1-2. Panon tayon naseguro ya awaten nen Jehova so panagdayew tayo?

 ANTOY naiisip mo no narengel moy salitan “panagdayew”? Seguro, naiimadyin moy sakey ya agi ya akatalimukor ya manpipikasi tan impapuson mitotongtong ed si Jehova. Odino ompan naisip moy sakey ya pamilya ya malikeliket ya manpa-family worship.

² No ontan so naisip mo, duga ka ta say gagawaen da et panagdayew ed si Jehova. Panon tayon naseguro ya awaten nen Jehova so panagdayew tayo? Awaten itan nen Jehova no gagawaen tayoy panlabayan to, tan no nanengneng to ya sikatoy inar-aro tan rerespetoen tayo. Siempre, inar-aro tayon maong si Jehova. Amta tayo ya sikato labat so karapat-dapat ya dayewen, kanian labay tayon iter so ‘the best’ tayod sikato.

3. Anto ray aralen tayo ed sayan artikulo?

³ Aralen tayo ed sayan artikulo no panon ya nandayew ed si Jehova iray matoor ya lingkor to nensaman. Insan tayo pantongtongan so waloran gagawaen tayo natan pian sikatoy nidayew tayo diad paraan ya labay to. Legan tayon pantotongtongan iratan, maabig no usisam so sarilim tan isip mo no anto ni ray kaukolan mon paaligwasen diad panagdayew mo. Diad sampot, pantongtongan tayo met no akin ya makapaliket so dugan panagdayew.

4. Panon ya impanengneng na saray lingkor nen Jehova so respeto tan panangaro da ed sikato antis nin linmay Jesus diad dalin?

⁴ Antis ni ya linmad dalin si Jesus, wala la ray matoor ya lingkor nen Jehova ya angipanengneng ed sikato na respeto tan panangaro —singa si Abel, Noe, Abraham, tan Job. Maunor ira ed Dios, mabiskeg so pananisia ra, tan angiyapay iray bagat ed sikato. Ag-akarekord ed Biblia so amin ya ginawa ra diad impandayew dad si Jehova. Pero segurado tayo ya ginawa ray anggaay nayarian da pian nigalang day Jehova, kanian inawat toy panagdayew da. Kalabas na dakel a taon, inter nen Jehova so Mosaikon Ganggan ed saray apo nen Abraham, saray Israelita. Inter to itan pian naamtaan da no panon so dugan pandayew dad sikato.

5. Antoy agawan pananguman ed dugan panagdayew kayari na impatey tan inkioli nen Jesus?

⁵ Kayari na impatey tan inkioli nen Jesus, aliwa lan say Mosaikon Ganggan so kaukolan ya unoren na saray lingkor nen Jehova. (Roma 10:4) Wala lay balon ganggan parad saray Kristiano, say “ganggan na Kristo.” (Gal. 6:2) Aliwa iyan listaan na dakdakel ya ganggan, kanian aga kaukolan ya i-memorize. Pian naunor tayo so “ganggan na Kristo,” kailangan tayon aligen so alimbawa nen Jesus tan iyaplika iray bangat to. Kanian no labay tayon napaliket si Jehova natan, dapat gawaen tayoy anggaay nayarian tayon aligen si Kristo. No ontan so gawaen tayo, seguradon “nainawaan” tayo tan magmaliw tayon maliket.—Mat. 11:29.

6. Antoy gawaen mo pian talagan minabang ka ed sayan artikulo?

⁶ Legan tayon aaralen so waloran gagawaen tayo natan pian nidayew tayoy Jehova, tepetan moy sarilim, ‘Anto la ray nagagawaan ko ed saya?’ Maabig no itepet mo met, ‘Wala ni kasi nagawaan ko pian mas niiter koy “the best” ko ed si Jehova?’ Makapaliket no isipen mo iray nagagawaan mo la natan parad si Jehova, pero seguradon walan-wala ni ray napaaligwas mo. Kanian ipikasim ed sikato ya tulongan to kan nanengneng iray kaukolan mo nin paaligwasen.

7. Diad Biblia, antoy angikomparaan ed saray impapuson pikakasi tayo, tan antoy epekto to ed si Aman Jehova?

⁷ Dadayewen tayo si Jehova kada no manpipikasi tayo. Ibabaga na Biblia ya saray pikakasi tayo et singa insenso ya imparaan ya maong tan iyaapay nensaman diad tabernakulo tan templo. (Sal. 141:2) Ambalbalingit so angob na insenso tan makapaliket itan ed si Jehova. Saray impapuson pikakasi tayo et “makapaliket” met ed sikato, anggano simpli labat iran salita so uusaren tayo. (Pro. 15:8; Deu. 33:10) Seguradon makakaimis si Aman Jehova kada no misasalamat tayod sikato tan ibabaga tayon inar-aro tayo. Labay to met ya ibaga tayod sikato iray problema tayo, no anto ray pankaukolan tayo, tan anggan saray plano tayod bilay. Anto kasi no antis kan manpikasi et isip mo nin maong no antoy ibagam? No gawaen mo itan, seguradon ambalbalingit ya “insenso” so iyapay mo ed si Aman Jehova.

8. Diad anton paraan ya nibaga tayod arum iray balibalin ugali tan saray makapakelkelaw ya gagawaen nen Jehova?

⁸ Dadayewen tayo si Jehova kada no ibabaga tayod arum iray balibalin ugali to tan saray makapakelkelaw ya gagawaen to. (Sal. 34:1) Dakdakel so makapadinayew ed si Jehova. No dalepdepen tayo so kamaongan to tan amin ya gagawaen to parad sikatayo, seguradon onleppua so pisasalamat ed puso tayo. Kanian agtayo napigilay sarili tayo ya mangirayew ed sikato. Kada no manpupulong tayo, ‘mangiyaapay tayo ed Dios na bagat a panangidayew, say bunga na saray bibil tayo.’ (Heb. 13:15) Naaralan tayo nen niman ya kailangan tayon iparaan ya maong so ibaga tayo antis tayon manpikasi. Ontan met ed panagpulong. Maabig no iparaan tayon maong so ibaga tayo. Nepeg ya nalikna na saray napupulongan tayo ya kombinsido  tayo ed saray katuaan ya ibabaga tayod sikara. On, labay tayon ‘the best’ so “bagat” ya iiter tayo ed si Jehova.

9. Singa saray Israelita nensaman, anto ran bendisyon so awaten tayo no oonla tayod saray pantitipon? Antoy epekto ed sika na saray aral tayo?

⁹ Dadayewen tayo si Jehova kada no mimiaral tayo. Oniay ingganggan nen Jehova ed saray Israelita nensaman: “Mamitlo ed sakey taon ya onarap ed si Jehova a Dios mo iray amin a lalaki ed sikayo diad pasen a pilien to.” (Deu. 16:16) Pian naunor da itan ya ganggan, kaukolan dan taynanan ya magano so abung da tan saray tanem da. Pero anggapoy nepeg dan panaburidoan ta oniay impaseguro nen Jehova ed sikara: “Anggapoy manpirawat a manamsam ed dalin mo legan kan ontatatdang pian onarap ed si Jehova a Dios mo.” (Exo. 34:24) Lapud mabiskeg so pananisia na saray Israelita, aatendian da iray tinaon ya piesta. Sulit so amin ya sakripisyo da ta dakel ya bendisyon so naawat da—lalon onaaralem so pakatalos da ed Ganggan na Dios, walay pagkakataon dan dalepdepen so amin ya kamaongan to, tan malikeliket dan nakaiba iray arum nin matoor ya lingkor nen Jehova. (Deu. 16:15) Awaten tayo met iratan ya bendisyon natan no lanang tayon mimiaral anggano wala ray kaukolan tayon isakripisyo no maminsan. Seguradon naliliketan si Jehova ed sikatayo, lalo la no walay imparaan tayo ya antikey tan makapaseseg ya komento.

10. Panon kaimportante so pangansion na panangirayew ed si Jehova?

¹⁰ Dadayewen tayo si Jehova kada no mangakansion tayo kaiba iray agagi. (Sal. 28:7) Nensaman, importantin maong ed saray Israelita so pangansion na panangirayew ed si Jehova. Diad tua, 288 ya Levita so inyasain nen Arin David bilang managkansion diad templo. (1 Awa. 25:1, 6-8) Ontan met natan, nibabalikas tayoy panangaro tayo ed si Jehova kada no kakansionan tayo na panangirayew. Pero ompan isipen mo, ‘Panon to balet ey ta aliwan marakep so boses ko?’ Tandaan tayo ya aliwan say karakep na boses so pampopokusan nen Jehova. Di ba, ibabaga na Biblia ya ‘amin tayo et nalilingo ed panagsalita’ tayo? Pero manpupulong tayo nin siansia tan mankokomento tayod aral, anggano amta tayon nalilingo tayo no maminsan. (Sant. 3:2) Ontan met ed panagkansion. Anggano nalingo tayo ed tono tan aliwan onman karakep so boses tayo, impapuso tayo nin siansia ya kansionan na panangirayew si Jehova.

11. Base ed Salmo 48:13, akin et nepeg ya walay eskedyul tayo ya manaral na Biblia bilang pamilya?

¹¹ Dadayewen tayo si Jehova kada no aaralen tayoy Salita to tan ibabangat tayoy ananak tayo tungkol ed sikato. No agew na Sabaton, agmankikimey iray Israelita kanian pagkakataon da iman pian pabiskegen so espiritualidad da. (Exo. 31:16, 17) Ibabangat na saray matoor ya Israelita iray ananak da tungkol ed si Jehova tan iistoryaen day amin ya kamaongan tod sikara. Ontan met so nepeg tayon gawaen natan. Dapat walay eskedyul tayon basaen tan aralen so Biblia. Tandaan tayo ya parte itan na panagdayew tayo. Kaukolan itan pian mas nakabkabat tayoy Jehova tan mas onasingger so liknaan tayod sikato. (Sal. 73:28) Tan no walay eskedyul tayo met ya manaral bilang pamilya, tutulongan tayo so ontumbok iran henerasyon—saray ananak tayo—ya nakaaro da met si Aman Jehova.—Basaen so Salmo 48:13.

12. Panon ya indeskribe na Biblia so impanggawa na tabernakulo tan saray kagawaan ditan, tan antoy naaralan tayo ed satan?

¹² Dadayewen tayo si Jehova kada no mitutulongan tayo ed panagpaalagey tan panagmintina na saray pasen ya uusaren tayo ed  panagdayew. Ibabaga na Biblia ya say impanggawa na tabernakulo tan saray kagawaan ditan et “masanton kimey.” (Exo. 36:1, 4) Ontan met natan. Diad pakanengneng nen Jehova, sagradon serbisyo so panagpaalagey na saray Kingdom Hall tan arum nin pasilidad na organisasyon tayo. Wala ray brother tan sister ya baleg so nitutulong da diad panagpaalagey tan panagmintina na saratan. Misalsalamat tayon maong ed sakripisyo na sarayan agagi! Siempre, agda met papaulyanan so kimey ya panagpulong. Say arum ni ingen ed sikara et labay day man-regular payunir. Kanian no man-aplay iran payunir, agdapat manaalangan iray elder ya irekomenda irayan agagi no kualipikado met ira. Tandaan, anggano anggapoy skill tayo ed construction, amin tayo et makapitulongan pian mansiansian malinis tan presentabli iray Kingdom Hall tan arum nin pasilidad tayo.

13. Antoy nepeg tayon tandaan kada no mandonasyon tayo parad kimey na Panarian?

¹³ Dadayewen tayo si Jehova kada no mandodonasyon tayo parad kimey na Panarian. No oonlad tinaon ya piesta iray Israelita nensaman, amta da ya ag-ira nepeg ya “onarap a kalimalima ed si Jehova.” (Deu. 16:16) Walan-walay awit da ya regalo parad si Jehova depende ed situasyon dad bilay. Sakey itan ya paraan pian nipanengneng da ya misalsalamat ira ed amin ya kamaongan tod sikara. Diad panaon tayo met natan ey, panon tayon nipalikna ed si Jehova ya inar-aro tayo tan misalsalamat tayod sikato? Say sakey ya paraan et no mandonasyon tayo parad saray gagastosen na kongregasyon tayo tan parad sankamundoan ya kimey, depende ed no antoy sarag tayon iter. Balibali may imbaga nen apostol Pablo tungkol ed saya: “No say sakey et akaparaan a mangiter, nagkalalo lan makapaliket no gawaen to itan unong ed no antoy walad sikato, aliwan unong ed no antoy anggapod sikato.” (2 Cor. 8:4, 12) On, papablien nen Jehova iray donasyon tayo no mabulbulos tayo itan ya iter, anggano say pakalikna tayo et melmelag itan.—Mar. 12:42-44; 2 Cor. 9:7.

14. Base ed Proverbio 19:17, antoy singa gagawaen tayo kada no tutulongan tayo iray agagin mankaukolan?

¹⁴ Dadayewen tayo si Jehova kada no tutulongan tayo iray agagi ya mankaukolan. Insipan nen Jehova ed saray Israelita nensaman ya bendisyonan to ira no tulongan da ray mairap-bilay. (Deu. 15:7, 10) Diad tua, singa tayo reregaloan si Jehova kada no ontutulong tayo ed sakey ya agin mankaukolan. (Basaen so Proverbio 19:17.) Singa bilang, nen apriso si Pablo, angipawit na regalo ed sikato iray agagi ya taga Filipos tan imbaga to ya sakey itan ya “naabobonan a bagat, a makapaliket ed Dios.” (Fil. 4:18) Kanian tepetan moy sarilim, ‘Siopa kasi ed saray kakongregasyon ko so natulongan ko?’ Seguradon makakaimis si Aman Jehova kada no nanengneng to ya uusaren moy oras, biskeg, abilidad, tan kuartam pian tulongan so arum. Tandaan tayo ya parte itan na panagdayew tayo.—Sant. 1:27.

15. Akin et aliwan makapabelat so panagdayew ed si Jehova anggano kaukolan tayoy mansakripisyo tan iter so panaon tayo ed sikato?

¹⁵ Pian nidayew tayoy Aman Jehova diad paraan ya labay to, kaukolan tayoy mansakripisyo tan iter tayod sikato so panaon tayo. Pero ag-itan makapabelat. (1 Juan 5:3) Akin ey? On ta inar-aro tayoy Aman Jehova. Isip mo pay melag ya ugaw ya labay ton regaloan si papa to kanian nandrowing. Anggano piga-pigaran oras ya mandrowing, ayos labat ed sikato ta inar-aro toy papa to tan talagan labalabay ton regaloan. Ontan met ed panagdayew tayo ed si Jehova. Lapud inar-aro tayo, maliket tayo ya  mansakripisyo tan usaren so oras tayo parad dugan panagdayew.

16. Base ed Hebreo 6:10, antoy papablien nen Jehova ed kada lingkor to?

¹⁶ Amta na maaron atateng ya aliwan parepareho so regalo ya niiter na ananak da, tan amta da ya nandurumay abilidad da. Ontan ya ontan si Aman Jehova. Amta to ya nandurumay situasyon na kada lingkor to. Ompan mas dakel so nagagawaan mo nen say arum ya agagi. Odino medyo abawasan la ta ontatatken ka la, onkakapuy lay laman mo, o naaruman so responsabilidad mod pamilyam. Agka komon nadidismaya ed sarilim. (Gal. 6:4) Tandaan mo ya agbalot lingwanan nen Jehova so amin ya ginawam parad sikato. Napapaliket moy Dios basta iter moy ‘the best’ mo tan dugay motibom. (Basaen so Hebreo 6:10.) Diad tua, nababasa toy pusom kanian amta to no anto ray labay mon gawaen tan no anton talagay sarag mo labat ya iter. Say importante ed sikato et panliliketan moy panlilingkor mo.

17. (a) Antoy gawaen mo no naiirapan ka ed arum ya parte na panagdayew tayo? (b) Manpili na sakey ya litrato ed kahon ya “ Labay Mo ni Mas Onliket?” tan ibagam no antoy epekto tod sika kada no gagawaen mo itan.

¹⁷ Panon to no mairap mon gawaen so arum ed saray apantongtongan tayo, singa say pam-personal study o pampulong? Diad tua, no mas mabetbet mon gawaen iraya, diman mo mas na-enjoy tan nalikas moy maabig ya epekto tod sika. Singa met itan panag-exercise o panaral na gitara. No mataltalag mon gawaen, ngalngali anggapoy nanengneng mon resulta. Pero no inagew-agew kan man-exercise, nalikas moy maong ya epekto ed laman mo tan anap-anapen mo la. No inagew-agew ka met ya manpraktis ya man-gitara, man-improve ka tan mas ganado ka lan mantogtog. Pero siempre, gawaen mo itan ya sandaraiset, aliwan biglaan. Ontan ya ontan met so gawaen tayo pian na-enjoy tayoy mandayew ed si Jehova.

18. Antoy sankaimportantian ya nagawaan tayo ed bilay tayo, tan antoy resulta no gawaen tayo itan?

¹⁸ Say interon-puso ya pandayew ed si Jehova so sankaimportantian ya nagawaan tayo ed bilay tayo. No gawaen tayo itan, nalikna tayoy tuan liket tan walay ilalo tayon manbilay ya andi-anggaan. (Pro. 10:22) Pero diad tua, natan ni labat et tutulongan ka la nen Jehova pian nasarag mo ray subok tan ondeen so nonot mo anggano wala ray problemam. (Isa. 41:9, 10) On, dakdakel so rason tayon manliket legan tayon dadayewen so maar-aron Ama tayo, si Jehova—say Dios ya karapat-dapat ya “mangawat na gloria tan galang”!—Apo. 4:11.