1-2. Tiheeni enahaaala weeriha wi malapelo ahu yeemereryiwe ti Muluku?

 TIHEENI munuupuwelaanyu vaavaa muniiwaanyu masu awi “malapelo”? Akhweya munnamuupuwela munna yoowo okokhonre avekelaka ni murima awe woothene wa Yehova ahaakumve okona. Akhweya tho munnuupuwela echoko yeeyo eri yoohakalala emuhuseryaka Piipiliya.

² Mmikhalelo soomiili seiha, oothene anapaka mukhalelo wa malapelo. Apwanne Yehova onahaala weemererya malapelo aya? Owo onahaala weemererya wakhala wi ari mwawiinana ni yookhwela awe nave wakhala wi anavahiwa moosivela ni mwa ncicimiho. Ninnamusivela vancipale Yehova. Hiyaano noosuwela wi pahiru Yehova tonaphwanela olapeliwa, nave ninnachuna weerano yeeyo mmukhalelo waphama.

3. Tiheeni nnahaalaahu othokororya mmwaha yoola?

³ Mmwaha yoola, nnahaala ohuserya vooloca sa mukhalelo wa malapelo yaawo Yehova eemereryeiye mmahiku akhalai nave nnahaala othokororya mikhalelo 8 seiho Yehova onachuneiye wi nimulapeleke olelo. Vaavaa nnahuseryaahu, nnaphwanela wuupuwela ti mwawiihai hiyaano mukhatiihu nneeraahu nrehererye mukhalelo wa malapelo ahu. Nnahaala woona tho ntakhara heeni omulapela Yehova mmukhalelo waphaama onahaalaaya oneeriha okhala oohakalala.

4. Ti mwawiihai alapeli a Yehova akhalai yoonihenryaaya ncicimiho ni omusivela waya Yehova?

⁴ Ehaakhumve elukuluku ya Kristu, alopwana oororomeleya ntoko Apeli, Nowa, Aprahamu ni Yupu yaahooniherya ncicimiho ni omusivela waya Yehova. Mwawiihai? Moorweela wa wiiwelela  waya, nroromelo naya ni mikucho saya. Piipiliya hanathariha soothene awo yeeraaya wi emulapele. Nyenya mweeparipari awo yaanapaka owetha waya wi emucicimihe Yehova, nave malapelo aya yaari aweemereryiwa ni yoowo. Voocharela Yehova aahaavaha Aisarayeli Nlamulo orweela wa Mose. Nlamulo nenla naanaphitaanyerya malamulo mancipale vooloca sa mukhalelo owo aachuneiye wi alapeliweke.

5. Matorokelo taani apaken’ye mmalapelo eeparipari amanle Yesu okhwa ni oviihiwa?

⁵ Amanle Yesu okhwa ni oviihiwa, Yehova hanaweherya tho wi achu emulapeleke mwawiiwanana ni Nlamulo nenlo aavahereryeiye Aisarayeli. (Aro. 10:4) Akristu anachariha nlamulo nvyaani, “nlamulo na Kristu.” (Gal. 6:2) Awo ananwerya wiiwelela “nlamulo” nenla, ohiya moorweela wa wuupuwelela ni ochariha malamulo mancipale, nyenya orweela wa ochariha yootakiherya ya Yesu ni mahusiheryo awe. Olelo tho, Akristu annapaka owetha waya wi emuchare Kristu ni omuhakalaliha Yehova nave ‘annaphwanya wiichuwa’ mu okumi aya.—Mat. 11:29.

6. Nni niwerye hai ophura orweela wa mwaha yoola?

⁶ Vaavaa nnathokororyaahu mukhalelo ti mukhalelo wa malapelo ahu, mwiikohe: ‘Matorokelo taani kipankaaka mmukhalelo yoola?’ Munaphwanela tho wiikoha: ‘Apwanne kinninnuwiha mukhalelo wa malapelo aka?’ Nyuwaano munanwerya ohakalala ni yeeyo muneeraanyu hiihaano, nyenya munaphwanela omveka Yehova wi ookhaviheryeeni woona echu yeeyo munaphwanelaanyu weerakano phaama.

7. Ti mwawiihai Yehova onooneiye mavekelo ahu oorweela vathi va murima?

⁷ Ninnamulapela Yehova vaavaa nnavekelaahu wa yene. Soorepa sinnalikanyiha mavakelo ahu ni mukucho woorehereryiwa phaama yoowo waavahiwa mu tapernakulo nave ohoolo waya mu empa ya Muluku. (Sal. 141:2) Mukucho yoowo waanakumiha wunkhela yoowo waamuhakalaliha Muluku. Moolikana, mavekelo ahu ookhumela vathi va murima ‘annamuhakalaliha’ yoowo, naamwi nipharihenle masu ookhweya. (Masi. 15:8; Malam. 33:10) Nookhalano mathowa aphaama a ororomela wi Yehova onnasiveliwa oniwiriyana naalocaka sa osivela wahu ni othamalela wahu wa yoowo. Owo onachuna wi nimuleeleke miyoonelo sahu, soolakelela ni soochuna sahu. Nihaakumve oloca ni Yehova mu nivekelo, yaamukhala phaama wuupuwela moopwacha yeeyo nnahaalaahu oloca. Mweerano yeela, nyuwaano muhaala ovaha “mukucho” waphaamaxa wa Tiithi anyu awirimu.

8. Ekari taani yavameekhaaya nraahuno ya omvuwiha Muluku?

⁸ Ninnamulapela Yehova vaavaa nnamvuwihaahu yoowo. (Sal. 34:1) Ninnamvuwiha Yehova moorweela wa waaleela akina vooloca sa mukhalelo nnamusivelaahu ni ocicimiha makhalelo awe ootikhiniha ni miteko sawe. Nnahaala okhalano ichu sincipale sa oloca vooloca sa Yehova wakhala wi ninnamuthamalela yoowo. Wakhala wi ninnuupuwelela vooloca sa ichu saphaama soothene Yehaova oneerenleiye, hiyaano nnahaala okhalano mathowa mancipale a omvuwiha yoowo. Muteko woolaleerya onnanivaha ekari yavameekhaaya ya ‘operekha mukucho woocicimiha, ari masu a mwaano mwahu.’ (Ahe. 13:15) Hiihaa ntoko nnaphwanelaahu wuupuwela phaama yeeyo nnayaahu oloca nihaakumve omwaacamela Yehova mu nivekolo, yaamukhala phaama tho wuupuwela moopwacha vooloca sa yeeyo nnayaahu oloca wa yaale nnayaahu waalaleerya. Nnachuna wi ‘mikucho sahu soocicimiha’ sikhaleke saphaamaxa. Ti  nthowa nene nnakhalaahu oolocuwa vaavaa nnalaleeryaahu.

9. Moolikana ni Aisarayeli akhalai, ti mwawiihai nnaphuraahu moorweela wa othukumana vamoha? Mvahe yootakiherya vooloca sa mukhalelo mithukumano sinookhaviheryayaani.

⁹ Ninnamulapela Yehova vaavaa nnaphiyaahu mmithukumano. Aisarayeli akhalai yaaleeliwa: “Vararu vayakhani alopwana othene yiperekheke w’Apwiya, Muluku anyu, vanipuroni anayàya othanlavo.” (Malam. 16:16, BNM) Awo yaaphwanela ohiya ipa ni imaca saya ahirivo muchu aahaala okhapelelaka. Nyenya Yehova aahaaroromeliha yaawo: “Hakhalavo muchu oowerya orosha elapo aa mu elukuluku yoowela okumana ni Apwiya Muluku aa.” (Muk. 34:24) Nthowa nawi Aisarayeli yaanamuroromela Yehova moomalela, awo yaanaphiya va ifesta sa vayaakhani. Nave yaanaphura mmikhalelo mincipale. Ntoko yootakiherya, awo yaanahuserya vancipale vooloca sa Nlamulo na Muluku, yaanuupuwelela vooloca sa mukhalelo Yehova aareiye ooreera murima wa yaawo nave yaanahakalala vamoha ni akina yaawo tho yaamusivela Yehova. (Malam. 16:15) Hiyaano ninnakhalano miphurelo soolikana vaavaa nniilipexeryaahu wi niphiye mmithukumano Seekristu. Nave muupuwele mukhalelo Yehova onasiveliweiye vaavaa nniireheryaahu wi nivahe maakhulo ookhuveya, nyenya arino yootaphulela.

10. Ntakhara heeni wiipa aryaaya makupa oochuneyaxa mmalepelo ahu?

¹⁰ Ninnamulapela Yehova vaavaa nniipaahu vamoha. (Sal. 28:7) Aisarayeli yaanoona wiipa okhala makupa oochuneya a malapelo aya. Mwene Tavite aahaathanala Alevi 288 wi ekhale alipa awiipa mu empa ya Muluku. (1 Math. 25:1, 6-8) Olelo, nnanwerya wooniherya omusivela wahu Muluku vaavaa nniipaahu macipo oomucicimihano. Hannaphwanela okhala alipa awiipa aphaama wi neereno yeela. Muthokororye olikanyiha ola: Vaava nnalocaahu, “ninnakwaculiwa oothene mu sincipale,” nyenya ela henanihiiha oloca mmulokoni ni mmuteko woolaleerya. (Tiy. 3:2) Moolikana, hinnaphwanela weemererya wi moonelo ahu vooloca sa ohiphwanelela wa nsu nahu onihiihe omwiipela Yehova macipo oomucicimihano.

11. Ntoko etharihiwaaya mu Salumu 48:13, ntakhara heeni nnaphwanelaahu waavya elukuluku wi nipake malapelo a echoko?

¹¹ Ninnamulapela Yehova vaavaa nnahuseryaahu masu awe ni waahusiha anamwane ahu vooloca sa yoowo. Nihiku na Sapata Aisarayeli hiyaalapa, nave yaanapharihela nihiku nenla wi elipihe onthamwene aya ni Yehova. (Muk. 31:16, 17) Yaale yaari oororomeleya yaanaahusiha anaaya vooloca sa Yehova ni oreera wawe murima. Olelo tho, nnaphwanela waavya elukuluku wi naalakhanye ni ohuserya Masu a Muluku. Ala makupa a omulapela wahu Yehova, nave eyo ennnanikhaviherya omwaacamela yoowo. (Sal. 73:28) Nave vaavaa nnahuseryaahu vamoha ntoko emusi, ninnaakhaviherya anamwane ahu okhalano onthamwene wawaacamelaya ni Tiithi ahu oosivela a wirimu.—Mwaalakhanye Salumu 48:13.

12. Tiheeni nihusenryaahu orweela wa mukhalelo Yehova ooneiye muteko wa yaale yaapaka ichu sa mu tapernakulu?

¹² Ninnamulapela Yehova vaavaa nnatekaahu ni orehererya mapuro a malapelo. Piipiliya onnaloca muteko wa ompaka tapernakulu ni ichu seiyo saari mwemmo wi waari ‘muteko waweela.’ (Muk. 36:1, 4) Olele tho, Yehova onnoona miteko sa oteka Ipa sa Omwene ni miteko mikina sa oteka soomuluku ntoko miteko saweela. Anna ni arokora akina annamaliha elukulu yincipale epharaka miteko seiha. Apwanne hinnathamalela wiiveleela waya ntakhara muteko wa Omwene? Mweeparipari awo tho annapaka muteko woolaleerya. Ophiyerya tho wi akina a yaawo annachuna okhala  mapiyoneero. Atokweene ananwerya wooniherya wi annakhaviherya muteko wa oteka moorweela wa oweemererya anna ni arokora yaala oowetha okhala mapiyoneero wakhala wi awo annaphwanelela. Moohipwacha waakhanle wi nookhalano mavyakelo a oteka naari hooye, oothene ahu nnanwerya okhaviherya weeliha ni orehererya mapuro yaawo.

13. Nnaphwanela woonaka hai sooveleela nnapakaahu wi nikhaviherye muteko wa Omwene?

¹³ Ninnamulapela Yehova vaavaa nnakhaviheryaahu miteko sa Omwene ni sooveleela sahu. Yaaweheryiwa wi Aisarayeli eruuheke yoovaha wa Yehova vaavaa yaayaaya mu ifesta. (Malam. 16:16) Awo yaanaruuha samahala sa sookhalano saya mwawiiwanana ni mikhalelo saya. Mmukhalelo yoola yaanooniherya wi yaanathamelela soothene Yehova eereiye ntakhara yaawo. Nni nooniherye hai osivela wahu wa Yehova ni othamalela wahu ntakhara soovaha soomunepani nnaakhelaahu? Mukhalelo mmoha wa weerano yeela ori moorweela wa ovaha ikhorowa wi nikhaviherye muloko wa vanipuro ni muteko wa elapo yoothene wakhala wi mikhalelo sahu sinnaneemererya. Murummwa Paulo aaloca yeela mmukhalelo ola: “Muchu aachunaka ovaha, yoovaha awe eneemereriwa echarihaka yeeyo oryeiyeno ohiya yeeyo ohiryeiyeno.” (2 Kor. 8:4, 12) Yehova onnavaha esisapo yooveleela eri yoothene nnapakaahu ni murima ahu woothene, moohipwacha waakhanle wi hiyaance.—Mar. 12:42-44; 2 Kor. 9:7.

14. Mwawiiwanana ni Masiposipo 19:17, Yehova onoona hai nikhaviheryo nnaavahaahu anna ni arokora ahu oothoiwa?

¹⁴ Ninnamulapela Yehova vaavaa nnaakhaviheryaahu Akristu akhwiihu yaawo ari oothoiwa. Yehova aaroomeliha waareeliha Aisarayeli yaawo yooniherya oreera murima wa oohaawa. (Malam. 15:7, 10) Chiryene, ilukuluku soothene nnamukhaviheraahu munna naari murokora yoowo ori oothoiwa, Yehova onoona okhala ntoko yamahala wa yoowo. (Mwaalakhanye Masiposipo 19:17.) Ntoko yootakiherya, vaavaa Akristu o Filipi yaaruminhaaya yoovaha wa Paulo ari mukariposo, owo aaloca wi eyo yaari “mukucho waweemereryiwa woomuhakalaliha Muluku.” (Fil. 4:18) Nwuupuwele oothene a muloko anyu nave mwiikohe: ‘Apwanne ookhalavo muchu kineeraaka kimukhaviherye?’ Yehova onnahakalala vaava onanooneiye nipharihelaka elukuluku ahu, ikuru sahu, mavyakelo ahu, ni sookhalano sahu wi naakhaviherye yaale ari oothoiwa. Owo onnoona eyo okhala makupa a malapelo ahu.—Tiy. 1:27.

15. Malapelo eeparipari ennachuneya elukuluku ni wiilipixerya, nyenya ntakhara heeni ehiryaaya yoovelaveliha?

¹⁵ Malapelo eeparipari ennachuna elukuluku ni wiilipixerya. Nyenya tahi oovelaveliha. (1 Yoh. 5:3) Ntakhara heeni? Woona wi nnamulapela Yehova nthowa na omusivela. Mmwaanyiherye mwaana ori mmiravo yoowo onachuna waavaha echu apapa awe. Owo onanwerya omaliha iwora atesenyaaraka eruku ntakhara yaawo. Mwaana owo hakhalano ekeerelani nthowa na elukuluku omalinheiye atesenyaaraka eruku yeeyo. Owo oonnaasivela apapa awe nave ori oohakalala nthowa na waavaha yamahala yeela. Moolikana, nthowa na omusivela wahu Yehova, ninnahakalala opharihela elukuluku ni ikuru sahu wi nimulapele yoowo.

16. Mwawiiwanana ni Ahebri 6:10, Yehova onoona hai wiilipixerya nnapakaahu wi nimuhakalalihe yoowo?

¹⁶ Asitiithi oosivela hanaweherya waakhela yamahala emohamoha wa mwaana ti mwaana. Awo aasuwela wi mwaana ti mwaana toohiyana nave aakhalano mikalelo soohiyana. Moolikana Tiithi ahu a wirimu onniiwexexa mikhalelo sa mmoha ti mmoha a hiyo. Akhweya nyuwaano munnawerya opaka sincipale waapwaha  yaawo mwaasuwenlaanyu ni munaasivelaanyu. Naari nyuwaano himunawerya opaka sincipale ntoko akina anapakaaya, akhweya nthowa na iyaakha sanyu, okumi anyu, naari mirici sa veechokoni. Muhiceecheye. (Gal. 6:4) Yehova harwa acuwala muteko anyu. Wakhala wi munnavaha yeeyo munaweryaanyu ni mathowa aphaama, owo onamuhakalala. (Mwaalakhanye Ahebri 6:10.) Ophiyerya wi Yehova onnasuwela yeeyo mwaachunaanyu wi mpanke. Owo onachuna wi muhakalaleke ni musiveliweke ni malapelo yaawo munaweryaanyu omvaha yoowo.

17. (1) Wakhala wi ninnoona wi mikhalelo mikina sa malapelo ahu ti soovila, tiheeni nnaphwanelaahu weera? (2) Ti mwawiihai mukhaviheryen’yaanyu moorweela wa mukhalelo mmoha wooniheryiwe mu ekaaxa “ Mwaaceererye Ohakalala Wanyu?”

¹⁷ Tiheeni nnahaalaahu weera wakhala wi ninnoona okhala woovila wa hiyo weera ichu ikina seiyo nimanlaahu othookororya, ntoko omuhuserya Piipiliya ni olaleerya? Vaavaa nnapakaahu ichu seiha mwawuuluulela ti yawooneya wi nnahaala osivelikwaka ni seiho ni ophura vancipale orweela wa seiho. Nnanwerya olikanyiha malapelo ahu ni muteko mukina, ntoko ovyakiha mwiili naari wiikhoveleliha ni ekhankoonya yawiipano. Wakhala wi nnapaka yeeyo pahiru vanihikuni, hiniwerya wiikhoveleliha. Nyenya tiheeni enahaala weereya wakhala wi noolakelela weerano echu eyo nihiku ti nihiku? Woopaceryani, akhweya nnahaala opakaka yeeyo mu aminuutu vakhaani, nyenya ohoolo waya nnanwerya opakaka mu elukuluku yincipale. Vaavaa nnoonaahu sookhumelela saphaama sa wiilipixerya wahu, nnahaala woonaka ntoko wi elukuluku eyo yoovira mwawaakuveya nave nnahaala ohakalalaka vancipale. Emohamoha tho ennaphariheleya wa malapelo ahu.

18. Echu taani eri yoochuneya nnaphwanelaahu weera, nave tiheeni enahaala weereya wakhala wi noheerano?

¹⁸ Opaka owetha wahu wi nimulapele Yehova echu yoochuneyaxa yeeyo nnaphwanelaahu weera. Wakhala wi ninneerano yeela, nnahaala opuha okumi woohakalaliha ni okhalano ohakalala wa omulapela Yehova okhala wookhala. (Masi. 10:22) Vano hiyaano ninnakhalano murecele wa mmuupuweloni ntakhara noosuwela wi Yehova onnaakhaviherya alapeli awe vaavaa anakumanaayano makacamiho. (Isa. 41:9, 10) Mweeparipari hiyaano nookhalano mathowa aphaama a okhala oohakalala vaavaa nnamulapelaahu Tiithi ahu oosivela, yoowo ori oophwanelela ‘waakhela ncicimiho ni ivuwa’ orweela mwa soopatuxiwa sawe soothene!—Wup. 4:11.