1-2. Kansi n’chinji chingachitishe kuti Mulungu akovomeleja kulambila kwasu?

 KANSI mwewo muganiza chinji mukamvwa mawu akuti “kulambila”? Payakine muganizila za m’bale wolichefya wamene ogwada mmbali mwa bedi yake nopemphela mofumila pansi pantima. Olo payakine muganizilasoti za banja yamene yusangalala kuphunzila Baibolo mwakhama.

² Pa vochitika vonse vamene ivi, vakuchita aliyense vupanga mmbali ya kulambila. Kansi Yehova angavomeleje kulambila kwawo? Yove angavomeleje keno ove oyeja-yeja kuchita vamene ivo mokatijana na chifunilo chake, komasoti keno omukonda nomulemekeza. Sewo tumukonda ngakosoti Yehova. Tuziŵa kuti yove ni woyenelela kulambiliwa ndipo tufuna kuchita vonse vatingakwanishe mu njila iweme.

3. Kansi tikambilane chinji mu nkhani ino?

³ Mu nkhani ino, tikambilane vokhuza ntundu wa kulambila kwenzevomeleja Yehova m’masiku akuvuli, komasoti tikambilane vinthu vokwana 8 vokhuza kulambila kwakuvomeleja masiku ŵano. Mwa kuchita vamene ivi, tingakwanishe kuganizila mwatingochitila kuti tikolambila Mulungu mu njila yovomelejeka. Tiwonesoti chifukwa chake kulambila kwachendi kutiyavya kuti tikonkhala osangalala.

4. Kansi ŵanthu amene enzelambila Yehova m’masiku akuvuli Chikhilisitu chikaliyeyamba, ewonesha tyani kuti enzekonda Yehova komasoti kumulemekeza?

⁴ Chikhilisitu chikaliyeyamba, analume okhulupilika monga Abele, Nowa, Abulahamu na Yobu, ewonesha kuti enzekonda Yehova komasoti kumulemekeza. Motyani? Ove enzemumvwila  Mulungu, enzemukhulupilila komasoti enzepeleka nsembe kuli yove. Baibolo yufotokozalini vonse venzefunika kuchita ove polambila. Koma n’vowonekelatu kuti ove echita vonse vechikwanisha kuti alemekeze Yehova ndipo yove enzevomeleja kulambila kwawo. Pavuli pake, Yehova epeleka Chilamulo cha Mose kuli ŵana ŵa Abulahamu. M’chilamulo chamene icho mwenze malamulo anyinji amene enzefotokoza njila yolambilila yenzevomeleja Yehova.

5. Kansi Yehova efuna kuti ophunzila a Yesu akomulambila motyani?

⁵ Pavuli pakuti Yesu wamwalila noushiwa, Yehova aliyembekezele kuti ŵanthu akomulambila mokatijana na Chilamulo chenze epasa Aisiraeli. (Aro. 10:4) Akhilisitu enzefunikila kukonkheja chilamulo chanyowani, chamene ni “chilamulo cha Khilisitu.” (Aga. 6:2) Venze vokwanishika kuli ove kukonkheja “chilamulo” chamene ichi paliye kukumbukila olo kukonkheja malamulo anyinji, koma potolela chisanzo cha Yesu nokonkheja venzephunzisa yove. Masiku ŵanosoti, Akhilisitu oyeja-yeja mulimonse mwangakwanishile kukonkheja chisanzo cha Yesu kuti akondweleshe Yehova komasoti kuti ‘alimbikisiwe.’—Mt. 11:29.

6. Kansi nkhani ino itiyavye tyani?

⁶ Patukambilana chilichonse mwa vinthu vatuchita pa kulambila kwasu mukolikonsha kuti, ‘Kansi newo nuchita tyani pa nkhani yamene iyi?’ Mungalikonshesoti kuti, ‘Kansi ningayangijile tyani vanuchita polambila Mulungu?’ Mukosangalala na vamukwanisha kuchita palipano ndipo mukomusenga Yehova kuti akuyavyeni kuwona vamufunika kuyangijila kuchita.

7. Kansi Yehova oŵawona tyani mapemphelo ŵasu ofumila pansi pantima?

⁷ Tulambila Yehova keno tupemphela kuli yove. Malemba olinganija mapemphelo ŵasu na vofukiza vokonzewa luweme venzepelekewa ku chihema ndipo pavuli pake ku kachisi. (Sal. 141:2) Vofukiza vamene ivo venzefumya kavumba konunkhila luweme kamene kenzekondwelesha Mulungu. Molingana na vamene ivi, mapemphelo ŵasu ofumila pansi pantima ‘omukondwelesha’ olo keno takatishila ntchito mawu osavuta kumvwa. (Miy. 15:8; Deut. 33:10) Tili na vifukwa vomvwika vokhulupilila kuti Yehova okondwela kumvwishila mapemphelo ŵasu amene owonesha kuti tumukonda komasoti kumutembeja. Yove ofuna kuti tikomufotokozela nkhaŵa zasu, chikhulupililo chasu na vokumbwa vasu. Tikaliyeyamba kulaŵila naye Yehova kupitila m’pemphelo, tufunika kuganizila luweme vatikuti tilaŵile. Mwa kuchita vamene ivi, mwewo mukopeleka “vofukiza” viweme ngako kuli Atata ŵanu ŵakululu.

8. Kansi ni mwayi uweme wotyani watili nawo wotamandila Mulungu?

⁸ Tulambila Yehova keno tumutamanda. (Sal. 34:1) Tutamanda Yehova mwa kuujako ayasu momekela za minkhalidwe yake yodabwisa komasoti ntchito zake. Tingankhale na vinthu vinyinji viweme vatingalaŵile vokhuza Yehova keno tumutembeja. Keno tupatulako nthawe—yoganizila vinthu vonse viweme vakutichitila Yehova—tinkhale na vifukwa vinyinji vomutamandila. Ntchito yolalikila yutipasa mwayi uweme ngako ‘wopeleka nsembe kwa Mulungu, yamene ni chitwazi cha milomo yasu.’ (Ahe. 13:15) Monga ni mwatuchitila kuganizila mosamala ngako vatikuti tilaŵile tikaliyeyamba kulaŵila naye Yehova kupitila m’pemphelo, ni bwino kuganizila luweme vatingaŵauje ŵanthu ŵatulalikila. Tufuna kuti ‘nsembe zasu zachitamando’ zikonkhala ziweme ngako. Niye chifukwa chake, keno tulalikila tulaŵila mofumila pansi pantima.

9. Molingana na Aisiraeli, kansi tupindula tyani chifukwa chosonkhana pamozi? Pelekani chisanzo chokhuza mwayakuyavyilani misonkhano mwewo.

 ⁹ Tulambila Yehova keno tupezeka pamisonkhano. Kale Aisiraeli eujiwa kuti: “Mwanalume aliyense pakati panu akowonekela katatu pa chaka pamenso pa Yehova Mulungu wanu, pa malo ŵakuti azasankhe Mulungu.” (Deut. 16:16) Ove enzefunikila kusiya ng’anda zawo na minda yawo paliye aliyense angaviteteze. Koma Yehova eŵalonjeza kuti: “Paliye aliyense akuti azakumbwile chalo chanu, mwewo mukachokapo kuyawona chinso cha Yehova Mulungu wanu.” (Eks. 34:24) Chifukwa chakuti Aisiraeli enzekhulupilila Yehova na ntima wonse, enzeluta ku vikondwelelo va pachaka. Ndipo ove enzepindula mu njila zinyinji; mwachisanzo, ove enzemvwishila luweme Chilamulo cha Mulungu, kuganizila ubwino wake komasoti enzelimbikisiwa akasonkhana na ŵanthu ayakine amene enzelambila Mulungu. (Deut. 16:15) Nase tupindulasoti chimozi-mozi keno tuchita vonse vatingakwanishe kuti tikopezeka pamisonkhano ya Chikhilisitu. Ndipo ganizilani mwakusangalalila Yehova tikankhala okonzeka kupelekako ndemanga zachidule, koma zokata ntima.

10. Ndaŵa yanji kuimba n’kofunika ngako pa kulambila kwasu?

¹⁰ Tulambila Yehova keno tuimba nyimbo pamozi na abale na alongo ŵasu. (Sal. 28:7) Aisiraeli enzewona kuti kuimba nyimbo ni mbali yofunika ngako pa kulambila kwawo. Mfumu Davide esankha Alevi okwana 288, kuti ankhale oimba pa kachisi. (1 Mbiri 25:1, 6-8) Masiku ŵano, tingawoneshe kuti tumukonda Mulungu keno tumuimbila nyimbo zachitamando. Tufunikalini kuchitankhala na lizu iweme kuti tichite vamene ivi. Ganizilani chisanzo ichi: Tikolaŵila, “tonse tuphoniya nthawe zinyinji,” koma vamene ivi vutikangishalini kuti tikolaŵila mumpingo komasoti mu utumiki. (Yak. 3:2) Molingana na vamene ivi, tufunikalini kulola kuti kudela nkhaŵa zakuti tuimbalini luweme kutikangishe kuimba nyimbo zotamanda Yehova.

11. Mokatijana na lemba ya Salimo 48:13, ndaŵa yanji tufunika kupatulako nthawe yophunzila Baibolo pamozi na banja yasu?

¹¹ Tulambila Yehova keno tuphunzila Mawu ŵake komasoti kuphunzisa ŵana ŵasu vokhuza yove. Pa nsiku ya Sondo, Aisiraeli enzekatalini ntchito zawo za nsiku na nsiku, ndipo vamene ivi venzeŵapasa mwayi woganizila za ushamwali wawo na Yehova. (Eks. 31:16, 17) Ŵala enze okhulupilika pakati pawo enzephunzisa ŵana ŵawo vokhuza Yehova na ubwino wake. Masiku ŵanosoti tufunika kupatula nthawe yoŵelenga nophunzila Mawu a Mulungu. Vamene ivi vupanga mbali ya kulambila kwasu Yehova, ndipo vutiyavya kuti tinkhale naye pa ushamwali wotang’a. (Sal. 73:28) Ndipo keno tuphunzila pamozi monga banja—tingayavye ŵana ŵasu—kuti ankhale pa ushamwali wotang’a na Atata ŵasu ŵakululu amene ni achikondi.—Ŵelengani Salimo 48:13.

12. Kansi tuphunzilapo chinji pa nkhani ya mwenzewonela ntchito yopanga chihema Yehova pamozi na viya vake?

¹² Tulambila Yehova pomanga malo ŵasu olambilila noŵasamalila. Baibolo yunena kuti ntchito yopanga chihema pamozi na viya vake, yenze “ntchito yopatulika.” (Eks. 36:1, 4) Masiku ŵanosoti, Yehova owona kuti ntchito yomanga Ng’anda za Ufumu na malo ayakine olambilila, ni ntchito yopatulika. Abale na alongo ayakine otola nthawe ikulu pokata ntchito zamene izi. Kansi tufunikalini kutembeja pa vinthu vamene ivi vakuchita vamene n’vofunika ngako pa ntchito ya Ufumu? Olo n’tetyo, ove okatasoti ntchito yolalikila. Ayakine mwa ove mpaka angafune kuchita upainiya. Akulu angawoneshe kuti oyavya pa ntchito yamene iyi yomanga, mwa kulola kuti abale na alongo amene aŵa akhama ankhale apainiya keno ni  oyenelela. Keno tili na luso ya zomanga-manga olo yayi, tonse tingayavye kuti ng’anda zamene izi zipitilije kunkhala za ukhondo komasoti kuti zikowoneka luweme.

13. Kansi tufunika kuziwona tyani zopeleka zasu zoyavya pa ntchito ya Ufumu?

¹³ Tulambila Yehova keno tuyavya pa ntchito ya Ufumu na zopeleka zasu. Aisiraeli enzefunikalini kuyawonekela pamenso pa Yehova chimanja-manja. (Deut. 16:16) Ove enzefunika kupeleka mphaso mokatijana na mwevenzele vinthu pa moyo wawo. Vamene ivi venzewonesha kuti enzetembeja vinthu vonse venzekonzewa kuti apindule mwauzimu. Kansi tingawoneshe tyani kuti tukonda Yehova nomutembeja pa vonse vakutichitila? Njila imozi yatingawoneshele vamene ivi, ni kuyavya mwa kupeleka ndalama zoyavya pampingo watusonkhana na zoyavya pa ntchito ya pachalo chonse mokatijana na mwavilili vinthu pa moyo wasu. Ntumwi Paulo enena kuti: “Mphaso yofumila pansi pantima niye yakukondwela nayo Mulungu, chifukwa Mulungu Ofuna kuti munthu apeleke vangakwanishe, osati vangalekekwanisha.” (2 Akor. 8:4, 12) Yehova otembeja ngako chopeleka chilichonse chofumila pansi pantima chatingapeleke, olo chingankhale chitontho.—Mk. 12:42-44; 2 Akor. 9:7.

14. Mokatijana na Miyambo 19:17, kansi Yehova oiwona tyani thandizo yatupeleka poyavya abale ŵasu amene ofunikila thandizo?

¹⁴ Tulambila Yehova keno tuyavya Akhilisitu ayasu amene ofunikila thandizo. Yehova elonjeza kuti azaŵadalise Aisiraeli amene enzeyavya osauka. (Deut. 15:7, 10) N’chendi, nthawe iliyonse yatayavya m’bale olo mulongo wamene ofunikila thandizo, Yehova owona vamene ivi kunkhala mphaso kuli yove. (Ŵelengani Miyambo 19:17.) Mwachisanzo, Akhilisitu aku Filipi pechitumija mphaso kuli nkaidi muyakine zina yake Paulo, yove etomola mphaso yamene iyo kuti ni “nsembe yovomelejeka yokondwelesha kwa Mulungu.” (Afil. 4:18) Mukawona abale na alongo a mumpingo mwanu mukolikonsha kuti, ‘Kansi pali aliyense waningayavyeko?’ Yehova okondwela ngako akawona kuti sewo tukatishila ntchito nthawe yasu, mphamvu zasu, maluso ŵasu na vinthu vatili navo kuti tiyavye ŵala ofunikila thandizo. Yove owona vamene ivi kunkhala mbali ya kulambila kwasu.—Yak. 1:27.

15. Kulambila kwachendi kufuna nthawe na khama, koma ndaŵa yanji n’kosaŵeŵesha?

¹⁵ Kulambila kwachendi kufuna nthawe na khama. Koma n’kosaŵeŵesha. (1 Yoh. 5:3) Ndaŵa yanji tunena tetyo? Ndaŵa yakuti tulambila Yehova chifukwa chakuti tumukonda. Ganizilani za mwana ntontho wamene ofuna kupeleka kanthu kayakine kwa atata ŵake. Yove payakine angatole nthawe ikulu olemba chithunzi kuti azaŵapase atata ŵake. Koma mwana wamene uyo odandaulalini za kupaka kwa nthawe yawankhala olemba chithunzi chamene icho. Yove oŵakonda ngako atata ŵake, ndipo osangalala kuŵapasa chithunzi chamene icho monga mphaso. Molingana na vamene ivi, chifukwa chakuti sewo tumukonda Yehova tusangalala kukatishila ntchito nthawe yasu komasoti kuchita khama kuti tikomulambila movomelejeka.

16. Mokatijana na Aheberi 6:10, kansi Yehova owona tyani kuyeja-yeja kwasu kwatuchita kuti timukondweleshe?

¹⁶ Makolo achikondi oyembekezelalini kulondela mphaso zolingana kufumila kuli aliyense mwa ŵana ŵawo. Ove oziŵa kuti mwana aliyense ni wosiyana na muyake ndipo angachitelini vinthu molingana. Molingana na vamene ivi, Atata ŵasu ŵakululu omvwisha vinthu vangakwanishe kuchita aliyense wa sewo. Payakine mukwanisha kuchita vinyinji kupambana ŵala ŵamuziŵa na ŵamukonda. Olosoti payakine mungakwanishelini kuchita vinyinji monga  mwakuchitila ayakine, payakine chifukwa cha uchikulile, thanzi yanu olo maudindo ŵanu a m’banja. Keno n’tetyo, osalola kuti vamene ivi vikufokesheni. (Aga. 6:4) Yehova aluŵelini ntchito yanu. Malinga keno muchita vonse vamungakwanishe komasoti na volinga viweme, yove akokondwela namwe. (Ŵelengani Aheberi 6:10.) Ndipo Yehova mpaka owona volinga va muntima mwanu. Yove ofuna kuti mukonkhala wosangalala komasoti wokhutila na vamukwanisha kuchita pomulambila.

17. (a) Kansi tingachite tyani keno vutivuta kuchita vinthu viyakine vokhuza kulambila? (b) Kansi njila zolambilila zafotokozewa m’kabokosi kakuti, “ Yangijilani chisangalalo chanu” zakuyavyani tyani?

¹⁷ Kansi tingachite tyani keno vutivuta kuchita vinthu viyakine vatakambilana kwalombapano monga kuphunzila Baibolo olo kulalikila? Keno tuchita vamene ivi pafupi-pafupi, n’vowonekelatu kuti tingosangalala navo komasoti kupindula navo. Tingalinganije kulambila kwasu na vinthu viyakine monga kuchita masoŵela otang’isha muŵili olo kuphunzila kuimba pokatishila ntchito chida choimbila. Keno tuchita vamene ivi mwa apo na apo, tingapitelini pasogolo. Koma kansi n’chinji chingachitike keno tasankha kuchita vamene ivi nsiku iliyonse? Poyamba payakine tingochita vamene ivi kwa maminesi atontho nsiku iliyonse, koma pavuli pake tingayambe kuyangijila nthawe yochita vamene ivi patontho-patontho. Tikawona vokonkhapo viweme va kuyeja-yeja kwasu, mosakaikila tingayambe kunkhala ofunishisha kuti tikochita vamene ivi nthawe zonse nosangalala navo. Kansi mwakwanisha kuwona mwatingakatishilile ntchito njila zamene izi pa kulambila kwasu?

18. Kansi tukwanilisha tyani cholinga chetilengelewa, ndipo

¹⁸ Tukwanilisha cholinga chechitilengela Yehova keno tumulambila mofumila pansi pantima. Vamene ivi vutiyavya kuti tikonkhala na moyo wosangalala komasoti watanthauzo, ndipo tunkhala na chiyembekezo cha kuzamulambila mpaka kale-kale. (Miy. 10:22) Palipano tunkhala na ntendele wa m’maganizo chifukwa tuziŵa kuti Yehova oyavya ŵanthu amene omulambila olo akakumana na mavuto. (Yes. 41:9, 10) Tetyo, tili na vifukwa vomvwika vonkhalila osangalala tikolambila Atata ŵasu achikondi amene ni oyenelela “kulondela ulemelelo na ulemu” kufumila ku vinthu vonse vechilenga!—Chiv. 4:11.