1-2. Ke eng seo se ka dirago gore Modimo a amogele borapedi bja rena?

 O NAGANA ka’ng ge o e kwa lentšu “borapedi”? Mohlomongwe o ka nagana ka ngwanabo rena yo a khunamego kgauswi le mpete wa gagwe a rapela go tšwa pelong. Goba o ka nagana ka lapa leo le ipshinago nakong ya borapedi bja lapa.

² Batho ba ka moka ba rapela Modimo. Na Jehofa o tla amogela borapedi bja bona? O tlo bo amogela ge e ba ba leka go dira thato ya gagwe e bile ba mo rata le go mo hlompha. Re rata Jehofa kudu. Re a tseba gore o swanelwa ke go rapelwa le gona re nyaka go leka ka moo re ka kgonago gore re mo rapele.

3. Re tlo ithuta ka’ng sehlogong se?

³ Sehlogong se, re tlo bolela ka gore Jehofa o be a nyaka batho ba mo rapele bjang nakong e fetilego le gona re tlo bolela ka dilo tše seswai tšeo re ka di dirago gore Jehofa a amogele borapedi bja rena lehono. Re tlo bona le kamoo re ka kaonefatšago tsela yeo re rapelago Jehofa ka yona. Re tlo ithuta le gore ke ka baka la’ng go rapela Jehofa ka tsela yeo a e amogelago go tlago go dira gore re thabe.

4. Bahlanka ba Jehofa ba mehleng ya kgale ba ile ba bontšha bjang gore ba hlompha Jehofa le go mo rata?

⁴ Mehleng ya kgale banna bao ba botegago ba go swana le Abele, Noa, Aborahama le Jobo ba ile ba bontšha gore ba hlompha  Jehofa le go mo rata. Bjang? Ba be ba e kwa Modimo, ba na le tumelo go yena e bile ba mo direla dihlabelo. Beibele ga e re botše dilo ka moka tšeo ba bego ba swanetše go di dira. Eupša ba ile ba hlankela Jehofa ka matla a bona ka moka le gona o ile a amogela borapedi bja bona. Ka morago Jehofa o ile a nea Baisiraele Molao wa Moshe. Melao yeo e be e na le ditaelo tšeo di bontšhago gore Jehofa o nyaka gore ba mo hlankele bjang ka tsela yeo a e amogelago.     

5. Ka morago ga gore Jesu a tsošwe bahung go ile gwa ba le phetogo efe ka borapedi bja therešo?

⁵ Ka morago ga gore Jesu a tsošwe bahung, Jehofa o be a se sa nyaka gore batho ba mo rapele ba diriša Molao wa Moshe. (Baroma 10:4) Bakriste ba be ba swanetše go latela molao o mofsa e lego “molao wa Kriste” (Bagal. 6:2) Ba be ba ka latela molao wo ka go ekiša mohlala wa Jesu le go latela dithuto tša gagwe e sego ka go latela melao e mentši go swana le Baisiraele. Lehono Bakriste ba šoma ka thata gore ba ekiše mohlala wa Jesu e le gore ba kgone go kgahliša Jehofa le go ‘hweletša meoya ya bona tapologo.’—Mat. 11:29.   

6. Sehlogo se se tlo re hola bjang?

⁶ Ge re dutše re ithuta ka ditsela tšeo re ka rapelago Jehofa ka tšona ipotšiše gore, na ke di latela go fihla kae? Na go na le mo nka kaonefatšago gona? O ka no ba o thabela tsela yeo o hlankelago Jehofa ka yona gona bjale, eupša go bohlokwa gore o mo kgopele gore a go thuše go kaonefatša.

7. Jehofa o lebelela bjang dithapelo tša rena tšeo di tšwago pelong?

⁷ Go rapela ke karolo ya go hlankela Jehofa. Beibele e swantšha dithapelo tša rena le diorelo tšeo di lokišeleditšwego gabotse tšeo di bego di neelwa taberenakeleng gomme ka morago tša neelwa tempeleng. (Ps. 141:2) Diorelo tšeo di be di ntšha monkgo o bose o yago go Jehofa. Ka mo go swanago dithapelo tša rena tšeo di tšwago pelong di “a mo kgahla,” le ge re ka ba re diriša mantšu a bonolo. (Die. 15:8; Doit. 33:10) Ka gona re kgodišegile gore Jehofa o a thaba ge a e kwa re mmotša ka tsela yeo re mo ratago ka yona le kamoo re mo lebogago ka gona. O nyaka gore re mmotše mathata a rena le dilo tšeo re di nyakago. Re swanetše go nagana ka seo re nyakago go se botša Jehofa pele re mo rapela. Ge re dira bjalo re tla be re nea Jehofa diorelo tše di kaonekaone.

8. Re ka tumiša Jehofa ka ditsela dife?

⁸ Tsela e nngwe ya go hlankela Jehofa ke go mo tumiša. (Ps. 34:1) Re tumiša Jehofa ge re botša ba bangwe ka dilo tšeo a di dirilego le dika tša gagwe tše dibotse. Ge e ba re leboga Jehofa go tšwa pelong re tlo kgona go ba le dilo tše dintši tšeo re ka di bolelago ka yena. Ge e ba re ka naganišiša ka dilo tše dibotse tšeo Jehofa a re diretšego tšona re tlo ba le mabaka a mantši a go mo tumiša. Ge re ruta batho Beibele ke nako e botse ya go “direla Modimo sehlabelo sa tumišo ka mehla, ke gore seenywa sa melomo ya rena.” (Baheb. 13:15) Go swana le ge re swanetše go naganišiša ka seo re tlago go se bolela ge re rapela, re swanetše go naganišiša ka seo re tlago go se bolela ge re le tšhemong. Re nyaka gore “sehlabelo sa rena sa tumišo” e be se se kaonekaone. Re bontšha seo ge re bolela ditaba tše dibotse ka mafolofolo.

9. Go swana le Baisiraele re holega bjang ge re e ba gona dibokeng? Nea mohlala wa kamoo wena o holegago ka gona.

⁹ Tsela e nngwe ya go hlankela Jehofa ke go ba gona dibokeng. Baisiraele ba ile ba laelwa gore: “Yo mongwe le yo mongwe yo motona mo go lena a tšwelele gararo ka ngwaga pele  ga Jehofa Modimo wa gago lefelong leo a tlago go le kgetha.” (Doit. 16:16) Ba be ba swanetše go tlogela magae a bona le mašemo a bona a sa hlokomelwa ke motho. Eupša Jehofa o ile a ba tshepiša gore: “Ga go yo a tlago go duma naga ya lena nakong ya ge le rotogetše go tlo bona sefahlego sa Jehofa Modimo wa lena.” (Ek. 34:24) Ka ge Baisiraele ba be ba na le tumelo go Jehofa, ba ile ba ba gona menyanyeng yeo ya ngwaga le ngwaga. Ba ile ba holega ka ditsela tše dintši. Ka mohlala ba ile ba ithuta molao wa Jehofa, ba naganišiša ka tsela yeo Jehofa a ba ratago ka yona le go thabela go ba le barapedigotee le bona. (Doit. 16:15) Le rena ge re dira sohle seo re ka se kgonago gore re be gona dibokeng re a holega. Jehofa o thaba kudu ge a re bona re etla dibokeng re lokišeleditše go nea dikarabo tše dikopana.

10. Ke ka baka la’ng go opela e le karolo e bohlokwa ya borapedi bja rena?

¹⁰ Tsela e nngwe ya go hlankela Jehofa ke ka go opela. (Ps. 28:7) Baisiraele ba be ba tšea go opela e le karolo e bohlokwa ya borapedi bja bona go Jehofa. Kgoši Dafida o ile a kgetha Balefi ba 288 gore ba opele ka tempeleng. (1 Dikor. 25:1, 6-8) Lehono re ka bontšha gore re rata Modimo ge re opela dikopelo tša go mo tumiša. Ga se gore re swanetše go kgona go opela gabotse gore re tumiše Jehofa. Nagana ka se: Ka moka ga rena ge re bolela re ‘kgopša gantši’ eupša seo ga se re thibele go bolela ge re le ka phuthegong le tšhemong. (Jak. 3:2) Ka mo go swanago re ka tumiša Jehofa ka go mo opelela le ge re sa kgone go opela gabotse.

11. Go ya ka Psalme 48:13, ke ka baka la’ng re swanetše go ba le nako ya go ithuta Beibele le malapa a rena?

¹¹ Tsela e nngwe ya go hlankela Jehofa ke ka go ithuta Beibele le go ruta bana ba rena ka yena. Ka Sabatha Baisiraele ba be ba sa šome eupša ba diriša nako yeo gore ba matlafatše segwera sa bona le Jehofa. (Ek. 31:16, 17) Baisiraele bao ba botegago ba be ba ruta bana ba bona ka Jehofa le dilo tše dibotse tšeo a di dirilego. Le rena re swanetše go ipha nako ya go bala le go ithuta lentšu la Modimo. Ye ke karolo e nngwe ya borapedi bja rena e bile e re thuša gore re batamele kgauswi le Jehofa. (Ps. 73:28) Ge re ithuta re le lapa, re ka thuša bana ba rena gore ba be le segwera se sebotse le Tatago rena yo lerato wa legodimong.—Bala Psalme 48:13.

12. Re ithuta’ng tseleng yeo Jehofa a bego a lebelela mošomo wa bao ba bego ba aga taberenakele?

¹² Tsela e nngwe ya go hlankela Jehofa ke go aga meago ya rena ya borapedi le go e lokiša. Beibele e bitša go aga taberenakele le go tsentšha dilo ka moka tšeo di lego ka gare ga yona gore ke ‘Modiro o mokgethwa.’ (Ek. 36:1, 4) Le lehono Jehofa o lebelela modiro wa go aga Diholo tša Mmušo le meago e mengwe ya mokgatlo e le tirelo e kgethwa. Bana babo rena ba bangwe le dikgaetšedi ba fetša nako e ntši ba aga meago ye. Re tloga re thabela mošomo wa bona o mobotse wo ba o dirago. Bana ba babo rena le dikgaetšedi ba tšea karolo le modirong wa go bolela ditaba tše dibotse. Ba bangwe ba bona ba nyaka le go ba babulamadibogo. Bagolo ba bontšha gore ba thekga modiro wa go aga ka go dumelela bana babo rena le dikgaetšedi ba gore e be babulamadibogo ge e ba ba swanelega. Ka moka ga rena re ka thuša gore meago ya rena e dule e hlwekile e bile e le maemong a mabotse le ge re sa kgone go aga.

13. Re swanetše go lebelela bjang moneelo wo re o ntšhago go thekga modiro wa rena wa go bolela ditaba tše dibotse?

¹³ Tsela e nngwe ya go hlankela Jehofa ke ka go ntšha meneelo. Baisiraele ba be ba sa swanela go tla pele ga Jehofa ba lekeleditše diatla.  (Doit. 16:16) Ba be ba swanetše go tla le dimpho go ya le ka maemo a bona. Ge ba dira bjalo ba be ba bontšha gore ba leboga dilo ka moka tšeo Jehofa a ba direlago tšona. Re ka bontšha bjang gore re leboga dilo ka moka tšeo Jehofa a re direlago tšona? Tsela engwe ke ka go ntšha moneelo wo o tlago go thuša phuthego ya gabo rena le modiro wa lefase ka moka. Moapostola Paulo o itše: “Ge e ba motho a ikemišeditše go nea, gona mpho e amogelega ka mo go kgethegilego go ya ka seo a nago le sona, e sego go ya ka seo a se nago sona.” (2 Bakor. 8:4, 12) Jehofa o a thaba ge re ntšha moneelo ka go rata le ge e ka ba o monyenyane.—Mar. 12:42-44; 2 Bakor. 9:7.

14. Go ya ka Diema 19:17, Jehofa o lebelela bjang thušo yeo re e neago bana babo rena bao ba hlokago?

¹⁴ Tsela e nngwe ya go hlankela Jehofa ke go thuša Bakristegotee le rena bao ba se nago sa bona. Jehofa o ile a tshepiša Baisiraele gore o tla ba putsa ge ba ka thuša bana babo bona bao ba se nago sa bona. (Doit. 15:7, 10) Nako le nako ge re thuša ngwanabo rena go ba kgaetšedi yo a hlokago, Jehofa o lebelela seo e le mpho yeo e newago yena. (Bala Diema 19:17.) Ka mohlala ge Bakriste ba kua Filipi ba be ba nea Paulo yo a bego a golegilwe mpho o ile a e tšea e le “sehlabelo se se amogelegago, se se kgahlišago kudu go Modimo”. (Bafil. 4:18) Lebelela ka phuthegong ya geno gomme o bone ge e ba go na le yo o ka mo thušago. Jehofa o a thaba ge a re bona re diriša nako ya rena , matla a rena, bokgoni bja rena le dilo tšeo re nago le tšona go thuša bao ba hlokago. O lebelela seo e le karolo ya borapedi bja rena.—Jak. 1:27.

15. Ke ka baka la’ng go hlankela Jehofa go se boima le ge go nyakega nako le maiteko?

¹⁵ Go nyakega maiteko le nako gore re hlankele Jehofa. Eupša go dira bjalo ga go boima. (1 Joh. 5:3.) Ke ka baka la’ng re re’alo? Ka gobane re hlankela Jehofa ka ge re mo rata. Nagana ka ngwana yo monyenyane yo a nyakago go fa tatagwe selo se itšego. A ka fetša diiri tše ntši a mo thalela seswantšho. Ngwana yoo ga itshole ka ge a feditše diiri tše ntši a thala seswantšho. O rata tatagwe e bile o thabela go mo nea mpho yeo. Ka tsela e swanago, ka ge re rata Jehofa re thabela go diriša nako ya rena le matla a rena gore re mo hlankele.

16. Go ya ka Baheberu 6:10, Jehofa o lebelela bjang seo re mo direlago sona?

¹⁶ Batswadi ba lerato ba a tseba gore bana ba bona ba ka se ba fe dilo tša go swana. Ba a tseba gore bana ba bona ga ba swane le maemo a bona ga a swane. Ka mo go swanago, tatago rena wa legodimong o kwešiša maemo a yo mongwe le yo mongwe wa rena. Mohlomongwe o ka kgona go dira dilo tše dintši go feta ba bangwe. Goba mohlomongwe o ka palelwa ke go dira go swana le ba bangwe ka ge o tšofetše, o sa phele gabotse goba o na le maikarabelo a lapa. O se ke wa fela matla. (Bagal. 6:4) Jehofa a ka se lebale seo o mo direlago sona. Jehofa o tlo thaba ge o mo hlankela ka matla a gago ka moka. (Bala Baheberu 6:10.) Jehofa o kgona go bona le dilo tšeo o nyakago go mo direla tšona. O nyaka gore o thabe le go kgotsofalela seo o kgonago go mo direla sona.

17. (a) Re swanetše go dira’ng ge e ba re palelwa ke go latela e nngwe ya ditsela tša go hlankela Jehofa? (b) Ntlha yeo e lego lepokising leo le rego “ Oketša Lethabo la Gago” e go thušitše bjang?

¹⁷ Re ka dira’ng ge re hwetša go le thata go diriša dilo tšeo re boletšego ka tšona peleng go swana le go ithuta Beibele le go botša batho ditaba tše dibotse? Ge re ka dula re dira dilo tše re tlo di thabela e bile di tlo re  hola. Re ka swantšha go hlankela Jehofa le go itlwaetša go dira mošomo o itšego goba go ithuta go diriša seletšo sa mmino. Ge re ka se itlwaetše ka mehla, re ka no se kgone go diriša selo seo. Eupša go tlo direga’ng ge re ka itlwaetša ka mehla? Re ka thoma ganyenyane gomme ge nako e dutše e eya, ra oketša nako ya go itlwaetša. Ge re ka bona re kgona go dira selo seo re feditšego nako e ntši re palelwa ke go se dira, re tlo fetša nako e ntši re se dira le go se thabela. Le rena re ka dira se se swanago ge re nyaka go hlankela Jehofa.

18. Selo se bohlokwa seo re swanetšego go se dira ke eng, gona go tlo direga’ng ge e ba re ka se dira?

¹⁸ Selo sa bohlokwa seo re ka se dirago ke go dira hlankela Jehofa ka matla a rena ka moka. Ge re ka dira bjalo re tlo thaba le go kgotsofala gomme ra thabela go hlankela Jehofa ka mo go sa felego. (Die. 10:22.) Gona bjale re na le khutšo ya monagano ka gobane re a tseba gore Jehofa o a re thuša ge re ena le mathata. (Jes. 41:9, 10) Re a thaba ge re hlankela Tatago rena yo lerato yo a swanelwago ke amogela letago le kgodišo yeo e tšwago go dibopiwa tša gagwe ka moka.—Kut. 4:11.