1, 2. Йеговӕ нӕ лӕггадӕй арази кӕд уодзӕй?

 «ЙЕГОВИ ЛӔГГАДГӔНӔГ» – аци дзурдтӕ фегъосгӕй дӕ цӕститӕбӕл ци рауайуй? Ӕ уӕргутӕбӕл лӕугӕй Йеговӕмӕ сӕрниллӕгӕй ка ковуй, уӕхӕн ӕнсувӕрбӕл нӕ расагъӕс кӕнис? Кенӕ ба игъӕлдзӕгӕй Библи ӕртасунмӕ ка ӕрӕмбурд ӕй, уӕхӕн бийнонтӕ дӕ цӕститӕбӕл нӕ рауайунцӕ?

² Ӕма ӕцӕгӕйдӕр, аци гъуддӕгтӕ хаунцӕ нӕ лӕггадӕмӕ. Фал цӕмӕй Йеговӕ нӕ лӕггадӕй арази уа, уой туххӕй гъӕуама уа ӕ фӕндонмӕ гӕсгӕ. Удта гъӕуама бӕрӕг уа, ке ӕй уарзӕн ӕма ’й ке нимайӕн. Мах Йегови берӕ уарзӕн, удта ’й зонӕн, ӕрмӕстдӕр е ке ӕй уой аккаг, цӕмӕй ин лӕггадӕ кӕнӕн. Уомӕ гӕсгӕ нӕ фӕндуй, цӕмӕй нӕмӕ хуӕздӕрӕй ци ес, уой ин дӕттӕн.

3. Аци статьяй цӕмӕ ӕркӕсдзиан?

³ Аци статьяй ӕркӕсдзиан, рагидзаманти Йеговӕ арази кӕмӕй адтӕй, уӕхӕн еузӕрдон лӕггадгӕнгути хабӕрттӕмӕ. Удта ма ӕркӕсдзиан, цӕхуӕн аст гъуддаги гъӕуй кӕнун, цӕмӕй Йеговӕ нӕ лӕггадӕй арази уа, уомӕ. Еци гъуддӕгтӕ ӕвзаргӕй расагъӕс кӕнӕ, фӕххуӕздӕр кӕнун дӕ ци гъӕуй, уобӕл. Фӕстагмӕ ба радзубанди кӕндзиан, нӕ лӕггадӕ куд баст ӕй, амондгун уодзиан ӕви нӕ, уой хӕццӕ.

4. Киристей ӕрцуди размӕ ци лӕггадгӕнгутӕ цардӕй, етӕ Йегови ке уарзтонцӕ ӕма ’й ке нимадтонцӕ, е цӕмӕй бӕрӕг адтӕй?

⁴ Киристей ӕрцуди размӕ дӕр зӕнхӕбӕл цардӕй Йегови  еузӕрдон лӕггадгӕнгутӕ. Зӕгъӕн, Авель, Ной, Авраам ӕма Иов Йегови уарзтонцӕ ӕма ’й нимадтонцӕ. Цума е цӕмӕй бӕрӕг адтӕй? Етӕ ибӕл федарӕй ӕууӕндтӕнцӕ, игъустонцӕ имӕ ӕма ин нивӕндтӕ хастонцӕ. Библий листӕг хабӕртти уӕнгӕ финст не ’рцудӕй, куд ин лӕггадӕ кодтонцӕ, е. Фал федарӕй ес зӕгъӕн, еци нӕлгоймӕгтӕ Йеговӕй ке тарстӕнцӕ, Йеговӕ ба син сӕ лӕггадӕй арази ке адтӕй. Фӕстӕдӕр Йеговӕ Авраами байзӕддӕгтӕн Моисеййи фӕрци равардта Закъон. Уоми бӕлвурдӕй финст ӕрцудӕй, Йеговӕн лӕггадӕ кӕнун куд гъудӕй, е.

5. Киристе ку рамардӕй ӕма ку райгас ӕй, уӕдӕй фӕстӕмӕ Йеговӕн куд лӕггадӕ кӕнун гъӕуй?

⁵ Киристе ку рамардӕй ӕма ку райгас ӕй, уой фӕсте Йеговӕ ӕ адӕнӕн Моисеййи закъон нӕбал ӕнхӕст кӕнун кодта (Ром. 10:4). Е син равардта нӕуӕг закъон – «Киристей закъон» (Гал. 6:2). Еци закъон сӕ ахур кӕнун нӕ гъудӕй, удта си листӕг хабӕртти уӕнгӕ финст не ’рцудӕй, ци ’нгъезуй кӕнун, ци ба – нӕ. Мадта ’й уӕд киристӕнттӕ куд гъӕуама ӕнхӕст кодтайуонцӕ? Уони гъудӕй алцӕмӕйдӕр Киристей фӕнзун ӕма цӕбӕл ахур кодта, уомӕ гӕсгӕ сӕ цард аразун. Гъе уотӕ абони мах дӕр фӕндуй Киристей фӕнзун ӕма Йегови зӕрдӕ рохс кӕнун. Ӕма гъе уотӕ ке архайӕн, уой фӕрци уодӕнцойнӕ иссерӕн (Матф. 11:29).

6. Цӕмӕй нин аци статья пайда ӕрхӕсса, уой туххӕй нӕ ци гъӕуй кӕнун?

⁶ Нӕ лӕггадӕмӕ ка хауй, еци фӕззелӕнтӕбӕл ку дзорӕн, уӕд хуарз уайдӕ нӕхе ку бафӕрсианӕ: «Нури уӕнгӕ мин ци бантӕстӕй? Фулдӕр байархайун мӕ цӕбӕл гъӕуй?» Цӕхуӕндӕр гъуддӕгтӕ дин хуарз ке ӕнтӕсунцӕ, е дин ӕхцӕуӕн куд нӕ уодзӕй. Фал нӕ уӕддӕр гъӕуй Йеговӕй корун, цӕмӕй нин бавдеса, фулдӕр байархайун ма нӕ цӕбӕл гъӕуй, уой.

7. Йеговӕ нин нӕ зӕрдиаг кувдтитӕмӕ ци цӕстӕй кӕсуй?

⁷ Йеговӕмӕ ке фӕкковӕн, е хауй нӕ лӕггадӕмӕ. Библий нӕ кувдтитӕ барст цӕунцӕ хуӕрздӕф боди хӕццӕ. Рагидзаманти еци бодӕ иссодзиуонцӕ Хуцауи цатури, фӕстӕдӕр ба – ковӕндони (Пс. 141:2). Еци боди смаг Хуцауӕн хъӕбӕр ӕхцӕуӕн фӕууидӕ. Гъе уотӕ ӕхцӕуӕн ин фӕуунцӕ нӕ зӕрдиаг кувдтитӕ дӕр, цийфӕнди хумӕтӕг дзурдтӕй ма уонцӕ, уӕддӕр (Ӕмб. 15:8; Дук. з. 33:10). Нӕ бон ӕй федарӕй ӕууӕндун, Йеговӕн кувди медӕг ку фӕдздзорӕн, куд берӕ ’й уарзӕн ӕма си куд боз ан, уой, уӕд ин уӕхӕн кувдтитӕ ӕхцӕуӕн ке фӕуунцӕ. Фӕндуй ӕй, цӕмӕй ин нӕ кувдтити не ’гас тухститӕ дӕр ӕма не ’гас фӕндтӕ дӕр ӕргом кӕнӕн. Хуарз уайдӕ, раковуни размӕ ку расагъӕс кӕнианӕ, ци ин дзордзиан, уобӕл. Гъе уӕд зӕгъӕн уодзӕй, ӕма Йегови рази ӕрлӕудтан тӕккӕ хуӕздӕр хуӕрздӕф боди хӕццӕ.

8. Нӕ бон куд ӕй Хуцауи кадгин кӕнун?

⁸ Йегови ке фӕккадгин кӕнӕн, е хауй нӕ лӕггадӕмӕ (Пс. 34:1). Иннетӕн Йегови дессаги менеугути ӕма гъуддӕгти туххӕй ку фӕдздзорӕн, уӕд ӕй уотемӕй кадгин фӕккӕнӕн. Уомӕ ба нӕ фӕрразӕнгард кӕнуй, боз си ке ан, е. Йегови хуарздзийнӕдтӕн банимайӕн дӕр нӕййес, гъе уотӕ берӕ ин ӕнцӕ. Мадта нин Хуцауи кадгин кӕнунмӕ хуарз фадуат ес – иннетӕн ӕ гъуддӕгти туххӕй дзорун. Игъосун кӕнгӕй Йеговӕн фӕххӕссӕн «кади нивонд, гъома ин нӕ цъухи дзурдӕй адӕни астӕу ӕ ном кадгин кӕнӕн» (Дзиуит. 13:15). Мадта нӕ кувди размӕ ци дзордзиан, уобӕл расагъӕс кӕнун куд фӕгъгъӕуй, уотӕ нӕ фӕгъгъӕуй расагъӕс кӕнун, адӕни хӕццӕ куд дзордзиан, уобӕл дӕр. Мах фӕндуй, цӕмӕй нӕ кади нивонд маци гъӕуагӕ уа. Уомӕ гӕсгӕ игъосун  кӕнгӕй фӕййархайӕн, цӕмӕй алке хӕццӕ дӕр зӕрдиагӕй дзорӕн.

9. Радзорӕ, ӕмбурдтӕ не ’гасемӕндӕр, удта дӕхецӕн дӕр ци пайда хӕссунцӕ, уой.

⁹ Ӕмбурдтӕмӕ ке цӕуӕн, е хауй нӕ лӕггадӕмӕ. Моисеййи закъони уотӕ загъд адтӕй: «Анзмӕ ӕртӕ хатти уӕ нӕлгоймӕгтӕ еугурӕйдӕр гъуама ӕрбацӕуонцӕ дӕ Хуцау Йегови размӕ, ке равзара, еци бунатмӕ» (Дук. з. 16:16). Еци рӕстӕг израилӕгти фӕгъгъӕуидӕ сӕ зӕнхитӕ ӕма сӕ хӕдзӕрттӕ ниууадзун. Фал син Йеговӕ зӕрдӕ байвардта: «Уӕ зӕнхитӕмӕ [уин] хӕстӕг цӕугӕ дӕр неке бакӕндзӕй» (Рац. 34:24). Гъема израилӕгтӕ дӕр сӕ зӕрдӕ Йеговӕбӕл даргӕй рандӕуиуонцӕ еци бӕрӕгбӕнттӕ бӕрӕг кӕнунмӕ, ӕма е сӕхецӕн дӕр устур пайда хаста. Уой фӕрци Йегови закъон хуӕздӕр балӕдӕриуонцӕ, сӕ бон фӕууидӕ Йегови хуарздзийнӕдтӕбӕл расагъӕс кӕнун, удта кӕрӕдзей нифс бафедар кӕнун (Дук. з. 16:15). Абони махӕн дӕр не ’мбурдтӕ гъе уӕхӕн пайда хӕссунцӕ, кӕд нӕ еуӕй-еухатт нӕхе цӕмӕйдӕрти фӕццох кӕнун багъӕуй, цӕмӕй сӕмӕ бахауӕн, уӕддӕр. Удта ма дӕ цӕститӕбӕл рауайун кӕнӕ, Йеговӕн куд ӕхцӕуӕн фӕууй, ӕмбурди нӕ къох ку исдарӕн ӕма дзӕбӕх ке бацӕттӕ кодтан, уӕхӕн цубур дзуапп ку раттӕн, уӕд.

10. Цӕмӕн ес уотӕ зӕгъӕн, ӕма зартӕ нӕ лӕггади ӕхсидзгӕ бунат ахӕссунцӕ?

¹⁰ Кади зартӕ хаунцӕ нӕ лӕггадӕмӕ (Пс. 28:7). Израилӕгтӕ кади зартӕ зарун сӕ лӕггади ӕхсидзгӕ гъуддагбӕл нимадтонцӕ. Паддзах Давид ма 288 левити равзурста, цӕмӕй Йегови хӕдзари зардтайуонцӕ (1 Анз. 25:1, 6–8). Гъе уотӕ абони дӕр Йеговӕн кади зартӕ ку фӕззарӕн, уӕд ӕй бавдесӕн, уарзгӕ ’й ке кӕнӕн. Удта зарун зонӕн ӕви нӕ, е уотӕ ӕхсидзгӕ нӕй. Расагъӕс кӕнӕ, «дзурдӕй ка нӕ рӕдуйуй», уӕхӕн нӕййес (Иак. 3:2). Фал нӕ уӕддӕр е нӕ фӕууорамуй ӕмбурди дзуӕппитӕ дӕттунӕй ӕма игъосун кӕнунӕй. Мадта дӕмӕ кӕд уотӕ кӕсуй, ӕма зарунмӕ неци уотӕ дӕсни дӕ, уӕддӕр дӕ е ма бауорамӕд Йеговӕн кади зартӕ зарунӕй.

11. Псалом 48:13 куд финст ӕй, уомӕ гӕсгӕ бийнонти ахур уадзун ӕхсидзгӕ цӕмӕн ӕй?

¹¹ Библи ӕртасун ӕма бийнонти ахур хаунцӕ нӕ лӕггадӕмӕ. Алли сабати дӕр израилӕгтӕ сӕ ӕнӕуой гъуддӕгтӕ ниууадзиуонцӕ, ӕма се ’ргом раздахиуонцӕ Йегови гъуддӕгтӕмӕ (Рац. 31:16, 17). Ниййергутӕ сӕ сувӕллӕнттӕн дзориуонцӕ Йегови туххӕй ӕма ӕ хуарздзийнӕдти туххӕй. Ӕма махӕн дӕр нӕ ихӕс ӕй Библи кӕсунмӕ ӕма ’й ӕртасунмӕ рӕстӕг хецӕн кӕнун. Уотемӕй Йеговӕн лӕггадӕ кӕндзиан ӕма имӕ хӕстӕгӕй-хӕстӕгдӕр кӕндзиан (Пс. 73:28). Мадта ниййергутӕ бийнонти ахур ку фӕууадзунцӕ, уӕд уотемӕй «федӕни фӕлтӕрӕн», гъома сӕ сувӕллӕнттӕн, фенхус кӕнунцӕ, цӕмӕй нӕ уӕларвон Фидӕбӕл сӕхе бӕттонцӕ. (Бакӕсӕ Псалом 48:13.)

12. Цатури куститӕмӕ Йеговӕ цӕхуӕн цӕстӕй кастӕй, е нин цӕбӕл дзорӕг ӕй?

¹² Йеговӕн кӕми фӕллӕггадӕ кӕнӕн, уӕхӕн бунӕттӕ кӕнун ӕма сӕмӕ зелун хауй нӕ лӕггадӕмӕ. Цатур ӕма ’й ци дзаумӕуттӕ гъудӕй, уони ка кодта, еци адӕни куст Йеговӕ нимадта лӕггадӕбӕл, уомӕн ӕма цатур адтӕй «сугъдӕг бунат» (Рац. 36:1, 4). Ӕма абони дӕр Йеговӕ Паддзахади залтӕ, удта нӕ организаций ӕндӕр бӕстихӕйттӕ кӕнуни гъуддаг нимайуй лӕггадӕбӕл. Еци гъуддагбӕл хуӕртӕ ӕма ӕнсувӕртӕй еуӕй-еуетӕ хъӕбӕр берӕ рӕстӕг харз кӕнунцӕ. Ӕма син уой туххӕй хъӕбӕр арфӕ кӕнӕн! Еци хуӕртӕ ӕма ӕнсувӕртӕ игъосун кӕнуни гъуддаги дӕр архайунцӕ. Кедӕрти ба си пионертӕй лӕггадӕ кӕнун дӕр фӕндадтайдӕ. Мадта си еске курдиадӕ ку бадӕтта ӕма домӕнтӕмӕ гӕсгӕ аккаг ку уа, уӕд ӕй хестӕр нӕлгоймӕгтӕ гъӕуама  иснисан кӕнонцӕ. Уотемӕй хестӕр нӕлгоймӕгтӕ ӕнхус кӕндзӕнцӕ нӕ организаций арӕзтадон гъуддагӕн. Арӕзтадон гъуддӕгтӕмӕ ка нӕ арӕхсуй, уони бон ба ӕй Паддзахади зал ӕфснайунмӕ кенӕ имӕ базелунмӕ фӕккӕсун.

13. Паддзахади гъуддагӕн нисайнӕгтӕ дӕттунмӕ ци цӕстӕй гъӕуама кӕсӕн?

¹³ Паддзахади гъуддагӕн нисайнӕгтӕ дӕттун хауй нӕ лӕггадӕмӕ. Израилӕгтӕн уӕхӕн фӕдзӕхст адтӕй, цӕмӕй бӕрӕгбӕнтти рӕстӕг Йегови размӕ ревӕд къохӕй маке ӕрбацудайдӕ (Дук. з. 16:16). Адӕймаг цӕхуӕн нивонд ӕрхӕсдзӕй, е кӕнгӕ адтӕй ӕ уавӕртӕй. Еци нивонди фӕрци адӕймаги бон адтӕй Йеговӕн райарфӕ кӕнун, цидӕриддӕр хуарздзийнӕдтӕ ин кӕнуй, уони туххӕй. Мах бон ба куд ӕй Йеговӕн арфӕ кӕнун? Зӕгъӕн, нӕ фӕрӕзтӕ ку не ’вгъау кӕнӕн не ’мбурди хӕрзтӕн ӕма ӕгас дуйнеуон гъуддагӕн. Апостол Павел уой туххӕй загъта: «Адӕймаг ести зӕрдиагӕй ку ратта, уӕд уӕхӕн лӕвар Хуцауӕн уӕлдай ӕхцӕуӕн ӕй. Ӕма адӕймаг ба дӕтгӕ фӕккӕнуй, ци имӕ нӕййес, уой нӕ, фал имӕ ци ес, уой» (2 Кор. 8:4, 12). Мадта ӕгас зӕрдӕй ци нисайнӕгтӕ раттӕн, етӕ Йеговӕн хъӕбӕр ӕхцӕуӕн фӕуунцӕ, цийфӕнди минкъий нӕмӕ ма кӕсонцӕ, уӕддӕр (Мар. 12:42–44; 2 Кор. 9:7).

14. Ӕмбесӕндти 19:17 куд финст ӕй, уомӕ гӕсгӕ, хуӕртӕ ӕма ӕнсувӕртӕмӕ ку фӕккӕсӕн, уӕд уомӕ Йеговӕ цӕхуӕн цӕстӕй ракӕсуй?

¹⁴ Ӕнхусгъӕуагӕ ка ӕй, еци хуӕртӕ ӕма ӕнсувӕртӕмӕ ке фӕккӕсӕн, е хауй нӕ лӕггадӕмӕ. Йеговӕ израилӕгтӕн загъта, мӕгурӕн ка банхус кӕна, уомӕн уой фӕсте ӕхуӕдӕг ке райарфӕ кӕндзӕй (Дук. з. 15:7, 10). Нӕ хуӕртӕ ӕма ӕнсувӕртӕй ӕнхусгъӕуагӕ ка ӕй, уонӕмӕ ку фӕккӕсӕн, уӕд Йеговӕ нӕ рази ӕхе ихӕсгинбӕл фӕннимайуй. (Бакӕсӕ Ӕмбесӕндтӕ 19:17.) Павел ахӕст ку адтӕй, уӕд ин Филиппти цӕрӕг киристӕнттӕ ци лӕвӕрттӕ рарвистонцӕ, уони исхудта, «Хуцауӕн ӕхцӕуӕн ка ӕй ӕма ӕ зӕрдӕмӕ ка цӕуй, уӕхӕн нивонд» (Фил. 4:18). Мадта дӕхе бафӕрсӕ: «Не ’мбурди мӕ бон кӕмӕн ӕй банхус кӕнун?» Йеговӕн хъӕбӕр ӕхцӕуӕн фӕууй, нӕ рӕстӕг, нӕ хъауритӕ ӕма нӕ фӕрӕзтӕ ку нӕ февгъау кӕнӕн, цӕмӕй, ӕнхусгъӕуагӕ ка ӕй, уонӕмӕ фӕккӕсӕн. Уӕхӕн гъуддӕгтӕн Йеговӕ аргъ кӕнуй ӕма сӕ нимайуй нӕ лӕггадӕбӕл (Иак. 1:27).

15. Йеговӕн лӕггадӕ кӕнун нӕхецӕн уаргъбӕл цӕмӕннӕ нимайӕн?

¹⁵ Цӕмӕй Йеговӕн, уой куд фӕндуй, уотӕ лӕггадӕ кӕнӕн, уой туххӕй нӕ берӕ рӕстӕг ӕма хъауритӕ бахарз кӕнун фӕгъгъӕуй. Фал уой нӕхецӕн уаргъбӕл нӕ нимайӕн (1 Иоан. 5:3). Цӕмӕннӕ? Уомӕн ӕма Йегови уарзӕн. Дӕ цӕститӕбӕл рауайун кӕнӕ: минкъий сувӕллони хъӕбӕр фӕндуй ӕ фидӕн ести хуарз ракӕнун. Гъема цалдӕр сахатти бадуй ӕма цидӕртӕ хузӕ кӕнуй, ӕма зийнадӕ дӕр нӕ кӕнуй, уомӕн ӕма ӕ фиди берӕ уарзуй ӕма ’й хъӕбӕр фӕндуй ести лӕвар ин искӕнун. Гъе уотӕ мах дӕр Йегови берӕ уарзӕн, ӕма ин уомӕ гӕсгӕ нӕдӕр нӕ рӕстӕг, нӕдӕр нӕ хъауритӕ нӕ февгъау кӕнӕн.

16. Дзиуиттӕгтӕмӕ 6:10 куд финст ӕй, уомӕ гӕсгӕ Йеговӕ цӕхуӕн цӕстӕй кӕсуй, ӕ зӕрдӕ барохс кӕнунбӕл ин ке архайӕн, уомӕ?

¹⁶ Сӕ сувӕллӕнтти берӕ ка уарзуай, уӕхӕн ниййергутӕн сӕ алли сувӕллони лӕвар дӕр хъазар фӕууй. Етӕ ’й лӕдӕрунцӕ, ӕгасӕйдӕр син фӕйнӕхузи ке ’нцӕ, удта сӕ кӕрӕдзей хӕццӕ дӕр нӕ фӕббарунцӕ. Гъе уотӕ нӕ уӕларвон Фидӕ дӕр лӕдӕруй, алкӕмӕндӕр ни ӕхе уавӕртӕ ке ес. Ка ’й зонуй, дӕу бон де ’мбӕлттӕй фулдӕр ӕй кӕнун. Кенӕ ба дӕ бон нӕй, цӕйбӕрцӕ дӕ фӕндуй, уойбӕрцӕ кӕнун дӕ карӕмӕ кенӕ дӕ ’нӕнездзийнадӕмӕ гӕсгӕ, кенӕ ба дӕбӕл дӕ бийнонти  рази ци ихӕстӕ ес, уомӕ гӕсгӕ. Кӕд уотӕ ’й, уӕддӕр дӕ нифс ма сӕттӕд (Гал. 6:4). Йеговӕ некӕд феронх кӕндзӕй, ду куд бахъиамӕт кодтай, уой. Кӕд ин ӕгас хъауритӕй ӕма кӕдзос зӕрдӕй лӕггадӕ кӕнис, уӕд ди арази уодзӕй. (Бакӕсӕ Дзиуиттӕгтӕмӕ 6:10.) Йеговӕ ’й зонуй, цӕйбӕрцӕ дӕ фӕндадтайдӕ кӕнун, уой. Фал ӕй фӕндуй, цӕмӕй дӕ уавӕрти дӕ бон ци ӕй, уой ке кӕнис, уобӕл цийнӕ кӕнай.

17. а) Нӕ лӕггади кӕцидӕр гъуддӕгтӕ нин хуарз ку нӕ уайонцӕ, уӕд нин ци банхус кӕндзӕй? б)  23 фарсбӕл рамки ци гъуддӕгтӕ ӕвдист цӕунцӕ, етӕ нӕ амондмӕ куд хаунцӕ?

¹⁷ Нӕ бон ци ӕй кӕнун, нӕ лӕггадӕмӕ ка хауй, еци гъуддӕгтӕй нин кӕцидӕртӕ хуарз ку нӕ уайуонцӕ, уӕд? Зӕгъӕн, Библий ахур кенӕ игъосун кӕнуни гъуддаг. Еци гъуддӕгтӕ куд арӕхдӕр кӕнай, уотӕ дин хуӕздӕр уайдзӕнцӕ ӕма дин цийнӕ дӕр фулдӕр хӕсдзӕнцӕ. Аци гъуддӕгтӕ ӕнгъезуй рабарун, уӕхӕн цӕвветтони хӕццӕ. Зӕгъӕн, адӕймаги фӕндуй кафунбӕл кенӕ фӕндурбӕл цӕгъдун исахур ун. Еци гъуддӕгтӕ ескӕд еу хатт ку кӕна, уӕд сӕбӕл тагъд не ’сахур уодзӕй. Фал син алли бон дӕр фагӕ рӕстӕг ку хецӕн кӕна, уӕд исдӕсни уодзӕй ӕма ин ӕнтӕсгӕ дӕр берӕ кӕндзӕй. Фиццӕгти зин ку уа, уӕд ӕнгъезуй цалдӕр минуттемӕй райдайун. Уой фӕсте ба имӕ бонӕй-бонмӕ рӕстӕг ӕфтаугӕ цӕун. Куд хуарз уайун ин райдӕдта, уой уингӕй ба ’й никки фулдӕр фӕнддзӕй ахур кӕнун. Ӕма гъе уотӕ ’й, нӕ лӕггадӕмӕ ци гъуддӕгтӕ хаунцӕ, уони хӕццӕ дӕр.

18. Царди нин тӕккӕ ӕхсидзгӕдӕр ци гъӕуама уа ӕма цӕмӕн?

¹⁸ Йеговӕн ӕгас зӕрдӕй ку лӕггадӕ кӕнӕн, уӕд нӕ цард дзӕгъӕли нӕ уодзӕй. Ӕцӕг амондгун нӕ цард исхонӕн уодзӕй, ку ин лӕггадӕ кӕнӕн, уӕд. Ӕма нин ӕрмӕстдӕр гъе уӕд уодзӕй ӕносон цардӕй нифс (Ӕмб. 10:22). Цийфӕнди уавӕри дӕр Йеговӕ е ’нхуси къох ӕрбадарунмӕ цӕттӕ ке ӕй, уой ке зонӕн, уой фӕрци нӕ зӕрди ес фарнӕ (Ис. 41:9, 10). Ӕцӕгӕйдӕр, нӕ уӕларвон Фидӕ ӕй «кадӕ ӕма намуси аккаг», уомӕн ӕма алцидӕр е сфӕлдиста. Ӕма ин ке лӕггадӕ кӕнӕн, уой ба нӕхецӕн амондгун гъуддагбӕл нимайӕн! (Рарг. 4:11).