1-2. Yehova akatsemera eriramya lyetu mughulu wahi?

 UKALENGEKANAYAKI omughulu ukowa ekinywa “eriramya”? Kwamuhwa ukalengekanaya oko mughala wetu oyukukamire akasaba n’erikania na Yehova embere sy’erighotsera. Kutse wanganalengekania oko kihanda ekiri n’obutseme omughulu w’erigha eBiblia.

² Omo mibere ibiri eyo, abosi abakanibweko bakakola amategheko w’eriramya. Yehova anemwendiligha eriramya lyabo? Akendilighalyo lyamabya irinahambene n’erisonda liwe kandi ryamabya irikakolawa omo lwanzo n’omwisikya. Twanzire Yehova yo kutsibu. Tunasi ngoko Iye yutolere eriramibwa, kandi twanzire itwamuramya omo nzira eyuwene kundu.

3. Tukendikania okuki omo mwatsi ono?

³ Omo mwatsi ono tukendikania oko muhanda w’eriramya owo Yehova abya alighire oko mughulu w’eBiblia kandi tukendilangira esyonzira munani esyo Yehova anzire itwamuramyamo munabwire. Omughulu tukendibya tukigha, obuli mughuma w’okwitwe anganalengekania ng’anguwania ati eriramya liwe. Tukendilebya kandi ekikaleka eriramya Yehova y’omo nzira y’ekwenene iryatuletera obutseme.

4. Abaramya ba Yehova ab’embere w’omughulu w’eKikristo mobakangania Yehova y’erisikya n’olwanzo lwabo bati?

⁴ Embere, oko mughulu w’eKikristo, abalume bataleghula  nga Abeli, Noa, Abrahamu, na Yobu mobakangania Yehova y’erisikya n’olwanzo. Bati? Babya bakowa oMungu, babya n’obwikirirya omw’Iye, kandi babya bakamuherera. EBiblia siyiritubwira obuli kindu ekyo babya batolere erikola omw’iramya lyabo. Aliwe mobakola ekyosi ekyo batoka erisikya Yehova, kandi eriramya lyabo molyamutsemesya. Enyuma syaho Yehova mwaha Abaisraeli b’emighambo erilabira Musa. Emighambo mbiri-mbiriri eyo yabyamo amakangirirya mangyi awalebirye eriramya Yehova omo nzira eyo abya alighire.

5. Enyuma sy’oluholo n’erilubuka lya Yesu mohabya syombinduka syahi omw’iramya ly’ekwenene?

⁵ Enyuma sy’oluholo n’erilubuka lya Yesu, Yehova mwaleka erisaba abandu erimuramya erikwamana n’emighambo eyo aha aBaisraseli. (Rom. 10:4) Mwasaba aBakristo erikwama emighambo mihya-mihya, “emigambo ya Kristo.” (Gal. 6:2) Bangakwamire “emighambo” eyi omw’ikwama eky’erileberyako kya Yesu n’erikwama amakangirirya wiwe, butsira omwihamba y’omo mutwe n’erikwama omutondekano w’ebyalayiro bingyi-bingyi. Munabwire, kutya, Abakristo bakayikasa kutsibu erikwama Kristo batoke eritsemesya Yehova n’eribana “eriluhuka omo mutima” ibibene-bene.​—Mat. 11:29.

6. Omwatsi ono angatuwatikya ati?

⁶ Omughulu tukakanaya oko buli mwatsi owalebirye eriramya lyetu, ubye ukayibulya uti, ‘Nabiriyikasa eryuwania omwatsi oyu erihika oko lulengo lwahi?’ Wanganayibulya kandi uti, ‘Nanganuwania emibere y’eriramya lyaghe?’ Wanganatsemera ebyo unemukola lino, aliwe kandi litolere iwasaba Yehova akuwatikaye erilangira ekyo wangatasyuwania kutsibu.

7. Yehova akalangira ati emisabe yetu eyikalua oko mutima?

⁷ Tukaramaya Yehova omughulu tukamusaba. Amasako akasosekanaya emisabe yetu n’obukwa obuteghekanibwe ndeke obwabya bukahererwa omo hema n’enyuma syaho omo hekalu. (Esy. 141:2) Obukwa obo ibukalwa kw’ekibeho ekyabya kikatsemesya oMungu. Kutya, emisabe yetu eyikalua oko mutima ni “butseme” okwiye, nomo twangakolesya ebinywa byolo-byolo. (Emi. 15:8; Ebi. 33:10) Tuwite ebikaleka ebikatukuna erikirirya ngoko kikatsemesaya omutima wa Yehova erituhulikirira tukamubwira ngoko tumwanzire kandi ngoko tukamusima. Anzire itwamubwira ebikatuhanga-hangaya, eriyiketera lyetu, n’ebyo tulaghireko. Embere sy’erikania na Yehova omo musabe, lyanganatolera iwatsuka walengekania oko ebyo ukendibugha. Erikola utya, iwamateghekanirya Tata waghu w’elubula y’“obukwa” obuwene kundu.

8. Tuwite akanya kahi akuwene ak’eripipa oMungu?

⁸ Tukaramaya Yehova omughulu tukamupipa. (Esy. 34:1) Tukapipa Yehova omughulu tukabwira abandi ngoko twanzire kandi ngoko tukatsemera emibere yiwe mibuya n’emibírí yiwe. Twamabibya n’omutima w’erisima itukandibya n’ebingyi by’eribugha tukapipa Yehova. Twamabiyihirira h’akatambi k’erilengekania buli oko mibírí mibuya ya Yehova​—oko byosi ebyo abiritukolera​—itukendibya n’ebingyi ebyangaleka itwamupipa. Omughulu tukatulira ni katambi akuwene kutsibu akeriha ‘eripipa lyetu ng’obuhere oko Mungu, kandi emirenge yetu ipipe erina liwe.’ (Ebr. 13:15) Ngoko linatolere itwalengekania ndeke oko ebyo tukendibugha embere  sy’erikania na Yehova omo musabe, kutya litolere itwalengekania kutsibu oko ebyo tukendikania n’abo tukendihindana nabo omo mubírí w’eritulira. Twanzire “obuhere bw’eripipa” bwetu ibwabya obuwene kundu. Ekyo kikaleka itwabwira abandi b’ekwenene erilua oko mutima.

9. Ng’Abaisraeli ba kera, tukabana endundi yahi omwihindana haghuma? Ulete eky’erileberyako kyaghu-kyaghu.

⁹ Tukaramaya Yehova omughulu tukaya oko mihindano. Abaisraeli ba kera mobahabwa ekyalayiro kino: “Engendo isatu oko mwaka, abalume bawe bosi basyahuluka embere sya Yehova oMungu wenyu aho asyayisoga.” (Ebi. 16:16) Ibakasighanaya amanyumba n’amalima wabo butsira mundu w’eribiteya. Aliwe Yehova mwalaghabo ati: “Sihali oyo wasyarumwa oko kihugo kyawe omughulu ukahetuka erihuluka embere sya Yehova oMungu wawe.” (Eri. 34:24) Kundi Abaisraeli babya bayiketere Yehova yo kundu, mobabya bakaya oko mihindano eyo y’obuli mwaka. Ekyo mokyaleka ibabana ebihembo bingyi; mobaminya eMighambo y’oMungu yo ndeke, mobalengekania buli oko myatsi mibuya eyo Yehova abya akabakolera, kandi mobatsemere erilabya endambi haghuma n’abandi abanzire Yehova. (Ebi. 16:15) Netu tukabana emiyisa eyiri ng’eyo omughulu tukakola ekyosi ekyo twangatoka eriya oko mihindano y’eKikristo. Kandi ulengekanaye ngoko Yehova akatsema omughulu tukaleta ekisubiryo kikuhi ekiteghekanibwe ndeke.

10. Busanaki erimba ni kitswe ky’omughaso omw’iramya lyetu?

¹⁰ Tukaramaya Yehova omughulu tukimba haghuma. (Esy. 28:7) Abaisraeli ibakalangira erimba mo kitswe ky’omughaso omw’iramya lyabo. Omwami Dawidi mwahiraho aBalawi 288 eribya bakimba omo hekalu. (1 Emy. 25:1, 6-8) Munabwire, twanganakangania oMungu y’olwanzo lwetu omughulu tukimba esyonyimbo sy’erimupipa. Sibughambu litolere itwatsuka eribya n’omulenge mubuya imotwatoka erimba. Ulengekanaye okw’iringilirania lino: Omughulu tukabugha, “itwe bosi tukatala omo bingi,” aliwe ekyo sikiritukakiraya eribugha omo ndeko n’omo mubírí w’eritulira. (Yak. 3:2) Kutya, twanganalola embere erimba esyonyimbo sy’eripipa Yehova, nomo twanganalengekania nga situlimba ndeke.

11. Ngoko kisakirwe omo Esyonyimbo 48:13, busanaki litolere itwayihirira h’endambi y’erigha eBiblia omo kihanda?

¹¹ Tukaramaya Yehova omughulu tukigha eKinywa kiwe n’erikikangirirya abana betu. Ekiro kye Sabato aBaisraeli ibakaleka emibírí yabo y’obuli kiro n’eryo ibakakolesaya ekiro ekyo eriwatya obwira bwabo haghuma na Yehova. (Eri. 31:16, 17) Ababya batalegula omw’ibo ibakakangiriraya abana babo eriminya Yehova n’emibírí yiwe mibuya. Netu munabwire, litolere itwayihiriraho endambi y’erisoma n’erigha eKinywa ky’oMungu. Ekyo ni kitswe ky’okw’iramya lyetu, kandi kikatuwatikaya eriyitunda hakuhi na Yehova. (Esy. 73:28) Kandi omughulu tukigha haghuma omo kihanda, twanganawatikya olulengo luhya-luhya​—abana betu​—erikulya obwira obuwatire haghuma na Tata wetu w’elubula.​—Soma Esyonyimbo 48:13.

12. Eriminya ngoko Yehova abya akalangira omubírí ow’ababya bakakokotya ebindu by’omo hema lyamatwighisyaki?

¹² Tukaramaya Yehova omughulu tukahimba n’erisugha emyanya y’eriramiryamo. EBiblia yikabugha yiti omubírí w’erihimba ehema n’erihiramo ebindu abya “mubiri abuyirire.” (Eri. 36:1, 4) Na munabwire, Yehova akalangira omubírí w’erihimba eBisenge by’oBwami n’eyindi myanya y’eKiteokrasi mo mubírí  abuyirire. Abaghala n’abali betu balebe bakalabaya endambi nene bakakola emibírí eyo. Tukatsemera kutsibu omubírí w’omughaso munene oyo ow’akakolawa busana n’oBwami. Kwenene, bakakola n’oko mubírí w’eritulira. Nibya abaghuma ba kubo bakananza eribya bapainia. Abasyakulu b’endeko banganakangania ngoko bakawatikaya oko mubírí w’obuhimbe omwilighira abaghala n’abali betu abakakola kutsibu abo eribya bapainia omughulu bamatolera. Nomo twangabya itwasi obuhimbe kutse iyehe, itwe bosi twanganasangira oko mubírí w’eryerya n’erikokotya emyanya eyo.

13. Litolere itwalangira tuti ebihembo ebyo tukateka eriwatikya omubírí w’oBwami?

¹³ Tukaramaya Yehova omughulu tukawatikaya omubírí w’oBwami erilabira ebihembo byetu. Abaisraeli si babya batolere erihulukira embere sya Yehova yo byala bisa. (Ebi. 16:16) Lyabya litolere ibaleta ekihembo ky’ekindu kilebe erikwamana n’ekyo bangatokire eriteka. Omo nzira eyo, mobakangania ngoko babya n’erisima oko byosi ebyo Yehova abya akabakolera. Netu twangakangania tuti ngoko twanzire Yehova kandi ngoko tutsemere ebyosi ebyo Yehova akatukolera? Enzira nguma ly’eriteka esyofranga esy’eriwatikya endeko yetu n’omubírí w’omo kihugho kyosi erikwamana n’emibere eyo tulimo. Omukwenda Paulo mwahandikakyo atya: “Mwamabya n’omuhwa w’erihitya, oMungu akaliga ebyo mundu awite, butsira ebyo atawite.” (2 Kor. 8:4, 12) Yehova akatsemera ebyosi ebyo tukateka erilua oko mutima, nomo byangabya isi bingyi.​—Mar. 12:42-44; 2 Kor. 9:7.

14. Erikwamana n’Emisyo 19:17, Yehova akalangira ati obuwatikya obo tukaha abaghala betu abali omo bwagha?

¹⁴ Tukaramaya Yehova omughulu tukawatikaya Abakristo balikyetu abali omo bwagha. Yehova mwalagha ati akasyaliha aBaisraeli ababya bakakangania abera b’olukogho. (Ebi. 15:7, 10) Inga, obuli ndambi eyo tukawatikaya oMukristo mulikyetu oyuli omo bwagha, Yehova akalangira ekyo mo kihembo ekyo tukamuha. (Soma Emisyo 19:17.) Eky’erileberyako, omughulu Abakristo be Filipi batumira Paulo y’ekihembo iniane omo muliki, mwabugha ati ni “buhere obutolere, obukatsemesaya oMungu.” (Flp. 4:18) Ulengekanaye oko abali omo ndeko yaghu neryo uyibulaye, ‘Hane omundu mulebe oyo nanganawatikya?’ Yehova akatsema omugulu akatulangira tukakolesya endambi yetu, akaghala ketu, obutoki bwetu, n’ebindu byetu busana n’eriwatikya abali omo bwagha. Akalangira ekyo mo kitswe ky’okwiramya lyetu.​—Yak. 1:27.

15. Nomo eriramya ly’ekwenene likanasaba endambi n’akaghala, aliwe busanaki si muheke alitohire?

¹⁵ Eriramya ly’ekwenene likasaba endambi n’akaghala. Aliwe si mwatsi alitohire. (1 Yoa 5:3) Busanaki? Kundi tukaramaya Yehova busana n’olwanzo lwetu okwiye. Ulengekanaye oko mwana mulere oyo wanzire eriha tata wiwe ekindu kilebe. Anganalabya endambi nene akadesa epitsa busana na tata wiwe. Omwana oyo syaliyikubaya bomo busana n’endambi eyo alyalabaya. Anzire tata wiwe, kandi ali n’obutseme bw’eriha tata wiwe y’ekihembo ekyo. Ko bine bitya n’okw’itwe, busana n’olwanzo lwetu oko Yehova, tukabya n’obutseme omughulu tukakolesya endambi n’akaghala ketu busana n’eriramya Yehova.

16. Erikwamana n’Abaebrania 6:10, Yehova akayowa ati busana n’eky’obuli mughuma w’okw’itwe akakola busana n’erimutsemesya?

¹⁶ Ababuti b’olwanzo sibalirindirira bati obuli mwana wabo akendibaha ekihembo  ky’omuhanda mughumerera. Banasi ngoko obuli mwana syasosire oghundi omo ebyo angatoka erikola. Kutya, Tata wetu w’elubula anasi ekyo obuli mughuma w’okwite angatoka erikola. Kwamuhwa wanganakola bingyi kulenga abangyi abo wasi n’abo wanzire. Kutse wangataluka erikola ebingana n’ebyo abandi bakakola, kwamuhwa busana n’erikekeluha, omubiri eryoloba, kutse busana n’omuheke w’erisugha ekihanda. Isiwabunika mutima. (Gal. 6:4) Yehova syendisyibirirwa omubírí waghu. Wamabya iwunemukola ekyosi ekyo wangatoka kandi busana n’ekikaleka ekyuwene, akasyakutsemera. (Soma Abaebrania 6:10.) Nibya Yehova akalangira ekyo wanzire erikola. Anzire iwatsemera ebyo wangatoka erikola utoke erimuramia.

17. (a) Twamalangira omwatsi mulebe owalebirye eriramya lyetu iniakalire, twangakolaki? (b) Wabiriwatikibwa wuti n’omughuma w’oko myatsi eyikanganibwe omo kasanduku “ Ubye n’obutseme bunene”?

¹⁷ Twangayira tuti kyamatukalako erikola omughuma w’oko myatsi eyo twamakaniako, ng’eriyighisya eBibliia kutse eritulira? Twamabibya tukakola emyatsi eyi yo kangyi-kangyi itwanganatsemerayo kutsibu n’eribana muyo mw’endundi nene. Twanganasosekania eriramya lyetu n’omubírí mulebe, ng’amasata w’erikalya-kalya omubiri kutse erigha eriwata ekiri ng’ekidali kutse erikembe. Twamabya tukayibegherya kaghuma-kaghuma isitwendilola embere omo mubírí oyo. Aliwe byangabya biti twamabiyisogha eribya tukakolagho obuli kiro? Oko nzuko, kwamuhwa itwanganayibegherya obuli ndambi omo syodakika nge, nikwa itwanganabya tukatomeka esyodakika n’erilabya mughulu muli. Omughulu tukalangira ebighuma ebyuwene by’eriyikasa lyetu, itwanganabya tukalindirira emighulu eyo n’obutseme kundu. Ko bine bitya n’oko mwatsi owalebirye eriramya lyetu.

18. Tukaberereraya tuti ekikaleka itwabyaho, kandi kikatuletera ebighuma byahi?

¹⁸ Tukaberereraya ekikaleka itwabyaho omwiramya Yehova erilua oko mutima. Twamabikola tutya, itukendibya n’engebe y’obutseme n’eyiwite omughaso kandi itukendibya n’eriyiketera ly’erisyaramya Yehova yo kera na kera. (Emi. 10:22) Lino tukayowa omo buholo kundi twasi ngoko Yehova akawatikaya abakamuramaya omughulu bakalaba omo maligho. (Isa. 41:9, 10) Kwenene tuwite ekikaleka eky’eribya n’obutseme omughulu tukaramaya Tata wetu w’olwanzo, oyutolere “eribana olukengerwa n’erisikya” erilua oko bihangikwa biwe byosi!​—Erib. 4:11.