkatsa kiueyichiuasej.

5. ¿Kenijkatsa kinejki Jehová ma kiueyichiuakaj Cristo itokilijkauaj?

⁵ Teipa kema kimiktijkej Jesús uan moyolkuik, Jehová kiijtok ayokmo kinamikiyaya kichiuasej tlen kiijtoua nopa Tlanauatili tlen Moisés kimakakej (Rom. 10:4). Nama, nochi Jesús itokilijkauaj monekiyaya kineltokasej Cristo itlanauatil (Gál. 6:2). Ipan nopa tlanauatili amo kiijtoua monekiyaya kitsontekontlalisej uan kichiuasej sejse tlamantli tlen kiijtouayaya, san monekiyaya kichiuasej kej Jesús uan tlen tlamachtia. Ipan ni tonali, Cristo itokilijkauaj kichiuaj kampeka kichiuasej kej ya, uan kiampa kiyolpakiltisej Jehová uan kipiasej tlayolseuilistli (Mat. 11:29, TNM).

6. ¿Kenijkatsa uelis techpaleuis ni tlamachtili?

⁶ Kema tikitstiasej kenijkatsa tijueyichiuaj Jehová, ma timotlatsintokikaj: “¿Nesi nelia kuali nitlaneltoka? ¿Uelis nojua kuali nitlaueyichiuas?”. Maske tikita kuali titlaneltoka, uelis tikiljuis Jehová ma mitspaleui tikitas tlake nojua moneki tijchiuas uan kuali tijtekipanos.

7. ¿Kenijkatsa kiita Jehová kema timomaijtouaj ika nochi toyolo?

⁷ Tijueyichiuaj Jehová kema timomaijtouaj. Biblia kiijtoua tlamaijtoli eli kej nopa incienso tlen kuali kichijchiuayayaj uan kitlatiyayaj ipan tabernáculo, uan teipa nojkia kitlatijkej ipan teokali (Sal. 141:2). Kema tlatlayaya tlauel ajuiyak mijyotiyaya uan Jehová tlauel kiyolpaktiyaya. Sanse kej nopa incienso, kema timomaijtouaj ika nochi toyolo, Jehová tlauel kipaktia maske amo tijtekiuiaj miak tlajtoli (Prov. 15:8; Deut. 33:10). Onka miak tlamantli tlen kinextia Jehová kipaktia kema tijnextiaj tikikneliaj uan tijtlaskamatij. Uan ya kineki ma tikiljuikaj tlen tijnekij, tlen techtekipachoua uan tlen tijnekiskiaj tijselisej teipa. Yeka, kema tijnekisej tikiljuisej se tlenijki, achtoui kuali ma timoiljuikaj tlake tikijtosej. Tlaj kiampa tijchiuasej, tijmakasej toTata kej se incienso tlen tlauel kiyolpakiltis.

8. ¿Kema nojkia uelis tijueyichiuasej Jehová?

⁸ Tijueyichiuaj Jehová kema san ya tijuejkapantlaliaj (Sal. 34:1). ¿Kenijkatsa uelis tijuejkapantlalisej? Kema tikiniljuiaj sekinok nopa kuajkuali tlamantli tlen ya kinextia uan tlen kichijchijtok. Kema se akajya tetlaskamati, kiyololinia ma kitlaskamati Jehová. Tlaj tijkixtiaj tonali uan timoyoliljuiaj kenijkatsa Jehová kipia kuali iyolo, nopa techpaleuis ma tijnekikaj nochipa tijueyichiuasej. Kema titlajtolmoyauaj uelis tijueyichiuasej toTeotsij ika tlen tikijtosej (Heb. 13:15). Sanse kej kema timomaijtouaj kuali timoiljuiaj tlake tikiljuisej Jehová, kema titlajtolmoyauaj nojkia moneki kuali timoiljuisej tlake tikiniljuisej maseualmej, pampa tijnekij tikijtosej san tlen kinamiki. Tijnekij titlamachtisej ika nochi toyolo.

9. 1) ¿Kenijkatsa kinpaleuia toikniuaj kema yauij tlanechikoli, uan kenijkatsa mitspaleuijtok?

 ⁹ Tijueyichiuaj Jehová kema tiauij tlanechikoli. Israeleuanij kiniljuijkej: “Nochi tlakaisraelitamej moneki monextisej expa ipan se xiuitl iixtla inmoTeko Dios kampa yajaya kitlapejpenijtos” (Deut. 16:16). Maske kema yauiyayaj tlaueyichiuaj kikajteuayayaj ininchaj uan ininmil uan amo aka kimokuitlauiyaya, Jehová kiniljuik: “Kema inyasej inmonextitij noixtla [...], axaka uelis kiixtokas o moaxkatis inmotlal” (Éx. 34:24). Yeka, kema israeleuanij yauiyayaj sejse xiuitl ipan nopa iljuitl, motemachiyayaj ipan Jehová. Inijuantij kiseliyayaj miak tlateochiualistli: nojua kuali kikuamachiliyayaj toTeotsij itlanauatiljuaj, moyoliljuiyayaj kenijkatsa kipia kuali iyolo uan moyolchikauayayaj ininuaya sekinok (Deut. 16:15). Tojuantij nojkia tlauel techpaleuia kema tijchiuaj kampeka tiasej tlanechikoli. Uan Jehová tlauel yolpaki kema kiita kuali timokualchijchiuaj uan titlanankiliaj.

10. ¿Kenke tlauel ipati tijuikatisej Jehová?

¹⁰ Tijueyichiuaj Jehová kema tiuikaj ininuaya toikniuaj (Sal. 28:7). Israeleuanij tlauel kipatiitayayaj uikasej kema tlaueyichiuayayaj. Se neskayotl, tlanauatijketl David kintlalik ma uikakaj 288 levitas ipan teokali (1 Crón. 25:1, 6-8). Ipan ni tonali, tojuantij nojkia uelis tijnextisej tikikneliaj Jehová kema tijuikatiaj, maske amo kuali tijchiuaj. Ximoiljui ipan ni tlamantli: maske kema tikamanaltij “kemantsi timokuapolouaj”, nojua titlanankiliaj ipan tlanechikoli uan titlajtolmoyauaj (Sant. 3:2). Yeka, amo kinamiki timoiljuisej amo tijuikatisej Jehová, san pampa amo kuali tiuikaj.

11. Kej kiijtoua Salmo 48:13, ¿kenke moneki tijkixtisej tonali uan kiampa timomachtisej ininuaya tochampoyouaj?

¹¹ Tijueyichiuaj Jehová kema timomachtiaj Biblia uan kema tikinmachtiaj tokoneuaj. Sejse sábado, israeleuanij mosiajketsayayaj uan kiampa nojua mouampojchiuayayaj ika Jehová (Éx. 31:16, 17). Inijuantij kinmachtiyayaj ininkoneuaj kenijkatsa eli Jehová uan kipia kuali iyolo. Ipan ni tonali nojkia moneki tijkixtisej tonali, uan kiampa tijpouasej uan timomachtisej Biblia. Kema kiampa tijchiuaj, nojkia titlaueyichiuaj uan techpaleuia nojua ma timonechkauikaj ika toTeotsij (Sal. 73:28). Uan kema timomachtiaj ininuaya tochampoyouaj, tikinpaleuiaj tokoneuaj nojkia kuali ma mouikakaj iuaya toTata, Jehová (xijpoua Salmo 48:13).

12. ¿Kenijkatsa kiitayaya Jehová nopa tekitl tlen mochijki ipan tabernáculo, uan tlake techmachtia?

¹² Tijueyichiuaj Jehová kema tijchijchiuaj uan tijkualchijchiuaj kali kampa titlaueyichiuaj. Biblia kiijtoua nopa tekitl tlen mochijki uan nochi tlen motekiuik ipan tabernáculo, elki “tlauel tlatsejtseloltik” (Éx. 36:1; 36:4, TNM). Ipan ni tonali, Jehová nojkia kiita tlauel tlatsejtseloltik nopa tekitl tlen mochiua kema kichijchiuaj kali kampa timosentiliaj uan ipan sekinok kali kampa titlaueyichiuaj. Uan miakej toikniuaj tlapaleuiaj nopaya. Tlauel tikintlaskamatiliaj katli nopaya tekitij, pampa kipaleuiaj toTeotsij iTlanauatijkayo. Maske kiampa tekitij, kichiuaj kampeka tlajtolmoyauasej, uan uelis sekij nojkia kinekij tlatekipanosej kej precursores. Ueuejtlakamej kinextiaj  tlapaleuiaj kema mochijchiua se kali, kema kinkauaj toikniuaj ma mochiuakaj precursores, tlaj kiitaj kena uelisej kiampa tlatekipanosej. Tlaj tiuelij tikalchiuaj o amo, nochi uelis titlapaleuisej amo ma tlasokiyojto uan kuali ma elto tlen nopaya onka.

13. ¿Kenijkatsa moneki tikitasej nopa tomij tlen motekiuia ipan tlajtolmoyaualistli?

¹³ Tijueyichiuaj Jehová kema titemakaj tomij ika nochi toyolo. Kema israeleuanij yauiyayaj kiueyichiuaj Jehová, temakayayaj se tlenijki (Deut. 16:16). Monekiyaya temakasej tlen kipixtoyaj. Kema kiampa kichiuayayaj, kinextiyayaj kitlaskamatij Jehová pampa nochipa kinpaleuiyaya. Uan tojuantij, ¿kenijkatsa uelis tijnextisej tikikneliaj Jehová uan tijtlaskamatij tlen techmaka? Uelis titemakasej tomij ika nochi toyolo tlen motekiuis ipan tlanechikoli uan ipan “Obra mundial”. Apóstol Pablo kiijtok ni tlamantli: “Intla se tlakatl temakas iofrenda ika iyolo, uajka toTeko kiselis nopa ofrenda keja tlen nopa tlakatl kipia, yonke miak o kentsi. Yajaya axinmechtlajtlania xitemakakaj tlen axinkipiaj” (2 Cor. 8:4, 12). Jehová kipatiita nopa tomij tlen titemakaj ika nochi toyolo, maske amo miak (Mar. 12:42-44; 2 Cor. 9:7).

14. Kej kiijtoua Proverbios 19:17, ¿kenijkatsa kiita Jehová kema tikinpaleuiaj toikniuaj?

¹⁴ Tijueyichiuaj Jehová kema tikinpaleuiaj toikniuaj. Jehová kiniljuik israeleuanij kinteochiuaskia tlaj kinpaleuiskiaj teikneltsitsij (Deut. 15:7, 10). Yeka, kema tijpaleuiaj se toikni katli kipoloua se tlamantli, Jehová kiita kejuak ya tijpaleuiaj (xijpoua Proverbios 19:17). Se neskayotl, toikniuaj tlen Filipos kititlanilijkej Pablo se keski tlamantli kampa tsaktoya, uan ya kiijtok Jehová tlauel kuali kiitak tlen kichijkej (Filip. 4:18). Ma timoiljuikaj ipan toikniuaj katli itstokej ipan totlanechikol, uan ma timotlatsintokikaj: “¿Itstok se akajya katli uelis nijpaleuis?”. Jehová tlauel yolpaki kema tijkixtiaj tonali, tochikaualis, tlen tiuelij tijchiuaj o tlen tijpiaj uan kiampa tikinpaleuiaj sekinok. Kema kiampa tijchiuaj, tijnextiaj nojkia titlaueyichiuaj (Sant. 1:27).

15. ¿Kenke amo tikouijmatij tijkixtisej tonali uan tijtekiuisej tochikaualis kema tijueyichiuaj Jehová?

¹⁵ Maske moneki tijkixtisej tonali uan tijtekiuisej tochikaualis kema tijueyichiuaj Jehová, amo tikouijmatij (1 Juan 5:3). ¿Kenke? Pampa tikikneliaj. Ma timoiljuikaj ipan ni neskayotl: se okichpil kineki kimakas itata se nemaktli. Maske uelis tlauel uejkauas kimachijchijtos se tlaixkopinkayotl, amo kiouijmati kichiuas pampa kiiknelia itata uan kineki kimakas ika nochi iyolo. Tojuantij nojkia tikikneliaj Jehová, yeka tlauel tiyolpakij kema tijkixtiaj tonali uan tijtekiuiaj tochikaualis kema tijueyichiuaj.

16. Kej kiijtoua Hebreos 6:10, ¿kenijkatsa kiita Jehová kema tijchiua kampeka tijueyichiuas?

¹⁶ Tetajmej katli kinikneliaj ininkoneuaj amo kinchiualtiaj ma kinmakakaj sanse nemaktli, pampa kimatij amo sanse elij uan amo uelij temakaj sanse tlamantli. Jehová nojkia kikuamachilia amo tiuelij nochi tijchiuaj. Uelis mouampoyouaj amo uelij kichiuaj miak tlamantli uan ta kena. O, uelis ta amo  tiueli tijchiua tlen inijuantij kena uelij, pampa ya tiueyi, timokokoua o moneki tikinmokuitlauis mochampoyouaj. Tlaj kiampa mitspano, amo ximoyolkoko (Gál. 6:4). Xikilnamiki, Jehová amo kiilkauas tlen ta tijchiua. Tlaj nochipa tijtekipanos ika nochi moyolo, ya tlauel yolpakis (xijpoua Hebreos 6:10). Jehová kiita tlen eltok ipan moyolo. Ya kineki xiyolpaki uan kuali xijyolmati kema tijueyichiua.

17. 1) ¿Tlake techpaleuis tlaj tijmatij ouij tijchiuasej se tlamantli tlen ika titlaueyichiuasej? 2) ¿Tlake tlamantli mitspaleuijtok tlen nesi ipan recuadro “ ¿Tlake techpaleuis ma tiyolpakikaj?”?

¹⁷ Tlaj ouij tijmatij tijchiuasej se tlamantli tlen ika titlaueyichiuasej, kej timomachtisej toselti o titlajtolmoyauasej, ¿tlake uelis techpaleuis? Moneki tijkixtisej tonali, tikitasej kenijkatsa techpaleuia uan tlauel tijpatiitasej. Kema titlaueyichiuaj eli kej kema tijchiuaj ejercicio o kema timomachtiaj titlatsotsonasej. Tlaj san kemantika tijchiuaj, uelis amo techpaleuis o amo tijyekosej. Uan tlaj mojmostla tijchiuaj, maske uelis achtoui amo tiuejkauayayaj uan teipa kena, tikitasej kenijkatsa nelnelia techpaleuia. Kema panos se keski tonali, san tijchixtosej nopa tonali kema tijchiuasej ejercicio o timomachtisej titlatsotsonasej. ¿Ueliskia nojkia kiampa tijchiuasej kema timomachtisej toselti o titlajtolmoyauasej?

18. ¿Tlake tlauel tijpatiitaj tijchiuasej, uan tlake pano kema tijchiuaj?

¹⁸ Kema tijueyichiuaj Jehová ika nochi toyolo, tijchiuaj tlen ipa kinekiyaya ma tijchiuakaj. Nopa techpaleuia ma tiyolpakikaj uan ma timotemachikaj teipa nochipa tijueyichiuasej toTeotsij (Prov. 10:22). Ipan ni tonali tijpiaj tlayolseuilistli, pampa tijmatij Jehová techpaleuia kema tikixnamikij tlaouijkayotl (Is. 41:9, 10). Yeka, tlauel tiyolpakij kema tijueyichiuaj Jehová, katli san ya kinamiki ma tijueyichiuakaj uan ma tijuejkapantlalikaj (Apoc. 4:11).