1-2. Oshike tashi ka ningitha Jehova a taambe ko oku mu longela kwetu?

 MBELA oshike hashi ya momadhiladhilo goye ngele owa uvu uutumbulilo “okulongela Kalunga”? Otashi vulika momadhiladhilo goye mu ye ethano lyomumwatate a tsa oongolo pooha dhombete ye, ta galikana manga inaa ka lala. Nenge mu ye uukwanegumbo wa nyanyukwa tawu tyapula ekonakonombiimbeli lyawo.

² Miiholelwa ayihe mbyoka iyali aantu mboka otaya longele Jehova. Ihe mbela Jehova ota ka taamba ko ngaa omukalo moka taye mu longele? Eeno, ote ke gu taamba ko, ngele otaye shi ningi metsokumwe nelalakano lye nonesimaneko, notayi inyengithwa kohole. Otu hole Jehova noonkondo. Otu shi kutya okwa gwana okulongelwa notwa hala oku shi ninga momukalo ngoka gwa dhenga mbanda.

3. Oshike tatu ka kundathana moshitopolwa shika?

³ Moshitopolwa shika otatu ka kundathana omikalo dhi ili nodhi ili dhi na ko nasha nokulongela Jehova, ndhoka a li a taamba ko pethimbo lyonale. Otatu ka kundathana wo omikalo hetatu moka Jehova a hala tu kale hatu mu longele kunena. Nongele otwe shi ningi, otatu ka vula okumona mpoka twa pumbwa okuninga omalunduluko sho tatu mu longele. Otatu ka tala wo komatompelo gamwe kutya omolwashike okulongela Jehova momukalo ngoka a hokwa, taku vulu oku tu etela enyanyu.

4. Aapiya yaJehova yonale oya li ya ulike ngiini kutya oya simaneka Jehova noye mu hole?

⁴ Pethimbo lyonale, aalumentu aadhiginini ngaashi Abel, Noa, Abraham nosho wo Job oya li ya ulike kutya oye hole Jehova noye mu simaneka. Mbela oya li ye shi ningi ngiini? Oya li haya vulika  kuye, oya li ye na eitaalo muye noya li haye mu yambele omayambo. Ombiimbeli inayi tu lombwela kondandalunde iinima ayihe mbyoka ya li haya ningi sho taya longele Jehova. Ihe nando ongawo, oya li haya longo nuudhiginini, opo ya longele Jehova momukalo ngoka a hokwa. Lwanima, Jehova okwa li a pe Aaisraeli Ompango yaMoses. Ompango ndjoka oya li ya kwatela mo omalombwelo gokondandalunde kombinga yankene ye na okukala taya longele Jehova momukalo ngoka a hokwa.

5. Jehova okwa tegelela aalanduli yaJesus ye Mu longele ngiini?

⁵ Konima yeso neyumuko lyaJesus, Jehova ka li we a tegelela aantu ye mu longele shi ikolelela kompango ndjoka a li a pa Aaisraeli. (Rom. 10:4) Aakriste oya li ye na okuvulika kompango ompe, ano “ompango yaKristus.” (Gal. 6:2) Opo ya vulike ‘kompango’ ndjono, kaya li ya tegelelwa ya kale ye shi momutse omusholondondo gwaashoka ye na okuninga naashono kaaye na okuninga. Ihe oya li ya tegelelwa ya landule oshiholelwa shaJesus nosho wo omalongo ge. Nokunena Aakriste ohaya longo nuudhiginini ya landule oshiholelwa shaKristus, opo ya nyanyudhe Jehova noyi “imonene evululuko.” — Mat. 11:2.

6. Ongiini tatu vulu okumona mo uuwanawa moshitopolwa shino?

⁶ Sho tatu ka kundathana omukalo kehe moka hatu longele Jehova, ipula to ti: ‘Onda ninga ehumokomeho li thike peni?’ Oto vulu wo wu ipule to ti: ‘Openi nda pumbwa okuninga omalunduluko?’ Nyanyukilwa ehumokomeho ndyoka wa ninga sigo oompaka, ihe pula wo Jehova e ku kwathele wu mone kutya openi natango wa pumbwa okuninga omalunduluko.

7. Jehova oha tala ko ngiini omagalikano getu taga zi komutima?

⁷ Okugalikana oku li omukalo gwokulongela Jehova. Omanyolo oga faathanitha omagalikano getu nomatsinino ga longekidhwa nawa ngoka ga li haga gandjwa metsalihangano, nolwanima oga li haga gandjwa motempeli. (Eps. 141:2) Iitsinino mbyoka oya li hayi zi ezimba lya nika nawa, ndyoka lya li hali nyanyudha Kalunga. Sha faathana, Jehova oha kala a “hokwa” omagalikano getu taga zi komutima, nonando otwa popya owala iinima yi li paufupi. (Omayel. 15:8; Deut. 33:10) Onkee ano, otu na etompelo ewanawa lyokukala twi itaala kutya Jehova oha kala a nyanyukwa sho e tu uvite tamu mu lombwele megalikano kutya otu mu hole notwe mu pandula. Okwa hala wu mu lombwele kombinga yaashoka to ipula nasho nosho wo oompumbwe dhoye. Manga inoo galikana, dhiladhila muule kombinga yaashoka to ka popya. Ngele owa kala ho ningi ngawo, oto ka pa Ho gwomegulu ‘etsinino’ lya dhenga mbanda.

8. Otu na ompito ombwanawa yini yokutanga Jehova?

⁸ Okutanga Jehova oku li omukalo gwoku mu longela. (Eps. 34:1) Ohatu tanga Jehova, ngele tatu popi kombinga yomaukwatya ge omawanawa nosho wo iilonga ye. Ngele otwa kala hatu kongo ethimbo tu tedhatedhe kiinima ayihe iiwanawa mbyoka Jehova e tu ningila, otatu ka kala tu na omatompelo ogendji goku mu tanga tashi zi komutima. Iilonga yokuuvitha ohayi tu pe ompito ombwanawa tu gandje kuKalunga aluhe “omahambelelondjambo,” ano “oshiyimati shomilungu dhetu.” (Heb. 13:15) Ngaashi owala tu na okutedhatedha komeho yethimbo kombinga yaashoka tatu ka lombwela Jehova megalikano, otwa pumbwa wo okukala hatu dhiladhila komeho yethimbo kombinga yaashoka tatu ku uvithila aantu. Otwa hala “omahambelelondjambo” getu ga kale aluhe ga dhenga mbanda. Naashono oshi na oku tu inyengitha tu kale hatu popi tashi zi komutima uuna tatu uvithile yalwe.

9. Ngaashi Aaisraeli yonale, uuwanawa wuni hatu mono pokugongala kwopaKriste? Gandja oshiholelwa shoye shopaumwene.

⁹ Ohatu longele Jehova uuna tu li pokugongala.  Oshigwana shaIsraeli shonale osha li sha lombwelwa kutya: “Aalumentu ayehe yoshigwana shoye oye na okuya, ya galikane Omuwa Kalunga koye lutatu omumvo kehe pehala lyelongelokalunga.” (Deut. 16:16) Oya li haya thigi po omagumbo nomapya gawo kaapu na ngoka e ga keelela. Ihe Jehova okwa li e ya uvanekela a ti: ‘Kape na ngoka ta ka haluka evi lyoye, sho to ka holoka koshipala shOmuwa, Kalunga koye.’ (Eks. 34:24) Molwaashoka Aaisraeli oya li yi inekela thiluthilu muJehova, oya li haya yi kiituthi mbyoka ya li hayi ningwa omumvo kehe. Piituthi mpoka oya li haya mono po uuwanawa. Pashiholelwa, oya li hayi ilongo po oshindji kombinga yOmpango yaKalunga, haya tedhatedha kombinga yuuwanawa mboka e ya ningila, noya li haya tyapula okweendathana nooitaali ooyakwawo. (Deut. 16:15) Natse ngele otwa kala hatu ningi omaiyambo tu kale hatu kala pokugongala kwopaKriste, otatu ka mona po uuwanawa. Ngele ohatu ilongekidhile okugongala komeho yethimbo nokugandja omatyokosha ge li paufupi notaga tungu, otashi ka nyanyudha Jehova noonkondo.

10. Omolwashike okwiimba ku li oshitopolwa sha simanenena shokulongela Jehova?

¹⁰ Okwiimba pamwe naamwatate naamwameme oku li omukalo gwokulongela Jehova. (Eps. 28:7) Aaisraeli oya li ya tala ko okwiimba ku li oshitopolwa sha simana shokulongela Jehova. Omukwaniilwa David okwa li a hogolola Aalevi 288 ya kale haya imbi motempeli. (1 Ondjal. 25:1, 6-8) Nokunena, ngele ohatu imbi omaimbilo gUukwaniilwa, otatu ulike kutya otu hole Jehova. Omutono gwomawi getu hagwo gwa simana. Shono otatu vulu oku shi yelekanitha nokupopya. “Atuheni ohatu puka olwindji” mokupopya. Ihe shono ihashi tu imbi tu popye uuna tu li pokugongala nenge uuna tu li muukalele. (Jak. 3:2) Sha faathana, inatu etha nando uusama wetu wokwiimba wu tu imbe tu tange Jehova okupitila momaimbilo.

11. Shi ikolelela kEpisalomi 48:13, omolwashike tu na okwiitulila po ethimbo tu konakone Ombiimbeli pamwe noyaandjetu?

¹¹ Ohatu longele Jehova, uuna tatu konakona Oohapu dhe, nongele tatu longo aanona yetu kombinga ye. Mesiku lyEsabati, Aaisraeli kaya li haya longo, opo ya gandje eitulomo kokukoleka ekwatathano lyawo naJehova. (Eks. 31:16, 17) Aaisraeli mboka ya li aadhiginini, oya li haya longo oyana kombinga yaJehova nosho wo yuuwanawa mboka e ya ningila. Natse kunena otwa pumbwa okwiitulila po ethimbo, opo tu kale hatu lesha nokukonakona Oohapu dhe. Ngoka ogwu li omukalo gwokulongela Jehova nohagu tu kwathele tu hedhe popepi lela naye. (Eps. 73:28) Ngele ohatu konakona Ombiimbeli pamwe noyaandjetu, otashi ka kwathela oyana yetu nayo ya kokeke ekwatathano lyawo naTate yetu gwomegulu omunahole. — Lesha Episalomi 48:13.

12. Oshike tatu ilongo kunkene Jehova a li a tala ko iilonga yaamboka ya li haya kaleke etsalihangano monkalo ombwanawa?

¹² Ohatu longele Jehova, ngele tatu tungu omatungo getu gokugongalela noku ga kaleka monkalo ombwanawa. Ombiimbeli oya popya kutya okutunga nokukaleka monkalo ombwanawa etsalihangano oya li “iilonga iiyapuki.” (NW) (Eks. 36:1, 4) Nokunena, Jehova okwa tala ko iilonga yokutunga Iinyanga yUukwaniilwa nosho wo omatungo getu galwe gokugongalela kutya nayo oyi li oshitopolwa shoku mu longela. Aamwatate naamwameme yamwe ohaya longitha ethimbo lyawo olindji ya kuthe ombinga miilonga mbyoka ya simana. Otatu ya pandula noonkondo omolwomaiyambo ngoka haya ningi. Aamwatate mbono nayo ohaya kutha ombinga miilonga yokuuvitha. Yamwe yomuyo otashi vulika nokuli ya hala okuninga aakokolindjila. Aakuluntugongalo otaya ka ulika ngiini kutya otaya yambidhidha iilonga yokutunga? Omokukala haya langeke po nziya aamwatate naamwameme mboka haya longo nuudhiginini miilonga yokutunga, uuna ya gwanitha po iitegelelwa ya  ninge aakokolindjila. Kutya nduno otu na owino miilonga yokutunga nenge hasho, atuheni otatu vulu okukutha ombinga mokwoopaleka nokukaleka monkalo ombwanawa omatungo getu gokugongalela.

13. Otu na okukala twa tala ko ngiini omayambidhidho ngoka hatu gandja omolwiilonga yUukwaniilwa?

¹³ Ohatu longele Jehova, uuna tatu gandja omayambidhidho omolwiilonga yUukwaniilwa. Jehova okwa li a tegelela Aaisraeli ya faalele sha, sho taya yi kiituthi yokomumvo. (Deut. 16:16) Oya li haya faalele omagano ngoka ye na, shi ikolelela kiiniwe yawo, nokungawo oya li haya ulike kutya oya pandula Jehova omolwiinima ayihe mbyoka e ya ningila. Mbela ongiini tatu vulu okuulika kutya otu hole Jehova notwa pandula oondja dhopambepo adhihe ndhoka he tu longekidhile? Omukalo gumwe moka tatu vulu oku shi ninga, omokugandja omayambidhidho gopashimaliwa megongalo lyetu nogokuyambidhidha iilonga yokuuvitha muuyuni awuhe, shi ikolelela kiiniwe yetu. Omuyapostoli Paulus okwa ti: “Ngele omu na ehalo ewanawa lyokugandja, nena Kalunga ota taamba ko omagano ngoka tamu gandja pamuthika mpoka mu thike, haampoka mwaa thike.” (2 Kor. 8:4, 12) Onkee ano, Jehova okwa lenga noonkondo omayambidhidho ngoka hatu gandja nehalo ewanawa, kashi na nduno mbudhi kutya otatu gandja ingapi. — Mark. 12:42-44; 2 Kor. 9:7.

14. Shi ikolelela kOmayeletumbulo 19:17, Jehova okwa tala ko ngiini ekwatho ndyoka hatu pe ooitaali ooyakwetu mboka ye na ompumbwe?

¹⁴ Ohatu longele Jehova uuna tatu kwathele Aakriste ooyakwetu mboka ye na ompumbwe. Jehova okwa li a uvanekela Aaisraeli kutya ote ke ya yambeka ngele oya kala haya kwathele oohepele nehalo ewanawa. (Deut. 15:7, 10) Onkee ano, oshikando kehe tatu kwathele Omukriste omukwetu ngoka e na ompumbwe, kungawo otwa fa tatu gandja omagano kuJehova. (Lesha Omayeletumbulo 19:17.) Pashiholelwa, sho Aakriste yokuFilippi ya li ya tumine Paulus omagano sho a li mondholongo, okwa popi kombinga yomagano ngoka a ti kutya oge li “eyambo lyezimba lya nika nawa, lyo opala nolya hokiwa kuKalunga.” (Fil. 4:18) Kala ho tala megongalo lyeni e to ipula to ti: ‘Mbela olye tandi vulu okukwathela?’ Jehova oha kala a nyanyukwa noonkondo ngele tatu longitha ethimbo lyetu, oonkondo, uunkulungu niiniwe yetu, opo tu kwathele aamwatate naamwameme mboka ye na ompumbwe. Okuninga iinima mbyoka okwe ku tala ko ku li oshitopolwa shoku mu longela. — Jak. 1:27.

15. Nonando okukala melongelokalunga lyashili ohaku pula ethimbo nosho wo oonkambadhala, omolwashike tatu tile kutya kaku shi omutenge?

¹⁵ Okukala melongelokalunga lyashili ohaku pula ethimbo nosho wo oonkambadhala. Ihe nando ongawo, kaku shi omutenge. (1 Joh. 5:3) Omolwashike tatu tile ngawo? Omolwaashono ohatu longele Jehova, tatu inyengithwa kohole yetu yoku mu hola. Dhiladhila andola kombinga yokamati hoka ka hala okupa he omagano. Otashi vulika ka longithe oowili odhindji take mu thanekele ethano. Okamwanamati hoka itaka ka kala ke uvite nayi omolwethimbo ndyoka ka longitha. Oke hole tate gwako noka nyanyukwa nokuli sho ke mu pa omagano. Sha faathana, molwaashoka natse otu hole Jehova, ohatu kala twa nyanyukwa uuna tatu ningi oonkambadhala nokulongitha ethimbo lyetu tu mu longele.

16. Shi ikolelela kAahebeli 6:10, Jehova okwa tala ko ngiini oonkambadhala ndhoka hatu ningi, opo tu mu nyanyudhe?

¹⁶ Aavali aanahole ihaya kala ya tegelela oyana ye ya pe omagano ga faathana. Omolwashike mbela? Omolwaashoka oye shi kutya aanona nosho wo iipewa yawo oya yoolokathana. Sha faathana, Tate yetu gwomegulu oku shi onkalo yakehe gumwe. Pashiholelwa, otashi vulika wu kale ho longo oshindji shi vulithe yamwe. Nenge otashi vulika itoo vulu okulonga oshindji miilonga  yaJehova omolwuukokele, okwaanuukolele nenge molwiinakugwanithwa yuukwanegumbo. Shoka inashi ku teya nando omukumo. (Gal. 6:4) Dhimbulukwa aluhe kutya Jehova ke na siku a dhimbwe iilonga yoye. Ota ka kala a nyanyukwa shampa owala to mu pe shoka sha dhenga mbanda noto shi ningi neinyengotompelo lyu uka. (Lesha Aahebeli 6:10.) Jehova oha kala wo e wete momutima gwoye shoka wa hala okuninga. Okwa hala wu kale wa nyanyukwa nowu tsikile okuninga ngaashi to vulu sho to mu longele.

17. (a) Oshike tatu vulu okuninga ngele ohatu mono oshidhigu okulongela Jehova momikalo dhimwe? (b) Uuwanawa wuni wa mona muyimwe yomiinima mbyoka ya tumbulwa moshimpungu “ Gwedha ko kenyanyu lyoye”?

¹⁷ Mbela oshike tu na okuninga ngele otu wete oshidhigu okutula miilonga iinima yimwe mbyoka twa zi nokukundathana, ngaashi okukonakona Ombiimbeli nenge okuuvitha? Ngele ohatu kutha ombinga miinima mbyoka olundji, otatu ka kala tatu yi tyapula notashi ke tu etela uuwanawa. Otatu vulu okuyelekanitha omaipyakidhilo getu gopambepo nokuninga omadhewo. Ngele ohatu ningi owala omadhewo omalupita, itatu ka mona po elunduluko olindji. Mbela oshike tashi ka ningwa po ngele otwa tokola tu kale hatu ga ningi kehe esiku? Petameko otashi vulika wu kale owala ho longitha ominute omishona, ihe mokweendela ko kwethimbo otashi vulika wu kale ho ga ningi ethimbo ele. Uuna twa mono iizemo iiwanawa otatu ka kala aluhe twa hala okutsikila oku ga ninga, notatu ka kala aluhe hatu ga tyapula. Shono osha faathana owala nokulongela kwetu Jehova.

18. Oshinima shini sha simanenena tu na okuninga monkalamwenyo yetu, notashi tu etele uuwanawa wuni?

¹⁸ Okulongela Jehova nomutima aguhe okwo oshinima sha simanenena. Ngele otwa kala hatu ningi ngawo, otatu ka kala nonkalamwenyo ombwanawa noyi na eityo, notatu ka kala wo tu na etegameno lyoku mu longela sigo aluhe. (Omayel. 10:22) Ngashingeyi otu na ombili yopamadhiladhilo, oshoka otu shi kutya Jehova oha kwathele aalongeli ye uuna ye na omaupyakadhi. (Jes. 41:9, 10) Otu na omatompelo omawanawa gokukala twa nyanyukwa sho tatu longele Tate yetu omunahole, ngoka a gwana “okusimanekwa” kiishitwa ye ayihe. — Eh. 4:11.