1-2. N’cinji cingacitishe kuti kulambila kwasu kunkhale kovomelezhyeka kwa Yehova?

 KANSI n’cinji cuwela m’maganizo mwanu mukamvwa mau akuti “kulambila”? Payakine muganizila za mkwasu wamene wagwada pafupi na bedi yake ndipo opemphela mofumila pansi pamtima. Olo payakine muganizila za banja yacimwemwe yamene yuphunzila Baibo mosamala pa kulambila kwa pabanja.

² M’visanzo vonse viŵili, zinthu zakucita ŵanthu aŵa ni kulambila. Kansi Yehova angavomelezhye kulambila kwao? Eee angavomelezhye, ngati n’kokatizhyana na cifunilo cake koma soti ngati n’kosonkhezelewa na cikondi koma soti ulemu kwa yove. Tumukonda ngako Yehova ndipo tuziŵa kuti ni woyenelela kulambiliwa. Tetyo, tucita zilizonse zatingakwanishe kuti tikomulambila m’njila yovomelezhyeka.

3. Kansi tilaŵizhyane cinji m’nkhani ino?

³ M’nkhani ino, tione kulambila kwamene Yehova enzovomelezhya m’nthawi zakale, na vinthu 8 vatucita polambila Yehova m’njila yovomelezhyeka. Tilaŵizhyane soti vifukwa vamene vucitisha kuti tinkhale acimwemwe ngati tulambila Yehova m’njila yovomelezhyeka. Patucita izi, tiyeni tiyeseyese kuganizila mbali zatufunika kuongolela.

4. Kansi atumiki a Yehova akale eonesha tyani kuti enzokonda Yehova nomulemekeza?

⁴ M’nthawi zakale, analume okhulupilika monga Abele, Nowa, Abulahamu na Yobu eonesha kuti enzokonda Yehova nomulemekeza. Ecita izi mwa kupeleka nsembe, kumumvwila na kumukhulupilila. Baibo yutiuzhya lini zonse zeenzocita polambila Yehova. Koma n’zoonekelatu kuti enzocita zilizonse  zaangakwanishe kuti amukondweleshe ndipo yove evomelezhya kulambila kwao. M’kuluta kwa nthawi, Yehova epeleka malamulo kuli Aisiraeli kupitila mwa Mose. M’malamulo aya, mwenze malangizo yosapita m’mbali yokhuza zeenzofunika kucita pomulambila.

5. Pavuli pakuti Yesu wafwa noukishiwa, kansi penkhala masinthidwe otyani okhuza molambilila Yehova?

⁵ Pavuli pakuti Yesu wafwa noukishiwa, Yehova enzoyembekezela lini soti kuti Akhristu oyambilila akokonkha Cilamulo ca Mose pomulambila. (Aro. 10:4) M’malo mwake, enzofunikila kukonkha cilamulo calomba cameme ni “cilamulo ca Khristu.” (Aga. 6:2) Izi zenze zosiyana ngako na mwezenzele kale. Mwacisanzo, Aisiraeli enzofunika kuloŵeza pamtima mau a m’cilamulo nooneshesha kuti okonkha malamulo onse enzemo. Koma Akhristu a m’vyaka 100 voyambilila enzofunika kutolela cisanzo ca Yesu nokonkha zinthu zeciphunzisa. Molingana na izi, masiku ŵano, Akhristu okonkha cilamulo ca Khristu pofuna kukondwelesha Yehova na kuti ‘asisimuliwe.’—Mat. 11:29.

6. Kansi tufunika kucitanji kuti tipindule na nkhani ino?

⁶ Patulaŵizhyana zinthu zatufunika kucita polambila Yehova, zikonsheni kuti: ‘Kansi nucita tyani pa mbali iyi? Kansi pali mbali zanufunika kuongolela kuti Yehova akovomelezhya kulambila kwangu?’ N’cendi kuti mufunika kusangalala na zamukwanisha kucita pali lomba. Koma mufunika kusenga Yehova kuti akuyavyeni kuona mbali zamufunika kuongolela.

7. Kansi Yehova akumvwa tyani ngati tupemphela mofumila pansi pamtima?

⁷ Tulambila Yehova ngati tupemphela. Malemba yolinganizhya mapemphelo ŵasu na zofukiza zamene Aisiraeli enzopeleka ku cihema, ndipo epitilizhya kucita izi olo pavuli pakuti amanga kacisi. (Sal. 141:2) Zofukiza izi, zenzocosa kafungo konunkhila kamene kenzonkhazika pansi mtima wa Yehova. Molingana na izi, Yehova ‘osangalala ngako’ na mapemphelo ŵasu ofumila pansi pamtima olo kuti yangankhale yacidule. (Miy. 15:8; Deut. 33:10) Ndipo tukaikila lini kuti okondwela ngako ngati tumuuzhya mwatumukondela nomuyamikila pa zinthu zabwino zakuticitila. Yove ofuna kuti tikomufotokozela nkhaŵa zasu, zinthu zatuyembekezela na zinthu zatulakalaka. Koma tikaliyoyamba kupemphela, tingacite bwino kuganizilatu zinthu zati tilaŵile m’pemphelo yasu. Kucita izi, kungatiyavye kuti tikopeleka “zofukiza” zonunkhila bwino kuli Ausuwasu akululu.

8. Kansi tingamutamande tyani Mulungu?

⁸ Tulambila Yehova ngati tumutamanda. (Sal. 34:1) Ndipo tuonesha kuti tumutamanda ngati tuuzhyako ayakine zokhuza minkhalidwe yake na mphamvu zake. Ngati tupatula nthawi yosinkhasinkha pa zinthu ziweme zakuticitila Yehova, tingonkhala na zinthu zinyinji zatingamuyamikile m’mapemphelo ŵasu. Ndipo ngati tuyamikila zinthu zabwino zakuticitila, tingosoŵa lini zinthu zatingauzhyeko ayakine zokhuza yove. Nchito yolalikila yutipasa mwai ‘wopeleka kwa Mulungu nsembe zacitamando, zamene ni vitwalo va milomo yasu.’ (Aheb. 13:15) Monga ni mwazilili kuti tufunika kukonzekela zati tilaŵile kwa Yehova, tufunika kukonzekelelatu zinthu zati tikalaŵile tikaluta mu ulaliki. Tufuna kuti ‘nsembe zasu zacitamando’ zikonkhala ziweme ngako. Niye cifukwa cake ngati tulalikila, tuyesayesa kulaŵila m’njila yofwika ŵanthu pamtima.

9. Molingana na Aisiraeli, kansi nase tupindula tyani ngati tupezeka pa misonkhano? Fotokozani mwamupindulila mweo pamweka.

⁹ Tulambila Yehova ngati tupezeka pa misonkhano. Aisiraeli enze euzhyiwa kuti:  “Munalume aliyense pakati panu akoonekela pamenso pa Yehova Mulungu wanu, katatu pa caka, pa malo yati akasankhe Mulungu.” (Deut. 16:16) Kucita izi, cenze lini cipepu cifukwa enzofunika kusiya mang’anda ŵao na minda zao paliye munthu woziteteza. Koma Yehova eŵalonjeza kuti: “Paliye aliyense wati akokumbwila calo canu ngati mwaluta kuyoonekela pamenso pa Yehova Mulungu wanu.” (Eks. 34:24) Cifukwa cakuti enzodalila Yehova na mtima wonse, Aisiraeli enzopezeka pa vikondwelelo vonse va pa caka. Kucita izi kwenzoŵapindulisha m’njila zinyinji ngako. Mwacisanzo, enzophunzila zinyinji zokhuza cilamulo ca Mulungu, enzosinkhasinkha pa zinthu ziweme zeenzoŵacitila Yehova, ndipo enzosangalala kuyanjana na olambila ayao. (Deut. 16:15) Nase tupindula ngako ngati tucita zonse zatingakwanishe kuti tipezeke pa misonkhano yacikhristu. Ndipo tikapezekapo, Yehova osangalala ngako ngati tupeleka ndemanga zokonzekelewa bwino koma soti zacidule.

10. Ndaŵa yanji kuimba ni mbali yofunika ngako pa kulambila kwasu?

¹⁰ Tulambila Yehova ngati tutolako mbali poimba nyimbo za Ufumu pa misonkhano. (Sal. 28:7) Aisiraeli enzoona kuti kuimba, yenze mbali yofunika ngako pa kulambila Yehova. Mwacisanzo, Mfumu Davide esankha Alevi okwanila 288 kuti akoimba pa kacisi. (1 Mbi. 25:1, 6-8) Masiku ŵano, tingaoneshe kuti tukonda Mulungu ngati tutolako mbali poimba nyimbo zomutamanda. Tufunika lini kucita wowa kuimba pa misonkhano poganiza kuti tili na cileya. Ganizilani izi: Ngati tulaŵila, tukonda ‘kulakwisa nthawi zinyinji.’ Koma izi zuticitisha lini kuti osati tikolaŵila ngati tili pa misonkhano olo mu utumiki. (Yak. 3:2) Molingana na izi, tufunika lini kulola kuti kamvwikidwe ka mau ŵasu kakotikangisha kutolako mbali poimba nyimbo zotamanda Yehova.

11. Molingana na Salimo 48:13, ndaŵa yanji mufunika kupatula nthawi yophunzila Baibo monga banja?

¹¹ Tulambila Yehova ngati tuphunzila Mau ŵake nophunzisa ŵana ŵasu zokhuza yove. Pa Sabata iliyonse, Aisiraeli enzopumula ku zinchito zao za siku na siku kuti atang’ishe ushamwali wao na Yehova. (Eks. 31:16, 17) Ayakine enzoseŵenzesha mpata wamene uyu kuti aphunzise ŵana ŵao zokhuza minkhalidwe ya Yehova na ubwino wake. Molingana na izi, nase masiku ŵano tufunika kupatula nthawi yophunzila Mau a Mulungu. Iyi ni njila iyakine yatulambililamo Yehova ndipo yutiyavya kuvwendela pafupi na yove. (Sal. 73:28) Makolo, ngati mupatula nthawi yoŵelenga Baibo pamozi monga banja, muyavya ŵana ŵanu kuti ankhale pa ushamwali wotang’a na Ausuwasu akululu.—Ŵelengani Salimo 48:13.

12. Kansi tuphunzilapo cinji tikaona mwamene Yehova enzoonela nchito yeciseŵenza ŵanthu emanga cihema?

¹² Tulambila Yehova ngati tutolako mbali pa nchito yomanga nokonza soti malo ŵasu olambilila. Baibo yulaŵila kuti nchito yomanga cihema na zinthu zenzofunika kuseŵenzeshewa pa cihema yenze “yopatulika.” (Eks. 36:1, 4) Olo masiku ŵano, Yehova oona kuti nchito yomanga Mang’anda ya Ufumu na vimango viyakine va m’gulu yake ni yopatulika. Akwasu na azilongosi ayakine, oseŵenzesha nthawi yao ikulu pocita nchito izi. Ove ocita soti khama pa nchito yolalikila ndipo ayakine mwa akwasu na azilongosi aŵa ofuna kunkhala apainiya. Kulaŵila cendi, tufunika kuŵayamikila pa nchito yakucita. Akulu, angaoneshe kuti ocilikiza nchito zacimango mwa kulola kuti ŵala amene ocilikiza pa nchito iyi ayambe upainiya ngati ni oyenelela. Ndipo mosasamala kanthu kuti tili na luso ya zomangamanga olo yai, tonse tingatoleko mbali pa nchito yoyelesa nokonza soti malo ŵasu olambililamo.

13. Kansi zopeleka zatupanga pocilikiza nchito ya Ufumu tufunika kuziona tyani?

 ¹³ Tulambila Yehova ngati tupanga zopeleka kuti zicilikize nchito ya Ufumu. Aisiraeli enzofunikila lini kuonekela pamenso pa Yehova cimanjamanja. (Deut. 16:16) M’malo mwake, enzofunikila kuwela na mphaso kulingana na mwezenzele zinthu pa umoyo wao. Kucita izi, yenze njila imozi yeenzooneshelamo kuti enzoyamikila Yehova pa zinthu zonse zeenzoŵacitila. Kansi tingaoneshe tyani kuti tukonda Yehova na kuti tumuyamikila pa zinthu zonse zakutipasa? Njila imozi yatingacitilemo izi, ni mwa kupanga zopeleka kuti zikoyavya mumpingo na pa nchito ya pacalo conse kulingana na mwazilili zinthu pa umoyo wasu. Mtumwi Paulo elaŵila kuti: “Mulungu okondwela na mphaso yofumila pansi pamtima. Cifukwa yove ofuna kuti munthu akopeleka zaangakwanishe, osati zamene angakwanishe lini.” (2 Akor. 8:4, 12) Yehova osangalala ngako na zopeleka zatupanga mosasamala kanthu kuti ni zinyinji olo zitontho.—Mko. 12:42-44; 2 Akor. 9:7.

14. Molingana na Miyambo 19:17, kansi Yehova oiona tyani thandizo yatupeleka kuli akwasu amene okumana na mavuto?

¹⁴ Tulambila Yehova ngati tuyavya Akhristu ayasu amene okumana na mavuto. Yehova enze elonjeza Aisiraeli kuti akoŵadalisa ngati oyavya ŵanthu osauka. (Deut. 15:7, 10) Tetyo, nthawi zonse tikayavya ayasu amene okumana na mavuto, Yehova oona monga tapeleka mphaso kwa Yove. (Ŵelengani Miyambo 19:17.) Mwacisanzo, Akhristu a ku Filipi pecituma mphaso kwa Paulo peenze m’jele, yove eiona kuti yenze “nsembe yovomelezhyeka koma soti yosangalasa kwa Mulungu.” (Afil. 4:18) Tetyo, tingacite bwino kuzikonsha kuti: ‘Kansi paliko aliyense mumpingo mwasu wamene ofunikila thandizo yangu?’ Yehova osangalala ngako akaona kuti tuseŵenzesha nthawi yasu, mphamvu zasu, maluso ŵasu na cuma casu poyavya ayakine. Ndipo oona kuti iyi ni mbali iyakine yatumulambililamo.—Yak. 1:27.

15. Olo kuti tufunika kucita khama noseŵenzesha nthawi yasu polambila Yehova, ndaŵa yanji kucita izi n’kosaŵeŵesha?

¹⁵ Tufunika kucita khama noseŵenzesha nthawi yasu ikulu kuti tilambile Yehova m’njila yovomelezhyeka. Koma izi zutanthauza lini kuti kulambila Yehova ni koŵeŵesha. (1 Yoh. 5:3) Talaŵila teti cifukwa tulambila Yehova cifukwa comukonda. Ganizilani zakucita mwana ngati ofuna kupasa mphaso ausuwake. Ngati angafune kuŵapasa cithunzithunzi, mwana uyu angaseŵenzeshe nthawi yake ikulu pocidulowing’a. Koma oona lini kuti wataila nthawi yake patyala cifukwa oŵakonda ngako ausuwake ndipo onkhala wosangalala kuŵapasa mphaso. Molingana na izi, cifukwa cakuti tukonda Ausuwasu akululu, tunkhala osangalala kuseŵenzesha nthawi yasu na mphamvu zasu pomulambila.

16. Molingana na Aheberi 6:10, kansi Yehova akumvwa tyani ngati tucita zilizonse zatingakwanishe pomutumikila?

¹⁶ Makolo acikondi oyembekezela lini kuti ŵana onse akoŵapasa mphaso zolingana. Ocita izi cifukwa ozindikila kuti ŵana ali na maluso osiyanasiyana ndipo onse angacite lini zinthu zolingana. Molingana na izi, Ausuwasu akululu oziŵa kuti tonse tingocita lini zinthu zolingana cifukwa tukumana na mavuto osiyana pa umoyo. Payakine mweo mukwanisha kucita zinyinji kupambana akwasu na azilongosi ayakine. Olo payakine mukwanisha lini kucita zinyinji monga ni mwakucitila ayakine cifukwa ca ukulukazi, matenda olo maudindo a m’banja. Ngati umu niye mwazilili zinthu pa umoyo wanu, musafooke. (Aga. 6:4) Yehova angaluŵe lini nchito yanu. Yove osangalala ngako  ngati mucita zonse zamungakwanishe pomutumikila. (Ŵelengani Aheberi 6:10.) Yehova oziŵa zamulakalaka kumucitila. Ndipo ofuna kuti mukonkhala osangalala koma soti okhutila na zamukwanisha kucita pomulambila.

17. (a) Kansi mungacitenji ngati muvutika kucita ziyakine mwa zinthu zatalaŵizhyana? (b) Kansi mwapindula tyani cifukwa cocita ziyakine mwa zinthu zili pa kabokosi kakuti “ Yangizhyilani Cimwemwe Canu”?

¹⁷ Payakine tuvutika kucita ziyakine mwa zinthu zatalaŵizhyana monga kuphunzila Baibo na kulalikila. Ngati zili tetyo, kansi tingacitenji kuti tiongolele? Cinthu cingatiyavye ni kucita zinthu izi nthawi zonse osati molumphalumpha. Ngati tingacite izi, tingapindule ngako ndipo tingapeze cimwemwe. Kulambila kwasu tingakulinganizhye na kucita masoŵela otang’isha muŵili olo kuphunzila moseŵenzeshela cipangizo coimbila nyimbo monga gitala. Ngati tingocita izi mwa apa na apo, cingativute kuti tiyoŵelele. Koma ngati tingayambe kucita izi siku iliyonse, tingayoŵelele mosavuta. Payakine poyamba, tingocitako tyala kwa maminesi yatontho. Koma m’kuluta kwa nthawi, tingayambe kucita izi kwa nthawi itali. Ndipo ngati taona zofumapo ziweme zamene zingankhalepo cifukwa ca khama yasu, tingayambe kusangalala ngako pocita zinthu izi. Kansi izi zulingana tyani na kulambila kwasu?

18. Kansi cinthu cofunika ngako pa umoyo wasu n’cinji, ndipo tupindula tyani ngati tucita izi?

¹⁸ Paliye cinthu cofunika ngako pa umoyo wasu kupambana kulambila Yehova. Kucita izi kutiyavya kunkhala na umoyo wacimwemwe koma soti watanthauzo. Kutipangisha soti kunkhala na ciyembekezo cakuyonkhala na moyo wosasila m’paladaiso mwamene tikalambile Yehova mpaka kale-kale. (Miy. 10:22) Ndipo olo pali lomba, tili na mtendele wa m’maganizo cifukwa tuziŵa kuti nthawi zonse, Yehova otiyavya tikakumana na mavuto. (Yes. 41:9, 10) Kulaŵila cendi, tili na vifukwa vinyinji vonkhalila acimwemwe patulambila Ausuwasu acikondi, amene ni oyenelela “kulandila ulemu na ulemelelo” kufumila ku volengewa vonse.—Chiv. 4:11.