1, 2. ¿Tlen moneki tikchiuaskej tla tiknekij Jehová ma kiseli ijkuak tikueyichiuaj?

 ¿TLEN timokuayejyekoua ijkuak tikkaki kiueyichiuaj Jehová? Xamo timokuayejyekoua se tokni motlankuaketsa uan kitlatlaujtia noso se familia san sekan momachtia Biblia.

² Nonmej tokniuan kiueyichiuaj Jehová. ¿Kiselia ken kiueyichiuaj? Kema, porque kiueyichiuaj ken ye kineki, kitlasojtlaj uan kitlakaitaj. Tejuan tiktlasojtlaj Jehová, ik non, tiknekij tikueyichiuaskej ken ye kineki.

3. ¿Tlen timomachtiskej?

³ Itech nin tlamachtil tikitaskej ken okinekiaya Jehová ma kiueyichiuakan yiuejkika. Noijki tikitaskej chikueyi tlamantli ken moneki tikueyichiuaskej Jehová. Ijkuak timomachtijtiaskej moneki tikitaskej ken techpaleuia para okachi kuali tikueyichiuaskej. Tla tikueyichiuaj ken ye kineki, tiyolpakiskej.

4. Ijkuak ayamo okatka Cristo, ¿ken okiteititijkej itekipanojkauan Jehová okitlasojtlayaj uan okitlakamatiayaj?

⁴ Ijkuak ayamo okatka Cristo, sekimej itekipanojkauan Jehová ken Abel, Noé, Abrahán uan Job okiteititijkej okitlasojtlayaj uan okitlakaitayaj. ¿Ken okiteititijkej? Okitlakamatkej, otlaneltokakej uan okitlamanilijkej. Biblia amo techiluia ken okiueyichijkej pero kuali tikmatij omochijchikajkej okiueyichijkej uan ye okiseliaya. Satepan toTajtsin Dios okinmakak ixuiuan Abrahán tlanauatilmej tlen okijkuilo Moisés. Itech non tlanauatilmej okinmilui ken okinekiaya ma kiueyichiuakan.

5. ¿Ken okiueyichiuayaj Jehová akinmej opejki kichiuaj ken Cristo?

⁵ Ijkuak okimiktijkej Jesús uan Jehová okiyoliti, Jehová ayakmo okinmilui ma kitlakamatikan Tlanauatil tlen okijkuilo Moisés (Rom. 10:4). Itekipanojkauan Jehová omonekiaya kitlakamatiskej “itlanawatil Cristo” (Gál. 6:2). Akinmej opejki kichiuaj ken Cristo omonekiaya kichiuaskej ken ye okichi uan tlen otlamachti. Tiitekipanojkauan Jehová tiknekij tikyolpaktiskej, ik non, timochijchikauaj tikchiuaskej ken Cristo (Mat. 11:29).

6. ¿Ken mitspaleuis tlen timomachtiskej?

⁶ Ijkuak timomachtijtias ken moneki tikueyichiuas Jehová, ximotlajtlani: “¿Kox nikueyichiua Jehová ken ye kineki? ¿Tlen ok moneki nikchiuas para okachi nikyolpaktis?”. Maski tiyolpaki tikueyichiua Jehová, moneki xikilui ma mitspaleui para okachi kuali tikueyichiuas.

7. ¿Ken kita Jehová ijkuak tiktlatlaujtiaj ika nochi toyolo?

⁷ Ijkuak tiktlatlaujtiaj Jehová tikueyichiuaj. Biblia kijtoua ijkuak ikaj motlatlaujtia yetoskia ken ijkuak yiuejkika ikaj okitlatiaya kopali ompa tabernáculo uan satepan ompa teokali (Sal. 141:2). Tlen ompa okitlatiayaj okiyolpaktiaya Jehová, noijki ijkon ijkuak tiktlatlaujtiaj ika nochi toyolo “kiyolpaktia” maski amo tikiluiaj miak tlamantli (Prov. 15:8; Deut. 33:10). Onka miak tlamantli tlen kiteititia Jehová kiyolpaktia ma tikiluikan tiktlasojtlaj uan tiktlasojkamatiliaj. Ye kineki ma tikiluikan tlen tiknekij, tlen techtekipachoua uan tlen tikneltokaj kichiuas satepan. Ik non, ijkuak tiktlatlaujtiskej moneki kuali ma timokuayejyekokan tlen tikiluiskej, ijkon yetoskia ken tiktlatiliaj kopali tlen okachi kuali.

8. ¿Tlen uelis tikchiuaskej para okachi tikueyichiuaskej toTajtsin Dios?

⁸ Ijkuak titetlapouiaj tikueyichiuaj Jehová (Sal. 34:1). ¿Ken tikchiuaj? Ijkuak tikintlapouiaj oksekimej itech nochi tlen okichijchi. Tiktlasojkamatiliaj Jehová, ik non, tikueyichiuaj. Uan nochipa ijkon tikchiuaskej tla timokuayejyekouaj ye yolkuali uan nochipa kichiua tlen kuali. Ijkuak titetlapouiaj “matikweyijkachiwakah ika totlajtol” (Heb. 13:15). Ijkon ken moneki achto timokuayejyekoskej tlen  tikiluiskej Jehová ijkuak tiktlatlaujtiskej, noijki ijkon achto moneki kuali timokuayejyekoskej tlen tikinmiluiskej akinmej tikintlapouitiuij. Tiknekij tikueyichiuaskej Jehová ika nochi toyolo, ik non, titetlapouiaj ika nochi toyolo.

9. ¿Ken kipaleuia ialtepe Jehová monechikos uan ken yomitspaleui?

⁹ Ijkuak timonechikouaj tikueyichiuaj Jehová. Ik non, yiuejkika israelitas okinnauatijkej: “Sejse xiuitl eyi uelta moneki nochtin tlakamej yaskej ixpan Jehová moDios kanin ye kipejpenas” (Deut. 16:16). Omonekiaya kikajteuaskej inkal uan intlal pero Jehová okinmilui: “Ijkuak sejse xiuitl tikueyichiuati eyi uelta Jehová moDios, amikaj kimoaxkatis motlal” (Éx. 34:24). Okineltokayaj Jehová, ik non, israelitas sejse xiuitl miak uelta oiluichiuayaj. Ijkon okajsikamatiayaj tlen kijtoua iTlajtol toTajtsin Dios uan omokuayejyekouayaj ken sapanoua yolkuali, noijki omoyolchikauayaj iuan oksekimej itekipanojkauan Jehová (Deut. 16:15). Tejuan noijki techpaleuis tla timonechikouaj. Noijki Jehová yolpaki tla achto timomachtiaj para titlanankiliskej itech tlanechikol.

10. ¿Tleka moneki tiktlakuikiliskej Jehová?

¹⁰ Tikueyichiuaj Jehová ijkuak titlakuikaj iuan tokniuan (Sal. 28:7). Israelitas okipatioitayaj kitlakuikiliskej Jehová ijkuak okiueyichiuayaj. David okintlali ma tlakuikakan 288 levitas ompa teokali (1 Crón. 25:1, 6-8). Axkan uelis tikteititiskej tiktlasojtlaj Jehová ijkuak tiktlakuikiliaj ika nochi toyolo maski tikitaj oui titlakuikaskej. Ximokuayejyeko, ijkuak itlaj tikijtouaj ualeua timotlapololtiaj pero non amo kichiua ayakmo ma titlanankilikan ijkuak timonechikouaj uan ijkuak titetlapouiaj (Sant. 3:2). Maski timotlapololtiaj moneki nochipa tiktlakuikiliskej Jehová.

11. Ijkon ken kijtoua Salmo 48:13, ¿tleka moneki timajxiliskej timomachtiskej iuan tofamilia?

¹¹ Tikueyichiuaj Jehová Ijkuak tiktlajtoltiaj iTlajtol uan tikinmachtiaj tokoneuan. Sejse sábado israelitas omonekiaya momachtiskej para okachi mouikaskej iuan Jehová (Éx. 31:16, 17). Israelitas okinmachtiayaj inkoneuan Jehová yolkuali, ik non, tejuan moneki timajxiliskej para tiktlajtoltiskej uan timomachtiskej iTlajtol. Ijkon tikueyichiuaj Jehová uan okachi kuali iuan timouikaj (Sal. 73:28). Noijki ijkuak tikueyichiuaj Jehová iuan tofamilia tikinpaleuiaj tokoneuan iuan ma mouikakan (xiktlajtolti Salmo 48:13).

12. ¿Ken okitak Jehová tekitl tlen okichijkej israelitas uan tlen techmachtia?

¹² Tikueyichiuaj Jehová ijkuak titlapaleuiaj ma kinchijchiuakan uan ma kinyektlalikan kalmej kanin timonechikouaj. Biblia kijtoua okatka santo tlen okichijchijkej israelitas: tabernáculo uan nochi tlen okipiaya (Éx. 36:1, 4). Axkan Jehová noijki ijkon kita ijkuak kinchijchiuaj kalmej kanin timonechikouaj uan okseki tlamantli tlen ika tikueyichiuaj. Sekimej tokniuan noijki tlapaleuiaj, moneki tikintlasojkamatiliskej  porque mochijchikauaj kitekichiuiliaj ialtepe toTajtsin Dios. Oksekimej mochijchikauaj tetlapouiaj uan oksekimej mochiuaj precursores. Tlayekankej noijki tlapaleuiaj ma mochijchiuakan nonmej kalmej ijkuak kinpaleuiaj tokniuan ma mochiuakan precursores tla uelij. Tla tikmatij ken tikalchiuaskej noso amo, tinochtin uelis titlachipauaskej uan titlayektlaliskej.

13. ¿Tleka tiktemakaj totomin?

¹³ Ijkuak tiktemakaj totomin ika nochi toyolo tikueyichiuaj Jehová. Israelitas amo san ijkon oyayaj ixpan Jehová (Deut. 16:16). Omonekiaya itlaj kiuikiliskej, ijkon okiteititiayaj nochi tlen okinmakaya okitlasojkamatiliayaj. ¿Ken uelis tikteititiskej tiktlasojtlaj uan tiktlasojkamatij nochi tlen techmaka? Uelis tiktemakaskej totomin ijkuak timonechikouaj para ma motetlapoui itech nochi tlaltikpak. Apóstol Pablo ijkin okijto: “Porke tla se tlakatl ika nochi iyolo kitemaka kech ye weleti kitemaka, Dios kiselia, porke Ye amo techtlajtlanilia tlan amo tikpiah” (2 Cor. 8:4, 12). Maski amo miak tomin tikpiaj, Jehová kipatioita ijkuak tiktemakaj ika nochi toyolo (Mar. 12:42-44; 2 Cor. 9:7).

14. Ijkon ken kijtoua Proverbios 19:17, ¿ken kita Jehová ijkuak tikinpaleuiaj akinmej amitlaj kipiaj?

¹⁴ Tikueyichiuaj Jehová ijkuak tikinpaleuiaj tokniuan tlen amo itlaj kipiaj. Jehová okinmilui israelitas kinteochiuaskia tla kinpaleuiskiaj akinmej amitlaj okipiayaj (Deut. 15:7, 10). Ijkuak tejuan tikpaleuiaj se tokni tlen amitlaj kipia, Jehová kita ken ye tikmakaj se tetliokolil (xiktlajtolti Proverbios 19:17). Tokniuan tlen ochantiayaj Filipos okititlanilijkej apóstol Pablo se tetliokolil ijkuak otsaktoka uan ye okijto non tetliokolil okiyolpaktiaya toTajtsin Dios (Filip. 4:18). Ma tikitakan akin tokni uelis tikpaleuiskej. Jehová kita tikueyichiuaj tla tikinpaleuiaj oksekimej ijkuak itlaj kinpoloua (Sant. 1:27).

15. ¿Tleka amo tikitaj oui timochijchikauaj tikueyichiuaj Jehová?

¹⁵ Moneki timochijchikauaskej uan timajxiliskej para tikueyichiuaskej Jehová, ijkon ken ye kineki. Uan non amo oui (1 Juan 5:3). ¿Tleka? Porque tiktlasojtlaj. Ijkuak se chokotsin kineki itlaj kitliokolis itajtsin, xamo uejkauas miak horas kichiuas se dibujo pero amo kita oui. ¿Tleka? Porque kitlasojtla itajtsin uan paki itlaj kitliokolis. Ijkon tla tiktlasojtlaj Jehová, tiyolpakiskej timochijchikauaskej uan timajxiliskej para tikueyichiuaskej.

16. Ijkon ken kijtoua Hebreos 6:10, ¿ken kita Jehová ijkuak timochijchikaua tikyolpaktis?

¹⁶ Tetajmej amo kijtouaj kinekij inkoneuan ma kintliokolikan san se tlamantli porque inkoneuan tlatlamantli mokuayejyekouaj, noijki ijkon Jehová techajsikamati tlen uelis tikchiuaskej uan tlen amo. Xamo tejuatsin okachi titlapaleuia uan amo ken moyolikniuan. Noso xamo amo ueli tikchiua tlen oksekimej kichiuaj porque yitikpia  miak xiuitl, timokokoua noso moneki tikpaleuis mofamilia, pero amo ximosotlaua (Gál. 6:4). Jehová amo kilkaua tlen tejuatsin tikchiua. Nochipa xikmaka tlen okachi kuali pero ika nochi moyolo, ijkon ye yolpakis (xiktlajtolti Hebreos 6:10). Jehová kita tlen tikpia itech moyolo. Ye kineki xiyolpaki uan kuali ximomachili ijkuak tikueyichiua.

17. (1) ¿Tlen techpaleuis tla tikitaj oui tikueyichiuaskej Jehová? (2) ¿Yomitspaleui tlen kipia recuadro “ ¿Ken uelis okachi tiyolpakiskej?”.

¹⁷ ¿Uan tla tikitaj oui timomachtiskej toselti noso titetlapouiskej? Tla okachi timomachtiaj uan okachi titetlapouiaj okachi techpaktis. Ma tikijtokan tikchiuaj ejercicio noso itlaj tiktsotsonaj, ijkuak okachi tikchiuaj ejercicio noso titlatsotsonaj okachi techpaktis. Tla amo nochipa ijkon tikchiuaj, tikitaskej oui pero tla nochipa ijkon tikchiuaj maski san tepitsin, tikitaskej amo oui uan satepan kuali tikchiuaskej. Uan satepan hasta techpaktis. Noijki ijkon ma timochijchikauakan para tikueyichiuaskej Jehová.

18. ¿Ken tikchiuaj tlen Jehová kineki uan ken techpaleuia?

¹⁸ Ijkuak tikueyichiuaj Jehová ika nochi toyolo, tikchiuaj ijkon ken ye kineki. Non techpaleuia ma tiyolpakikan uan ma tikneltokakan nochipa uelis tiktekichiuiliskej (Prov. 10:22). Noijki ijkuak titlajyouiaj Jehová techpaleuia kuali ma timomachilikan (Is. 41:9, 10). Tikpiaj miak tlamantli para tiyolpakiskej porque tikueyichiuaj toTajtsin Dios akin sapanoua techtlasojtla uan san ye kinamiki ma tikueyichiuakan (Apoc. 4:11).