1-2. Khuyini okuzokwenza ukulotjha kwethu kwamukeleke kuJehova?

 KHUYINI ekufikelako nawuzwa igama elithi, “ukulotjha”? Mhlamunye ufikelwa sithombe somfowethu ozithobileko oguqe hlanu kombhedakhe, athululela isifuba sakhe kuJehova. Mhlamunye ucabanga ngomndeni othabileko ozimiseleko ukuya esifundweni sawo seBhayibheli.

² Eengcenyeni ezimbilezi, boke abantwaba benza izenzo zokulotjha. Inga-kghani uJehova uzokwamukela ukulotjha kwabo? Uzokwamukela nangabe kukhambisana nomnqophwakhe begodu kwenziwa ngethando nangehlonipho. Simthanda khulu uJehova. Siyazi bona ufanele ukulotjhwa begodu sifuna isipho sethu sokumlotjha kube ngileso esikhamba phambili.

3. Sizokucoca ngani esihlokwenesi?

³ Esihlokwenesi, sizokuqalisisa iindlela zokulotjha zekadeni uJehova ebekazamukela, sicoce nangeendlela ezibu-8 zokulotjha uJehova azamukelako namhlanjesi. Njengombana senza njalo, sizokucabangisisa ngendlela esingathuthukisa ngayo ukumlotjha kwethu. Sizokubona nokuthi kubayini ukulotjha uJehova ngendlela efaneleko kusithabisa.

4. Iinceku zakaJehova zangeenkhathi zangaphambi kobuKrestu zayitjengisa njani ihlonipho nethando ngoJehova?

⁴ Eenkhathini zangaphambi kobukrestu, amadoda athembekileko njengo-Abela, uNowa, u-Abrahama noJobe atjengisa ukuba nethando nehlonipho ngoJehova. Njani? Ngendlela abamlalela ngayo, ngokukholwa kwabo nangokuzidela  kwabo. IBhayibheli alinikezi imininingwana yokuthi bebamlotjha njani kodwana benza koke okusemandlenabo bona badumise uJehova begodu wakwamukela ukulotjha kwabo. Ekukhambeni kwesikhathi, uJehova wanikela iinzukulwana zaka-Abrahama umThetho kaMosi. Imithetho emilandelande le, beyifaka hlangana iinqophiso zendlela yokulotjha uJehova ayamukelako.

5. Ngiliphi itjhuguluko elenziwako ekulotjheni kweqiniso ngemva kokufa nokuvuswa kwakaJesu?

⁵ Ngemva kokufa nokuvuswa kwakaJesu, uJehova akhenge asafuna bona kulandelwe umThetho kaMosi. (Rom. 10:4) AmaKrestu besekufuze alandele umthetho omutjha, “umthetho kaKrestu.” (Gal. 6:2) Bekazokulandela “umthetho” lo, ingasi ngokuwubamba ngehloko namkha alandele irhelo elide lezinto ekufuze azenze nekungakafuzi azenze kodwana ngokulingisa isibonelo sakaJesu nangokulandela ifundiswakhe. Nanamhlanjesi, amaKrestu enza kuhle ngokulandela uKrestu bona athabise uJehova begodu ‘azifumanele ukuphumula’.—Mat. 11:29.

6. Isihlokwesi sizosizuzisa njani?

⁶ Njengombana sicoca ngengcenye ngayinye yokulotjha kwethu, zibuze, ‘Ngiyiphi ituthuko esele ngiyenzile endabeni le?’ Ungazibuza godu, ‘Inga-kghani ngingathuthukisa indlela engilotjha ngayo?’ Kungenzeka kuyakuthabisa ukubona ituthuko oyenzileko kodwana kufuze ubawe uJehova akusize ubone lapho ongathuthukisa khona khulu.

7. UJehova uyiqala njani imithandazo esuka ehliziyweni?

⁷ Nasithandazako sisuke silotjha uJehova. Imitlolo imadanisa imithandazwethu njengetjhwalo elilungiselelwe kuhle ebelinikelwa etabernakele namkha ekukhambeni kwesikhathi ethempelini. (Rhu. 141:2) Itjhwalelo belikhupha umnuko omnandi ebewuthabisa uZimu. Ngendlela efanako, Imithandazwethu ‘ithokozisa’ uZimu ngitjho nanyana sisebenzisa amagama abulula. (IzA. 15:8; Dut. 33:10) Sinamabanga amahle wokukholelwa bona kuyamthokozisa uJehova ukusizwa siveza indlela esimthanda ngayo nesimthokoza ngayo. Ufuna simtjele izinto ezisitshwenyako, amathemba esinawo neemfiso zethu. Ngaphambi kobana sikhulume noJehova ngomthandazo kubayini singacabangisisi ngalokho esizokutjho? Nasenza njalo, sizokunikela ‘itjhwalo’ elihle khulu eliya kuBabethu wezulwini.

8. Ngimaphi amathuba amahle esinawo wokudumisa uZimu?

⁸ Silotjha uJehova lokha nasimdumisako. (Rhu. 34:2) Sidumisa uJehova ngokutjela abanye ngemisebenzakhe nangobuntu bakhe obuhle. Nasimthokozako uJehova zinengi khulu izinto ezihle esizozikhuluma ezisuka ehliziyweni. Nasizipha isikhathi sokucabangisisa ngobuhle bakaJehova nangazo zoke izinto ezihle asiphe zona, angeze saphelelelwa mabanga wokumdumisa. Umsebenzi wokutjhumayela usinikela ithuba elihle lokunikela “uZimu umhlatjelo wokudumisa, okutjho, isithelo seendebe zethu ezivuma tjhatjhalazi ibizo lakhe.” (Heb. 13:15) Njengombana sicabangisisa kuhle ngalokho esizokutjho ngaphambi kokukhuluma noJehova ngomthandazo, sizabe senza kuhle nasicabangisisa ngalokho esizokutjho kilabo esihlangana nabo emsebenzini wokutjhumayela. Sifuna “umhlatjelo wokudumisa” ube ngophuma phambili. Sikhuluma ngokusuka ehliziyweni nasicoca nabanye ngeendaba ezimnandi.

9. Njengama-Israyeli wekadeni, sizuza njani ngokuba khona emhlanganweni? Sitjela ngokuhlangabezane nakho kwakho.

 ⁹ Silotjha uJehova lokha nasiya emhlanganweni. Ama-Israyeli wekadeni watjelwa bona: “Kathathu ngomnyaka boke abaduna benu bavele phambi kwakaSomnini uZimenu endaweni azayikhetha.” (Dut. 16:16) Bekufuze batjhiye imizabo neentjalo zabo zingakatjhejwa kodwana uJehova wabathembisa bona: “Akunamuntu ozarhalela inarhenu lokha naniyokuvela kathathu ngomnyaka phambi kwakaSomnini uZimenu.” (Eks. 34:24) Ngokukholwa kuJehova, ama-Israyeli ebekasaba uZimu bekaya eminyanyeni yaqobe mnyaka. Ngaphezu kwalokhu bebafumana iimbusiso; bakhulisa ilwazi labo ngomThetho kaZimu bacabangisisa ngobuhle bakhe begodu bathabele kukhuthazwa kukuba nabafowabo nabodadwabo. (Dut. 16:15) Nathi sifumana iinzuzo ezifanako nasizidela bona siye emihlanganweni yobuKrestu. Cabanga godu nangokuthi kumthabisa kangangani uJehova ukusibona sizilungiselela ukunikela ngeempendulo ezakhako ebandleni.

10. Kubayini ukuvuma kuyingcenye eqakathekileko yokulotjha kwethu?

¹⁰ Silotjha uJehova lokha nasimvumela ingoma nabafowethu nabodadwethu. (Rhu. 28:7) Ama-Israyeli bekaqala ukuvuma njengengcenye eqakatheke khulu yokulotjha kwawo. IKosi uDavida yanikela amaLevi ama-288 isabelo sokubhina ethempelini. (1 Kron. 25:1, 6-8) Namhlanjesi, sitjengisa indlela esimthanda ngayo uZimethu lokha nasibhina iingoma zokumdumisa. Indlela amaphimbwethu azwakala ngayo nasibhinako akusiyinto eqakatheke khulu. Akhucabange nganakhu: Nasikhulumako, “soke siyatjhapha iinkhathi ezinengi” kodwana lokho akusikhandeli bona sikhulume ebandleni nalokha nasitjhumayelako. (Jak. 3:2) Ngendlela efanako, akukafuzi sivumele ukutshwenyeka ngebanga lesono esinaso bona kusivimbele singakhuphi amaphimbwethu sidumise uJehova ngokuvuma.

11. Njengombana kutjho IRhubo 48:13, kubayini kufuze sibe nesikhathi sokufunda iBhayibheli njengomndeni?

¹¹ Silotjha uJehova lokha nasifunda iliZwi lakhe besifundise nabantwana bethu ngaye. ISabatha belinikela ama-Israyeli ithuba lokubekela ngeqadi izinto ebebazenza qobe, badzimelele ekuthuthukiseni ubuhlobo babo noJehova. (Eks. 31:16, 17) Labo ebebanokukholwa hlangana nabo bebafundisa abantwana babo ngoJehova nangobuhle bakhe. Nathi ngokwethu kufuze sibekele ngeqadi isikhathi sokufunda nokucabangisisa ngeliZwi lakaZimu. Lokhu kuyingcenye yokulotjha kwethu uJehova begodu kuyasiza bona sitjhidelane naye. (Rhu. 73:28) Nasifunda ndawonye njengomndeni singasiza abasesebatjha, abentwana bethu bona babe nobuhlobo obufuthumeleko noBabethu onethando weZulwini.—Funda IRhubo 48:13

12. Khuyini esiyifundako endleleni uJehova aqala ngayo umsebenzi walabo abakha itabernakeli?

¹² Silotjha uJehova lokha nasakha besitlhogomele iindawo zokumlotjha. IBhayibheli lithi, umsebenzi wokwakha itabernakeli nokulilungisa bekumsebenzi ‘ocwengileko.’ (Eks. 36:1, 4) Nanamhlanjesi, uJehova usaqala umsebenzi wokwakha amaWolo womBuso neminye imisebenzi yemakhiwo yehlangano njengemisebenzi ecwengileko. Abanye abafowethu nabodadwethu baba nesikhathi esinengi benza imisebenzi le. Kghani asiyithokozi imisebenzi emihle yomBuso le? Kwamambala siyayithokoza, godu baba nengcenye emsebenzini wokutjhumayela. Abanye babo kungenzeka bafune nokuba maphayona. Abadala bangasekela imisebenzi yokwakha le  ngokuthi bangariyadi nakufuze bavumele abodadwethu nabafowethwaba bona babe maphayona. Akunandaba bona sinamakghono wokwakha namkha awa, soke singabanengcenye ekwenzeni imakhiwo le ihlwengeke begodu ihlale isebujamweni obuhle.

13. Kufuze siyiqale njani iminikelo esiyenzako bona sisekele umsebenzi womBuso?

¹³ Silotjha uJehova lokha nasisekela umsebenzi womBuso ngeminikelwethu. Ama-Israyeli bekungakafuzi avele phambi kwakaJehova angakaphathi litho. (Dut. 16:16) Bekufuze aphathe izipho kuye ngobujamo bawo. Ngokwenza njalo bekatjengisa bona amthokoza kangangani uJehova ngamalungiselelo awenzileko bona azuze kiwo. Singatjengisa njani ukuthi siyamthanda uJehova besiyawathokoza amalungiselelo awenzileko bona sibe nobuhlobo obuhle naye. Enye indlela esingakwenza ngayo lokhu kunikela ngeemali ebandleni esikilo kunye nemsebenzini wephasini loke kuye ngokobujamo bethu. Umpostoli uPowula wathi: “Nangabe ukulungela kukhona qangi, kwamukeleka ngokukhethekileko ngokwalokho umuntu anakho, ingasi ngokwalokho umuntu anganakho.” (2 Kor. 8:4, 12) UJehova uyayithabela iminikelo esuka ehliziyweni esimenzela yona, akunandaba bona mincani kangangani.—Mar. 12:42-44; 2 Kor. 9:7.

14. NgokwezAga 19:17, uJehova uliqala njani isizo esilinikela abafowethu nabodadwethu abatlhogako?

¹⁴ Silotjha uJehova lokha nasisiza amanye amaKrestu esikunye nawo. UJehova wathembisa ukubuyisela ama-Israyeli ebewatjengisa umusa kilabo abatlhagako. (Dut. 15:7, 10) Isikhathi ngasinye lokha nasisiza umfowethu namkha udadwehu otlhagako, uJehova uqala lokho njengesipho esiya kuye. (Funda IzAga 19:17.) Ngokwesibonelo, lokha amaKrestu weFilipi nakathumela isipho kuPowula obekasibotjhwa wathi, lokho ‘kumhlatjelo owamukelekako, omthabisa khulu uZimu.’ (Flp. 4:18) Akhuqale ebandlelni okilo bese uzibuza naku umbuzo, ‘Inga-kghani ukhona otlhogako engingamsiza?’ Kumthabisa khulu uJehova nakasibona sisebenzisa isikhathi sethu, amandlethu, amakghonwethu nezinto zethu eziphathekako ukusiza labo abatlhogako. Lokho ukuqala njengengcenye yokumlotjha.—Jak. 1:27.

15. Ukulotjha kwamambala kutlhoga siziphe isikhathi begodu sizimisele kodwana kubayini kungasimthwalo?

¹⁵ Ukulotjha kwamambala kutlhoga isikhathi sethu nokuzimisela kodwana akusimthwalo. (1 Jwa. 5:3) Kubayini sitjho njalo? Kungombana silotjha uJehova ngombana simthanda. Cabanga ngomsanyana ofuna ukunikela ubabakhe isipho. Lingaba nesikhathi esinengi limdwebela isithombe kodwana alizisoli ngesikhathi elibe naso lidweba isithombeso. Liyamthanda ubabakhe begodu kuyalithabisa ukumnikela isiphweso. Ngendlela efanako, ngebanga lokuthi siyamthanda uJehova kuyasithabisa ukusebenzisa isikhathi sethu namandlethu bona simlotjhe.

16. NgokwamaHebheru 6:10, uJehova uyiqala njani imizamwakho yokumthabisa?

¹⁶ Ababelethi abanethando abalindeli ukufumana isipho esifanako kibo boke abantwana babo. Bayazi ukuthi umntwana ngamunye uhlukile begodu ubujamo nobujamo abufani. Ngendlela efanako uBabethu wezulwini uyazwisisa bona sinobujamo obungafaniko. Kungenzeka kunengi ongakwenza, wenzele labo obathandako nobaziko. Mhlamunye uyafisa ukubenzela  okunengi kodwana ngebanga leminyakakho, ubujamo bepilo namkha imithwalo yokutlhogomela umndeni, awukghoni. Ungapheli amandla. (Gal. 6:4) UJehova angeze awukhohlwe umsebenzakho. Nawuragela phambili umnikela okusemandlenakho begodu uneenhloso ezihle lokho kuzomthabisa. (Funda amaHebheru 6:10.) UJehova ubona iinsusa ezisehliziywenakho. Ufuna uthabe begodu waneliswe kumlotjha ukghone ukumnikela okusemandlenakho.

17. (a) Nasifumana ezinye iingcenye zokulotjha kwethu kubudisi ukuzenza, ngimaphi amagadango esingawathatha? b) Ikusize njani ingcenye ethileko yokulotjha oyifumene ebhoksini elithi, “ (Ngezelela Phezu Kwethabo Lakho”?

¹⁷ Kuthiwani nasikufumana kubudisi ukuhlanganyela eengcenyeni ezithileko zokulotjha, njengokuba nesifundo somuntu mathupha namkha ukutjhumayela tjhatjhalazi? Sizokufumana ukuthi nasihlanganyela kanengi emisebenzini le, sizokukghona ukuyithabela begodu sizuze kiyo. Singamadanisa ukulotjha kwethu nezinye izinto ezithileko, njengokubandula umzimba namkha ukuzibandululela ihlobo elithileko lombhino. Nasingazibanduli qobe, angeze saphumelela kodwana akhe sithi siqunta ukuzibandula qobe lilanga. Singathoma kancani siye ngokuya singezelele isikhathi sethu sokuzibandula. Nasibona imiphumela emihle yokuzimisela, lokho kuzosenza sikuthabele esikwenzako besikhulise nesikhathi sethu sokuzibandula. Kghani sele ubona ukuthi isibonelwesi singasisebenzisa njani ekulotjheni kwethu uJehova?

18. Khuyini okuqaketheke khulu esingakwenza begodu sizokufumana muphi umphumela?

¹⁸ Ukulotjha uJehova kuyinto eqakatheke khulu esingayenza. Umphumela walokho, sizokuba nethabo begodu sibe nokuphila okunomnqopho, sibe nethemba ngombana sizokulotjha uJehova ngokungapheliko. (IzA. 10:22) Sele sinokuthula emkhumbulweni ngombana siyazi ukuthi uJehova uyabasiza abamlotjhako abaqalana nemiraro. (Isa. 41:9, 10) Sinamabanga amahle khulu wokuhlala sithabile ngombana silotjha uBabethu onethando ofanelwe ‘kukwamukela iphazimulo, idumo namandla’ okuvela kiyo yoke indalwakhe!—IsAm. 4:11.