1-2. Kodi n’ciyani comwe tin’funika kucita kuti Mulungu abvume kunamata kwathu?

 KODI imwepo mumbakumbuka ciyani mukabva fala lakuti “kunamata”? Pinango mumbakumbukira bza m’bale omwe adagodama ndipo akupemba kwa Yahova pomwe akanati kugona. Ayai pinango mungakumbukire bza wanthu wa m’banja libodzi omwe adagwezekana ndipo akupfunza Bibliya.

² Wentse omwe tawalewawa akunamata. Tsono kodi Yahova akubvuma kunamata kwawoko? Inde. Ndipo kuti bzimwebzi bzikwanisike, iwo an’funika kumufuna, kucita bzomwe iye ambafuna na kumulemekeza. Ifepano timbamufuna kwene-kwene Yahova. Ndipo tikudziwa kuti iye ambafuna kuti timutumikire. Ndipopa tin’funika kucita ciri-centse kuti kunamata kwathu kubvumidwe na iye.

3. Kodi n’ciyani comwe tin’pfunza mu nkhani ino?

³ Mu nkhani ino, tin’pfunza bzomwe Yahova akhafuna kuti Ajirayeri ambacite ndipo tiniwona bzinthu bzakukwana 8 bzomwe ifepano tingacite kuti Yahova abvume kunamata kwathu. Tiniwonambo kuti thangwe ranyi kunamata kwacadidi kumbaticitisa kukhala wakukondwa. Pomwe tikucita bzimwebzi, bzingakhale bwino kuti m’bodzi na m’bodzi wa ifepano akumbukire bzomwe angacite kuti kunamata kwace kubvumidwe na Yahova.

4. Kodi atumiki wa Yahova wakale-kale adalatiza tani kuti akhalemekeza na kufuna Yahova?

⁴ Kale-kale, atumiki wakukhulupirika wa Yahova omwe ni Abeli, Nowa, Abalahamu, Djobi na winango adalatiza kuti akhalemekeza Yahova na kumufuna. Kodi iwo adacita tani bzimwebzi? Iwo akhacita bzimwebzi mwa kumubvera, kumukhulupira na kumbapereka ntsembe kwa iye. Bibliya limbalewa lini bzinthu bzentse  bzomwe iwo adacita kuti Yahova akomedwe nawo. Tsono iwo adacita ciri-centse kuti alemekeze Yahova. Ndipopa iye adabvuma kunamata kwawo. Pomwe padapita nthawe, Yahova adapasa Ajirayeri Malamulo mwakuphatisa basa Mozeji. Malamulo manango yomwe iwo adapasidwa yakhaleweratu mwakubveka bwino bzomwe akhafunika kucita kuti Yahova abvume kunamata kwawo.

5. Kodi Yahova akufuna kuti ateweri wa Jezu ambamunamate tani?

⁵ Kucokera pomwe Jezu adafa na kulamusidwa, Yahova ambafuna lini kuti atumiki wace ambamunamate mwa kumbateweza Malamulo ya Mozeji. (Aroma 10:4) Bibliya limbalewa kuti Akristau an’funika kuteweza lamulo lipsa, lomwe ni “lamulo la Kristu.” (Agalatiya 6:2) “Lamulo” limweri lidasiyana na Malamulo ya Mozeji thangwe liribe lista ya bzinthu bzomwe iwo an’funika kucita na bzomwe an’funika lini kucita. Koma iwo an’funika kundotewezera bzomwe Jezu adacita na kupfunzisa. Ntsiku zino, Akristau akucitambo nyongo kuti atewezere Kristu kuti akondwese Yahova na “kutsangalazidwa” pa moyo wawo.—Mateu 11:29.

6. Kodi n’ciyani comwe mun’funika kucita pomwe tikupfunza nkhani ino?

⁶ Pomwe tikupfunza bzinthu bzomwe tin’funika kucita pakunamata kwathu, mbabzibvunzani kuti: ‘Kodi n’ciyani comwe ndakwanisa kucita pa nkhani imweyi?’ Ndipo mungabzibvunze pomwe kuti: ‘Kodi n’ciyani comwe ndikadatazira kucita?’ Pinango mungakomedwe na bzomwe mukucita kale, tsono mun’funika kupemba kwa Yahova kuti akuthandizeni kudziwa bzinthu bzinango bzomwe mun’funika kucita.

7. Kodi Yahova ambaiwona tani mipembo yomwe timbaicita na mtima wentse?

⁷ Tikambapemba timbakhala tikunamata Yahova. Bibliya limbalewa kuti mipembo yathu iri ninga bzakufukiza bzakununtcira bzabwino kwene-kwene bzomwe bzikhaperekedwa mu tendi la mkonkhano, bzomwe na kupita kwa nthawe bzikhadzaperekedwa mu templo. (Salimo 141:2) Mulungu akhakomedwa kwene-kwene na mnuntci omwe ukhacokera pa bzakununtcirisabzi. Mpsibodzi-bodzimbo na mipembo yomwe ifepano timbaicita na mtima wentse. Iye “ambakomedwa” nayo kwene-kwene napo kuti pakupembapo tingaphatise lini basa mafala mazinji ya ulemu. (Mimwani 15:8; Bzakutonga 33:10) Ifepano timbakhulupira na mtima wentse kuti Yahova ambakomedwa kutiwona tikulatiza kuti timbamufuna na kutenda bzomwe iye ambaticitira. Iye ambafuna kuti timbamuuze bzomwe bzimbaticitisa thupo, bzomwe tikufuna kudzacita kutsogolo na bzomwe timbakhumba. Pomwe mukanati kupemba kwa Yahova, bzingakhale bwino kuti mumbapambule nthawe kuti muyambe mwakonzekera bzomwe mun’funa kumuuza. Mukacita bzimwebzi, mipembo yanu in’dzakhala ninga “bzakufukiza bzakununtcira” kwa Baba wanu wakudzulu.

8. Kodi ni basa liponi lomwe limbatipasa mwayi wakutumbiza Mulungu?

⁸ Tikatumbiza Yahova timbakhala tikumunamata. (Salimo 34:1) Ifepano tikambauza anzathu makhalidwe yakudabwisa ya Yahova na bzomwe ambacita, timbakhala tikumutumbiza. Ifepano tin’dzakwanisa kutumbiza Yahova tikambatenda bzomwe ambaticitira. Tikambapambula nthawe kuti tikumbukire bzinthu bzentse bzabwino bzomwe iye ambaticitira tin’dzawona kuti mpsakufunika kwene-kwene kumbamutumbiza. Basa lakupalizira limbatipasa mwayi wa “[kumbapereka] nthawe zentse ntsembe zacitumbizo kwa Mulungu” zomwe “ni mafala yakucokera pa mulomo pathu.” (Ahebereu 13:15) Ifepano tin’funika kukonzekera bwino-bwino bzomwe tin’funa kukalewalewa na wanthu mu upalizi ninga momwe timbacitira tikafuna kupemba kwa Yahova. Tikufuna  kuti “ntsembe zathu zacitumbizo” zikhale zabwino kwene-kwene. Ndipopa timbakomedwa kwene-kwene tikakhala tikupfunzisa wanthu cadidi.

9. Kodi kutsonkhana pabodzi kukhathandiza tani Ajirayeri ndipo kumbatithandizambo tani ntsiku zino? Fotokozani phindu lomwe mumbakhala nalo mukambagumanika pa mitsonkhano.

⁹ Tikambagumanika pa mitsonkhano timbakhala tikunamata Yahova. Yahova adauza Ajirayeri kuti: “Amuna wentse an’funika kudzawonekera pamaso pa Yahova Mulungu wanu katatu pa gole pa mbuto yomwe iye an’dzasankhula.” (Bzakutonga 16:16) Ajirayeri akhafunika kusiya mii yawo na minda yawo bzokha. Tsono Yahova adawauza kuti: “Palibe [munthu] ali-wentse omwe an’dzasirira dziko lanu pomwe mukuyenda kukawonekera kwa Yahova Mulungu wanu katatu pa gole.” (Kufuluka 34:24) Ajirayeri wakukhulupirika omwe akhagopa Yahova, akhayenda kukawonekera ku maphwando yomwe yakhacitika gole liri-lentseya. Bzimwebzi bzikhacitisa kuti iwo atambire mabaibai mazinji. Iwo akhakhala na mwayi wakupfunza Malamulo ya Mulungu, kukumbukira bzinthu bzentse bzabwino bzomwe Yahova akhawacitira na kukhala na mpata wakuceza na Ajirayeri anzawo omwe akhafunambo Yahova. (Bzakutonga 16:15) Ntsiku zino, timbakhalambo na mabaibai mabodzi-bodziya tikambacita nyongo kuti tigumanike pa mitsonkhano. Kumbukirani kuti Yahova ambabva tani akambatiwona tikupereka mitawiro yathu yacigwatira, koma icikhala yakubveka bwino. Kulewa cadidi, iye ambakomedwa kwene-kwene.

10. Thangwe ranyi kuimba n’kwakufunika kwene-kwene pa kunamata Yahova?

¹⁰ Tikambaimba nyimbo pabodzi na abale wathu timbakhala tikunamata Yahova. (Salimo 28:7) Ajirayeri akhawona kuti kuimba ni cinthu cakufunika kwene-kwene pa kunamata Yahova. Mambo Davide adasankhula Alevi wakukwana 288 kuti ambaimbe ku templo. (1 Nkhani 25:1, 6-8) Ntsiku zino, ifepano tingalatize kuti timbafuna Yahova tikambaimba nyimbo zacitumbizo. Tin’funika lini kukhala na madu ya kuimba kuti ticite bzimwebzi. Tingandendemezere bzimwebzi na kulewalewa. Ifepano tikambalewalewa “timbaphonya kazinji-kentse,” tsono timbaleka lini kuceza na anzathu mu gwere na mu upalizi. (Tiyago 3:2) Mpsibodzi-bodzimbo na kuimba, ifepano tingakwanise basi kuimbira Yahova nyimbo ticimutumbiza napo penu timbawona kuti tiribe madu ya kuimba.

11. Mwakubverana na Salimo 48:13, thangwe ranyi tin’funika kumbapambula nthawe kuti timbapfunze Fala la Mulungu na banja lathu?

¹¹ Tikambapfunza Fala la Mulungu na kupfunzisambo wana wathu bza iye timbakhala tikunamata Yahova. Pa ntsiku ya Sabudu, Ajirayeri akhambaphata lini basa thangwe ikhali ntsiku yakulimbisa uxamwali bwawo na Yahova. (Kufuluka 31:16, 17) Ajirayeri wakukhulupirika akhambapfunzisa wana wawo bza Yahova na bzinthu bzabwino bzomwe akhawacitira. Ntsiku zino, ifepano tin’funika kumbapambula nthawe kuti timbapfunze Fala la Mulungu. Bzimwebzi bzimbacita mbali yakunamata kwathu Yahova ndipo bzimbatithandiza kukhala pa uxamwali na iye. (Salimo 73:28) Tikambapambula nthawe kuti tipfunze Fala la Mulungu na banja lathu, timbathandiza wana wathu kukhala pa uxamwali bwakulimba kwene-kwene na Baba wathu wa kudzulu.—Werengani Salimo 48:13.

12. Kodi Yahova akhawona tani basa lakukonza bzinthu bza mu tendi la mkonkhano ndipo ifepano tikupfunza ciyani?

¹² Tikakhala tikumanga na kukonza bzinthu bzomwe bzadzongeka pa nyumba zakunamatira timbakhala tikunamata Yahova. Bibliya limbalewa kuti basa lakumanga tendi la mkonkhano na bzinthu bza mu tendimo likhali “basa la . . . kupambulika.” (Kufuluka 36:1, 4) Ntsiku zino, Yahova ambawonambo kuti basa lakumanga Nyumba za Umambo na nyumba zinango za  gulu lathu ndakupambulika. Pana abale na mpfumakazi omwe ambamala nthawe izinji akuphata basa limweri. Kodi ifepano timbatenda lini basa lomwe iwo ambalicitali? Tsono iwo ambacitambo basa lakupalizira. Ndipo winango wa iwo ambafunambo kukhala apainiya. Akulu wa gwere angalatize kuti ambathandizira basa lakumanga akambabvuma kuti abale omwe ambacita basa limweri acite upainiya akakhala kuti akuthemera. Napo penu tina luso lakumanga ayai ne, tentsenefe tingathandizire kuti nyumba zomwe gulu lathu limbaphatisa basa zikhale zabwino na zakucena.

13. Kodi n’ciyani comwe tin’funika kumbakumbukira tikambacita bzakupereka kuti tithandizire basa la Umambo?

¹³ Tikambathandizira basa la Umambo na bzakupereka bzathu timbakhala tikunamata Yahova. Ajirayeri akhafunika lini kukawonekera kwa Yahova cimanja-manja. (Bzakutonga 16:16) Iwo akhafunika kunyamula bzinthu bzomwe akhanabzo kuti akabzipereke kwa Yahova. Akacita bzimwebzi, akhalatiza kuti akutenda bzentse bzomwe Yahova akhawacitira. Kodi ifepano tingalatizembo tani kuti timbatenda Yahova thangwe ra bzinthu bzabwino bzomwe ambaticitira? Cinthu cibodzi comwe tingacite ni kupereka kobiri yomwe tinayo kuti tithandizire mabasa ya pa gwere lathu na basa la pa dziko lentse. Pa nkhani imweyi, mpostolo Paulo adalewa kuti: “Kupereka na mtima wentse kumbakondwesa Mulungu thangwe iye ambafuna kuti munthu apereke mwakubverana na bzomwe anabzo.” (2 Akolinto 8:4, 12) Yahova ambakomedwa kwene-kwene na bzakupereka bzomwe timbacita na mtima wentse napo kuti tingapereke kobiri zing’ono-ng’ono ayai zizinji.—Marko 12:42-44; 2 Akolinto 9:7.

14. Mwakubverana na Mimwani 19:17, kodi Yahova ambabva tani tikambathandiza abale wathu omwe akusaya?

¹⁴ Tikambathandiza abale wathu omwe akusaya timbakhala tikunamata Yahova. Yahova adalewa kuti angadabaira Ajirayeri omwe angadathandiza anyakusauka. (Bzakutonga 15:7, 10) Ndipo ifepanombo tikathandiza m’bale ayai mpfumakazi yomwe ikusaya, Yahova ambawona kuti tikupereka mphaso kwa iye. (Werengani Mimwani 19:17.) Kumbukirani kuti pomwe Akristau wa ku Filipi adatumizira mphaso Paulo pomwe akhali m’kawoko, iye adalewa kuti zimwezi zikhali “ntsembe zakubvumizika na zakukondwesa Mulungu.” (Afilipi 4:18) Mbakumbukirani abale wa m’gwere mwanu ndipo mbabzibvunzani kuti: ‘Kodi pana munthu omwe ningamuthandize?’ Dziwani kuti Yahova ambakomedwa tikambaphatisa basa nthawe yathu, mphanvu zathu, luso lathu na bzinthu bzathu kuti tithandize wanthu omwe akusaya. Ndipo iye ambawona kuti bzimwebzi bzimbacita mbali ya kunamata kwathu.—Tiyago 1:27.

15. Thangwe ranyi tingalewe kuti kunamata Yahova kulibe kunesa napo kuti kumbafuna nthawe na nyongo?

¹⁵ Kunamata Yahova kumbafuna nthawe na nyongo. Tsono kulibe kunesa. (1 Juwau 5:3) Thangwe ranyi? Thangwe rakuti lufoyi ndiro limbacitisa kuti timunamate. Tiyezezere kuti mwana akufuna kupasa cinthu pai wace. Iye angamale nthawe akunemba cithunzi-thunzi kuti awapase. Ndipo angawone lini bzimwebzi ninga kudzonga nthawe yace papezi. Iye akucita bzimwebzi thangwe rakuti ambawafuna pai wacewo ndipo an’komedwa kuwapasa cithunzi-thunzico. Mpsibodzi-bodzimbo na ifepano, pakuti timbafuna Yahova, timbakomedwa kuphatisa basa nthawe yathu na mphanvu zathu pa kumunamata.

16. Mwakubverana na Ahebereu 6:10, kodi Yahova ambawona tani nyongo yomwe timbacita kuti timukondwese?

¹⁶ Abereki omwe ana lufoyi ambadikhirira lini kuti wana wawo awapase mphaso zakundendemera. Iwo ambadziwa bzomwe mwana ali-wentse angakwanise kucita na bzomwe angakwanise lini. Mpsibodzi-bodzimbo na Baba  wathu wa kudzulu. Iye ambadziwa bzomwe tingakwanise kucita na bzomwe tingakwanise lini. Pinango imwepo mungakwanise kucita bzizinji kuposa abale wanu na axamwali wanu. Ayai, pinango imwepo mungakwanise lini kucita bzizinji kuposa anzanu thangwe rakuti mwakalamba, mumbaduwala-duwala ayai thangwe rakuti m’banja mwanu muna wanthu omwe ambathemba imwepo. Penu n’tenepo, lekani kuwofoka. (Agalatiya 6:4) Yahova cipo acidzayebwa basa lomwe mumbacita. Iye ambakomedwa na bzentse bzomwe mumbamucitira, mukabzicita na mathangwe yabwino. (Werengani Ahebereu 6:10.) Dziwani kuti iye ambakwanisa kuwona bzomwe mtima wanu umbakhumba kucita. Ndipo akufuna kuti mukomedwe na bzomwe mukukwanisa kumucitira.

17. (a) Kodi n’ciyani cingatithandize bzikakhala bzikutinesa kucita bzomwe tapfunza mu nkhani ino? (b) Kodi bzomwe mwapfunza pa kwadru yakuti “ Thimizirani Mpfatso Wanu” bzakuthandizani tani?

¹⁷ Tsono n’ciyani cingatithandize bzikakhala bzikutinesa kucita bzomwe tapfunza mu nkhani ino, ninga kupfunza Bibliya na kupalizira? Comwe cingatithandize ni kumbacita bzinthu bzimwebzi kawiri-kawiri ndipo bzimwebzi bzin’dzatithandiza kuti timbakomedwe nabzo na kubzizolowera. Ifepano tingandendemezere bzomwe timbacita pa kunamata Yahova na kucita masenzeka yakulimbisa thupi ayai kupfunza kuimba valimba. Tikambacita bzimwebzi mwa kumoga-moga tin’dzabzizolowera lini. Tsono tiyezezere kuti takonza kuti timbabzicite ntsiku zentse. Ntsiku zakuyambirira, pinango tingambapambule nthawe kuti timbabzicite m’tumphindi tung’ono-ng’ono ntsiku iri-yentse. Ndipo na kupita kwa nthawe tingambadzathimizire nthawe yomwe timbamala pa kubzicita. Tikambawona kuti bzikutifambira bwino, ifepano tin’dzayamba kukomedwa na bzomwe tikucitabzo. Tin’funikambo kucita bzibodzi-bodzibzi pa nkhani ya kunamata Yahova.

18. Kodi cinthu cakufunika kwene-kwene pa moyo wathu n’ciponi ndipo n’ciyani cin’dzacitika tikacita cinthu cimweco?

¹⁸ Cinthu cakufunika kwene-kwene pa moyo wathu ni kunamata Yahova na mtima wathu wentse. Tikacita bzimwebzi, ifepano tin’dzakhala na moyo wabwino ndipo tin’dzakhala na mwayi wakunamata Yahovayo mpaka kale-kale. (Mimwani 10:22) Ifepano tiri kale pa mtendere thangwe timbadziwa kuti Yahova ambathandiza atumiki wace akakhala akugumana na mabvuto. (Zaiya 41:9, 10) Ndipopa, tina mathangwe yakukhalira wakukondwa pomwe tikunamata Baba wathu wa lufoyi omwe ngwakuthemera “kupasidwa ulemerero na ulemu” na bzentse bzomwe adalenga!—Apokalipse 4:11.